Tag international news

(ایمرا نیوزآن لائن) افغان طالبان نے امن معاہدے کے لیے امریکا کے ساتھ مذاکرات دوبارہ شروع ہونے کی تصدیق کردی۔

امریکی صدر ڈونلڈ ٹرمپ نے رواں برس ستمبر میں گزشتہ ایک سال سے جاری مذاکرات معاہدے پر دستخط ہونے سے قبل منسوخ کر دیئے تھے۔ امریکا اور افغان طالبان کی جانب سے ایک دوسرے کے قیدیوں کی رہائی کے بعد امریکی صدر نے طالبان کے ساتھ مذاکرات کے دوبارہ آغاز کا اشارہ دیا تھا جس کے بعد امریکا کے نمائندہ خصوصی برائے افغان امن عمل زلمے خلیل زاد نے افغانستان کا دورہ کیا اور پھر وہ وہاں سے قطر پہنچے۔

قطر میں طالبان کے سیاسی دفتر کے ترجمان سہیل شاہین نے امریکا کے ساتھ مذاکرات کے دوبارہ آغاز کی تصدیق کرتے ہوئے بتایا ہے کہ امریکا کے ساتھ مذاکرات 7 ستمبر کو شروع ہوئے تھے جو آج بھی جاری رہیں گے۔ افغان میڈیا کے مطابق مذاکرات کے پہلے روز فریقین کے درمیان 4 گھنٹے کی طویل تشست ہوئی جس میں تشدد میں کمی لانے، انٹرا افغان مذاکرات اور جنگ بندی پر گفتگو ہوئی۔

(ایمرا نیوزآن لائن) امریکی صدر ڈونلڈ ٹرمپ نے عالمی بینک سے چین کو قرضوں کی فراہمی روکنےکا مطالبہ کر دیا۔

امریکا اور چین کے درمیان معاشی جنگ جاری ہے جس کے نتیجے میں دونوں ممالک ایک دوسرے کی اشیاء پر بھاری بھرکم ٹیکسز عائد کر رہے ہیں۔ دوسری جانب عالمی بینک نےکم شرح سود پر چین کے لیے ایک سے ڈیڑھ ارب ڈالر امداد کا پلان اپنایا ہے۔

عالمی بینک کے اس پلان پر ردعمل ظاہر کرتے ہوئے امریکی صدر نے عالمی بینک سے کہا ہے کہ چین کو قرضہ کیوں دیا جا رہا ہے، چین کے پاس بڑی تعداد میں رقم موجود ہے۔ ڈونلڈ ٹرمپ نے مزید کہا کہ اگر چین کے پاس رقم نہ بھی ہو تو وہ اسے پیدا کر سکتا ہے، عالمی بینک چین کو قرضوں کی فراہمی روکے۔

سری نگر(ایمرا نیوزآن لائن) مقبوضہ کشمیر میں قابض بھارت کی جانب سے عائد کرفیو کو 4 ماہ سے زائدعرصہ ہو چکا ہے اور وادی میں لاک ڈاؤن کے سبب معیشت کو 15ہزار کروڑ روپے کا نقصان ہو چکا ہے۔

کشمیر میڈیا سروس کے مطابق بھارتی حکومت کی بربریت کے خلاف بڈگام، گاندربل، پلوامہ، کلگام، شوپیاں، بانڈی پورہ،کپواڑہ سمیت دیگر علاقوں میں مظاہرے جاری ہیں۔ مظاہرین کو کو روکنے کے لیے بھارتی فورسز طاقت کا استعمال کر رہی ہے جس سے متعدد کشمیری زخمی ہو گئے ہیں۔ 125 روز سے جاری کرفیو اور پابندیوں کے باعث مقبوضہ وادی میں نظام زندگی مفلوج ہے، تعلیمی ادارے، دکانیں، کاروباری مراکز بند جب کہ سڑکوں پر ٹرانسپورٹ اب بھی غائب ہے۔

ان سب کے علاوہ انٹرنیٹ، موبائل فون اور لینڈ لائن سروس بھی تاحال بند ہے جب کہ حریت رہنما اور مقامی سیاسی قیادت سمیت 11 ہزار کشمیری گرفتار ہیں۔ کشمیر میڈیا سروس کے مطابق مسلسل 4 ماہ سے زائد کرفیو کے باعث مقبوضہ کشمیر کی معیشت کو 15 ہزار کروڑ روپے کا نقصان ہو چکا ہے۔ رپورٹ کے مطابق مقبوضہ وادی میں مسلسل 18ویں ہفتے جمعہ کی نماز پر بھی پابندی برقرار رہی۔

بھارت نے 5 اگست کو راجیہ سبھا میں کشمیر کی خصوصی حیثیت ختم کرنے کا بل پیش کرنے سے قبل ہی صدارتی حکم نامے کے ذریعے کشمیر کی خصوصی حیثیت ختم کردی اور ساتھ ساتھ مقبوضہ کشمیر کو وفاق کے زیرِ انتظام دو حصوں یعنی (UNION TERRITORIES) میں تقسیم کردیا جس کے تحت پہلا حصہ لداخ جبکہ دوسرا جموں اور کشمیر پر مشتمل ہوگا۔ بھارت نے یہ دونوں بل لوک سبھا سے بھی بھاری اکثریت کے ساتھ منظور کرالیے ہیں۔

آرٹیکل 370 کیا ہے؟ بھارتی آئین کا آرٹیکل 370 مقبوضہ کشمیر میں خصوصی اختیارات سے متعلق ہے۔ آرٹیکل 370 ریاست مقبوضہ کشمیر کو اپنا آئین بنانے، اسے برقرار رکھنے، اپنا پرچم رکھنے اور دفاع، خارجہ و مواصلات کے علاوہ تمام معاملات میں آزادی دیتا ہے۔ بھارتی آئین کی جو دفعات و قوانین دیگر ریاستوں پر لاگو ہوتے ہیں وہ اس دفعہ کے تحت ریاست مقبوضہ کشمیر پر نافذ نہیں کیے جا سکتے۔ بھارتی آئین کے آرٹیکل 370 کے تحت کسی بھی دوسری ریاست کا شہری مقبوضہ کشمیر کا شہری نہیں بن سکتا اور نہ ہی وادی میں جگہ خرید سکتا ہے۔

(ایمرا نیوزآن لائن) دنیا میں اب تک کوئی ایسی کار متعارف نہیں کرائی گئی ہے جو کہ زمین پر چلنے کے ساتھ ہوا میں بھی اُڑنے کی صلاحیت رکھتی ہو۔

امریکی ریاست فلوریڈا میں حال ہی میں دنیا کی پہلی زمین پر چلنے کے ساتھ ہوا میں اُڑنے والی ’Fly And Drive Car‘ نمائش کے لیے پیش کی گئی ہے۔

اس کار کا نام ’پائنیر پرسنل ائیر لینڈنگ وہیکل‘ رکھا گیا ہے جسے ’ Pal-V‘ بھی کہا جا سکتا ہے، جدید ٹیکنالوجی کے طرز پر بنائی جانے والی یہ کار ریٹریکٹ ایبل ہیڈ اور ریئر پروپیلرز سے لیس ہے جو آسمان پر 12 ہزار 500 فٹ کی بلندی پر اُڑان بھر سکتی ہے۔ اس کار میں آٹو موبائل میں استعمال کیا جانے والا فیول ہی استعمال ہوگا اوریہ کار ہوا میں 200 میل فی گھنٹہ کی رفتار اور زمین پر 100 میل فی گھنٹہ کی رفتار سے دوڑنے کی صلاحیت ہے۔

ڈچ کمپنی کی جانب سے بنائے جانے والی اس گاڑی کی قیمت 5 لاکھ 99 ہزار ڈالرز ہے جسے 2021 میں فروخت کے لیے پیش کرنے کی توقع کی جا رہی ہے۔ اس گاڑی میں 2 افراد کے بیٹھے کی گنجائش ہے اور یہ 3 پہیے والی گاڑی سے گائروکاپٹر میں صرف 10 منٹ میں تبدیل ہو جاتی ہے۔

واضح رہے کہ اس سے قبل بھی گاڑیاں بنانے والی سویڈن کی نامور کمپنی ‘وولو’ کی ذیلی کمپنی ‘گیلے’ نے زمین پر چلنے اور فضا میں اڑنے والی گاڑی 2019 تک مارکیٹ میں پیش کرنے کا اعلان کیا تھا۔ اس کار کار کے تہ ہونے والے دونوں پروں پر الیکٹرک موٹر لگائی گئی ہیں جو اسے اڑنے میں مدد دیتی ہے۔

(ایمرا نیوزآن لائن) بھارت میں ایک اور ہولناک اور انسانیت سوز واقعہ پیش آیا ہے جہاں ایک لڑکی کو اجتماعی زیادتی کا نشانہ بنانے کے بعدقتل کرکے لاش جلادی گئی۔

فرانسیسی خبر رساں ایجنسی کے مطابق یہ واقعہ شمالی بھارتی ریاست بہار کے علاقے بکسر میں پیش آیا۔ واقعے کے بعد بھارتی عوام میں شدید غصہ پایا جاتا ہے اور ملک کے مختلف علاقوں میں اس مذموم واقعے کے خلاف احتجاج کیا جارہا ہے۔

مقامی پولیس کے مطابق مقتولہ لڑکی ‘جس کی شناخت اور عمر ظاہر نہیں کی گئی’ کو نامعلوم ملزمان نے اجتماعی زیادتی کا نشانہ بنایا اور اس کے سرمیں گولی مار کر قتل کرنے کے بعد اس کی لاش کو جلادیا اور اسے بکسر میں ہی ایک ویران علاقے میں دفن کردیا۔

مقامی پولیس افسر کے مطابق لڑکی بہار کے علاقے بکسر کی رہائشی اور گذشتہ روز سے لاپتہ تھی، لاش کی میڈیکل رپورٹ کا انتظار کیا جارہا ہے جس کے بعد تحقیقات آگے بڑھائی جائیں گی۔ واضح رہے کہ گذشتہ ہفتے بھی بھارتی شہر حیدرآباد سے ایک 27 سالہ ویٹرنری ڈاکٹر کی جلی ہوئی لاش برآمد ہوئی تھی جسے اجتماعی زیادتی کے بعد قتل کردیا گیا تھا۔

واقعے کے بعد بھارت بھر میں احتجاج کیا جارہا تھا جس میں مظاہرین کا مطالبہ تھا کہ ریپ کے ملزمان کو بلا کسی تاخیر کے فوری سزائیں دی جائیں کہ بہار میں یہ ایک اور واقعہ پیش آگیا۔ واضح رہے کہ حکومت کی حالیہ عرصے کے دوران کوششوں کے باجود بھارت میں پیچیدہ قوانین کی وجہ سے مقدمات کے فیصلے ہونے میں برسوں لگ جاتے ہیں۔

بھارت میں اجتماعی زیادتی کے بعد خواتین کو قتل کرنے کے واقعات آئے روز پیش آتے رہتے ہیں اور اس حوالے سے بھارت کا شمار بدترین ممالک میں ہوتا ہے۔ بھارتی حکام کی اپنی رپورٹ کے مطابق صرف 2017 میں 33 ہزار سے زائد خواتین کو زیادتی کا نشانہ بنایا گیا۔

بھارتی جنونی ملزمان کی جانب سے ان کی حوس کا نشانہ اکثر اوقات غیر ملکی خواتین سیاح بھی بنتی ہیں اور متعد د بار غیر ملکی خواتین سیاحوں کو بھارت میں جنسی زیادتی کا نشانہ بنایا جاچکا ہے۔

یہی وجہ ہے کہ بھارت کا شمار خواتین سیاحوں کے لیے غیر محفوظ ممالک میں ہوتا ہے اور گذشتہ سال عالمی ماہرین کی رائے پر مشتمل ایک سروے میں جنسی زیادتی کے واقعات کی بناء پر بھارت کو خواتین کے لیے سب سے زیادہ خطرناک ملک قرار دے دیا گیا تھا۔

(میڈیامیڈیا 92نیوزآن لائن) فلپائن کے دارالحکومت منیلا میں خطرناک ترین سمندری طوفان ’کموری‘ نے تباہی مچا دی جب کہ شدید بارش اور طوفانی ہواؤں کی وجہ سے ملک کا سب سے بڑا ائیر پورٹ بھی بند کر دیا گیا۔

امریکی نشریاتی ادارے سی این این کے مطابق سمندری طوفان کمور فلپائن کے جنوب مشرق میں واقع سب سے زیادہ آبادی والے جزیرے لوزون سے ٹکرایا۔ 215 کلو میٹر فی گھنٹہ کی تیز رفتار سے ٹکرانے والے اس طوفان کی شدت بحر اقیانوس میں اٹھنے والے کیٹیگری میں فور کے سمندری طوفان کے برابر تھی۔

رپورٹ کے مطابق سمندری طوفان اور تیز بارشوں کے باعث مقامی افراد کی نظام زندگی درہم برہم ہوگئی جب کہ 2 لاکھ سے زائد افراد بے گھر ہوگئے جنہیں حفاظتی کیمپوں میں منتقل کر دیا گیا۔

طوفان کی وجہ سے سمندر ی لہریں بلند ہونے کے سبب متاثرہ علاقوں میں تعلیمی مراکز ، مارکٹس اور دفاتر بند کردیے گئے جب کہ حکام نے ملک کا سب سے بڑا انٹرنیشنل ائیرپورٹ بھی 12 گھنٹوں کے لیے بند کر دیا جس کے باعث 100 سے زائد پروازیں منسوخ کر دی گئیں۔

رپورٹس کے مطابق طوفان کموری فلپائن سے ٹکرانے والا اس سال کا 20 واں طوفان ہے جب کہ زمین سے ٹکرانے کے بعد اکثر طوفانوں کی شدت کم ہو جاتی ہے تاہم اس طوفان کی شدت اب بھی برقرار ہے۔ حکام کا کہنا ہے کہ کموری طوفان کی شدت کم ہونے میں ابھی کچھ وقت لگے گا۔ دوسری جانب منیلا میں ہونے والی جنوبی مشرقی ایشین گیمز 2019 کا شیڈول بھی سمندری طوفان کے باعث دوبارہ ترتیب دیا جائے گا۔

(ایمرا نیوزآن لائن) شمالی افریقی ملک تیونس میں سیاحوں سے بھری بس کھائی میں گر گئی جس کے نتیجے میں 24 مسافر ہلاک اور متعدد زخمی ہو گئے۔

حکومتی ترجمان کے مطابق حادثے کا شکار ہونے والی بس کے مسافر ملک کے مغربی حصے میں گھومنے پھرنے کی غرض سے سفر کر رہے تھے کہ اس دوران ان کی بس کو حادثہ پیش آگیا۔ حکام نے مزید بتایا کہ مسافر بس کا ڈرائیور تیز رفتاری کے باعث موڑ کاٹنے میں ناکام رہا اور بس گہری کھائی میں جا کر تباہ ہوگئی۔ تیونس کی وزارت داخلہ کے حکام کا کہنا ہے کہ حادثے کا شکار ہونے والی بس میں 43 افراد سوار تھے۔

وزارت صحت کے ترجمان چوکری نافطی نے بتایا کہ اس حادثے میں 24 افراد ہلاک اور 18 زخمی ہوئے جن میں سے کچھ کو قریبی اسپتال منتقل کیا گیا ہے جب کہ شدید زخمیوں کو تیونس کے خصوصی اسپتالوں میں منتقل کر دیا گیا ہے۔

واضح رہے کہ عین دراہم تونیسیا کا ایک خوبصورت سیاحتی مقام ہے جو الجیریا کی سرحد پر پہاڑی سلسلوں کی وجہ سے مشہور ہے، عین دراہم کرومیری پہاڑوں میں سے ایک دجبل بیر کی ڈھلوان پر 800 میٹرکی اونچائی پر واقع ہے۔

ترک وزیر خارجہ میولت چووشولو نے فرانسیسی صدر پر ایمانوئل میکرون پر دہشت گردوں کی معاونت کا الزام عائد کیا ہے۔

برطانوی میڈیا کے مطابق فرانسیسی صدر نے گزشتہ ماہ پیرس میں ایس ڈی ایف کی ترجمان سے مذاکرات کیے تھے جس پر ترکی نے ناراضی کا اظہار کیا تھا کیونکہ ترکی ایس ڈی ایف کو کردش ملیشیا وائے پی جی کا حصہ سمجھتا ہے اور اسے دہشت گرد تنظیم قرار دیتا ہے۔

ترک وزیر خارجہ میولت چووشولو کا صحافیوں سے گفتگو کرتے ہوئے کہنا تھا کہ فرانسیسی صدر پہلے ہی دہشت گرد تنظیم کو اسپانسر کر رہے ہیں اور مستقل بنیادوں پر ان کی میزبانی کر رہے ہیں، اگر وہ دہشت گردوں کو اپنا اتحادی مانتے ہیں تو پھر میں اس پر کچھ نہیں کہہ سکتا۔

ترک وزیر خارجہ نے پارلیمنٹ میں صحافیوں سے گفتگو کرتے ہوئے کہا کہ ابھی یورپ میں ایک خلا ہے اور فرانسیسی صدر یورپ کے لیڈر بننا چاہتے ہیں لیکن لیڈر ہمیشہ قدرتی طور پر بنتے ہیں۔ دوسری جانب نیٹو سمٹ سے خطاب کرتے ہوئے فرانس کے صدر ایمانوئل میکرون کا کہنا تھا کہ شمال مشرقی شام میں آپریشن کے بعد ترکی نیٹو سے یکجہتی کی توقع نہیں رکھ سکتا۔

خیال رہے کہ ترکی اور فرانس کے تعلقات گزشتہ کئی ماہ سے کشیدگی کا شکار ہیں اور فرانسیسی صدر کی ایس ڈی ایف ترجمان سے ملاقات پر ترک وزیر خارجہ کے ردعمل نے دونوں ممالک کے تعلقات کو مزید خراب کر دیا ہے۔

ارجنٹینا(ایمرا نیوزآن لائن) کے دارالحکومت بیونس آئرس کے ساحل سینٹا ٹیریسیتا پر سیاحوں کی سیلفیوں نے ڈولفن کے بچے کی جان لے لی۔

وائلڈ لائف فاؤنڈیشن کے مطابق ساحلِ سمندر پر سیاحوں نے ڈولفن کے بچے کو سیلفی لینے کے لیے سمندر سے باہر نکالا۔ حکام کے مطابق سیاحوں نے ڈولفن کے بچے کو پانی سے نکال اسے ہاتھوں میں اوپر اٹھا رکھا تھا اور سیلفی لینے کے بعد اسے ایک سے دوسرے کے ہاتھ میں دیا جا رہا تھا کہ اسی دوران ڈولفن کے بچے نے دم توڑ دیا۔

انہوں نے مزید بتایا کہ فرانسیشین ڈولفن کی یہ نسل پہلے ہی معدومیت کے خطرے سے دوچار ہے کیونکہ یہ دوسری ڈولفن کی طرح پانی سے باہر آکر زندہ نہیں رہ سکتیں، ان کی جلد بے حد موٹی اور چکنی ہوتی ہے۔

ترجمان نے مزید کہا کہ ساحلِ سمندر پر آنے والے ایک سیاح نے اس ڈولفن کے بچے کو پانی سے نکال کر اپنی سیلفیوں کی خاطر اس سے اس کی زندگی چھین لی، ڈولفن کے بچے کو ایک کھلونا سمجھا جا رہا تھا۔ انہوں نے بتایا کہ اس نسل کی ڈولفن دنیا میں صرف 30 ہزار کے قریب باقی رہ گئی ہیں۔

مقبوضہ کشمر(ایمرا نیوزآن لائن) میں قابض بھارتی فوج کی جارحیت کا سلسلہ جاری ہے، جھوٹے مقدمات میں 6 حریت پسندوں کی جائیدادیں ضبط کرلی گئیں جبکہ حزب اختلاف کی شدید مخالفت کے باوجود مقبوضہ وادی میں سڑکوں اور سرکاری محکموں کے نام تبدیل کرنا شروع کردیے گئے ہیں۔

قابض بھارتی حکومت کے شٹ ڈاؤن سے مقبوضہ کشمیر میں تجارتی سرگرمیاں بدحالی کا شکار ہیں،5 اگست سے جاری پابندیوں کے باعث اب تک وادی میں 1 ارب ڈالر سے زائد کا نقصان ہوچکا ہے، مقبوضہ وادی میں 108 ویں روز بھی لاک ڈاؤن برقرار ہے۔ مقبوضہ کشمیر کی چیمبر آف کامرس اینڈ انڈسٹری کے مطابق مقبوضہ کشمیر میں مسلسل شٹ ڈاؤن سے 1 ارب ڈالر سے زائد کا نقصان ہو چکا ہے۔ تجارتی تنظیم نے بھارتی حکومت کیخلاف نقصانات پر مقدمہ کرنے کا بھی عندیہ دیا ہے۔

’شیرِکشمیر کرکٹ اسٹیڈیم اب سردار ولبھ بھائی پٹیل اسٹیڈیم کہلائے گا‘: دوسری جانب بھارتی ادارے انفورسمنٹ ڈائریکٹوریٹ نے جھوٹے مقدمات میں سید صلاح الدین سمیت 6 حریت پسندوں کی 7 جائیدادیں ضبط کرلی ہیں۔ بھارت کی ڈھٹائی: مقبوضہ کشمیر میں صورتحال کو نارمل قرار دے دیا علاوہ ازیں حزب اختلاف کی شدید مخالفت کے باوجود حکمران جماعت بھارےی جنتا پارٹی (بی جے پی) نے مقبوضہ کشمیر میں سڑکوں اور سرکاری محکموں کے نام تبدیل کرنا شروع کردیے ہیں۔

کشمیر میڈیا سروس کی رپورٹ کے مطابق کشمیر کے محکمہ پانی کا نام جل شکتی محکمہ کردیا گیا جبکہ چنانی ناشری ٹنل کا نیا نام ہندوتوا نظریے کے حامل شیاما پرساد مکھرجی کے نام پر کردیا گیا ہے۔ اس کے علاوہ شیرِکشمیر کرکٹ اسٹیڈیم کو اب سردار ولبھ بھائی پٹیل اسٹیڈیم کے نام سے پکارا جائے گا۔

بھارت نے 5 اگست کو راجیہ سبھا میں کشمیر کی خصوصی حیثیت ختم کرنے کا بل پیش کرنے سے قبل ہی صدارتی حکم نامے کے ذریعے کشمیر کی خصوصی حیثیت ختم کردی اور ساتھ ساتھ مقبوضہ کشمیر کو وفاق کے زیرِ انتظام دو حصوں یعنی (UNION TERRITORIES) میں تقسیم کردیا جس کے تحت پہلا حصہ لداخ جبکہ دوسرا جموں اور کشمیر پر مشتمل ہوگا۔ بھارت نے یہ دونوں بل لوک سبھا سے بھی بھاری اکثریت کے ساتھ منظور کرالیے ہیں۔

آرٹیکل 370 کیا ہے؟: بھارتی آئین کا آرٹیکل 370 مقبوضہ کشمیر میں خصوصی اختیارات سے متعلق ہے۔ آرٹیکل 370 ریاست مقبوضہ کشمیر کو اپنا آئین بنانے، اسے برقرار رکھنے، اپنا پرچم رکھنے اور دفاع، خارجہ و مواصلات کے علاوہ تمام معاملات میں آزادی دیتا ہے۔ بھارتی آئین کی جو دفعات و قوانین دیگر ریاستوں پر لاگو ہوتے ہیں وہ اس دفعہ کے تحت ریاست مقبوضہ کشمیر پر نافذ نہیں کیے جا سکتے۔

بھارتی آئین کے آرٹیکل 370 کے تحت کسی بھی دوسری ریاست کا شہری مقبوضہ کشمیر کا شہری نہیں بن سکتا اور نہ ہی وادی میں جگہ خرید سکتا ہے۔ بھارت نے آرٹیکل 370 کو ختم کرنے سے قبل ہی مقبوضہ کشمیر میں اضافی فوجی دستے تعینات کردیے تھے کیوں کہ اسے معلوم تھا کہ کشمیری اس اقدام کو کبھی قبول نہیں کریں گے۔

اطلاعات کے مطابق مقبوضہ کشمیر میں بھارتی فوجیوں کی تعداد اس وقت 9 لاکھ کے قریب پہنچ چکی ہے۔ کشمیر کی خصوصی حیثیت ختم کرنے کے بعد سے وادی بھر میں کرفیو نافذ ہے، ٹیلی فون، انٹرنیٹ سروسز بند ہیں، کئی بڑے اخبارات بھی شائع نہیں ہورہے۔ بھارتی انتظامیہ نے پورے کشمیر کو چھاؤنی میں تبدیل کررکھا ہے، 7 اگست کو کشمیری شہریوں نے بھارتی اقدامات کیخلاف احتجاج کیا لیکن قابض بھارتی فوجیوں نے نہتے کشمیریوں پر براہ راست فائرنگ، پیلٹ گنز اور آنسو گیس کی شیلنگ کی۔

مقبوضہ وادی میں 3 ماہ سے زائد عرصے سے کرفیو نافذ ہے جس کے باعث اشیائے خوردونوش کی شدید قلت ہے جب کہ مریضوں کے لیے ادویات بھی ناپید ہوچکی ہیں، ریاستی جبر و تشدد کے نتیجے میں متعدد کشمیری شہید اور زخمی ہوچکے ہیں۔