Tag media92tv

اسلام آباد(نیٹ نیوز/ایمرا نیوز) قومی احتساب بیورو (نیب) نے جعلی اکاؤنٹس کیس کی تحقیقات کے لیے مشترکہ تحقیقاتی ٹیم بنانے کا فیصلہ کیا ہے۔جعلی اکاؤنٹس کیس سے متعلق سپریم کورٹ کے فیصلے کا جائزہ لیا گیا،نیب کے اعلامیے کے مطابق قومی احتساب بیورو کے چیئرمین جسٹس ریٹائرڈ جاوید اقبال کی زیر صدارت نیب ہیڈ کوارٹرز میں اعلیٰ سطح کا اجلاس ہوا۔اعلامیے میں کہا گیا ہے کہ اجلاس میں نیب کی جانب سے جعلی اکاؤنٹس کیس کی تحقیقات کے لیے مشترکہ تحقیقاتی ٹیم بنانے کا فیصلہ کیا گیا۔اعلامیے کے مطابق چیئرمین نیب جعلی اکاؤنٹس کیس کی تحقیقات کی براہ راست نگرانی کریں گے، جبکہ مشترکہ تحقیقاتی ٹیم کی سربراہی عرفان نعیم منگی کریں گے۔اعلامیہ میں کہا گیا ہے کہ مشترکہ تحقیقاتی ٹیم نے قانون کے مطابق اپنا کام شروع کر دیا ہے، یہ ٹیم سپریم کورٹ کے فیصلے کی روشنی میں قانون اور ٹھوس شواہد کی بنیاد پر تحقیقات کرے گی۔نیب نے اپنے اعلامیے میں یہ بھی کہا ہے کہ نیب مکمل شفافیت اور میرٹ پر منطقی انجام تک پہنچانے پر یقین رکھتا ہے، میڈیا جعلی اکاؤنٹس کیس سے متعلق قیاس آرائیوں سے گریز کرے۔

لاہور(نیٹ نیوز/ایمرا نیوز) وزیراعلیٰ پنجاب عثمان بزدار نے ساہیوال سانحے میں جے آئی ٹی کو تحقیقات کے لئے مزید وقت دینے سے انکار کردیا اور کہا ہے کہ جے آئی ٹی ٹیم 5 بجے تک حتمی رپورٹ پیش کرے، پوری قوم تحقیقاتی ٹیم کی جانب دیکھ رہی ہے۔واضح رہےجے آئی ٹی نے سانحہ ساہیوال پر اپنی حتمی رپورٹ شام تک دینے سے معذرت کر لی، جے آئی ٹی سربراہ سید اعجاز شاہ کا کہنا ہے کہ اتنے بڑے واقعے کی حتمی رپورٹ آج شام 5 بجے تک دینا ممکن نہیں۔ذرائع کے مطابق وزیراعلیٰ کا کہنا تھا کہ انصاف کی راہ میں تاخیر نہیں چاہتے، تحقیقاتی ٹیم 72 گھنٹے میں سانحہ کی تہہ تک پہنچ سکتی ہے اور شام 5 بجے اجلاس بلا لیا ہے، حتمی رپورٹ کا خود جائزہ لوں گا۔تحقیقاتی رپورٹ کے بعد ذمہ داروں کو قرار واقعی سزا دی جائے گی۔واضح رہے کہ 19 جنوری کی سہہ پہر سی ٹی ڈی نے ساہیوال کے قریب جی ٹی روڈ پر ایک گاڑی پر اندھا دھند فائرنگ کی جس کے نتیجے میں میاں بیوی اور ان کی ایک بیٹی سمیت 4 افراد جاں بحق ہوئے جب کہ کارروائی میں تین بچے بھی زخمی ہوئے۔واقعے کے بعد سی ٹی ڈی کی جانب سے متضاد بیانات کی آمد کا سلسلہ جاری ہے، واقعے کو پہلے بچوں کی بازیابی سے تعبیر کیا بعدازاں ویڈیو منظر عام پر آنے کے بعد مارے جانے والوں میں سے ایک کو دہشت گرد قرار دیا گیا۔

ساہیوال(نیٹ نیوز/ایمرا نیوز) ساہیوال واقعے کی تحقیقات کرنے والی مشترکہ تحقیقاتی ٹیم ( جے آئی ٹی) نے سانحہ ساہیوال پر اپنی حتمی رپورٹ شام تک دینے سے معذرت کر لی، جے آئی ٹی سربراہ سید اعجاز شاہ کا کہنا ہے کہ اتنے بڑے واقعے کی حتمی رپورٹ آج شام 5 بجے تک دینا ممکن نہیں۔جے آئی ٹی سربراہ نے ممبران کے ہمراہ جائے وقوعہ کا دورہ کیا جہاں تین سے چار عینی شاہدین کے بیانات قلمبند کیے گئے۔اس موقع پر میڈیا سے بات کرتے ہوئے جے آئی ٹی سربراہ سید اعجاز شاہ نے کہا کہ واقعے کی ابتدائی رپورٹ دینا بھی ممکن نہیں، سائنٹیفک بنیادوں پر تفتیش کر کے حقائق معلوم کریں گے۔جے آئی ٹی سربراہ کا کہنا تھا کہ جب تک سای چیزیں واضح نہ ہوجائیں اس وقت تک کچھ نہیں کہا جاسکتا، فائرنگ کرنے والے سی ٹی ڈی کے 6 اہلکار حراست میں ہیں جن کے بیانات ریکارڈ کر لیے ہیں اور ابتدائی طور پر ہم شہادتیں اکٹھی کررہے ہیں۔

اسلام آباد (نیٹ نیوز/ایمرا نیوز) سپریم کورٹ آف پاکستان نے کراچی کی معروف سماجی کارکن پروین رحمان کے ورثاء اور ڈائریکٹر اورنگی پائلٹ پراجیکٹ انور ارشد کو دھمکیوں پر از خود نوٹس لے لیا۔سپریم کورٹ میں پروین رحمان قتل کی سماعت جسٹس عظمت سعید شیخ کی سربراہی میں تین رکنی بنچ نے کی۔عدالت نے وفاقی اور صوبائی حکومت کو دھمکی آمیز فون کالز کرنے والوں کا پتہ چلانے کی ہدایت کر دی۔دوران سماعت جسٹس عظمت نے ریمارکس دیئے کہ پروین رحمان کی بہن نے بتایا کہ انہیں اورانور ارشد کو نامعلوم دھمکی آمیز کالز آ رہی ہے ۔ لگتا ہے دھمکیوں کے لیے غیر ملکی فون استعمال ہوا، ہو سکتا ہے کال کرنے والا پاکستانی ہو۔جسٹس عظمت نےوفاقی اور صوبائی حکومتوں کو دھمکی آمیز فون کالز کا پتہ چلانے کا حکم دے دیا۔ایڈیشنل سیکرٹری داخلہ نے عدالت کو بتایاکہ کابینہ نے پروین رحمان قتل کیس کے لیے جے آئی ٹی کی منظوری دے دی،آئندہ چند روز میں جے آئی ٹی کا نوٹیفیکیشن جاری کر دیا جائے گا۔ایڈیشنل سیکرٹری داخلہ ڈاکٹر طارق کے بیان کے بعد عدالت نے کیس کی سماعت دو ہفتوں کے لیے ملتوی کردی ۔واضح رہے کہ اورنگی پائیلٹ پراجیکٹ کی ڈائریکٹر پروین رحمان کو سال 2013 میں کراچی کے علاقے منگھوپیر میں موٹر سائیکل سوار مسلح افراد نے فائرنگ کرکے قتل کیا، جب وہ دفتر سے اپنے گھر واپس جا رہی تھیں۔چوبیس اپریل 2018کو ڈائریکٹر اورنگی پائلٹ پروجیکٹ اور سماجی کارکن پروین رحمان کے قتل کی تحقیقات کیلئے قائم کی گئی مشترکہ تحقیقاتی ٹیم نے اپنی حتمی تحقیقاتی رپورٹ سپریم کورٹ میں جمع کرائی تھی۔

اسلام آباد(نیٹ نیوز/ایمرا نیوز) ممتاز عالمی جریدے ”فارن پالیسی“ نے وزیراعظم عمران خان کو سال 2019ءکے 100 عالمی مفکرین کی فہرست میں شامل کیا ہے۔عالمی جریدے نے وزیراعظم عمران خان کا نام جرمنی کی چانسلر انجیلا مرکل، سابق امریکی صدر بارک اوباما اور ان کی اہلیہ مشل، نیوزی لینڈ کی وزیراعظم جے کینڈا آرڈرن کے ساتھ دنیا کے 100 بڑے عالمی مفکرین کی فہرست میں شامل کیاہے ۔امریکی جریدے کا کہنا ہے کہ عمران خان کو یہ اعزاز ان کی 22 سالہ جدوجہد کے بعد وزیر اعظم کے عہدے پر فائز ہونے پر ملا ہے۔فہرست میں بھارت کے میکش امبانی،علی بابا کے سربراہ جیک ما اور امیزون سی ای او جیف بیزوس کے نام بھی شامل ہیں۔ اس سے قبل ملالہ یوسف زئی سمیت کئی پاکستانی اس فہرست میں شامل ہو چکے ہیں۔جریدے کی مکمل فہرست آج آن لائن جاری کی جائے گی۔

چین(نیٹ نیوز/ایمرا نیوز) چین سے تعلق رکھنے والے Zheng Chunhuiنامی اس آرٹسٹ کو ہی دیکھ لیں جس نے ہزاروں سال پہلے قدیم چینی شہر میں خوشحالی کے ایک منظر سے منصوب چینی پینٹنگ کو چالیس فٹ قدیم درخت کے تنے کو خوبصورتی سے تراش ڈالا۔

Zhengکا یہ ہزاروں سال قدیم شہر کا خوبصورت منظر لئے فن پارہ چین کے صوبے Fujian میں نمائش کیلئے پیش کیا گیا ہے ۔2013اسے فن پارے کو گنیز بک آف ورلڈ ریکارڈ کے اعزاز سے بھی نوازا گیا ہے۔

لندن(نیٹ نیوز/ایمرا نیوز) برطانوی وزیراعظم تھریسامے نے بریگزٹ پر دوسرے ریفرنڈم کا مطالبہ مسترد کر دیا، انہوں نے نو ڈیل بریگزٹ کو خارج از امکان قرار دینے سے بھی انکار کر دیا۔برطانوی وزیراعظم نے شمالی آئرلینڈ کی سرحد کے انتظام پر یورپی یونین سے دوبارہ بات چیت کا اعلان کردیا جبکہ برطانیہ میں قیام کے خواہش مند یورپی شہریوں پر عائد 65 پاؤنڈز فیس ختم کر دی۔بریگزٹ ڈیل مسترد کیے جانے کے بعد تھریسامے نے ایوان میں متبادل منصوبہ پیش کر دیا اور کہا کہ ڈیل کی مخالفت کی اہم ترین وجوہات میں سے ایک شمالی آئرلینڈ اور آئرلینڈ کے درمیان سرحدی انتظام کا معاملہ تھا۔یورپی یونین کے مجوزہ بیک اسٹاپ منصوبے میں تبدیلیوں کے لیے برطانوی وزیراعظم یونین سے دوبارہ مذاکرات کریں گی، جس میں شمالی آئر لینڈ کی اتحادی جماعتوں کی تجاویز بھی شامل کی جائیں گی۔تھریسامے نے کہا کہ وہ ان آپشنز کا جائزہ لے رہی ہیں جو ارکان پارلیمنٹ کی حمایت حاصل کرنے میں مدد گار ہو اور برطانیہ کی سالمیت سے متعلق خدشات بھی دور کیے جاسکیں۔نئے پلان کے تحت برطانوی حکومت نے بریگزٹ کے بعد برطانیہ میں رہنے کے خواہش مند یورپی شہریوں کےلیے 65 پاؤنڈز کی فیس کی شرط ختم کردی ہے، ترمیم شدہ ڈیل پر پارلیمنٹ میں منگل کو ووٹنگ ہوگی۔اپوزیشن لیڈر جریمی کاربن نے پلان بی کو پلان اےکی کاپی قرار دیتے ہوئے کہا ہے کہ ان کی جماعت ایسی ڈیل کی حمایت کرے گی جس میں نو ڈیل بریگزٹ کے تباہ کن عمل سے بچنے کی یقین دہانی شامل ہو۔

بلوچستان میں حب بیلا کراس کے قریب مسافر کوچ اور ٹرک میں تصادم کے نتیجے جھلس کر جاں بحق ہونے والے تمام افراد کی لاشیں کراچی کے علاقے سہراب گوٹھ میں واقعے ایدھی سرد خانے منتقل کردی گئی ہیں جہاں ان کے ڈی این اے کے بعد ورثاء کے حوالے کیا جائے گا۔ذرائع ایدھی ہوم کے مطابق حب بیلا کراس کے قریب کوچ اور ٹرک میں تصادم کے نتیجے جھلس کر جاں بحق ہونے والے 27 افرد کی میتیں ایدھی ہوم لائی گئی ہیں۔سعد ایدھی کے مطابق 26 لاشیں بیلا سے جبکہ ایک کو سول اسپتال کراچی سے یہاں لایا گیا ہے ۔واضح رہے کہ گزشتہ روز مسافر کوچ بیلا کراس کے مقام پر کھڑے ٹرک سے جاٹکرائی، جس سے کوچ اور ٹرک میں آگ لگ گئی، بس میں ڈرائیور، کنڈیکٹر سمیت 33 مسافر سوار تھے، جن میں خواتین اور بچے بھی شامل تھے۔حادثہ میں زخمی ہونے والے4 سول اسپتال کراچی اور 2 بیلہ کے اسپتال میں زیر علاج ہےجن کی حالت تشویش ناک بتائی جاتی ہے۔عینی شاہدین کے مطابق بعض مسافروں نے شعلوں بھری بس سے کود کر اپنی مدد آپ کے تحت جان بچائی ۔پولیس نے حادثے کے نتیجے میں تیزی سے آگ بھڑک اٹھنے سے متعلق تحقیقات شروع کردی ہیں ، جبکہ وزیراعلیٰ بلوچستان نواب جام کمال خان نے واقعہ کا نوٹس لیتے ہوئے رپورٹ طلب کر لی ہے۔

(نیٹ نیوز/ایمرا نیوز) کوئٹہ کے ضلع کچھی کےعلاقے لنڈی کھوسہ میں وبائی امراض پھوٹ پڑے جس کے باعث کئی بچے جلدی امراض کاشکارہوگئے ۔ کوئٹہ میں جلدی وبائی امراض کاشکار ہونے والے بچوں کےچہرےاورجسم پر دانےاورنشان بن گئے، ان امراض کاشکار زیادہ تر بچوں کی عمریں تین سے دس سال تک بتائی جارہی ہیں۔وزیراعلی بلوچستان جام کمال نےلنڈی کھوسہ میں جلدی وبائی امراض کانوٹس لےلیاہے۔وزیر اعلیٰ بلوچستان کے نوٹس پرڈاکٹروں کی ایک ٹیم صورتحال کاجائزہ لینےکےلئے لنڈی کھوسہ پہنچ گئی اور علاج کےلئےمفت طبی کیمپ قائم کر دیئے۔والدین کی بڑی تعداد جلدی امراض کاشکار بچوں کو لےکرمفت طبی کیمپ پہنچ گئی جہاں ڈاکٹروں کی ٹیم نے بچوں کامعائنہ اور علاج شروع کردیا۔

لاہور(نیٹ نیوز/ایمرا نیوز) پنجاب اور سندھ کے مختلف شہروں میں حادثات پیش آئے ہیں جن کے نتیجے میں 4 افراد جاں بحق جبکہ 19 زخمی ہو گئے۔یہ حادثات مظفر گڑھ، جہانیاں، چشتیاں اور نوشہرو فیروز میں دھند کے باعث پیش آئے ہیں۔پنجاب کے شہر مظفر گڑھ میں وین اور ٹرک میں تصادم ہوا ہے جس کے نتیجے میں 2 افراد جاں بحق جبکہ 8 زخمی ہوگئے۔پولیس کے مطابق مظفر گڑھ کے علاقے خدائی بنگلہ کے قریب سڑک پر مسافر وین اور ٹرک میں ٹکر کا واقعہ پیش آیا ہے جس میں جاں بحق ہونے والوں دونوں افراد کی لاشوں اور آٹھوں زخمیوں کو اسپتال منتقل کیا گیا ہے۔ریسکیو ذرائع کا کہنا ہے کہ مظفر گڑھ میں حادثے کا شکار ہونے والی مسافر وین رنگپور سے ملتان جا رہی تھی۔منڈا چوک پر ٹرک اور بس کے درمیان تصادم سے 5افراد زخمی ہوگئے۔چشتیاں میں دھند کے باعث بس کی ٹکر سے موٹر سائیکل سوار چھٹی جماعت کا طالبعلم جاں بحق اور دوسرا طالبعلم زخمی ہو گیا۔جہانیاں میں دھند کے باعث میتلا چوک کے قریب کار دوموٹر سائیکلوں سے ٹکرا گئی جس کے نتیجے میں 4فراد زخمی ہوکر اسپتال پہنچ گئے۔ُنوشہرو فیروز میں پُھل کے قریب ٹریکٹر ٹرالی اور موٹر سائیکل میں تصادم کے نتیجے میں ایک موٹر سائیکل سوار جاں بحق اورایک شدید زخمی ہوگیا۔