Tag media92tv

روس(نیٹ نیوز/ایمرا نیوز) روس سےملحقہ کرائمیا کے قریب بحر اسود میں گیس کے 2 ٹینکرز میں آگ لگ گئی، اس حادثے میں 14 افراد ہلاک جبکہ 5 لاپتہ ہو گئے۔

دونوں جہازوں میں سوار 12 افراد کو بچالیا گیا ہے، جہازوں کے عملے کا تعلق ترکی اور بھارت سے ہے۔روسی حکام کے مطابق حادثے کا شکار ہونے والے کارگو جہاز تنزانیہ کے تھے، جن میں اس وقت آگ لگی جب ایک جہاز سے دوسرے جہاز میں ایندھن کو منتقل کیا جا رہا تھا۔آگ لگتے ہی عملے نے سمندر میں چھلانگ لگا دی، ریسکیو حکام کو 11 افراد کی لاشیں مل گئی ہیں جبکہ تین افراد سمندر میں ڈوب گئے ہیں۔جہازوں میں سوار عملے کا تعلق ترکی اور بھارت سے بتایا گیا ہے۔

لاہور(سپورٹس ڈیسک/ایمرا نیوز) پچھلے دنوں پاکستانی نژاد برطانوی باکسر عامر خان عمرے کی ادائیگی کے لئے سعودی عرب آئے تو پاکستانیوں کی جانب سے مختلف مقامات پر ان کی بھر پور پذیرائی کی گئی، سعودی حکومت بھی ملک میں باکسنگ کو ترقی دینے اور نئے باکسرز کی تلاش کے لئے کوشاں نظر آ رہی ہے،اسپورٹس پبلک اتھارٹی کی سیکریٹری شہزادی ریما بنت بندر آل سعود نے کہا ہے کہ پاکستانی نژاد برطانوی باکسر عامر خان کی خدمات حاصل کی جارہی ہیں۔ عامرخان نئی نسل کو باکسنگ کی تعلیم و تربیت دینے کے خواہشمند ہیں۔ اس تجویز پر غور کیا جارہا ہے کہ عامر خان سے سعودی نوجوان باکسنگ کا ہنر کس طرح سے سیکھیں اور ان سے کس طرح تربیت حاصل کریں۔ عامر خان کی مدد سے بہترین ٹرینرز بھی تلاش کئے جارہے ہیں، انہوںنے کہا ہے کہ سعودی عرب میں زیر تکمیل زبردست منصوبوں سے کھیلوں کو فروغ حاصل ہوگا اور معاشرے کے مختلف طبقوں کی امنگیں پوری ہونگی۔ انہوں نے بتایا کہ 13فیصد سعودی کھیلوں میں دلچسپی لے رہے ہیں۔ ہماری کوشش یہ ہے کہ40فیصد سعودی جسمانی ورزش کا اہتمام کرنے لگیں۔ اسکے لئے محلوں میں چہل قدمی کےلئے مناسب جگہیں مختص کی جارہی ہیں۔ انہوں نے یہ بھی بتایا کہ اتھارٹی کی بعض سرگرمیوں میں عوام کی شرکت توقعات سے کہیں زیادہ ہوچکی ہے جہاں ہم 3ہزار شائقین کی آمد کے متوقع تھے وہاں 3لاکھ سے زیادہ شائقین پہنچے۔ انہوں نے یہ بھی بتایا کہ اسپورٹس اتھارٹی اور مسک فاؤنڈیشن کے درمیان مملکت بھر میں کھیلوں کی سرگرمیوں کے فروغ کے معاہدے پر دستخط ہوچکے ہیں۔ انہوں نے بتایا کہ مسک فاؤنڈیشن دنیا بھر کی جامعات اور اداروںسے بہترین رابطے قائم کئے ہوئے ہے۔سعودی مہم جو ڈاکٹر بدر الشیبانی نے انٹارکٹیکا کی بلند ترین چوٹی سر کرنے کی مہم کا آغاز کردیا۔ یہ ”وینسن میسو“ چوٹی 4.892میٹر بلند ہے۔

لاہور(سپورٹس ڈیسک/ایمرا نیوز) پاکستان کی تاریخ میں پہلی بار نادرن ایریاز میں فٹ بال کے میچز کا آغاز کردیا گیا ہے۔لیژر لیگز کے زیراہتمام ملک کے نادرن ایریاز ہنزہ، گلگت اور گیزرمیں بیک وقت ہفتہ وار لیگز شروع ہوگئی ۔ نادرن ایریاز میں اس بار توقع سے زیادہ برف باری ہورہی ہے، اس وقت موسم سرما کی شدید ترین ٹھنڈ اور برفباری کا سلسلہ جاری ہے۔ لیژر لیگس کے عہدیداروں نے اس موسم کو فٹ بال کے میچز کے انعقاد سے یادگار بنا دیا اور مقامی کھلاڑی برف سے ڈھکی ہوئی وادیوں میں فٹ بال کے مقابلوں سے پوری طرح محظوظ ہورہے ہیں۔ لیژر لیگز فٹ بال کے مقابلوں کے ساتھ ساتھ نادرن ایریاز کے کھلاڑیوں کو نہ صرف فٹبال کی سرگرمیوں کی جانب راغب کیا گیا ہے بلکہ ان کھلاڑیوں کو لیژرلیگز نیشنل چیمپئن شپ کھیلنے کا موقع بھی فراہم کردیا۔ چیمپئن شپ کی فاتح ٹیم کو آئی ایس ایف اے ورلڈ کپ میں بھی کھیلنے کا سنہری موقع بھی حاصل ہوگا۔ نادرن ایریاز کے کھلاڑیوں کو ماضی میں نظر انداز کی جاتا رہا ہے لیکن ٹرنک والا فیملی نے لیژر لیگز کے ذریعے برف پوش علاقوں میں رہنے والے باصلاحیت کھلاڑیوں کو قومی اور بین الاقوامی کھیلوں کے دھارے میں شامل کرنے کا مکمل پروگرام ترتیب دیا ہے۔ آرگنائزرز کی اس کاوش کو نہ صرف مقامی بلکہ ملکی سطح پر سراہا جارہا ہے۔

نادرن ایریاز کے ہنزہ، گلگت اور گیزرمیں 8,8ٹیموں کی لیگز کا انعقاد کیا گیا ہے۔ لیگز میں ہر ٹیم اپنے گروپ میں 14,14میچز کھیلے گی جو ہفتہ وار ہوں گے۔ یہ مقابلے ساڑھے تین ماہ جاری رہیں گے اور اس دوران تمام کھلاڑی نہ صرف ان مقابلوں سے محظوظ ہونگے بلکہ ان کی ہر ممکن کوشش ہوگی کہ پہلے وہ نیشنل چمپئن شپ میں اپنی جگہ مستحکم کریں اور پھر ورلڈ کپ کی دوڑ میں شامل ہوکر فاتح کی حیثیت سے اکتوبر 2019میں یونان کا ٹکٹ حاصل کریں۔ لیژر لیگس کے سی او او سید اسحق شاہ نے کہا ہے کہ دنیا میں سب سے زیادہ کھیلے جانے والے فٹبال کھیل کو تمام کھیلوں پر مکمل برتری حاصل ہے جو فیفا سے الحاق رکھنے والے 207ملکوں میں یکساں مقبول ہے اور دنیا کے ہر حصہ میں انتہائی زوق و شوق سے کھیلا جاتا ہے۔ کوشش کی جارہی ہے ملک ہر ہر شہر، قصبوں گائوں میں اس کھیل کو نوجوانوں کی پہنچ میں لایا جارہا ہے۔ انشاء اﷲ وہ دن دور نہیں جب چیئرمین ورلڈ گروپ محمود ٹرنک والا کی یہ خواہش کہ فٹ بال کو پاکستان کا مقبول ترین کھیل بنایا جائے، جلد مکمل ہوجائے گا۔ پاکستان کے نوجوانوں کو فٹبال کا انفرااسٹرکچر بنا کر دے رہے ہیں جہاں انہیں فٹبال کھیل کی وہ تمام جدید سہولتیں حاصل ہورہی ہے جو دنیا کے کسی اور ملک میں فٹبالرز کو حاصل ہوتی ہیں۔ لیژرلیگس جلد پاکستان میں فٹبال کھیل کی تقدیر بدل دے گا اور اس کے مثبت نتائج برامد ہوں گے اور دنیا بھر میں پاکستان کا شمارفٹبال کھیل میں تیزی سے ترقی حاصل کرنے والے ممالک میں ہونے لگے گا۔

اوہائیو(نیٹ نیوز/ایمرا نیوز) امریکا میں چھوٹا طیارہ ایک مکان کے صحن میں گر کر تباہ ہو گیا جس کے باعث طیارے کے دو پائلٹ ہلاک ہو گئے ۔امریکی حکام کے مطابق حادثہ ریاست اوہائیو کے رہائشی علاقے میں پیش آیا جب نجی ائیر فیلڈ سے اڑنے کے کچھ دیر بعد ہی طیارہ علاقے کے ایک گھر کے یارڈ میں جا گرا۔

ابتدائی رپور ٹس کے مطابق طیارے کے انجن میں خرابی ہوئی اور درخت سے ٹکرانے کے بعد اس کے اگلے حصے کو نقصان پہنچا۔حادثے میں گھرکے لوگ محفوظ رہے جبکہ طیارے کے دونوں پائلٹ ہلاک ہوگئے۔ طیارے میں سوار دیگر افراد سے متعلق کوئی اطلاع نہیں ملی۔

توحید آباد(نیٹ نیوز/ایمرا نیوز) نتھیاگلی کےعلاقے توحید آباد میں برف باری کے باعث گاڑیوں میں پھنسے سیاحوں کو ریسکیو کرلیاگیا۔برف باری کا لطف اٹھانے کےلئے سیاحوں نے ملکہ کوہسار مری کا رُ خ کیا لیکن شدید برف باری کی وجہ سے پیر اورمنگل کی درمیانی شب متعدد گاڑی سوار سیاح برف باری کی وجہ سے توحیدآباد کے مقام پرپھنس گئے۔برف میں سیاحوں کی 14 سے 15 گاڑیاں پھنس گئی تھیں اور انہیں نکالنے کے لیے آنے والا لفٹر بھی شدید برف باری کی وجہ سے پھنس گیا تھا جس کے بعد پھنسے ہوئے سیاحوں کی بازیابی کے لیے فوج اور فضائیہ پر مشتمل ریسکیو ٹیم بھیجی گئی تھی۔آئی ایس پی آر کےمطابق برف میں پھنسے سیاحوں نے میڈیا کے ذریعے مدد طلب کی تھی،شدید موسمی حالات کے باوجود رات سوا 3بجے ریسکیو آپریشن شروع کیاگیا ۔برف میں پھنسے لوگوں کو علی الصبح مری اور کالا باغ کے محفوظ مقامات پر منتقل کردیاگیا۔آپریشن میں پاک آرمی،پاک فضائیہ،کوئیک ریلیف فورس اور ریسکیو1122 نے حصہ لیا۔

کراچی(نیٹ نیوز/ایمرا نیوز) پاکستان نیوی کمکار کمانڈ کی سالانہ تقسیم اسناد تقریب کا پی این ایس جوہر کراچی میں انعقاد کیا گیا۔ترجمان پاک بحریہ کے مطابق تقریب کے مہمان خصوصی وائس چیف آف دی نیول اسٹاف، وائس ایڈمرل کلیم شوکت تھے۔

وائس ایڈمرل کلیم شوکت نے دوران تقریب گفتگو میں کہا کہ ملکی بحری سرحدوں کا تحفظ مزید مضبوط بنانے کے لیےمستقبل میں کئی نئے پلیٹ فارمز پاک بحریہ کے بیڑے میں شامل کیے جائیں گےوائس چیف آف نیول اسٹاف نے کہا کہ یہ دور غیرروایتی جنگ کا دور ہے جس سے نمٹنے کے لیے ہمہ وقت تیار رہنے کی ضرورت ہے۔ترجمان پاک بحریہ کے مطابق کمانڈر کراچی وائس ایڈمرل آصف خالق نے مہمان خصوصی کوکمکار کمانڈ کی سالانہ کارکردگی کا جائزہ پیش کیا۔دوسری جانب مہمان خصوصی نے مختلف شعبوں میں بہترین کارکردگی کا مظاہرہ کرنے والے یونٹس میں اسناد اور شیلڈز تقسیم کیں۔

کوہاٹ(نیٹ نیوز/ایمرا نیوز) خیبر پختون خوا کے ضلع کوہاٹ میں پتنگ بازی نے ایک کم سن بچے کی جان لے لی، بچہ پتنگ اڑاتے ہوئے 3منزلہ عمارت سے گر کر جاں بحق ہو گیا۔کوہاٹ کی گڑھی ڈھوڈیوال میں 5سالا احرام دیگر بچوں کے ساتھ 3 منزلہ عمارت پرپتنگ اڑا رہا تھا کہ اس دوران توازن برقرار نہ رکھ سکا اور عمارت سے نیچے زمین پر آ گرا۔بچے کو فوری طور پر طبی امداد کے لیے پشاور کے نجی اسپتال لے جایا گیا لیکن وہ زخموں کی تاب نہ لاتے ہوئے دم توڑ گیا۔

ممبئی(شوبز ڈیسک/ایمرا نیوز) بھارتی شہر ممبئی میں رنگا رنگ فیشن شو کا انعقاد کیا گیا جس میں موسم کی مناسبت سے روایتی ملبوسات پیش کیے گئے۔معروف بھارتی فیشن ہاؤس کی جانب سے منعقد کیا جانے والے اس ایونٹ میں ماڈلز کے ساتھ ساتھ بالی ووڈ کی معروف اداکارہ کنگنا رناوت نے بھی ریمپ پر جلوے بکھیرے۔

فیشن شو میں کنگنا رناوت سب کی توجہ کا مرکز بنی رہی۔خوبصورت لباس پہنی کنگنا نے ریمپ اینٹری دی تو دیکھنے والے دیکھتے ہی رہ گئے۔اس موقع پر فیشن سے دلچسپی رکھنے والے افراد کی بڑی تعداد بھی وہاں موجود تھی۔

آسٹریلیا(سپورٹس ڈیسک/ایمرا نیوز) آسٹریلین اوپن ٹینس مقابلے میں ڈرون کی دھواں دھار انٹری نےایمپائر،کھلاڑیوں سمیت شائقین کو حیران و پریشان کردیا۔

یہ واقعہ آسٹریلیا میں جاری ٹینس مقابلے کے دوران پیش آیا جب روسی کھلاڑی ماریہ شراپوا اور آسٹریلوی کھلاڑی ایشلی بارٹی کے درمیان میچ جاری تھا کہ ایونٹ کی کوریج کرتا ڈرون کیمرا بے قابو ہوتا ایمپائر کی کرسی سے برے طرح ٹکرایا۔جس کے باعث ایمپائر کی کرسی کی چھت اُڑ گئی اور ایمپائر سمیت دیگر کھلاڑی بے قابو ڈرون کی زد میںآنے سے بال بال بچ گئے۔واقع کی تحقیقات کی جا رہی ہے۔

لاہور(شوبز ڈیسک/ایمرا نیوز) ڈی سی کامکس کے مشہور کردار شازم کے گرد گھومتی نئی ہالی وڈ سپر ہیرو ایکشن ایڈونچر فلم ‘شازیم ‘کانیا ٹریلر جاری کر دیا گیا ۔ہدایتکارڈیوڈایف سینڈ برگ کی اس سنسنی خیز فلم کی کہانی ایک ایسے لڑکے کے گرد گھوم رہی ہے جسے اچانک جادوئی طاقت کے ذریعے بے پناہ طاقت مل جاتی ہے۔یہ لڑکا اس غیر معمولی طاقت کے ملتے ہی مضبوط جسامت والے نوجوان کو روپ دھار لیتا جسے اس کے دوست تک اسے پہنچان نہ پاتے۔یہ لڑکا خطرناک صلاحیتوں کا استعمال نہ جاننے پر اکثر مشکل میں گھِر جاتا تاہم پھراپنی طاقت کا اندازہ ہونے پر یہ نوجوان دشمنوں کو منہ توڑ جواب دیتا ہے اور ان کا ڈٹ کر مقابلہ کرتا ہے۔

پیٹر سیفران کی پروڈکشن میں بننے والے اس سپر ہیروفلم میں مرکزی کردار ہالی وڈ اسٹارزیچرے لیوی ،عشر اینجل،مارک اسٹروگ،روز بٹلر اورایڈم بروڈی سمیت کئی فنکار اہم کرداروں میں جلو گر ہو ں گے۔سنسنی خیز مناظر سے بھرپور یہ سپر ہیرو ایکشن ایڈونچرڈی سی انٹرٹینمنٹ اور وارنر بروس کے بینر تلے5اپریل کو سنیما گھروں میں نمائش کیلئے پیش کر دی جائیگی۔