Tag media92tv

افغانستان(نیٹ نیوز/ایمرا نیوز) افغانستان کے صوبے وردک میں طالبان کا افغان سیکیورٹی بیس پر حملہ کیا ہے جس کے نتیجے میں 12سیکیورٹی اہلکار ہلاک اور 20سے زائد زخمی ہو گئے، جوابی کارروائی میں 3حملہ آور بھی مارے گئے۔افغان میڈیا کے مطابق طالبان نے آج صبح وردک کے شہر میدان میں پہلے ایک حملہ آور نے بارودی مواد سے بھری گاڑی کو بیس کے نزدیک دھماکے سے اڑا دیا جس کےبعد دیگر حملہ آور بیس کے اندر داخل ہو گئے۔افغان فورسز سے جھڑپوں میں 3حملہ آور بھی مارے گئے، طالبان نے حملے کی ذمہ داری قبول کی ہے۔

لاہور(نیٹ نیوز/ایمرا نیوز) مسلم لیگ نون نے ساہیوال کے سانحے پر قومی اسمبلی سیکریٹریٹ میں تحریک التواء جمع کرا دی ، جبکہ اسی واقعے پر پنجاب اسمبلی میں پیپلز پارٹی نے توجہ دلاؤ نوٹس جمع کرایا۔نون لیگ کا قومی اسمبلی سیکریٹریٹ میں جمع کرائی گئی تحریک التواء میں کہنا ہے کہ نہتے شہریوں کا بچوں کے سامنے پولیس فائرنگ سے قتل فوری اور عوامی نوعیت کا اہم ترین مسئلہ ہے۔مسلم لیگ نون نے اپنی تحریک التواء میں یہ بھی کہا ہے کہ ساہیوال واقعے پر ایوان میں بحث کرائی جائے اور حکومت سے جواب طلب کیا جائے۔علاوہ ازیں سانحہ ساہیوال کے خلاف پنجاب اسمبلی میں توجہ دلاؤ نوٹس جمع کرایا گیا، یہ توجہ دلاؤ نوٹس پیپلز پارٹی کے پارلیمانی لیڈر حسن مرتضیٰ نے جمع کرایا۔پیپلز پارٹی کے توجہ دلاؤ نوٹس کے متن میں کہا گیا ہے کہ کیا یہ درست ہےکہ ساہیوال کےقریب سی ٹی ڈی نےجعلی پولیس مقابلہ کیا؟متن میں مزید کہا گیا ہے کہ جعلی مقابلےمیں 4 شہریوں کو دہشت گرد قرار دے کر قتل کر دیا گیا، واقعے کی مکمل تفتیش سے ایوان کو آگاہ کیا جائے۔

کراچی(نیٹ نیوز/ایمرا نیوز) کراچی میں آج سے 7روزہ انسداد پولیو مہم کا آغاز ہوگیا ہے ،کمشنر کراچی افتخار شوانی کے مطابق مہم کے دوران شہر کے 23 لاکھ سے زائد بچوں کو پولیو سے بچاؤ کی خوراک پلانے کا ہدف مقرر کیا گیا ہے ۔کراچی سمیت ملک بھر میں رواں سال کی پہلی پولیو مہم کا آج سے آغاز ہوگیا ہے۔کراچی میں کمشنر کراچی افتخار شوانی نے بچوں کو پولیو کے قطرے پلا کر مہم کا افتتاح کیا، میڈیا سے گفتگو کرتے ہوئے نے بتایا کہ یہ مہم 7روز جاری رہے گی۔کمشنر کراچی کا مزید کہنا ہے کہ مہم کے دوران 192 یونین کونسلوں کے 23 لاکھ سے زائد بچوں کو پولیو کے قطرے پلائے جائیں گے۔ان کا یہ بھی کہناہے کہ پولیو رضا کار گھر گھر جا کر بچوں کو پولیو سے بچاؤ کی خوراک پلائیں گے جن کی سیکیورٹی کے لیے قانون نافذ کرنے والے ادارے بھی اپنی خدمات فراہم کر رہے ہیں۔

لاہور(نیٹ نیوز/ایمرا نیوز) رواں سال کے پہلے مکمل چاند گرہن کا نظارہ افریقہ،یورپ ،جنوبی اور شمالی امریکا کے ملکوں میں دیکھا گیا۔چاند گرہن پاکستان اور بھارت میں نظر نہیں آیا۔چاند گرہن پاکستانی وقت کے مطابق صبح 7 بج کر 36 منٹ پر شروع ہواجبکہ مکمل چاند گرہن صبح کے پونے دس بجے ہوا جو 11 بج کر 45 منٹ تک رہا۔سپر بلڈ وولف مون کا دورانیہ 62 منٹ تک رہا۔جنوری کے پہلے مکمل چاند کو وولف سپر مون کا نام دیا گیا ہے۔

اس گرہن میں چاند زمین کے قریب آجاتا ہے اور سُرخ رنگ کا دکھائی دیتا ہے۔چاند کا زمین کے قریب آنا اور معمول سے بڑا نظر آنا،سپر مون کہلاتاہے جبکہ سورج کی روشنی کے باعث سرخ نظر آنے پر چاند بلڈ مون کہلاتا ہے۔۔

مقبوضہ کشمیر(نیٹ نیوز/ایمرا نیوز) قابض بھارتی فورسز کے ہاتھوں مقبوضہ کشمیر میں ظلم و ستم توڑنے کا سلسلہ جاری ہےجس کے نتیجے میں ہر نئے دن معصوم کشمیری اپنی جانوں سے جارہے ہیں۔مقبوضہ کشمیر میں تازہ کارروائی میں بھارتی فورسز نے مزید دو کشمیریوں کو شہید کر دیا۔قابض بھارتی فورسز نے ضلع بڈگام کے علاقے چراری شریف کا محاصرہ کیا اور اس کے دوران فائرنگ کر کے 2 کشمیریوں کو شہید کر دیا۔قابض انتظامیہ نے بڈگام میں محاصرے کے دوران انٹرنیٹ سروس بھی معطل کر دی ہے۔علاقے میں صورت حال کشیدہ ہے، جبکہ قابض فورسز کا علاقے کا محاصرہ تاحال جاری ہے۔

لاہور(نیٹ نیوز/ایمرا نیوز) امریکی سینیٹر لنزے گراہم کا کہنا ہے کہ طالبان سے مصالحت کے بارے میں موقف پروزیراعظم عمران خان درست تھے۔امریکی سینیٹر لنزے گراہم نے ماضی میں وزیر اعظم عمران خان کے طالبان کے ساتھ مصالحت کے موقف کہ’ افغانستان کی جنگ کا خاتمہ مصالحت میں ممکن ہے‘ کو صحیح تسلیم کرلیا۔لنزے گراہم نے کہا کہ عمران خان کی صورت امریکا کے پاس پاکستان کے ساتھ تعلقات کو لین دین سے اسٹرٹیجک شراکت داری میں تبدیل کرنے کا ایک منفرد موقع ہے۔یہ ایک آزاد تجارتی معاہدے کی صورت میں مضبوط اقتصادی تعلقات کے ذریعے ہی ممکن ہے، انہوں نے کہا کہ واپس جاکر صدر ٹرمپ کو وزیراعظم عمران خان سے ملاقات کرنے پر آمادہ کریں گے۔اس کے علاوہ امریکی سینیٹر لنزے گراہم نے کہا کہ بین الاقوامی مالیاتی فنڈ کے قرضے سے پاکستان کی معیشت کو عارضی سہارا ملے گا جبکہ پاکستان اور امریکا کے درمیان ایک آزاد تجارتی معاہدہ ہی حقیقی طور پر پاکستانی معیشت کی کایا پلٹ سکتا ہے۔واضح رہے کہ گزشتہ چند دہائیوں میں عمران خان کو طالبان سے مصالحت کرنے کا موقف اختیار کرنے پر تنقید کا نشانہ بنایا گیا ہے۔

اسلام آباد(نیٹ نیوز/ایمرا نیوز) وزیراعظم عمران خان کا سانحہ ساہیوال سے متعلق سوشل میڈیا پیغام میں کہنا ہے کہ ساہیوال سانحے پر عوام کا غم و غصہ جائز ہے، ذمہ داران کو مثالی سزا دی جائے گی۔سماجی رابطے کی ویب سائٹ ٹوئٹر پر اپنے پیغام میں وزیراعظم عمران خان نے کہا کہ ’سانحہ ساہیوال پر عوام کا غم و غصہ بالکل جائز ہے۔ وہ عوام کو یقین دلاتے ہیں کہقطر دورے سے واپسی پر ساہیوال سانحے کے ذمہ داران کو مثالی سزا دی جائے گی۔‘وزیراعظم کا مزید کہنا ہے کہ پنجاب پولیس کے پورے ڈھانچے کا جائزہ لینے کے بعد اس میں اصلاحات کا عمل بھی شروع کیا جائے گا۔واضح رہے کہ وزیراعظم عمران خان آج قطر کے دو روزہ سرکاری دورے پر روانہ ہو رہے ہیں۔ وزیراعظم کے اس دورے کو سوشل میڈیا پر شدید تنقید کا نشانہ بنایا جارہا ہے۔عمران خان یہ دورہ ایک ایسے وقت میں کر رہے ہیں، جب دو روز قبل یعنی 19 جنوری کی سہہ پہر پولیس کے محکمہ انسداد دہشت گردی نے ساہیوال کے قریب جی ٹی روڈ پر ایک مشکوک مقابلے کے دوران گاڑی پر اندھا دھند فائرنگ کی جس کے نتیجے میں میاں بیوی اور ان کی 13 سالہ بیٹی سمیت 4 افراد جاں بحق اور تین بچے بھی زخمی ہوئے جبکہ 3 مبینہ دہشت گردوں کے فرار ہونے کا دعویٰ کیا گیا۔میڈیا پر معاملہ آنے کے بعد وزیراعظم عمران خان نے بھی واقعے کا نوٹس لیا، دوسری جانب واقعے میں ملوث سی ٹی ڈی اہلکاروں کو حراست میں لے کر تحقیقات کے لیے جے آئی ٹی تشکیل دے دی گئی۔

اسلام آباد(نیٹ نیوز/ایمرا نیوز) سینیٹر رحمان ملک کا کہنا ہے کہ حکومت نے کہا ملک میں داعش نہیں ہے، اگر داعش نہیں ہے تو پھر ساہیوال میں یہ کیسے آگئی۔اسلام آباد میں داخلہ امور کے لیے سینیٹ کی قائمہ کمیٹی کا اجلاس منعقد ہوا جس میں چیئرمین کمیٹی رحمان ملک کا کہنا تھا کہ سانحہ ساہیوال سے متعلق تمام سوالات پر غورکرنا ہوگا جبکہ کمیٹی کے سوالات بھی جے آئی ٹی کو فراہم کیے جائیں۔چیئرمین کمیٹی رحمان ملک نے اجلاس میں کہا کہ اگر ضرورت پڑی تو وزیر اعلیٰ پنجاب کو کمیٹی میں بلائیں گے۔ اُن کا کہنا تھا کہ حکومت نے پہلے کہا ملک داعش نہیں، اگر داعش نہیں ہے تو پھر ساہیوال میں یہ کیسے آگئی؟دوران اجلاس رحمان ملک نے کہا کہ کمیٹی پنجاب حکومت کی پیش کردہ رپورٹ کا باقاعدہ تفتیش و معائنہ کرے گی اوریہ لائحہ عمل تیار کرے گی کہ آئندہ ایسے واقعات رونما نہ ہوں۔چیئرمین قائمہ کمیٹی رحمان ملککا کہنا تھا کہ سی ٹی ڈی نے کہا گاڑی سے فائر ہوا، لیکن کسی کے پاس کوئی ثبوت نہیں ہے۔دوسری جانب کمیٹی نےسانحہ ساہیوال سے متعلق مختلف چینلز پر چلنے والی ساری فوٹیجز بھی طلب کرلیں۔

لاہور(نیٹ نیوز/ایمرا نیوز) جنوری کے آخر میں ایک اور بارش کا سسٹم پاکستان میں داخل ہونے کا امکان ظاہر کیا جارہا ہے۔محکمہ موسمیات کے مطابق رواں سال سسٹم ملک کے 90فیصد علاقوں میں بارش اور برفباری لے کر آیا ہے جبکہ برف باری آئندہ آنے والےدنوں میں ڈیمز میں پانی کی کمی نہیں ہونےدےگی۔یہ بھی کہا جارہا ہے کہ گندم کی کاشت کے دنوں میں بارش کا ہونا خوش آئند ہے۔اس کے علاوہ بارش نے فضا سے آلودگی بھی کم کردی ہے۔محکمہ موسمیات کا کہناہے کہ بارش کا یہ سسٹم آج شام تک سندھ سے نکلے گاجبکہ کراچی کے کچھ علاقوں میں شام تک بوندا باندی اور ہلکی بارش کا امکان ہے۔محکمہ موسمیات کے مطابق 29اور 30جنوری کو ایک اور بارش کا سسٹم پاکستان میں داخل ہونے کا امکان ہے۔

فلوریڈا(نیٹ نیوز/ایمرا نیوز) فلوریڈا میں ایک ہال کی15منزلہ تاریخی عمارت کو دھوئیں کے بادل اُڑاتے ہوئے ملبے کا ڈھیر بنا دیا گیا۔امریکی ریاست فلوریڈا کے شہر جیکسن ویل میں 60سال پرانی پندرہ منزلہ عمارت کو گرانے صبح کے وقت کا انتخاب کیا گیا ۔

دھماکا خیز مواد کا استعمال کر کے صرف چند سیکنڈ کے اندر عمارت زمین بوس کردی گئی ۔اس منظر کو دیکھنے کیلئے مقامی افراد کی بڑی تعداد موجود تھی۔