Tag media92tv

لاہور(نیٹ نیوز/ایمرا نیوز) اس ترقی یافتہ دور میں ماہرین حیران کن ایجادات متعارف کر وا رہے ہیں ۔اب ایسی بیٹریاں تیار کی جارہی ہیں جو بیکٹیریا(جر ثومے) پر مشتمل ہوگی اور ان کی مدد سےچھوٹے آلات کو بآسانی چلایا جا سکے گا ۔میسا چیو سیٹس انسٹی ٹیوٹ آف ٹیکنا لوجی (ایم آئی ٹی ) کے ماہرین نے بجلی پیدا کرنے والے بیکٹیریا کو الگ کرنے اور ان کی درجہ بندی کا ایک نیا طر یقہ وضع کیا ہے ۔

بہت سے بیکٹیریابجلی پیدا کرنے کےکام آتے ہیں ،تاہم انہیں لیبارٹری میں رکھنا اور ان کی تعداد میں اضافہ کرخاصاً مشکل اور مہنگا کام ہوتا ہے ۔ایم آئی ٹی کے ماہرین کے نئے طر یقے پر عمل کرتے ہوئے برق پیدا کرنے والے بیکٹیریا کو الگ کرنا قدرے آسان ہوگیا ہے ۔اس طر ح بیکٹیریا کا الیکٹران کی خلوی جھلی سے باہر آتا ہے اور یہ عمل ایکسٹر سیلو لر الیکٹران ٹرانسفر یا ای ای ٹی کہلا تا ہے ۔ماہرین کے مطابق بیکٹیریا میں ای ای ٹی کے عمل کو دیکھنا اور اس کی درجہ بندی سب سے بڑا چیلنج تھا ۔ نئی تکنیک ڈائی الیکٹروفوریس کو استعمال کرکے دو اقسام کے بیکٹیریا الگ کیے گئے ہیں ،جس کے ذریعے زیادہ بجلی بنانے والے بیکٹیریا سامنے آئے ۔بعدازاں ماہرین ان پر مشتمل بیٹری بنانے پر کام کریں گے ۔

دکی(نیٹ نیوز/ایمرا نیوز) بلوچستان کے ضلع دکی میں مقامی کوئلے کی کان میں زہریلی گیس بھرنے سے دھماکا ہوا ہے، دھماکے کے نتیجے میں کان بیٹھ جانے کے باعث ملبے تلے 4کان کن دب گئے۔کان میں دبے ہوئے کان کنوں کو نکالنے کے لیے امدادی کارروئی شروع کی گئی جس کے دوران 2 کان کنوں کی لاشوں کو نکال لیا گیا۔پولیس کا کہنا ہے کہ ملبے کے نیچے پھنسے ہوئے دیگر 2 کان کنوں کو نکالنے کے لے امدادی کارروائیاں جاری ہیں۔پولیس کے مطابق دکی میں واقع کوئلے کی کان میں زہریلی گیس بھرجانے کے باعث دھماکا ہوا ،دھماکے کی وجہ سے کان کا ایک حصہ بیٹھ گیا۔دکی میں گیس بھرجانے کے سبب بیٹھ جانے والی متاثرہ کان کی گہرائی تقریباً 1700 فٹ بتائی گئی ہے۔واضح رہے کہ گزشتہ ماہ بھی دکی کی ہی ایک کوئلے کی کان میں دھماکے کے نتیجے میں ملبے تلے دب کر 3 کان کن جاں بحق ہوگئے تھے۔

اسلام آباد(نیٹ نیوز/ایمرا نیوز) ’’گلیوں میں آوارہ پھرنے والے کتوں کو نہ ماریں‘‘کے عنوان سے اسلام آباد میں آوارہ کتوں کا ڈاگ شوسجا یا گیا۔کتوں کے اس میلے میں یہ پیغام دیا گیا کہ جانور بے زبان ہیں، جبکہ آپ اشرف المخلوقات ہیں، جانوروں پر ترس کھائیں، گلی محلے میں پھرنے والے کتوں کو نہ ماریں۔

اسلام آباد کے ڈپلومیٹک انکلیو میں سجی ڈاگ شو کی تقریب میں اسٹریٹ ڈاگز کی اڈاپشن اور ان کو جان سے نہ مارنے کے حوالے سے واک کا اہتمام کیا گیا۔اس شو میں کوئی کتا قد میں چھوٹا تھا تو کسی کے بال نرالے تھے، تھوڑی سی توجہ ملی تو آوارہ کتوں نے بھی خوب جلوے بکھیرے۔ڈاک شو کے ذریعے یہ پیغام دیا گیا ہے کہ کتوں کو بلاوجہ مت ماریے بلکہ ان سے پیار کیجیے۔

کراچی(نیٹ نیوز/ایمرا نیوز) کراچی کے مختلف علاقوں میں گزشتہ شب گرج چمک کے ساتھ تیز بارش ہوئی جس کے بعد متعدد علاقوں میں بجلی کی فراہمی معطل ہوگئی، تاہم اب کراچی کے بیشتر علاقوں میں بجلی بحال کردی گئی ہے۔ترجمان کے الیکٹرک کے مطابق کراچی کے بیشترعلاقوں میں بجلی بحال کی جاچکی ہے،جن میں گلستان جوہر اور بلدیہ کے علاقوں میں بجلی بحال ہے۔اس کے علاوہ سرسید ٹاؤن، شادمان ٹاؤن، لیاری، پی ای سی ایچ ایس، عیسیٰ نگری اور پی آئی بی میں بھی بجلی بحال ہے۔ترجمان کے الیکٹرک نے مزید بتایا کہ چند نشیبی علاقوں میں پانی جمع ہونے کے باعث بجلی کی بحالی میں پریشانی کا سامنا ہے۔

جاپان(نیٹ نیوز/ایمرا نیوز) جاپان میں دنیا کے معمر ترین شخص مسازو نوناکا 113 سال کی عمر میں انتقال کرگئے۔غیر ملکی خبر رساں ادارے کے مطابق جاپانی شہری ماسازو نوناکا کا نام گنیز بک آف ورلڈ ریکارڈ میں شامل تھا جس کے مطابق ماسازو نوناکا جولائی 1905 میں پیدا ہوئے تھے۔گنیز بک نے گزشتہ سال اسپین کے شہری فرانسسکو نونیز الیورا کے انتقال کے بعد ماسازو نوناکا کو دنیا کا سب سے معمر ترین شخص قرار دیا تھا۔معمر ترین شخص مسازو نوناکا ہوکئیڈو میں اپنے گھر میں علی الصبح مردہ حالت میں پائے گئے۔اہل خانہ کے مطابق اُن کی موت طبعی طور پر ہوئی۔نوناکا کی پوتی نے میڈیا سے گفتگو کرتے ہوئے بتایا کہ انہیں کسی قسم کی کوئی تکلیف نہیں تھی اور وہ معمول کے مطابق رات کو سوئے تھے اور صبح ہمیں کسی قسم کی خدمت کا موقع دیئے بغیر ہمیشہ کے لیے چھوڑ گئے۔

پاکپتن(نیٹ نیوز/ایمرا نیوز) پنجاب کے شہر پاکپتن کی ضلع کچہری میں فائرنگ ہوئی ہے جس کے نتیجے میں 3افراد جاں بحق ہو گئے۔پولیس کے مطابق پاکپتن کی ضلع کچہری میں فائرنگ سے جاں بحق ہونے والے 3 افراد میں 2اشتہاری ملزمان جبکہ ایک کلرک شامل ہے۔پولیس کا کہنا ہے کہ چیمبر کے قریب چھپے ہوئے مخالف گروپ کے افراد نے ان تینوں افراد پر فائرنگ کی جس سے وہ جاں بحق ہو گئے، فائرنگ کے بعد ملزمان باآسانی فرارہونے میں کامیاب ہوگئے۔دوسری جانب پولیس کا یہ بھی کہنا ہے کہ ہلاک ہونے والے اشتہاری ملزمان کے خلاف قتل، ڈکیتی اور زیادتی کے مقدمات درج ہیں۔مقتولین کی لاشوں کو پولیس نے پوسٹ مارٹم کے لیے اسپتال منتقل کیا ہے۔ادھر پاکپتن ضلع کچہری میں فائرنگ کے واقعے میں 3افراد کی ہلاکت کا وزیراعلیٰ پنجاب سردار عثمان بزدار نے نوٹس لے لیا۔وزیر اعلیٰ پنجاب نے آئی جی پنجاب سے اس واقعے کی رپورٹ مانگ لیاور واقعے میں ملوث ملزمان کی جلد گرفتاری کا حکم بھی دے دیا۔اس ضمن میں ان کا کہنا ہے کہ فائرنگ کے ذمہ داروں کے خلاف قانونی کارروائی کی جائے۔

لاہور(نیٹ نیوز/ایمرا نیوز) ساہیوال میں پولیس مقابلے میں جاں بحق ہونے والے خلیل کے بھائی جلیل کا کہنا ہے کہ حکومت کی جانب سے ہمیں 2 کروڑ روپے کی امداد دینے کا اعلان کیا گیا،ہماری قیمت 2 کروڑ لگانے والے ہم سے ڈھائی کروڑ لے لیں۔لاہور میں مقتول خلیل کے بھائی جلیل نے میڈیا سے گفتگو کرتے ہوئے کہا کہ ہمیں پیسے نہیں چاہئیں، ہمارے پیارے واپس لا دیں۔انہوں نے مزید کہاکہ پنجاب حکومت کا ایک اور دعویٰ جھوٹا نکلا،وزیر قانون پنجاب نے دعویٰ کیا ہےکہ ان کا ہم سے رابطہ ہوا تھا،مگر ہم سے کسی نے کوئی رابطہ نہیں کیا ۔مقتول کے بھائی کا یہ بھی کہنا ہے کہ ہمیں انصاف کی امید نہیں، ادارے حقائق سامنے لائیں، تحقیقات کے بغیر کسی کو دہشت گرد کیسے قرار دے دیا گیا؟

لاہور:(نیٹ نیوز/ایمرا نیوز) وفاقی وزیراطلاعات فواد چوہدری نے کہاہے کہ ق لیگ کے تحفظات کو دور کیا جائے گا اور کوئی اتحادی چھوڑ کر نہیں جارہا۔لاہور میں میڈیا سےگفتگو کرتے ہوئے فواد چوہدری نے کہا کہ تمام سیاسی جماعتوں کو اپنی اپنی سیاست کرنے کا حق حاصل ہے، پی ٹی آئی اور ق لیگ ایک جماعت نہیں، ق لیگ کے تحفظات کو دور کیا جائے گا، چوہدری برادران سے ملاقات ہوتی رہتی ہے، کوئی اتحادی چھوڑ کر نہیں جارہا۔انہوں نے کہا کہ فوجی عدالتیں نیشنل ایکشن پلان کے تحت بنائی گئیں اور سب کے اتفاق رائے سے بنی تھیں، ملک سے متعلق فیصلوں کیلئے اتفاق رائے پیدا کرنے کی کوشش کریں گے۔فواد چوہدری کا کہنا تھا کہ مسلم لیگ ن یا پیپلزپارٹی کی طرف سے کوئی بہتر تجویز آئی تو غور کریں گے، پیپلز پارٹی اور مسلم لیگ ن سمیت ہر جماعت کا سیاسی نظریہ ہے، جمہوریت جرائم پر پردہ ڈالنے کا نام نہیں بلکہ احتساب کا نام ہے۔اس سے قبل لاہور میں تقریب سے خطاب کرتے ہوئے وزیراطلاعات نے کہاکہ معیشت بہتر ہورہی ہے، یہ سال بیرونی سرمایہ کاری اور برآمدات کا ہوگا، اس سال پاکستان اپنی تاریخ کی سب سے بڑی ایکسپورٹ کرے گا اور اس سال پاکستان میں تاریخ کی سب سے بڑی سرمایہ کاری آئے گی، اس سال عمران خان کی قیادت میں معاشی سفر طے کریں گے۔فواد چوہدری کا کہنا تھاکہ سیاسی جماعتوں کے بغیر ملک نہیں چلتا، سیاسی جماعتیں حقیقت ہیں، یہاں جھگڑا صرف سیاسی جماعتوں میں دو بڑوں کو این آر او دینے کا ہے۔

پورٹ الزبتھ:(سپورٹس ڈیسک/ایمرا نیوز) پاکستان کے خلاف پہلے ون ڈے میں جنوبی افریقا نے ٹاس جیت کر بیٹنگ کرنے کا فیصلہ کیاہے۔پورٹ الزبتھ کے سینٹ جارج پارک میں کھیلے جانے والے پہلے ون ڈے میں قومی ٹیم سرفراز احمد کی قیادت میں جنوبی افریقا سے ٹیسٹ سیریز کا بدلنے لینے کے لیے پرعزم ہے۔قومی ٹیم کپتان سرفراز احمد، بابراعظم، فخر زمان، حسن علی، عماد وسیم، امام الحق، محمد عامر، محمد حفیظ، شاداب خان، شعیب ملک اور عثمان شنواری پر مشتمل ہے۔جب کہ جنوبی افریقا کی ٹیم ہاشم آملہ، ہینڈرک، وینڈیر ڈیوسن، ڈوپلیسی، کلاسن، ربادا، پریٹوریس، اولیویر اور عمران طاہر کے ساتھ میدان میں اتری ہے۔ٹاس کے بعد گفتگو کرتے ہوئے کپتان سرفراز احمد کا کہنا تھا کہ پورٹ الزبتھ میں کوئی میچ نہیں ہارے، امید ہے آج بھی جیتیں گے۔انہوں نے کہا کہ ٹیسٹ سیریز میں جو ہوا اسے بھلا کر ون ڈے میں اچھا پرفارم کریں گے۔جب کہ پروٹیز کپتان فاف ڈوپلیسی کا کہنا تھا کہ ٹیسٹ سیریز میں کامیابی کے بعد کھلاڑی پر اعتماد ہیں، پاکستان ون ڈے کی اچھی سائیڈ ہے اور امید ہے اچھا مقابلہ ہوگا۔

اٹلی(نیٹ نیوز/ایمرا نیوز) مہنگائی صرف پاکستان میں نہیں ہے بلکہ اس کا راج دیگر ممالک میں بھی ہے لیکن اس کے باوجود بھی اٹلی کے ایک علاقے میں 1 یورو میں گھر فروخت کرنے کا اعلان کردیا گیا۔حال ہی میں اٹلی کے علاقے ’سمبوکا‘ کے ڈپٹی میئر جیوسپ کیسیوپو (Giuseppe Cacioppo) نے 1 یورو میں گھر فروخت کرنے کا اعلان کیا جو خبروں کی زینت بن گیا ہے۔ سمبوکا کے ڈپٹی میئر نے یہ اعلان تیزی سے کم ہوتی ہوئی آبادی کے پیش نظر کیا کیونکہ اچھی خاصی تعداد میں مقامی افراد بڑے شہروں کی طرف ہجرت کرچکے ہیں۔

ڈپٹی میئر نے گھروں کی فروخت 1 یورو میں کرنے کے ساتھ یہ بھی اعلان کیا کہ گھر خریدنے والے مالک کو 3 سال میں 15 ہزار یورو تزئین و آرائش پر خرچ کرنا پڑیں گے۔واضح رہے کی اٹلی کا 1 یورو، 155 پاکستانی روپے سے زائد کچھ بنتا ہے، یعنی اٹلی کے علاقے سمبوکا میں گھر اتنے سستے ہیں جن کا پاکستان میں تصور کرنا بھی ناممکن ہے۔سمبوکا اٹلی کا ایک پہاڑی علاقہ ہے جہاں سے بحیرہ روم کے جزائر کا نظارہ کیا جاسکتا ہے۔