Tag media92tv

وائٹ ہاؤس(نیٹ نیوز/ایمرا نیوز) امریکا میں ان دنوں کرسمس کی تیاریاں عروج پر ہیں اس موقع پر امریکی صدر ڈونلڈٹرمپ نے اہلِ خانہ کے ہمراہ نیشنل کرسمس ٹری روشن کرنے کی تقریب میں شرکت کی۔

96ویں سالانہ نیشنل کرسمس ٹری روشن کرنے کی تقریب وائٹ ہاؤس کے قریب ہی منعقد کی گئی۔جس کے دوران صدرٹرمپ نے قمقموں سے مزین کرسمس ٹری خاتونِ اول میلانیا کے ساتھ ملکر روشن کیا، امریکی عوام کو کرسمس کی مبارکباد پیش کی۔تقریب میں کئی نامور گلوکاروں نے شاندار پرفارمنس دی جس پر ٹرمپ اور میلانیا سمیت تمام مہمان بھی جھوم اُٹھے۔اس موقع پر اسٹیج کو سرخ اور سبز رنگوں کے پھول پتوں، تحائف اوراور ننھے کرسمس ٹریز سے خوبصورتی سے سجایا گیا تھا ۔سفید لباس میں میلانیا بھی تقریب میں مرکزِ نگاہ بنی رہیں۔

(نیٹ نیوز/ایمرا نیوز)
سائنسدانوں نےبڑھاپے یا بڑھاپے کی بیماریوں سے بچانے والی اینٹی بائیوٹک دوا تیار کرنے کا دعویٰ کر دیا ہے۔تحقیق کےمطابق ایزیتھرومائیسن AZITHROMYCIN نامی اینٹی بائیوٹک انسانی جسم میں موجود ناکارہ سیل ختم کر کے نئے صحت مند سیل بنانے کی صلاحیت رکھتی ہے۔

برطانیہ کی سیلفرڈ یونیورسٹی میں کی جانےوالی ایک تحقیق میں دعویٰ کیا گیا ہے کہ AZITHROMYCIN نامی اینٹی بائیوٹک بڑھاپے کی اثرات کوکم کرنے میں معاون ثابت ہوسکتی ہے۔اس انقلابی ڈرگ کے ذریعے انسانی جسم میں پرانے اور ناکارہ سیلز کوختم کرکے نئے اورصحت مندسیلزپیدا کیے جاسکتے ہیں۔

لاہور(نیٹ نیوز/ایمرا نیوز) پاکستان بھر میں موبائل فون استعمال کرنے والے صارفین کی تعداد 15کروڑ 75لاکھ سے زائد ہوگئی ہے، یہ صارفین 4 کمپنیوں کی موبائل سروسز استعمال کر رہے ہیں۔پاکستان میں ٹیلی کمیونیکیشن کو کنٹرول کرنے کے ذمہ دار ادارے پاکستان ٹیلی کمیونیکیشن اتھارٹی (پی ٹی اے) نے موبائل فونز کی شناخت اور بلاکنگ کا سسٹم یکم دسمبر سے فعال کرنے کا اعلان کیا ہے۔ملک میں جعلی موبائل فونز کا استعمال روکنے، فون چوری کی روک تھام اور صارفین کے حقوق کے تحفظ کا نظام یکم دسمبر 2018ء سے باقاعدہ فعال ہورہا ہے۔اس سلسلے میں پی ٹی اے نے وزارت انفارمیشن ٹیکنالوجی اور ٹیلی کام کی جانب سے منظور شدہ ٹیلی کام پالیسی 2015ء کے سیکشن 9.6کے پیش نظر موبائل فونز کی شناخت اور بلاک کرنے کے نظام ڈیوائس آئی ڈینٹیٹی فکیشن، رجسٹریشن اینڈ بلاکنگ سسٹم کے حوالے سے اقدامات کئے ہیں۔اس سسٹم سے پاکستان کے تمام موبائل فون صارفین کو بلا تعطل خدمات فراہم کی جاسکیں گی۔یکم دسمبر تک ملک میں تما م موبائل ڈیوائسز بشمول نان کمپلائنٹ ڈیوائسز تمام موبائل نیٹ ورکس پر فعال رہیں گی، تمام صارفین کی سہولت کے لیے ان کےآئی ایم ای آئی (IMEI ) کو ان کے موبائل فون نمبر کے ساتھ منسلک کر دیا جائے گا اور وہ کسی تعطل کے بغیر فعال رہیں گے۔

تاہم نئے نظام کے بعد تمام ایسی نئی موبائل ڈیوائسز جن کے آئی ایم ای آئی بین الاقوامی معیار کے مطابق نہیں، انہیں نان کمپلائنٹ ڈیوائس سمجھا جائے گا اور انہیں پاکستانی حدود میں کہیں بھی رابطے اور خدمات کی سہولت دستیاب نہیں ہوسکے گی۔اس سے قبل 20 اکتوبر کے بعد ملک کے تمام شہروں میں چوری شدہ، اسمگل شدہ اور تمام غیر رجسٹرڈ موبائل فون بند کرنے کا اعلان کیا گیا تھا۔پی ٹی اےکی طرف سےاس سلسلے میں تمام اسمارٹ فونز اور GSM ڈیوائسز کی تصدیق کرنے کے لیے تمام نمبروں پر ایس ایم ایس بھیجے گئے اور کہا گیا تھا کہ اگر کسی کو ایس ایم ایس نہ ملے ، تب بھی وہ اپنی GSM ڈیوائسز / فون کی خود سے تصدیق کر سکتا ہے۔پی ٹی اےکی جانب سے یہ بھی کہا گیا تھا کہ صرف تصدیق کردہ موبائل فون اور جی ایس ایم ڈیوائسز 20اکتوبر کے بعد فعال رہیں گے، لہٰذا صارفین صرف پی ٹی اے کے منظور شدہ موبائل اور جی ایس ایم ڈیوائسز خریدیں اور استعمال کریں۔موبائل فون اور جی ایس ایم ڈیوائسز کی تصدیق کے لیے تین طریقے متعارف کرائے گئے تھے، جن میں ایس ایم ایس کے ذریعے، ایپلیکیشن کے ذریعے اور ویب سائٹ کے ذریعےموبائل یا جی ایس ایم ڈیوائسز کی تصدیق کی جا سکتی تھی۔ایس ایم ایس کے ذریعے تصدیق کرنے کے لیے اپنے موبائل کا آئی ایم ای آئی نمبر میسج میں لکھ کر 8484 پر ایس ایم ایس کرنے کے لیے کہا گیا تھا جس کے بعد پی ٹی اے کی جانب سے جوابی ایس ایم ایس سے موبائل یا ڈیوائس کے متعلق تصدیق کی جا رہی تھی اور ہدایات دی جارہی تھیں۔اپنے موبائل فون کا آئی ایم ای آئی نمبر چیک کرنے کے لیے موبائل سے #06#* ڈائل کرنے کی ہدایت بھی دی گئی تھی۔پی ٹی اے کی جانب سے 20 اکتوبر تک غیر منظور شدہ یا غیر تصدیق شدہ فونز بند کرنے کے اعلان کے بعد کراچی الیکٹرانک ڈیلر ایسوسی ایشن نے دھمکی دی تھی کہ اگرپی ٹی اے نے 20 اکتوبر کو غیرمنظور شدہ موبائل فون بند کئے تو پورے پاکستان میں کاروبار بند کردیں گے۔اس ضمن میں آل پاکستان موبائل فون یونین اور مرکزی انجمن تاجران پاکستان کے وفد نے بھی وزیر مملکت ریونیو حماد اظہر سے ملاقات کی تھی جنہوں نے پی ٹی اے کی جانب سے موبائل فون بلاک کرنے کے فیصلے کو مؤخر کرنے کی یقین دہانی کرا دی تھی جبکہ متعلقہ حکام کو ہدایت کی تھی کہ استعمال شدہ موبائل فون کی درآمد کے لیے کسٹم حکام سے مشاورت کےبعد تاجروں کے تحفظات دور کیے جائیں۔ادھر سینیٹ کی قائمہ کمیٹی برائے انفارمیشن ٹیکنالوجی نے بھی پی ٹی اے سے تصدیق کے بغیر 20اکتوبر کے بعد موبائل فونز کی بندش کے معاملے کا سخت نوٹس لیا تھا اور پاکستان ٹیلی کمیونیکیشن اتھارٹی (پی ٹی اے) کو 20اکتوبر کے بعد موبائل فون بلاک نہ کرنے کی ہدایت کی تھی۔

گزشتہ دنوں وفاقی کابینہ نے اسمگل شدہ فونز کے استعمال کی روک تھام کیلئے ڈی آئی آر بی ایس نظام رائج کرنے،کی منظوری دے دی اور کہا کہ 31دسمبر 2018ءکے بعد اسمگل شدہ موبائل فونز بند کر دیئے جائیں گے۔وفاقی وزیر اطلاعات فواد چوہدری کا اس حوالے سے کہنا تھا کہ اس وقت 82 ملین مالیت کے موبائل فون قانونی طریقے سے پاکستان آ رہے ہیں جبکہ ڈھائی ارب کے موبائل فون غیر قانونی طریقے سے پاکستان لائے جا رہے ہیں، سیکنڈ ہینڈ موبائل فون پاکستان لانے پر پابندی کے باوجود پاکستان بھر کی مارکیٹوں میں سیکنڈ ہینڈ موبائل فون کثیر تعداد میں دستیاب ہیں۔انہوں نے بتایا تھا کہ وفاقی کابینہ نے فیصلہ کیا ہے کہ ڈی آئی آر بی ایس کے ذریعے 31 دسمبر 2018ءکے بعد اسمگل شدہ موبائل فونز بند کر دیئے جائیں گے تاہم اس سے قبل پاکستان لائے جانے والے موبائل فونز پر یہ پابندی لاگو نہیں ہوگی۔تاہم پی ٹی اے کی جانب سے اب ملک میں جعلی موبائل فونز کا استعمال روکنے، فون چوری کی روک تھام اور صارفین کے حقوق کے تحفظ کا نظام یکم دسمبر 2018ء سے باقاعدہ فعال ہو رہا ہے۔

لاہور(سپورٹس ڈیسک/ایمرا نیوز) پاکستان ویمنز کرکٹ ٹیم کی سابق کپتان بسمہ معروف بھی ازدواجی رشتے میں بندھ گئیں۔سابق کپتان بسمہ معروف سافٹ وئیرانجینئرابراراحمد کی دلہن بن گئیں جو ان کے خالہ کے بیٹے ہیں۔

لاہور کے مقامی شادی ہال میں منعقدہ شادی کی پروقار تقریب میں اہلخانہ، عزیز و اقارب سمیت ساتھی کھلاڑیوں نے بھی شرکت کی۔تقریب میں ساتھی خواتین کرکٹرز بھی شریک ہوئیں جنہوںنے خوبصورت لمحات کی تصاویر بنوائیں۔ساتھی کرکٹرز نے ان یادگار لمحات کی تصاویر سوشل میڈیا پر جاری کی ہیں جو وائرل ہوچکی ہیں۔

(نیٹ نیوز/ایمرا نیوز)
سوشل میڈیا کا بخار آج کل ہر ایک کے سر پر سوار ہے جسکی وجہ سے کئی لوگ نہ صرف خود کو مشکل میں ڈال دیتے ہیں بلکہ بعض اوقات زندگی تک داؤ پر لگا دیتے ہیں۔ویڈیو میں نظر آنے والے اِن چینی خاتون کو ہی دیکھ لیں جنہیں سوشل میڈیا پر بخار مہنگا پڑ گیا ہے۔
یہ مناظر چین کے سڑک پر دیکھے گئے جہاں ایک خاتون اپنے دوستوں کے ساتھ جا رہی تھی اور اس دوران مستقل موبائل فون میں مصروف تھی کہ راستے میں آنے والے کنوئیں کا اندازہ نہ کر سکی اور کھیلے کنوئیں کے اندر جا گری۔رپورٹ کے مطابق خاتون تنگ میں کنوئیں گر کر پھنس گئی تھی جسے اسکے دستوں نے بروقت نکال لیا جبکہ کنوئیں میں گرنے کی وجہ سے خاتون معمولی زخمی ہوئی جسے طبی امداد کیلئے فوری اسپتال منتقل کردیا ۔

ممبئی(شوبز ڈیسک/ایمرا نیوز) بالی ووڈ کے میگا اسٹار شاہ رخ خان نے اپنی اہلیہ اور بھارت کی مشہور ڈیزائنر گوری خان کی کامیابی پر اُن کے لیے ایک خوبصورت پیغام سوشل میڈیا پر جاری کیا ہےجسے مداحوں کی جانب سے بے حد پسند کیا جارہاہے۔ہندوستان ٹائمز کے مطابق گزشتہ روز گوری خان نےاپنے ٹوئٹر اکائونٹ پر شیئر کیا کہ انہیں فورٹیون انڈیا (Fortune India) کی جانب سے’بزنس میں سب سے زیادہ طاقت ور خاتون‘ نامی پروگرام میں بطور مہمان خصوصی مدعو کیا گیا ہے تو اس کے جواب میں شاہ رخ خان نے اپنی اہلیہ کے لیے خوبصورت پیغام جاری کیا۔ سماجی رابطے کی ویب سائٹ ٹوئٹر پر گوری خان نے اپنے ٹوئٹ میں لکھا کہ ’وہ فورٹیون انڈیا موسٹ پاورفل ویمن ان بزنس 2018 ایونٹ میں موجود ہیں جہاں وہ گوری خان ڈیزائنز سے متعلق لوگوں سے بات چیت کریں گی۔‘گوری کے اس ٹوئٹ کے بعد انہیں دنیا بھر سے نیک تمنائوں اور مبارک باد کے پیغامات وصول ہورہے ہیں۔ ان کے مداحوں کا کہنا ہے کہ وہ ایک باصلاحیت اور ذہین گھرانے سے تعلق رکھتی ہیں۔ ایک سوشل میڈیا صارف نے لکھا کہ ’شوہر دنیا کے 50 سب سے زیادہ طاقتور افراد میں سے 1اور بیوی دنیا کی 50 سب سے زیادہ طاقتور خواتین میں سے1 ۔

On our family list of ‘Fortunate’ she is the most powerful! https://t.co/XWi5m1aFzg

— Shah Rukh Khan (@iamsrk) November 27, 2018

ٹیلنٹیڈفیملی‘ایک اور صارف نے گوری خان کے ٹوئٹ کے جواب میں لکھا کہ ’50 طاقتور ترین کاروباری خواتین کا ایوارڈ حاصل کرنے پر دنیا کی خوبصورت اور سپر ویمن کو مبارک باد۔‘لیکن ان سب میں سب سے زیادہ توجہ شاہ رخ خان کے ٹوئٹ نے سمیٹی ہے، انہوں نے اپنی اہلیہ کو جواب میں کہا کہ ’ہمارے گھر کی کامیابی کی فہرست میں وہ (گوری خان) سب سے زیادہ طاقتور ہیں۔‘ کنگ خان کے اس ٹوئٹ نے آتے ہی مداحوں کے دل جیت لیےاور اس پر دلچسپ تبصرے بھی کیے جارہے ہیں۔سوشل میڈیا صارفین کا کہنا ہے کہ گوری خان کے کامیاب اور طاقتور ہونے کی وجہ یہ ہے کہ انہیں ایک شفیق اور ساتھ دینے والا شوہر ملا ہےجو ہمیشہ ان کی ہر قدم پر مدد کرتے ہیں اور ان کی صلاحیتوں کو خوبصورتی کے ساتھ سامنے لاتے ہیں۔

لاہور(شوبز ڈیسک/ایمرا نیوز) پاکستان کی مشہور و معروف اداکارہ فلم اسٹار نور نے دوبارہ ڈائریکشن کے میدان میں قدم رکھ دیا ۔اطلاعات کے مطابق انہوں نے گلوکارہ سائرہ طاہر کی آواز میں ریکارڈ کی جانے والی نعت کی ویڈیو میں بطور ڈائریکٹر فرائض سرانجام دیئے ہیں۔تفصیلات کے مطابق شوبز کو خیر باد کہہ کر حجاب کو مستقل اپنی زندگی کا حصہ بنانے والی سابقہ فلم اسٹار نور اس سے قبل بھی ہدایتکاری کے میدان میں قسمت آزما چکی ہیں۔اس سے قبل انہوں نے اپنی ایک فلم میں ہدایتکاری کے فرائض سرانجام دیئے تھے اور یہ ان کا ویڈیو ریکارڈنگ میں پہلا تجربہ ہے۔ایک رپورٹ کے مطابق اس حوالے سے گفتگو کرتے ہوئے سابقہ فلم اسٹار کا کہنا تھا کہ مجھے جب اس نعت کی ڈائریکشن کیلئے پیشکش ہوئی تو میں انکار نہیں کرسکی۔ان کا مزید کہنا تھا کہ میں نے اپنی بھرپور صلاحیتوں کو بروئے کار لاتے ہوئے نعت کی ڈائریکشن دی، جس کی مجھے روحانی خوشی بھی ہے۔انہوں نے آئندہ بھی اس طرح کے پراجیکٹس میں حصہ لینے کے عزم کا اظہار کیا ہے۔

نارروال :(نیٹ نیوز/ایمرا نیوز) سابق بھارتی کرکٹر نوجوت سنگھ سدھو کا کہنا ہے کہ جب بھی کرتارپور صاحب کی تاریخ لکھی جائےگی, عمران خان پہلا نام لکھا جائے گا، یہ معجزہ ہے جو 73 سال میں نہیں ہوا وہ 3 ماہ کے اندر اندر ہوگیا،زندگی بھر کرتارپور کوریڈور منصوبے پر شکرگزار رہوں گا۔تفصیلات کے مطابق نارروال میں کرتارپور کوریڈور کی افتتاحی تقریب سے خطاب کرتے ہوئے سابق بھارتی کرکٹر نوجوت سنگھ سدھو نے کہا وزیراعظم عمران خان اور سب مہمانوں کا شکرگزار ہوں، پاکستان جیوے ہندوستان جیوے، ہنستا بستا سارا جہاں جیوے، میرا یار دلدارعمران خان جیوے۔نوجوت سنگھ سدھو کا کہنا تھا کہ 73 سال کے انتظار کو پل بھرمیں ختم کردیا اور یاری بھی نبھائی، کوئی فرشتہ ہوتا ہے، جو ایسے اقدامات کرتا ہے، امن اورخوشی کے لئےآگے بڑھنے کے لئے سوچ کو تبدیل کرنا ضروری ہے۔سابق بھارتی کرکٹر نے کہا ہماری جھولی خوشی سے بھردی گئی، ساری کائنات جھولی میں ڈال دی گئی، مذہب کو سیاست اور طاقت کے چشمے سے کبھی نہیں دیکھیں، وزیراعظم عمران خان کا بہت مشکور ہوں۔ان کا کہنا تھا کہ آپ بھی عبادت کرتے ہیں ہم بھی کرتے ہیں دعا میں آپ کا بھلا مانگتے ہیں، خون خرابہ بند ہونا چاہیے، امن واپس آنا چاہیے، جہاں دوست مل جائیں وہ دہلیز مقدس ہوجاتی ہے، بہت نقصان اوربہت خون خرابہ ہوگیا، آگ پر کوئی پانی ڈالنے والا ہونا چاہیے۔سدھو نے کہا کرتارپور کوریڈور کو ایک بہت اچھا مستقبل دیکھ رہا ہوں۔سابق بھارتی کرکٹر کا کہنا تھا کہ حکومت اور پاک فوج کا شکرگزار ہوں، بھارتی سرکار کا بھی شکرگزار ہوں کیونکہ تالی دونوں ہاتھوں سے بجتی ہے، وزیراعظم عمران خان ایسی چابی بن گئے ہیں جو ہر تالے کو کھول سکتی ہے، دونوں ملکوں کو احساس ہونا چاہیے تاکہ ہم ایک ہوسکیں۔انھوں نے مزید کہا میرا خواب ہے ہماری سبزیاں برسلز جائیں، لاہور سے ٹرین چلے اور امرتسر سےہوتی ہوئی برسلز جائے، زندگی بھر کرتارپور کوریڈور منصوبے پر شکرگزار رہوں گا۔

ممبئی(شوبز ڈیسک/ایمرا نیوز) جنسی ہراسگی ایک ایسا لفظ بن گیا ہے جو شوبز سے تعلق رکھنے والے ہر چھوٹے بڑے شخص کے منہ پر نظر آتا ہے، کچھ عرصہ قبل شروع ہونے والی ‘می ٹو’ مہم کے بعد پہلے ہولی وڈ اور پھر بولی وڈ میں بھی کئی المناک کہانیوں کے راز فاش ہوئے۔حال ہی میں ایک واقعہ رپورٹ ہوا ہے جس میں ایک بھارتی اداکارہ کی جانب سے اماراتی رہائشی پر آن لائن ہراسگی کا الزام عائد کیا گیا تھا تاہم اس شخص نے ان الزامات کی تردید کرتے ہوئے کہا ہے کہ میرا واٹس ایپ ہیک ہوگیا تھا۔

غیرملکی میڈیا رپورٹس کے مطابق بھارتی فلموں میں کام کرنے والی اداکارہ نے دبئی کے رہائشی پر آن لائن جنسی ہراسگی کا الزام عائد کرتے ہوئے دعویٰ کیا تھا کہ مذکورہ شخص انہیں واٹس ایپ پر نامناسب پیغامات بھیجتا تھا۔اداکارہ نے اپنے مداحوں اور چاہنے والوں کو اس بات سے انسٹاگرام پر آگاہ بھی کیا تھا۔اداکارہ نیہا سکسینا کانندا اور ملیالم فلموں میں اداکاری کر چکی ہیں، ان کا کہنا تھا کہ مذکورہ شخص کی جانب سے معاملے پر معافی کی درخواست کے بعد میں نے جنسی ہراسگی کی شکایت متحدہ عرب امارات تک پہنچا دی ہے۔اماراتی خبر رساں ادارے کی رپورٹ کے مطابق دبئی کے ایلسن نامی رہائشی نے جنسی ہراسگی کے الزامات کی تردید کی ہے جبکہ اس نے یہ دعویٰ بھی کیا ہے کہ اس کا واٹس ایپ اکاؤنٹ ہیک ہوگیا تھا۔اداکارہ کا کہنا ہے کہ وہ اس معاملے پر خاموش نہیں بیٹھیں گی بلکہ جب تک اس شخص کی جانب سے لکھ کر معافی نہیں مانگ لی جاتی میں معاف نہیں کروں گی۔

لاہور: (نیٹ نیوز/ایمرا نیوز) کرسمس کی آمد آمد ہے اور اس موقع پر جہاں دنیا بھر میں سانتاکلاز اپنے سفری منصوبوں اور تحائف کو حتمی شکل دے رہے ہیں وہیں لوگ کرسمس کی شاپنگ اور سجاوٹ مکمل کرنے میں بھی مصروف ہیں۔کرسمس کے موقع پر سانتاکلاز کی اہمیت کو مدِ نظر رکھتے ہوئے دنیا بھر میں مختلف سانتا کلاز ریسوں کا اہتمام کیا جاتا ہے جس میں عام لوگوں کی بڑی تعداد سانتا کلاز کا روپ اپنا کر شریک ہوتی ہے۔ اس ریس کا مقصد دوڑ میں جیت نہیں بلکہ محض مل جل کر تفریح کرنا ہے۔امریکی شہر سان انٹونیو میں بھی ایسی ہی ایک ریس کا انعقاد کیا گیا جس میں 800 سے زائد افراد سانتا کلاز کا مخصوص لباس پہنے سڑکوں پر نکل آئے اور امدادی مقاصد کے تحت ہونیوالی 5 کلو میٹر طویل ریس میں حصہ لیا۔