Tag media92tv

لاہور: (نیٹ نیوز/ایمرا نیوز) الجزائر کی مسجد میں چینی کمپنی نے دنیا کا سب سے بڑا مینار بنا دیا۔ تفصیلات کے مطابق شمالی افریقی ملک الجزائر میں چار لاکھ میٹر رقبے پر پھیلی مسجد کی تعمیر کی جا رہی ہے جس کی تعمیر آخری مراحل میں ہے۔اس مسجد میں بیک وقت ایک لاکھ بیس ہزار افراد نماز پڑھ سکتے ہیں۔ یہ مسجد رقبے کے لحاظ سے دنیا کی تیسری جبکہ الجزائر کی سب سے بڑی مسجد ہو گی اسکی تعمیر پر 1.4 ارب ڈالر کی لاگت آئیگی۔رپورٹ کے مطابق مسجد میں دنیا کا بلند ترین مینار تعمیر کیا گیا ہے جس کی بلندی 265 میٹر ہے اسکا ڈیزائن جرمنی کی مدد سے تیار کیا گیا ہے جبکہ اس کی تعمیر ایک چینی کمپنی کر رہی ہے، اس مسجد کو بحیرہ روم میں موجود ایک آبی سیرگاہ سے شاندار دو راہوں کے ذریعے منسلک کر دیا جائیگا۔

بھارت(سپورٹس ڈیسک/ایمرا نیوز) بھارت کا شہر بھونیشور آج سے 16 ٹیموں کے ہاکی ورلڈ کپ کے 14ویں ایڈیشن کی میزبانی کرنے جارہا ہے۔ٹورنامنٹ کے افتتاحی روز یعنی 28 نومبر کو دو میچ کھیلے جائیں گے، جہاں گروپ ‘سی’ میں میزبان بھارت کا مقابلہ جنوبی افریقا جبکہ بیلجیئم کا مقابلہ کینیڈا کی ٹیم سے ہوگا۔ہاکی ورلڈ کپ ٹورنامنٹ کا فائنل 16 دسمبر کو کھیلا جائے گا۔ہاکی ورلڈ کپ 2018 اور ٹیمیں بھونیشور کے کالینگا اسٹیڈیم میں کھیلے جانے والے 14ویں ہاکی ورلڈ کپ میں شریک 16 ٹیموں کو چار مختلف گروپس میں تقسیم کیا گیا ہے۔ہر گروپ کی سر فہرست ٹیم براہ راست کوارٹر فائنل کھیلنے کی اہل ہوگی جبکہ دوسرے اور تیسرے نمبر پر رہنے والی ٹیمیں دوسرے راؤنڈ میں مد مقابل ہوں گی۔ہاکی ورلڈ کپ گروپ ‘اے’ ارجنٹائن، نیوزی لینڈ، اسپین اور فرانس کی ٹیموں پر مشتمل ہے.گروپ ‘بی’ میں دفاعی چیمپئن آسٹریلیا، انگلینڈ، آئر لینڈ اور چین کی ٹیمیں ہیں۔گروپ ‘سی’ میں میزبان بھارت، بیلجیئم، جنوبی افریقا اور کینیڈا شامل ہیں۔جبکہ گروپ ‘ڈی’ میں پاکستان، جرمنی، ہالینڈ اور ملائیشیا کی ٹیموں کو رکھا گیا ہے۔

اسلام آباد :(نیٹ نیوز/ایمرا نیوز) وزیراعظم عمران خان نے کرتارپور راہداری کا سنگ بنیاد رکھ دیا۔گوردوارہ کرتار صاحب پر کرتارپور کوریڈور کے سنگ بنیاد کی تقریب میں وزیر خارجہ شاہ محمود قریشی، آرمی چیف جنرل قمر جاوید باجوہ، بھارتی وفد، مختلف ممالک کے سفارتکار اور عالمی مبصرین بھی شریک ہیں۔تقریب میں بھارتی وزیر ہرسمرت کور، ایچ ایس پوری، نوجوت سنگھ سدھو بھی شریک ہیں۔مختلف ممالک کے سفارتکار اور عالمی مبصرین بھی کرتارپور پہنچنا شروع ہوگئے، گورنر پنجاب چوہدری سرور اور نجوت سنگھ سدھو کرتارپور روانہ ہوگئے جب کہ وزیراعلیٰ پنجاب عثمان بزدار بھی لاہور سے نارووال کے لیے روانہ ہوگئے۔واہگہ بارڈ پہنچنے والی بھارتی وزیر ہرسمرت کور بادل کا کہنا تھا کہ آج وہاں جارہی ہوں جہاں بابا گرونانک نے 18 برس گزارے، آج بہت جذباتی ہوں، خوابوں میں بھی نہ سوچا تھا کہ کرتار پور جاسکوں گی، میرے جیسے لاکھوں لوگوں کی دعائیں رنگ لارہی ہیں۔کمشنر گوجرانوالہ ڈویژن اسداللہ اور چناب رینجرز کے ونگ کمانڈر عدیل یوسف نے گوردوارہ کرتار صاحب میں انتظامات کا جائزہ لیا اور سکھ یاتریوں میں مٹھائی تقسیم کی۔کرتارپور کوریڈور ڈیزائن سے متعلق معلوماتی بورڈ کے مطابق کرتارپور کوریڈور فیز1 میں ساڑھے چار کلو میٹر سڑک تعمیر کی جائے گی جبکہ بارڈر ٹرمینل کمپلیکس بھی تعمیر ہوگا۔اس کے علاوہ کرتار پور کوریڈور میں دریائے راوی پر 800 میٹر پل، پارکنگ ایریا اور سیلاب سے بچاؤ کے لیے فلڈ پروٹیکشن بند بھی تعمیر ہوگا اور دوسرے فیز میں ہوٹل اورگوردوارہ کرتار صاحب کی توسیع کی جائے گی۔اس حووالے سے وفاقی وزیر برائے مذہبی امور پیر نورالحق قادری کا کہنا ہے کہ وزیراعظم عمران خان کی گوردوارہ کرتارپور صاحب آمد باعث فخر ہے، وزیراعظم کے کرتارپور راہداری کھولنے کے اعلان پر پوری سکھ قوم بلکہ دیگر مذاہب کے لوگ بھی پرمسرت ہیں۔

ممبئی(شوبز ڈیسک/ایمرا نیوز) بالی وڈ انڈسٹری میں دپیکا اور رنویر کی شادی کے بعد جہاں مداح پریانکا چوپڑا اور نک جونس کی شادی کے منتظر تھے، وہیں بھارتی اسٹینڈ اپ کامیڈین اور اداکار کپل شرما نے بھی اپنی شادی کی تاریخ کا اعلان کردیا۔کپل شرما نے انسٹاگرام پر شادی کا کارڈ سب سے شیئر کیا اور بتایا کہ وہ اپنی گرل فرینڈ گنی چتھرا کے ساتھ آئندہ ماہ 12 دسمبر کو شادی کے بندھن میں بندھ جائیں گے۔

View this post on Instagram

Need ur blessings ??

A post shared by Kapil Sharma (@kapilsharma) on Nov 27, 2018 at 2:45am PST

علاوہ ازیں انہوں نے سب کی نیک تمناؤں پر خوشی کا اظہار کرتے ہوئے شکریہ بھی ادا کیا۔کپل شرما اور گنی چتھرا کی شادی کی تقریب 12 نومبر کو بھارتی شہر جالندھر میں ہوگی جب کہ استقبالیہ تقریب 14 نومبر کو امرتسر میں منعقد ہوگی۔اس کے علاوہ ممبئی میں بھی 24 دسمبر کو شادی کی استقبالیہ تقریب رکھی جائے گی جس میں فلم انڈسٹری کے ستارے شرکت کریں گے۔واضح رہے کہ کپل شرما نے اپنی دوست گنی چتھرا کو گزشتہ برس سب سے متعارف کروایا تھا، ہندوستان ٹائمز کو دیئے گئے انٹرویو میں ان کا کہنا تھا کہ ‘انہیں محسوس ہوتا ہے کہ شادی ان کی زندگی میں بڑی اور مثبت تبدیلی لائے گی’۔

ملائیشیا(نیٹ نیوز/ایمرا نیوز) ملائیشیا کے 49 سالہ بادشاہ نے روس کی 25 سالہ سابق ملکہ حسن سے شادی کرکے سب کو حیران کردیا۔برطانوی جریدے ڈیلی میل کی ایک رپورٹ کے مطابق روس کی 25 سالہ سابق ملکہ حسن اوکسانا ویوہڈینا، 49 سالہ بادشاہ تینگکو محمد فارس پترا سے شادی رچا کر ملائیشیا کی ملکہ بن گئیں۔

دونوں کی شادی 22 نومبر کو روس کے دارالحکومت ماسکو میں منعقد ہوئی جس میں شاہی مہمانوں سمیت دوست احباب نے شرکت کی۔شادی کی پروقار تقریب میں ملائیشیا کے بادشاہ نے نیلے رنگ کا روایتی لباس پہنا جب کہ دلہن سفید رنگ کے لباس میں نظر آئیں۔واضح رہے کہ سابق مس ماسکو نے ملائیشین بادشاہ سے شادی سے قبل رواں برس اسلام قبول کیا جس کے بعد ان کا نام ریحانہ رکھا گیا۔

لاہور:(سپورٹس ڈیسک/ایمرا نیوز) پاکستانی ویمن کرکٹ ٹیم کی ون ڈے کپتان بسمہ معروف آج انجینئر ابرار کے ساتھ شادی کے بندھن میں بندھ جائیں گی۔گزشتہ روز بسمہ معروف کی رسم حنا اور ڈھولکی روایتی انداز سے منائی گئی، جس میں ویمن کرکٹ ٹیم کی کھلاڑیوں نے بھی شرکت کی۔ سابق کپتان ثناء میر، فاسٹ بولر کائنات امتیاز اور ڈیانا بیگ، آل راؤنڈر ایمن انور اور وکٹ کیپر سدرہ نواز بھی اس موقع پر موجود تھیں۔ایونٹ میں سب نے ہی شاندار ملبوسات زیب تن کیے اور ڈھولکی کو خوب انجوائے کیا۔اس موقع پر سب نے بسمہ معروف کے ساتھ تصاویر بھی بنوائیں، جنہیں سوشل میڈیا پر شیئر بھی کیا گیا۔

نئی دہلی:(نیٹ نیوز/ایمرا نیوز) بھارتی وزیر خارجہ سشما سوراج نے کرتار پور کوریڈور کے سنگ بنیاد رکھے جانے کو ایک تاریخی دن قرار دیتے ہوئے واضح کیا ہے کہ کرتا رپور راہداری کا مطلب یہ نہیں کہ دوطرفہ مذاکرات شروع ہوجائیں گے۔ہندوستان ٹائمز کی ایک رپورٹ کے مطابق سشما سوراج کا کہنا تھا کہ نہ ہم سارک میں جائیں گے اور نہ پاکستان سے مذاکرات کریں گے۔ان کا کہنا تھا کہ کرتارپور راہداری کے بھارتی حکومت کے دیرینہ مطالبے پر پاکستان نے اب مثبت ردعمل دیا ہے، تاہم کرتار پور بارڈر سے آمدو رفت کے لیے ویزا ہوگا یا نہیں، یہ ابھی طے ہونا باقی ہے۔سشما سوراج کا مزید کہنا تھا کہ ملکوں میں رابطے حکومت سے حکومت کے ہوتے ہیں انفرادی نہیں اور بھارتی وزیر ثقافت نوجوت سنگھ سدھو سرکاری نہیں ذاتی حیثیت میں کرتار پور کی تقریب میں شرکت کر رہے ہیں۔

اسلام آباد:(نیٹ نیوز/ایمرا نیوز) جسٹس اطہر من اللہ نے چیف جسٹس اسلام آباد ہائیکورٹ کے عہدے کا حلف اٹھا لیا۔چیف جسٹس اسلام آباد ہائی کورٹ کی حلف برداری کی تقریب ایوان صدر میں منعقد ہوئی، جہاں صدر مملکت ڈاکٹر عارف علوی نے جسٹس اطہر من اللہ سے حلف لیا۔حلف برداری کی تقریب میں وفاقی وزراء، ہائیکورٹس کے ججز، سینئر وکلاء اور اعلیٰ سرکاری عہدیداران نے شرکت کی۔جسٹس اطہر من اللہ نے جسٹس انور کاسی کے بطور چیف جسٹس اسلام آباد ہائیکورٹ ریٹائر ہونے پر بطور چیف جسٹس حلف اٹھایا۔وہ 17 جون 2014 کو اسلام آباد ہائیکورٹ کے جج تعینات ہوئے تھے۔بطور چیف جسٹس اسلام آباد ہائیکورٹ جسٹس اطہر من اللہ 11 دسمبر 2023 تک اس عہدے پر فائز رہیں گے۔

کراچی(نیٹ نیوز/ایمرا نیوز) دفاعی نمائش آئیڈیاز 2018ء کے دوسرے روز آج آرمی چیف جنرل قمر جاوید باجوہ کانفرنس سے خطاب کریں گےآئیڈیاز 2018ء کے دوسرے روز پاکستان آرمی، ایئر فورس اور نیوی کے کمانڈوز دہشت گردی سے نمٹنے کی عملی مشقوں کا مظاہرہ کریں گے ۔نمائش کے دوران ملک اور خطے میں امن و استحکام کے لیے پاکستان کی مسلح افواج کے کردار کے عنوان سے کانفرنس منعقد کی جائے گی ، چیف آف آرمی اسٹاف جنرل قمر جاوید باجوہ کانفرنس کے مہمان خصوصی ہوں گے ۔آج پاک بحریہ کے تحت بحر ہند میں سیکیورٹی کے موضوع پر کانفرنس بھی منعقد کی جائے گی ، چیف آف نیول اسٹاف ایڈمرل ظفر محمود عباسی کانفرنس کے مہمان خصوصی ہوں گے۔

چین (نیٹ نیوز/ایمرا نیوز) شمالی چین میں واقع ایک کیمیکل پلانٹ میں دھماکے کے نتیجے میں 22افرادہلاک اور دو درجن لوگ زخمی ہوگئے۔دھماکے کے بعد پلانٹ میں آگ لگ گئی، آگ بجھانے کے لیے امدادی کارروائیاں جاری ہیں۔خبر ایجنسی کے مطابق دھماکے کے نتیجے میں قریب کھڑی ہوئی 50 گاڑیاں بھی تباہ ہوگئیں۔حکام کا کہنا ہے کہ دھماکے سے متعلق تحقیقات جاری ہیں۔