Tag media92tv

ڈیلاس:(نیٹ نیوز/ایمرا نیوز) خوبصورت اور دلکش نظر آنا ہر خاتون کی خواہش ہے لیکن اسی شوق کے ہاتھوں ایک خاتون ہلاک ہوگئی جس نے میکسیکو سے سستی کاسمیٹک سرجری کروائی تھی۔امریکی ریاست ڈیلاس سے تعلق رکھنے والی 35 سالہ لارا اویلا نے میکسکو کے شہر جوریز میں واقع ایک مشہور رائنو پلاسٹی کے مرکز سے رابطہ کیا جو امریکا کے مقابلے میں بہت سستی کاسمیٹک سرجری کرتا ہے، خاتون کو یہاں ناک اور سینے کی کاسمیٹک سرجری کرانی تھی۔جیسے ہی خاتون کو بے ہوش کرنے کے بعد سرجری شروع کی گئی تو معلوم ہوا کہ بے ہوشی کے عمل میں کوئی غلطی ہوئی ہے جس سے ان کے دماغ پر سوجن آگئی اور دماغ کو شدید نقصان پہنچا۔ خاتون کی بہن کے مطابق سرجن نے لارا کی ریڑھ کی ہڈی پر جو انجکشن لگایا جو غلط جگہ پر لگا لیکن اس کے بعد خاتون کا دماغ متاثر ہونا شروع گیا، پھر گردے ناکارہ ہوگئے اور اسے دل کا شدید دورہ پڑا۔

کلینک کے ڈاکٹروں نے بتایا کہ جیسے ہی بے ہوشی کی دوا کا اثر ختم ہوگا سب کچھ ٹھیک ہوجائے گا لیکن خاتون کی طبیعت بگڑگئی ۔ اس کے بات وینٹی لیٹر سے مدد لی گئی لیکن وہ بھی کارآمد نہ ہوسکی اور آخرکار وہ لقمہ اجل بن گئی۔واضح رہے کہ امریکا سے ہر سال ہزاروں افراد پلاسٹک اور کاسمیٹک سرجری کے لیے میکسکو جاتے ہیں کیونکہ وہاں 10 ہزار ڈالر کا آپریشن صرف دو سے تین ہزارڈالر میں ہوجاتا ہے۔کلینک کے ڈاکٹروں نے بتایا کہ جیسے ہی بے ہوشی کی دوا کا اثر ختم ہوگا سب کچھ ٹھیک ہوجائے گا لیکن خاتون کی طبیعت بگڑگئی ۔ اس کے بات وینٹی لیٹر سے مدد لی گئی لیکن وہ بھی کارآمد نہ ہوسکی اور آخرکار وہ لقمہ اجل بن گئی۔

ممبئی(شوبز ڈیسک/ایمرا نیوز) پاکستانی نژاد بھارتی گلوکار عدنان سمیع کا سال 2000 میں ریلیز ہونے والا گانا ’مجھ کوبھی تولفٹ کرادے‘ اور اُس پر ان کا مذاحیہ رقص آج بھی لوگوں کو نہ صرف یاد ہے بلکہ بے حد پسند بھی کیا جاتا ہے۔ ان کے اس گانے نے انہیں شہرت کی بلندیوں پر پہنچادیا جس کے بعد ان کے کئی مشہور گانے ان کی پہچان بن گئےاور نا صرف ان کے گانے بلکہ عدنان سمیع کا ’چببے لک‘ یعنی موٹاپابھی ان کی پہچان بن گیا۔شائقین عدنان سمیع کو ’موٹا‘ دیکھنے کے عادی ہوگئےاور جب انہیں اسی طرح پسند کرنے لگے تو یہ خبر وائرل ہوئی کہ عدنان سمیع کچھ عرصے کے لیے گلوکاری کی دنیا کو خیر آباد کہہ رہے ہیں جس کی وجہ ان کا اپنے وزن میں کمی لانا ہےاور پھر سال2005 سے 2017 تک مسلسل محنت کے بعد وہ تقریباً 145 کلو وزن کم کرنے میں کامیاب ہوگئے۔2005 میں موسیقی کی دنیا سے دور جانے کے بعد جب وہ واپس آئے تو کوئی بھی انہیں پہچان نہیں سکا کیونکہ اُن کے وزن میں کافی حد تک کمی آچکی تھی۔

آہستہ آہستہ ان کے جسم میں مزید تبدیلی آتی چلی گئی اور 2017 میں وہ 220 کلو سے 65 کلو پر آگئے تھےجو کہ اُن کے لیے ایک بہت بڑی ’اچیوومنٹ‘ تھی۔گزشتہ ماہ ’بالی ووڈ ہنگامہ‘ کو انٹرویو دیتے ہوئے عدنان سمیع جذباتی ہوگئے انہوں نے کہا کہ’ اگر آپ موٹے ہیں تو اس کا مطلب یہ نہیں ہے کہ آپ کے پاس دل نہیں ہے، میں موٹے جسم کےساتھ اسکرین پر آیا اور لوگوں کے دل میں جگہ بھی بنائی جبکہ میری جگہ کوئی اورہوتا تو شایدکبھی بھی ایسا نہیں کر پاتا، لیکن اس کے باوجود مجھےاپنے موٹاپے کو دیکھ کر افسوس ہوتا ہے کیونکہ اس کے باعث لوگ مجھے اُس طرح سے پسند نہیں کرتے جس طرح سے پسند کیے جانا چائیے۔ ‘

زندگی اور موت کا معاملہ:
ماہرین صحت کا کہنا ہے کہ وزن میں کمی لانا تو ٹھیک ہے لیکن اس حد تک وزن میں کمی انسان کے لیے خطرے کاباعث بھی بن سکتی ہے لیکن عدنان سمیع نے اس خطرے کی پرواہ کیے بغیر ناممکن کو ممکن کر دکھایا۔ انہوں نے2005 میں سرجری کروائی جس کے بعد انہیں 3 مہینے تک مکمل طور پر آرام کرنے کے لیے کہا گیاتھا ،یہی سرجری اُن کے وزن میں کمی لانے میں اہم وجہ بنی۔عدنان سمیع نے بتایا کہ بہت زیادہ وزن ہونے کے سبب انہیں سانس لینے میں کافی دقت کا سامنا کرنا پڑرہا تھا، یہ وہ وقت تھا جب ڈاکٹروں نے انہیں یہ تک کہہ دیا کہ آپ ’چھ مہینوں سے زیادہ زندہ نہیں رہ سکتے۔‘ اس کے بعد انہوں نے امریکی شہر ’ہیوسٹن‘ کارخ کیا اور وہاں سے انہوں نے اپنے ’ویٹ لوس‘ سفرکا آغاز کیا جس میں ان کے اہلخانہ اور قریبی ساتھیوں نے ان کا بھرپور ساتھ دیا۔عدنان سمیع نے انٹرویو میں بتایا کہ وہ بچپن سے ہی موٹاپےکا شکار نہیں تھے بلکہ وہ اپنے اسکول کے زمانےمیں ’اسکواش اور پولو‘ کے بہترین کھلاڑی تھے۔ پھر انہوں نےمیٹھی اور چکنائی والی اشیا ءکھانا شروع کردیں جس سے اُن کا وزن بڑھتا چلا گیا۔
ڈائٹ پلان:
عدنان سمیع کے وزن میں کمی کی ایک بہت بڑی وجہ ان کا ڈائٹ پلان بھی ہے۔ اپنے وزن میں کمی کے سلسلے میں انہوں نے ماہر غذائیت سے رابطہ کیا جنہوں نے عدنان سمیع کو ’لو کیلوری ڈائٹ پلان ‘بنا کر دیا،جس کے تحت انہیں سفید اُبلے چاول، ڈبل روٹی، چکنائی والے کھانے، جنک فوڈ اور دیگر وزن بڑھانے والےکھانے کھانا سختی سے منع تھا۔
وہ صرف سلاد، مچھلی اور بھنی ہوئی دال پر گزارا کرنے لگےتھے اور روزانہ اُن کے دن کا آغاز بغیر چینی کی چائےسے ہوتا تھا۔ انہوں نے چاول اور روٹی کو مکمل طور پر چھوڑ دیا تھا، انہیں صرف اتنی اجازت تھی کہ وہ شام کے وقت گھر کے بنے پاپ کارن (مکھن اور نمک کے بغیر) کھا سکتے ہیں ۔
وزن میں کمی لانے کے لیے عدنان سمیع کا ’ورک آوٹ‘:
اس میں کوئی شک نہیں کہ عدنان سمیع نےاپنے وزن میں کمی لانے کے لیے دن رات محنت کی ۔انہوں نے بتایا کہ ڈاکٹروں نے انہیں جم جانے سے بلکل منع کیا ہوا تھا کیونکہ مشینیں استعمال کے باعث اُنہیں دل کا دورہ پڑنے کا خطرہ تھا۔جس کے بعد انہوں نے فٹنس ماہر سے رجوع کیا اور انہوں نے عدنان سمیع کو ایک ورزش پلان بنا کر دیا جس نے ان کے وزن میں کمی لانے میں بہت مدد کی۔ورزش پلان کے ذریعےسے انہوں نے ہر مہینے اپنا10 کلو وزن کم کیا اور نہ صرف یہ بلکہ ان کی مدافعتی قوت بڑھنے لگی اور انہیں چلنے پھرنےمیں آنے والی تکلیف سے بھی نجات مل گئی ۔

بیلجیئم(نیٹ نیوز/ایمرا نیوز) بیلجیئم کی تاریخ میں پہلی بار ایک پاکستانی نژاد خاتون امیدوار مقامی کابینہ کا حصہ بن گئیں۔تفصیلات کے مطابق بیلجیئم کے ساحلی شہر اوسٹنڈ کی میونسپلٹی میں منتخب ہونے والی پاکستانی نژاد حنابھٹی کو 10 رکنی مقامی کابینہ کا حصہ بنا لیا گیا ہے۔حنا بھٹی کو شہر کے سول میٹرز ، پاپولیشن اور سول اسٹیٹس کے معاملات سونپے گئے ہیں ۔اس کے ساتھ ساتھ وہ شہر میں منعقد ہونے والی تقریبات،عبادات، تدفین اور معذوروں سے متعلقہ مسائل کی بھی چیف ہوںگی ۔حنا بھٹی بلدیاتی انتخابات میں دوسری مرتبہ بھاری اکثریت سے منتخب ہوئی ہیں ۔سن 2012 میں اوپن وی ایل ڈی نامی جماعت کے پلیٹ فارم سے اپنی سیاست کا آغاز کرنے والی حنا کو گزشتہ بلدیاتی حکومت میں اسپیکر کی ذمہ داریاں تجویز کی گئیں تھیں جسے انہوں نے اچھے انداز میں نبھایا اور شہر کے سیاسی حلقوں میں اپنا نام پیدا کیا۔ان کے تقررپر مقامی میڈیا سے بات کرتے ہوئے شہر کے نئےمئیر اوینول مینن نے کہا کہ غیر ملکی اویجن کی حامل حنا بھٹی کو کابینہ کا حصہ بنا کر ہم دنیا کو یہ پیغام دینا چاہتے ہیں کہ قابلیت کے زور پر اس معاشرے میں اپنا مقام پیدا کیا جا سکتا ہے۔واضح رہے کہ مغربی جمہوریت میں لوگوں کے 90 فیصد معاملات مقامی حکومتوں کے ذمہ ہوتے ہیں۔دوسری جانب یہ بات بھی خوش آئند ہے کہ پاکستانی نژاد مردو خواتین آبادی کا کم تناسب ہونے کے باوجود مقامی نظام میں اپنی جگہ بنا رہے ہیں۔

بالی ووڈ اداکار ابھیشیک بچن نے اپنے دادا جی ہر ی ونش رائے بچن کی ایک سو گیارہویں سالگرہ کے موقع پر ان کے نام ایک خوبصورت پیغام جاری کیا ہے۔ابھیشیک بچن نے گزشتہ روزسماجی رابطہ ویب سائٹ انسٹاگرام پر داداجی کے ساتھ اپنی بچپن کی تصویر شیئر کی ہے۔اپنی پوسٹ میں ابھیشیک لکھتے ہیں کہ’ آج میرے داداجی کی ایک سو گیارہویں سالگرہ ہے، انہوں نے ہمیں لفظوں کےتحائف دیئے اور آج وہی الفاظ ان کے لئے کم پڑ رہے ہیں۔ہیپی برتھ ڈے داداجی، لو یو۔‘

View this post on Instagram

It would have been my Dadaji's 111th birthday today. He gave us the gift of words, and today they fall short. Happy birthday Dadaji. Love you.

A post shared by Abhishek Bachchan (@bachchan) on Nov 27, 2018 at 5:45am PST

بالی ووڈ شہنشاہ امیتابھ بچن کے والد ہر ی ونش رائے بچن بھارت کے مشہور شاعر گزرے ہیں ان کی شاعری پر انہیں 1976 میں ہندی ادب کے مشہور اعزاز سے بھی نوازاگیاتھا۔جب پوتا اپنے دادا سے محبت کا اظہار کر رہا ہو تو بیٹا کیوں پیچھے رہے، امیتابھ بچن نے بھی اپنے والد کی سالگرہ کے موقع پر ان کا ایک پورٹریٹ شیئر کیا ہے۔یہ پہلی بار نہیں ہے کہ ابھیشیک نے اپنے دادا کی پرانی تصویر سوشل میڈیا پر پوسٹ کی ہے اس سے قبل بھی وہ کئی بار ایسا کر چکے ہیں ۔دو سال قبل انہوں نے بہت ہی پیاری تصویر شیئر کی تھی جس میں وہ ایک ہاتھ کی انگلی دادا کے ہاتھ میں اور دوسرے ہاتھ کی اپنے بابا کے ہاتھ میں پکڑائے نظر آرہے ہیں۔ابھیشیک نے اس تصویر کے ساتھ لکھا تھا کہ میرے دادا کی سالگرہ ہے، میں انہیں بہت زیادہ یاد کرتا ہوں ، اب جبکہ ہم بڑے ہو گئے ہیں مگر وہ زندہ ہوتے تو ہمیشہ کی طرح آج بھی اپنے پوتے پوتیوں کی سالگرہ پر ہر سال ایک نظم لکھتے۔ہم کبھی سمجھے ہی نہ تھے کہ سالگرہ پر جب کوئی تحفہ دیتا ہے تو دادا جی نظم کیوں لکھتے تھے مگر آج جب وہ نہیں ہیں تو ہمیں سمجھ آگیا کہ ان کی نظم کا لکھا کاغذ کا وہ ٹکڑا ہر تحفے سے زیادہ قیمتی اور بڑا ہے۔

لاہور(نیٹ نیوز/ایمرا نیوز) کرتار پور بارڈر کے کھلنے کی خوشخبری پر لاہور کی سکھ برادری بھی نہال ہوگئی ہے، سکھ کمیونٹی کا کہنا ہے کہ حکومت کا یہ احسان کبھی فراموش نہیں کر سکتے۔سکھ یاتریوں کے لیے کرتار بارڈر کھلنا کسی نعمت سے کم نہیں، کہتے ہیں کہ حکومت کا یہ احسان کبھی فراموش نہیں کر سکتے، کرتار پور بارڈر کھلنے کی امید چھوڑ چکے تھے۔سکھ برادری کا کہنا ہے کہ کرتا رپور بارڈ کھلنے سے عوامی رابطے بڑھیں گے اور پاک بھارت تعلقات میں بھی بہتری آئے گی۔واضح رہے کہ وزیر اعظم عمران خان سکھوں کے مقدس مقام گوردوارہ کرتار پور کوریڈور کا آج سنگ بنیاد رکھ رہے ہیں، راہداری کے لیے بھاری مشینری تعمیراتی کام کے لیے پہنچا دی گئی ہے۔پاکستان نے گوردوارہ کرتار پور صاحب کی زیارت کے لیے آنے والے یاتریوں کی سہولت کے لیے سرحد سے گوردوارے تک رسائی کے لیے ویزے جاری کرنے کے بجائے مخصوص دورانیے کے خصوصی پرمٹ جاری کرنے کی منصوبہ بندی بھی کی ہے۔

(نیٹ نیوز/ایمرا نیوز)
کسی بھی قوم یا ملک کی بنیاد اس کی نوجوان نسل ہوتی ہے، اس ملک کو بدلنے یا آگے لے کرجانے میں نسل نو بنیادی کردار ادا کرتی ہے۔اگر کسی ملک کی بنیاد کو کھوکھلا کرنا ہو، تو اس کے نوجوانوںکو منشیات کا عادی بناکر اسے بآسانی کمزور کیا جاسکتا ہے۔منشیات نے نہ صرف نسل نوکی زندگی مفلوج بناکررکھ دی ہے، بلکہ انہیں اپنے حلقہ احباب اور معاشرتی ذمے داریوں سے بھی دور کردیا ہے۔جس زندگی کی انہیں قدر کرنی چاہیے، جسے ملک و ملت کو سنوارنے ، اسے بام عروج پر پہنچانے میں صرف کرنا چاہیے، اسے نشے کا شکار ہو کر برباد کرنے پہ تلے ہوئے ہیں۔ نوجوانوں کی اکثریت ، تو اس بات تک سے انجان ہے کہ چند لمحوں کے سکون کے لیے جس زہر قاتل کا استعمال وہ کر رہے ہیں، وہ ان کی زندگی اور مستقبل کو دیمک کی طرح چاٹ رہا ہے۔ پہلے زمانے میں کم از کم اتنی تہذیب تو تھی کہ، نوجوان اپنے بڑوں، اساتذہ وغیرہ کے سامنے تمباکو نوشی تک کرنے سے گریز کرتے تھے لیکن آج تو حال یہ ہے کہ نوجوان کھلے عام تمباکو نوشی اور منشیات کا استعمال کرتے نظر آتے ہیں۔ جیسے یہ کوئی معیوب عمل نہیں بلکہ قابل فخر کام ہے،ان کی اکثریت مغربی طور طریقوں سے متاثر ہوکر نشے کی عادی ہورہی ہے،جب کہ چند نوجوان محض دوستوں کے سامنے ’’کول‘‘ یا دلیر بننے کے لیے ان کے کہنے پر منشیات کا استعمال کرنا شروع کر دیتے ہیں، کچھ نوجوان ایسے بھی ہیں، جواپنی پریشانیوں سے بھاگنے اور ذہنی سکون حاصل کرنےکے لیےاس زہر کو گلے لگالیتے ہیں۔منشیات میں مبتلا نوجوان معاشرے کے لیے ناسورہوتےہیں ، ہمارے ملک میں نشے کی لت میں مبتلا افراد میں سب سے زیادہ تعداد نوجوانوں کی ہے۔نشے کا آغاز عام طور پر تفریحاً کیا جاتا ہے،پہلے پہل دوستوں کے ساتھ مل کر یا کسی پارٹی وغیرہ میں کرتے ہیں،پھر رفتہ رفتہ یہ شوق ،عادت اور پھر نہ ختم ہونے والی ضرورت بن جاتا ہے۔ اس کا نتیجہ یہ نکلتا ہے کہ نوجوانوں کا جسم تیزی سے نشےکا عادی ہوجاتا ہے،جس کے بعد مختلف قسم کے نشوں میں اضافہ ہوجاتا ہے، یہ لت اتنی شدت اختیار کر لیتی ہے کہ نشئی ،منشیات کے حصول کے لیے کسی بھی حد تک جانے سے گریز نہیں کرتے، غیراخلاقی وغیرقانونی سرگرمیوں تک میں ملوث ہوجاتے ہیں۔، کیوں کہ انہیںاپنے اردگرد کے حالات کا شعور نہیں ہوتا۔

نوجوان دوستو! ذرا سوچیے کہ آپ کے چند دن یا محض دوستوں کے کہنے میں آکر کیے گئے نشے کی خبر جب آپ کے والدین کو ملے گی، توان پر کیا گزرے گی؟اس کی لت ایسا روگ ہے ،جو لگتی ایک فرد کو ہے، مگر تباہ پورے خاندان کوکرتی ہے،جس سےخوشیاں اور سکون بربادہوجاتا ہے۔ منشیات کے عادی نوجوان زیادہ عرصے تک اپنے والدین سے یہ عادت نہیں چھپا پاتے، کیوں کہ اسے خریدنے کے لیے انہیں پیسوں کی ضرورت پڑتی ہےیا ان کی صحت رفتہ رفتہ خراب ہونے لگتی ہے، جو گھر والوں کو شک میں مبتلا کر دیتی ہے۔ہمارے ملک کا اثاثہ 64 فیصد نوجوان آبادی ہے،جس کے کاندھوں پراپنا ہی نہیں ملک کے مستقبل کو سنوارنے کی ذمے داری بھی عائد ہے، لیکن نشے میں ڈوبی یہ قوت کیسے مستقبل روشن بنا سکے گی؟یہ لمحۂ فکریہ ہے کہ ہمارے ملک میں منشیات استعمال کرنے والےنوجوانوں کی تعداد لاکھوں میں ہے، جس میںدن بہ د ن تیزی سے اضافہ ہوتا جا رہا ہے، اکثریت 21 سال سے 30 سال کی ہے۔اس سے بھی زیادہ افسوس ناک بات یہ ہے کہ، منشیات فروشی اور نشہ آور چیزوں کی جانب تعلیم یافتہ نوجوان تیزی سے مائل ہو رہے ہیں، ایک اندازے کے مطابق تقریباً 70 فی صد طالب علم سگریٹ اور گٹکے کا استعمال کرتے ہیں۔اس سے بھی کہیںحیران کن،افسوس ناک بات یہ ہے کہ اکثر اسکول کےبچے بھی سگریٹ نوشی میں مبتلا نظر آتے ہیں۔مشاہدے میں آیا ہے کہ اکثر نوجوان دوستوں پر سبقت لے جانے یا ان کے سامنے اپنا رعب و دبدبہ قائم کرنے کے لیے تمباکو نوشی، گٹکا مین پوری اور دیگر چیزوں کا استعمال کرتے ہیں، جو وقت کے ساتھ ان کی عادت اورپھر ضرورت بن جاتی ہے، جس کا انجام سوائے تاریکی کے اور کچھ نہیں ۔ یقیناً نوجوان نسل اس بات سے ناواقف ہے کہ، تمباکونوشی ، نشے کی بنیاد بنتی ہے۔ کیا فائدہ ایسے عارضی سکون کا جس سے زندگی بھر کی تکلیف مقدر بن جائے۔تحقیق کے مطابق منشیات کے عادی 60 فی صد سے زائد نوجوان تعلیم یافتہ ہیں۔ اگر غور کیا جائے، تویہ ایک انتہائی تشویش ناک بات ہے کہ ہمارا پڑھا لکھا طبقہ فیشن کے دھوکے میں اپنی ہی بربادی کا سامان کر رہا ہے۔ اس کی اہم وجہ ان کےاردگرد کا ماحول اوردوست نما دشمن ہیں۔جہاں تعلیمی ادارے اتنی بھاری بھر کم فیسیں وصول کرتے ہیں، انہیں چاہیے کہ وہ یہ بھی نظرمیں رکھیں کہ ان کے ادارے میں زیر تعلیم نوجوان کن سرگرمیوں میں مشغول ہیں ،تعلیمی ادارے تو نسل نوکی تربیت کرنے اورذہنی شعور بلند کرنے کا ذریعہ ہوتے ہیں، لیکن جب ان اداروں میں نوجوان کو منشیات استعمال کرنے لگیںتو سمجھ جانا چاہیے کہ قوم کا سرمایہ خطرے میں ہے۔ حیران کن بات یہ ہے کہ کالجوں اور یونیورسٹیوں کی لڑکیوں میں شیشہ اور دیگر منشیات کا استعمال فیشن کے طور پر اپنا یاجارہا ہے۔ تحقیق سے پتا چلتا ہے ،کہ لڑکیاں زیادہ تر نشہ ذہنی دبائو، ڈپریشن اور احساس کمتری کی وجہ سے کرتی ہیں۔ جب نشے کی عادت میں مبتلا نوجوانوں کو پیسے نہیں ملتے، تووہ اپنے مقصد کےحصول کے لیے منفی سرگرمیوں میں ملوث ہوجاتے ہیں، اسٹریٹ کرائم میں اضافہ بھی اسی وجہ سے ہوتا ہے۔عالمی ادارۂ صحت نے نوجوانوں میں منشیات کے استعمال کی تین بنیادی باتیں بتائی ہیں۔ وہ نشے میں اپنے آپ کو اچھا اور مطمئن محسوس کرتے ہیں ، اپنے آپ کو طاقتور محسوس کرتے ہیں اور اپنے فیصلے خود کرنا چاہتے ہیں۔قومیں اپنے کردار، گفتار، عادات سے مقبولیت پاتی ہیں والدین اور اساتذہ کوپرائمری سطح پر تعلیم حاصل کرنے والے بچوں پر بطور خاص توجہ دینا ہوگی، کیوں کہ جو باتیں اس وقت ان کے ذہنوں میں بیٹھ جائیں گی وہ ہمیشہ ان کے دل و دماغ پر نقش ر ہیںگی۔ منشیات کے مسئلے سے لڑا جاسکتا ہے،اس میں تعلیم اور آگہی اہم کردار ادا کرسکتی ہے۔ والدین کا فرض بنتا ہے کہ وہ اپنے بچوں پر کڑی نظر رکھیں اور انہیں نشے جیسی لعنت سے بچانے کے لیے میدان عمل میں آئیں، تاکہ خاندان کسی بھی بڑی اذیت کا سامنا کرنے بچ جائیں۔سختی صرف اسکول ، کالج کے دنوں تک ہی نہیں بلکہ یونیورسٹی کی سطح پر بھی ضروری ہے۔سگریٹ نوشی، شیشہ اور دیگر منشیات کی برائیوں کی روک تھام کے لیے درسگاہوں کے سربراہوں، والدین اور سماجی تنظیموں کو مل کر اقدامات اٹھانے چاہئیں۔طلباء و طالبات کو منشیات کے حوالے سے باضابطہ طور پر گائیڈ لائن دی جائے اور اس کے نقصانات سے آگاہ کیا جائے ،جہاں نوجوانوں کو معاشرتی برائیوں سے دور رکھنا والدین اور اساتذہ کی ذمہ داری ہے، وہیںاہم ذمہ داری حکومت وقت کی بھی ہے، حکام منشیات فروشی کے رجحان کو روکنے کے لیے ہر ممکن وسائل بروئے کار لائیں۔ماہرین نفسیات کہتے ہیں کہ،نوجوانوں کے درمیان نشہ کے بڑھتےہوئے رجحان ،غیر اخلاقی دوستوںکا ساتھ، خاندانی دبائو ، ماں باپ کے جھگڑے ، انٹرنیٹ پر گھنٹوں وقت صرف کرنا اور خاندانی تضادات ہیں۔اس ضمن میں والدین اور اساتذہ کی ذمے داری ہے کہ نوجوانوں سے ان کے مسائل دریافت کریں ، ان کے لئے مسائل حل کریں، پیار و محبت سے سمجھایا اور منشیات کے نقصانات سے آگاہ کیا جائے۔ایک انگریزی مقولہ ہے کہ ’’اگر تم نے دولت کھو دی تو کچھ نہ کھویا، اگرصحت کھو دی تو کسی حد تک کھویا، لیکن اگرکردار کھو دیا، تو سب کچھ کھو دیا‘‘۔ نشہ ایک ایسی لعنت ہے جو انسان کے کردار پر سب سے پہلے اثر انداز ہوتا ہے اور اچھے سے اچھے انسان کو برائی کی طرف راغب کر دیتا ہے۔ نوجوان نسل ہی ہمارے مستقبل کا اثاثہ ہے۔بے روزگار یا ذہنی تناؤ کا شکار نوجوان ، کسی نہ کسی تعمیری سرگرمی میں مصروف رہنے کی کوشش کریں، مطالعہ کریں،اچھے دوستوںاور اساتذہ کے ساتھ وقت گزاریں ۔ کھیلوں میں دلچسپی لیں ،اقبال کے شاہین بنیں اور پہاڑوں کی چٹانوں پر بسیرا کرنے کی ٹھانیں، مایوسی یا ناامیدی کسی مسئلے کا حل نہیں ہے، ان سے وقتی فرار حاصل کرنے کے لیے منشیات کا استعمال نہ کریں۔ منشیات میں مبتلا نوجوانوں کو پیار و محبت اور شفقت سے گھر لوٹنے کی دعوت دیں ۔برے کو برا کہہ کر اس کے حال پر نہیں چھوڑا جاتا بلکہ ہر وقت اصلاح اور برائیوں کی نشاندہی کرتےرہنا چاہیے، واپسی کے لیے دروازے ہمیشہ کھلے رکھیں اور کھلی بانہوں سے قوم کے معماروں کا استقبال کریں ۔

کراچی(نیٹ نیوز/ایمرا نیوز)بھارتی سنیئر صحافی راجدیپ سردسائی نے کہا ہے کہ کرتارپور میں جو ہورہا ہے اچھا لیکن یہ صرف ایونٹ تک معاملہ محدود نہیں رہنا چاہیے پاکستان اور ہندوستان میں گفتگو کے معاملات آگے لے جانے کی ضرورت ہے لیکن کم سے کم ایک اچھی بات ہوئی ہے لیکن ہمیں یہاں نہیں رُکنا اس سے آگے جانے کی ضرورت ہے،بھارتی میڈیا جانتا ہے نفرت پھیلانے سے ریٹنگ ملتی ہے ۔تحریک انصاف کے رہنما سینیٹر ولید اقبال نے کہا کہ اس قدم سے یہ با ت واضح ہوسکتی ہے کہ ہم امن چاہتے ہیں ہماری درمیان جو ہتھیاروں کا مقابلہ ہوتا ہے اگر ان وسائل کو غربت ختم کرنے کے لئے استعمال کیا جائے تو دونوں ملکوں کے لئے اچھا ہے۔سنیئر تجزیہ کار امتیاز عالم نے کہا کہ بڑی اندھیری رات کے بعد کرن کا پھوٹنا خوش آئند ہے ،جموں اور سیالکوٹ کا رستہ بھی کھلنا چاہئے۔مسلم لیگ نون کی عظمیٰ بخاری کا کہنا تھا کہ پاکستان انڈیا کے تعلقات کھٹے میٹھے رہے ہیں اور ایسے ہی رہیں گے سب کچھ اچھا ہوجائے ممکن نہیں ہے لیکن چھوٹے چھوٹے اقدامات کرنے سے بہت بہتری آسکتی ہے ۔راجدیپ سردسائی نے مزید کہا کہ دہشت گردی ایک بڑا مسئلہ ہے جسے حل ہونے کی ضرورت ہے۔ بھارتی میڈیا جانتا ہے نفرت پھیلانے سے ریٹنگ ملتی ہے ۔میں اتفاق کرتا ہوں کہ ہر سطح پر بات ہونی چاہیے ۔ چاہتا ہوں جس طرح میں محظوظ ہوا عمران خان اور سنیل گواسکر کو میدان میں دیکھ کر اسی طرح ہمارے بچے بھی محمد عامر اور ویرات کو ایک ساتھ کھیلتے ہوئے دیکھیں ۔ امید ہے کرکٹ کی شروعات ضرور ہوگی۔ امتیاز عالم کا مزید کہنا ہے کہ ہندوستانی میڈیا میں جس طرح نفرت انگیزی پیدا کی جاتی ہے یہ افسوسناک ہے۔ اردواگر زندہ ہے دنیا میں تو میں سمجھتا ہوں بالی ووڈ کا اس میں اہم کردار ہے ۔ پاکستان اور ہندوستان میں جس طرح مذہبی انتہا پسندی کا ابھار ہے جس کا ہم شکار ہوئے ہیں اور جس طرح ہندوستان میں ہندو مذہب سیاست میں بڑھ رہا ہے یہ بڑے خطرات آرہے ہیں کوشش کرنی چاہیے ان ریاستوں کو اگر ان کا اسیر نہیں بننا ہے تو اس سے آزاد ہو کر آگے بڑھیں۔ الزام لگانے کا سلسلہ چلتا رہے گا اسی دوران بات ہونی چاہیے اس سے کوئی فرق نہیں پڑتا، ایک وعدہ لینا چاہتا ہوں راجدیپ سے کہ آپ نے کرکٹ شروع کروانے کی مہم چلوانی ہے۔ ولید اقبال کا مزید کہنا ہے کہ دونوں ممالک کو وسعت قلبی دکھانے کی ضرورت ہے ۔ پاکستان میں جب الیکشن میں حصہ لیا جاتا ہے ہماری جتنی بھی پارٹیز ہیں وہ الیکشن مہم میں اپنے لوکل مسائل پر مہم چلاتی ہیں لیکن ہندوستان میں الیکشن مہم کا مرکز پاکستان دشمنی ہوتا ہے اس مائنڈ سیٹ کو نکالنے کی ضرورت ہے۔

کراچی (نیٹ نیوز/ایمرا نیوز) یوں تو دنیا میں ملک کا نام روشن کرنیوالے پاکستانیوں کے چرچے عام ہیں تاہم حال ہی میں ایک ایسے پاکستانی ڈیزائنر کے فیشن کے دنیابھر میں دھوم مچی ہوئی ہے جو مردوں کےشاندارملبوسات تیار کرنے میں مہارت رکھتے ہیں ۔سرفراز اکبر نامی یہ پاکستانی ٹیلر سابق امریکی صدر جارج ڈبلیو بش سمیت کئی نامورشخصیات کے ملبوسات تیار کر چکے ہیں۔سرفراز اکبر کراچی زمزمہ کی ایک شاپ میں اپنے فرائض سر انجام دے رہے ہیں جو گزشتہ دنوں ایک پرائیویٹ طیارے کے ذریعے امریکا پہنچے اور سابق امریکی صدر جارج ڈبلیوبش کے ملبوسات سینے کے لئے ان کا نا پ لیتے دکھائی دئیے اور بش نے سر فراز کے کام کو بیحد داد بھی دی ۔

امریکہ(نیٹ نیوز/ایمرا نیوز) امریکی خلائی تحقیقی ادارے ‘ناسا’ کا بغیر پائلٹ جہاز ’انسائٹ‘ 6 ماہ تک خلاء میں سفر کرنے کے بعد کامیابی سے مریخ کی سطح پر پہنچ گیا، جہاں سے بھیجی گئی تصویر کو سوشل میڈیا پر بھی شیئر کی گئی۔تصویر موصول ہونے کے بعد ناسا کی جیٹ پروپلزن لیبارٹری (Jet Propulsion Laboratory) میں ماہرین نے خوشی سے تالیاں بجائیں اور ایک دوسرے سے گلے مل کر مبارک باد دی ۔

انسائٹ زمین سے 54 کروڑ 80 لاکھ کلومیٹر کا سفر طے کر کے مریخ پر پہنچا ہے، جو وہاں دو سال تک موجود رہے گا۔365 کلوگرام وزن کے حامل اس خلائی جہاز پر گرمی سے بچنے کے لیےخاص ہیٹ شیلڈ لگائی گئی ہے جو تقریباً 15 سو ڈگری سینٹی گریڈ تک گرمی برداشت کرنے کی صلاحیت رکھتی ہے۔مریخ پر پہنچنے کے بعد انسائٹ خلائی جہاز سورج کی روشنی سے توانائی حاصل کرکے کام کرے گا اور جائزہ لے گا کہ زمین کی طرح یہ سیارہ اربوں سال پہلے کیسے وجود میں آیا۔9 کروڑ 93 لاکھ ڈالر لاگت کے حامل اس خلائی جہاز میں فرانسیسی خلائی ایجنسی کے آلات نصب ہیں اور اس پر نصب کیمرے مریخ کی سطح کا جائزہ لیں گے۔یہ خلای جہاز گولی کی رفتار سے بھی زیادہ تیز محض ایک گھنٹے میں 19 ہزار 800 کلومیٹر کا فاصلہ طے کرتا ہے۔

اسلام آباد:(سپورٹس ڈیسک/ایمرا نیوز) تحریک انصاف کے رہنما جہانگیر ترین کے صاحبزادے علی ترین نے پاکستان سپر لیگ کی چھٹی ٹیم خریدنے میں دلچسپی ظاہر کی ہے۔ علی ترین نے تصدیق کی ہے کہ وہ پی ایس ایل کے چوتھے ایڈیشن کے لیے فرنچائز خریدنا چاہتے ہیں اور اس سلسلے میں انہوں نے پی سی بی ہیڈکوارٹر لاہور میں آفیشلز سے دو سے تین ملاقاتیں بھی کی ہیں۔علی ترین نے کہا کہ وہ پی ایس ایل فور کے ٹینڈر کے لئے باقاعدہ درخواست دینے کے لئے ابتدائی کام مکمل کر چکے ہیں۔

دوسری جانب پی ایس ایل میں کھلاڑیوں کے منیجر کی حیثیت سے کام کرنے والے عمران احمد خان نے جیو نیوز سے دبئی میں بات کرتے ہوئے بتایا کہ علی ترین نے پی سی بی سے چھٹی ٹیم کے حوالے سے ضرور بات کی ہے، البتہ چھٹی ٹیم کے مالک کا فیصلہ ٹینڈر کے ذریعے ہوگا جو دسمبر کے پہلے ہفتے میں جاری کر دیا جائے گا۔عمران احمد نے کہا کہ ہماری کوشش ہے کہ آئندہ ماہ پی ایس ایل کی چھٹی ٹیم کے مالکانہ حقوق فروخت کردیے جائیں۔یاد رہے کہ پاکستان سپر لیگ کے تیسرے ایڈیشن میں شامل ہونے والی ‘ملتان سلطان’ 52 کروڑ میں فروخت ہوئی تھی، اس سال ڈرافٹ سے قبل پی سی بی کو بینک گارنٹی اور فرنچائز فیس نہ دینے کے باعث مالکانہ حقوق سے دست بردار ہو چکی ہے۔جہانگیر ترین کے فرزند علی ترین اس عزم کا اظہار کرچکے ہیں کہ اگر انہیں پی ایس ایل میں چھٹی ٹیم لینے کا موقع ملا تو وہ جنوبی پنجاب میں کرکٹ کے حوالے سے اب بھی کام کر رہے ہیں اور اس اقدام کے بعد مزید بہتر انداز میں ڈومیسٹک سطح پر کھیل کے فروغ کے لیے بہت کچھ کرنے کا ارادہ رکھتے ہیں۔