Tag media92tv

اسلام آباد:(نیٹ نیوز/ایمرا نیوز) قومی احتساب بیورو (نیب) کی حراست میں موجود مسلم لیگ (ن) کے صدر اور قومی اسمبلی میں قائد حزب اختلاف شہباز شریف کا اسلام آباد کے پمز اسپتال میں طبی معائنہ ہوا، جس کے بعد ڈاکٹروں کی جانب سے سفر کی اجازت ملنے پر انہیں لاہور منتقل کردیا گیا۔واضح رہے کہ سابق وزیراعلیٰ پنجاب شہباز شریف آشیانہ ہاؤسنگ اسکینڈل کے سلسلے میں اِن دنوں نیب لاہور کی تحویل میں ہیں، انہیں قومی اسمبلی اجلاس میں شرکت کی غرض سے راہداری ریمانڈ پر اسلام آباد لایا گیا تھا۔ذرائع کے مطابق شہباز شریف کا طبی معائنہ پمز اسپتال کے ڈاکٹروں نے کیا اور انہیں سفر کی اجازت دی، جس کے بعد نیب ٹیم شہباز شریف کو لے لاہور پہنچ گئی۔واضح رہے کہ چند روز قبل شہباز شریف کے خون کی تجزیاتی رپورٹ میں کینسر کی علامات دوبارہ ظاہر ہونے کا انکشاف ہوا تھا، جس کے بعد پولی کلینک کے ڈاکٹروں نے ان کے خون کے نمونے حاصل کرنے کے علاوہ ان کاسی ٹی اسکین کیا تھا۔دوسری جانب ڈاکٹروں نے شہباز شریف کے طبی معائنے کے بعد کینسر ماہرین پر مشتمل بڑا بورڈ تشکیل دینے کی سفارش بھی کی تھی۔واضح رہے کہ شہباز شریف ماضی میں سرطان کے مرض سے صحت یاب ہوئے تھے۔طبی ماہرین کا کہنا ہے کہ سرطان کے مریضوں میں مرض دوبارہ ظاہر ہونے کے امکانات موجود ہوتے ہیں۔

لاہور:(نیٹ نیوز/ایمرا نیوز) کرتار پور راہداری کے سنگ بنیاد کی تقریب میں شرکت کے لیے بھارتی وفد پاکستان پہنچ گیا۔سابق بھارتی کرکٹر اور سیاست دان نوجوت سنگھ سدھو کی قیادت میں بھارتی وفد واہگہ بارڈر کے راستے پاکستان پہنچا جہاں پنجاب رینجرز کے حکام نے ان کا استقبال کیا۔وزیراعظم عمران خان کل نارووال کے قریب کرتار پور راہداری کا سنگ بنیاد رکھیں گے جب کہ تقریب میں بھارتی وفد سمیت پاکستان میں موجود سکھ یاتری بھی تقریب میں شرکت کریں گے۔پاکستان کی تجویز پر نریندر مودی حکومت نے کرتار پور سرحد تک اپنی حدود میں راہداری بنانے کی منظوری دی، اس سے قبل پاکستان نے بھارت کو پیشکش کی تھی کہ سکھ یاتریوں کو بغیر کسی دشواری کرتارپور آنے کے لیے پاکستان راضی ہے، بھارت بھی اس کی اجازت دے۔ یاد رہے کہ ضلع نارووال میں واقع کرتار پور بھارتی سرحد سے متصل علاقہ ہے جہاں سکھ مذہب کے بانی بابا گرو نانک دیو جی نے اپنی زندگی کے آخری ایام گزارے اور یہیں گردوارے میں ان کی قبر بھی ہے۔سکھ یاتریوں کو کرتارپور تک پہنچنے کے لیے پہلے لاہور اور پھر تقریبا 130 کلو میٹر کا سفر طے کر کے نارووال پہنچنا پڑتا تھا جب کہ بھارتی حدود سے کرتارپور 3 سے 4 کلو میٹر دوری پر ہے۔
کرتارپور کی اہمیت و پس منظر
ہندوستان کی تقسیم کے وقت گردوارہ دربار صاحب پاکستان کے حصے میں آیا، دونوں ممالک کے درمیان کشیدہ تعلقات کے باعث طویل عرصے تک یہ گردوارہ بند رہا۔بھارتی سکیورٹی فورس نے سرحد پر ایک ‘درشن استھل’ قائم کیا جہاں سے سکھ دوربین کی مدد سے دربار صاحب کا دیدار کرتے ہوئے اپنی عبادت کیا کرتے تھے اور پہلی بار 1998 میں دونوں حکومتوں کے درمیان ایک معاہدہ ہوا جس کے تحت ہر سال سکھ یاتریوں کو کرتارپور کا ویزہ ملنا شروع ہوا۔

ممبئی(شوبز ڈیسک/ایمرا نیوز) بالی وڈ میں مسٹر پرفیکشنسٹ کے نام سے مشہور اداکار عامر خان نے مصروفیت کے باعث فلم ’سارے جہاں سے اچھا‘ میں کام کرنے سے معذرت کرلی، جس کے بعد یہ پروجیکٹ اب بالی وڈ کنگ شاہ رخ خان کریں گے۔بھارتی نیوز ویب سائٹ ہندوستان ٹائمز کی رپورٹ کے مطابق عامر خان نے ایک تقریب میں انٹرویو دیتے ہوئے بتایا کہ ’یہ ایک بہترین پروجیکٹ ہے اور اسے نہ کرنے پر دکھ بھی ہو رہا ہے‘۔

رپورٹ کے مطابق عامر خان اس وقت فلم ’مہابھارت‘ کے پروجیکٹ میں مصروف ہیں جس کی وجہ سے انہوں نے فلم ’سارے جہاں سے اچھا‘ کرنے سے معذرت کرلی ہے۔عامر خان کا کہنا تھا کہ ’مجھے فلم کا اسکرپٹ بہت پسند آیا یہی وجہ ہے کہ میں نے اس فلم کے لیے شاہ رخ خان کو فون کیا اور کہا کہ وہ ایک دفعہ اسکرپٹ ضرور پڑھیں، انہیں فلم کی کہانی پسند بھی آئی اور مجھے بہت خوشی ہے کہ وہ اسے کرنے کے لیے راضی بھی ہوگئے‘۔ ’سارے جہاں سے اچھا‘ بائیوپک فلم ہے جو پہلے بھارتی خلاء باز راکیش شرما کی زندگی پر بنائی جا رہی ہے، جس کی کہانی راجابلی نے لکھی ہے۔فلم آئندہ برس فروری میں نمائش کے لیے پیش کی جائے گی۔واضح رہے کہ گزشتہ دنوں عامر خان اور امیتابھ بچن کی میگا بجٹ فلم ’ٹھگز آف ہندوستان‘ ریلیز کی گئی تھی جس نے باکس آفس پر ریلیز کے پہلے روز کمائی کا ریکارڈ بنایا تھا لیکن اس کے بعد فلم کوئی بڑا چھکا مارنے میں ناکام رہی۔میگا بجٹ فلم ’ٹھگز آف ہندوستان‘ کی ناکامی پر عامر خان فلم بینوں سے معافی بھی مانگ چکے ہیں۔

دبئی(سپورٹس ڈیسک/ایمرا نیوز) دو مختلف ٹیموں کے درمیان کرکٹ میچ ہو اور مداحوں کا آپس میں ٹاکرا نہ ہو، ایسا تو ہی نہیں سکتا۔ ایسا ہی کچھ پاکستان اور نیوزی لینڈ کے درمیان کھیلے جارہے دبئی ٹیسٹ کے تیسرے روز بھی ہوا، جہاں اسٹیڈیم میں موجود پاکستانی اور کیوی مداح میں نعروں کا دلچسپ مقابلہ ہوا۔میچ شروع ہوا تو نیوزی لینڈ کا پرچم تھامے ایک کیوی مداح اردو میں نعرے لگاتا نظر آیا، ‘جیتے گا بھئی جیتے گا، نیوزی لینڈ جیتے گا’، ‘کیوی کیوی’، ‘نیوزی لینڈ زندہ باد۔’کیوی شہری کے برابر میں موجود پاکستانی فین نے بھی نعرہ لگایا، ‘پاکستان زندہ باد’، ‘پاکستان وِن وِن’ (Pakistan win win)۔جس پر نیوزی لینڈ کے مداح نے کہا، ‘نو نو’۔تاہم میچ کے دوران جیسے ہی پاکستانی لیگ اسپنر یاسر شاہ نے میچ کا پانسہ پلٹا تو کیوی مداح نے بھی پلٹا کھایا اور اردو میں نعرے لگانے شروع کردیئے، ‘جیتے گا بھئی جیتے گا، پاکستان جیتے گا’۔اور تو اور نیوزی لینڈ کے اس مداح نے ‘پاکستان زندہ باد’ اور ‘جیوے جیوے پاکستان’ کے ساتھ ساتھ ‘نیوزی لینڈ ہارے گا’ کا بھی نعرہ لگا ڈالا۔جس پر پاکستانی فین نے ایک زبردست قہقہہ لگا دیا۔واضح رہے کہ گذشتہ روز دبئی ٹیسٹ کے تیسرے دن یاسر شاہ نے نیوزی لینڈ کی پہلی اننگز میں 41 رنز دے کر 8 وکٹیں جبکہ دوسری اننگز میں 2 وکٹیں حاصل کی تھیں۔گذشتہ روز ہی انہیں ٹیسٹ کرکٹ میں ایک ہی میدان میں 50 وکٹیں لینے والے تیسرے پاکستانی بولر کا اعزاز بھی حاصل ہوا۔

کراچی:(نیٹ نیوز/ایمرا نیوز) صدرمملکت عارف علوی کا کہنا ہے کہ پاک فوج دہشتگردی کے خلاف سیسہ پلائی دیوارہے اور ملک کے دفاع کیلیے ہم ہر قدم اٹھائیں گے۔کراچی میں صدرمملکت عارف علوی نے آئیڈیاز 2018 نمائش کی افتتاحی تقریب سے خطاب کے دوران کہا کہ حکومت نئے پاکستان کے حصول کی راہ پرگامزن ہے، ملک کی معیشت کو اپنے پاؤں پرکھڑا کرنے کی ہرممکن کوشش کررہے ہیں، آئین عام شہری کو ہرقسم کا تحفظ فراہم کرتا ہے۔صدر نے کہا کہ دہشتگردوں نے ہماری معیشت کوبہت نقصان پہنچایا، دہشتگردی کے خلاف پاکستانی فوج دنیا کی تجربہ کار ترین فورس ہے، ہمیں پاک فوج کےشہدا پر فخر ہے، پاکستان جغرافیائی لحاظ سے اہم مقام پرواقع ہے، پاک فوج دہشتگردی کے خلاف سیسہ پلائی دیوار ہے، ہمارے ہتھیاردفاع کے لیے ہیں اوراپنے ملک کے دفاع کیلیے ہم ہر قدم اٹھائیں گے جب کہ دہشتگردی کے خاتمے میں پاک فوج کا کردار انتہائی اہم ہے۔صدرمملکت عارف علوی نے کہا کہ افغان جنگ کے 32 لاکھ متاثرین کو پاکستان میں پناہ دی گئی، بھارت طاقت کے زورپرکشمیرکے حقوق نہیں دباسکتا اور اسے مذاکرات کی میزپرآنا ہوگا، ہماری امن کی کوششوں کو ہماری کمزوری نہ سمجھا جائے، خطے کے مسائل جنگ سے نہیں مذاکرات سے حل ہوں گے، خطے کی ترقی علاقائی امن و امان سے وابستہ ہے، پاکستان علاقائی تنازعات کا مذاکرات کے ذریعے حل چاہتا ہے جب کہ مسائل کو دبانے کے بجائے انھیں حل کیا جائے۔

ممبئی:(شوبز ڈیسک/ایمرا نیوز) ناموربالی ووڈ کامیڈین کپل شرما کا کہنا ہے کہ جب پہلی بارانہوں نے اپنی ہونے والی بیوی گینی کے گھررشتہ بھیجا توان کے سسر نے انہیں مسترد کردیا تھا۔بالی ووڈ کے مقبول ترین مزاحیہ اداکارکپل شرما کی زندگی کی کہانی پوری فلمی ہے، ان کی زندگی میں کئی دلچسپ اتارچڑھاؤ آئے ہیں جو کسی بھی ہندی فلم سے کم نہیں۔

کپل شرما نے حال ہی میں ایک انٹرویو کے دوران گینی کے ساتھ اپنی محبت کی فلمی کہانی لوگوں کے ساتھ شیئرکی۔کپل شرما نے بتایا وہ اور گینی (کپل کی ہونے والی بیوی) 2005 میں کالج میں ملے تھے جب گینی کی عمر 19 اور ان کی 24 برس تھی۔ کپل نے بتایا وہ نہایت قابل اسٹوڈنٹ تھے اوراپنا خرچہ پورا کرنے کے لیے انہوں نے کالج میں ڈراموں کی ہدایت کاری کرنی شروع کی تھی اورگینی سے پہلی ملاقات آڈیشن کے دوران ہوئی تھی اوراسی وقت سے دونوں نے ایک دوسرے کو پسند کرنا شروع کردیا تھا تاہم اس وقت میری مالی حالت زیادہ اچھی نہیں تھی اور ممبئی میں لافٹرچیلنج کے آڈیشن میں فیل ہوگیا تھا بعد ازاں دوسرے آڈیشن میں منتخب ہونے کے بعد جب میرے مالی حالات تھوڑے ٹھیک ہوئے تو میری والدہ گینی کے گھررشتہ لے کر گئیں تاہم گینی کے والد نے بڑے پیارسے بولا ’شٹ اپ‘ اورمجھے مسترد کردیا۔س کے بعد میں ممبئی آگیا اور میری کامیابی کا سفر شروع ہوگیا تاہم اس وقت بھی میں گینی کو بھولا نہیں تھا بعد ازاں 2016 میں میں نے فیصلہ کیا کہ مجھے گینی سے شادی کرلینی چاہیے اور میں نے اسے دوبارہ کال کی اور شادی کی پیشکش کی۔ اور اس بار گینی کے والد نے کپل کو مسترد نہیں کیا۔کپل نے بتایا میرے برے وقت میں گینی نے میرا بہت ساتھ دیا تھا وہ ہر وقت میرے لیے دعائیں کرتی تھی اوراس وقت مجھے احساس ہوا اس سے اچھی لڑکی مجھے نہیں مل سکتی۔ کپل اور گینی کی خوبصورت لواسٹوری اب شادی میں بدلنے جارہی ہے، دونوں 13 سال تک محبت کے رشتے میں بندھے رہنے کے بعد اگلے ماہ 12 دسمبرکو شادی کے بندھن میں بندھ جائیں گے جب کہ دونوں کے استقبالیے کی تقریب 22 دسمبر کوہوگی۔

دبئی:(سپورٹس ڈیسک/ایمرا نیوز) دوسرے ٹیسٹ کے چوتھے روز پاکستان کے خلاف نیوزی لینڈ کی بیٹنگ جاری ہے۔دبئی ٹیسٹ کے چوتھے روز نیوزی لینڈ نے 2 وکٹ کے نقصان پر 131 رنز سے کھیل کا آغاز کیا تو کچھ ہی دیر میں پاکستان کو پہلی کامیابی حاصل ہوگئی۔

نیوزی لینڈ کی تیسری وکٹ 146 رنز پر گر گئی اور ٹام لیتھم 50 رنز بنا کر حسن علی کی گیند پر کیچ آؤٹ ہوگئے۔ اس کے بعد راس ٹیلر نے ٹیم کو سہارا دینے کی کوشش کی اور اسکور 198 رنز تک پہنچا دیا تاہم بلال آصف نے راس ٹیلر کو 82 رنز پر کیچ آؤٹ کرا دیا جس کے نتیجے میں نیوزی لینڈ کی چوتھی وکٹ 198 رنز پر گر گئی۔پاکستان نے پہلی اننگ میں 418 رنز بنائے تھے جس کے جواب میں نیوزی لینڈ کی پوری ٹیم صرف 90 رنز پر ڈھیر ہوگئی۔ میچ کے تیسرے روز قومی ٹیم کی جانب سے فالو آن کروانے کے بعد کیویز نے 2 وکٹ پر 131 رنز بنائے تھے۔

کراچی(سپورٹس ڈیسک/ایمرا نیوز) پاکستان میں انٹر نیشنل کرکٹ کی بحالی کی جانب ایک مثبت پیش رفت کے طور پر آئندہ ماہ کراچی کے دو میدان ایمرجنگ ایشیا کپ کرکٹ ٹورنامنٹ کے چھ میچوں کی میزبانی کریں گے۔ بنگلہ دیش، متحدہ عرب امارات اور ہانگ کانگ کے علاوہ میزبان پاکستان کی ٹیم حصہ لیں گی۔ بھارت نے پاکستان آنے سے انکار کرتے ہوئے اپنے میچ سری لنکا میں کھیلنے کا فیصلہ کیا ہے۔ کولمبو فائنل کی میزبانی کرے گا۔ کراچی میں تین غیر ملکی ٹیموں کے آمد کے موقع پر سخت سیکیورٹی فراہم کی جائے گی۔ پیر کو ہوم سیکریٹری کے دفتر میں ہونے والے اجلاس میں پی سی بی کے کرنل عثمان اور دیگر ایجنسیوں کے نمائندوں نے شرکت کی۔پی سی بی ذرائع کا کہنا ہے کہ نیشنل اسٹیڈیم کراچی اور سائوتھ اینڈ کلب ون ڈے ٹورنامنٹ کے تین تین میچوں کی میزبانی کریں گے۔ ٹیمیں چار دسمبر کو کراچی پہنچیں گی۔ پانچ دسمبر کو پریکٹس ہوگی ۔ پاکستانی ٹیم اپنے تینوں میچ نیشنل اسٹیڈیم کراچی میں کھیلے گی۔ چھ دسمبر کو پاکستان کا پہلا میچ ہانگ کانگ اور دوسرا میچ بنگلہ
دیش اور متحدہ عرب امارات کے درمیان کھیلا جائے گا۔ سات دسمبر کو پاکستانی ٹیم متحدہ عرب امارات سے میچ کھیلے گی۔ جبکہ بنگلہ دیش اور ہانگ کانگ کا میچ ہوگا۔8 دسمبر کو آرام کا دن ہوگا جبکہ 9 دسمبر کو پاکستان کا میچ بنگلہ دیش اور متحدہ عرب امارات کا میچ ہانگ کانگ سے ہوگا۔ دس دسمبر کو غیر ملکی ٹیموں کی واپسی ہوگی۔

(نیٹ نیوز/ایمرا نیوز)
ملکی تاریخ میں پہلی بار کسی خواجہ سرا کوڈرائیونگ لائسنس جاری کردیا گیا ہے۔ذرائع کے مطابق لیلیٰ علی نامی خواجہ سرا پچھلے دس سال سے گاڑی چلارہا تھا مگر اس کے پاس ڈرائیونگ لائسنس نہیں تھا۔اس نے لائسنس کے لئے کئی بار درخواست بھی دی تھی مگر کچھ نہ ہوا۔

گزشتہ روز لیلیٰ نےآئی جی اسلام آباد پولیس محمد عامر ذوالفقارسے ملاقات کی اور اپنے طبقے کو درپیش مسائل سے آگاہ کیا،انہوں نےمسائل سننے کے بعد اپنےماتحت افسران کو ہدایت کی کہ آئندہ خواجہ سرا طبقے کے مسائل ترجیح بنیادوں پرحل کیے جائیں۔ترجمان پولیس کے مطابق علی لیلیٰ کوخیرسگالی طورپراسلام آبادٹریفک پولیس دفتر بھجوایا گیاجہاں لائسنس کے حصول کے لیے تمام دستاویزی کارروائی اور ٹیسٹ کے بعد انہیں ڈرائیونگ لائسنس فراہم کیاگیا۔

امریکہ(نیٹ نیوز/ایمرا نیوز) امریکی صدر ڈونلڈ ٹرمپ کی اہلیہ میلانیا ٹرمپ نے کرسمس کی تیاریوں کا آغاز کرتے ہوئے وائٹ ہاؤس میں کی گئی سجاوٹ کا افتتاح کردیاہے ۔کرسمس ڈیکوریشن کی جاری کردہ ویڈیو میں وائٹ ہاؤس میں کی گئی تیاریوں اور دلکش سجاوٹ کے مناظر فلمائے گئے ہیں۔

وائٹ ہاؤس کی سجاوٹ میں میلانیا نے صدر ڈونلڈ ٹرمپ کی پسند کو مدنظر رکھا ہے۔امریکی خاتون اول نے وائٹ ہاؤس میں کرسمس ڈیکوریشن کے تمام معاملات بڑی ذمہ داری سے نبھائے اورسینکڑوں رضاکاروں کی مدد سے اس سجاوٹ کا حتمی شکل دی ۔

اس سال کرسمس کے جشن میں کی گئی سب سے اہم سجاوٹ میں جنجر بریڈ سے بنا وائٹ ہاؤس کا دلکش ماڈل،گولڈ اسٹار فیملی ٹری اور چائنا روم قابلِ ذکر ہیں۔رواں برس اس سجاوٹ میں امریکا کی مختلف ریاستوں سے تقریباً225رضاکاروں نے حصہ لیا اور گھنٹوں کی محنت کے بعد یہ سجاوٹ کی گئی۔کرسمس کے لیے وائٹ ہاؤس کو جِھل مِل کرتی روشنیوں اور کرسمس ٹریز کو چاروں طرف قمقموں اورسنہری ستاروں سے سجایا گیا ہے۔