Tag pm imran khan

اسلام آباد:(نیٹ نیوز/ایمرا نیوز) ملک میں بڑھتی ہوئی آبادی کے معاملے پر غور کے لیے چیف جسٹس آف پاکستان جسٹس ثاقب نثار کی زیر صدارت اہم کانفرنس جاری ہے۔ لاء اینڈ جسٹس کمیشن کے زیر انتظام منعقد ہونے والی اس کانفرنس کے مہمان خصوصی وزیراعظم عمران خان ہیں۔سپریم کورٹ کی جانب سے جاری کیے گئے اعلامیے کے مطابق اعلیٰ عدلیہ کے جج صاحبان، ماہرین اور دیگر اسٹیک ہولڈرز بھی کانفرنس میں شرکت کریں گے۔اعلامیے کے مطابق کانفرنس سے چیف جسٹس ثاقب نثار اور وزیراعظم عمران خان کے علاوہ وفاقی وزیر صحت عامر کیانی اور بینظیر انکم سپورٹ پروگرام (بی آئی ایس پی) کی چیئرپرسن ڈاکٹر ثانیہ نشتر بھی خطاب کریں گی۔کانفرنس سے عالم دین مولانا طارق جمیل اور دیگر ماہرین بھی خطاب کریں گے۔اعلامیے کے مطابق گلوکار شہزاد رائےکانفرنس سے متعلق تھیم سانگ بھی پیش کریں گے۔اجلاس کے دوران آبادی پر قابو پانے کے لیے فیصلوں اور رہنمائی کے لیے 31 دسمبر تک ٹاسک فورسز بنائی جائیں گی۔دوسری جانب وفاقی حکومت کی جانب سے خصوصی فنڈ بنائے جانے کا بھی امکان ہے۔واضح رہے کہ گذشتہ دنوں ڈیم فند ریزنگ کے لیے دورہ برطانیہ کے دوران چیف جسٹس ثاقب نثار نے دسمبر سے آبادی پر کنٹرول کے لیے ‘2 بچے ہی اچھے’ مہم شروع کرنے کا اعلان کیا تھا۔جسٹس ثاقب نثار نے اس موقع پر کہا تھا کہ 12 یا 13 دسمبر سے وہ مہم شروع کرنے جارہے ہیں، جس کے دوران اس حوالے سے آگاہی پیدا کی جائے گی کہ آبادی کو کیسے کنٹرول کرنا ہے۔انہوں نے کہا تھا کہ ‘میں اس کی شروعات اپنے گھر سے کروں گا اور اپنے بچوں کو بھی اس کی تلقین کروں گا’۔چیف جسٹس نے امید ظاہر کی تھی کہ اس معاملے کی نزاکت کو دیکھتے ہوئے اور پاکستان کی بقا کے لیے قوم ان کے ساتھ اس مہم میں بھرپور تعاون کرے گی۔واضح رہے کہ حالیہ مردم شماری کے نتائج کے مطابق پاکستان کی مجموعی آبادی 20 کروڑ 77 لاکھ 74 ہزار 520 سے زائد ہے۔

(نیٹ نیوز/ایمرا نیوز) وزیراعظم عمران خان نے کہا ہے کہ وزرا کی کارکردگی جائزہ لے رہے ہیں ،ہوسکتا ہے کچھ وزرا ءکو ہٹا بھی دیں، 100 روز میں سارے وزراء نے مجھے رپورٹ دی ہے کہ اب تک انہوں نے کیا کیا،کارکردگی دیکھ کر ممکن ہے وزرا کو تبدیل کیا جائے۔انہوں نے کہا کہ پچھلے 100دن میں جتنا کام کیا اتنا ساری زندگی نہیں کیا،موجودہ حالات میں جتنی محنت کی ہے اتنی محنت پوری زندگی میں نہیں کی۔سینئر صحافیوں سے گفتگو کرتے ہوئے عمران خان نے کہا کہ اعظم سواتی کے معاملے پرعدالتی فیصلے پرعمل کریں گے، اعظم سواتی کے معاملے پرجے آئی ٹی میں مداخلت نہیں کی، کسی کوتحفظ دینے کے لیے کوئی مداخلت نہیں کریں گے،سی ڈے اے میرے ماتحت ہے، کیا میں مداخلت نہیں کرسکتاتھا؟ بابراعوان نے خود اپنے عہدے سےاستعفا دیا،اگر اعظم سواتی کی غلطی ہوئی تو وہ خود استعفا دیں گے۔عمران خان نے کہا کہ عثمان بزدار کو شکایت ملی کہ کسی نے بشریٰ بی بی کی بیٹی سےناروا سلوک کیاہے،کیا چیف ایگزیکٹو عثمان بزدارکسی پولیس افسرکوبلاکرپوچھ نہیں سکتا؟ عثمان بزدار جیسا وزیراعلیٰ پنجاب کو کبھی ملا ہی نہیں۔انہوں نے کہا کہ انفارمیشن چھپانے کی کوشش وہ کرتاہےجو خوفزدہ ہوتاہے، میری خواہش ہے کہ ہماری حکومت اتنی شفاف ہو کہ پہلے ایسی حکومت نہ آئی ہو، اگرمیرا کوئی وزیرغلط کام کرتا ہے توچاہتا ہوں وہ بے نقاب ہو۔حکومت کے سو دن سے متعلق ایک سوال پر وزیر اعظم عمران خان کا کہنا تھا کہ اگرپل بھی بناتے ہیں تو وہ 100 دن میں نہیں بنتا، ایک ایسا سسٹم چاہتےہیں جس میں نچلے طبقے کے لئے پالیسیاں ہوں، ہیلتھ کارڈ سارے پاکستان میں لے کر آرہےہیں، سرکاری اسپتالوں کوبہتربنانےپرکام کررہے ہیں۔ایک سوال پر وزیر اعظم نے کہا کہ مرغی اورانڈے کی بات پربہت شورمچایا گیا، بل گیٹس نےجب مرغی اورانڈے کی بات کی تواس کوسراہا گیا،اُن کا کہنا تھا کہ حلال گوشت کا ٹریڈ دو ہزار ارب کا ہے۔وزیراعظم عمران خان نے کا کہنا تھا کہ ڈالر کی قیمت میں اچانک اضافے کا میڈیا سے پتا چلا، میکنزم بنارہے ہیں کہ اسٹیٹ بینک حکومت کو بتائے بغیر روپے کی قدر کم نہ کرسکے، انہوں نے عوام کو یقین دہانی کرائی کہ اس ملک میں ڈالروں کی کمی نہیں ہوگی ۔اسٹیٹ بینک خودمختار ادارہ ہے،اسٹیٹ بینک نے معاشی صورتحال کے باعث ڈالر بڑھانے کا فیصلہ کیا، اسٹیٹ بینک نےاپنی سمجھ کےمطابق معاشی حالات کے باعث روپے کی قدرکم کی، ن لیگ حکومت نےروپےکی قدرمصنوعی طورپربرقراررکھی جسکی وجہ سے 7 ارب خرچ ہوئے، ہمارے دور میں دوبار روپے کی قدرگری ہے، دونوں بار خبروں کےذریعے پتا چلا کہ روپےکی قدرگری ہے، زرمبادلہ کےذخائر بچانےکے لئے ڈالر کی قدر میں اضافہ عارضی اقدام ہے۔وزیراعظم عمران خان نے کرتار پور راہدری سے متعلق وزیر خارجہ کے بیان کی وضاحت کرتے ہوئے کہاکہ ’ یہ فیصلہ گوگلی نہیں تھی بلکہ سیدھا سادہ فیصلہ تھا، شاہ محمود کا مطلب تھا کہ بھارت میں الیکشن آرہے ہیں، وہ پاکستان کے خلاف نفرت پھیلانے کی کوشش کررہا ہے لیکن ہم نے نفرت پھیلانےکا منصوبہ روکنے کے لیے کرتارپور کوریڈور کھولا ہے لہٰذا نفرت پھیلانے کا منصوبہ ناکام بنانے کو گوگلی کہہ سکتے ہیں لیکن اس کا قطعاً یہ مقصد نہیں کہ ہم نے دھوکا یا ڈبل گیم کیا ہے‘۔ وزیراعظم نے وزیراعلیٰ پنجاب کے معاملے پر چیف جسٹس کے ریمارکس پر شکوہ بھی کیا۔ عمران خان نے کہا کہ ‘چیف جسٹس نے وزیراعلیٰ پنجاب کے بارے میں جو کہا انہیں دیکھنا چاہیے تھا کہ وہ صوبے کے چیف ایگزیکٹو ہیں جب کہ زلفی بخاری سے متعلق چیف جسٹس کے ریمارکس پر بھی افسوس ہوا، میں نے کبھی اقربا پروری نہیں کی، چیف جسٹس کی عزت کرتا ہوں لیکن ان چیزوں پر افسوس ہے‘۔قائمہ کمیٹیوں کی تشکیل سے متعلق وزیراعظم کا کہنا تھا کہ ’آج قائمہ کمیٹیاں بنارہے ہیں جب کہ پبلک اکاؤنٹس کمیٹی کے معاملے پر اپوزیشن تعاون نہیں کررہی، اگر اپوزیشن کا تعاون نہیں رہا تو پی اے سی کا چیئرمین شہبازشریف کی بجائے اپنے طورپر کسی کو بنائیں گے‘سرمایہ کاری سے متعلق سوال کا جواب دیتے ہوئے وزیر اعظم نے کہا کہ چھوٹی سے مدت میں بڑے بڑے سرمایہ کار ملک میں آئے ہیں، چین کی طرز کا ایکسپورٹ زون ملک میں لے کر آرہےہیں۔انہوں نے کہا کہ لیگل ایڈ اتھارٹی بنارہےہیں، ایسےغریب جو وکیل نہیں کرسکتےحکومت انہیں وکیل کرکے دے گی۔

اسلام آباد: (نیٹ نیوز/ایمرا نیوز) وزیراعظم عمران خان نے کہا ہے کہ قبل از وقت انتخابات ہو سکتے ہیں، کپتان کی سٹریٹجی کسی وقت بھی تبدیل ہو سکتی ہے۔وزیراعظم نے کہا کہ منی لانڈرنگ سے متعلق سخت قانون لا رہے ہیں، ہمیں تباہ حال معیشت ملی، ڈالر کا بڑھنا یا کم ہونے میں حکومت کا کوئی کردار نہیں، بھارت کا نفرت پھیلانے کا منصوبہ روکنے کے لیے کرتارپور کھولا۔وزیراعظم عمران خان نے ٹی وی اینکرز اور سینئر صحافیوں سے ملاقات میں سیاسی، معاشی اور کرتارپور بارڈر سے متعلق معاملات پر بھی تفصیلی گفتگو کی۔وزیراعظم نے ایک سوال کے جواب میں کہا کہ جنوبی پنجاب صوبہ بنانا ایک لمبا مرحلہ ہے، ہو سکتا ہے ملک میں قبل از وقت انتخابات ہوں، آنے والے 10 دنوں میں وزارتوں میں بھی تبدیلیاں ہو سکتی ہیں۔وزیراعظم عمران خان نے منی لانڈرنگ سے متعلق سخت قانون لانے کا بھی اعلان کیا۔ انہوں نے کہا کہ بڑے بڑے لوگ نام سامنے آنے سے ڈر رہے ہیں، گو سلو پالیسی والے افسران کو کامیاب نہیں ہونے دیں گے اور اگر اپوزیشن ساتھ نہیں چلنا چاہتی تو نہ چلے، شہباز شریف کو پبلک اکاؤنٹس کمیٹی کا چیئرمین نہیں بنائیں گے۔معاشی صورتحال کا ذکر کرتے ہوئے انہوں نے کہا کہ ہمیں تباہ حال معیشت ملی، ڈالر کا بڑھنا یا کم ہونے میں حکومت کا کوئی کردار نہیں ہے۔کرتارپور راہداری سے متعلق وزیراعظم عمران خان کا کہنا تھا کہ ہم نے بھارت کے نفرت پھیلانے کا منصوبہ ناکام بنا دیا اور اس نفرت آمیز منصوبے کو روکنے کے لیے ہی کرتارپور کھولا، کرتارپور کھولنے کا مقصد کسی کو دھوکا دینا نہیں تھا جبکہ یہ فیصلہ گگلی نہیں ایک سیدھا سادہ فیصلہ ہے۔انہوں نے کہا کہ ہم مسئلہ کشمیر کے حل کے لیے پرعزم ہیں، دونوں حکومتیں چاہیں تو یہ مسئلہ حل ہو سکتا ہے۔ وزیراعظم نے ایک بار پھر اپنے یوٹرن کے موقف کی حمایت کی اور کہا کہ یوٹرن عظیم لوگ ہی لیتے ہیں۔

لاہور:(نیٹ نیوز/ایمرا نیوز) ہائیکورٹ نے مسلم لیگ (ن) کے رہنما خواجہ سعد رفیق اور ان کے بھائی سلمان رفیق کی پیراگون ہاؤسنگ اسکینڈل کیس میں درخواست ضمانت میں 5 دسمبر تک توسیع کرتے ہوئے چیئرمین نیب کو ہدایت کہ ہے کہ وہ تبدیلی تفتیش کی درخواست پر جلد از جلد قانون کے مطابق فیصلہ کریں۔لاہور ہائیکورٹ کے جسٹس طارق عباسی کی سربراہی میں 2 رکنی بنچ نے خواجہ برادران کی پیراگون ہاؤسنگ اسکینڈل میں ضمانت قبل از گرفتاری کی درخواست پر سماعت کی۔ درخواست گزاروں نے مؤقف اختیار کیا کہ کسی قسم کی کرپشن نہیں کی، نیب کی تفتیش میں مکمل تعاون کیا، درخواست ضمانت قبل از گرفتاری منظور کی جائے۔عدالت نے نیب کے وکیل سے استفسار کیا ‘کیا گرفتاری سے متعلق دستاویزات خواجہ برادران کو دے دی ہیں جس پر وکیل نے جواب دیا جب گرفتار کیا جائے گا، تب دستاویزات دی جائیں گی۔عدالت نے اظہار برہمی کرتے ہوئے کہا کیا وہ دستاویزات عدالت کو بھی نہیں دکھائی جا سکتیں جس پر وکیل کا کہنا تھا کہ گرفتاری کے جواز سے متعلق دستاویزات نیب آفس میں ہیں۔عدالت نے سوال پوچھا کہ کیا خواجہ سعد رفیق اور سلمان رفیق عدالت میں موجود ہیں جس پر عدالت کو بتایا گیا کہ وہ موجود ہیں، درخواست گزاروں نے کہا کہ خدشہ ہےکہ نیب کی جانب سےگرفتار کر لیا جائے گا۔عدالت نے فریقین وکلا کے دلائل سننے کے بعد خواجہ برادران کی درخواست ضمانت میں 5 دسمبر تک توسیع کردی جب کہ عدالت نے چیئرمین نیب کو بھی ہدایت کی کہ خواجہ برادران کی تبدیلی تفتیش کی درخواست پر جلد از جلد قانون کے مطابق فیصلہ کریں۔نیب پراسیکیوٹر کا مؤقف ہے کہ خواجہ سعد رفیق کے خلاف تین انکوائریز زیر التوا ہیں جن میں پیرا گون، آشیانہ اقبال اور پاکستان ریلوے میں کرپشن سے متعلق انکوائریز شامل ہیں۔ نیب کی جانب سے خواجہ سعد رفیق کے وارنٹ گرفتاری جاری کیے جا چکے ہیں اور اس حوالے سے نیب پراسیکیوٹر نے عدالت کو بھی آگاہ کر رکھا ہے۔