Tag psl4

یوم پاکستان کے موقعہ پر کوئٹہ میں جشن مناکر خوشی دوبالا ہو جائے گی، خوشیوں کو کوئٹہ اپنے چاہنے والوں کے ساتھ باٹنے کے خواہش مند ہیں، ندیم عمر/سرفراز احمد
لاہور(ایمرا نیوز آن لائن)پی ایس ایل فور کی فاتح کوئٹہ گلیڈیٹر کی ٹیم اپنی کامیابی کا جشن یوم پاکستان کے موقعہ پر23 مارچ کو ٹرافی کے ہمراہ کوئٹہ میں اپنے پرستاروں اور مداحوں کے ساتھ منائے گی۔کوئٹہ گلیڈیٹر کے روح رواں ندیم عمر کی قیادت میں فرنچائز کے قافلے میں کپتان سرفراز احمد، ہیڈ کوچ، سابق ٹیسٹ کپتان معین خان،احمد شہزاد،انورعلی، احسان علی اور ٹیم منیجر اعظم خان سمیت دیگر بھی شامل ہوں گے۔اس حوالے سے ندیم عمر کا کہنا ہے کہ ہم لیگ میں میں شاندار فتح کی خوشیوں کو کوئٹہ اپنے چاہنے والوں کے ساتھ باٹنے کے خواہش مند ہیں، ٹرافی کی آمد پر جشن کا سا سماں ہوگا،ہمیں اس بات پر بھی فخر ہے کہ ہماری فرنچائز کی جیت کی بدولت بدول دنیا میں کوئٹہ اور بلوچستان کا نام روشن اور مثبت تاثرابھرا ہے، کوئٹہ گلیڈیٹر کی ٹیم وزیر اعلی بلوچستان جام کمال خان سے ملاقات کے ساتھ پاکستان آرمی کی سدرن کمانڈ کے سربراہ لیفٹینینٹ جنرل عاصم سلیم باجوہ سے ملے گی۔دوسری جانب کامیابی پر ملک بھر میں خیرمقدم پر مسرور کپتان سرفراز احمد کا کہنا ہے کہ یوم پاکستان کے موقعہ پر کوئٹہ میں جشن مناکر خوشی دوبالا ہو جائے گی۔

ہم انسان ہیں مشینیں نہیں،آسٹریلیاکیخلاف آرام کا فیصلہ درست ہے‘حسن علی
شہر قائد کے باسیوں کا شکریہ ادا کرنا چاہتا ہوں، لوگ کرکٹ سے لگاؤ رکھتے اور میچ دیکھنا چاہتے ہیں‘انٹرویو
لاہور(ایمرا نیوز آن لائن) قومی ٹیم کے فاسٹ باولر حسن علی نے آسٹریلیا کےخلاف ون ڈے سیریز کیلئے اہم کھلاڑیوں کو آرام کروانے کا فیصلہ درست قراردیدیا۔جمعرات کو ایک انٹر ویو میں نامور فاسٹ باولر حسن علی نے کہا کہ سلیکٹرز، کوچ اور کپتان نے باہمی مشاورت سے فیصلہ کیا، ہم انسان ہیں مشینیں نہیں، میں گزشتہ 6ماہ سے تینوں فارمیٹ میں مسلسل کھیل رہا ہوں، میرے لیے آرام کرنا ضروری ہو گیا تھا، اب ورلڈکپ جیسے بڑے چیلنج سے قبل ذہنی اور جسما نی طور پر تازہ دم ہو جاؤں گا۔حسن علی نے کہا کہ وکٹ کا جشن منانے کیلئے منفرد انداز سے فٹنس مسائل پیدا نہیں ہوتے، میں نے پرستاروں کیلئے یہ انداز اپنایا تھا،اللہ تعالیٰ نے عزت دی،بچے، بوڑھے سب اس کو پسند کرتے ہیں،زوردار ایکشن کی وجہ سے کبھی فٹنس کا مسئلہ نہیں ہوا،پٹھوں میں کھچاوٹ تو ایک کروٹ سوئے رہنے سے بھی ہوجاتی ہے، بعض اوقات باؤلنگ کرتے ہوئے بھی کھلاڑیوں کی گردن اکڑجاتی ہے،اس کا جشن منانے کے ایکشن کےساتھ کوئی تعلق نہیں ہے۔انہوں نے کہا کہ پاکستان میں پی ایس ایل میچز کی رونقوں سے زندگی ہی بدل گئی،یو اے ای میں مقابلوں کی دوران سٹیڈیمز میں تھوڑے بہت تماشائی آتے تھے،کراچی میں میلہ لگا تو بھرپور ہوم کرآڈ کی موجودگی میں ماحول ہی بدل گیا، میں شہر قائد کے باسیوں کا شکریہ ادا کرنا چاہتا ہوں، لوگ کرکٹ سے لگاؤ رکھتے اور میچ دیکھنا چاہتے ہیں۔

پی ایس ایل 5 کے تمام میچز پاکستان پاکستان میں ہوں گے، پی سی بی نے ملتان اور راولپنڈی کے اسٹیڈیمز کو اپ گریڈ کرنے کا فیصلہ کرلیا
لاہور(ایمرا نیوز آن لائن )پاکستان سپر لیگ 5 کے ممکنہ وینیوز کے نام سامنے آگئے، پی ایس ایل 5 کے تمام میچز پاکستان پاکستان میں ہوں گے، پی سی بی نے ملتان اور راولپنڈی کے اسٹیڈیمز کو اپ گریڈ کرنے کا فیصلہ کرلیا۔ تفصیلات کے مطابق پاکستان سپر لیگ کا چوتھا سیزن بھرپور کامیابی کے بعد اختتام پذیر ہوچکا ہے۔پاکستان سپر لیگ 4 کے اختتام پر پاکستان کرکٹ بورڈ اور حکومت پاکستان پاکستان سپر لیگ 5 کے تمام میچز کا پاکستان میں انعقاد کروانے کا اعلان کر چکے ہیں۔اب اس حوالے سے مزید کچھ تفصیلات سامنے آئی ہیں۔ پاکستان سپر لیگ 5 کے ممکنہ وینیوز کے نام سامنے آگئے ہیں۔ پی ایس ایل 5 کے تمام میچز پاکستان کے کل 4 شہروں میں کھیلے جائیں۔ پاکستان سپر لیگ 5 کے میچز کراچی، لاہور، ملتان اور راولپنڈی کے میدانوں میں کھیلے جائیں گے۔ پی سی بی نے اس سلسلے میں ابھی سے تیاریاں شروع کرتے ہوئے ملتان اور راولپنڈی کے اسٹیڈیمز کو اپ گریڈ کرنے کا فیصلہ کرلیا ہے۔

بڑے سائز کی ایل سی ڈی،ڈش رسییور،میچ بک اور 49700 روپے کے کرنسی نوٹ برآمد
راولپنڈی(ایمرا نیوز آن لائن )پاکستان سپر لیگ کے کراچی میں کھیلے گئے کوئٹہ گلیڈیٹر اور کراچی کے اہم میچ پر رقم لگانے والے چار بکی گرفتار کر کے بڑے سائز کی ایل سی ڈی،ڈش رسییور،میچ بک اور 49700 روپے کے کرنسی نوٹ برآمد کر لئے گئے ۔یس ایچ او واہ کینٹ صدر راجہ اعزاز عظیم کے مطابق ملزمان بلال،احمد یاور خان عمر عارف اور قادر حسین کو پولیس اسٹیشن منتقل کر کے مقدمہ درج کر لیا گیا۔

اسلام آباد یونائیٹڈ اور لاہور قلندرز کے بیٹسمینوں نے 26 چھکے اور 37 چوکے لگائے
کراچی(ایمرا نیوز آن لائن )پی ایس ایل کی کراچی میں اینٹری ہوتے ہی پہلے میچ میں چھکوں چوکوں کی برسات پر پی سی بی حکام تشویش میں مبتلا ہوگئے۔کوئٹہ گلیڈی ایٹرز اور کراچی کنگز کے مابین اہم میچ اتنی ہی بانڈری پر کھیلا جائے گا جتنی پیمائش پہلے میچ میں تھی،کراچی کے نیشنل سٹیڈیم میں پی ایس ایل کے پہلے میچ میں دفاعی چیمپئن اسلام آباد یونائیٹڈ اور لاہور قلندرز کے بیٹسمینوں نے 26 چھکے اور 37 چوکے لگائے تھے ۔ ڈائریکٹر پی سی بی مدثر نذربانڈری کا جائزہ لینے سٹیڈیم پہنچے اور گرانڈ مین سے ملاقات کی۔ہیڈکیوریٹرآغا زاہد نے مدثر نذر کو بانڈری کی پیمائش کروائی اورویڈیو بھی بنائی، آغا زاہد نے مدثر نذ ر کو بتایا کہ بانڈری چھوٹی نہیں تھی اور 65 گز کی بنائی گئی تھی۔یاد رہے کہ اس میچ کے دوران اسلام آباد یونائیٹڈ کی جانب سے کئی ریکارڈز بنائے گئے جن میں ایک اننگز کے دوران سب سے زیادہ چھکے(16)،نیشنل سٹیڈیم میں ایک ٹی ٹونٹی اننگز کا سب سے بڑا مجموعہ(238)،پی ایس ایل کا مہنگا ترین سپیل(شاہین آفریدی 1-62-0-4) شامل ہے ۔

رکی ویسلز جنوبہ افریقہ کے سابق کپتان کیپلر ویسلز کے بیٹے ہیں، وکٹ کیپر بھی ہیں
کراچی(ایمرا نیوز آن لائن)سری لنکا کے اسیلا گنارتنے اور انگلینڈ کے رکی ویسلز پاکستان سپر لیگ کے کراچی میں ہونے والے میچز کے لیے لاہور قلندرز ٹیم میں شامل ہوگئے۔ لاہور قلندرز کے چیف آپریٹنگ آفیسر سمین رانا نے ٹیم میں نئے کھلاڑیوں کی شمولیت کی تصدیق کی۔انہوں نے بتایا کہ نیوزی لینڈ کے کوری اینڈرسن پہلے ہی پاکستان میں پی ایس ایل میچز کے لیے دستیاب نہیں تھے جبکہ نیدرلینڈز کے ریان ٹین ڈسکاٹی پشاور زلمی کے خلاف ہونے والے میچ میں انجری کا شکار ہوکر ایونٹ سے باہر ہوگئے تھے۔سمین رانا کا کہنا تھا کہ لاہور قلندرز کے گنارتنے آج ٹیم کو جوائن کرلیں گے۔ان کا کہنا تھا کہ لاہور قلندرز کو ایک وکٹ کیپر بیٹسمین کی ضرورت تھی جس کے لیے رکی ویسلز کو شامل کیا گیا ہے۔خیال رہے کہ رکی ویسلز اب دنیا کی تقریبا تمام بڑی لیگز کھیل چکے ہیں اور اب تک 2 سو سے زائد ٹی ٹوئنٹی میچز کھیلنے کا تجربہ رکھتے ہیں۔واضح رہے کہ رکی ویسلز جنوبہ افریقہ کے سابق کپتان کیپلر ویسلز کے بیٹے ہیں۔رکی ویسلز اس سے قبل بھی پی ایس ایل کا حصہ رہے ہیں اور انہوں نے گزشتہ سیزن میں پشاور زلمی کی نمائندگی کی تھی۔اس کے علاوہ سری لنکا کے 33 سالہ اسیلا گنارتنے اپنی بین الاقوامی ٹیم کی نمائندگی کرنے کے ساتھ ساتھ 48 ٹی ٹوئنٹی میچز کھیلنے کا تجربہ رکھتے ہیں۔

فائنل 8بجے شروع ہوگا،ٹیموں کی ٹریننگ اور پریس کانفرنسز کا شیڈول جاری
لاہور(ایمرا نیوز آن لائن )پی ایس ایل 4میں شریک ٹیموں کی کراچی میں مصروفیات کا شیڈول جاری کردیا گیا جبکہ 17مارچ کو اختتامی تقریب شام 6بجے سجائی جائیگی۔تفصیلات کے مطابق پی ایس ایل 4کا فائنل 17 مارچ کو ہوگا، اس سے قبل اختتامی تقریب 6 بجے سجائی جائےگی، رات 8بجے فیصلہ کن معرکہ شائقین کی توجہ کا مرکز بنے گا۔کراچی آنے والی ٹیموں کے میچز، پریکٹس سیشنز اور پریس کانفرنسزکا شیڈول بھی جاری کردیا گیا،کھلاڑی ہائی پرفارمنس سنٹر میں اپنی صلاحیتیں نکھارنے کیلیے سرگرم ہونگے، دوپہر 2:45 پر اسلام آباد یونائیٹڈ اور کراچی کنگز کے کھلاڑی ٹریننگ کریں گے،اسلام آباد یونائیٹڈ کے کسی کھلاڑی یا کوچ کی پریس کانفرنس بھی ہوگی، 3 بجے لاہور قلندرز کا کوئی کھلاڑی یا آفیشل میڈیا سے بات کریگا،لاہور قلندرز اور کوئٹہ گلیڈی ایٹرز کے پریکٹس سیشن شام ساڑھے 6بجے شروع ہونگے۔ہفتے کو دوپہر12بجے کراچی کنگز اور کوئٹہ گلیڈی ایٹرز کی ٹیمیں پریکٹس کریں گی، شام 4 بجے کے بعد دونوں ٹیموں کے کپتانوں کی میڈیا سے بات چیت بھی متوقع ہے،لاہور قلندرز اور اسلام آباد یونائیٹڈ کا میچ شام 7بجے شروع ہونا ہے، بعدازاں پریس کانفرنس بھی ہوگی۔اتوار کی دوپہر 12 بجے پشاور زلمی کا ٹریننگ سیشن شیڈول کیا گیا ہے،اس کے بعد ٹیم کے کسی کرکٹر کی میڈیا سے گفتگو ہوگی، شام 7بجے کراچی کنگز اور کوئٹہ گلیڈی ایٹرز آمنے سامنے ہونگے، میچ کے بعد دونوں ٹیموں کی پریس کانفرنس ہونی ہے۔پیر کو لاہور قلندرز اور ملتان سلطانز کا میچ سہ پہر 2 بجے شروع ہوگا، کراچی کنگز اور پشاور زلمی کے مقابلے کا آغاز رات 7 بجے ہوگا، چاروں ٹیمیں میچز ختم ہونے کے بعد پریس کانفرنس بھی کریں گی۔

کراچی(ایمرا نیوزآن لائن)پاکستان سپرلیگ کے لاہور کے میچز کراچی منتقل ہونے کے پر کراچی والوں کے لئے خوشخبری ، 10 مارچ کے ایک ٹکٹ پر شائقین 2 میچز دیکھ سکیں گے. ذرائع کے مطابق 10 مارچ کو ایک میچ کراچی اور دوسرا لاہور میں شیڈول تھا. ایک میچ کے بعد شائقین کو باہر بھیجنا ممکن نہیں تھا. امکان ہے کہ شائقین لاہور قلندر اور ملتان سلطان کا میچ مفت دیکھیں.

چھتوں کی صرف 30فیصد تنصیب باقی ہے،اسٹیڈیم کو7سے 17 مارچ تک فائنل سمیت پی ایس ایل کے 5میچز کی میزبانی کرنا ہے
کراچی (ایمرا نیوز آن لائن)نیشنل اسٹیڈیم کراچی پی ایس ایل میچزکیلیے تقریبا تیار ہو چکا، تعمیراتی اور تزئین و آرائش کا کام آخری مراحل میں داخل ہو گیا، چھتوں کی صرف 30فیصد تنصیب باقی ہے، سیکیورٹی فورسز بھی مستعد ہیں۔نیشنل اسٹیڈیم کو7سے 17 مارچ تک فائنل سمیت پی ایس ایل کے 5میچز کی میزبانی کرنا ہے، وینیو پر جاری تعمیراتی اور تزئین و آرائش کا کام ہنگامی بنیادوں پر مکمل کیا جا رہا ہے،www.cricketpakistan.com.pk کے سلیم خالق کی رپورٹ کے مطابق ڈریسنگ روم، چیئرمین باکسز اور میڈیا سینٹر تیار ہوچکے، پریس کانفرنس ہال بھی نیا بنایا گیا ہے، کئی انکلوژرز میں نئی کرسیاں نصب دیگر میں نشستوں پر رنگ وروغن کردیا گیا۔اسٹیڈیم ایک خوبصورت منظر پیش کر رہا ہے، سب سے بڑا چیلنج چھتوں پر ٹیفلون فیبرک کی تنصیب تھی، اس کا 70 فیصد کام مکمل ہوچکا، میدان بھی ہرا بھرا نظر آرہا ہے، دوسری جانب سیکیورٹی ادارے اپنی ذمہ داریاں سنبھال چکے ہیں۔ریذیڈنٹ انجینئر عمران زبیری نے کہاکہ زیادہ تر کام بالکل آخری مراحل میں ہے اور1،2روز میں پایہ تکمیل کو پہنچ جائے گا، چھتوں کیلیے ٹیفلون فیبرک کی آخری کھیپ کراچی پہنچ چکی ہے، اس کو فوری طور پر نصب کردیا جائے گا، جو تھوڑا بہت کام رہ گیا اس میں قطعی طور پر تاخیر نہیں ہوگی۔ایک سوال پر انھوں نے اعتراف کیا کہ تعمیراتی کام کی وجہ سے اسٹیڈیم کے صدر دروازے کے باہر کا ماحول کوئی اچھا تاثر نہیں چھوڑ رہا، اس کی صفائی ستھرائی اور خوبصورتی کا کام بھی بروقت مکمل کر لیا جائے گا۔

13اضلاع سے تعلق رکھنے والے 100اہلکاروں کی خدمات کو سکیورٹی ڈیوٹی کے لیے لاہور پولیس کے سپرد کر دیا گیا
لاہور(ایمرا نیوز آن لائن) انسپکٹر جنرل پولیس پنجاب امجد جاوید سلیمی کی طرف سے لاہور میں ہونے والے پی ایس ایل 4کے میچز کے دوران شائقین ، مہمانوں کی فول پروف سکیورٹی اور مانیٹرنگ سمیت ٹریفک کے بہاﺅ کو یقینی بنانے کے لیے اور ٹریفک پولیس کو اضافی نفری کے علاوہ دیگر سہولیات فراہم کر دی گئیں۔احکامات کے مطابق 13اضلاع سے تعلق رکھنے والے 100اہلکاروں کی خدمات کو سکیورٹی ڈیوٹی کے لیے لاہور پولیس کے سپرد کر دیا گیا۔جبکہ ایلیٹ پولیس فورس کی 125ٹیمیں اپنی گاڑیوں سمیت فراہم کر دی گئی ہیں اور سنائپر چیکنگ کے لیے 10پیئرز بھی ایلیٹ فورس سے لاہور پولیس کے سپرد کر دئیے گئے ہیں۔پی ایس ایل کے میچز کے دوران ٹریفک کے بہا کو مستقل بنیادوں پر یقینی بنانے اور عام شہریوں کو روز مرہ معمولات زندگی کو جاری رکھنے کے لیے 5ایس پی رینک کے افسروں کی خدمات سی ٹی او لاہورکے سپرد کی گئی ہیں۔ 10ڈی ایس پی صرف اور صرف مہمانوں کی آمدورفت و الے راستوں اور پارکنگ ڈیوٹی سر انجام دیں گے۔30سینئر ٹریفک وارڈنز اور 400تربیت یافتہ ٹریفک اہلکاراور وارڈن بھی پی ایس ایل کے دوران فرائض انجام دیں گے۔