Tag psl4

پاکستانی خاص کر پشاور کھانوں سے تواضع ، غیر ملکی کرکٹرز انگلیاں چاٹتے رہ گئے
دبئی (ایمرا نیوز آن لائن) پاکستان سپر لیگ میں شامل پشاور زلمی کے غیر ملکی کرکٹرز بھی پاکستانی اور پشاوری کھانوں کے دیوانے نکلے۔پشاور زلمی کے چیئرمین جاوید آفریدی نے ٹیم کے اعزاز میں روایتی عشائیہ دیا جس میں پشاوری اور پاکستانی کھانوں سے کھلاڑیوں کی تواضع کی گئی۔ٹیم کے کپتان ڈیرن سیمی سمیت تمام غیر ملکی کھلاڑی پاکستانی اور پشاوری کھانوں پر انگلیاں چاٹتے رہ گئے۔ اعشایئے میں اسپیشل دم پخت، پشاوری چپلی کباب، افغان پلا اور پشاوری کڑاہی سے کھلاڑیوں کی تواضع کی گئی۔ڈیرن سیمی نے کہا ہے کہ کھانا بہت لذید ہے اور میں پشاوری کھانوں کا دیوانہ ہوں۔چیئرمین جاوید آفریدی نے کھانا خود تقسیم کیا۔ کھلاڑیوں نے پشاوری نمکین کڑاہی شوق سے کھائی اور ڈیرن سیمی بھی کابلی پلا کے شوقین نکلے۔یاد رہے کہ پشاور زلمی اسکور بوڑد پر دو پوائنٹس کے ساتھ دوسرے نمبر پر ہے۔ زلمی نے اب تک دو میچ کھیلے ہیں۔ ڈیرن سمیی کی کپتانی میں ٹیم نے لاہور قلندرز کو سات وکٹوں سے ہرا تھا جب کہ پشاور زلمی کو کوئٹہ گلیڈی ایٹرز سے شکست کا سامنا کرنا پڑا تھا۔

پی سی بی کے ساتھ سندھ حکومت اورکمشنرکراچی کی جانب سے بھی لیگ کی تشہیری مہم کی جائیگی
کراچی (ایمرا نیوز آن لائن) پی ایس ایل 4کے میچزاور فائنل کے موقع پرکراچی کوسجانے کا عمل یکم مارچ سے شروع ہوگا۔ذرائع کے مطابق بلدیہ عظمی کراچی سمیت شہر کے دیگرمقامی انتظامی اداروں بشمول متعددکنٹونمٹ بورڈز سے قانونی اجازت نامے حاصل کرلیے گئے ہیں تاہم بعض حل طلب امورکے بعد شہربھرمیں لیگ کے حوالے سے تزئین وآرائش کا عمل شروع ہوجائیگا۔کوآرڈینیشن کمیٹی کی جانب سے قائد اعظم کے مزارکے قریب وجوار میں خصوصی طور پر پی ایس ایل مقابلوں کی تشہیرکا اہتمام کرنے کی تجویزدی گئی ہے، پی سی بی کے ساتھ سندھ حکومت اورکمشنرکراچی کی جانب سے بھی لیگ کی تشہیری مہم کی جائیگی۔صوبائی حکومت کے سیکریٹری اسپورٹس اختر حسین مینگل کے مطابق پی ایس ایس ایل میچزکے موقع پرمحکمہ کھیل کے تحت بھی شہربھرمیں مشہور کرکٹرز کے بل بورڈز لگانے کے ساتھ خیرمقدمی بینرز آویزاں کیے جائیں گے اور مہران رنگ کو نمایاں کیا جائیگا۔دریں اثنا لیگ کی تیاریوں کے سلسلے میں اسپورٹس مینجمنٹ سسٹم کے تحت شہرمختلف مقامات پرنمونے کے طور پرتشہری مہم کا اہتمام کیا گیا، اس موقع پرکمشنرکراچی افتخارشلوانی، میونسپل کمشنرکے ایم سی ڈاکٹرسیف الرحمان، ڈپٹی کمشنرکراچی ایسٹ احمد علی صدیقی، ڈپٹی کمشنرکراچی ساتھ صلاح الدین، اسی ایم ایس گروپ کے جاوید علی ودیگر بھی موجود تھے۔

لاہور (ایمرا نیوز آن لائن) فہیم اشرف نے پی ایس ایل کو ورلڈکپ کی تیاری کا بہترین موقع قرار دیدیا۔آل راونڈر فہیم اشرف کا کہنا ہے کہ دورہ جنوبی افریقہ میں بہت کچھ سیکھنے کا موقع ملا، سخت محنت کا صلہ ملنا شروع ہو گیا، میگا ایونٹ میں بہترین کارکردگی دکھانے کیلیے پر عزم ہوں۔ کرکٹ پاکستان کو دیے گئے خصوصی انٹرویو میں فہیم اشرف نے کہا ہے کہ بیشتر ساتھی کرکٹرز کی طرح میرا بھی جنوبی افریقی کنڈیشنز میں کھیلنے کا پہلا تجربہ تھا، توقعات کے مطابق کارکردگی پیش نہیں کر پایا لیکن سخت محنت کی اور بہت کچھ سیکھنے کا موقع ملا، اس کا صلہ بھی ملنا شروع ہو گیا، پی ایس ایل کے آغاز میں اچھی فارم کا مظاہرہ کرنے میں کامیاب ہوا۔

لاہور قلندرز نے کر اچی کنگز کے صدر وسیم اکرم اور 2کھلاڑیوں ،کپتان عماد وسیم اور فاسٹ بولر محمد عامر کے خلاف آفیشل شکایت کردی
دبئی (ایمرا نیوز آن لائن)پاکستا ن سپرلیگ میں لاہور قلندرز کی کراچی کنگز کے خلاف22رنز کی جیت کے بعد پیش آنے والے ناخوشگوار واقعہ کے بعد لاہور قلندرز نے کر اچی کنگز کے صدر وسیم اکرم اور 2کھلاڑیوں ،کپتان عماد وسیم اور فاسٹ بولر محمد عامر کے خلاف آفیشل شکایت کردی ہے۔ میڈیا رپورٹ کے مطابق عماد وسیم اور محمد عامر کے خلاف خواتین کو گالیاں دینے اور نازیبا اشارے کرنے کا سنگین الزام سامنے آیا ہے، اس سلسلے میں میچ ریفری روشن ماہاناما سے لاہور قلندرز نے تحریری شکایت کی ہے۔دوسری جانب کراچی کنگز نے بھی آفیشل شکایت کی ہے جس میں کہا گیا ہے کہ وسیم اکرم کو نامناسب نام سے پکارا گیا جس کے بعد صورتحال خراب ہوئی۔ پی سی بی کا کہنا ہے کہ میچ ریفری کی جانب سے رپورٹ آنے کے بعد مزید کارروائی کی جائے گی، واقعے سے ٹورنامنٹ میں ناقص سیکورٹی انتظات کی قلعی کھل گئی ہے۔عینی شاہدین کا کہنا ہے کہ لاہور کی جیت کے بعد سب سے پہلے وسیم اکرم نے شکایت کی کہ انہیں لاہور قلندرز کے انکلوژر سے نامناسب نام سے پکارا گیا ہے،تھوڑی دیر بعد عماد وسیم اور محمد عامر آئے انہوں نے خواتین کی جانب نازیبا اشارے کئے اور گالیاں دیں جس کے بعد سیکورٹی حکام نے دو تماشائیوں کو حراست میں لیا تاہم انہیں بعد میں چھوڑ دیا گیا۔بعد ازاں سی سی ٹی وی کیمرے کی مدد سے اس تماشائی کی نشاندہی کر لی گئی جس نے وسیم اکرم کو نامناسب نام سے پکارا تھا۔ذرائع کا کہنا ہے کہ عماد وسیم اور محمد عامر کا رویہ اور زبان قابل اعتراض تھا،لاہور قلندرز کی انتظامیہ پی سی بی کی جانب سے کارروائی کا مطالبہ کررہی ہے کیوں کہ جن خواتین کے ساتھ یہ واقعہ پیش آیا اس میں فرنچائز کے خاندان کی خواتین شامل تھیں۔

مشہور بھارتی تاجر مکیشن امبانی کی کمپنی آئی ایم جی ریلائنس کو پی ایس ایل کی نشریات کے حقوق دیے تھے انہوں نے لیگ کی مزید نشریات سے انکار کردیا ہے
بورڈ کے پاس پہلے سے ہنگامی صورتحال سے نمٹنے کا منصوبہ موجود تھا،وسیم خان
لاہور، ممبئی (ایمرا نیوز آن لائن)پاکستان کرکٹ بورڈنے بھارتی کمپنی آئی ایم جی ریلائنس سے پاکستان سپر لیگ کے نشریاتی حقوق واپس لیتے ہوئے تصدیق کی ہے کہ آئی ایم جی ریلائنس اب لیگ کے میچز نشر نہیں کرے گا۔پاکستان سپر لیگ نے مشہور بھارتی تاجر مکیشن امبانی کی کمپنی آئی ایم جی ریلائنس کو رواں سال پاکستان سپر لیگ(پی ایس ایل) کی نشریات کے حقوق دیے تھے لیکن اب انہوں نے لیگ کی مزید نشریات سے انکار کردیا ہے۔پی سی بی کے مطابق آئی ایم جی ریلائنس نے ہمیں مطلع کیا ہے کہ وہ پی ایس ایل 2019 کے بقیہ میچز کے لیے ہمارے ساتھ پارٹنرشپ نہیں کر سکیں گے اور پی سی بی تمام حقوق محفوظ رکھتا ہے۔پی سی بی کے منیجنگ ڈائریکٹر وسیم خان نے کہا کہ بورڈ کے پاس پہلے سے ہنگامی صورتحال سے نمٹنے کا منصوبہ موجود تھا اور ہم پراعتماد ہیں رسمی کارروائیاں مکمل کرنے کے بعد اس پوزیشن میں ہوں گے کہ نئے پارٹنر کا اعلان کر سکیں۔وسیم نے مزید کہا کہ پی سی بی نے حال ہی میں رونما ہونے والے چند واقعات پر افسوس کا اظہار کیا ہے اور ہمارا ماننا ہے کہ کھیلوں کو سیاست سے الگ رکھنا چاہیے۔ تاریخ ہمیں بتاتی ہے کہ کھیل خصوصا کرکٹ نے لوگوں اور ملکوں کے درمیان پل کا کردار ادا کیا ہے۔ان کا کہنا تھا کہ بھارتی شائقین کو پی ایس ایل کی ڈیجیٹل نشریات سے روکنا اور اہم تاریخی میدانوں اور مقامات سے وزیراعظم عمران خان سمیت پاکستان کے سابق عظیم کرکٹرز کی تصاویر کو ہٹانا انتہائی قابل مذمت ہے۔پی سی بی کے منیجنگ ڈائریکٹر نے کہا کہ بورڈ اس معاملے کو آئی سی سی کے اجلاس میں کھیلوں کی عالمی گورننگ باڈی اور بھارت کے سامنے اٹھائے گا۔یاد رہے کہ مقبوضہ کشمیر کے علاقے پلوامہ میں ہونے والے حملے کے بعد بھارت چینل نے پاکستان سپر لیگ (پی ایس ایل) 2019 کی لائیو کوریج کے نشریاتی حقوق حاصل کرنے کے باوجود ایونٹ کی نشریات بند کر دی تھیں.

لاہور(ایمرا نیوزآن لائن رپورٹ عمر خالد سے) قومی اسمبلی میں اپوزیشن لیڈر شہباز شریف آشیانہ ہاؤسنگ اسکیم اور رمضان شوگر ملز مقدمات میں لاہور ہائیکورٹ سے ضمانت کے بعد آج اسلام آباد سے لاہور جائیں گے۔ذرائع نے بتایا کہ شہباز شریف اسلام آباد میں رہائش پذیر ہیں،ان کی لاہور جانے کی تیاریاںجا ری ہیں اور وہ جمعے کو لاہور روانہ ہوں گے۔ذرائع نے بتایا کہ اپوزیشن لیڈر شہباز شریف لاہور پہنچنے کے بعد پہلے اپنی والدہ سے ملاقات کریں گے ،وہ کوٹ لکھپت جیل میں قید سابق وزیراعظم نواز شریف سے بھی ملاقات کریں گے۔ذرائع نے بتایا کہ شہباز شریف پارٹی رہنماؤں اور ارکان پنجاب اسمبلی سے بھی پارٹی امور پر مشاورت کریں گے۔

کپتان سرفراز احمد کو واٹسن کےساتھ باصلاحیت عمر اکمل اور احمد شہزاد کا ساتھ بھی میسر
لاہور(ایمرا نیوز آن لائن) پی ایس ایل فور میں کوئٹہ گلیڈی ایٹرز ٹائٹل فتوحات کا قحط ختم کرنے کیلیے پرعزم ہیں۔کوئٹہ گلیڈی ایٹرز کی پی ایس ایل میں مجموعی کارکردگی اچھی رہی لیکن قسمت نے ساتھ نہ دیا، تینوں ایڈیشنز میں سرفراز احمد کی قیادت میں میدان میں اترنے والی ٹیم نے 2بار فائنل میں پہنچ کر ہمت ہاردی۔پہلے ایڈیشن میں 6فتوحات کیساتھ کوالیفائر میچ میں پشاورزلمی کو سنسنی خیز مقابلے میں ایک رن سے ہرایا لیکن فیصلہ کن معرکے میں اسلام آباد یونائیٹڈ نے مات دیدی۔دوسرے ایڈیشن میں4 فتوحات اور ایک بے نتیجہ میچ کی بدولت کوئٹہ گلیڈی ایٹرز نے پلے آف مرحلے کیلیے کوالیفائی کیا، اس بار بھی پشاورزلمی کو ایک رن سے مات دیکر براہ راست فائنل میں جگہ بنائی، پشاور زلمی ایلمنیٹر میچ میں کراچی کنگزکوشکست دے کر ایک بار پھر کوئٹہ گلیڈی ایٹرز کے مقابل آئے اور 58 رنز سے فتح کیساتھ ٹائٹل اپنے نام کرلیا۔کیون پیٹرسن سمیت اہم غیر ملکی کھلاڑیوں کا لاہور میں فائنل کھیلنے سے انکار بھی شکست کی وجہ بنا۔ تیسرے ایڈیشن میں کوئٹہ گلیڈی ایٹرز 4 فتوحات کےساتھ پوائنٹس ٹیبل پر چوتھے نمبر پر ہے،ایلمنیٹر ون میں پشاور زلمی کے ہاتھوں ایک رن سے شکست ہوئی۔کوئٹہ گلیڈی ایٹرز نے پی ایس ایل فور سے قبل تبادلے کے عمل میں لاہور قلندرز کو چھوڑنے والے سنیل نارائن کی خدمات حاصل کر لی تھیں لیکن بی پی ایل میں انگلی کی انجری بڑھ جانے پر ان کی جگہ میکس والر کو شامل کرنا پڑا، کم از کم ابتدائی مرحلے میں سنیل نارائن میسر نہیں ہوں گے، ڈیوائن براوو کو تاخیر سے جوائن کرنا ہے، ان کا خلا ڈیوائن اسمتھ پر کریں گے۔سرفراز احمد کو شین واٹسن جیسے نامور آشل راؤنڈر کیساتھ ماضی میں ڈسپلن کی خلاف ورزیوں کا ریکارڈ رکھنے والے باصلاحیت مگرشریر بچوں عمراکمل اور احمد شہزاد کی خدمات بھی حاصل ہیں، جارح مزاج رلی روسو بھی موجود ہوں گے۔محمد نواز آف سپن بولنگ کیساتھ بیٹنگ میں بھی صلاحیتوں کے جوہردکھاسکتے ہیں، پیس بیٹری میں سہیل تنویراورانورعلی کیساتھ ہیری گرنی بھی موجود ہیں،کوئٹہ گلیڈی ایٹرز اس بار ٹائٹل فتوحات کا قحط ختم کرنے کا عزم لیے میدان میں اتریں گےسرفراز احمد(کپتان)، شین واٹسن،ڈیوائن اسمتھ،سنیل نارائن، ڈیوائن براوو، رلی روسو، فواد احمد، ہیری گرنی،احمد شہزاد، عمراکمل،میکس والر، محمد نواز،سہیل تنویر،سعود شکیل،احسن علی خان،انور علی،دانش عزیز،جلات خان، اعظم خان، محمد عرفان جونیئر، محمد اصغر، غلام مدثر، محمد حسنین.

کیرون پولارڈا ور شعیب ملک اب تک8ہزار سے زیادہ ٹونٹی ٹونٹی رنز سکور کرچکے ہیں
لاہور (ایمرا نیوز آن لائن)پاکستان سپر لیگ کے چوتھے ایڈیشن کا حصہ بننے والی چھ فرنچائزز کے120کھلاڑیوں میں سے چھ کو مختصر ترین فارمیٹ(ڈومیسٹک اور انٹر نیشنل) میں 6000یا اس سے زیادہ رنز سکور کرنے کا اعزاز حاصل ہے۔پی ایس ایل فور میں شامل چھ ہزار رنز سے زیادہ سکور کرنے والے کھلاڑیوں میں سے دو کوئٹہ گلیڈی ایٹرز کے سکواڈ کا حصہ ہیں جب کہ لاہور قلندر، ملتان سلطانزاور کراچی کنگز کو بھی ایک ، ایک کھلاڑی کی خدمات حاصل ہیں تاہم حیران کن طور پر پی ایس ایل کی کامیاب ترین ٹیم اسلام آباد یونائیٹڈ میں کوئی بھی ایسا کھلاڑی شامل نہیں ہے جو 6000تو کجا پانچ ہزار ٹونٹی ٹونٹی رنز کا سنگ میل بھی عبور کرسکا ہو،پشاور زلمی کے آل رانڈر کیرون پولارڈ8719رنز کے ساتھ پی ایس ایل میں شامل کھلاڑیوں میں سب سے آگے ہیں ،ملتان سلطانز کے کپتان شعیب ملک ان کے علاوہ وہ واحد بلے باز ہیں جو ٹونٹی ٹونٹی کرکٹ میں آٹھ ہزار رنز (8362)سے زیادہ سکور کرچکے ہیں ،کوئٹہ گلیڈی ایٹرز کے آسٹریلوی آل رانڈ شین واٹسن نے7311ٹونٹی ٹونٹی رنز سکور کررکھے ہیں ،لاہور قلندرز کے بلے باز اے بی ڈیویلیئرز اب تک7144ٹونٹی ٹونٹی رنز بناچکے ہیں ، کراچی کنگزکے برطانوی آل رانڈر روی بوپارہ اب تک6299ٹونٹی ٹونٹی رنز بنا چکے ہیں ، کوئٹہ گلیڈی ایٹرز کے ویسٹ انڈین آل رانڈر ڈوین براوو نے اب تک6192 ٹونٹی ٹونٹی رنز سکور کیے ہیں ۔

زندگی میں ایسا ہوتا ہے، اس بار شاندار ٹورنامنٹ میں آپ کے ساتھ نہیں ہوں گا،نجم سیٹھی
لاہور(ایمرا نیوز آن لائن) سابق چیئرمین پی سی بی نجم سیٹھی کا کہنا ہے اس بار شاندار کرکٹ ایونٹ میں آپ کے ساتھ نہیں ہوں گا، ٹیموں کے لیے نیک خواہشات کا اظہار کرتا ہوں۔پی ایس ایل کے پہلے ایڈیشن سے لے کر تیسرے تک ہر تقریب میں پیش پیش رہنے والے نجم سیٹھی کی جگہ اب احسان مانی چارج سنبھال چکے ہیں۔سماجی رابطوں کی ویب سائٹ پر چند صارفین نے نجم سیٹھی کو مخاطب کرتے ہوئے کہا کہ ماضی کی خدمات کو پیش نظر رکھتے ہوئے کیا بہتر نہیں تھا کہ آپ کے جانشین آپ کو بطور مہمان خصوصی پی ایس ایل فور کی افتتاحی تقریب میں بلاتے۔جواب میں نجم سیٹھی نے کہا کہ مجھے یاد رکھنے اور یاد دلانے کا شکریہ، میں بھی کمی محسوس کروں گا، زندگی میں ایسا ہوتا ہے، اس بار شاندار ٹورنامنٹ میں آپ کے ساتھ نہیں ہوں گا لیکن شرکت کرنے والی تمام ٹیموں کیلئے نیک خواہشات کا اظہار کرتا ہوں، اگرمیڈیا سپورٹ اور حوصلہ افزائی نہ کرتا تو پی ایس ایل کی کامیابی ممکن نہیں تھی۔

کراچی کے میچز کے ٹکٹ 500 سے 12 ہزار ، لاہور کے میچز کے ٹکٹ ایک ہزار سے 12 ہزار تک فروخت کرنےکا فیصلہ
لاہور (ایمرا نیوز آن لائن)پاکستان سپر لیگ4کے پاکستان میں ہونے والے 8میچز کا کم سے کم ٹکٹ 500 روپے رکھنے کا فیصلہ کیا گیا ہے۔ذرائع کے مطابق پی ایس ایل کے چوتھے ایڈیشن میں کراچی اور لاہور میں شیڈول میچز کی آن لائن بکنگ رواں ہفتے سے شروع ہوگی ،ان میچز کے لیے مہنگا ترین ٹکٹ 12 ہزار روپے اور سستا ترین ٹکٹ 500 روپے رکھنے کا فیصلہ کیا گیا ہے۔،کراچی کے نیشنل سٹیڈیم میں کھیلے جانے والے 5 میچز کے ٹکٹ 500 روپے سے لے کر 12 ہزار روپے تک ہوں گے جب کہ قذافی سٹیڈیم، لاہور میں شیڈول تین میچز کے ٹکٹ ایک ہزار روپے سے 12 ہزار روپے تک میں فروخت ہوں گے،17مارچ کو نیشنل سٹیڈیم ،کراچی میںشیڈول فائنل میچ کے ٹکٹوں کی قیمت زیادہ رکھنے کا فیصلہ کیا گیا ہے۔یاد رہے کہ پی ایس ایل فور کے لاہور میں میچز 9، 10 اور 12 مارچ کو ہوں گے جب کہ کراچی میں کھیلے جانے والے میچز 7، 10، 13، 15 اور 17 مارچ کو ہوں گے۔یاد رہے کہ پاکستان کرکٹ بورڈ (پی سی بی) کے زیر اہتمام پاکستان سپر لیگ کا چوتھا ایڈیشن 14 فروری سے یو اے ای اور پاکستان میں شروع ہوگا، لیگ کا فائنل 17مارچ کو کراچی میں کھیلا جائیگا، لیگ میں 6 ٹیمیں ٹائٹل کے حصول کیلئے پنجہ آزمائی کرینگی، لیگ رانڈ روبن فارمیٹ کے تحت کھیلی جائیگی۔ ابتک اسلام آباد یونائیٹڈ کی ٹیم دو دفعہ اور پشاور زلمی کی ٹیم ایک بار لیگ جیت چکی ہے۔پاکستان سپر لیگ کا افتتاحی میچ 14فروری کو دفاعی چمپئن اسلام آباد یونائیٹڈ اور لاہور قلندرز ٹیموں کے درمیان دبئی میں کھیلا جائیگا۔ پی ایس ایل کے چوتھے ایڈیشن میں فائنل سمیت کل 34 میچز کھیلے جائیں گے جس میں سے آخری 8 میچز پاکستان کے شہروں لاہور اور کراچی میں کھیلے جائینگے۔ لاہور میں 3 میچز جبکہ فائنل سمیت پانچ میچز کراچی میں کھیلے جائینگے۔نیشنل سٹیڈیم، کراچی میں پہلا میچ 7 مارچ کو کراچی کنگز اور پشاور زلمی کے مابین فلڈ لائٹس میں ہوگا جبکہ لاہور میں پہلامیچ 9 مارچ کو لاہور قلندر اور اسلام آباد یونائیٹڈ کے مابین کھیلا جائیگا۔ پاکستان میں کھیلے جانےوالے 8 میچز کے علاوہ دبئی انٹرنیشنل سٹیڈیم میں 14میچز اور چار میچز شیخ زید سٹیڈیم ابوظہبی میں کھیلے جائینگے۔ شیڈول کے مطابق پی ایس ایل میں شرکت کرنےوالی تمام ٹیمیں ہر ٹیم کےساتھ دو دو میچز کھیلیں گی۔ جنوبی افریقہ کے اے بی ڈی ویلیئرز، زمبابوے کے برینڈن ٹیلرسمیت 19کھلاڑی پہلی بار پی ایس ایل میں ایکشن میں نظر آئینگے۔ پاکستان سپر لیگ کے چوتھے ایڈیشن کا فائنل میچ 17 مارچ کو کھیلا جائیگا جو نیشنل کرکٹ سٹیڈیم کراچی میں کھیلا جائیگا۔