Category کالم

لاہور(ایمرا نیوز)
پاکستان کے بڑھتے ہوئے قرضوں پر میں نے 2017-18ء میں 7 کالم تحریر کئے جس میں پاکستان کے ناقابل برداشت قرضے، مختلف ادوار میں بیرونی قرضوں کا موازنہ، پرانے قرضوں کی ادائیگی کیلئے نئے قرضے، آئی ایم ایف سے قرض ناگزیر اور قرضوں پر قرضے جیسے کالم شامل تھے۔ رواں مالی سال 5ارب ڈالر کے بیرونی قرضوں کی ادائیگیوں، 18ارب ڈالر کا کرنٹ اکائونٹ، 35ارب ڈالر کا تجارتی خسارہ اور گرتے ہوئے زرمبادلہ کے ذخائر کے پیش نظر معیشت دانوں کا خیال ہے کہ ہمیں 31ارب ڈالر کی بیرونی فنانسنگ کی ضرورت ہے اور نئی حکومت کو سخت شرائط پر 12 ارب ڈالر کے نئے قرضے کیلئے جلد ہی آئی ایم ایف کے پاس جانا پڑے گا لیکن امریکہ نے کہا ہے کہ وہ آئی ایم ایف کی پاکستان کو قرضے دینے کی مخالفت کرے گا۔ گزشتہ حکومت کو یہ امید تھی کہ غیر ملکی اثاثوں کی ایمنسٹی اسکیم کے تحت 2 سے 3 ارب ڈالر غیر ملکی اثاثے ملک میں واپس لائے جائیں گے لیکن ملک میں انتخابات اور سیاسی عدم استحکام کی وجہ سے حکومت کو مطلوبہ نتائج نہیں ملے۔ سابق عبوری وزیر خزانہ ڈاکٹر شمشاد اختر نے متعدد بار کہا تھا کہ عبوری حکومت آئی ایم ایف سے نئے قرضے کیلئے تیاریاں مکمل کرکے نئی حکومت کو دیکر جائیگی کیونکہ آئی ایم ایف عبوری حکومت سے مذاکرات کیلئے تیار نہیں۔

اِن حالات میں پاکستان نے آئی ایم ایف سے قرضے لینے کے بجائے اپنے دوست ممالک چین اور سعودی عرب سے 6 سے 8 ارب ڈالر کی کیش گرانٹ کی درخواست کی ہے جس پر ان دونوں ممالک کی طرف سے حوصلہ افزا اعلانات سامنے آئے ہیں کہ وہ پاکستان کی مالی مدد کریں گے۔ اس سلسلے میں سعودی عرب نے 2 ارب ڈالر جبکہ چین نے بھی 2 ارب ڈالر کی مالی امداد کا اعلان کیا جس میں ایک ارب ڈالر گزشتہ ہفتے دیئے جاچکے ہیں جسکے باعث پاکستانی روپیہ 4.3 فیصد مستحکم ہوا تھا۔ اسکے علاوہ دہشت گردفنانسنگ اور منی لانڈرنگ کو روکنے کیلئے ایشین ڈیولپمنٹ بینک (ADB) نے پاکستان کو مالی امداد دینے کا وعدہ کیا ہے۔ نئے وزیر خزانہ اسد عمر نے عندیہ دیا ہے کہ وہ غیر ملکی پاکستانیوں کیلئے ڈالر بانڈ کے اجراء کا ارادہ رکھتے ہیں۔ گزشتہ حکومتوں نے بھی قرضوں کے علاوہ گلوبل کیپیٹل مارکیٹ میں 2 بلین ڈالر کے یورو بانڈ اور 2.5 بلین ڈالر کے سکوک بانڈز بھی جاری کئے ہیں جن کی ادائیگیاں 2019ء، 2025ء ، 2027ء اور 2036ء میں ہیں۔

پاکستان اور چین کے مابین 12.5ارب ڈالر کا تجارتی خسارہ ہے۔ ڈالر پر دبائو کم کرنے کیلئے پاکستان نے چین سے درخواست کی ہے کہ وہ پاکستان سے چین کی امپورٹ کی 50فیصد ادائیگی پاکستانی روپے میں قبول کرے۔ اسکے علاوہ سی پیک کے منصوبوں کیلئے کی جانے والی اضافی امپورٹ کے دبائو کو کم کرنے کیلئے چین کو4 سے 5ارب ڈالر اسٹیٹ بینک کو سافٹ ڈپازٹ دینے کی تجویز ہے تاکہ ملکی زرمبادلہ کے ذخائر میں مزید کمی کے بغیر چین سے امپورٹس کی ادائیگیاں کی جاسکیں۔ 30 جون 2018ء کو پاکستان کے بیرونی قرضے اور مالی ذمہ داریاں 14 فیصد اضافے سے 95 ارب ڈالر تک پہنچ گئی ہیں اور اس طرح ہمارے مجموعی قرضے 29.86 کھرب روپے تک پہنچ چکے ہیں جو ہماری جی ڈی پی کا 86.8 فیصد ہے جبکہ قرضوں کی حد کے قانون(Fiscal Responsibility Debt Limitation Act 2005) کے تحت حکومت جی ڈی پی کے 60 فیصد سے زیادہ قرضے نہیں لے سکتی لیکن ہمارے قرضے اس حد سے تجاوز کرگئے ہیں جو ایک لمحہ فکریہ ہے۔

مختلف ادوارِ حکومت میں لئے گئے بیرونی قرضوں کے موازنے سے معلوم ہوتا ہے کہ پاکستان نے پہلا غیر ملکی قرضہ 1950ء میں 145ملین ڈالرز کا پہلے پانچ سالہ منصوبے کیلئے لیا تھا جسکے بعد آئندہ پانچ سالہ منصوبوں کیلئے ہم ہر بار 57ملین ڈالر سالانہ کے غیرملکی قرضے حاصل کرتے رہے۔ 1960ء میں یہ قرضے بڑھکر 585 ملین ڈالرز ہوگئے اور 1970ء تک قرضوں میں اضافے کا رجحان اسی طرح جاری رہا، اس طرح ہمارے بیرونی قرضے دگنے سے زیادہ ہوتے گئے۔ دسمبر1971ء میں غیرملکی قرضے3ارب ڈالرز تھے جو جون 1977ء تک 6.3 بلین ڈالرز ہوگئے جس کے بعد پاکستان نے سالانہ ایک ارب ڈالرز قرضے لئے۔ 1979ء میں بھٹو حکومت کے خاتمے کے بعد حکومت نے 1984ء تک اوسطاً 1.6 ارب ڈالرسالانہ بیرونی قرضے حاصل کئے۔ جون 1998ء تک پاکستان نے مجموعی 40 بلین ڈالرز کے غیرملکی قرضے اور 10.2بلین ڈالرز کی امداد حاصل کی۔ انسٹیٹیوٹ فار پالیسی ریفارمز (IPPR) کی رپورٹ کے مطابق 2016-17ء قرضوں کا ریکارڈ سال تھا جس میں مسلم لیگ (ن) حکومت نے 7.9 ارب ڈالرز اضافی قرضے لئے اور 30جون 2018ء تک ہمارے بیرونی قرضوں کا حجم 95.097ارب ڈالرز تک پہنچ گیا۔ ان بیرونی قرضوں کا جائزہ لینے سے معلوم ہوتا ہے کہ 1951ء سے 1955ء تک پاکستان کے بیرونی قرضے صرف 121 ملین ڈالر تھے تاہم 1969ء میں یہ قرضے بڑھ کر 2.7ارب ڈالر اور 1971ء میں 3 ارب ڈالر تک جاپہنچے۔ 1977ء میں پاکستان پر واجب الادا قرضے بڑھ کر دگنا یعنی 6.3 ارب ڈالر ہوگئے جس کے بعد بیرونی قرضے لینے کی روایت بن گئی اور 1990ء میں یہ قرضے بڑھ کر 21.9 ارب ڈالر جبکہ 2000ء میں 35.6 ارب ڈالر تک جاپہنچے۔ موجودہ دور حکومت میں پاکستان کے بیرونی قرضے 2016ء میں 72.98 ارب ڈالر اور اب 30جون 2018ء کو یہ قرضے ریکارڈ 95.097 ارب ڈالر کی حد تک پہنچ چکے ہیں۔

گزشتہ سال ایف بی آر کے 3500ارب روپے کے ریونیو میں سے 1482ارب روپے (42.36فیصد) قرضوں اور سود کی ادائیگی میں چلے گئے۔ دوسرے نمبر پر 775.86 ارب روپے دفاعی اخراجات اور تیسرے نمبر پر ترقیاتی منصوبوں کیلئے 661.29 ارب روپے خرچ کئے گئے۔ تجزیئے سے یہ بات بھی سامنے آتی ہے کہ حکومت نے مقامی قرضوں پر 1,112 ارب روپے اور بیرونی قرضوں پر 1,118.4ارب روپے سود ادا کئے جس سے ثابت ہوتا ہے کہ ہم قرضوں کے ناقابل برداشت بوجھ تلے دبے ہوئے ہیں اور ہمارا زیادہ تر ریونیو اور وسائل قرضوں اور سود کی ادائیگی میں چلے جاتے ہیں جس کی وجہ سے تعلیم، صحت، روزگار، پینے کا صاف پانی اور سماجی شعبوں کے ترقیاتی منصوبوں پر اخراجات کیلئے ہمارے پاس فنڈز دستیاب نہیں۔ معیشت کے طالبعلم کی حیثیت سے میں یہ بات کہہ سکتا ہوں کہ ہماری حکومتیں Debt Managment میں ناکام رہی ہیں۔ نواز شریف حکومت نے اقتدار سنبھالنے کے بعد مجموعی 480 ارب روپے کے گردشی قرضے ادا کئے تھے لیکن انہی کی حکومت نے آج 1.14 کھرب روپے کے گردشی قرضے نئی حکومت کو تحفے میں دیئے ہیں جس میں 566 ارب روپے ڈسٹری بیوشن کمپنیوں کے ذمہ اور 817 ارب روپے کے واجبات حکومتی و نجی شعبے کے صارفین کے ذمہ ہیں۔ جانے والی حکومت نے تجویز دی ہے کہ گردشی قرضے صارفین کے بجلی کے بلوں میں سرچارج لگاکر وصول کئے جائیں جس سے ملک میں بجلی مہنگی ہوگی اور صنعتیں اور ایکسپورٹس مزید غیر مقابلاتی ہوجائیں گی۔ نقصان میں چلنے والے حکومتی اداروں پی آئی اے، اسٹیل ملز اور واپڈا کی نجکاری نہ کرنے کی وجہ سے حکومت نے ان اداروں کو چلانے کیلئے 980 ارب روپے قومی خزانے سے ادا کئے۔ ان اداروں کے مالی نقصانات بڑھنے کی وجہ سے 2017ء میں انہیں 823 ارب روپے اور 2018ء میں 980 ارب روپے حکومتی قرضے دیئے گئے جس میں سب سے زیادہ قرضے پی آئی اے 122.4 ارب روپے، دوسرے نمبر پر واپڈا 81.4 ارب روپے، تیسرے نمبر پر پاکستان اسٹیل ملز 43.2 ارب روپے ہیں۔ ان اخراجات کی وجہ سے 2018ء میں بجٹ کا مالی خسارہ بڑھکر 2.1کھرب روپے یعنی جی ڈی پی کا 6.1 فیصد رہا جبکہ اس کا ہدف 4.1فیصد تھا۔

ملکی قرضوں کے باعث 2011ء میں ہر پاکستانی 46,000 روپے، 2013ء میں 61,000 روپے اور آج 1,44,256 روپے کا مقروض ہوچکا ہے۔ ان قرضوں کیلئے ہم اپنے موٹر ویز، ایئرپورٹس اور دیگر قومی اثاثے قرضہ دینے والے اداروں کے پاس گروی رکھوا چکے ہیں جو ایک لمحہ فکریہ ہے۔ ایف بی آر اور اسٹیٹ بینک نے بڑھتی ہوئی درآمدات کی حوصلہ شکنی کیلئے جو اقدامات کئے ہیں، ان کے بہتر نتائج نکلے ہیں اور امپورٹس میں اضافے کو کنٹرول کیا گیا ہے۔ مجھے امید ہے کہ ان اقدامات اور دوست ممالک کی مالی امداد سے ہم نہ صرف زرمبادلہ کے ذخائر مستحکم رکھ سکیں گے بلکہ بیرونی قرضوں کی ادائیگیوں کیلئے ہمیں تقریباً ایک سال کا ریلیف مل جائیگا جس سے ہم ملکی ایکسپورٹس، ترسیلات زر، بیرونی سرمایہ کاری میں اضافے اور لوٹی ہوئی دولت وطن واپس لاکر اپنے زرمبادلہ کے ذخائر کو برقرار رکھ سکیں گے۔
(بشکریہ جنگ لاہور)

لاہور(ایمرا نیوز)
محترم جناب رائو منظر حیات نے واٹس ایپ پر ایک نہایت تلخ تجربہ اور اس کا نہایت اعلیٰ حل بہ زبانی قریشی صاحب بیان کیا ہے۔ یہ تجربہ اکثر بعض والدین کو ہوتا ہے جو اپنی تمام پونجی بچوں کی تعلیم، شادی اور خوشی پر خرچ کردیتے ہیں اور پھر یہ بچے ’’اپنا مستقبل‘‘ تابناک بنانے کیلئے عموماً امریکہ یا کینیڈا چلے جاتے ہیں۔ دو تین سال میں چند دن کیلئے والدین سے ملنے آجاتے ہیں اور دل میں خفیہ آرزو ہوتی ہے کہ بوڑھے کب مریں کہ وہ جائداد بیچ کر رقم لے جائیں۔

اب آپ کی خدمت میں رائو منظر حیات صاحب اور ان کے دوست قریشی صاحب کا حقیقی واقعہ پیش کرتا ہوں۔ نصیحت حاصل کیجئے۔ رائو صاحب نے اس کو تنہائی کا جن کہا ہے۔

قریشی صاحب سے دوستی پرانی نہیں ہے صرف دو ڈھائی برس پہلے کا ذکر ہے۔ قریشی صاحب ستر برس کے لگ بھگ ہیں لیکن پچاس برس سے زیادہ نہیں لگتے ۔ ملاقات بھی عجیب طریقے سے ہوئی۔ مجھے اسکول کے زمانے سے اب تک تیرنے کا شوق ہے ۔ گرمیوں میں مقامی کلب اور سردیوں میں سول افسروں کے میس میں گرم پانی کے سوئمنگ پول میں شوق پورا کرتا ہوں۔ بذات خود تیراکی ایک بہت بڑا مضمون ہے۔ اس پر کسی اور وقت لکھوں گا۔ دو برس پہلے تیراکی سے فارغ ہوکر باہر کرسی پر بیٹھا تھا ساتھ ہی صحت مند بزرگ تشریف فرما تھے۔ انہیں کئی مہینوں سے دیکھ رہا تھا مگر کبھی بات نہیں ہوئی تھی۔ اس دن سلسلہ شروع ہوا ۔ مجھے قریشی کہتے ہیں۔ یوں ابتدائی تعارف ہوا۔ خیر تھوڑے سے عرصے میں دوستی ہوگئی۔ پچاس منٹ تیرنے کے بعد قریشی صاحب کافی کا ایک کپ پیتے تھے۔ یہ بات چیت کا بہترین وقت ہوتا تھا۔ تعجب ہوا جب انہوں نے اپنی اصلی عمر بتائی۔ تاریخ پیدائش ملک بننے سے پہلے کی تھی۔ بڑھاپے میں اتنی پھرتی، اتنی بھرپور صحت بہت عرصے بعد دیکھنے کو ملی تھی۔ ایک دن ہم دونوں سوئمنگ پول کے باہر بیٹھے ہوئے تھے۔ کافی کا ایک کپ پینے کے بعد دوبارہ کافی منگوائی۔ پہلی مرتبہ ہوا تھا کہ انہوں نے کافی کے دو کپ منگوائے ہوں۔ چہرے پر سوال دیکھ کر کہنے لگے، آج میری ’’برتھ ڈے‘‘ ہے اور اسے صرف اپنے ساتھ منا رہا ہوں۔ دوسری کافی میرا برتھ ڈے گفٹ ہے۔ قریشی صاحب ترنگ میں تھے۔ ان سے وہ سوال کیا جو تقریباً ایک سال سے میرے دماغ میں تھا۔ آپ کی اچھی زندگی اور صحت کا کیا راز ہے۔ کہنے لگے، ڈاکٹر ! بڑی مشکل بات پوچھ لی ہے آپ نے۔ اب جواب غور سے سنو۔ پچاس برس کی عمر تک بہت اچھی زندگی گزاری۔ کاروبار کیا، پیسے کمائے، ہروقت ذہن میں یہی دھن سوار رہتی تھی کہ بچوں کو سیٹل کرنا ہے۔ خیر ان کو بھی کاروبار کروا کر دے دیا۔ وہ بھی دولت میں کھیلنے لگے۔ پھر بڑے بیٹے کے ذہن میں بھوت سوار ہوا کہ بہتر زندگی کیلئے کینیڈا منتقل ہونا ہے۔ کیونکہ اب تمام فیصلے خود کرتا تھا لہٰذا میں نے انکار نہیں کیا۔ بیٹا صرف ایک ہے۔ باقی بیٹیاں ہیں۔ خیر اسے کینیڈا منتقل ہونے میں دو سال کا عرصہ لگا۔ پر اس دو سال میں مجھے یہ فکر لاحق ہوگئی کہ گھر تو خالی ہوجائے گا۔ بیٹیاں بیاہی جاچکی ہیں اب بیٹا بھی چلا جائے گا تو پھر کیا ہوگا۔ ہاں، ایک بات بتانا بھول گیا بیوی کا انتقال اس وقت ہوا جب بیٹا چھوٹاتھا۔

دوسری شادی نہیں کی۔ صرف اس لئے کہ مرد جب دوسری شادی کرتا ہے تو وہ اپنی اولاد کیلئے اجنبی سا تیسرا انسان بن جاتا ہے۔ خیر سوچنے سے کیا ہوتا ہے بیٹا بڑے آرام سے کینیڈا منتقل ہوگیا۔ گھر میں اکیلا رہ گیا۔ اس وقت عمر تقریباً ساٹھ برس ہوچکی تھی۔ گھر، اس قدر خالی ہوچکا تھا کہ ہول آتا تھا۔ روز فیکٹری جانا بھی عجیب سا لگتا تھا۔ بڑی مشکل سے اپنے آپ کو بستر سے خود ہی زبردستی نکالتا تھا۔ پھر لائونج میں گھنٹوں بیٹھا اخبار پڑھتا رہتا تھا۔ پرانے دوستوں سے کبھی کبھی ملاقات ہوتی تو اکثر کہتے کہ چلو کسی عورت کو سہارا دینے کیلئے شادی کرلو کم از کم کوئی بات کرنے والا تو موجود ہوگا۔ مگر مجھے یہ تجویز پسند نہیں آتی تھی۔اسی طرح پورا ایک سال گزر گیا۔ ایک دن ٹی وی پر جانوروں کا چینل Animal Planet دیکھ رہا تھا۔ دیکھا کہ ہاتھیوں کا ایک جھنڈ شدید خشک سالی میں بھی اکٹھا رہتا ہے کوئی بھی دوسرے جانور کو اکیلا نہیں چھوڑتا۔ دماغ میں پتہ نہیں کیا خیال آیا۔ تحقیق کرنے لگا کہ جنگلی جانوروں کی اکثریت کیسے رہتی ہے۔ جواب بے حد آسان تھا۔ اکثر جانور، گروہ کی صورت میں رہتے ہیں۔ ضمنی سوال اُٹھا کہ اگر اکیلے رہ جائیں توکیا ہوتا ہے۔ تجزیے کا نتیجہ خوفناک تھا۔ اکیلا جانور بہت تھوڑے سے عرصے کے بعد کسی نہ کسی وجہ سے مر جاتا ہے۔ جب اس معاملے کو انسانوں میں دیکھا تو نتائج حیران کن حد تک یکساں تھے۔ پختہ عمر کے اکثر لوگ تنہائی کے بوجھ کو برداشت نہیں کرسکتے۔زندگی کے تجربات کو یکسانیت کا بھالا بنا کر روح میں اُتارلیتے ہیں۔ تلخیوں کو کرید کرید کر زندہ رکھتے ہیں۔ سوچ کو اس قدر منفی کرلیتے ہیں کہ اولاد، رشتہ دار اور دوست ملنے سے بھی کتراتے ہیں۔ اپنی کامیابیوں کو بھول کر، صرف اور صرف زندگی کے حوادث کو اوڑنا بچھونا بنا دیتے ہیں۔ چند سال میں ہی کسی مہلک بیماری کو تمغے کی طرح سینے پر سجائے، قبر میں اُتر جاتے ہیں۔ ایک چیز جو جانور ہر وقت یاد رکھتے ہیں کہ جنگل میں گروہ کی صورت میں رہنا ہے۔ ہرگز ہرگز تنہا نہیں رہنا۔ یہ دانا اور بزرگ لوگ یکسر اس اہم نکتے کو بھول جاتے ہیں۔ قریشی نے کافی کی چسکی لگاتے ہوئے کہا، یہی نکتہ گرہ سے باندھ لیا۔ اپنے آپ کو لوگوں سے جوڑنے کا نایاب فن سیکھ لیا۔میرا سوال تھا، مگر کیسے؟ قریشی صاحب نے ہنسنا شروع کردیا ۔ کہنے لگے، دن میں ساری نمازیں دفتر یا اپنے کمرے میں بیٹھ کر پڑھتا تھا وجہ یہ کہ گھٹنوں کے بل بیٹھ نہیں سکتا تھا۔ سب سے پہلے گاڑی کی ڈگی میں ایک فولڈنگ چیئر رکھوائی۔ فجر کی نماز نزدیک مسجد میں پڑھنے چلا گیا، کرسی نکال کر کونے میں رکھی اور جب جماعت ہوئی تو صف کے آخر میں کرسی پر بیٹھ کر نماز پڑھنے لگا۔ دن میں جتنی بھی نمازیں ہوتیں، نزدیک ترین مسجد میں پڑھنا شروع کردیں۔ پہلی مثبت بات یہ ہوئی کہ اپنے علاقے کے لوگوں سے شناسا ہوگیا۔

میں جس ہائوسنگ کالونی میں رہتا ہوں وہاں محلے کا کوئی وجود نہیں تھا مگر میں نے نزدیک ترین لوگوں سے ملنا شروع کردیا۔ معلوم ہوا کہ یہاں تو ہر ایک اکیلا ہے۔اپنی ان سوچوں کو لوگوں سے ’’شیئر‘‘ کرنا شروع کردیا۔ صبح کا وقت بے حد خوشگوار گزرنے لگا، پھر ہفتے میں تین دن گھر کے نزدیک پارک میں جانا شروع کردیا۔ پہلی بار پتہ چلا کہ اس پارک میں ایک ’’یوگا گروپ‘‘ بنا ہوا ہے، ستر کے قریب مرد، بچے، بوڑھے، خواتین، ایک گروپ کی صورت میں ورزش کرتے ہیں۔ ان کیلئے یوگا کا ایک ماہر، مفت ورزش کراتا ہے۔ میں بھی گروہ میں شامل ہوگیا۔ ایک ماہ تک میں تقریباً ساٹھ ستر دوست بنا چکا تھا۔

فیکٹری سے چھٹی کرنا چھوڑ دی ساتھ ساتھ دفتر میں بیٹھنا تقریباً ختم ہوگیا۔ دن میں تین دفعہ پوری فیکٹری کا چکر لگاتا تھا، ہر ورکر کے پاس جاکر کام دیکھتا تھا، معیار جانچتا تھا، سب سے بڑی بات اپنے مزدور کی ہمت بڑھاتا تھا۔ ان کی مشکلات کو اپنی مشکل بنانا شروع کردیا۔ یہ حالت ہوگئی کہ اسٹاف اور عملے نے کئی بار اتوار کو بھی چھٹی کرنے سے انکار کردیا۔ فیکٹری اس درجہ بہتر ہوگئی کہ آرڈر آنے تقریباً دگنے ہوگئے۔ منافع کو دو حصوں میں تقسیم کیا، ایک حصہ پہلے کی طرح اپنے لئے اور دوسرا حصہ اپنے ورکروں کی بھلائی کے لئے، ان کی اولاد کی بہتر تعلیم کے لئے، ان کی بیماریوں کے علاج کے لئے۔ صرف دو سال میں ، میں نے دوسری فیکٹری لگا لی۔ صرف اس لئے کہ میرے ورکر اب مجھے اپنا سمجھنے لگے تھے۔ بالواسطہ طور پر منافع میں بھی شرکت دار تھے۔ سیٹھ اور مزدور کا تعلق کب کا ختم ہوگیا۔

بیٹا، کینیڈا سے سالانہ چھٹیوں پر وطن آیا تو میری روٹین دیکھ کر حیران ہوگیا۔ فیکٹری گیا تو ششدر رہ گیا۔ جس طرح میرا عملہ کام کرتا تھا۔

اس لگن سے تو یورپ میں بھی کام نہیں ہوتا تھا۔ وہ میرے پاس آیا، بیٹھے بیٹھے کہنے لگا کہ بابا، آپ نے تو کمال کردیا ہے۔

آپ کو تو تنہائی ’’راس‘‘ آگئی ہے۔ میرا جواب تھا کہ تنہائی نہیں، مجھے دوستی اور شناسائی راس آچکی ہے۔ خیر ایک اور نکتہ ، پانی سے ہمیشہ ڈر لگتا تھا خواب میں بھی پانی نظر آتا تھا تو خوف سے اُٹھ بیٹھتا تھا۔ اپنے دیرینہ خوف کو فتح کرنے کا فیصلہ کیا۔ پینسٹھ برس کی عمر میں ایک انسٹرکٹر سے تیرنا سیکھنے لگا، پہلے لوگ مجھ پر ہنستے تھے کہ یہ بابا اس عمر میں کیا کررہا ہے۔ مگر صرف دو مہینے میں تیراک بن گیا۔ اب میں ہفتہ میں تین چار دن، بھرپور سوئمنگ کرتا ہوں۔ پانی میرے لئے مذاق بن گیا ہے۔ میں نے اپنے بچپن کے خوف پر بھی قابو پالیا ہے۔

قریشی صاحب نے بڑے آرام سے اپنی زندگی کے اَن دیکھے گوشے بیان کئے۔ پچھترسال کے عمررسیدہ کے چہرے پر، بچوں جیسا سکون اور مسکراہٹ تھی۔ اُٹھتے ہوئے کہنے لگے، ڈاکٹر! ہم لوگ اتنے کندذہن ہیں کہ جانوروں تک سے سبق نہیں سیکھتے۔ میں نے دوبارہ زندہ رہنا ان ہی جانوروں سے سیکھا ہے۔
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(بشکریہ جنگ لاہور)

لاہور(ایمرا نیوز)
ایک مخصوص ایجنڈےکے تحت پاکستان میں ایک سوچ پیدا کرنے کی کوشش کی جا رہی ہے جس کا مقصد ریاست پاکستان کی طرف سے ختم نبوت کے منکرین کو غیر مسلم قرار دینے کے متفقہ آئینی فیصلہ کو متنازع بنانا ہے۔ کبھی کسی ایک بہانہ اور کبھی کسی دوسرے بہانہ سےاس آئینی ترمیم کو نشانہ بنانے کی کوشش کی جاتی ہے۔ کبھی کہا جاتا ہے کہ ریاست کا کوئی مذہب نہیں ہوتا تو کبھی سوال اٹھایا جاتا ہے کہ ریاست کیسے کسی کے مسلمان یا غیر مسلم ہونے کا فیصلہ کر سکتی ہے۔ موجودہ حکومت کی طرف سے ایک قادیانی مبلغ اور معیشت دان کو ایکنومک ایڈوائزری کونسل میں شامل کرنے اور پاکستانیوں کی طرف سے شدید احتجاج پر چند ہی دنوں میںاُسے نکالنے کے فیصلے نے ایک مخصوص طبقہ کوجیسے حواس باختہ کر دیا ہو۔ ایک طرف عمران خان کی حکومت جس نے اپنے ایک غلط فیصلہ کو واپس لے کر اچھا اقدام کیا اُس پر سوشل میڈیا کے ذریعے تابڑ توڑ حملے کیے جا رہے ہیں تو دوسری طرف ایک بار پھر پاکستان کے اسلامی آئین اور ختم نبوت کے متعلقہ شقوں کے خلاف پروپیگنڈہ کیا جا رہا ہے۔ کئی افراد جن میں میڈیا کے بھی کچھ لوگ شامل ہیں اپنی لاعلمی کے باعث اس پروپیگنڈہ کا حصہ بنے نظر آتے ہیں۔ ان افراد میں اپنے آپ کو سیکولر اور لبرل ظاہر کرنے والوں کا ایک گروہ پیش پیش ہے جو یہ جھوٹ پھیلانے کی کوشش میں ہیں جیسے یہ مسئلہ صرف مولوی حضرات اور مذہبی طبقہ کا ہے اور یہ بھی کہ پاکستان میں اقلیتوں کو تو کوئی حقوق ہی حاصل نہیں۔ عمومی طور پر پاکستان کا لبرل اور سیکولر طبقہ ذوالفقار علی بھٹو مرحوم سے مرعوب نظر آتا ہے اس لیے سوچا کیوں نہ اُن کو بھٹو صاحب کی زبان میں ہی بات سمجھائی جائے۔ 1974 کو جب پاکستان کی پارلیمنٹ نے منکرین ختم نبوت (قادیانیوں) کے غیر مسلم ہونے کا فیصلہ کیا اور اس فیصلہ کو آئین کا مستقل حصہ بنا دیا تو اُس وقت کے وزیر اعظم ذوالفقار علی بھٹو نے پارلیمنٹ سے ایک تاریخی خطاب کیا جس کے کچھ اقتباسات (اردو ترجمہ) مندرجہ ذیل ہیں:

’’جناب اسپیکر،… آج کے روز جو فیصلہ ہوا، یہ ایک قومی فیصلہ ہے۔ یہ پاکستان کے عوام کا فیصلہ ہے۔ یہ فیصلہ پاکستان کے مسلمانوں کے ارادے، خواہشات اور ان کے جذبات کا عکاس ہے… یہ ایک مذہبی مسئلہ ہے۔ یہ مسئلہ بنیادی اور اصولی طور پر مذہبی مسئلہ ہے۔ پاکستان کی بنیاد اسلام ہے۔ پاکستان، مسلمانوں کے مادر وطن کے طور پر وجود میں آیا تھا۔ اگر کوئی ایسا فیصلہ کر لیا جاتا، جسے اس ملک کے مسلمانوں کی اکثریت، اسلامی تعلیمات اور عقیدے کے خلاف سمجھتی، تو اس سے پاکستان کے مقصد وجود اور اس کے تصور کو بھی خطرناک حد تک صدمہ پہنچنے کا اندیشہ تھا… آپ کو یہ بتاتے ہوئے جناب اسپیکر، مجھے حیرت نہیں ہو رہی کہ اس مسئلے کے باعث میں اکثر پریشان اور راتوں کو نیند سے محروم رہا ہوں۔ اس مسئلے پر جو فیصلہ ہوا ہے، میں اس کی شاخ در شاخ پیچیدگیوں اور اس ردعمل سے بھی بخونی واقف ہوں جس کا اثر مملکت کی سلامتی پر ہو سکتا ہے… جناب اسپیکر، جیسا کہ میں نے کہا ہے کہ ہمیں امید کرنی چاہیے کہ ہم نے اس مسئلہ کا باب بند کر دیا ہے۔ یہ میری کامیابی نہیں، یہ حکومت کی بھی کامیابی نہیں ہے۔ میں بار بار زور دے کر کہتا ہوں کہ یہ کامیابی پاکستان کے عوام کی کامیابی ہے، جس میں ہم بھی شریک ہیں۔ میں اس سارے ایوان کو خراج تحسین پیش کرتا ہوں۔ مجھے احساس ہے کہ یہ فیصلہ متفقہ طور پر نہ کیا جا سکتا تھا، اگر تمام ایوان کی جانب سے اور یہاں موجود تمام پارٹیوں کی جانب سے تعاون اور مفاہمت کا جذبہ نہ ہوتا… ہمیں امید رکھنی چاہیے کہ یہ حل ہمارے لیے نیک شگونی کا باعث ہےاور اب ہم آگے بڑھیں گے اور تمام توقعات، لڑائی جھکڑے پر ابھارنے والے مسائل کو مفاہمت اور مطابقت کے جذبے سے حل کریں گے… میں ایک بار پھر دُہراتا ہوں کہ یہ ایک مذہبی معاملہ ہے۔ یہ ایک فیصلہ ہے جس کا ہمارے عقائد سے تعلق ہے۔ یہ پورے ایوان اور پوری قوم کا فیصلہ ہے۔ یہ فیصلہ عوامی خواہشات کے مطابق ہے۔ میرے خیال میں یہ انسانی طاقت سے باہر تھا کہ یہ ایوان اس سے بہتر کچھ فیصلہ کر سکتا۔ اسی طرح میرے خیال میں یہ بھی ممکن نہیں تھا کہ اس مسئلے کو ہمیشہ کے لیے حل کرنے کے لیے موجودہ فیصلہ سے کم کوئی اور فیصلہ ہو سکتا۔ کچھ لوگ ایسے بھی ہو سکتے ہیں، جو اس فیصلہ سے خوش نہ ہوں۔ یہ بھی ہو سکتا ہے کہ اُن کے نزدیک یہ فیصلہ ناگوار ہو۔ یہ ایک فطری سی بات ہے۔ ہم یہ توقع کیسے کر سکتے ہیں کہ اس مسئلے کے فیصلے سے تمام لوگ خوش ہوں گے، جو گزشتہ نوے سال سے حل نہیں ہو سکا۔ اگر یہ مسئلہ اتنا سادہ سا ہوتا اور ہر ایک کو خوش کرنا ممکن ہوتا، تو یہ مسئلہ بہت پہلے حل ہو گیا ہوتا، الیکن ایسا ممکن نہیں ہو سکا تھا…میں اس بات کو تسلیم کرتا ہوں اور مجھے اچھی طرح معلوم ہے ایسے لوگ بھی ہیں جو اس فیصلہ پر نہایت ناخوش ہوں گے۔ اب میرے لیے یہ ممکن نہیں کہ میں ان لوگوں کے جذبات کی ترجمانی کروں لیکن میں یہ کہوں گا یہ لوگوں کو طویل المیعاد مفاد میں ہے کہ یہ مسئلہ حل کر لیا گیا ہے۔ آج یہ لوگ غالباً ناخوش ہوں گے، انہیں یہ فیصلہ پسند نہیں ہو گا اور فیصلہ پر رنجیدہ ہوں گے لیکن حقیقت پسندی سے کام لیتے ہوئے اور ذاتی طور پر ان لوگوں سے کہوں گا،کہ ان کو بھی اس بات پر خوشی ہونی چاہیے کہ اس فیصلہ سے یہ مسئلہ حل ہوا، ان کو آئینی حقوق کی ضمانت حاصل ہو گئی۔ مجھے یاد ہے کہ جب حزب اختلاف کی طرف سے مولانا شاہ احمد نورانی نے یہ تحریک پیش کی، تو انہوں نے ان لوگوں کو فیصلہ کی روشنی میں مکمل تحفظ دینے کا ذکر کیا تھا، جو اس فیصلے سے متاثر ہوں گے۔ اس یقین دہانی پر یہ پورا ایوان اور پوری قوم پرعزم ہے۔ اب ہر پارٹی کا فرض ہے، یہ حزب اختلاف کا فرض ہے اور یہ ہر شہری کا فرض ہے کہ وہ پاکستان کے تمام شہریوں کی یکساں طور پر حفاظت کرے۔ یہ امر واقعہ ہے کہ اسلام کی یہی روح ہے اور اس کی نصیحت رواداری ہی ہے۔ مسلمان ہمیشہ رواداری پر عمل کرتے رہے ہیں۔ اسلام نے فقط رواداری کی تبلیغ نہیں کی بلکہ پوری تاریخ میں اسلامی معاشرے نے رواداری سے کام لیا ہے۔ اسلامی معاشروں نے اس تیرہ و تاریک زمانے میں یہودیوں کے ساتھ بہترین سلوک کیا، جب کہ یورپ میں عیسائیت ان پر ظلم کر رہی تھی اور یہودیوں نے سلطنت عثمانیہ میں آ کر پناہ لی تھی۔ اگر یہودی دوسرے حکمران معاشروں سے بچ کر، عربوں اور ترکوں کے اسلامی معاشرے میں پناہ لے سکتے تھے، تو پھر یاد رکھنا چاہیے ہماری مملکت ایک اسلامی مملکت ہے، ہم مسلمان ہیں، ہم پاکستانی ہیں اور یہ ہمارا مقدس فرض ہے کہ ہم تمام فرقوں، تمام لوگوں اور پاکستان کے تمام شہریوں کو یکساں طور پر تحفظ فراہم کریں۔‘‘

مجھے ڈرہے کہ بھٹو مرحوم کو اس عظیم کارنامہ پر اور اُن کی اس تقریر کو پڑھ کر کچھ سیکولر اور لبرل حضرات اُنہیں بھی bigotنہ کہہ دیں لیکن اس بات میں کوئی شک نہیں کہ 1974 کی پارلیمنٹ نے جو فیصلہ کیا وہ بہترین فیصلہ تھا جسے تسلیم کر کے ہی یہاں امن قائم رہ سکتا ہے۔ ختم نبوت کے نہ ماننے والے غیر مسلم اقلیت ہیں اور اسی حیثیت میں اُنہیں تمام آئینی حقوق میسر ہوں گے۔ لیکن اگر منکرین ختم نبوت میں سے کوئی یہ ضد کرے کہ وہ مسلمان ہے تو پھر نہ صرف یہ عمل خلاف اسلام اور خلاف آئین ہے بلکہ اس سے انتشار اور فتنہ جنم لیتا ہے جسے ختم کرنا ہی 1974 کی آئینی ترمیم کا اصل مقصد تھا۔

(کالم نگار کے نام کے ساتھ ایس ایم ایس اور واٹس ایپ رائے دیں 00923004647998)

(بشکریہ جنگ لاہور)

اردو دنیا کے واحد صاحبِ دیوان عرب شاعر ڈاکٹر زبیر فاروق، اکسٹھ اردو شعری مجموعوں کے خالق ہیں۔ جو ان سے متعارف نہیں وہ ان کے حوالے سے دو سوال ضرور کرتے ہیں۔ ایک یہ کہ کیا روانی سے اردو بولنے اور سہولت سے اردو لکھ لینے والا یہ شاعر واقعتاً عرب ہے اور دوسرا سوال یہ ہوتا ہے کہ کیا زبیر فاروق نے اتنی ڈھیروں، 61 شعری مجموعوں پر مشتمل ساری شاعری خود کی ہے یا یہ قلم کے تخلیق کار مزدوروں اور گھوسٹ شاعروں کا کمال اور کیا دھرا ہے؟ پچھلے دنوں ڈاکٹر زبیر فاروق پاکستان تشریف لائے تو ہمارے دوست پروفیسر ظہیر بدر نے انہیں اپنے ہاں مدعو کیا، ظہیر بدر جنہوں نے اپنے گھر کے باہر مقام دوست کندہ کرا رکھا ہے، محفل دوستاں برپا کرنے میں لاثانی ہیں۔ چنانچہ اس روز ڈاکٹر زبیر فاروق کے ساتھ شہر کے چنیدہ ادیب، شاعر اور دانشور بھی موجود تھے۔ یوں ڈاکٹر زبیر فاروق کے اعزاز میںیہ نشست جہاں شعر و ادب کے حوالے سے اہل محفل کے زوق سلیم کو مہمیز عطا کر ہی رہی تھی، وہاں شرکاء محفل کے شگفتہ، برجستہ جملوں، فقروں اور بیان کیے جانے والے دلچسپ اور یادگار واقعات و قصوںکے باعث ایک منفرد رنگا رنگ تقریب کے روپ میںڈھل گئی۔
تقریب کے مہمان اعزاز ڈاکٹر زبیر فاروق نے خود اپنے اور اپنی شاعری خصوصاً ڈھیروں شعری مجموعوں کے تناظر میں اٹھنے والے سوالات اور پیدا ہونے والے شکوک کے تناظر میں دلچسپ واقعات سنا کر محفل کو کشت زعفران بنائے رکھا۔ انہوں نے بتایا کہ اکثر ان کے احباب یہ شک کرتے ہیں کہ جتنی شاعری میرے نام سے شائع ہو چکی ہے یا میں مشاعروںمیں پڑھتا ہوں وہ میں نے معاوضہ دے کر گھوسٹ شاعروں سے حاصل کی ہے۔ اس ضمن میں یہ بات بھی دلچسپی کی حامل ہے کہ کچھ شاعروں نے یہ تاثر دے اور مشہور کررکھاہے کہ وہ ڈاکٹر زبیر فاروق کے ا ستاد اور اتالیق ہی نہیں اس کے نام سے شائع ہونے والی شاعری کے خالق بھی ہیں۔ زبیر فاروق ہنستے مسکراتے ہوئے بتا رہے تھے کہ ایک مرتبہ متذکرہ بالا تاثر کے تناظر میں ایک بڑے شاعر (منیر نیازی) نے ان یعنی ڈاکٹر زبیر فاروق کا امتحان لینے اور یہ چیک کرنے کیلئے کہ آیا زبیر فاروق کو شعر فہمی اور شعر نگاری کا کچھ ادراک بھی ہے یا نہیں، ایک کچا پکا مصرعہ کاغذ پر لکھ کر انہیں تھمایا اور کہا فاروق ذرا دیکھنا یہ مصرعہ وزن میں ہے ناں…؟ ڈاکٹر فارو ق بتاتے ہیں کہ وہ یہ جان گئے کہ اس سوال کے بین السطور مقاصد کیا ہیں اور متذکرہ شاعر محض میرے امتحان اور اپنی خباثتِ طبع کی خاطر یہ شرارت کر رہے ہیں۔ چنانچہ میں نے بڑے ادب سے عرض کیا، ارے صاحب! آپ خود بڑے شاعرہیں آپ کو اپنا کام خود کرنے کی عادت ڈالنی چاہیے۔ زبیر فاروق کی اس حاضر جوابی اور برجستگی پر محفل میں ایک فلک شگاف قہقہہ بلند ہوا اور ساتھ ہی میری چشم تصور میں وہ چہرے منڈلانے لگے جو برسہا برس سے ہمیں یہ بے جا تاثر دیے ہوئے ہیں کہ وہ فی سبیل اللہ یا معاوضہ لے کر ڈاکٹر زبیر فاروق کو سادہ کاغذ پر اصلاح دیتے چلے آ رہے ہیں۔
بہرحال شاعروں کی موجودگی کے باوجود اس محفل میں گفتگو اور گپ شپ کا عنصر غالب تھا اور سبب اس کا یہ تھا کہ تقریب کے مہمانِ اعزاز شاعر ہونے کے باوجود اپنی ادبی و پیشہ ورانہ زندگی کے دلچسپ واقعات کے تذکرے سے حاضرین محفل کو ہنسا ہنسا کر لوٹ پوٹ کر رہے تھے۔ زبیر فاروق پیشے کے اعتبار سے میڈیکل ڈاکٹر ہیں اور ان کا اختصاص بطور ماہر امراض جلد ہے مگر وہ فنون لطیفہ کی ہر صنف شاعری، موسیقی، گائیکی، مصوری، اداکاری غرض ہر ایک میں دلچسپی رکھتے اور اس میں اپنے فن کا اظہار بہت باقاعدگی اور سنجیدگی سے
کرتے ہیں۔ پاکستان سے انہیں خاص انس اور رغبت ہے۔ یہاں کی تہذیب، ثقافت، تمدن ، رسم و رواج سے وہ پوری طرح تعلق اورآگہی رکھتے ہیں۔ شاید اس کی ایک وجہ یہ بھی ہے کہ پاکستان ان کا ’’منکوحہ‘‘ ملک ہے اور خیر سے ان کی چوتھی اہلیہ محترمہ پاکستان سے تعلق رکھتی ہیں۔ ’’منکوحہ‘‘ کا تذکرہ آیا تو ایک دلچسپ قصہ ملاحظہ کیجئے۔ گئے برسوں کی بات ہے بہاولپور میں معروف شاعر نوشی گیلانی، دانشور منور جمیل قریشی اور صحافی و تجزیہ نگار وقار عزیز صدیقی نے میرے برادرِ کلاں معروف دانشور، شاعر اور براڈ کاسٹر اعزاز احمد آذر کے اعزازمیں ایک تقریب برپا کی۔ منور جمیل نے آذر بھائی کے حوالے سے ابتدائی گفتگو کرتے ہوئے کہا، میں چشم دید گواہ ہوں اور خوش گوار حیرت ہوتی ہے کہ آذر جس شہر میں مشاعرہ پڑھنے جاتا ہے، لوگوں کے دل جیت اور مشاعرہ لوٹ لیتا ہے۔ ایسے لگتاہے جیسے بہاولپور، رحیم یار خاں ، سرگودھا، فیصل آباد، سیالکوٹ، گوجرانوالہ اور ساہیوال یہ سب آذر کے ’’مفتوحہ‘‘ شہر ہیں۔ اس پر آذر بھائی یکدم اپنی نشست سے کھڑے ہوئے اور کہا، برادرم اس میں سے سیالکوٹ کو نکال دیں کیونکہ وہ میرا ’’مفتوحہ‘‘ نہیں منکوحہ شہر ہے اور ہال دیر تک تالیوں سے گونجتا رہا۔
بہرحال یہ نشست جس کا اہتمام مہمان شاعر ڈاکٹر زبیر فاروق کے اعزازمیں کیا گیا تھا کیونکر منطقی انجام کو پہنچ سکتی تھی جب تک مہمانِ اعزاز اور حاضر شعرا سے ان کا کلام نہ سنا جاتا۔ چنانچہ یکے بعد دیگر چند دوستوں نے اپنی شاعری سے شرکاء محفل کی تواضع کی اور اپنے ان اشعار پر خوب داد پائی، ملاحظہ کیجئے:
لٹ گیا اسلام عظمی ہر کوئی بازار میں
مول پہ جھگڑا کیا اور تول میں کم لے گیا
(اسلام عظمی)
۔۔۔۔۔۔۔۔۔۔۔۔۔۔۔۔۔۔۔۔۔۔۔
جو چاہوں بھی تو اب خود کو بدل سکتا نہیں ہوں
سمندر ہوں کناروں سے نکل سکتا نہیں ہوں
۔۔۔۔۔۔۔۔۔۔۔۔۔۔۔۔۔۔۔۔۔۔۔
اب عاشقوں پہ عشق کی لذت حرام شد
یعنی قیام دشت کی مدت حرام شد
گزری جو تیرے ساتھ وہ سب رائیگاں گئی
تیری گلی کے پھیروں کی ذلت حرام شد
(ظہیر بدر)
۔۔۔۔۔۔۔۔۔۔۔۔۔۔۔۔۔۔۔۔۔۔۔
اُجڑے مکاں میں جیسے دیمک نے گھر کیا ہے
ایسے ہی میرے دل میں اک شک نے گھر کیا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔
تو نے ہر بار مصیبت سے نکالا ہم کو
ہم نہ بن پائے ترے پھر بھی ہمارا تو ہے
(ڈاکٹر زبیر فاروق)
ڈاکٹر رشید زئی اور زابر سعید کی معیت میں تقریب کے اختتام پر باہر نکلے تو شاعر ناصر زیدی کا یہ باکمال شعر میری زبان پر تھا:
میں بے ہنر تھا مگر صحبت ہنر میں رہا
شعور بخشا ہمہ رنگ محفلوں نے مجھے
یار زندہ صحبت باقی، انشاء اللہ!!!

(ایمرا نیوز)
کہا گیا ہے کہ مالی کمپنیوں ،بینک فراڈاور نادہندگی کے مقدمات پر ترجیحاً کام کیا جارہا ہے مگر دیکھنے میں معاملات اس کے بر عکس نظر آرہے ہیں آئے دن کسی دفتر میں آگ لگتی ہے اور فراڈ کے سارے ثبوت راکھ بن کر ہوا میں اڑ جاتے ہیں ۔نہ کوئی خنجر پر داغ دکھائی دیتا ہے نہ ہی دامن پر کوئی چھینٹ نظر آتی ہے ۔وہ زمانے گئے کہ جب مقتول کی آستین کا خون اپنے قاتل کا پتہ دیا کرتا تھا۔خاص طور پردفاتر میں ریکارڈ کوآگ لگانے کا نسخہ تو بہت زیادہ قابلِ اعتماد سمجھا جاتا ہے ۔شاید اسی لئے گزشتہ دس سالوں میں پنجاب میں جس قدر آگ سے ریکارڈ جلنے کے واقعات ہوئے ہیں۔ اتنے پچھلے سو سال میں نہیں ہوئے۔ اسی سال مارچ میں نیسپاک کے صدر دفتر میں آگ کے شعلے کھڑکی سے اندر آگئے تھے ۔یہ دوسری منزل تھی ۔ہائی ویز اینڈ ٹرانسپورٹ انجینئرنگ ڈویژن کے شعبہ ڈیزائن میں جو کچھ پڑاتھا جو فائلیں رکھی تھیں ، سب کچھ راکھ ہوگیا۔ یہیں لاہور اور راولپنڈی میٹرو بس منصوبوں سمیت متعدد اہم قومی منصوبوں کا ریکارڈ جل گیا۔ تقریباً ایک سال پہلے نیسپاک کے پاور ڈویژن میں بھی اسی طرح کی آگ لگ چکی ہے، جس میں بجلی کے اہم پیداواری منصوبوں کا ریکارڈ راکھ ہوگیاتھا۔حسنِ اتفاق دیکھئے کہ اس طرح کے آتش زدگی کے واقعات میں ابھی تک کسی افسر کو کوئی سزا نہیں ہوئی۔صرف محرر کیخلا ف ایف آئی آر درج ہوئی ہے۔اُس کا قصہ بس اتنا ہے۔

2013 ءمیں ایل ڈی اے پلازہ میں آگ لگی تھی۔ جس میں نواز شریف اور شہباز شریف دور کے دوسرے اہم ریکارڈ کے ساتھ بلاکوٹہ الاٹمنٹ کا ریکارڈ بھی جل گیا تھا۔ 1985سے 2012تک بلا کوٹہ کی مد میں پلاٹوں کی بے تحاشاتقسیم ہوئی اور یہ پلاٹ 1500سے بڑھ کر چودہ ہزار ہو گئے تھے۔اس آگ کی وجہ سے 22 افراد ہلاک ہوئے ۔جن کے قتل کا باقاعدہ مقدمہ درج کیا گیاتھا مگر اِس خوفناک سانحہ کی تحقیقات کا ریکارڈ پولیس کے ریکارڈ سے غائب ہو گیا ہے ۔ریکارڈ گم ہونے کا الزام محررمحمد لطیف پر عائد کیا گیا ہے کہ اس نے سی سی پی او آفس سے تھانہ ریس کورس کی عمارت میں تھانہ سول لائنز کی منتقلی کے دوران ریکارڈ کباڑئیے کو بیچ دیاتھا۔ بائیس افراد کے خون کے داغ کباڑیے کی دکان سے اب کون تلاش کرے ۔ویسے ابھی میں ایل ڈی اے کی آگ پر بات نہیں کرنا چاہتا۔ یہ فسانہ پھر کسی وقت چھیڑیں گے ۔میں تو اُس آگ کی بات کرنا چاہ رہا ہوں جو پچھلے دنوں لاہور میں نیلا گنبد کے قریب فائلوں پر پٹرول چھڑک کر لگائی گئی تھی ۔

یہ آگ اُس دن لگائی گئی جب بینک کی تاریخ میں پہلی بار سپریم کورٹ کے حکم پراُس کا آڈٹ ہونا شروع ہوا تھا۔ ممکن ہے کبھی پہلے آڈٹ ہوا ہو مگر یہ طے ہے کہ شہباز شریف کے دس سالہ دورِ حکومت میں اس بینک کا یہ پہلا آڈٹ تھا ۔دراصل تھوڑے دن پہلے سپریم کورٹ نے سوموٹو نوٹس لیا تھااور خوفناک بے ضابطگیوں کے سبب آڈٹ کا حکم دیا تھا۔پنجاب کوآپر ٹیو بینک کی تقریباً بیس ہزار سے زائد کوآپر ٹیو سوسائٹیاں ممبر ہیں اس کا بینک ورکنگ کیپٹل گیارہ بلین ہے ۔ سات بلین اکویٹی میں تبدیل کردیا گیا ہے ۔اس بینک کی سو سے زیادہ پر اپرٹیز پنجاب میں موجود ہیں ۔ آگ لگا کر ریکارڈ جلانے کا کام اس کے لئے کوئی نیا نہیں ۔یہ کام اس کی مختلف برانچوں میں پچھلے آٹھ سال میں بہت مرتبہ چکاہے۔ تقریباً دوسو ایسے معاملات ہیں جن پرمقدمات درج ہیں ۔معاملہ صرف یہیں تک ختم نہیں ہوتا ۔ اس بینک نےکچھ عرصہ پہلے سونا رکھنے کی ایک اسکیم متعارف کرائی۔ بڑی اچھی اسکیم تھی لوگوں نے بڑھ چڑھ کر حصہ لیا۔مگر دو ہزار سترہ میں شجاع آباد برانچ سےچھ کروڑ کا سونا چوری ہوگیا ۔چندماہ کے بعد یعنی دوہزار اٹھارہ میں سونا چوری کی پھر واردات ہوئی۔یہ راولپنڈی برانچ میں ہوئی جہاں سے بارہ کروڑ کا سونا چوری ہو گیا مگر کسی کے کان پر جوں تک نہیں رینگی ۔اللہ تعالیٰ چیف جسٹس آف پاکستان ثاقب نثار کا بھلا کرے جنہوں نے از خودنوٹس لیا اور بینک میں ہونے والے اربوں روپے کے فراڈ پر آڈٹ شروع ہوا۔ابوبکر خدا بخش ایڈیشنل آئی جی اِنویسٹی گیشن اِس کی انکوائری کر رہے ہیں۔بینک کے لوگوں کا خیال ہے کہ اس بینک کی تباہی کاجو شخص ذمہ دار ہے اس نےدوہزار آٹھ میں ستر ہزار روپے ماہانہ پر اس بینک میں ملازمت اختیار کی اور پھر دیکھتے ہی دیکھتے ترقی کی غیر فطری منازل طے کرتا چلا گیا اور بینک کا صدر بن گیا۔خبر ہے کہ اس کے احد چیمہ اور فواد حسن فواد کے ساتھ انتہائی قریبی مراسم ہیں ۔فواد حسن فواد نے اپنے اقبالی بیان میں کہیں اُس کا ذکر بھی کیا ہے ۔اس بینک کی تباہی کی ایک وجہ یہ بھی بیان کی جاتی ہے کہ کئی سال ہو گئے ہیں مگر بورڈ آف ڈائریکٹر کا اجلاس تک نہیں ہوا ۔ بائی لاز منسوخ کر دئیے ہیں۔ بینک حکام اپنی مرضی کے قوانین بناتے اور انہیں بدلتے رہتے ہیں ۔چیف جسٹس آف پاکستان بڑی باریک بینی سے اربوں کھربوں کے اس فراڈ کی تحقیقات کرا رہے ہیں اور کہا جارہا ہے کہ اس فراڈ میں بڑے بڑے شرفا کا نام آرہا ہے ۔اگرچہ شرفا کی لسٹ میرے پاس موجود ہے مگر ابھی اسے سامنے لانے کا وقت نہیں آیا۔

ابھی تک یہی لگ رہا ہے عمران خان کے کرپشن سے پاک پاکستان کے خواب کوتعبیر یقیناً چیف جسٹس آف پاکستان کے ایسے ہی ازخود نوٹسوں سے ہی ملے گی۔ بڑے بڑے مگرمچھوں پر ہاتھ ڈالنا کوئی آسان کام نہیں۔ یہی جو جعلی اکائونٹس والا کیس ہے ۔اس کی جے آئی ٹی بن چکی ہے مگر پیپلز پارٹی نون لیگ سے کہیں زیادہ تیزی اور توانائی سے آصف علی زرداری کا دفاع کرنے میں لگی ہوئی ہے ۔ ابھی تک تو میڈیا پر بھی کوئی آسانی سے یہ نہیں کہہ سکتا ہے کہ زرداری فیملی کے پاس چوبیس بلین ڈالر کی رقم اور اثاثے ہیں ۔جعلی اکائونٹس والا کیس اصل میں منی لانڈرنگ کا کیس ہے ۔ یہ بھی درست کیس ہے مگر آمدن اور اثاثوں میں تفاوت کا یہ معاملہ ہے آصف علی زرداری کا مقدمہ اُس قانون کے تناظر میں کیوں نہیں دیکھا جا رہا ۔ محترمہ بے نظیر بھٹو سے شادی سے پہلے آصف علی زرداری کی مالی حیثیت اور آج کی مالی حیثیت یقیناً زیر بحث آنی چاہئے۔

(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(بشکریہ جنگ لاہور)

(ایمرا نیوز)
ٹی وی لگا کر کوئی ٹاک شو دیکھ لیں، کسی محلے میں تھڑے پر بیٹھ کر گفتگو کر لیں، اپنے ڈاکٹر سے بحث کر لیں، گھر کے ڈرائنگ روم میں دوستوں سے گپ شپ کر لیں، عام آدمی سے پوچھ لیں، کسی کالج میں نوجوانوں کے گروپ سے سوال کر لیں، سرکاری اہلکاروں کو کٹہرے میں کھڑا کر کے باز پرس کر لیں ،سیاست دانوں کے بیانات پڑھ لیں، جیل کے قیدیوں سے پوچھ لیں، تاجر برادری سے سوال کرلیں،مولوی حضرات کی رائے لے لیں یا پھر سوشل میڈیا میں سروے کر وا لیں….. آپ کو کچھ اِس قسم کی ملی جلی آوازیں سنائی دیں گی کہ ہم سب ملک کی ترقی و خوشحالی چاہتے ہیں، قائداعظم ہمارے رول ماڈل ہیں، حرمت دین کے لئے جان بھی حاضر ہے….. وغیرہ وغیرہ۔ مگر مجھے آج تک یہ سمجھ نہیں آئی کہ جس ملک کا ہر شہری ملک کی محبت کا دم بھرتا ہو، جس ملک کے سکولوں میں قائد اعظم اور علامہ اقبال بچوں کو نصاب میں پڑھائے جاتے ہوں، جس ملک میں کروڑوں عاشقان رسول ﷺ بستے ہوں، جس ملک میں تمام ٹی وی چینلز صبح شام ملک کو مسائل کے گرداب سے نکالنے کے لئے پروگرام کرتے ہوں، جس ملک کی ہر محفل میں یہی بحث ہوتی ہو کہ پاکستان کیسے ترقی کرے گا، جس ملک کے اعلیٰ تعلیم یافتہ نوجوان اپنے سوشل میڈیا پروفائل پر true Pakistaniلکھ کر فخر کرتے ہوں، جہاں کے تارکین وطن اپنے ملک کے لئے تن من دھن قربان کرنے کو تیار ہوں اور جہاں اعلیٰ سطح پر مسائل کا ادراک بھی ہو اور اُن مسائل کو حل کرنے کی صلاحیت کا دعویٰ بھی….. اُس ملک میں پھر وہ کون لوگ ہیں جو بجلی کے کُنڈے ڈالتے ہیں، جو گلی محلوں میں کوڑے کے ڈھیر لگاتے ہیں، جو سڑکوں پر ڈنگر وں کی طرح گاڑی چلاتے ہیں، جو پلاٹوں پر قبضہ کرتے ہیں، جو لوگوں کے گردے نکال کر بیچتے ہیں، جو کم سِن بچوں پرڈنڈے برساتے ہیں، جو دفتروں میں رشوت دیتے اور لیتے ہیں، جو دواؤں اور کھانے پینے کی اشیا میں ملاوٹ کرتے ہیں، جو تھانوں میں بے گناہ لوگوں پر تشدد کرتے ہیں، جو اختیار کا ناجائز استعمال کرتے ہیں اور جو طاقت میں اندھے ہو کر قانون کو روند ڈالتے ہیں! ہم سب تو بہت اچھے اور محب وطن شہری ہیں اور کروڑوں کی تعداد میں ہیں ….. تو پھر یہ کروڑوں لوگ کون ہیں جو دن رات ہماری آنکھوں کے سامنے قانون کی پامالی کرتے ہیں، کیا یہ کسی اور سیارے کی مخلوق ہے؟ یقیناً نہیں۔ یہ ہم خود ہیں ۔

یہ ہم ہی ہیں جو ٹی وی چینلز پر دن رات قانون کی بالادستی کے بھاشن دیتے ہیں مگر ’’یہ نہیں جانتے‘‘ کہ اُنہی میڈیا ہاؤسز نے باہر آدھی سڑک غیرقانونی پارکنگ سے قبضے میں کی ہوئی ہے، یہ ہم ہی ہیں جو خود کو proud Pakistaniکہتے ہیں اور ساتھ ہی غلیظ گالیاں بک کر اپنے محب وطن ہونے کا ثبوت دیتے ہیں، یہ ہم ہی ہیں جو رسول اللہ ﷺ سے عشق کا دعویٰ تو کرتے ہیں مگر آپ ﷺ کی بتائی ہو ئی تعلیمات پر عمل کرنے کو تیار نہیں، یہ ہم ہی ہیں جو قائداعظم کو رول ماڈل کہتے ہیں مگر قائد کی کسی ایک بات کو بھی اپنی ذات پر لاگو کرنے کو تیار نہیں، یہ ہم ہی ہیں جو پڑھ لکھ کرشوخ و شنگ ڈگری حاصل کرتے ہیں مگر گنواروں کی طرح سڑک پر گاڑی چلاتے ہیں، یہ ہم ہیں جو کوڑا گھر کے باہر پھینک کر سمجھتے ہیں کہ اب اسے اٹھانا حکومت کا کام ہے، یہ ہم ہی ہیں جو بجلی چوری کرتے ہیں اور پھر اسی سانس میں حکومت کو کوستے ہیں کہ ملک میں ناانصافی کیوں ہے، یہ ہم ہی ہیں جو اندھا دھند پانی ضائع کرتے ہیں اور پھر دعویٰ کرتے ہیں کہ پاکستان سے ہمیں بہت محبت ہے، یہ ہم ہی ہیں جو نماز پڑھنے کے بعد سیدھا اپنی دکان میں واپس جاتے ہیں اور اللہ کی قسم اٹھا کر جعلی مال بیچتے ہیں، یہ ہم ہی ہیں جو اپنی سوشل میڈیا پروفائل پر قرانی آیات لگا کر بہتان تراشی سے بھی باز نہیں آتے، یہ ہم ہی ہیں جو فرانس میں حجاب پر پابندی کو سیکولرازم کے اصولوں کے منافی کہہ کر آسمان سر اٹھا لیتے ہیں مگر اسی اصول کے تحت اپنی اقلیتوں کو آئین میں دیئے گئے جائز حقوق دینے کو تیار نہیں، یہ ہم ہی ہیں جو اس ملک میں غربت پر ماتم کرتے ہیں مگر اپنے کارخانوں میں مزدور کو اُجرت بھی بیگار کی طرح دیتے ہیں اور یہ ہم ہی ہیں جن کے عقیدہ ایمان میں صفائی شامل ہے مگر چاروں طرف پھیلی (ظاہری اور باطنی) غلاظت کو دیکھ کرنہیں کہا جا سکتا کہ ہم میں سے کوئی بھی صاحب ایمان ہے!

پاکستانی سوسائٹی کا اِس وقت سب سے بڑا مسئلہ منافقت ہے۔ منافقت میں اب ہم اُس درجے پر فائز ہو چکے ہیں جہاں ہمیں منافقت کا احساس ہی نہیں ہو رہا، ہم خود کو درست سمجھتے ہیں، اپنے ہر عمل کی توجیہہ ہمارے پاس ہے چاہے وہ عمل خلاف دین ہو یا خلاف قانون، ہمیں اِس بات کی پروا نہیں، جس چیز کو ہم اپنی ذات کے لئے نفع بخش سمجھتے ہیں اُس کا حصول ہمارے لئے جائز ہے، اگر کوئی بات ہمارے کسی نام نہاد نظریئے کے مطابق درست ہے تو ہم اُس کی تاویل کہیں سے بھی تلاش کرکے اُس کو صحیح ثابت کرنے کے لئے اڑ جائیں گے مگر یہ تسلیم نہیں کریں گے ہم غلط بھی ہو سکتے ہیں ۔مثلاً ہم میں سے کچھ لوگ ایسے ہیں جنہوں نے گزشتہ چند برسوں میں بغض معاویہ میں ایک مخصوص بیانئے کی اندھا دھند حمایت کی، میڈیا پر حالیہ بندشیں غالباً اس بیانئے کی حمایت کا نتیجہ ہیں، اگر آپ گاڑی میں پٹرول ڈال کر لاہور موٹر وے سے اسلام آباد کی طرف جائیں گے تو اسلام آباد ہی پہنچیں گے، کابل نہیں (واضح رہے کہ کچھ لوگ میڈیا کی آزادی کی حقیقی جنگ لڑ رہے ہیں مگر اُن کی تعداد آٹے میں نمک کے برابر ہے) اسی طر ح جو لوگ قائداعظم کو ایک آئیڈیل سیاست دان مانتے ہیں وہ قائد کی بتائی ہوئی اُن باتوں کو ماننے کو تیار نہیں جو انہوں نے اقلیتوں کے باب میں سمجھائی تھیں، وہ قائداعظم کی زندگی کا رنگ ڈھنگ اپنانے کو بھی تیار نہیں، تو پھر رول ماڈل کاہے کا، ہر دو صورتوں میں یہ منافقت کی معراج ہے۔ دراصل ہم لوگ تضادات کا مجموعہ بن چکے ہیں، ایک ہی سانس میں ہم کسی ایک بات کا دعوی کرتے ہیں اور پھر اسی سانس میں ہم اس کے بالکل برعکس عمل کرتے ہیں، ہمارا دین ہمیں صفائی کا درس دیتاہے، حسن اخلاق کی تعلیم دیتا ہے، ایمانداری کا سبق سکھاتا ہے، مگر حال ہمارا یہ ہے کہ حج کرنے جاتے ہیں تو اضافی سامان چھپا کر لے آتے ہیں تاکہ پی آئی اے کو اِس کا جرمانہ ادا نہ کرنا پڑے۔

جس حج فلائٹ سے ہم واپس آتے ہیں اُس میں گندگی کے ڈھیر لگا دیتے ہیں اور جو بندہ ہماری بات سے اختلاف کرے اور جواب میں کوئی دلیل نہ ہو تو اسے گندی گالیوں سے نواز کر بتاتے ہیں کہ ہم کتنے ’’دین دار‘‘ ہیں ! اس ملک میں جس گروہ، لیڈر، تجزیہ نگار اور لکھاری نے مذہبی تنگ نظری کو فروغ دیا اور اپنا چھابہ لگا کر محض اس لئے یہ سودا بیچا کہ اُس وقت یہ اُن کے مفاد میں تھا، اب وہی تمام لوگ اِس پر ماتم کناں ہیں کہ ہائے ہمارا یہ مطلب تو نہیں تھا، قائد کا پاکستان ایسا تو نہیں تھا، ہمارے پاکستان میں تو اقلیتوں کے حقوق تھے، اب کیا ہوگا….. اب جو ہونا تھا ہو چکا، یہ ہم ہی تھے جنہوں نے اپنے مفاد کے لئے یہ سب کچھ کیا تھا، جو بویا تھا وہی کاٹنا پڑے گا۔

(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(بشکریہ جنگ لاہور)

(ایمرا نیوز)
کئی سال پہلے میں جناب مشتاق احمد یوسفی کے ہاں حاضری دینے جارہا تھا۔ راستے میں منیر نیازی صاحب کے انتقال کی خبر ملی۔ بہت سی شاموں کی یاد ستانے لگی۔ مطلع وارد ہوا:

اٹھ گئے رند قرینے والے

رہ گئے عام سے پینے والے

گلشن سے ڈیفنس جاتے جاتے غزل پوری ہوگئی:

ہیں کہاں خاص تھی مستی جن کی

اپنے نشّے میں ہی جینے والے

یوسفی صاحب کو سُناکر داد بھی سمیٹی۔ حالانکہ اس معاملے میں وہ بہت محتاط تھے۔

یہ مطلع آج کل بار بار یاد آرہا ہے۔ کتنی بے اصولی کہ بوتلوں میں شراب بچی ہوئی پائی جائے۔ یہ میخانے کی توہین ہے رندوں کی ہتک ہے۔ کم ظرف کے ہاتھوں میں اگر جام دیا جائے ۔ محسن بھوپالی کا قول فیصل۔پاکستان میں آداب مے نوشی یہ ہیں کہ جتنی بھی بوتلیں ہوں وہ پوری کی پوری نوش جاں کرلی جائیں۔ یہاں کوئی ملزم یا مجرم جرم کی نشانی نہیں چھوڑتا۔ ہم دیکھ رہے ہیں کہ نیب۔ ایف آئی اے کو کتنی مشکلات پیش آتی ہیں۔ شراب رکھنا۔ لے جانا قابل دست اندازی پولیس ہیں۔ قرینے سے پینے والوں کو چاہئے کہ ایسے ہم مشربوں کی مذمت کریں۔ جو کچھ بچا بھی لیتے ہیں۔

اب تو اتنی بھی میسر نہیں میخانے میں

جتنی ہم چھوڑ دیا کرتے تھے پیمانے میں

اسلام آباد میں پولیس رات کو لوگوں کے منہ سونگھا کرتی تھی۔ اعتزاز احسن جب1988 میں وزیر داخلہ بنے تو انہوں نے بڑی مشکل سے پولیس کی یہ عادت چھڑوائی۔ پاکستان ایک غیر معمولی ریاست ہے۔ یہاں حالات ہمیشہ غیر معمولی رہتے ہیں۔ اس لیے یہاں اکثر واقعات معمول کے خلاف ہوتے ہیں۔ قانون یہاں چند خاندانوں میں گھر کی لونڈی بن کر رہ گیا ہے۔ قائد اعظم کی فکر اور تعلیمات کو ہم احترام دیں یا نہ دیں۔ لیکن ان کی تصویر کو جی جان سے زیادہ عزیز رکھتے ہیں۔ اس کے لیے سب کچھ کر گزرتے ہیں۔ پیسہ سب سے بڑی قوت ہے۔ پیسہ جیل کو گھر سے زیادہ پُر آسائش بنادیتا ہے۔ آپ رات جیل سے باہر گزار کر دن میں جیل میں واپس جاسکتے ہیں۔ پیسے والے جیل جاتے ہیں بیمار ہوجاتے ہیں۔ پھر اسپتال میں داخلہ حاصل کرلیتے ہیں۔ اسپتال عشرت گاہیں بن جاتے ہیں۔

پیسے والا اب ہر محلّے میں عزت والا بن گیا ہے۔ چھوٹے علاقوں میں پھر بھی کچھ ادب آداب ہیں۔ اس لیے زیادہ پیسہ آجائے جو اس ملک میں ناجائز راستوں سے ہی آسکتا ہے۔ تو ڈیفنس۔ کلفٹن۔ گلبرگ۔ کا رُخ کیا جاتا ہے اس حمام میں سب عریاںسماسکتے ہیں۔

کسی حساب کی زد ہے نہ اختیار کی حد

کچھ ایسے لوگ مرے حلقۂ اثر میں ہیں

اب ایک دو سال سے یہ خاص لوگ بھی بڑے گھبرائے ہوئے ہیں اور خوف زدہ ہیں۔ بہت محتاط ہوگئے ہیں ۔ غالب نے کہا تھا درد کا حد سے گزرنا ہے دوا ہوجانا۔

جب چھوٹے بڑے عہدوں پر مامور۔ عوام کے ٹیکسوں پر پلنے والے سرکاری ذمہ داران اپنے فرائض کی ادائیگی سے کوتاہیاں کررہے ہوں۔ اپنے سرکاری اختیارات چند لاکھ میں فروخت کررہے ہوں۔جب ان آسودہ حالوں کے لیے قانون کی گرفت ہی نہ ہو۔ ایک بڑی اکثریت کی زندگی اجیرن ہو۔ ایک طبقہ ایسا نسل در نسل پیدا ہوتا رہے جو جیسے چاہے قانون کی دھجیاں اڑائے۔ ایس ایچ او ۔ ٹریفک انسپکٹر۔ ایس ایس پی ۔ آئی جی۔ ڈی آئی جی۔ کمشنر۔ڈی سی اس کی جیب میں ہوں۔ سرکاری زمینوں پر قبضے کیے جارہے ہوں۔ سرکاری افسر سب کچھ دیکھ رہے ہوں۔ ان کے سامنے قانون کا جنازہ نکالا جارہا ہو۔

جب تعلیم بک رہی ہو۔ ڈگریاں نیلام کی جارہی ہوں۔ بورڈ میں پوزیشنوں کی قیمت لگ رہی ہو۔پرائیویٹ اسکول کتابوں اور کاپیوں کو من مانی قیمتوں پر بیچ رہے ہوں۔ جب ماہانہ فیس دس پندرہ ہزار روپے سے بڑھ کر تیس چالیس تک پہنچ جائے۔ اس کے باوجود ماں باپ کو ٹیوشن سنٹروں پر بھی اتنے ہی پیسے دینے ہوں۔ جب اپنی عمر بھر کی کمائی سے مشکل سے ایک پلاٹ خرید کر اس پر غریب ٹیچر اپنا مکان بنانے کی جرأت کرے تو بلڈنگ کنٹرول اتھارٹی والے لاکھ دو لاکھ رشوت کے بغیر اس کا نقشہ منظور نہ کررہے ہوں۔

وہ جنہیں بھیڑوں کے گلے کی نگہبانی سونپی جائے۔ وہی بھیڑیے بن رہے ہوں جو ریاستی زمینوں کے امین ہوں وہی زمین کے کاروبار میں مصروف ہوجائیں۔ جہاں تھانے بکتے ہوں۔ نوکریاں فروخت ہوتی ہوں۔ جہاں پولیس تبادلوں۔ سرکاری افسروں کے تبادلے پر لاکھوں کے نذرانے اور وہ بھی بیرون ملک وصول کیے جاتے ہوں کہ پاکستان پارسائوں کی مقدس زمین ہے۔ یہاں ناجائز آمدن وصول کرنا انہیں غیر شرعی لگتا ہے۔ جہاں درسگاہیں بھی ناجائز آمدنی کا ذریعہ بن جاتی ہوں۔ علمائے دین۔ اسکولوں کالجوں یونیورسٹیوں کے مالکان کروڑوں کی گاڑیوں میں سفر کرتے ہوں۔ جہاں کلیدی اسامیاں اہل لوگوں کی بجائے سمدھیوں۔ بھائیوں اور لنگوٹیے یاروں میں بانٹی جاتی ہوں۔

جہاں با اثر لوگوں کے ضمیر اور پندار کی یہ قیمت دیکھ کر غیر ملکی کمپنیاں۔ بین الاقوامی طاقتیں اور دوسری قوموں کے خفیہ ادارے بھی بہتی گنگا میں ہاتھ دھوتے ہوں۔جہاں پیسہ غیر ملکی سازشوں کو بھی کامیاب بنادیتا ہو۔

وہاں اگر اعلیٰ منصب پر فائز کسی پاکستانی کا ضمیر جاگ اٹھتا ہے اور وہ حرکت میں آجاتا ہے تو وہ با الیقیں ہم سب غافلوں ۔ کوتاہیوں کے مرتکب ہم وطنوں کا کفارہ ادا کررہا ہوتا ہے۔ پھر یہ تبصرہ بے معنی ہوجاتا ہے کہ یہ اسکے اختیار میں ہے یا نہیں۔جس ملک میں آئین کو بارہ صفحے کی کتاب کہہ کر بار بار پھاڑا جاسکتا ہے۔ جہاں جس کی لاٹھی اس کی بھینس کا فارمولا ہے۔ وہاں اگر ایسے غیر معمولی اقدامات کسی ادارے یا کسی فرد واحد کی طرف سے ہورہے ہیں تو وہ عین منطقی اور معروضی ہیں۔

کتنی منتخب حکومتیں فوجی سرکاریں آئیں۔ گزشتہ پچاس برس میں کوئی ڈیم نہیں بن سکا۔ ڈیم بنانا اس کی ذمہ داری نہیں ہے۔ لیکن جن کی ذمہ داری ہے وہ غفلت یا مصلحت کے شکار ہیں۔ یا سازش کا حصہ ہیں ۔ زمینیں بنجر ہورہی ہیں۔ دریائوں میں ریت بھر رہی ہے۔ بھارت ڈیم پر ڈیم بنارہا ہے۔ تو کیا ایک روشن ضمیر انہی غافلوں کے نقش قدم پر چلے۔ اپنے ضمیر کو جبراً سُلا دے۔ ڈیم تو انجینئر ہی بنائیں گے لیکن وہ آپ کے اندر اس شدید ضرورت کا احساس پیدا کررہا ہے۔ اس منصوبے کی اپنائیت بلکہ ملکیت دے رہا ہے ۔

آپ کہتے ہیں کہ کرپشن اس ملک کودیمک کی طرح چاٹ گئی وہ اس تباہ کن خرابی کے خلاف صرف آواز بلند نہیں کررہا جو اس کے اختیار میں ہے وہ کررہا ہے۔ کہا جاتا تھا کہ چھوٹے لوگوں پر سب ہاتھ ڈال دیتے ہیں اگر وہ وزیر اعظموں۔ سابق صدور۔ وزرائے اعلیٰ۔ وفاقی وزراء۔ کھرب پتیوں کو کٹہرے میں کھڑا کررہا ہے تو کیا برسوں سے یہی شکوے شکایت کرنے والوں کو اس کے ساتھ کھڑے نہیں ہونا چاہئے۔

کہیں سے تو ابتدا ہوگی۔ کوئی تو میدان میں آئے گا۔ دوسری پارٹی کا بندہ گرفت میں آئے تو آپ کہیں یہ مکافات عمل ہے۔ اپنی پارٹی کا پکڑا جائے تو یہ آئینی حدود سے تجاوز ہے۔ صرف اور صرف ملک صرف اور صرف قانون ہمارے سامنے محور و مرکز کیوں نہیں ہوتا۔میں تو اقبال کا ہم آواز ہوں۔

اک ولولۂ تازہ دیا تونے دلوں کو

(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(بشکریہ جنگ لاہور)

(ایمرا نیوز)
بہت ہی اچھا لگا جب مقہور جمہوری عبور کے پانچویں وزیراعظم نے یومِ دفاع پر بطور چیف گیسٹ اور چیف ایگزیکٹو جی ایچ کیو کے وسیع میدان میں اپنے خیالات کا بلاجھجک اظہار کیا۔ ایسا لگا کہ وزیراعظم عمران خان اپنے ہی حلقہ انتخاب سے خطاب کر رہے ہیں۔ سول اور فوجی دل و دماغ یوں شیر و شکر ہوتے پچھلے چالیس برس میں شاید ہی کبھی دیکھے گئے ہوں گے۔ لیکن جب عمران خان نے ببانگِ دُہل اپنا روایتی موقف دہرایا کہ دہشت گردی کے خلاف جنگ ہماری نہیں تھی تو شکنوں پہ بل تو پڑنے ہی تھے کہ حاضرین کی اچھی خاصی تعداد اُن شہدا کے لواحقین پر مشتمل تھی جنہوں نے دہشت گردوں کے فتنے سے نپٹتے وطنِ عزیز کے لیے اپنی جانیں قربان کی تھیں۔ اور جب فوراً ہی وزیراعظم نے شہدائے دہشت کو خراجِ عقیدت پیش کیا تو مجمع کا ردِّعمل دیدنی تھا۔ غالباً وزیراعظم کا یہ عزم بے جا نہ تھا کہ پاکستان آئندہ کبھی دوسروں کی جنگ میں ملوث نہیں ہوگا۔ ہم کب سے ابتدائے پاکستان سے غیروں کے فوجی بلاکوں کا لقمہ بنے رہے ہیں۔ سیٹو، سینٹو، افغان جہاد، طالبان حکومت کے داعی اور پھر نائن الیون کی دہشت گردی کے ساتھ اُنہیں جہادیوں کے خلاف جہاد جنہیں ہم نے امریکہ کی سرپرستی میں تیار کیا تھا۔ اس سب کا خمیازہ نہتے لوگوں، سپاہیوں، افسروں کی شہادتوں اور وطنِ عزیز کے چپہ چپہ پہ لگنے والے زخموں کی صورت ہم نے بھگتا اور اب تک بھگت رہے ہیں۔ جنرل باجوہ نے اشارہ تو دیا کہ ہم نے 1965ء کی جنگ اور 1971ء کے المیے سے سبق سیکھا ہے۔ اب ضرورت ہے کہ ان تمام جنگوں، جہادوں اور کارگل سمیت تمام ایڈونچرز سے ٹھوس نتائج اخذ کیے جائیں۔ ہم کسی کی بھی جنگ میں کودیں اور نہ اپنی دھرتی کو کسی فتنہ گری کے ہاتھوں استعمال ہونے دیں۔ خطے اور ہمسایوں کے ساتھ امن و امان سے رہنے کی خاکی و مفتی مشترکہ خواہش کو عملی جامہ پہنا کر اپنے خلاف بڑھے ہوئے بیرونی خطرات کے امکانات کو معدوم کرنے کی مقدور بھر کوشش کریں۔ سول ملٹری تعلقات میں بُعد کوئی افسانہ نہیں جیسا کہ عمران خان صاحب کا خیال ہے۔ ہماری قومی تاریخ کے مدوجذر میں یہ ایک کلیدی عنصر رہا ہے۔ گورنر جنرل غلام محمد اور صدر اسکندر مرزا کی صورت سول نوکرشاہی کا غلبہ اور پھر جنرل ایوب خان کے مارشل لا کی صورت فوجی غلبہ۔ 1971ء کے المیہ کے نتیجے میں چیف مارشل لا ایڈمنسٹریٹر، صدر اور وزیراعظم ذوالفقار علی بھٹو کی صورت سویلین غلبہ اور 1973ء کے آئین کا عمرانی معاہدہ۔ پھر جنرل ضیاء الحق کی فوجی بغاوت اور سویلین بالادستی کے نشان بھٹو کی پھانسی۔ جنرل ضیاالحق کی نرسری میں تیارکردہ سیاسی قیادت اور بھٹو روایت کی وارث بے نظیر بھٹو اور فوجی قیادت کے درمیان کشمکش کے کئی ادوار۔ بے نظیر بھٹو کا قتل اور وزیراعظم نواز شریف کی پے در پے برطرفیاں۔ جنرل مشرف کا دور اور ایک نئی سیاسی پود کی تشکیل اور اب تبدیلی۔ سول و ملٹری قیادت کے اس ہنی مون پیریڈ میں کیا ہی اچھا ہو کہ جنرل باجوہ (جو آئینی نظام اور جمہوری تسلسل کے بڑے حامی ہیں) اور وزیراعظم عمران خان سول ملٹری تعلقات کو ایک مستحکم آئینی و اداراتی بنیاد فراہم کر دیں کہ طاقت کے آئینی و غیرآئینی مراکز کی بے جا کشمکش کی بجائے اداراتی معاونت فروغ پائے۔ (جس کا اظہار امریکا کے خارجہ سیکرٹری کے دورہ کے وقت ہوا اور سول و فوجی قیادت وزیراعظم کی سربراہی میں اکٹھے بیٹھے نظر آئے۔)
امریکی وفد کے ساتھ پاکستان کی متحدہ قیادت نے جو بھی بات چیت کی ہے، اس کا اچھا تاثر قائم ہوا ہے۔ اب بات چیت وزیراعظم عمران خان کی انتظامیہ کے ساتھ ہی کی جائے گی جس کا افواجِ پاکستان ایک آہنی حصہ ہیں۔ کہا جا رہا ہے کہ جو باتیں پہلے طے ہوئی تھیں اُن پر عملدرآمد ہونے سے پاکستان اور امریکہ میں اعتماد بحال ہونے کی راہیں کھل سکتی ہیں۔ ویسے بھی موجودہ دگرگوں مالیاتی حالات میں کر و فر مردَ بیمار کی حالت بہتر بنانے کے تقاضوں سے ہم آہنگ نہیں۔ دہلی میں امریکہ کے خارجہ اور دفاعی سیکرٹری کی اپنے بھارتی ہم منصب خواتین کے ساتھ پریس کانفرنس میں پاکستان کا لفظ آیا نہ چین کا۔ یہ علیحدہ بات ہے کہ مشترکہ بیان میں اُسی موقف پہ اصرار ہے جو ہم کئی برسوں سے بار بار سنتے آئے ہیں۔ واشنگٹن میں پاکستانی سفارت خانے کی تقریب میں امریکی وزیردفاع کے نائب کی جانب سے تہنیتی کلمات سے ظاہر ہے کہ کچھ برف پگھلی ضرور ہے۔ اچھا ہوگا اگر ہم جنرل مشرف کی دوغلی حکمتِ عملی کی باقیات سے جان چھڑا کر قول و فعل کے تضاد کی شرمندگی کے بوجھ سے اپنی سفارت کاری کو نجات دلا کر عالمی تنہائی سے نکلنے کا اہتمام کریں۔ میری رائے میںیہ جو ’’ڈو مور‘‘ (اور کریں) کو ہم نے بلاوجہ قومی حمیت کا مسئلہ بنا دیا ہے (جیسا کہ ڈرون حملوں کے وقت نظر آیا) وہ خود ہمارے قومی مقاصد سے ہم آہنگ نہیں ہے۔ ہمارا اپنا قومی و ریاستی اصرار ہے کہ ہم کسی بھی طرح کی دہشت گردی کو پنپنے نہیں دیں گے اور اپنی دھرتی کو کسی بھی ملک کے خلاف دہشت گردی کے لیے استعمال نہیں ہونے دیں گے۔ اور یہ کہ ابھی دہشت گردی کی ’’باقیات‘‘ کے خلاف ردّالفساد جاری ہے۔ اگر ہم ایسا بلا کم و کاست کر رہے ہیں تو پھر کسی کو ’’ڈو مور‘‘ کہنے کی زحمت کیوں ہوگی؟ اگر امریکہ افغانستان میں اپنی ناکامیوں سے بھنّا کر ہم پر ملبہ ڈالتا رہے گا تو دُنیا ہماری کارگزاریوں سے ہماری سچائی کی معترف ہو سکے گی۔ ہم نے امریکہ کے ذریعہ جو بھارت کو بات چیت شروع کرنے کا پیغام دیا ہے وہ مناسب ہے۔ اگر امریکہ کو افغانستان سے روانگی کے لیے سیاسی حل نکالنا ہے اور پاک افغان سرحد پہ دہشت گردی کا سدباب کرنا ہے تو ہماری مشرقی سرحد کو ٹھنڈا کروانا امریکہ اور خطے کے امن کے مفاد میں ہے۔

امریکی دورے کے بعد اب چین کے وزیرخارجہ تشریف لے آئے ہیں۔ اُن سے کرنے کو بہت باتیں ہیں۔ خاص طور پر سی پیک کو عمران خان کے تبدیلی کے ایجنڈے سے ہم آہنگ کرنے کے لیے سماجی شعبوں میں بہت گنجائش ہے۔ پاک چین شراکت داری کو دست نگری سے نکلنے اور معیشت کی پیداواری اور پائیدار بنیادوں کو مضبوط کرنے کے لیے بروئے کار لانا چاہیے۔ پانی کے بحران سے نمٹنے کے لیے ڈیمز کی تعمیر کے لیے وزیراعظم نے جو بیرونِ ملک پاکستانیوں سے اپیل کی ہے، اُس میں چین کو بھی شامل کرنا چاہیے۔ اگر چین عظیم الشان شاہراہیں بنا سکتا ہے، گوادر تعمیر کر سکتا ہے اور بجلی کے بحران کو حل کرنے میں مدد کر سکتا ہے تو وہ پانی، زراعت اور برآمداتی شعبوں کی ترقی میں بھی بہت معاون ہو سکتا ہے۔

ہمارے موجودہ مالیاتی خسارے کے بحران کو حل کرنے کے لیے چین سے امداد حاصل کرنے سے زیادہ ضرورت یہ ہے کہ چین سے موجودہ تجارتی خسارے (جو اس وقت 16.4 ارب ڈالرز ہے اور ہمارے کل تجارتی خسارے کا بڑا حصہ ہے) پہ قابو پانے کے طریقہ ہائے کار پہ بات کی جائے۔ مقامی کرنسیوں میں باہمی تجارت اس کا حل نہیں بلکہ پاکستان کی چین کو موجودہ برآمدات (جو 1.83 ارب ڈالرز ہیں) کو کئی گنا بڑھانے کی راہیں نکالنی چاہئیں۔ دوسرے کئی ملکوں کو چین نے برآمدی رعایات دی ہیں، تو پاکستان کو کیوں نہیں مل سکتیں؟ چین نے بھارت کے ساتھ لمبے چوڑے علاقائی جھگڑوں اور امریکہ کے ساتھ مل کر چین کے گھیراؤ کے عالمی سامراجی منصوبوں میں شرکت کے باوجود اپنے معاشی و سفارتی تعلقات کو بگڑنے نہیں دیا۔ اور آپ دیکھیں گے کہ کیسے چینی، جاپانیوں اور بھارتیوں کو امریکہ کے ساتھ جاری تجارتی جنگ میں اپنا ہمنوا بناتے ہیں۔

ہم بھارت چین سفارتی و معاشی ماڈل کو کیوں پاک بھارت تعلقات میں اپنی قومی معاشی اولیتوں کے مطابق اپنا نہیں سکتے۔ چینی وزیرخارجہ کے دورے کے وقت ہمارے وزیرِ خزانہ ایک نیا بجٹ تیار کرنے میں مصروف ہیں۔ ان کا بڑا مسئلہ یہ ہے کہ مالیاتی خسارے کو کیسے پورا کیا جائے۔ بہتر ہوگا ہم اس کے لیے چین کو زیادہ نہ دوہیں، بلکہ چین کے ساتھ زیادہ کارآمد معاشی بنیاد کی تعمیر کے لیے بات کریں۔ جو منصوبے شروع ہو چکے وہ جاری رہیں اور جو نئے منصوبے بنیں وہ ہماری اپنی صنعتی، تکنیکی، سائنسی، علمی، زرعی، آبی اور توانائی کی بنیادوں سے متعلق ہوں۔ چین سے قرضوں کی ادائیگی کے التوا پر بھی بات ہونی چاہیے اور عالمی مالیاتی اداروں کو یہ موقع نہیں دینا چاہیے کہ وہ یہ بہانہ تراشیں کہ اُن کی امداد کو چین کے قرضے دینے میں استعمال کیا جا سکتا ہے۔ چین پاکستان اکنامک کاریڈور کو پاکستان کے صنعتی، زرعی اور سائنسی انقلاب کو مہمیز لگانے کے لیے استعمال میں لانا ہوگا۔ دست نگری خواہ مغرب کی ہو یا مشرق کی آخری نتیجے میں دست نگری ہوتی ہے۔ موضوع تو اور بھی ہیں لیکن یہ کالم اپنے دوست فواد چوہدری سے اس گزارش پہ ختم کرتا ہوں کہ پہلے سے موجود سنسرشپ ختم کروائے بغیر آپ میڈیا کی اصلاح کے دردمیں مبتلا نہ ہوں تو ہم آپ کے ممنون ہوں گے۔

(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(بشکریہ جنگ لاہور)

(ایمرا نیوز)
تحریک انصاف کے ڈاکٹر عارف علوی ملک کے تیرہویں صدر منتخب ہو گئے۔ مولانا فضل الرحمٰن اور اعتزاز احسن کو انتخابی شکست ہوئی۔ پارلیمنٹ میں 432میں سے 424ووٹ کاسٹ ہوئے۔ جن میں سے 353کی واضح اکثریت ڈاکٹر عارف علوی صاحب نے حاصل کی۔
ملک کے تیرہویں منتخب صدر ڈاکٹر عارف علوی نے اپنے انتخاب کے فوراً بعد اپنے خطاب میں کہا ’’صرف پی ٹی آئی کا نہیں پورے ملک کا صدر ہوں، آئین کے دائرے میں رہتے ہوئے قوم کی خدمت کروں گا۔ اللہ میری مدد کرے۔ بے جا پروٹوکول کم کروں گا‘‘۔ خدا کرے ایسا ہی ہو اور صدر کا عہدہ بے جا اخراجات کا سبب نہ بنایا جائے اور اٹھارویں ترمیم کے بعد صدر کے پاس جو اختیارات رہ گئے ہیں انہیں آئین کے ہی دائرے میں استعمال کیا جائے۔

پاکستان کی سیاسی تاریخ ایک ہی وقت میں دلچسپ بھی ہے اور افسوس ناک بھی، مثلاً یہاں پہ صدر غلام اسحاق خان مرحوم اور صدر فاروق لغاری مرحوم جیسی شخصیات منتخب حکومتوں کو برطرف کر کے گھر بھیجتی رہی ہیں اور ایسے صدر بھی رہے جو ملک و قوم کو صحیح جمہوری منزل پر پہنچانے کے لئے اپنے موجود آئینی اختیارات سے دستبردار ہو گئے اور انہیں پارلیمنٹ کے حوالے کر دیا جیسا کہ سابق صدر آصف علی زرداری کی مثال دی جا سکتی ہے۔ آیئے ان کی شخصیت اور پیپلز پارٹی پر ذرا تفصیل سے بات کرتے ہیں۔

پاکستان پیپلز پارٹی کی سرکردہ شخصیت اور سابق وزیراعظم محترمہ بے نظیر بھٹو کے رفیق حیات، زندگی کے پہلے ہارٹ اٹیک سے زندگی پانے کے بعد دبئی میں صحت یابی کی جانب گامزن تھے۔ ہارٹ اٹیک ان دنوں جس کے نتیجے میں معالجوں نے انہیں بارہ ہفتے مکمل آرام کا مشورہ دیا تھا۔ اسی آصف علی زرداری کے بارے میں، میں نے پاکستانی سیاست، میڈیا اور ان کی ذاتی شخصیت کے حوالے سے حسب روایت بات کرنی ہے۔

پاکستان پیپلز پارٹی ہمیشہ سے وہی ہے، جس کی قیادت ذوالفقار علی بھٹو مرحوم اور بیگم نصرت بھٹو کے پاس رہی۔ جسے بھٹو صاحب کی وفات اور بیگم صاحبہ کی علالت کے بعد محترمہ بے نظیر بھٹو نے سنبھالا۔ پاکستان پیپلز پارٹی کے اس تاریخی تسلسل کے تناظر میں کوثر نیازی مرحوم، غلام مصطفیٰ کھر، محمد حنیف رامے، غلام مصطفیٰ جتوئی، ڈاکٹر غلام حسین، عبدالحفیظ پیرزادہ، ممتاز علی بھٹو وغیرہ اپنے اپنے وقت اور اپنے اپنے انداز میں جو بھی کہتے رہے یا کچھ لوگ آج بھی کہہ رہے ہیں وہ عوام کی عدالت میں مسترد ہو چکا۔ ثبوت کے طور پر پاکستانی عوام نے جب بھی موقع ملا، بیلٹ بکس میں مندرج اپنی رائے کے ذریعے اپنے اس اجتماعی فیصلے اور متفقہ دانش کا اظہار کیا۔ باضابطہ جماعتوں کے بارے میں اسی واقعہ کی شہادت ملتی ہے۔ جماعت اسلامی وہی ہے، جس کی قیادت سید ابوالاعلیٰ مودودی نے سنبھالی، جسے ان کے بعد میاں طفیل محمد نے اور ان کے بعد دوسرے منتخب حضرات نے جاری رکھا ہوا ہے۔ اب اس معاملے میں جماعت کے حد درجہ واجب الاحترام بزرگ، صاحب کردار و تقویٰ، مولانا امین احسن اصلاحی، نعیم صدیقی (باری تعالیٰ ان کے لئے اپنا درِ رحمت ہمیشہ وا رکھے) یا ڈاکٹر اسراراحمد سمیت جماعت سے علیحدگی اختیار کرنے والے اصحاب جو بھی کہیں، جماعت سے متاثر یا اس کے حامی عوام کی اکثریت نے ان کے قول سے ہمیشہ اعراض اور جدائی کا راستہ اپنایا۔ اسی اصول کا اطلاق پاکستان مسلم لیگ پر ہو گا کہ قومی سطح پر مسلم لیگ کی قومی شناخت کا عوامی تصدیق نامہ میاں محمد نواز شریف کے پاس ہے، جن کی اجازت سے میاں شہباز شریف ان کے تصدیق نامے کے تحت پاکستان مسلم لیگ کے قیادتی فرائض ادا کر رہے ہیں۔ کہنے کا مقصد یہ ہے کہ قومی جماعتوں کے سلسلے میں مقبول عام پیغام ہی طے شدہ جماعتی سچ ہوتا ہے، لہٰذا پیپلز پارٹی کے بارے میں متذکرہ حضرات یا کل کے رائو سکندر اقبال، فیصل صالح حیات، آفتاب شیر پائو یا سردار فاروق لغاری، جس بھی اعلان کا سہارا لیتے رہے پاکستانی عوام کے نزدیک وہ پاکستان پیپلز پارٹی سے باہر، ایک سوالیہ نشان ہی رہے۔ صدارتی انتخاب میں اعتزاز صاحب کی شکست کے باوجود پاکستان پیپلز پارٹی کا سیاسی وجود فیصلہ کن حیثیت اختیار کرتا جا رہا ہے اور لگتا یوں ہے کہ مستقبل میں آصف زرداری کا وژن اور بلاول کی جواں عمر قیادت پیپلز پارٹی کو 70کے عشرے میں واپس لے جا سکتی ہے اور صدارتی انتخاب میں حصہ اسی پروگرام کے تحت تھا۔
(کالم نگار کے نام کیساتھ ایس ایم ایس اور واٹس ایپ رائےدیں00923004647998)
(بشکریہ جنگ لاہور)

(ایمرا نیوز)
بہت خوش ہیں ۔ بغلیں بجارہے ہیں ۔ وزیرخارجہ شاہ محمود قریشی خوشی سے پھولے نہیں سمارہے ہیں۔امریکی وزیرخارجہ مائیک پومپیو کے پانچ گھنٹے کے دورہ پاکستان کے بعد صحافیوں کو ایک گھنٹہ سے زائد وقت کی بریفنگ دیتے ہوئے قادرالکلام قریشی صاحب نے اردو اور انگریزی ڈکشنریوں کے تمام سہانے الفاظ دہرا کر یہ تاثر دیا کہ جیسے وہ اور ان کے وزیراعظم پومپیو کو ہی نہیں بلکہ امریکہ کو بھی فتح کرچکے ۔حالانکہ کامیابی سے مراد ان کی یہ تھی کہ پومپیو نے اس قدر دھمکیاں نہیں دیں جس قدر خدشہ تھا اور ان کی خوشی کی اصل وجہ یہ تھی کہ پومپیو نے مہربانی کرکے انہیں بتادیا کہ جب وہ اقوام متحدہ کی جنرل اسمبلی میں شرکت کے لئے امریکہ آئیں گے تو ان سے بھی دوبارہ ملاقات کا شرف حاصل کرسکتے ہیں ۔ تاہم قریشی صاحب نے وضاحت نہیں کی کہ پومپیو نے دھمکی آمیز بیانات کے بعد پاکستان آکر مزید دھمکیاں اس لئے نہیں دیں کہ وہ جو مطالبہ لے کر آرہے تھے، وہ ان کی آمد سے پہلے مان لیا گیا تھا۔ انہو ں نے مطالبہ کیا کہ پاکستان افغان طالبان کو مذاکرات کی میز پر لانے میں مدد کرے اور ان کی آمد سے پہلے ان کو بتایا گیا تھا کہ پوری طرح مدد کی جائے گی ۔ ہاں البتہ پومپیو نے آنے سے پہلے واضح کردیا تھا کہ اگراب کی بار پاکستان نے وعدہ پورا نہیں کیا تو پھر اچھا نہیں ہوگا اور ہم نے ان سے کہہ دیا کہ موقع دے کر دیکھ لیجئے ۔ پاکستان آمد سے قبل امریکہ نے پاکستان کی واجب الادا کولیشن سپورٹ فنڈ کی مد میں تیس کروڑ ڈالر کی ادائیگی روک دی تھی اور پاکستانی حکومت اس قدر دفاعی پوزیشن میں رہی کہ پومپیو کے دورہ پاکستان کے موقع پر ان سے اس کی بحالی کا اعلان تک نہ کرواسکی ۔ نہ تو شاہ محمود قریشی کی پریس کانفرنس میں اس کا کوئی ذکر ہے اور نہ امریکی دفتر خارجہ کے بیان میں ۔ گویا ہم نے وعدہ کرلیا کہ کام کریں گے لیکن پرانی تنخواہ بھی طلب نہیں کریں گے ۔ یہ ہے وہ مبینہ کامیابی جو پومپیو کے دورہ پاکستان میں ہماری نئی نویلی حکومت نے حاصل کی ۔

امریکہ کو پاکستان سے شکایت ہے کہ وہ افغانستان کے معاملے میں حسب منشا تعاون نہیں کررہا جبکہ پاکستان کو امریکہ سے شکایت ہے کہ وہ اس کی قربانیوں کو تسلیم نہیں کررہا ۔ امریکہ کو شکایت ہے کہ پاکستان افغانستان اور خود اپنی سرحدوں کے اندر انتہاپسندوں اور دہشت گردوں کے خلاف سنجیدہ کارروائی یا تعاون نہیں کررہا جبکہ پاکستان کو شکایت ہے کہ امریکہ افغانستان اور خطے میں پاکستان کے مفادات کو مدنظر نہیں رکھ رہا ۔ اہم ترین شکایت امریکہ کو یہ ہے کہ پاکستان خطے میں چین کا اسٹرٹیجک پارنٹر اور اتحادی کیوں بن رہا ہے جبکہ پاکستان کو اصل شکایت یہ ہے کہ امریکہ بے وفائی کرکے ہندوستان کوگلے کیوں لگا رہا ہے ۔ یوں اس تناظر میں پاکستان کی خارجہ پالیسی کی کامیابی یہ سمجھی جاتی ہے (میں ذاتی طور پر اس سوچ سے اتفاق نہیں کرتا) کہ امریکہ کو ہندوستان سے دور کرکے اپنا ہمنوا بنالیا جائے جبکہ ہندوستان اپنی کامیابی یہ سمجھتا ہے کہ وہ پاکستان کے مقابلے میں امریکہ کو اپنا ہمنوا بنالے ۔ اب اس تناظر میں امریکی سیکرٹری خارجہ کے پاکستان اور ہندوستان کے دوروں اور اس میں طے پانے والے معاملات کا تقابل کرکے بخوبی اندازہ لگایا جاسکتا ہے کہ شاہ محمود قریشی جشن منانے میں حق بجانب ہیں یا نہیں ۔

اب زمینی حقیقت یہ ہے کہ امریکی سیکرٹری خارجہ پاکستان صرف چند گھنٹے کے دورے پر آئے اور باقاعدہ مذاکرات کی بجائے صرف افغانستان کے معاملے پر چند مطالبات کرکے چلے گئے جبکہ ہندوستان وہ 2017 میں شروع کئے گئے وزارتی ڈائیلاگ کے لئے گئے ۔بلکہ حقیقت یہ ہے کہ وہ اصلاً خطے میں اس ڈائیلاگ کے لئے آئے تھے اور اس کے لئے آتے ہوئے چند گھنٹے کے لئے پاکستان میں بھی رکے ۔ پاکستان آتے ہوئے وہ صرف ایک جنرل اور افغانستان کے لئے خصوصی نمائندے زلمے خلیل زاد کو ساتھ لائے جبکہ ہندوستان میں امریکی سیکرٹری دفاع جیمز میٹس بھی ان کے ہمراہ تھے ۔پاکستان کے دورے کے موقع پر وہ اپنے ہم منصب شاہ محمود قریشی کے ساتھ مشترکہ پریس کانفرنس تو کیا مشترکہ اعلامیہ جاری کرنے پر بھی تیار نہ ہوئے جبکہ ہندوستان کے دورے کے اختتام پر دونوں ممالک کے وزرائے خارجہ اور وزرائے دفاع کا تفصیلی اور مشترکہ اعلامیہ جاری کردیا گیا جو ہر لحاظ سے ہندوستان کے بیانیے کو آئینہ دار ہے ۔ پاکستان کے دورے کے اختتام پر امریکی سیکرٹری خارجہ نے ہوائی اڈے پر اپنے صحافیوں کے ساتھ جو گفتگو کی یا پھر امریکی محکمہ خارجہ کی طرف سے جو بیان جاری کیا گیا ، اس میں صرف اور صرف افغانستان کے حوالے سے پاکستان سے مطالبات اور توقعات کا ذکر ہے جبکہ خطے سے متعلق پاکستان کے مطالبات اور خدشات کا کہیں ذکر سننے یا دیکھنے کو نہیں ملتا جبکہ ہندوستان کے دورے کے اختتام پر جو مشترکہ اعلامیہ جاری کیا گیا وہ خطے کے حوالے سے ہندوستانی خواہشات کا ہی نہیں بلکہ پاکستان سے متعلق بھی اس کے مطالبات کا آئینہ دار ہے ۔ اس مشترکہ اعلامیہ کے الفاظ یوں ہیں :

Welcoming the expansion of bilateral counter- terrorism cooperation, the minister announce their intent to increase information sharing efforts on known or suspected terrorists and to implement UN Security Council resolution 2396 on returning foreign terrorist fighters. They committed to enhance their ongoing cooperation in multilateral fora such as FATF. They reaffirmed their support for UN comprehensive convention of international terrorism that will advance and strengthen the framework for global cooperation and reinforce the message that no cause or grievance justifies terrorism. The minister denounced any use of terrorist proxies in the region, and in this context they called on Pakistan to ensure that the territory under its control is not used to launch terrorist attacks on other countries. On the eve ot 10- years anniversary of the 26/11 Mumbai attack, they called on Pakistan to bring to justice expeditiously the perpetrators of the Mumbai, Pathankot, Uri and other cross border terrorist attacks. The ministers welcomed the launch of bilateral dialogue on designation of terrorists in 2017 , which is strengthening cooperation and action against terrorist groups , including Alqaida, ISIS, Lashkar e Tayyeba , Jaish e Mohammad, Hizbu-ul- mujahideen, the Haqqani network, Tehrik e Taliban Pakistan , D- Company and their affiliates.

مشترکہ اعلامیہ کے ان الفاظ سے بالکل واضح ہے کہ امریکہ نے بھی ہندوستان کا ہمنوا بن کر پاکستان پر دہشت گرد تنظیموں کی سرپرستی کے الزام کو تسلیم کیا ہے ۔ اور اسی تسلسل میں ممبئی، پٹھان کوٹ اور اڑی حملوں کے لئے امریکہ کی طرف سے بھی اسی طرح پاکستان کو مورد الزام ٹھہرایا گیا ہے جس طرح کہ ہندوستان اسے موردالزام ٹھہراتا ہے ۔ بعینہ ہندوستان کی خواہش کے مطابق لشکرطیبہ ، جیش محمد اور حزب المجاہدین بھی القاعدہ اور داعش جیسی تنظیمیں قرار دے دی گئی ہیں ۔ اس اعلامیہ میں یہ بھی عزم ظاہر کیا گیا ہے کہ دونوں ممالک اقوام متحدہ اور ایف اے ٹی ایف جیسے عالمی فورمز پر بھی ایک دوسرے کے ساتھ تعاون کریں گے اور اگر امریکہ اسی طرح ہر معاملے میں ہرحوالے سے ہندوستان کا ہمنوا بنا رہتا ہے تو پھر بخوبی اندازہ لگایا جاسکتا ہے کہ آنے والے وقتوں میں عالمی فورمز پر امریکہ کا رویہ کیا ہوگا ۔صرف یہ نہیں بلکہ آگے جاکر اس مشترکہ اعلامیہ میں افغانستان کے حوالے سے ہندوستان کے کردار کو سراہ کر وہاں اس کے کردار کومزید بڑھانے پر بھی زور دیا گیا ہے ۔

اب آپ ہی بتائیے کہ شاہ محمود قریشی کا جشن اور خوشی کس قدر بجاہے ؟۔ ذرا ہمیں بھی وہ سفارتی کامیابی سمجھا دی جائے جس کا ان دنوں نئی حکومت جشن منارہی ہے ۔

(بشکریہ جنگ لاہور)