All posts by Sibte Hussain

لاہور(ایمرا نیوز آن لائن) نیب نے آشیانہ اقبال ہاؤسنگ اسکیم اسکینڈل اور رمضان شوگر مل کیسز کی سماعت کے دوران احتساب عدالت سے شہباز شریف کے وارنٹ گرفتاری جاری کرنے کی اپیل کردی ہے۔ لاہور کی احتساب عدالت کے جج جواد الحسن نے آشیانہ اقبال ہاؤسنگ اسکیم اسکینڈل اور رمضان شوگر مل کیسز کی سماعت کی، حمزہ شہباز عدالت میں پیش ہوئے جب کہ شہباز شریف پیش نہیں ہوئے۔

عدالت کے استفسار پر شہباز شریف کے وکیل عطا تارڑ نے کہا کہ شہباز شریف 11 جون کو وطن واپس آجائیں گے۔ نیب نے شہباز شریف کی حاضری معافی سے متعلق جواب جمع کروا دیا، نیب پراسیکیوٹر نے موقف اختیار کیا کہ شہبازشریف کے تمام میڈیکل ٹیسٹ پاکستان میں ہوسکتے ہیں، شہباز شریف کا علاج بھی پاکستان میں ممکن ہے، شہباز شریف کھلے عام لندن کی سڑکوں میں گھوم رہے ہیں اور یہاں علاج کا بہانہ بنا کر حاضری معافی کی درخواستیں دی جا رہی ہیں، عدالت فوری شہبازشریف کی حاضری معافی کی درخواست مسترد کرے اور ملزم کے ورانٹ گرفتاری جاری کرے۔

کراچی(ایمرا نیوز آن لائن) پاکستانی اداکار احسن خان کا کہنا ہے کہ رمضان ٹرانسمیشن کے بعد انہیں احساس ہوا کہ ابھی تو اسلام کے بارے میں بہت کچھ سیکھنا باقی ہے۔ اداکار احسن خان دیگر شوبز ستاروں کی طرح رواں سال نجی ٹی وی چینل سے رمضان ٹرانسمیشن کی میزبانی کررہے ہیں۔ تاہم شوبز سے وابستہ افراد کا رمضان ٹرانسمیشن کی میزبانی کرنے کا موضوع ہمیشہ ہی سوشل میڈیا پرزیر بحث رہا ہے اور بہت سے لوگوں کا خیال ہے کہ اداکاروں کو رمضان ٹرانسمیشن کی میزبانی نہیں کرنی چاہئے۔

اسی حوالے سے ایک انٹرویو کے دوران احسن خان نے رمضان ٹرانسمیشن کی میزبانی کے تجربے کو بیان کرتے ہوئے اپنے دل کی باتیں کہیں۔ انہوں نےہاد کرتے ہوئے کہا کہ کس طرح رمضان ٹرانسمیشن کے بعد انہیں احساس ہوا کہ انہیں اسلام کے بارے میں ابھی مزید سیکھنا باقی ہے۔ احسن خان نے واضح کرتے ہوئے کہا کہ رمضان ٹرانسمیشن کی میزبانی کرنے کا مطلب یہ نہیں کہ میں اسکالر بننے کی اداکاری کررہاہوں، بلکہ میں اسکالرز اورناظرین کے درمیان ایک پُل کاکام کرتا ہوں اور اسکالرز سے ایسے سوالات کرتا ہوں جس میں لوگوں کی دلچسپی ہوتی ہے۔

کئی لوگوں کی جانب سے شوبزفنکاروں پر رمضان ٹرانسمیشن کی میزبانی کرنے پر تنقید کرنے کے حوالے سے احسن خان کا کہنا تھا کہ کچھ لوگ سوچتے ہیں کہ میں ایک اداکار ہوں اسلیے اچھا مسلمان نہیں ہوں، لیکن کسی کو بھی میرا احتساب کرنے کا کوئی حق نہیں، میں ایسے لوگوں سے پوچھنا چاہتا ہوں کہ انہیں یہ سوچنےکا حق کس نے دیا کہ میں کیسا مسلمان ہوں۔ احسن نے کہا ہمیں لوگوں کی ذہنیت تبدیل کرنے کی اور زندگی کے ہرمعاملے میں لوگوں کے درمیان ہم آہنگی پیدا کرنے کی ضرورت ہے۔

جارح مزاج بلے باز آصف علی کو حارث سہیل کی جگہ ٹیم میں شامل کیے جانے کا واضح امکان، وہاب ریاض بھی ٹیم میں شامل ہوں گے

لندن (ایمرا نیوز آن لائن) ویسٹ انڈیز کیخلاف اپنے افتتاحی میچ میں پاکستان کی جانب سے بڑی تبدیلی کیے جانے کا امکان، جارح مزاج بلے باز آصف علی کو حارث سہیل کی جگہ ٹیم میں شامل کیے جانے کا واضح امکان، وہاب ریاض بھی ٹیم میں شامل ہوں گے۔ تفصیلات کے مطابق آئی سی سی کرکٹ ورلڈ کپ کے انعقاد میں دو دن باقی رہ گئے۔ آئی سی سی کرکٹ ورلڈ کپ 30 مئی سے 14جولائی تک انگلینڈ میں منعقد ہوگا۔

پاکستان اور بھارت کی کرکٹ ٹیمیں 16جون کو اولڈ ٹریفرڈ میں ٹکرائیں گی ۔ جبکہ پاکستان کرکٹ ٹیم ورلڈکپ کے سلسلے میں 31 مئی کو ویسٹ انڈیز کیخلاف ٹرینٹ برج میں اپنا پہلا میچ کھیلے گی۔ ذرائع کے مطابق ویسٹ انڈیز کیخلاف اپنے افتتاحی میچ میں پاکستان کی جانب سے بڑی تبدیلی کیے جانے کا امکان ہے۔ ذرائع کے مطابق ویسٹ انڈیز کے خلاف میچ کیلئے جارح مزاج بلے باز آصف علی کو حارث سہیل کی جگہ ٹیم میں شامل کیے جانے کا واضح امکان ہے۔

جبکہ وہاب ریاض بھی ٹیم میں شامل ہوں گے۔ آصف علی اپنی صاحبزادی کے انتقال کے باعث پاکستان چلے گئے تھے، تاہم اب وہ انگلینڈ میں موجود قومی ٹیم کو جوائن کر چکے ہیں۔ پاکستان کرکٹ ٹیم کا ویسٹ انڈیز کے خلاف پہلے میچ کے بعد دوسرا میچ 3جون کو انگلینڈ کیخلاف ٹرینٹ برج ، تیسرا میچ 7جون کو سری لنکا کیخلاف برسٹل، چوتھا میچ 12جون کو آسٹریلیا کیخلاف ٹائونٹن ، پانچواں میچ 16جون کو بھارت کیخلاف اولڈ ٹریفرڈ ، چھٹا میچ 23جون کو سائوتھ افریقہ کیخلاف لارڈز کرکٹ گرائونڈ ، ساتواں میچ نیوزی لینڈ کیخلاف 26جون کو ایجباسٹن ، آٹھواں میچ 29جو ن کو افغانستا ن کیخلاف ہیڈنگلے جبکہ نواں میچ بنگلہ دیش کیخلاف لارڈز کرکٹ گرائونڈ میں پانچ جولائی کو ہوگا۔

لاہور (ایمرا نیوز آن لائن) اکثر حضرات اپنے ہاتھ کی انگلیوں میں انگوٹھی سجائے نظر آتے ہیں۔ کچھ اپنی منگنی کی جبکہ کچھ خاص قسم کا پتھر برکت یا کسی مقصد یا خواہش کے پورا ہونے کے لیے پہنتے ہیں۔ اگرچہ انگوٹھی پہننا عام بات ہے مگر ہمارے معاشرے میں کچھ لوگ ایسے بھی ہیں جو انگوٹھی پہننے کے حوالے سے خاصے مشہور ہیں۔اگرچہ آج کل بلاول بھٹو زرداری کے ہاتھ میں نظر آنے والی انگوٹھی موضوع بحث بنی ہوئی ہے مگر گزشتہ برس پاکپتن شریف دربار پر حاضری دینے کے بعد واپسی پر عمران خان کے ہاتھ میں جو انگوٹھی تو اس نے سب سے زیادہ شہرت سمیٹی تھی۔

کئی لوگوں کا یہ کہنا اور ماننا ہے کہ اسی انگوٹھی کی برکت سے عمران خان صاحب آج پاکستان کے وزیراعظم ہیں۔لہٰذا اب بلاول بھٹو کے ہاتھ میں بھی انگوٹھی دیکھ کر مختلف قسم کے اندازے لگائے جا رہے اور فقرے بازی بھی کسی جا رہی ہے۔ مگر انگوٹھی سے متعلق بلاول بھٹو بذات خود اور اس کے خاندان کے افراد مکمل طور پر خاموش ہیں کہ یہ انگوٹھی بلاول نے کیوں پہن رکھی ہے۔

پچھلے دنوں سوشل میڈیا پر ایک تصویر وائرل ہوئی جس میں بلاول بھٹو کے ہاتھ میں سونے کی انگوٹھی نظر آ رہی ہے۔سوشل میڈیاپر وائرل تصوییر میں نظر آنے والی انگوٹھی سے متعق جاننے کے لیے لوگ بیتاب ہیں، بلاول بھٹو کے ہاتھ میں پہنی گئی انگوٹھی کے بارے میں مختلف دعوے اوراندازے بھی سوشل میڈیا پرشیئرکیے جارہے ہیں۔ بلاول بھٹو زرداری کی انگوٹھی کے بارے میں ان کی فیملی بھی خاموش ہے لوگ حیران ہیں کہ آیا یہ انگوٹھی ان کی منگنی کی ہے یا کسی کی نشانی۔

بلاول بھٹو زرداری کے قریبی ذرائع نے بتایا کہ بلاول بھٹو زرداری نے اپنے ہاتھ میں جو انگوٹھی پہن رکھی ہے یہ خاندانی پیرکی طرف سے دی گئی ہے۔کچھ حلقوں کا کہنا ہے کہ بلاول کے ہاتھ میں نظرآنے والی انگوٹھی آصف علی زرداری کے دریافت شدہ فیملی پیرکی دین ہے جن کا نام صوفی جمیل ہے جبکہ بعض لوگوں کا خیال ہے کہ یہ جیل کے دنوں میں دریافت کئے گئے پیرکی دین ہے۔البتہ سوشل میڈیا پربحث ومباحثے اورکھوج لگانے کے باوجود بلاول بھٹو زرداری نے اپنی انگوٹھی کے حوالے سے ابھی تک خاموشی اختیار کر رکھی ہے۔

لاہور (میڈیا 92 نیوز آن لائن) پنجاب کے سرکاری ملازمین کی تنخواہوں اور پنشن میں اضافے کی سفارش کر دی گئی ہے۔ تفصیلات کے مطابق پنجاب کے سرکاری ملازمین کی تنخواہوں اور پنشن میں 10 فیصد اضافے کی سفارش کر دی گئی ہے۔ اس سفارش کے بعد محکمہ خزانہ نے وزیر اعلیٰ پنجاب سردار عثمان بزدار سے اجازت طلب کر لی ہے۔ ذرائع محکمہ خزانہ کے مطابق آئندہ مالی سال میں تنخواہ اور پنشن پر 530 ارب خرچ ہوں گے۔

تنخواہ کی مد میں 320 اور پنشن پر 210 ارب کی ادائیگی ہو گی۔ صوبے کے مالی حالات میں 10 فیصد اضافہ بھی ہو سکتا ہے۔ تنخواہ اور پنشن پر حتمی فیصلہ وزیر اعلیٰ پنجاب سردار عثمان بزدار اور ان کی کابینہ کرے گی۔ یاد رہے کہ اس سے قبل پنجاب کے سرکاری ملازمین کے لیے بجٹ میں خوشخبری آنے کا امکان ظاہر کیا جا رہا تھا۔پنجاب کے آئندہ مالی سال کے بجٹ کی تیاریاں اپنے حتمی مراحل میں داخل ہو چکی ہیں۔

ذرائع کے مطابق بجٹ میں سرکاری ملازمین کی تنخواہوں میں دس فیصد اضافے کی تجویز پیش کی گئی تھی۔ تنخواہوں میں اضافے کے امکان کی خبر نے سرکاری ملازمین کو بھی خوش کر دیا ہے۔ سرکاری ملازمین کا کہنا ہے کہ جس تیزی سے ڈالر کی قیمت اور مہنگائی بڑھ رہی ہے حکومت کو چاہئیے کہ تنخواہوں میں اضافے کو جلد از جلد ممکن بنائے تاکہ عام آدمی مہنگائی کا مقابلہ کرسکے۔

خیال رہے کہ اس سے قبل پاکستان پیپلز پارٹی کے رہنما سید خورشید شاہ سمیت پیپلز پارٹی کے کئی رہنماؤں نے سرکاری ملازمین کی تنخواہوں میں 50 فیصد اضافے کا مطالبہ کیا تھا۔ واضح رہے کہ ملک میں بڑھتی ہوئی مہنگائی کی وجہ سے عوام کافی پریشان ہو کر رہ گئی ہے۔ رمضان المبارک کے مہینے میں بھی اشیائے خوردونوش کی قیمتوں میں ہوشربا اضافہ ہوا جبکہ ڈالر کی قدر میں مسلسل اضافہ اور پیسے کی قدر میں مسلسل کمی دیکھنے میں آئی جس نے عوام میں مزید تشویش کی لہر دوڑا دی۔

کراچی (ایمرا نیوز آن لائن) انٹربینک مارکیٹ میں ڈالر کی قیمت میں 76 پیسے کا اضافہ ہوا۔ تفصیلات کے مطابق انٹربینک مارکیٹ میں ڈالر کی قیمت میں 76 پیسے کا اضافہ ہوا جس کے بعد ڈالر کی قیمت 149 روپے 74 پیسے سے بڑھ کر 150 روپے 50 پیسے ہو گئی۔ خیال رہے کہ گذشتہ روز انٹربینک مارکیٹ میں ڈالر کی قیمت میں کمی دیکھنے میں آئی تھی۔ ہفتے کے پہلے کاروباری دن کے آغاز میں ہی سٹاک مارکیٹ میں 114پوائنٹس کا اضافہ دیکھنے میں آیا اور 3 کاروباری سیشنز میں ڈالر 2 روپے 45 پیسے سستا ہو گیا تھا۔

یہاں یہ بات قابل ذکر ہے کہ انٹر بینک میں ڈالر کی قیمت میں مسلسلم کمی ہو رہی ہے۔ گذشتہ ہفتے جمعہ کے روز ڈالر 53 پیسے سستا ہو کر انٹر بینک میں 150.91 اور اوپن مارکیٹ میں 151.70 روپے پر بند ہوا تھا۔ جبکہ گذشتہ ہفتے 21 مئی بروز منگل کو اوپن مارکیٹ میں ڈالر تاریخ کی بلند ترین سطح 153 پر پہنچ گیا تھا ۔ ڈالر کی قیمت ملکی تاریخ کی بلند ترین سطح پر پہنچنے کے بعد عوام نے ذخیرہ کیے گئے ڈالرز مارکیٹ میں واپس کرنا شروع کر دیے ہیں۔

اس باعث ڈالر کی مانگ میں کمی ہوئی اور روپے کی قدر میں اضافہ ہونے لگا تھا۔ ڈالر کی قیمت میں اُتار چڑھاؤ کے حوالے سے چیئرمین ایکسچینج کرنسی ایسوسی ایشن ملک بوستان کا کہنا تھا کہ آئندہ دنوں میں ڈالر کی قیمت 5 سے 6 روپے مزید کم ہوسکتی ہے۔ انہوں نے کہا کہ ہم نے قوم سے اپیل کی تھی کہ ڈالر کا بائیکاٹ کریں جس کے بعد عوام نے ڈالر بیچنا شروع کر دیئے۔

معاشی تجزیہ کاروں کے مطابق سعودی عرب سے اُدھار تیل ملنے کی خبر کے باعث توقع کی جارہی ہے کہ مستقبل میں روپے پر دباؤ مزید کم ہو گا۔ لیکن دوسری جانب کچھ معاشی ماہرین کے مطابق ڈالر کی قیمت میں کمی اور پیسے کی قدر میں استحکام صرف وقتی ہے کیونکہ بجٹ کے بعد ڈالر کی قیمت میں ایک مرتبہ پھر سے اُتار چڑھاؤ شروع ہونے کا امکان ظاہر کیا جارہا ہے۔

(ایمرا نیوز آن لائن) سوئیڈن کے قصبے Tjoloholmمیں سالانہ ٹمبر اسپورٹس ورلڈ چمپئن شپ کاانعقادکیا گیا جس میں دنیا بھر سے ماہر پیشہ ور لکڑہاروں نے شرکت کی۔

اس منفرد مقابلے میں دنیا کے مختلف ممالک سے آئی ٹیموں اور انفرادی طور پر کھلاڑیوں کے درمیان برقی آرے،گرم آرے اور کلہاڑیوں سمیت دیگر اوزاروں سے درخت کے موٹے تنے کاٹنے اور توڑنے کے مقابلے کروائے گئے۔

اس موقع پرامریکاکے کھلاڑی میٹ کوگرنے شاندار کارکردگی کا مظاہرہ کرتے ہوئے دنیا کے بہترین لکڑہارے کا اعزاز اپنے نام کرلیا۔

(ایمرا نیوز آن لائن)
بوسٹن: امریکا کے مصروف شہر بوسٹن میں گھر میں نقب زنی کی عجیب و غریب واردات ہوئی جس میں گھر میں چور داخل ہوئے۔ لیکن وہ کچھ لے کر نہیں گئے اور الٹا گھر کو صاف ستھرا اور منظم کرکے واپس چلے گئے۔ جاتے جاتے انہوں نے کئ مقامات پر کاغذ کے پھول بھی رکھے ہوئے ملے ہیں۔

نیٹ رومن اپنے بیٹے کے ساتھ رہتے ہیں۔ 15 مئی کو وہ جب اپنے بچے کو اسکول سے واپس گھر لے کر آئے تو معلوم ہوا کہ ان کے گھر کا دروازہ کھلا ہوا ہے۔ لیکن گھر کے اندر جاتے ہی انہیں بلیچنگ کے عمل کو بو آئی اور دیکھا کہ بقیہ کمروں کے دروازے بھی بند تھے جو عام حالات میں کھلے رہتے تھے۔

اس کے بعد وہ اوپر کی جانب بیڈروم میں گئے تو دیکھا کہ بچے کے کمرے کی تمام اشیا بہت منظم انداز میں ترتیب سے موجود تھیں جبکہ فرش کو بھی صاف کیا گیا ہے۔ اس کے بعد دیکھا گیا تو کمرے سے کوئی شے غائب نہ تھی اور گھر میں آنے والوں نے کسی قیمتی شے پر ہاتھ صاف نہیں کیا تھا بلکہ صرف گھر ہی صاف کیا تھا۔

یہاں تک کہ فرش کے بچھونے بھی ویکیوم کلینر سے صاف کئے گئے تھے کیونکہ دونوں بیڈروم کی حالت بہت ہی خراب تھی ۔ اس کےعلاوہ ایک اور دلچسپ شے بھی موجود تھی۔ وہاں کاغذ سے بنے دو پھول بھی رکھے گئے تھے۔ بغور جائزے کے بعد بھی گھر سے کوئی شے غائب نہیں ہوئی تھی اور نہ ہی پڑوسیوں نے کسی کو گھر میں نقب لگاتے دیکھا تھا۔

گھر کا الارم سسٹم دن کے وقت بند تھا جبکہ دروازے کے پاس وقت نوٹ کرنے والے نظام بتایا کہ گھر میں گھسنے والے افراد ڈیڑھ گھنٹے تک اندر موجود رہے تھے۔ لیکن گھر سے کوئی سامان غائب نہ تھا اور نہ ہی کسی شے کو نقصان پہنچایا گیا تھا۔ خیال تھا کہ شائد گھر صاف کرنے والے افراد غلطی سے کسی اورگھر کی بجائے اس کے گھر کو صاف کرکے گئے تھے لیکن پورے گھر میں صفائی کے باوجود باورچی خانے کو ہاتھ تک نہیں لگایا گیا۔

(ایمرا نیوزآن لائن)
لاہور: مختلف مصنوعات کے برآمدکنندگان (ایکسپورٹرز) نے زیرو ریٹڈ سہولت کے ختم ہونے سے برآمدات میں اربوں روپے کی کمی کے خدشات ظاہر کیے ہیں۔

برآمدات میں اربوں روپے کی کمی کے خدشات پاکستان ریڈی میڈ گارمنٹس مینوفیکچررز ایکسپورٹرز ایسوسی ایشن (PRGMEA)کے تحت ایک اجلاس میں چمڑے، قالین،سرجیکل آلات، کھیلوں کا سامان اور دیگر اشیا کے ایکسپورٹرز نے ظاہر کیے۔ برآمدکنندگان کا کہنا تھا کہ روپے کی قدر میں کمی کی وجہ سے انھیں پہلے ہی خام مال کی زیادہ قیمتوں کے مسائل کا سامنا ہے۔

سیالکوٹ سے تعلق رکھنے والی برآمدی اشیا کے مینوفیکچررز نے حکومت سے مطالبہ کیا ہے کہ زیرو ریٹڈ نظام کا سلسلہ جاری رکھا جائے ورنہ برآمدات میں 21 سے 24 بلین ڈالرکی کمی کا سامنا کرنا پڑسکتا ہے۔ اجلاس کی صدارت پاکستان ریڈی میڈ گارمنٹس مینوفیکچررز ایکسپورٹرز ایسوسی ایشن کے چیف کوآرڈینیٹراعجاز کھوکھر نے کی۔

(ایمرا نیوز آن لائن)
کراچی: پاکستان کسٹمز نے درآمد و برآمد کنندگان کی سہولت کے لیے مقامی طورپر تیارکردی انتہائی سہل اور تیزرفتار کسٹمز کلیئرنس سسٹم ’’وی بوک‘‘ کو مزید اپ گریڈ کردیاہے۔

کسٹمز کلیئرنس سسٹم ’’وی بوک‘‘ کے ذریعے ہفتے کے7دن اور 24 گھنٹے کسٹمز کلیئرنس ہوسکے گی اور درآمد وبرآمدکنندگان کسٹم ہائوس آئے بغیراپنے گھریادفتر میں بیٹھے اپنی درآمدی وبرآمدی کنسائمنٹس کی کلیئرنس کے لیے گڈز ڈیکلریشن داخل کرسکیں گے۔ وی بوک کلیئرنس سسٹم کی اپ گریڈیشن کے باعث ٹریڈ سیکٹر کووقت کی بچت بھی ہوگی۔

اس سلسلے میں چیرمین ایف بی آرشبر زیدی کی جاری کردہ ہدایات کی روشنی میںمحکمہ کسٹمز کے تمام فیلڈ آپریشن افسران کومستعدی کے ساتھ کلیئرنس کرنے کے احکام جاری کیے گئے ہیں۔