Category کرکٹ

رواں سال برطانیہ میں ہونے والی ’دی ہنڈرڈز‘ کیلئے برمنگھم فینکس ٹیم نے پاکستان کے فاسٹ باؤلر شاہین شاہ آفریدی کو برقرار رکھنے کا فیصلہ کیا ہے۔

تفصیلات کے مطابق دی ہنڈرڈز کرکٹ ٹورنامنٹ گزشتہ برس ہونا تھا جس کیلئے پلیئرز ڈرافٹ 2019ءمیں ہوا تھا اور اس میں مختلف ٹیموں نے پاکستان کے محمد عامر، شاہین شاہ آفریدی اور شاداب خان کو پک کیا تھا تاہم کورونا کی وجہ سے یہ ٹورنامنٹ گزشتہ سال میں نہیں ہوسکا تھا۔

اب رواں سال ہونے والے ایڈیشن کیلئے مختلف ٹیموں نے اکثر کھلاڑیوں کو ری ٹین کیا ہے اور ری ٹینشن کے آخری روز ٹیم برمنگھم نے پاکستان کے شاہین شاہ آفریدی کو سکواڈ میں برقرار رکھنے کا اعلان کیا جبکہ اس سے قبل لندن سپرٹ نے پاکستان کے محمد عامر کو سکواڈ میں ری ٹین کیا تھا۔

گزشتہ برس سدرن بریو کیلئے پک ہونے والے شاداب خان کو ری ٹین نہیں کیا گیا جبکہ اگلے مرحلے میں ٹیمیں دستیاب سلاٹس کیلئے ڈرافٹ سے کھلاڑیوں کا انتخاب کریں گی۔

کرکٹ کے مختصر ترین فارمیٹ ٹی 10 لیگ میں قلندرز کا فاتحانہ مارچ جاری ہے جس نے مراٹھا عریبینز کو 4 وکٹ سے شکست دے کر ٹورنامنٹ میں کر لگاتار چوتھی فتح سمیٹ لی ہے۔

تفصیلات کے مطابق ٹورنامنٹ میں قلندرز کی تیسری فتح میں کپتان سہیل اختر نے کلیدی کردار ادا کیا تھا جبکہ چوتھی فتح میں سہیل تنویر نے اہم ذمہ داری ادا کی ۔ مراٹھا عریبینز نے پہلے بیٹنگ کرتے ہوئے پانچ وکٹوں کے نقصان پر 101 رنزبنائے، محمد حفیظ 44 اور شعیب ملک 23 رنز کے ساتھ نمایاں رہے جبکہ سہیل تنویر نے 3 وکٹیں لیں۔قلندرز نے 102 رنز کا ہدف 11 گیندیں قبل ہی چھ وکٹ پر حاصل کر کے ٹورنامنٹ کی چوتھی فتح سمیٹی۔ بین ڈنک نے ناقابل شکست 26 رنز بنائے جبکہ شرجیل خان 28اور سہیل اختر 26 رنز کے ساتھ نمایاں رہے، شاہد آفریدی دو رنز بنا سکے جبکہ شعیب ملک نے ایک وکٹ لی۔
دوسرے میچ میں دہلی بلز نے پونے ڈیولز کو 8 وکٹ سے مات دی، مین آف دی میچ علی خان نے تین اور عماد بٹ نے دو وکٹیں حاصل کیں، پونے کے محمد عامر نے ایک کھلاڑی کو آﺅٹ کیا۔

پاکستان کرکٹ بورڈ (پی سی بی) کو پاکستان سپر لیگ (پی ایس ایل) کے چھٹے ایڈیشن کے دوران 40 فیصد تماشائیوں کو سٹیڈیم لانے کی اجازت ملنے کا قوی امکان ہے۔
تفصیلات کے مطابق پی سی بی نے قومی کرکٹ لیگ کے چھٹے ایڈیشن کے دوران تماشائیوں کی سٹیڈیم آمد ممکن بنانے کیلئے ایک بار پھر حکومت سے رابطہ کرلیا ہے اور ذرائع کا کہنا ہے کہ بورڈ حکام کو یقین ہے کہ کراچی اور لاہور میں لیگ میچز کے دوران نیشنل کمانڈ آپریشن سینٹر (این سی او سی) کی جانب سے 40فیصد تماشائیوں کو سٹیڈیمز میں بیٹھ کر میچز دیکھنے کی اجازت مل جائے گی البتہ اس حوالے سے حتمی فیصلہ آج ہونے کا امکان ہے۔
ذرائع کا کہنا ہے کہ این سی او سی کی جانب سے مثبت جواب موصول ہوتے ہی لاہور میں لبرٹی چوک سے تشہیری مہم کا آغاز کردیا جائے گا اور اس کے بعد ہی ٹکٹوں کی فروخت کا شیڈول بھی جاری کیا جائے گا جبکہ لیگ کا آفیشل گانا بھی آئندہ ہفتے ریلیز کر دیا جائے گا۔

نانا کا خواب پورا کرنے کیلئے 14 سال انتظار کرنے والے 34 سالہ نعمان علی جنوبی افریقہ کے خلاف ریکارڈ کارکردگی دکھا کر پاکستانیوں کے ہیرو بن گئے ہیں۔
تفصیلات کے مطابق 34 کی عمر میں قومی ٹیم میں شامل ہونے والے نعمان علی نے جنوبی افریقہ کیخلاف نیشنل سٹیڈیم کراچی میں جاری ٹیسٹ میچ میں پانچ وکٹیں حاصل کر کے پاکستان کے بارہویں کھلاڑی اور چوتھے سپنر ہونے کا اعزاز اپنے نام کیا اور قومی ٹیم کی جیت کی بنیاد رکھنے میں بھی کلیدی کردار ادا کیا۔
نعمان علی نے پروٹیز کو اپنے سپن کے جال میں پھنساتے ہوئے ڈیبیو میچ میں ہی پانچ وکٹیں حاصل کیں اور پاکستان کے چوتھے سپنر بن گئے، ان سے قبل شاہد خان آفریدی، بلال آصف اور نذیر جونیئر بھی ٹیسٹ ڈیبیو پر پانچ، پانچ وکٹیں حاصل کر چکے ہیں۔
واضح رہے کہ نعمان علی نے جنوبی افریقہ کیخلاف پہلے ٹیسٹ میچ میں ڈیبیو کو اپنے مرحوم نانا کے نام کرتے ہوئے کہا تھا کہ میں نے ٹیسٹ کرکٹ میں پاکستان کی نمائندگی کرنے کیلئے ہی ساری زندگی کرکٹ کھیلی ہے اور آج میرا اور میرے اہل خانہ کا یہ خواب حقیقت کا بدل گیا ہے۔ میرے گھر والوں نے ہمیشہ میری بھرپور سپورٹ کی اور میری کامیابی کی وجہ بھی یہی ہے۔
ان کا کہنا تھا کہ ٹیسٹ کیپ حاصل کرتے وقت مجھے اپنے نانا بہت یاد آئے جو ہمیشہ سے ہی مجھے پاکستان کی جانب سے ٹیسٹ میچ کھیلتے دیکھنا چاہتے تھے۔ نعمان علی نے ڈومیسٹک کرکٹ کی اچھی کارکردگی کو جاری رکھنے کا عزم ظاہر کرتے ہوئے کہا کہ ڈومیسٹک کرکٹ کی کارکردگی کا صلہ ملنا اعزاز کی بات ہے اور میں اپنی کارکردگی جاری رکھنے کی کوشش کروں گا۔

جنوبی افریقہ اور پاکستان کی کرکٹ ٹیموں کے درمیان جاری پہلے ٹیسٹ میچ کے تیسرے روز جنوبی افریقہ نے دوسری اننگز میں کھانے کے وقفے تک بغیر کسی نقصان کے 37 رنز بنا لئے ہیں اور اسے مزید 121 رنز کے خسارے کا سامنا ہے۔ تفصیلات کے مطابق نیشنل سٹیڈیم کراچی میں جاری پہلے ٹیسٹ میچ کے تیسرے روز پاکستانی ٹیم 378 رنز بنا کر آؤٹ ہوئی اور جنوبی افریقہ کیخلاف 158 رنز کی برتری حاصل کی جس کے جواب میں پروٹیز نے دوسری اننگز میں بغیر کسی نقصان کے 37 رنز بنا لئے ہیں۔
قبل ازیں پاکستان کے حسن علی اور نعمان علی نے 308 رنز آٹھ کھلاڑی آؤٹ سے اننگز کا آغاز کیا تو 323 کے مجموعی سکور پر حسن علی 21 رنز بنا کر کاگیسو ربادا کی گیند پر کلین بولڈ ہو گئے جبکہ 378 کے مجموعی سکور پر پاکستان کی آخری وکٹ گری اور ٹیسٹ ڈیبیو کرنے والے نعمان علی 24 رنز بنا کر کیشو مہاراج کی گیند پر ایل بی ڈبلیو ہو گئے۔ پاکستان کی جانب سے فواد عالم نے مشکل وقت میں ذمہ دارانہ بلے بازی کرتے ہوئے 109 رنز کی اننگز کھیلی اور سب سے نمایاں بیٹسمین رہے جبکہ دیگر کھلاڑیوں میں اظہر علی 51، وکٹ کیپر بلے باز محمد رضوان 33، فہیم اشرف 64، عمران بٹ نو، عابد علی چار، بابراعظم سات، شاہین آفریدی صفر اور یاسر شاہ 38 رنز بنانے میں کامیاب ہوئے۔
جنوبی افریقہ کی جانب سے تمام باؤلرز نے ہی اچھی کارکردگی کا مظاہرہ کیا ہے تاہم فاسٹ باؤلر کاگیسو ربادا اور سپنر کیشو مہاراج نے تین، تین کھلاڑیوں کو پویلین کی راہ دکھائی جبکہ لونگی نگیڈی اور اینرچ نورٹجے نے دو، دو کھلاڑیوں کو آؤٹ کیا۔ قبل ازیں جنوبی افریقہ نے ٹاس جیت کر بیٹنگ کرنے کا فیصلہ کیا تو پاکستانی باؤلرز نے عمدہ کارکردگی کا مظاہرہ کرتے ہوئے پروٹیز کو پہلی اننگز میں 220 رنز پر آؤٹ کر دیا۔ یاسر شاہ نے سب سے زیادہ تین وکٹیں حاصل کیں جبکہ ڈیبیو میچ کھیلنے والے نعمان علی نے دو شکار کئے۔
جنوبی افریقہ کے ڈین ایلگر اور ایڈن مارکرم نے اننگز کا آغاز کرتے ہوئے پہلی وکٹ کی شراکت میں 30 رنز جوڑے تاہم اس موقع پر قومی ٹیم کے نوجوان فاسٹ باؤلر شاہین شاہ آفریدی نے پہلی کامیابی دلاتے ہوئے ایڈن مارکرم کو پویلین کی راہ دکھا دی، وہ 16 گیندوں پر 13 رنز بنا کر عمران بٹ کے ہاتھوں کیچ ہوئے۔ پروٹیز کی دوسری وکٹ 63 کے مجموعی سکور پر اس وقت گری جب ریسی وینڈرڈوسن نے فہیم اشرف کی گیند پر بھاگ پر رن لینے کی کوشش کی مگر دوسرے اینڈ پر موجود ڈین ایلگر نے ان کی کال کو مسترد کر دیا جس پر انہیں آدھی وکٹ سے واپس جانا پڑا تاہم اس سے پہلے ہی محمد رضوان نے بابراعظم کی زبردست تھرو پکڑتے ہوئے انہیں رن آؤٹ کر دیا، وہ 30 گیندوں پر تین چوکوں کی مدد سے 17 رنز بنا سکے۔
ڈین ایلگر اور فاف ڈوپلیسی نے چائے کے وقفے کے بعد 94 رنز سے اننگز کا آغاز کیا تو 108 کے مجموعی سکور پر لیگ سپنر یاسر شاہ نے قومی ٹیم کو تیسری اور اہم کامیابی دلاتے ہوئے فاف ڈوپلیسی کو محمد رضوان کے ہاتھوں کیچ کروا دیا، وہ 46 گیندوں پر چار چوکوں کی مدد سے 23 رنز بنانے میں کامیاب ہو سکے۔ ڈیبیو ٹیسٹ میچ کھیلنے والے نعمان علی نے بھی اپنی مہارت کے جوہر دکھائے اور 133 کے مجموعی سکور پر کپتان کوینٹن ڈی کوک کو پویلین کی راہ دکھائی اور پھر مجموعی سکور میں محض تین رنز کے اضافے کے بعد ہی ڈین ایلگر کو بھی آوٹ کر دیا، دونوں کھلاڑی بالترتیب 15 اور 58 رنز بنانے میں کامیاب ہوئے۔ مہمان ٹیم کی چھٹی وکٹ 179 کے مجموعی سکور پر اس وقت گری جب ٹیمبا باووما 17 رنز بنا کر رن آؤٹ ہو گئے۔ چائے کے وقفے کے بعد پروٹیز کی جانب سے کیشو مہاراج اور جارج لینڈے نے اننگز کا آغاز کیا تو مجموعی سکور میں بغیر کسی اضافے کے یاسر شاہ نے کیشو مہاراج کو صفر کے انفرادی سکور پر کلین بولڈ کر دیا۔ 194 کے مجموعی سکور پر جارج لینڈے کی مزاحمت بھی جواب دے گئی جو 35 رنز بنا کر حسن علی کی گیند پر محمد نواز کے ہاتھوں کیچ ہو گئے۔ جنوبی افریقہ کے آخری آؤٹ ہونے والے کھلاڑی لونگی نگیڈی تھے جنہوں نے آٹھ رنز بنائے اور شاہین شاہ آفریدی کی گیند پر ایل بی ڈبلیو ہو گئے۔ پاکستان کی جانب سے تمام باؤلرز نے ہی اچھی کارکردگی کا مظاہرہ کیا ہے تاہم لیگ سپنر یاسر شاہ نے تین کھلاڑیوں کو پویلین کی راہ دکھائی جبکہ ڈیبیو میچ کھیلنے والے نعمان علی اور شاہین شاہ آفریدی نے دو، دو وکٹیں حاصل کیں ، حسن علی ایک کھلاڑی کو آؤٹ کرنے میں کامیاب ہوئے۔

پاکستان کرکٹ ٹیم کے کھلاڑی نعمان علی نے جنوبی افریقہ کیخلاف پہلے ٹیسٹ میچ میں ڈیبیو کو اپنے مرحوم نانا کے نام کر دیا ہے۔
تفصیلات کے مطابق نعمان علی نے کہا کہ میں نے پاکستان کی ٹیسٹ کرکٹ میں نمائندگی کرنے کیلئے ہی ساری زندگی کرکٹ کھیلی ہے اور آج میرا اور میرے اہل خانہ کا یہ خواب حقیقت کا بدل گیا ہے۔ میرے گھر والوں نے ہمیشہ میری بھرپور سپورٹ کی اور میری کامیابی کی وجہ بھی یہی ہے۔
انہوں نے کہا کہ ٹیسٹ کیپ حاصل کرتے وقت مجھے اپنے نانا بہت یاد آئے جو ہمیشہ سے ہی مجھے پاکستان کی جانب سے ٹیسٹ میچ کھیلتے دیکھنا چاہتے تھے۔ انہوں نے ڈومیسٹک کرکٹ کی اچھی کارکردگی کو جاری رکھنے کا عزم ظاہر کرتے ہوئے کہا کہ ڈومیسٹک کرکٹ کی کارکردگی کا صلہ ملنا اعزاز کی بات ہے اور میں اپنی کارکردگی جاری رکھنے کی کوشش کروں گا۔

پاکستان کے ٹیسٹ کرکٹر عمران فرحت نے کرکٹ سے ریٹائرمنٹ کا اعلان کر دیا ہے جو اپنے طویل ترین کیرئیر میں 26 جنوری کو خیبر پختونخواہ کے خلاف آخری میچ کھیلیں گے۔
تفصیلات کے مطابق عمران فرحت پاکستان کپ میں بلوچستان ٹیم کی قیادت کررہے ہیں۔ انہوں نے 40 ٹیسٹ میچوں میں 2400 رنز سکور کئے اور 58 ایک روزہ میچوں میں 1719 رنز بنائے جبکہ سات ٹی 20انٹر نیشنل میچز میں 76 رنز بنانے میں کامیاب ہوئے۔
عمران فرحت نے 230 فرسٹ کلاس میچوں میں 15ہزار 790 رنز بنائے اور 220 لسٹ اے میچز میں 7401 رنز جوڑے جبکہ 69 ڈومیسٹک ٹی 20 میچز میں 1636 رنز بنا رکھے ہیں۔ عمران فرحت نے دو ماہ قبل ہی ریٹائرمنٹ کے اپنے فیصلے سے پاکستان کرکٹ بورڈ (پی سی بی) کو آگاہ کر دیا تھا اور وہ اب کوچنگ میں نام بنانے کے خواہشمند ہیں۔

جنوبی افریقہ کرکٹ ٹیم کے سابق کپتان فاف ڈوپلیسی نے کہا ہے کہ پاکستان کا دورہ کرنا ایک ایسا لمحہ ہے کہ جو میں نے اب تک اپنی زندگی میں نہیں دیکھا، یہ تو معلوم تھا کہ پاکستان میں محدود طرز کی انٹرنیشنل کرکٹ بحال ہو چکی ہے مگر یہ اندازہ نہیں تھا کہ اتنی جلدی طویل طرز کی کرکٹ بھی کھیلی جائے گی۔

تفصیلات کے مطابق پاکستان اور جنوبی افریقہ کی کرکٹ ٹیموں کے درمیان 26 جنوری سے نیشنل سٹیڈیم کراچی میں شروع ہونے والا ٹیسٹ میچ جہاں فاف ڈوپلیسی کے ٹیسٹ کیرئیر کا 68واں میچ ہوگا تو وہیں یہ 36 سالہ بیٹسمین کا پاکستان کی سرزمین پر پہلا ٹیسٹ میچ ہوگا۔ فاف ڈوپلیسی کا اس حوالے سے کہنا ہے کہ یہ ایک ایسا لمحہ ہے کہ جو میں نے اب تک اپنی زندگی میں نہیں دیکھا، یہ تو جانتا تھا کہ یہاں محدود طرز کی کرکٹ تو کھیلی جارہی ہے مگر یہ اندازہ نہیں تھا کہ اتنی جلدی طویل طرز کی کرکٹ بھی کھیلی جائے گی۔فاف ڈوپلیسی نے کہا کہ میں اب پاکستان میں ٹیسٹ کرکٹ کے دوبارہ آغاز کا منتظر ہوں اور مجھے یقین ہے کہ یہ بالکل 13 سال پہلے جیسا آغاز ہی ہو گا، یہاں وکٹیں فلیٹ ہیں، لہٰذا یہاں ہم بلے بازوں کیلئے رنز بنانے کے مواقع بھی زیادہ ہیں۔ پاکستان میں نوجوانوں کو کرکٹ سے متاثر کرنے کیلئے ضروری ہے کہ پاکستان کرکٹ ٹیم اپنی سرزمین پر کرکٹ کھیلے اورامید ہے کہ جنوبی افریقہ کرکٹ ٹیم کا یہ دورہ دیگر بین الاقوامی کرکٹ ٹیموں کو پاکستان لانے میں مدد کرے گا۔

فاف ڈوپلیسی نے کہا کہ پاکستان نے گزشتہ 11 سال اپنی ہوم کرکٹ متحدہ عرب امارات میں کھیلی ، جس کی وجہ سے پاکستان کرکٹ کے مداحوں کی ایک نسل اپنے سٹار کرکٹرز کو اپنے گراؤنڈز میں کھیلتا نہیں دیکھ سکی، یہ ضروری ہے کہ پاکستان اپنی ہوم کرکٹ اپنے ملک میں ہی کھیلے۔ سابق ٹیسٹ کپتان نے کہا کہ دیگر قوموں کی طرح پاکستانی مداح بھی اپنی ٹیم پر بہت فخر محسوس کرتے ہیں، جب بھی برصغیر کا دورہ کریں ہمیں یہاں کرکٹ کے بہت پرجوش مداح دیکھنے کو ملتے ہیں، یہ مداح ہر میچ دیکھنے آتے ہیں اور ہر میچ میں اپنی ٹیم کو سپورٹ کرتے ہیں، دن بھر ان کا جوش اور جذبہ دیدنی ہوتا ہے۔واضح رہے ہفتے کے روز پاکستان پہنچنے والے جنوبی افریقہ کے سکواڈ میں شامل فاف ڈوپلیسی کا یہ گزشتہ چار سال میں پاکستان کا تیسرا دورہ ہے، تجربہ کار مڈل آرڈر بیٹسمین نے آئی سی سی ورلڈ الیون کرکٹ ٹیم کی قیادت کرتے ہوئے تین ٹی 20 میچز کھیلنے کیلئے سال 2017ءمیں لاہور کا دورہ کیا، فاف ڈوپلسی دوسری مرتبہ گزشتہ سال پاکستان سپر لیگ (پی ایس ایل) میں شرکت کی غرض سے پاکستان آئے اور پلے آف میچز میں پشاور زلمی کی نمائندگی کی۔

پاکستان سپر لیگ (پی ایس ایل) کے چھٹے ایڈیشن کے آغاز میں چند ہفتے ہی باقی رہ گئے ہیں اور پاکستانیوں کیلئے خوشخبری یہ ہے کہ لیگ کے دوران تماشائیوں کو سٹیڈیم میں آنے کی اجازت ملنے کا امکان ہے۔
تفصیلات کے مطابق پی ایس ایل انتظامیہ نے لیگ کے چھٹے ایڈیشن کے دوران تماشائیوں کو گراؤنڈز میں لانے کے لئے این سی او سی سے اجازت مانگ لی ہے تاہم حکومتی ہدایت کی روشنی میں فیصلہ کیا جائے گا۔ ذرائع کا کہنا ہے کہ میچز کے دوران سب تماشائیوں کو داخلے کی اجازت نہیں ہو گی اور اجازت ملنے کی صورت میں مخصوص تعداد میں ہی تماشائیوں کو سٹیڈیم داخلے کی اجازت مل سکے گی۔
ذرائع کے مطابق اگر حکومت نے تماشائیوں کو سٹیڈیم میں جانے کی اجازت دیدی تو کورونا پالیسیز پر سختی سے عمل کیا جائے گا، پی ایس ایل انتظامیہ تماشائیوں کو سٹیڈیم میں بیٹھا کر میچز دکھانے کی خواہاں ہے اور اس کا موقف ہے کہ مداحوں کے بغیر لیگ کچھ نہیں، ان کے نہ ہونے سے لیگ مقابلے متاثر ہوسکتے ہیں۔
ذرائع کا یہ بھی کہنا ہے کہ تماشائی نہ آنے سے مارکیٹنگ کا شعبہ بھی متاثر ہو گا، مزید برآں پی سی بی نے پاکستان میں ہونے والے میچز کے ٹکٹس کیلئے نجی کوریئر کمپنی سے بھی رابطہ کرلیا ہے، پاکستان سپر لیگ سیزن چھ کے میچز 20 فروری سے 22 مارچ تک جاری رہیں گے اور تمام میچز کراچی اور لاہور میں کھیلے جائیں گے۔
دوسری جانب پی ایس ایل کی افتتاحی تقریب محدود پیمانے پر کرنے کا فیصلہ کیا گیا ہے، رنگا رنگ تقریب کا انعقاد مختصر پیمانے پر ہو گا البتہ اسے دلکش بنانے کی بھرپور کوشش کی جائے گی، پی ایس ایل کو خسارے سے نکالنے کیلئے اقدامات کا فیصلہ بھی کیا گیا ہے، پی سی بی ذرائع کے مطابق کوویڈ19 کی وجہ سے بھی پی ایس ایل متاثر ہوئی تاہم میڈیا رائٹس سے آمدنی میں بہتری ہو گی۔

جنوبی افریقہ کے خلاف ٹیسٹ سیریز کیلئے قومی ٹیم کے ارکان کل کراچی میں رپورٹ کریں گے جہاں ان کی دوسری کورونا وائرس ٹیسٹنگ بھی کی جائے گی۔
تفصیلات کے مطابق جنوبی افریقہ کے خلاف سیریز کیلئے 20 رکنی قومی سکواڈ کے تمام اراکین کا پہلا کورونا وائرس ٹیسٹ ہو گیا ہے اور تمام رپورٹس منفی آئی ہیں اور اب یہ کھلاڑی کل کراچی پہنچیں گے جہاں دوسری کوویڈ ٹیسٹنگ ہوٹل پہنچنے پر ہو گی۔ کپتان بابراعظم، عابد علی، اظہرعلی، ہیڈکوچ مصباح الحق، باﺅلنگ کوچ وقار یونس، ٹیم منجیر منصور رانا سمیت دوسرے اراکین کی منگل کو سہ پہرلاہورسے فلائٹ ہے۔
دوسرے شہروں سے تعلق رکھنے والے کرکٹرزبراہ راست کراچی پہنچیں گے، قومی ٹیم میں پہلی بار منتخب ہونے والے ڈومیسٹک کے پرفارمرزپاکستان کپ کے سلسلے میں پہلے سے ہی کراچی میں موجود ہیں۔ پانچ روز کے قرنطینہ میں رہنے والی قومی ٹیم کے ارکان کودوسری کوویڈ ٹیسٹنگ رپورٹ منفی آنے پر 21 جنوری سے نیشنل سٹیڈیم میں ٹریننگ کی اجازت ہوگی۔