Category دلچسپ و عجیب

سابق صدر آصف علی زرداری اور سابق وزیراعظم شہید بینظیر بھٹو کی نوبیاہتا بیٹی بختاور بھٹو کی شوہر محمود چوہدری کے ہمراہ سیلفی کے چرچے ہو رہے ہیں۔
بختاور بھٹو اور محمود چوہدری کی جانب سے سوشل میڈیا سائٹس پر جاری سیلفی میں بختاور خود گاڑی چلاتے ہوئے والدہ کے آبائی علاقے گڑھی خدا بخش جا رہی ہیں، بختاور بھٹو کے ہمراہ ان کے شوہر محمود چوہدری بھی موجود ہیں۔بختاور بھٹو زرداری نے اپنے شوہر محمود چوہدری کے ہمراہ والدہ کے مزار پر حاضری دی۔
دوسری جانب بختاور بھٹو کے شوہر محمود چوہدری نے بھی اپنے انسٹاگرام پر شہید بینظیر بھٹو کے مزار پر حاضری کی تصاویر شیئر کی ہیں، ایک تصویر میں محمود چوہدری بختاور بھٹو کے ہمراہ قرآن کی تلاوت کر رہے ہیں۔
بختاور کے ہمراہ ان کی خالہ صنم بھٹو بھی موجود تھیں، بختاور بھٹو اور محمود چوہدری نے شہید بینظیر بھٹو کے مزار پر پھولوں کی چادریں چڑھائیں۔دوسری تصویر میں نوبیاہتا جوڑا شہید بے نظیر بھٹو کی قبر پر پھولوں کی چادر چڑھاتے دیکھا جا سکتا ہے۔بختاور بھٹو نے اپنے شوہر محمود چوہدری کے ہمراہ گڑھی خدا بخش پہنچ کر والدہ کے مزار پر فاتحہ خوانی کی۔ بختاور بھٹو زرداری والدہ کے مزار پر حاضری کے دوران آبدیدہ بھی ہو گئی تھیں۔

چین کے سرد ترین شہر ہربن میں ہر سال آئس اینڈ سنو فیسٹیول منعقد ہوتا ہے جہاں چینی سالِ نو کی خوشی میں ہزاروں افراد برف کی دنیا سے لطف اندوز ہوتے ہیں۔

آج کل ہربن کے سنگہوا ہوا نامی دریا پر 300 مزدور کام میں مصروف ہیں جو لمبی لمبی چھینیاں اٹھائے دریا کی جمی ہوئی سطح کو کریٹ کے سائز کے برابر بلاکس میں توڑتے ہیں۔ ان مزدوروں نے ربڑ کے بوٹ، لمبی جیکٹسں، موٹے دستانے اور ہیٹ پہنے ہوتے ہیں۔

برف کے بلاکس کو ٹرکوں پر لاد کر قریبی ہربن ونٹر فیسٹیول کی سائٹ پر منتقل کیا جا رہا ہے جہاں ان سے قلعے ، بت، پل اور ریسٹورنٹ بنائے جا رہے ہیں۔

سویڈن کے دارالحکومت سٹاک ہوم کے باسیوں کیلئے سلور ایرو نامی ٹرین آسیب زدہ ہے اور کسی اور ہی جگہ ٹیلی پورٹ کردیتی ہے۔

میڈیا رپورٹ کے مطابق 1960 کی دہائی میں سٹاک ہوم میٹرو نے 8 ٹرینوں کو المونیم سے تیار کیا تھا، کچھ عرصے بعد ہی سٹاک ہوم میں ایک روایت کا جنم ہوا کہ اصل یا خالص پبلک انفراسٹرکچر کا ہر جزو ایک بھوت ہوتا ہے اور چونکہ ہر آسیب زدہ ٹرین کو ایک آسیب زدہ سٹیشن کی ضرورت ہوتی ہے تو ایسا ہی سلور ایرو کے ساتھ بھی ہوا۔

ایسا کہا جاتا ہے کہ جب کوئی سلور ایرو پر سوار ہوتا ہے تو پھر کبھی باہر نہیں آ پاتا، اس لیے نہیں کیونکہ وہ مرجاتا ہے بلکہ یہ ٹرین وقت کے کسی چکر میں پھنس جاتی ہے اور وہیں گھومتی رہتی ہے۔ کہانی کا ایک اور ورژن بھی ہے جس کے مطابق یہ ٹرین سال میں صرف ایک بار رکتی ہے، اس وقت تک تمام مسافر مردہ بن چکے ہوتے ہیں۔

کراچی (نیٹ نیوز/ایمرا نیوز) چین نے لامحدود توانائی کے حصول کی کوشش کے دوران مصنوعی سورج بنانے اور اس کا درجہ حرارت پہلی مرتبہ 18؍ کروڑ ڈگری فارنہائٹ تک محفوظ انداز میں لیجانے میں کامیابی حاصل کرنے کا دعویٰ کیا ہے۔ مصنوعی سورج دراصل ایک ایٹمی ری ایکٹر ہے جو بالکل اسی انداز سے کام کرتا ہے جیسے سورج کرتا ہے اور اس کی سطح پر موجود حالات ہیں، یہ پروجیکٹ سائنسدانوں کی اس کوشش کا حصہ ہے جس کے تحت ہائیڈروجن کو ماحول دوست توانائی میں تبدیل کیا جا سکتا ہے۔ برطانوی اخبار کی رپورٹ میں بتایا گیا ہے کہ گزشتہ ہفتے کیے جانے والے تجربے میں چینی ماہرین نے اہم سنگ میل اس وقت حاصل کیا جب یہ ری ایکٹر کامیابی کے ساتھ 18؍ کروڑ ڈگری فارنہائٹ (10؍ کروڑ ڈگری سینٹی گریڈ) کے درجہ حرارت تک محفوظ انداز میں پہنچا۔ یہ وہ درجہ حرارت ہے جس میں نیوکلیئر فیوژن وقوع پذیر ہوتا ہے جس سے ماحول دوست توانائی اور بجلی پیدا کی جا سکتی ہے۔ فی الوقت دنیا بھر کے سائنسدانوں میں درمیان دنیا کا پہلا فعال نیوکلیئر فیوژن ری ایکٹر بنانے کیلئے مقابلہ جاری ہے اور اس مقابلے میں کامیاب ہونے والا سائنسدان اربوں ڈالرز مالیت کی لامحدود ماحول دوست توانائی کے حصول کا فارمولا تلاش کر لے گا جو ماحولیاتی بحران، آلودگی اور ماحول دشمن تغیرات کو روکنے میں مددگار ثابت ہوگا۔
رپورٹ کے مطابق، چین کے ہیفائی انسٹی ٹیوٹ آف فزیکل سائنس نے منگل کو درجہ حرارت کو انتہائی حد تک لیجائے جانے کا اعلان کیا اور بتایا کہ یہ درجہ حرارت سورج کے مرکز (Core) سے 6؍ گنا زیادہ گرم ہے جو انتہائی حد تک زیادہ سے زیادہ 2؍ کروڑ 70؍ لاکھ ڈگری فارنہائٹ تک جاتا ہے۔ سائنسدانوں کا خیال ہے کہ نیوکلیئر فیوژن کے نتیجے میں ڈیوٹریم اور ٹرائٹیم کے چارجڈ پارٹیکل ایک دوسرے میں ضم ہو کر توانائی کا ایک بہت بڑا ذخیرہ پیدا کرتے ہیں۔ عموماً یہ دونوں طرح کے پارٹیکلز (ذرات) ایک دوسرے کو دھکیلتے ہیں اور ان کی مخالفانہ قوت پر قابو پانے کیلئے زبردست درجہ حرارت کی ضرورت ہوتی ہے۔

نیویارک: (نیٹ نیوز/ایمرا نیوز) گلوکار مائیکل جیکسن کی جیکٹ 2 لاکھ 98 ہزار ڈالر میں نیلام کر دی گئی۔ مداحوں کی بڑی تعداد نے بولی لگائی جو بالآخر اصل قیمت سے 3 گنا کی پیشکش کرنے والے کے حوالے کر دی گئی۔

جولین آکشن ہاؤس کی جانب سے جاری بیان کے مطابق مائیکل جیکسن کے پہلے ورلڈ ٹور میں زیراستعمال جیکٹ کو نیلامی کیلئے گزشتہ دنوں پیش کیا گیا تھا جس کی پشت پر سلور مارکر سے گلوکار کے دستخط موجود تھے ۔نیلامی کی تقریب میں جیکٹ کی قیمت ایک لاکھ ڈالر رکھی گئی تھی مگر جب بولی لگنے کا سلسلہ شروع ہوا تو ہر کسی نے اسے خریدنے کی کوشش کی یہی وجہ ہے کہ تین گھنٹے تک ہر دوسرے شخص نے اسکے مہنگے دام لگائے ۔مقامی شہری اور مائیکل جیکسن کے مداح نے بولی کی قیمت 2 لاکھ 98 ہزار امریکی ڈالر لگائی جو پاکستانی کرنسی کے حساب سے ( 3 کروڑ 97 لاکھ 29ہزار 360 روپے ) بنتی ہے ۔انتظامیہ نے سب سے زیادہ بولی لگانے والے شہری کو کامیاب قرار دیا اور سیاہ رنگ کی جیکٹ کو اصل قیمت سے تین گنا زیادہ میں فروخت کیا ۔

میسا چیوسیٹس:(نیٹ نیوز/ایمرا نیوز) امریکی ماہرین نے کہا ہےکہ موسمیاتی تبدیلیاں قدیم تہذیب سندھ کے زوال کی اہم وجہ ہیں اور ان ہی کے باعث موہن جودڑو اور ہڑپہ تہذیب دھیرے دھیرے تباہی سے دوچار ہوکر فنا ہوگئیں۔ہم جانتے ہیں کہ سندھ کی قدیم تہذیب کے دو بڑے مراکز ہڑپہ اور موہن جودڑو ہیں اور اس کے علاوہ پاکستان اور بھارت میں بھی اس کے مختلف آثار ملے ہیں۔ امریکا میں واقع وُوڈز ہولز اوشیانو گرافک انسٹی ٹیوشن کے ایک نئے تجزیے کے مطابق عمدہ شہر، گودام، نکاسی کے نظام اور بہترین شہری سہولیات ہونے کے باوجود چار ہزار سال پرانی یہ تہذیب آب و ہوا میں تبدیلی (کلائمیٹ چینج) کی وجہ سے روبہ زوال ہوکر فنا ہوگئی تھی۔1800 قبل مسیح میں قدیم تہذیب کے باشندوں نے اس شہر کو خیرباد کہنا شروع کیا اور ہمالیہ کے دامن میں جاکر چھوٹے چھوٹے گاؤں میں رہنا شروع کردیا۔ ووڈ ہولز انسٹی ٹیوٹ کے مطابق موسمیاتی تبدیلیوں سے یہ خطہ ناقابلِ رہائش ہونے لگا تھا۔2500 قبل مسیح میں ہڑپہ تہذیب کا موسم بدلنا شروع ہوا اور موسمِ گرما کا مون سون نظام دھیرے دھیرے کمزور پڑا۔ زراعت مشکل ہوگئی اور غلہ بانی بھی کم ہوتی گئی اور یوں یہ عظیم تہذیب اپنے اختتام کو پہنچی تھی۔اس ضمن میں وُوڈز ہولز اوشیانو گرافک انسٹی ٹیوشن کے ارضیات داں ڈاکٹر لائی ویو گایوسِن اور ان کے ساتھیوں نے اس پر تحقیق کرکے مقالہ شائع کیا ہے جو 13 نومبر 2018ء کے ’کلائمٹ آف دی پاسٹ‘ نامی جرنل میں شائع ہوا ہے۔

ماہرین کہتے ہیں کہ مون سون کے بگاڑ نے پوری وادی میں کھیتی باڑی کو ناممکن بنادیا تھا۔لیکن اس دوران بحیرہ روم کے طوفان ہمالیائی سلسلے سے ٹکراتے تھے اور پاکستانی علاقوں میں تھوڑی بہت بارش کی وجہ ضرور بنتے تھے لیکن مون سون نہ ہونے کی وجہ سے دریاؤں کا بہاؤ شدید متاثر ہوا۔ اسی لیے وادی سندھ کے لوگوں نے دیگر علاقوں میں سکونت اختیار کی اور یوں دھیرے دھیرے پوری بستی ہی خالی ہوگئی۔اگرچہ اس کے آثار آج کی مٹی میں نہیں ملتے لیکن ماہرین نے پاکستانی ساحلوں اور سمندر کے کئی مقامات پر مٹی کے نمونے جمع کیے اور ان کا مطالعہ کیا۔ انہوں نے ان نمونوں میں یک خلوی (سنگل سیل) پلانکٹن کا جائزہ لیا جنہیں ’فورا مینی فیرا‘ یا مختصراً فورمز کہا جاتا ہے۔ اس سے معلوم ہوا کہ کونسا پلانکٹن سرد موسم اور کونسا موسمِ گرما میں پروان چڑھا۔اس طرح انہوں نے خطے کے قدیم جینیاتی مادے کا بغور مطالعہ کیا ۔ اس دوران دریا اور سمندر کے کنارے کے علاقے میں موجود قدیم مٹی اور خود اس میں موجود قدیم پلانکٹن سے ہزاروں سال قدیم موسم کا ایک نقشہ مرتب کیا جس سے معلوم ہوا کہ کس طرح گرمیوں کا مون سون کمزور اور سردیوں کا مون سون توانا ہوا اور اس سے زراعت ناممکن ہوگئی۔اگلے مرحلے میں لوگوں نے ماضی کے ان عظیم شہروں کو چھوڑنا شروع کیا اور یوں وہ کئی صدیوں میں تتربتر ہوکر علاقے کے دیگر مقامات پر منتقل ہوگئے اور یوں یہ موئن جودڑو اور ہڑپہ ویران ہوتے چلے گئے۔

ماسکو:(نیٹ نیوز/ایمرا نیوز) پوری دنیا میں سمندر کی معصوم مخلوق وھیل کو بے رحمی سے شکار کیا جارہا ہے اور آبی حیات کے ماہرین انہیں بچانے کی سرتوڑ کوشش کررہے ہیں۔ اسی بازگشت میں روس میں غیر قانونی ’وھیل جیل‘ کا انکشاف ہوا ہے جہاں 100 سے زائد وھیلوں کو ایک تنگ جگہ پر فروخت کے لیے رکھا گیا ہے۔ اس عمل کو ماہرین نے جانوروں کے استحصال کی ایک مکروہ مثال قرار دیا ہے۔

روسی ساحلوں سے کچھ دور ایک سمندر میں ایک مقید جگہ بنائی گئی ہے جہاں سے وھیل جیسے جانور بھی فرار نہیں ہوسکتے۔ اسے ایک طرح کا وھیل جیل قرار دیا جاسکتا ہے۔ ماہرین نے خدشہ ظاہر کیا ہے کہ ان وھیلوں کو چینی تفریحی تھیم پارکوں، مچھلی گھروں یا خوراک کے لیے استعمال کیا جاسکتا ہے۔روس کے جنوب مشرق میں ناخودکا شہر کے پاس ایک آبی جگہ بنائی گئی ہے۔ اب روسی قانون نافذ کرنے والے ماہرین اس بات کا جائزہ لے رہے کہ کیا وھیلوں کو غیرقانونی تجارتی مرکز کے طور پر استعمال کیا جارہا ہے یا قید کیے گئے ان جانوروں کو بلیک مارکیٹ میں فروخت کے لیے پیش کیا جائے گا۔اس ضمن میں بعض تصاویر اور ویڈیو بھی بنائی گئی ہیں جہاں مسلح افراد اس جگہ کی حفاظت کرتے دیکھے جاسکتے ہیں۔ جبکہ وھیلوں کو ایسے پنجروں میں رکھا گیا ہے جو مضبوط جالوں سے بنائے گئے ہیں۔ دوسرے روسی اخبار نووایا گزیٹا نے لکھا ہے کہ یہاں 11 اورکا اور 90 بیلوگا وھیل رکھی گئی ہیں۔اخبار کے مطابق چار روسی کمپنیاں اس میں ملوث ہیں اور سمندری جانوروں کو پکڑنے اور انہیں بین الاقوامی مارکیٹ میں فروخت میں ان کا ایک بڑا حصہ ہے۔ وھیل کے معاملے میں بین الاقوامی قوانین بہت سخت ہیں ۔ اگر کوئی ان پر تحقیق، تعلیم اور بچاؤ کے لیے کام کرنا چاہتا ہے تو وھیل کو قید کرنے کی اجازت ہے تاہم چینی پارکس اور تفریح گاہوں کے لیے ان کی فروخت سختی سے ممنوع ہے۔بعض اخبارات کے مطابق ایک اورکا وھیل کی چینی بلیک مارکیٹ میں قیمت 60 لاکھ ڈالر تک ہوسکتی ہے۔ اس وقت چین میں 60 میرین پارکس قائم ہیں اور مزید ایک درجن زیرِ تعمیر ہیں۔

(نیٹ نیوز/ایمرا نیوز)
بھارت میں ایک خاتون کے پیٹ سے حیرت انگیز طور پر کیلیں، نٹ، بولٹ، سیفٹی پن، بال پن سمیت دیگر لوہے اور اسٹیل سے بنی مختلف اشیاء بر آمد ہو ئی ہیں۔بھارتی میڈیا کے مطابق احمد آباد کی رہائشی 40 سالہ ذہنی مرض میں مبتلا خاتون سنگیتا کو پیٹ کی شدید شکایت پر سول اسپتال منتقل کیا گیا۔خاتون کا علاج کرنے والے ڈاکٹر کا کہنا ہے کہ جب خاتون کو اسپتال لایا گیا تو اس کا پیٹ پتھر کی طرح سخت ہو رہا تھا۔ ایکسرے کرنے پر ان کے پیٹ میں ایک بڑا گچھا نظر آیا جبکہ پھیپڑوں کے آس پاس سیفٹی پن نظر آئی۔انہوں نے کہا کہ ایک پن کی وجہ سے ان کے پیٹ کی اندرونی جلد میں سوراخ ہونے کا انکشاف ہو اتو فوری طور پر ان کا آپریشن کیا گیا۔

جب ان کا پیٹ چیرا گیا تو ایک کے بعد ایک لوہےب اور اسٹیل کی اشیاء ہاتھ آنے لگیں جن میں تیز دھار کی اشیاء ،زیورات سمیت دیگر دیڑھ کلو کا سامان بر آمد ہو اہے۔اسپتال کے سینئر ڈاکٹروں کا کہنا ہے کہ ذہنی مریضوں میںایک ایسی حالت پائی جاتی ہے جس میں وہ تیز دھار والی اور نا قابل ہضم چیزیں کھانے لگتے ہیں۔سنگیتا کا علاج کرنے والے نفسیاتی ماہرین کا کہنا ہے کہ ہم نے خاتون کے بھائی سے بات کی ہے ، انہوں نے ان کو گھر لانے سے انکار کر دیا ، ان کا کہنا ہے کہ سنگیتا کئی بار گھر سے بھاگ چکی ہے لہذٰا علاج ہونے تک ان کا اسپتال میں رہنا ضروری ہے۔

کیلفورنیا:(نیٹ نیوز/ایمرا نیوز) اسمارٹ فون اور ٹیبلٹ بنانے والی مشہور کمپنی ایپل نے اعتراف کیا ہے کہ اس کی 13 انچ میک بک پرو (بغیر ٹچ بار کے) اور آئی فون ایکس میں کچھ ہارڈویئر مسائل ہیں، سب سے پہلے بلومبرگ ویب سائٹ نے اس پر ایک مضمون شائع کیا تھا جس کے ردِعمل میں کمپنی کا اعتراف سامنے آیا ہے۔ایپل نے کہا ہے کہ میک بک پرو اور آئی فون ایکس میں ڈسپلے اسکرین پر ٹچ کے مسائل سامنے آئے ہیں جو کچھ اس طرح ہیں:جیسے ہی کوئی اسکرین پر ٹچ کرتا ہے تو اسکرین یا اس کا کچھ حصہ اس کا ردِعمل نہیں دیتا اور جامد ہوجاتا ہے۔

دوسری جانب نہ چھونے کے باوجود بھی اسکرین تبدیل ہوتی ہے اور ہدایات پر عمل کرتی ہے۔ایپل نے مزید کہا ہے کہ جن افراد کے آئی فون ایکس اور میک بک پرو میں ایسے مسائل سامنے آرہے ہیں وہ مجاز اسٹور سے مفت میں اسے تبدیل کروا کر نیا فون یا میک بک پرو حاصل کرسکتے ہیں۔اس سے قبل بھی ایپل کے صارفین کئی آن لائن پلیٹ فارمز پر مصنوعات کی خرابی کی شکایت کرچکے تھے۔ 2016ء میں بھی آئی فون 6 پلس میں ٹچ اسکرین کے عین ایسے ہی مسائل سامنے آئے تھے اور ایپل نے اس وقت یہ مسئلہ حل کرنے کے لیے صارفین سے 149 ڈالر کی رقم مانگی تھی۔13 انچ والی میک بک پرو کی فروخت جون 2017ء میں شروع کی گئی تھی اور دوبارہ جون 2018ء میں اسے بیچا گیا تو معلوم ہوا کہ اس میں ڈیٹا ضائع ہورہا ہے اور ہارڈ ڈرائیو بھی فیل ہورہی ہے پھر کمپنی نے اس کی مرمت کی مفت پیشکش کی تھی۔

بیجنگ:(نیٹ نیوز/ایمرا نیوز) چین میں ایک شخص نے اپنے ہاتھوں سے 37 سیکنڈ میں 100 اینٹیں توڑ ڈالیں جس کی ویڈیو تیزی سے مقبول ہورہی ہے۔کنگ فو اور مارش آرٹ کے ماہر وانگ ہوا نے اس کا عملی مظاہرہ کرتے ہوئے ایک ویڈیو بھی بنائی۔

وانگ کہتے ہیں کہ وہ اپنے بچپن سے ہی مارشل آرٹ اور کنگ فو کے کرتب سیکھ رہے ہیں اور اپنے آہنی ہاتھوں کو کئی مرتبہ عملی مظاہروں کے لیے استعمال کرچکے ہیں۔ساؤتھ چائنا مارننگ پوسٹ نے اس دلچسپ واقعے کی ویڈیو بھی پوسٹ کی ہے۔ویڈیو چین کے صوبے گوائی ژاؤ میں بنائی گئی ہے جس میں انہیں ایک کے بعد ایک سرخ اینٹوں کو صرف ہاتھوں کی ضرب سے توڑتے ہوئے دیکھا جاسکتا ہے۔ وانگ کی ایک ضرب سے اینٹ کے دو ٹکڑے ہوجاتے ہیں اور اس کے بعد وہ دوسری اینٹ کو توڑنے کے لیے آگے بڑھتے ہیں۔وانگ کہتے ہیں کہ اس سے قبل وہ 40 سیکنڈ میں 50 اینٹیں توڑ چکے ہیں لیکن مسلسل محنت کے بعد اس سے بھی کم وقت میں 100 اینٹیں توڑنے کا ریکارڈ قائم کیا ہے۔