Category بزنس

لاہور(ایمرا نیوز آن لائن)سارک چیمبر آف کامرس اینڈ انڈسٹری کے زیر اہتمام ” علاقائی اقتصادی انضمام میں چیمبرز کا کردار“ کے موضوع پر ایک روزہ کانفرنس 16 مارچ کو نیپال کے دارالحکومت کٹھمنڈو میں منعقد ہوگی جس میں افغانستان، بنگلہ دیش، بھوٹان، بھارت، مالدیپ، نیپال، پاکستان اور سری لنکا سے کاروباری وفود اور وزراءشرکت کریں گے۔ سارک چیمبر کے سینئر نائب صدر افتخار علی ملک نے یہ بات ایف پی سی سی آئی کوارڈی نیشن کمیٹی کے چیئرمین سہیل حسین ملک کی قیادت میں تاجروں کے وفد سے گفتگو کرتے ہوئے کہی۔ انہوں نے کہا کہ اسی دوران سارک چیمبر کی ایگزیکٹو کمیٹی کا اجلاس 15 مارچ کو ہوگا۔ انہوں نے کہا کہ جنوبی ایشیا کے سماجی، اقتصادی اور معاشی پوٹینشل سے بھر پور استفادہ کے لئے رکن ممالک کے درمیان سماجی و سیاسی مباحثہ انتہائی ضروری ہے۔ انہوں نے مزید کہا کہ معاشی فوائد کیلئے حکومتی اور نجی شعبوں کو مل کر کام کرنا ہو گا اور اگر تمام ضروری اقدامات کیے جائیں تو 2020 تک خطے میں صرف فرنیچر مارکیٹ کا حجم 5.4 بلین ڈالر جبکہ صرف دو سال میں علاقائی تجارت کا حجم 170 بلین ڈالر تک پہنچ سکتا ہے۔

اسلام آباد (ایمرا نیوز آن لائن)پاکستان میں ڈیری کے شعبہ میں سرمایہ کاری کے وسیع امکانات موجود ہیں۔ لائیو سٹاک شعبہ کے ماہرین نے کہا ہے کہ ملک میں دودھ کی مجموعی پیداوار کا صرف 5 فیصد حصہ پراسیس کیا جاتا ہے جبکہ 95 فیصد دودھ بغیر پراسیسنگ کے استعمال کیا جاتا ہے جس سے صحت کے مسائل کا خدشہ ہے۔ انہوں نے مزید کہاکہ شعبہ میں سرمایہ کاری سے دودھ کی پراسیسنگ کی موجودہ شرح میں اضافہ سے شہریوں کو صحت مند اور محفوظ دودھ کی فراہمی کو یقینی بنایا جاسکتا ہے۔ اس کے علاوہ پراسیسنگ وغیرہ کے حوالے سے نئی سرمایہ کاری سے نہ صرف دیہی معیشت پر خوشگوار اثرات مرتب ہوں گے بلکہ اس سے روزگار کے نئے مواقع پیدا کر کے بے روزگاری کی شرح کو بھی کم کرنے میں مدد حاصل کی جا سکتی ہے۔

اسلام آباد (ایمرا نیوز آن لائن)وزارت منصوبہ بندی و اصلاحات نے سرکاری شعبہ کے ترقیاتی پروگراموں میں میری ٹائم افئیرز ڈویژن کے ترقیاتی کاموں کے لئے مجموعی طور پر اب تک 74کروڑ 20 لاکھ روپے کے فنڈز جاری کردیئے گئے ہیں۔ حکومت نے اس ڈویژن کے ترقیاتی کاموں کے لئے رواں مالی سال کے دوران 3 ارب 65کروڑ 15 لاکھ روپے کے فنڈز مختص کئے ہیں۔ پلاننگ کمیشن کے جاری کردہ اعدادو شمار کے مطابق حکومت نے نیو اسلام آباد انٹرنیشنل ایئرپورٹ پر سکیورٹی اہلکاروں کی رہائشگاہوں کی تعمیر کے لئے 59 کروڑ 38 لاکھ، اسلام آباد میں کسانہ ڈیم کی تعمیر کے لئے 7 کروڑ، مردان میں کلپانی کے مقام پر فلڈ فارکاسٹنگ سسٹم کی تنصیب کے لئے 3 کروڑ 50 لاکھ روپے سے زائد کے فنڈزجاری کردیئے ہیں۔

کراچی: (ایمرا نیوز) قرض برائے قرض کی روش برقرار، حکومت نے گردشی قرضوں کو کم کرنے کیلئے 200 ارب روپے کا نیا قرض لے لیا۔

گردشی قرضوں کے حجم میں کمی کے لئے حکومت نے اسلامک بانڈز کا اجراء کر دیا، بینکنگ ذرائع کے مطابق حکومت نے 200 ارب روپے کے سکوک جاری کیے ہیں، بانڈز کی میعاد 10 سال ہو گی۔

ذرائع کے مطابق سات بینکوں نے بانڈز کی خریداری کی، میزان بینک نے 88 ارب روپے، فیصل بینک اور بینک اسلامی نے 70 ارب روپے کی سرمایہ کاری کی ہے، اس وقت گردشی قرضوں کا کُل حجم 1500 ارب روپے سے زائد ہے۔

تجزیہ کاروں کے مطابق گردشی قرضوں کا حجم مسلسل بڑھ رہا ہے، حکومت فوری طور پر گردشی قرضوں کو کم کرنے کے لئے بانڈز کا اجراء تو کر رہی ہے مگر اس کے مستقل حل کے لئے حکومت کو لائن لاسسز میں کمی اور سبسڈی کا خاتمہ کرنا ہو گا۔

لاہور(ایمرا نیوز/رپورٹ عمر بٹ سے) ملک بھر میں بڑے پیمانے پر زرعی رقبوں کو اربن یونٹس میں تبدیل کرنے کا انکشاف ہوا ہے۔ گزشتہ سالوں کے دوران وقف رقبوں کی حیثیت تبدیل ہونے سے ملکی زراعت کو نقصان پہنچا اور قبضہ مافیا کی بھی حوصلہ افزائی ہوئی۔ سپیشل فرانزک آڈٹ ٹیم کی جانب سے نشاندہی پر معاملہ کی سنگینی کا اندازہ کرتے ہوئے ملک بھر میں تعینات 7ایڈمنسٹریٹرز سے تفصیلات طلب کر لی گئیں۔ ایڈمنسٹریشن ڈائریکٹوریٹ مترکہ وقف املاک بورڈ کے مصدقہ ذرائع کے مطابق اسلام آباد سے وزیر اعظم کی ہدایت پر خصوصی فرانزک آڈٹ کے لئے تعینات ٹیم نے نشاندہی کی کہ لاہور سمیت ملک بھر میں وقف زرعی رقبوں کو گزشتہ سالوں کے دوران مندروں اور گوردواروں کے نام پر اربن یونٹس میں تبدیل کیا گیا اور اس ضمن میں متروکہ وقف املاک بورڈ کے ذمہ داروں نے بہت سے معاملات کو مدنظر نہیں رکھا۔ ذمہ داروں کی غفلت کے سبب محکمہ کو مالی طور پر نقصان ہوا۔ ذرائع کے مطابق ندیم دھریجو ڈپٹی ایڈمنسٹریٹر (لینڈ) متروکہ وقف املامک بورڈ نے ایسٹرن زون لاہور، گوجرانوالہ زون، ننکانہ زون، ویسٹرن زون فیصل آباد زون، ناردرن زون راولپنڈی، سنٹرل زون راولپنڈی اور ساﺅتھرن زون کراچی کے ایڈمنسٹریٹز کے نام مراسلہ میں قرار دیا کہ فرانزک آڈٹ ٹیم کو ایسے تمام وقف زرعی رقبوں کی تفصیلات درکار ہیں جنہیں گزشتہ سالوں کے دورامن اربن پراپرٹیز/ پلاٹس میں تبدیل کر دیا گیا۔ ترجیحی بنیادوں پر لاہور سمیت ملک بھر سے رپورٹس ای میل کے ذریعے ہیڈ آفس ارسال کی جائیں جن میں وقف زرعی رقبوں کو اربن پراپرٹیز، رہائشی یا کمرشل پلاٹوں میں تبدیل کرنے کی تفصیلات موجود ہوں۔

اسلام آباد(نیٹ نیوز) اقتصادی رابطہ کمیٹی نے برآمدی اور درآمدی پالیسی آرڈر 2016 میں ترامیم کی منظوری دے دی۔

وزیرخزانہ اسد عمر کی زیر صدارت اقتصادی رابطہ کمیٹی کا اجلاس ہوا جس میں اہم منظوریاں دی گئیں۔

ای سی سی نے ذاتی،گفٹ اسکیم کے تحت گاڑیوں پر ٹیکسز، ڈیوٹیاں فارن ایکسچینج سے کرنے کی منظوری دے دی۔

درآمدی گاڑیوں پر ٹیکسز اور ڈیوٹیاں بیرون ملک مقیم پاکستانی یا ان کے مقامی رشتے دار ادا کریں گے۔

اقتصادی رابطہ کمیٹی نے یکم فروری سے 30 جون تک کپاس کی درآمد پر کسٹم اور ایڈیشنل کسٹم ڈیوٹی پر سیلز ٹیکس چھوٹ کی بھی منظوری دے دی۔

ای سی سی نے برآمدی پالیسی آرڈر 2016 اور درآمدی پالیسی آرڈر 2016 میں بھی ترامیم کی منظوری دے دی جس سے امپورٹرز اور ایکسپورٹرز کو کاروبار میں آسانیاں فراہم کرنے میں مدد ملے گی۔

اطلاعات کے مطابق تائیوان میں ایک خاتون کے خلاف اپنی روم میٹ کا دہی سے بنا ہوا مشروب چوری کرنے کا مقدمہ درج کیا گیا ہے۔ ان کی شناخت ڈی این اے ٹیسٹ سے کی گئی ہے۔
براڈکاسٹر ٹی وی بی ایس کے مطابق یہ مشتبہ خاتون جن کا نام ظاہر نہیں کیا گیا تائی پی میں ایک سٹوڈنٹ ہاؤس میں پانچ دیگر خواتین کے ہمراہ مقیم تھیں۔
گذشتہ ماہ ان کے ساتھ اس گھر میں رہنے والی ایک ساتھی کو لگا کہ ان کا 1.92 ڈالر کا دہی سے بنا مشروب ان کی اجازت کے بغیر پی لیا گیا ہے۔ انھوں نے کوڑے دان سے اس بوتل کو نکالا اور مجرم سے سامنے آنے کو کہا۔
انڈیا: ہیرے جڑا سونے کا لنچ باکس چوری
’جہاز چوری کرنے والے کو ایئرپورٹ پر آنے کی اجازت تھی‘
معروف افراد کے چوری شدہ ہیرے کیسے بکتے ہیں؟
جب کوئی بھی سامنے نہ آیا تو وہ اس بوتل کو پولیس کے پاس لے گئیں اور قانونی کارروائی کرنے کی درخواست کی جو پولیس نے قبول کر لی۔
اب یہ مشروب کی بوتل چونکہ نم تھی تو اس پر سے انگلیوں کے نشان حاصل نہیں کیے جا سکتے تھے تو اس مشروب کی مالک نے افسران سے اپنی ساتھیوں کے ڈی این اے ٹیسٹ کرنے کو کہا، تاکہ معلوم ہو سکے کہ کس پر الزام لگایا جائے۔
اس پر پولیس نے الزامات لگانے والی خاتون سمیت دیگر کو پولیس سٹیشن بلایا تاکہ ان کا فرانزک ٹیسٹ کیا جا سکے۔
چونکہ ہر ایک ٹیسٹ پر 98 ڈالر خرچ آتا ہے جو ٹیکس ادا کرنے والوں کی جانب سے فنڈڈ ہوتا ہے لہذا مقامی افراد نے شدید غصے کا اظہار کیا اور کہا کہ اتنے سے مسئلے کے لیے اتنا وقت اور پیسہ خرچ کیا گیا۔
ایک مقامی شخص لیو نے ایپل ڈیلی اخبار کو بتایا: ’یہ معاشرے کے وسائل کا ضیاع ہے۔ اگر میں پولیس اہلکار ہوتا تو میں اس خاتون کو ایک اور بوتل خرید دیتا۔‘

لاھور(نیٹ نیوز)بینک آف پنجاب کے صدر نعیم الدین نے اپنے عہدے سے استعفیٰ دے دیا۔

بینک آف پنجاب کے صدر نعیم الدین نے استعفیٰ وزیراعلیٰ پنجاب عثمان بزدار کو ارسال کردیا اور اس میں انہوں نے بطور صدر عہدہ سنبھالنے سے لے کر آج تک بیلنس شیٹ کا تذکرہ کیا گیا۔

نعیم الدین نے میڈیا نیوز سے گفتگو کرتے ہوئے کہا کہ 10 سال پہلے عہدہ سنبھالا توبینک میں سیاسی مداخلت اور کرپشن تھی اور بینک دیوالیہ تھا جب کہ اسے 17ارب روپے خسارےکا سامنا تھا۔

نعیم الدین کا کہنا تھا کہ وہ آج بینک کو 12 ارب 50 کروڑروپے سالانہ منافع کے ساتھ چھوڑ کر جا رہے ہیں۔

نعیم الدین کے مطابق انہیں بینک آف پنجاب میں 10 سال پورے ہونے کو ہیں، لیکن اب وہ مزید کام نہیں کرنا چاہتے۔

لاہور(اپنے نمائندے سے) اتوار بازاروں میں سبزیوں اور پھلوں کی قیمتوں میں اضافہ ہوگیا۔ گزشتہ ہفتے کی نسبت سبزیاں پانچ سے پندرہ روپے مہنگی فروخت کی جا رہی ہیں۔مہنگائی نے شہریوں کو پریشان کردیا ہے۔ سبزیوں اور پھلوں کے ریٹس اتنی جلدی بڑھتے ہیں کسی کو یقین نہیں آتا اتنے تو بسوں اور ویگنوں کے کرائے نہیں بڑھتے جتنے سبزیوں کے ریٹس بڑھ جاتے ہیں جو حکومت تبدیل کا دعویٰ کرتی ہے ابھی تک وہ اتوار بازاروں میں ریٹس کو کنٹرول کرنے میں ناکام ہو گئی ہے یہاں پر نہ تو بیٹھنے کا انتظام ہے اور نہ ہی پینے کے پانی کا انتظام کیا گیا ۔انتظامیہ کی نااہلی کے باعث ہم سستی سبزیاں مہنگے داموں خریدنے پر مجبور ہیں ،شہریوں کی دہائی، سروے کے دوران شہری محمد عرفان ،لیئق احمد ،شکیل نواز اور محمد سہہل رانا نے کہا کہ روزانہ کی بنیاد پر استعمال ہونے والی سبزیوں کی قیمتیں انتظامیہ کے کنٹرول سے باہر اور بے قابو ہو گئی ہیں کہ غریب آدمی اب سبزی کھانے سے پہلے بھی سوچنے پر مجبور ہو جاتا ہے،تمام تر نوٹسز اور پچھلے چند دنوں سے تمام تر معلومات کے باوجود انتظامیہ ان سبزیوں کی فراہمی اور قیمتیں کنٹرول میں بالکل ناکام ہو چکی ہیں جس کے باعث شادمان اتوار بازاروں میں آج بھی یہ سبزیاں مہنگے داموں فروخت ہو رہی ہیں خاص طور پر ہر پکوان میں استعمال ہونے والے ٹماٹر اور پیاز عوام کی پہنچ سے دور ہو چکے ہیں ،شہری عامر حسین،عدنا ن راشد،محمد سجاد اور حسیب اسلم نے کہا کہ شہر اور خاص طور پر شادمان اتوار بازار میں سبزیوں کی بڑھتی ہوئی قیمتیں خاص طور پر ٹماٹر اور پیاز کی قیمتوں کو قابو کرنے میں انتظامیہ مکمل طور پر ناکام ہو چکی ہے ،شادیوں کے سیزن کی وجہ سے ٹماٹر اور پیاز کی قیمتوں میں اضافہ ہو گیا ہے ہمارا انتظامیہ سے مطالبہ ہے کہ اس کے خلاف فوری طور مربوط کارروائی کی جائے تاکہ لاہوریئے اب سستی سبزیاں مہنگے داموں خریدنے پر مجبور نہ ہوں ،پہلے ہی ہم ہر جگہ ملاوٹ اور درجہ دوئم کی چیزیں استعمال کر رہے ہیں ،گوشت پر ہم بھروسہ نہیں کر سکتے ہیں کہ وہ حلال بھی ہے کہ نہیں اور محکمہ صحت سے منظور شدہ ہے بھی کہ نہیں۔صرف سبزیاں اور دالیں ہی وہ واحد چیزیں رہ جاتیں ہیں جو غریب طبقہ اور پسماندہ لوگ استعمال کرکے اپنی گزر اوقات کرتے ہیں لیکن انتظامیہ کی غفلت اور انتہائی لاپرواہی کی وجہ سے یہ چیزیں بھی اب ہم سے دور ہو گئیں ہیں ،ہمیں نہیں پتہ ہے کہ حکومت ہمارے ساتھ کیا کرنا چارہی ہے،میٹروپولٹین انتظامیہ کے ترجمان نے کہا ہے کہ ،ٹماٹر اور پیاز کی قیمت میں ایک یا دو دن میں استحکام آجائے گا،عوام کو بہترین سہولتیں اور اشیاءخوردنی کی سستے فراہمی کے لئے ہر ممکن کوشش کررہے ہیں۔اتوار بازار میںپھل کچھ اس طرح فروخت ہو رہے تھے ۔ سیب کالا کہولو 120، انار قندھاری 140، انار دانے دار 190 ، مسمی 80روپے، جاپانی پھل 70، انگور سندر خانی 170، پپیتا 94روپے، انگور ٹافی 120، گرے فروٹ 18روپے، اتوار بازار میں سبزیوں کے ریٹ کچھ اس طرح سے تھے ادرک چائینہ 190، لہسن چائینہ 95، لہسن دیسی 70روپے، کھیرا فارمی 25، سبز مرچ دیسی 70روپے، کھیرا دیسی 50روپے، ٹماٹر 40شملہ مرچ 95روپے ، مونگرے 80، شلجم 30، کھیرا 50، ٹینڈے 85، کریلے 60گھیا کدو 23، لیموں 55، بھنڈی 55روپے ، سبز مرچ 70، پودینے کی فی گھٹی 6 روپے، بیگن 25روپے ، آلو نیا 36، پیاز 22روپے ، آلو شوگر فری 22 روپے فی کلو میں فروخت کئے جا رہے ہیں۔ شہریوں کا کہنا ہے کہ سبزی اور پھل مہنگے داموں فروخت کئے جا رہے ہیں۔اتوار بازاروں میں پھل بھی مہنگے فروخت کئے جا رہے ہیں۔

کراچی(نیٹ نیوز/ایمرا نیوز)کراچی: پاکستان اسٹاک ایکسچینج میں آج کاروبار کے آغاز کے ساتھ ہی تیزی کا رجحان ہے۔ڈالر کی قیمت مستحکم ہونے کے بعد پاکستان اسٹاک ایکسچینج میں کاروبار کا آغاز مثبت انداز میں ہوا اور کاروبار میں تیزی دیکھی گئی۔کاروبار کے آغاز پر 100 انڈیکس میں 600 سے زائد پوائنٹس کا اضافہ دیکھا گیا جس سے انڈیکس 41 ہزار 529 کی سطح پر پہنچ گیا۔کاروبار کے دوران اسٹاک ایکسچینج میں زبردست تیزی آئی اور ہنڈرڈ انڈیکس 1000 پوائنٹس بڑھ کر 42 ہزار پوائنٹس کی نفسیاتی حد کے قریب پہنچ گیا۔