Category کالم

(میڈیا 92نیوز)
میری اصل پہچان میری حکمت ہے میں وہ حکیم حاذق ہوں جس کے نسخوں سے زرد چہروں والے مریض تروتازہ اور صحت مند ہو کر اٹھتے ہیں، کبڑے سیدھے ہو کر چلنا شروع کر دیتے ہیں، اندھوں کو میری دوائی سے نظر آنا شروع ہو جاتا ہے، بہرے سننے کے قابل ہو جاتے ہیں، لنگڑے اپنا لنگ بھول کر دوڑنے لگتے ہیں۔ قبض، مردانہ کمزوری، بدہضمی، ذیابیطس ، سرطان، بلڈ پریشر، چیچک، دمہ ، ہیضہ، سردرد اور گلے کی خرابیوں سمیت تمام بیماریوں کا میرے پاس شافی علاج ہے جو مریض میرے پاس آتا ہے وہ اس قدرشفایاب ہو کر جاتا ہے کہ اسے دوبارہ زندگی بھر میرے پاس آنے کی ضرورت نہیں پڑتی۔
میں عام طور پر اپنے مریضوں کے نام نہیں بتاتا انہیں خفیہ رکھتا ہوں لیکن مفاد عامہ کے لئے آج یہ بتانا چاہتا ہوں کہ ہر جماعت سے تعلق رکھنے والے بڑے بڑے سیاست دان میرے مریضوں میں شامل ہیں۔ میں ان سیاست دانوں کی بیماریوں ہی سے ملک کے سیاسی حالات کو جان لیتا ہوں نصف صدی کے تجربے کے بعد میرے پاس جہاں مریضوں کے لئے حکیمی نسخے موجود ہوتے ہیں وہاں سیاسی مشورے بھی تیار رکھتا ہوں۔ہر سیاسی مریض کو اس کے حالات کے مطابق مشورہ دینا اور اسکی بیماری کے لئے مناسب نسخہ دینا ہی اصل حکمت ہے ۔میری حکمت کی شہرت چاردانگ ہے اسی لئے ملک بھر سے سیاسی مریضوں کی کثیر تعداد میرے حکیمی نسخے اور سیاسی مشورے استعمال کرتی ہے۔
کل ہی میرے پرانے مریض بٹ پہلوان آئے تھے انہیں اکثر بدہضمی کی شکایت رہتی ہے موٹاپے کی وجہ سے چلنے پھرنے میں بھی تکلیف ہوتی ہے لیکن میرے مجرب نسخوں کی وجہ سے وہ اب بھی نہاری، حلوہ پوری، پلائو کباب اور کھابے بخوبی ہضم کر لیتےہیں ،کل اپنی بیماری پر مشورے کے بعد کہا کہ کچھ بات تخلیے میں کرنی ہے میں انہیں دوسرے کمرے میں لے آیا۔ بٹ پہلوان نے ادھر ادھر دیکھا اور پھر میرے کان میں کہا میرے لیڈر شہباز شریف کی طبیعت خراب ہے براہ کرم ان کے لئے بھی کوئی ادویات لکھ دیں میں نے پوچھا انہیں شکایت کیا ہے تو بٹ پہلوان نے کہا کہ میاں صاحب رات گئے اٹھ جاتے ہیں ، ڈرائونے خواب دیکھتے ہیں، انہیں ہتھکڑیاں اور جن بھوت نظر آتے ہیں۔بٹ پہلوان کا خیال تھا کہ انہیں مصلحت کی گولیوں کا ایک اور پیکٹ دے دوں مگر میں نے تجویز کیا کہ انہیں ’’کشتۂ مردمی‘‘ جیسی مقوی دوا کی ضرورت ہے۔ ’’شربت بہادری‘‘ کے دوبڑے چمچے صبح شام بھی تجویز کئے جن بھوت بھگانے کے لئے آیت الکرسی کا ہر دم ورد کرنے کا مشورہ بھی دیا۔بٹ پہلوان نے مجھ سے رازداری کا وعدہ کیا تھا مگر چونکہ یہ رازداری کی بات نہیں ہے اس لئے اسے بتانے میں کوئی حرج بھی نہیں ہے۔
آج کوئی اور نہیں بلکہ میڈم کنول بنفس نفیس میرے مطب آئیں ان کے آنے سے فضاء معطر سی ہو گئی پہلے خیر سے میری محلے دار تھیں مگر اب ڈیفنس منتقل ہو چکی ہیں۔انصاف اور جدت پسندی کی قائل ہو کر انصافین کہلاتی ہیں میری پرانی مہربان ہیں اگر کوئی اہم مشورہ کرنا ہو یا ناقابل علاج بیماری کے بارے میں جاننا ہو تو پھر خاص طور پر پرانے محلے میں میرےمطب میں آتی ہیں آج بھی تشریف لائیں تو فوراً کہا کہ میرے پاس زیادہ وقت نہیں حکیم صاحب فوراً مشورہ دیں میں نے پوچھا خیریت توہے، صحت تو بالکل ٹھیک نظر آ رہی ہے لیموں اور کھیرے کو ملا کر جو ’’نسخہ حسن‘‘ میں نے انہیں تیار کرکے دیا تھا اس نے مکمل طور پر کام دکھایا تھا میڈم کا چہرہ کھلے ہوئے پھول کی طرح دکھائی دے رہا تھا میں سمجھا کوئی پوشیدہ بیماری نہ ہو اس لئے انہیں الگ کمرے میں بٹھا کر پوچھا کہ اب کیا مسئلہ ہے تومیڈم نے کہا کہ وہ بالکل ٹھیک ٹھاک ہیں مسئلہ تو پارٹی قیادت کو درپیش ہےجب سے اقتدار ملتے ہوئے نظر آنے لگا ہے انکے خون میں گردش زیادہ ہو گئی ہے ،غصہ اور جوش بڑھ گیا ہے، پچھلے چند دنوں میں ایک دو نے تو معمولی باتوں پر تھپڑ رسید کر دیئے ہیں جبکہ لڑائی جھگڑے کے واقعات بڑھ گئے ہیں ۔ میڈم نے کہا کہ کوئی ایسی دوا تجویز کریں جس سے قیادت کا چڑھا ہوا پارا کچھ نیچے اتر جائے۔ میرے ذہن کی پردہ سکرین پر پچھلے چند دن کے واقعات فلم کی طرح چلنے لگے۔ میں نے تھوڑی دیر آنکھیں بند کیں اور پھر اپنے معاون ’’دیسی برگر‘‘ کو آواز دی کہ وہ فوراً ’’معجون عقل‘‘ اور ’’عرقِ برداشت‘‘ لائے تاکہ تحریک انصاف کی قیادت کو بھیجا جا سکے وہ آئندہ دنوں میں ان ادویات کے استعمال سے پرسکون رہیں گے۔ بلند فشار خون کے لئے ’’املی کا شربت‘‘ پینے کا بھی مشورہ دیا تاکہ مخالفانہ بات سن کر ان کا خون جوش نہ مارے اور وہ تحمل سے حکومت کا مزہ لےسکیں۔
میرے محلے گوالمنڈی میں ایک پرانا جیالا زاہد گوگا بھی رہتا ہے کوڑے کھا چکا ہے اس لئے کبھی کبھار اسکی کڑوی کسیلی باتیں سننے کے لئے آصف زرداری بھی اسے بلا لیتے ہیں ۔کل ہی اسلام آباد سے آیا ہے سینہ پھلائے ہوئے مطب میں آیا اور زور سے بے تکلفانہ آواز لگائی حکیم صاحب! حکیم صاحب! میں نے جھٹ سے کہا آپ کے سامنے تو بیٹھا ہوں کیوں اتنا شور مچا رہے ہو۔ گوگا نے کہا حکیم صاحب بات ہی ایسی ہے کل ہی پارٹی قیادت سے ملا ہوں اب آپ سے مشورہ لینا ہے کہ کیا کیا جائے ؟ ہوا کیا ہےمیں نے سوالیہ انداز میں پوچھا تو گوگا نے کہا کہ قیادت مجھے ضمنی الیکشن لڑنے کا کہہ رہی ہے خرچہ بھی پارٹی دے گی، میں نے فوراً کہا تو حرج ہی کیا ہے فوراً تیاری کرو۔ گوگا سوچ میں پڑ گیا اور کہا جیتنے کا کوئی چانس نہیں پھر بھی؟ میں نے کہا ہاں پھر بھی۔تمہارا نقصان ہی کیا ہے پارٹی جیتنے کی پوزیشن میں آئی تو جیالوں کو کب ٹکٹ ملے گا۔ابھی الیکشن لڑ کر شوق پورا کر لو۔زاہد گوگا تھوڑا ریلیکس ہوا تو کہنے لگا حکیم صاحب میں نے زرداری صاحب سے آپ کا ذکر کیا تھا اور بتایا تھا کہ آپ کے حکیمی نسخے دائمی مریضوں کو بھی ٹھیک کر دیتے ہیں۔ گوگا نے کہا کہ آپ زرداری صاحب کے لئے کچھ نسخے، کچھ دوائیاں اور خوراک میں احتیاط وغیرہ تجویز کر دیں۔ میں نے فوری طور پر گوگا کو کہا کہ زرداری صاحب شریفیہ دسترخوان سے اجتناب کریں کیونکہ اس دسترخوان سے استفادہ کرنے والوں کو آج کل جائے پناہ نہیں مل رہی اور اگر ہوسکے تو مولانا فضل الرحمٰن کو بھی یہ خوراک کھانےسے باز رکھیں، میں نے یہ بھی تجویز کیا کہ زرداری صاحب ’’اکسیر عسکری ‘‘ کا استعمال بڑھائیں اور ’’تریاکِ زر‘‘ نامی ’’زہر مار‘‘ کی خوراک شروع کریں کیونکہ اصل میں یہی وہ زہر ہے جو پارٹی اور زرداری صاحب کو اندر ہی اندر کھا رہا ہے۔
میں نے متحدہ پاکستان کو بھی ’’خمیرۂ مصلحت توڑ‘‘ تجویز کی ہے جبکہ مصطفیٰ کمال کی خراب آنکھوں کی درستی کے لئے ’’عرق گلاب اور ردِ غلط فہمیہ گولیاں ‘‘ تجویز کی ہیں۔ مولانا فضل الرحمن خود بھی حکمت جانتے ہیں مگر پھر بھی ان کے لئے میں نے خاص طور پر ’’بنی گالہ کا اصلی دیسی اور چھوٹی مکھی کا شہد‘‘ بھیجا ہے تاکہ ان کے ٹوٹے ہوئے دل کی مرمت تیز تر ہو سکے ۔جاوید ہاشمی کی کمزوری کا پتہ چلنے پر میں نے نوازی اور شہبازی دواخانے سے ’’معجون حوصلہ افزائی ‘‘ بھجوائی ہے امید ہے انہیں تھوڑا بہت افاقہ ضرور ہوا ہو گا ۔باقی سیاسی مریضوں کے لئے بھی نسخے تیار ہیں جسے ضرورت ہو منگوالے۔(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

رضاکارانہ طورپراعتراف کرتا ہوں کہ میں یہ کالم لکھ نہیں بلکہ گھسیٹ رہاہوں کیونکہ رات بھر کا جاگا ہوا ہوں اور اس عمر میں رتجگے مت مار دیتے ہیں۔ وہ دن کب کے لد گئے جب خلیل خان فاختہ اڑایا کرتے تھے۔
عمران خان! پلیز روک سکو تو روک لو
آج کل تو ناک پر بیٹھی مکھی بھی سنجیدگی سے نہیں لیتی۔ ہوا یوں کہ بچے دوماہ دو دن کی چھٹیاں منا کر امریکہ سے واپس آ رہے تھے۔ پندرہ سولہ کی درمیانی رات (صبح) ایک بج کر50منٹ پر فلائٹ تھی۔ ننھیال نے حسب معمول تحائف سے لاد کربچوں کو نہال اور مجھے نڈھال کر رکھا تھا۔ گھر پہنچتے پہنچتے صبح کے تین ساڑھے تین بج گئے۔ سونے کاوقت گزرچکا تھا۔ اوپرسےمحمدہ بیٹی اور بڑا بیٹا حاتم خاص طورپرمیرے لئے دو بیگز کتابوں سے بھرلائے تھے۔ ایک سے بڑھ کرایک کتاب۔ میں ندیدوں کی طرح کتابوں کے ٹائٹلز دیکھ دیکھ خوش ہوتا رہا کہ سال بھرکا یہ ’’سامان تعیش‘‘ خاصا باعث ہیجان تھا۔
عمران خان! پلیز روک سکو تو روک لو
دو گھنٹے کی ٹوٹی پھوٹی کچی پکی ادھوری نیند میں بھی چین نہیں تھا کیونکہ اک موضوع بری طرح میرے اعصاب پر سوار تھا جس پر کالم لکھے بغیر سوتے رہنا ممکن ہی نہ تھا۔ بظاہر موضوع بہت معمولی لیکن میرے لئے بے حد غیرمعمولی تھا سو عالم خستگی میں لکھنے بیٹھ گیا ہوں۔ الیکشن نتائج کے بعد ایک ’واردات‘ تو لاہور میں ہوئی۔ PTI کے ایک ’فاتح‘ کے لوگوں نے فائرنگ کرکے جشن فتح منایا۔ نوبت تھانے کچہری تک جا پہنچی۔ اس کے چند روز بعد ہی ٹی وی چینلز کی اسکرینوں پر ایک ایکشن سے بھرپور فلم دیکھی۔ اس کا ہیروبھی PTI کراچی کا کوئی نو منتخب ایم پی اے تھا جو سر عام داؤد نامی اک غریب سن رسیدہ آدمی کے منہ پر تھپڑوں سے ’تبدیلی‘ لکھنے کے بعد اپنے آٹوگراف بھی ثبت کررہا تھا۔
عمران خان! پلیز روک سکو تو روک لو
اس ’تبدیلی‘ کی ویڈیو وائرل ہونے پر ایم پی اے داؤد کے گھر گیا اور معافی کا ’تاوان‘ طلب کیا۔ غریب داؤد مہان مہمان کو انکار تو کر نہیں سکتا تھا، اس نے اپنی ناداری و بے بسی کا اعلان کرتے ہوئے فیصلہ عمران خان پر چھوڑ دیا۔ غالباً بدھ کی شام عائشہ بخش نے یہ سوال اپنےپروگرام ’رپورٹ کارڈ‘ میں اٹھایا تو میرا جواب یہ تھا کہ اس جنگجو ایم پی اے کو اسی مقام پر خاص طور پر لے جا کر داؤد کی داد رسی کرتے ہوئے اسے کہا جائے کہ سرعام اس کو اتنے ہی تھپڑ رسید کرے جتنے اسے مارے گئے تھے۔ بظاہر یہ مطالبہ ’غیرقانونی‘ ہے لیکن شاید اس سے کم پر کام نہیں رکے گا۔ غریب پر غصہ آنے کا کلچر تبدیل نہیں ہوگا۔
عمران خان! پلیز روک سکو تو روک لو
’روک سکو توروک لو تبدیلی آئی رے‘ میں نے جو سزا تجویز کی وہ علامتی بات تھی، اصل بات یہ کہ کل کے 9ٹانکوں سے بچنا ہے تو آج بروقت ایک ٹانکا لگا لو کیونکہ بوری میں موری ہو جائے تو مگورا بنتے دیر نہیں لگتی۔ ’تبدیلی‘ کا آغاز ’تمیز‘ سے کرنا ہوگا ورنہ یہ وائرس پھیل گیا تو ’پیادوں‘ کا تو کچھ نہیں بگڑے گا، عمران خان کی 22سالہ جان لیوا محنت غارت ہوجائے گی جو کسی صورت قبول نہیں۔ میں عمران خان سے براہ راست مخاطب ہوں کہ اس بددماغ کو ایسا سبق سکھائے کے دوبارہ PTI کا کوئی بندہ ایسی حرکت کی جرأت نہ کرے ورنہ نقصان ناقابل بیان ہوگا۔ صرف شوکاز نوٹسز سے اس شر پر قابو پانا ممکن نہ ہوگا۔
عمران خان! پلیز روک سکو تو روک لو
’رپورٹ کارڈ‘ میں ہی برادرم مظہر عباس جیسے ’چھٹے‘ ہوئے سینئر صحافی دانشور نے بھی اک سزا تجویزکی ہے۔ میری تجویز کردہ سزا میں انتہا پسندی اور لاقانونیت (بقول امتیازعالم) پائی جاتی ہو تو مظہر عباس کے قیمتی اور بالکل مفت مشورے پر ہی عمل کر لیں ورنہ سواری اپنے سامان کی خود ذمہ دار تو ہےہی۔ ’سامان سو برس کا ہے پل کی خبر نہیں‘ جو لوگ PTI کی پشت پر سوار ہو کر پہلی بار ایوان ِ اقتدار تک پہنچے، وہ بہت خطرناک بھی ہو سکتے ہیں۔ عمران خان! روک سکو تو روک لو پلیز!
بشکریہ : جنگ نیوز

یادش بخیر کسی زمانے میں یہاں قادریوں اور چشتیوں کا دور دورہ تھا، روحانیت کے چشمے بہتے تھے اور علم و فضل کی روشنی چاردانگ پھیلتی تھی، تصوف اور مجاہدوں سے دینی اور دنیاوی دونوں راستے کھلتے تھے، اسی مبارک زمانے کا ذکر ہے مولانا ابراہیم علی چشتی نے جرمنی کے رہنما ایڈولف ہٹلر کی خود نوشت سوانح عمری’’ میری جدوجہد‘‘ کا ترجمہ’’تزک ہٹلری‘‘ کے نام سے کیا جسے بہت شہرت ملی۔
تزک ہٹلری اور تضاد نویس
ابھی ایک بار پھر سے ریاست سے اندھیرے چھٹ رہے ہیں نعمتوں، رحمتوں اور برکتوں کے دروازے کھلنے والے ہیں، نحوست، آسیب اور مشکلات کا دور ختم ہونے والا ہے۔ تزک ہٹلری کا مقدمہ قدوس صہبائی نے لکھا تھا اور وہ ہٹلر کی کامیابی میں حب الوطنی اور جرمن فوج سے اس کے تعلقات کا ر اور فکر کی ہم آہنگی کو قرار دیتے ہیں۔ لکھتے ہیں’’ہٹلر کی ذاتی زندگی اور صلاحیت کے علاوہ اس کی کامیابی کا اہم راز یہ بھی تھا کہ ہٹلر کا اضطراب اور جوش انتقام لاکھوں جرمنوں کی دلی کیفیتوں کا ترجمان تھا، جرمن فوجی ہٹلر پر جان چھڑکتے تھے، صنعت کاروں کا کاروبار اشتراکیوں کی وجہ سے تباہ ہورہا تھا وہ اپنی دولت ہٹلر کے قدموں پر نچھاور کرتے رہے۔ غرض پہلی جنگ عظیم کے بعد جرمنی کے مایوسی اور محرومی کے دور میں ہٹلر کی تحریک نے طاقت پکڑی۔ ہٹلر کے نعرے سن کر ہر جرمن کے سینے میں چنگاری سلگ اٹھتی تھی یہی چنگاری بالآخر شعلہ بن کر بھڑکی اور پھر دوسری جنگ عظیم کا آتش فشاں بن گئی‘‘۔
تزک ہٹلری اور تضاد نویس
بظاہر جرمنی کے حالات اور ہٹلر کے عروج کا آج کی دنیا اور اس ریاست سے کوئی تعلق نہیں مگر چونکہ تضاد نویس کو یہاں بھی مڈل کلاس کی محرومی اور مایوسی نظر آتی ہے اور عسکری خان کا رجحان بھی نئے پاکستان کی طرف ہی رہا ہے۔ یہاں کے امراء اور اشرافیہ بھی اسی تصور پر جان چھڑک رہے ہیں تو ایسے میں تزک ہٹلری کے یہ اوراق پڑھنا فائدہ دے سکتا ہے۔
تاریخ بتاتی ہے کہ ہٹلر کے جرمنی میں لوگ اس پر جان چھڑکتے تھے ، 90فیصد سے بھی زیادہ جرمن انتخابات یا ریفرنڈم میں ہٹلر کے حق میں فیصلہ دیتے تھے۔ مڈل کلاس تو ہٹلر پر صدقے واری تھی۔ یہودیوں کو گیس چیمبر میں بند کر کے مارنا یا کسی بھی ملک پر حملہ اور بےتحاشا بمباری بھی اس مڈل کلاس کے شوق انتقام کو ٹھنڈا کرنے سے قاصر تھی۔ ہٹلر کے مخالفوں کے ساتھ جو بھی برا سلوک ہو، مڈل کلاس اس نازیت کی ہی حمایت کرتی تھی، اس وقت جرمن فوج اور مڈل کلاس کی سوچ ایک تھی، جرمنی کے صدر جنرل ہنڈن برگ اور ان کی افواج کی بہت عزت تھی مگر اس کے باوجود ایڈولف ہٹلر کے عروج اور اس کو اقتدار میں لانے میں فوج کا بہت بڑا ہاتھ تھا۔
تزک ہٹلری اور تضاد نویس
فوج اور ہٹلر کا دل ایک ہی طرح دھڑکتا تھا۔ مخالف آوازیں دبا دی گئیں تھیں، میڈیا مکمل طور پر کنٹرولڈ تھا، صرف پراپیگنڈہ منسٹر جوزف گو ئبلزکی دی ہوئی لائن پر ہی پوری قوم کو چلنا پڑتا تھا۔ ہٹلر کو مکمل اقتدار دلانے میں جرمن سیاستدان وان پاپن کا بہت ہاتھ تھا۔ اس نے فوج اور صدر جنرل ہنڈن برگ کو یہ دلیل دے کر ہٹلر کو اقتدار دلوایا کہ ہٹلر اقتدار میں آئے گا تو ذمہ دار بن جائے گا۔ اس کا لاابالی پن، خودسری اور غیر ذمہ داری جاتی رہے گی، جرمن صدر اور فوج دونوں کو یہ دلیل پسند آئی اور ہٹلر کو جرمنی کا چانسلر بنادیا گیا۔ کوشش یہ کی گئی کہ کابینہ اور اہم عہدوں پر ہٹلر کے لوگ نہ لگائے جائیں اور اس کے بجائے دوسرے لوگوں کے ذریعے اسے کنٹرول کیا جائے، مگر پاپن کا یہ فارمولا مکمل طور پر ناکام ہوا، ہٹلر عوام میں مقبول تھا اس نے فوج اور حکومت کا مکمل کنٹرول سنبھال لیا۔ وان پاپن کو بےاختیاری اور بےبسی کی وجہ سے حکومت چھوڑنی پڑی، صدر جنرل ہنڈن برگ کی وفات ہوئی تو چانسلر ایڈولف ہٹلر صدر بھی بن گیا اب وہ چانسلر،فیوریر اور صدر سب کچھ تھا، فوج حکومت اور عوام سب اس کے ساتھ تھے بس ا سی قومی خواب نے وہ المیہ جنم دیا جسے اب دوسری جنگ عظیم کے نام سے یاد کیا جاتا ہے۔وان پاپن حکومت سے نکلے تو ہٹلر نے ان کے احسان کے بدلے میں انہیں پہلے آسٹریا اور بعد میں ترکی میں جرمنی کا سفیر بنادیا۔ دوسری جنگ عظیم میں جرمنی کو شکست ہوئی تو وان پاپن بھی گرفتار ہوا نورمبرگ کے وار کرائمز ٹریبونل میں اس کا مقدمہ چلا وان پاپن نے کہا کہ وہ تو دراصل ہٹلر اور اس کے نازی فلسفے کا سخت مخالف تھا اسی لئے حکومت میں کام کرنے کے بجائے سفارت قبول کرلی۔
تزک ہٹلری اور تضاد نویس
نورمبرگ ٹرائل نے تو اسے بری کردیا لیکن تاریخ اور جرمن عوام نے وان پاپن کے ہٹلر کو برسراقتدار لانے کے جرم کو کبھی معاف نہیں کیا۔ پاپن سیاست میں دوبارہ سرگرم ہوئے تب بھی قبولیت نہ ملی۔ وان پاپن نے آرٹیکلز اور مضامین کا سلسلہ شروع کیا جس میں اپنے دفاع اور نظریات کے حق میں دلائل دئیے مگر ہٹلر کو اقتدار دلانے کا جرم ایسا داغ بنا کہ پاپن کو اس داغ کے ساتھ ہی اس دنیا سے رخصت ہونا پڑا۔
ظاہر ہے جرمنی کی ان مثالوں یاتاریخ کے ان کرداروں سے کوئی بھی مماثلت اتفاقی ہوسکتی ہے مگر تضاد نویس کو کچھ ضرور ایسا نظر آتا ہے جس کا اطلاق آج کے حالات اور آج کی ریاست پر ہوسکتا ہے۔ غور سے پڑھیں گے تو بہت سی مطابقتیں بھی مل جائیں گی۔
ابراہیم علی چشتی کی تزک ہٹلری میں لکھا ہے کہ جرمن حکمت عملی یہ تھی کہ ظلم کا مقابلہ پرامن رہ کر نہیں کیا جاسکتا اور صرف نعرہ بازی حب الوطنی نہیں۔ گویا ظلم کا مقابلہ جارحیت سے کرنا پڑتا ہے اور صرف نعرے بازی نہیں حب الوطنی کے لئے ملک فتح کرنے پڑتے ہیں، یہ انعام میں نہیں ملتے۔
تزک ہٹلری اور تضاد نویس
تزک ہٹلری ہو یا ذاتی انا اور انتقام میں ڈوبے کسی اور حکمران کی کہانی، ہر ایک کا انجام ملک کی شکست اور اس حکمران کی تباہی کی صورت میں سامنے آتا ہے۔ تضاد نویس کا کہنا ہے کہ کامیاب وہ ہوتے ہیں جو عصری شعور کو مدنظر رکھتے ہوئے حسد، انتقام اور احتساب کے سال خوردہ دائروں کو توڑتے ہیں، انقلاب فرانس کے گلوٹین، انقلاب روس میں سرمایہ داروں کا خون اور انقلاب ایران میں شاہ پرستوں کا قتل خوشگوار تبدیلیاں نہ لاسکے بلکہ ان ملکوں کو ایک بڑے دائرے میں محدود کردیا، کاش! یہاں ایسا انقلاب آئے جس میں فرد کی آزادی، اظہار رائے کی آزادی، انسانی حقوق کا احترام، مخالفوں کے لئے انصاف اور مظلوموں کے لئے بہتری ہو۔ وگر نہ پابندیاں، بےمحابا طاقت اور فوج کے پسندیدہ حکمران تو تاریخ میں تباہی کا باعث بنتے رہے ہیں یہ ہٹلر ہی تھا جس کے خلاف بعد میں جرمن فوج ہی نے بغاوتیں کیں، Night of Generalsنامی فلم اس کی گواہی دیتی ہے حتیٰ کہ رومیل جیسے عظیم جرنیل کو گمنامی کی موت ملی۔ کاش! تاریخ کا یہ حصہ یہاں سایہ فگن نہ ہو بلکہ ہمارا ملک خوشحالی کے راستہ پر چلے…….
(بشکریہ جنگ نیوز)

تاریخ ریاستی نظام میں موجود مختلف قوتوں کے مابین کشیدگیوں، اختلافات اور پنجہ آزمائی کے واقعات سے بھری پڑی ہے۔ دورِ شہنشاہیت میں محلاتی سازشوں سے لیکرجدید جمہوری دَور تک کوئی سیاسی نظام مسلسل جاری و ساری رہنے والی اِس قدیم روایت سے عاری نہیں رہا۔ زیادہ سے زیادہ طاقت، اختیار اور وسائل کا حصول تاریخ کے اِس ناقابل شکست رجحان کا سب سے بڑ اسبب رہا ہے ۔ ریاستی امور میں اگرچہ یہ ایک سنجیدہ معاملہ سمجھاجاتا ہے لیکن تشویشناک صورتحال اُس وقت پیدا ہوتی ہے جب یہ متصادم عناصر کسی بیرونی یلغار یا مداخلت کے دوران بھی یکجا نہ ہو سکیںیا ملتے جلتے حالات میں ریاست کی جغرافیائی و نظریاتی سرحدوں کے دفاع پراپنے ذاتی مفادات کو ترجیح دینے لگیں ۔ بیسویں صدی میں یقیناً چند ایسے واقعات رونما ہوئے ہیں کہ جب اندرونی سطح پر ایک دوسرے سے نبرد آزما قوتوں نے بیرونی مداخلت کے وقت ایک ہوکر اپنی ریاست کے مشترکہ دفاع کو ترجیح دی۔
ہمیشہ کی طرح اِس سال بھی پوری قوم کو یوم آزادی کے موقع پرخوش اور یکجا دیکھ کردل سے خود بخود یہ دعا نکلی کہ آنے والا ہر دِن پوری قوم کے لئے یوم آزادی جیسا ہی ثابت ہو اور ملک بھر میں بسنے والے لوگ ہر نئے دن کو یوم آزادی جان کر اسی طرح یکجا رہیں ۔اگرچہ اختلاف رائے ایک جمہوری روایت ہے، لیکن ملک میں سیاسی رقابتوں اور اقتدار کی کشمکش میں متصادم عناصر کو بارہا سیاسی بحران، اقتصادی تنزلی اور پر تشدد واقعا ت کا سبب بنتے دیکھا جاتا رہا ہے۔
پاکستان میں تاریخ اور پڑوس سے کچھ سیکھ لینے کا کوئی خاص رواج نہیں۔اَلبتہ مذکورہ حقائق کے ساتھ ساتھ ، یوم آزادی کے موقع پر قومی یکجہتی کے جو ش و جذبے سے بھرپور مناظر ’’ماضی‘‘ اور’’پڑوس‘‘ دونوں پر تھوڑی تھوڑی سی دستک دینے کے متقاضی ہیں۔
جولائی 1937میں چین پر جاپان کا حملہ اور اِس کے بعد چین میں سیاسی طور پر یکسر بدل جانے والے حالات، قومی یکجہتی کے تناظر میں دنیا کے لئے مکمل سبق ہیں۔ دوسری جنگ عظیم کی شروعات کے وقت عظیم چینی رہنما مائوزے تنگ کی قیادت میں دنیا بھر میں مقبولیت حاصل کرلینے والی لانگ مارچ جاری و ساری تھی۔دنیا کے بہت سے اَہم واقعات کی طرح وسیع جغرافیائی حدودمیں پھیل جانے والی اس لانگ مارچ سے متعلق کئی حقائق بھی جنگ عظیم کی تباہ کاریو ں کے ملبے تلے کہیں گم سے ہوگئے تھے ۔ جیسے شمال مشرقی چین میں مارکو پولو برج پرسپاہیوں کے درمیان ہونے والی معمولی کشیدگی ، جس میں غیرضروری طور پر شدت بڑھ جانے کے بعد جاپانی افواج کی چینی علاقوں میں یلغار، اپنے نتائج کے تناظر میں گزشتہ صدی کی عسکری و سیاسی تاریخ کا اہم باب ہے۔
قصہ کچھ یوں ہے کہ جاپانی افواج اپنے ایک اہلکار کی تلاش میں چین کے ایک خاص علاقے میں داخل ہونا چاہتی تھیں۔لیکن چینی حکام نے جاپانیوں کی درخواست پر کان نہیں دھرے لہٰذا جاپانیوں نے چینی علاقوں میں پیش قدمی شروع کردی۔اُدھر چین میں اُس وقت مائوزے تنگ کی لانگ مارچ زوروں پر تھی اور ان کے سرگرم حامی عملاً برسر اقتدار قومی نیشنل پارٹی (Kuomintang of China) سے نبردآزما تھے۔لیکن جاپانیوں کی عسکری مداخلت چین کے اندرونی حالات پر کچھ اس طرح اَثر اندازہوئی کہ حکومت اور کمیونسٹوں کے درمیان کشیدگی اور اس کے نتیجے میں رونما ہونے والے پر تشدد واقعات میں نا قابل یقین حد تک کمی ہوگئی۔جاپانیوں کی مسلح پیش قدمی کے ساتھ ساتھ یہ واضع ہوتا جا رہا تھا کہ بر سر اقتدار قومی پارٹی روایتی جنگی حربو ں کے ذریعے ملک کا دفاع کرنے میں ناکام ثابت ہورہی ہے ۔اِیسی صورتحال میں ایک جانب سرکاری افواج نے جاپانیوں سے لڑنے کے لئے گوریلا تکنیک اختیار کرنے کا فیصلہ کیاتو دوسری جانب لانگ مارچ کی حمایت کرنے والے کمیونسٹوں نے بھی اِن غیر ملکی حملہ آوروں پرگوریلا حملے شروع کردئیے۔ کمیونسٹ چھاپہ ماروں اور مخالف سرکاری گوریلوں نے شدید نظریاتی اختلافات، نفرت اور محاذ آرائی کے باوجود جاپانیوں کو ملک سے نکالنے کی ملتی جلتی کوششوں کے دوران ایک دوسرے کے خلاف خاطر خواہ کوئی بڑی کارروائی کرنے سے ہرممکن گریز کیا۔اِس جنگ کے حتمی نتائج سے قطعہ نظر، چین کی ریاستی افواج اور کمیونسٹ جنگجوئوں کے درمیان یہ انوکھی اورخاموش یکجہتی حب الوطنی کے فلسفے اور ذاتی مفادات اور نظریات کے مقابلے میں ملک و قوم کے خاطر قربان ہوجانے کے جذبے کی ایک غیر معمولی مثال ہے۔
اگرچہ امن عامہ اور سیاسی اٹھا پٹخ کے حوالوں سے ان دنوں ملک کے حالات پہلے سے بہت بہتر ہیں، لیکن انتخابات کے دنوں میں سیاست دانوں، نگراں حکومت، الیکشن کمیشن آف پاکستان، انتخابات سے متعلق انتظامی عناصر اوردیگر ریاستی و سیاسی حلقوں کے درمیان روابط ، تعلقات اور بظاہر عدم اعتمادکا معاملہ زیر بحث رہا۔ اِس صورتحال کی دھول اب یقیناً ڈھلتی بیٹھتی نظر آرہی ہے لیکن ملک کوآئندہ اندرونی سطح پرمہلک تنازعات سے بہترطور پر محفوظ رکھنا نئی حکومت کے اوّلین ایجنڈوں میں شامل ہونا ضروری ہے۔اِس کالم کے لئے کی گئی تحقیق کے دوران اندازہ ہوا کہ لاہور میں مقیم معروف صحافی اور تجزیہ کار افتخار احمد سے رابطہ موضوع کے تناظر میں مدد گار ثابت ہوسکتا ہے۔
افتخارصاحب نے بتایا کہ وہ 1965 میں محترمہ فاطمہ جناح اور جنرل ایوب خان کے درمیان صدارتی انتخابات کے وقت اسکول میں پڑھتے تھے۔ اس کے باوجود وہ نہ صرف محترمہ کا انتخابی نشان لالٹین لئے گھومتے پھرتے تھے بلکہ انتخابی مہم کے دوران وہ محترمہ کی پارٹی کیلئے باقاعدہ چندہ بھی اکٹھا کیا کرتے تھے جس پر انہیں اسکول میں سزا بھی دی گئی۔اِنہوں نے بتایا کہ لاہور کے شہریوں کی ایک بڑی تعداد ایوب خان کے مقابلے میں محترمہ فاطمہ جناح کی حمایت کر رہی تھی۔آج بھی متنازع سمجھے جانے والے اِن انتخابات میں محترمہ کی شکست افتخار احمد ، اِن کے ہم جولیوں اور لاہور کے لاتعداد ووٹرزکیلئے ایک انتہائی مایوس کن سانحہ تھا۔ لیکن اصل کہانی ابھی باقی ہے ۔
’’میں نے انتخابات کے دوران جن لوگوں کو ایوب خان کی مخالفت کرتے دیکھا تھا، وہ جنگ شروع ہوتے ہی ایوب کی ایک درخواست پر اپنا سینہ کھول کر کھڑے ہوگئے ،‘‘ چند لمحوں کے لئے ماضی میں کھوئے ہوئے افتخارصاحب نے اپنی اِس بات کو یوں آگے بڑھایا، ’’جنگ کیا شروع ہوئی، قوم ایک ہوگئی۔‘‘ یہی زندہ قوموں کی نشانی اور یہی اچھی جمہوریت کا تقاضا ہے۔
جاپان کی جارحانہ پیش قدمی کے وقت چین میں مزاحمتی سیاست میں سرگرم کمیونسٹوں کی ترجیحات کا یکسر بدل جانااور پھر 1965کے معرکے میں محترمہ فاطمہ جناح کے حمامیوں کا جیتنے والے مخالف امیدوار کی درخواست پرفوراً ایک ہوجانا، در اصل خاص نظریاتی رویے ہیں۔ جمہوری نظام یا سیاسی رویوں میں جمہوری مزاج کا فروغ فطری طور پر نظریاتی روایات کی بنیاد بنتا ہے ۔بات اگرچہ بہت سادہ ہے، لیکن گزشتہ اکہتر برسوں میں اس بات کو سمجھنے والے یا تو ایوان اقتدار سے باہر دکھائی دیتے رہے ہیں یا ایوانوں میں داخل ہوتے ہی وہ مکمل طور پربدل جایا کرتے ہیں۔

(ایمرا نیوز)

ویسے تو میں ذاتی طور اپنا ’’دوسرا گال پیش کرنے‘‘ کے حق میں ہوں یعنی کہ جیسے یسوع مسیح نے کہا تھا کہ اگر کوئی تمہارے ایک گال پر تھپڑ مارے تو دوسرا بھی آگے کردو لیکن جس ملک میں رہتا ہوں میں وہاں تھپڑ کیا کسی کو چھونا بھی تشدد اور حملے کی نیت جیسے جرم کےزمرے میں آتا ہے۔ لیکن جس سماج اور ملک سے میں آیا ہوں، پیدا ہوا اور پلا بڑھا ، وہاں تھپڑ کی ایک پوری عمرانیات اور تاریخ ہے۔ پیارے پاکستانی سماج میں طاقتور کمزور کو، بڑا چھوٹے کو، با اختیار بے اختیار کو، مرد عورت کو، استاد شاگرد کو، بڑی یعنی مہنگی گاڑی والا سستی گاڑی والے کو بدقسمتی سے تھپڑ رسید کرتا رہتا ہے۔ کئی تھانیداروں نے تو گناہ بے گناہ لوگوں کو تھپڑ مارنے میں گویا پی ایچ ڈی کر رکھی ہوتی ہے۔ اور کبھی کبھی کمزور طاقتور کو یا ہم پلہ طاقتور دوسرے ہم پلہ طاقتور کو تھپڑ مار بھی دیتا ہے تو پھر کہانی بدل بھی جاتی ہے۔ لیکن یہ کوئی اچھا عمل نہیں ۔ قبیح اور مجرمانہ عمل ہے۔ توہین انسانیت ہے۔
لیکن ایک ایسی سوسائٹی جہاں ٹیلیوژن سوپ اوپیراز میں یا ڈراموں میں مرد عورت کو تھپڑ مارتا دکھایا جاتا ہو اور دیکھنے والے پاپ کارن کھاتے یا چائے کافی سے گھونٹ بھر رہے ہوتے ہیں۔ دوسرے لفظوں میں گھریلو یا ازدواجی تشدد کے تصور کو گویا ڈرائنگ روم پذیرائی حاصل ہو جاتی ہے۔
تو پس عزیزو اسی لیے جب حالیہ انتخابات میں کراچی کے نارتھ ناظم آباد کے صوبائی اسمبلی کے حلقے سے عمران خان کی پارٹی پاکستان تحریک انصاف (پی ٹی آئی) سے جیت کر آنیوالے رکن عمران علی شاہ نے ہمراہ پولیس پروٹوکول و سیکورٹی کے کراچی کی ایک شاہراہ پر غریب نہتے شریف سوزوکی کار ڈرائیور پر تھپڑوں کی بارش کردی تو مجھے یہ پاکستانی سماج کی عمرانیات، سیاسیات اور تاریخ میں تھپڑ فیکٹر یاد آگیا۔ یہ ایک نہ فقط بے ہودہ بلکہ شرمناک اور قابل دست اندازی جرم ہے ہر ایسی موٹی بلیوں کے گلے میں کون گھنٹی باندھے گا کون۔ کہ جن کے لیڈر نے بھی لائیو ٹی وی شو میں مخالف سیاستدان پر اسکے پارٹی رہنما کے ہاتھوں تھپڑ پر داد دی تھی۔ ایسا ہی ایک شرمناک واقعہ آپ کو یاد ہوگا جب ٹنڈو محمد خان میں حکمران پی پی پی کی وحیدہ شاہ نے ضمنی انتخابات کے موقع پر پولنگ اسٹیشن کے اندر خواتین پریذائڈنگ افسر اور دیگر پولنگ عملے کو تھپڑ مارے تھے۔ وحیدہ شاہ بہرحال قانونی سزا سے نہیں بچ سکی تھیں۔
ایک اور واقعہ ماضی بعید سے آپ کو سناتا چلوں کہ جب سندھ میں حر بغاوت کے دوران پیرپگارو صبغت اللہ شاہ سینئر کو انگریز حکومت نے دوسری بار قید کیا ہوا تھا اور ان پر قتل و بغاوت کا مقدمہ چلایا گیا تھا جس میں ان کو بعد میں پھانسی دے دی گئی تھی۔ ان کے دونوں بیٹوں سکندر شاہ اور نادر شاہ کو جن کی عمریں ا س وقت چودہ اور تیرہ سال ہوں گی ،کو اپنی تحویل میں لیکر جلاوطن کر رہے تھے پہلے دہلی، علی گڑھ اور پھر برطانیہ۔ تب یہ دونوں بچے اپنی حویلی کی در و دیوار سے الگ نہیں ہونا چاہتے تھے ان پر ایک خلیفہ علی بخش جونیجو اتالیق مقرر کیا گیا تھا۔ یہ بچے زارو قطار رو رہے تھے تو ان کو زبردستی اسی خلیفے نے تھپڑ مار کر جیپ پر سوار کرایا تھا۔ یہ واقعہ حر تحریک پر تحقیق کےدوران مجھے اس وقت چند چشم دید سینئر حروں نے سنایا تھا اور دوسروں نے اس کی تصدیق کی تھی۔ بعد میں علی بخش جونیجو انیس سو 74میں سانگھڑ شہر میں قتل ہوگیا تھا جس کا الزام بھی جام صادق علی پر لگا تھا۔
تھپڑ کی عمرانیات اور تاریخ
بہت کم لوگوں کو معلوم ہوگا کہ اپنی زندگی اور جلاوطنی کا بڑا حصہ پی پی پی اور بھٹو فیملی کو دینے والا جام صادق علی آخر کار سندھ میں پی پی پی والوں کے خلاف ضیا الحق جتنا یا اس سے بھی کئی حالات میں دو سو گز آگے کیوں نکل گیا تھا؟ اس کی وجہ بھی بوڑھے اور جاگیردار جام کو بینظیر کی قریبی طاقتور شخصیت کے ہاتھوں لگنے والا تھپڑ تھا۔ بینظیر کے پہلے دور حکومت میں جب بینظیر بھٹو نے کابینہ میں ردوبدل کیا تو اس ردوبدل میں جام معشوق کو دوبارہ وزیر نہیں لیا گیا تھا جسکا شکوہ لیکر جام اسلام آباد میں اس طاقتور شخصیت کے پاس گیا تھا۔ جام کی اپنی مخصوص لغت اور طنز پر مرد حر غصہ کھا گیا تھا اور اس نے جام کو ایک تھپڑ جڑ دیا تھا۔ جام نے وہاں سے نکلتے ہی اپنی گاڑی سے پی پی پی کا جھنڈا اتا رکر ڈیش بورڈ میں رکھ دیا تھا۔ جب اگست نوے کے پہلے ہفتے کی شروعات میں جام ایوان صدر میں اسوقت کے صدر غلام اسحاق خان سے ملنے گیا تھا تو یہ ملاقات رپورٹ کرنے میں بینظیر کی انٹیلی جنس بیورو سراسر ناکام رہی تھی۔ پھر چھ اگست انیس سو نوے کو بینظیر بھٹو کی حکومت غلام اسحاق خان کے ہاتھوں برطرف ہونے پر جام سندھ کے نگران وزیر اعلیٰ کا حلف اٹھا رہا تھا۔ باقی سب تاریخ ہے۔ بہرحال بینظیر نے ایسے واقعے کی تردید کی تھی کہ مرد حر ایسے نہیں ہو سکتے۔
آپ نے یہ بھی وڈیو دیکھی ہوگی جس میں سندھ کے سابق وزیر اعلیٰ ارباب غلام رحیم براجمان اقتدار تھے تو وہ بنفس نفیس ایک سرکاری ملازم( شاید محکمہ اطلاعات کا اہلکار) کو تھپڑ مار رہے تھے۔ وہاں کئی اعلیٰ عملدار خاموش تماشائی کھڑے تھے۔ قانون پسند و مہذب معاشروں میں چاہے کوئی کتنا طاقتور اس طرح کی حرکت کسی پولیس والے کی موجودگی میں کرے تو فوری پکڑ سے بچ نہیں سکتا۔ یہ بھی انتہائی غلط اور قابل مذمت عمل ہے جب ارباب رحیم حکومت میں نہیں رہے تو سندھ اسمبلی کی عمارت کے اندر پی پی پی کی طلبہ تنظیم سپاف یا سندھ پی ایس ایف کے آغا جاوید نے انہیں جوتا رسید کیا تھا۔
ایک تھپڑ پولیس افسروں کو میرمرتضی بھٹو نے مارا تھا اور سندھ کے وزیر اعلیٰ عبداللہ شاہ کو گلے سے پکڑا تھا۔ مرتضی بھٹو کی بھی لوگوں کو دوست ہو کہ دشمن تھپڑ مارنے کی عادت تھی۔ پھر آپ نے دیکھا کہ بات کہاں سے کس سانحہ تک گئی۔ نثار کھوڑو کو دو ہزار آٹھ کے لاٖڑکانہ میں انتخابات کے موقع پر مرتضیٰ بھٹو کے کارکنوں نے تھپڑ مارا تھا۔
ایک تھپڑ کی باز گشت اب تک سنائی دیتی ہے جب ذوالفقار علی بھٹو کے دور حکومت میں سندھ یونیورسٹی جامشورو میں انیس سو تہتر کے کانووکیشن پر آئین کے خلاف احتجاج کرنے والے جئے سندھ اسٹوڈنٹس کے کارکنوں کے ساتھ تلخ کلامی کے بعد ایک نوجوان اسماعیل وسان نے اس وقت کے وزیر قانون عبدالحفیظ پیرزادہ کو تھپڑ مار دیا تھا۔ اسماعیل وسان سمیت جئے سندھ کے کارکنوں اور کئی لیڈروں پر ریاستی تشدد اور ان کے والدین اور اہالیان خانہ پر جیلوں کے دروازے کھول دئیے گئے تھے۔ بھٹو دور ختم ہوا۔ پھر وہی عبدالحفیظ پیرزادہ اسی انیس سو تہتر کے آئین کے مخالف ہوکر سندھی بلوچ پشتون فرنٹ کے بانی کار بنے۔ اسی پر سندھی قوم پرست دانشور اور بلا کے مقرر حفیظ قریشی نے پیرزادہ سے کہا تھا :اگر اب تمہیں وہ لڑکا ملے اسے دو تھپڑ جڑ دینا کہ اب تم آئین کے مخالف اور اسماعیل وسان اس پارٹی مسلم لیگ کا رکن ہے جو آ ئین پر یقین رکھتی ہے۔ دونوں عمل غلط گردانے جائیں گے کہ تھپڑ پیرزادہ وسان کو مارتا یا وسان نے پیرزادہ کو مار کر کوئی ہیروپن نہیں کیا تھا۔
تھپڑ کی عمرانیات اور تاریخ
ویسے تو مارچ 1971ء میں دھان منڈی ڈھاکہ میں شیخ مجیب الرحمان کی گرفتاری کے وقت اور اکتوبر انیس سو ننانوے میں شہباز شریف کی گرفتاری کے وقت بھی تھپڑ کے حوالے آتے ہیں لیکن غیر مصدقہ۔
شاید یہ تمام اسلامی دنیا کا المیہ ہے مظلوموں پر ظلم کا کلچر کہ کوئی اور بات اس کا خوبصورت اظہار مصطفیٰ زیدی نے کیا تھا:
جس ہاتھ سے تھپڑ پڑا وہ ہاتھ اک کردار تھا
عارض سکینہ کے نہ تھے تاریخ کا رخسار تھا
(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائے دیں 00923004647998)

(ایمرا نیوز)
جوش نے کہا تھا کہ ’’سیاست انبیاء کا میدان ہے‘‘ یہ جہاں بانی و جہانگیری کا نام ہے لیکن افسوس ہمارے یہاں سیاست کو اس قدر بدنام کر دیا گیا ہے کہ جیسے اس کا دوسرا نام کرپشن، بددیانتی، بے ایمانی، بے وفائی، دھوکہ دہی یا جھوٹ اور کہہ مکرنی ہو۔ جس طرح ہر شعبہ حیات میں کچھ کالی بھیڑیں یا گھس بیٹھیے ہوتے ہیں اسی طرح کارزارِ سیاست بھی ان ’’ہستیوں‘‘ سے محروم نہیں ہے۔ میڈیکل کے مقدس شعبے میں اگر ڈاکٹرز کی جگہ عطائی ہو سکتے ہیں تو میدانِ سیاست میں اسی نوع کے اناڑی کیوں نہیں ہو سکتے اور وہ منفی ہتھکنڈوں کو استعمال کرتے ہوئے نسبتاً بڑی بڑی پوسٹوں پر بھی براجمان ہو سکتے ہیں۔ پاکستان جیسے ملک میں جہاں سیاست کو مذموم مقاصد کے تحت گالی بنا کر پیش کیا جاتا ہے اور جینوئن سیاستدانوں یا قومی قائدین کو کارنر کرنا یا اس مقدس ایوان سے آؤٹ کرتے ہوئے جیلوں میں بھیجنا حب الوطنی کے سرٹیفکیٹ بانٹنے جیسا خیال کیا جاسکتا ہے وہاں اس خلا کو گھس بیٹھیوں کے ذریعے پُر کرنا کوئی اچھنبے کی بات نہیں ہے کیونکہ طاقتور کے سامنے کسی بھی قومی ایشو پر جو سٹینڈ ایک جینوئن پاپولر حمایت سے جیتنے والا لے گا وہ کسی کٹھ پتلی یا اناڑی کے بس میں نہیں ہو گا۔ ہماری سیاسی تاریخ کا یہی المیہ رہا ہے کہ بیساکھیوں کے سہارے آنے والوں نے بھی شعوری منازل طے کرتے ہوئے جب اپنی ٹانگوں پر کھڑے ہو کر پاؤں جمانے اور حقیقی مطالبات منوانے کی کوشش کی تو انہیں راندئہ درگاہ قرار دے دیا گیا۔
پاکستان بننے کے بعد سے ہم آج تک جناح صاحب کی پہلی تقریر کا رونا روتے چلے آرہے ہیں، وہ تقریر جواُن کے سیاسی آدرشوں کی تمہید یا تفسیر تھی وہ اس نئی مملکت کی بنیادیں کس طرح استوار کرنا چاہتے تھے ان کی جھلک اُن کی یہی تقریر تھی مگر افسوس اُن کی اس جوہری تقریر کو اس وقت کی اسٹیبلشمنٹ کیا خود ان کے اپنوں نے بھی کبھی حقیقی اہمیت کے قابل نہیں سمجھا۔ پاکستان میں الیکشن کے جو نتائج آئے ہیں اُن پر اگرچہ اعتراضات بھی ہیں اس سب کے باوجود جیتنے والی پارٹی کے لیڈر نے اپنی پہلی تقریر میں جو مثبت باتیں کیں پوری دنیا میں انہیں سراہا گیا مگر افسوس اس تقریر پر جو تبصرہ ہماری سماعتوں تک پہنچا وہ یہی تھا کہ وہ تقریر تو محض سیاسی تھی یعنی اس میں ظاہر کیے گئے عزائم اور وعدے محض جھوٹ تھے جن کی کوئی قانونی یا عملی حیثیت نہیں۔ اس کے بعد عام لوگ قومی سیاست کے دعوئوں کو 35 پنکچرز کے واویلے کی طرح کیوں نہیں دیکھیں گے؟
سیاست بلاشبہ کسی جمود کا نہیں لچک کا نام ہے جس میں کامیابی یا حصولِ اقتدار کے لیے مختلف النوع چالیں بھی چلنا پڑتی ہیں لیکن سیاسی چالوں اور بے اصولیوں یا کہہ مکرنیوں میں فرق ملحوظ خاطر رہنا چاہیے۔ ایک مدبر یا مفکر آنے والی صدیوں کو دیکھتا ہے جبکہ ایک سیاستدان آنے والے دنوں پر نظر رکھتا ہے ایک کامیاب سیاستدان وہی سمجھا جاتا ہے جو انتخابی سیاست میں کامیابیاں سمیٹنے کی صلاحیت رکھتا ہو اس کے لیے اُسے بارہا تلخ سمجھوتے بھی کرنے پڑتے ہیں لیکن بڑا سیاستدان یا قومی قائد صرف وہی کہلا سکتا ہے جو ہنگامی سیاسی کامیابیوں سے اوپر اٹھ کر وسیع تر قومی و عوامی مفاد میں فیصلے کرنے کا وژن اور حوصلہ رکھتا ہو چاہے وقتی طور پر اُسے ناکامی کو سہنا پڑ جائے لیکن مابعد وقت اُس کی دانائی اور عظمت کو سلام پیش کرے۔ تاریخ میں جن سیاسی قائدین نے بلند مقام حاصل کیا وہ ابن الوقت نہیں ابو الوقت تھے۔ مہاتما گاندھی اور ابراہام لنکن جیسے عظیم سیاستدانوں نے اگرچہ اپنے مشن کی تکمیل میں اپنی جانیں گنوا دیں مگر انسانی تاریخ بلا تمیز اُن کی پر عظمت جدوجہد کو ہمیشہ سلامِ عقیدت پیش کرتی رہے گی۔
ہمارے اپنے ملک پاکستان کی تاریخ بڑی درد ناک ہے یہاں مذموم مقاصد کے تحت بانی پاکستان کی جینوئن سوچ اور اپروچ کو باشندگانِ پاکستان کے سامنے اجنبی بنا کر رکھ دیا گیا آج ہم اپنے قائد کی حقیقی زندگی کے بارے میں کچھ لکھنا یا بولنا چاہتے ہیں تو حیرت سے دیکھا جاتا ہے کہ یہ آپ کیسی باتیں کر رہے ہیں یہ تو ناقابلِ اشاعت ہیں۔ قائد نے کس کے متعلق زیارت میں یہ کہا تھا کہ ’’فاطی یہ میری عیادت کے لیے نہیں آیا بلکہ دیکھنے آیا ہے کہ بڈھا کب مرنے جا رہا ہے۔‘‘ مابعد خود فاطمہ جناح پر ملک دشمن اور بھارتی ایجنٹ ہونے کے جو الزامات عائد کیے گئے اور انہیں جس ظالمانہ دھاندلی کے ساتھ ایوب خان نے ہرایا کیا یہ سب ہماری تاریخ کا حصہ نہیں ہے۔
ماضی کو چھوڑیں آج کیا ہو رہا ہے تین مرتبہ منتخب ہونے والے قومی قائد کو متعدد الزامات کے تحت بیٹی کے ہمراہ جیل میں بند کیا ہوا ہے۔ آپ تمام الزامات کو حقیقی قرار دیتے ہوئے اس سے لاکھ اختلاف کریں لیکن وہ لاکھوں کروڑوں پاکستانیوں کا محبوب رہنما ہے۔ مانا کہ نیب نے سزا دی ہے کیا ابھی اس کی اپیلیں نہیں چل رہی ہیں؟ ضمانتیں تو قاتلوں اور آئین شکنوں کی بھی ہو جاتی ہیں سینکڑوں انسانوں کے قاتل اور دہشت گرد یہاں دندناتے پھر رہے ہیں، دو مرتبہ آئین توڑنے والے کو یہاں کوئی پوچھنے والا نہیں ساری برق گرتی ہے تو بیچارے سیاستدانوں پر۔ بادی النظر میں انصاف کا تقاضا تو وہی تھا جو مولانا فضل الرحمٰن چاہتے تھے کہ انتخابی بے ضابطگیوں کے خلاف اٹھ کھڑا ہوا جائے اس سے پہلے کم ازکم مسلم لیگ ن، دھاندلی کے ایشو پر اپنے تمام گورنرز، سپیکرز اور صدر سے فوری احتجاجی استعفے دلواتی۔ کم ازکم آپ لوگ ظلم کے خلاف اپنی چیخ تو سناتے اپنے لاکھوں کارکنان کے ساتھ ایک مرتبہ جیلیں تو بھرتے لیکن یہ سب اُس وقت ممکن ہوتا ہے جب آپ کے پاس روایتی کے بجائے انقلابی قیادت موجود ہو جس کی بلند پروازی دوسری سیاسی پارٹیوں کو بھی ساتھ لے کر چلنے کی وسعت رکھتی ہو جبکہ یہاں تو آپ کے اپنے اندر اتنا حوصلہ بھی نہیں کہ وزارتِ عظمیٰ کے عہدے پر شکست کھانے کے لیے اپنی بجائے اپنی پارٹی کے کسی دوسرے رہنما کو آگے کردیں چہ جائیکہ دوسری اتحادی جماعت کی دلجوئی کرتے ہوئے ان میں سے امیدوار کھڑا کریں۔ اگر سیاسی بلوغت ہوتی تو روایتی اپروچ کی بجائے اس سے آگے کا سوچا جاتا۔
مسلم لیگ ن کے موجودہ صدر شہباز شریف بلاشبہ بڑے اچھے ایڈمنسٹریٹر ثابت ہوئے ہیں پنجاب حکومت کو انہوں نے جس خوش اسلوبی سے چلایا اور جتنے بڑے ترقیاتی منصوبے مکمل کیے وہ سب قابلِ ستائش ہی نہیں مثالی ہیں مگر بطور قومی سیاستدان کارکردگی دکھانا ایک مختلف چیز ہے۔ نواز شریف کی پاپولر قیادت جس کے پیچھے ن لیگ کا پورا ووٹ بینک ہے وہ ازخود گرفتاری دینے کے لیے لاہور ایئرپورٹ پہنچ رہے تھے عین اس وقت کارکنان کے عوامی جذبات کو کس بے دردی سے کچلا گیا۔ انتخابی بے ضابطگیوں کے خلاف الیکشن کمیشن کے سامنے جو علامتی احتجاج ہونے جا رہا تھا اُس میں بھی عدم شرکت ہوئی۔ اور اب اسمبلی اجلاس کے موقع پراحتجاج کی کوئی ایک آواز نہیں اٹھی۔ حضور احتجاج تو زندگی کی علامت ہے مردے کو چاہے چارپائی پر رکھو یا پھٹے پر ڈالو اُسے کوئی فرق نہیں پڑتا۔ کیا بہتر نہیں ہو گا کہ ن لیگ کم از کم قائدِ حزب اختلاف کے لیے خواجہ آصف یا احسن اقبال ہی کو لے آئے جب آپ لوگ دوبارہ اقتدار میں آئیں تب دوبارہ اپنے بہترین منتظم یا ایڈمنسٹریٹر کی خدمات سے مستفید ہوں پارٹی کہیں نہیں چلی جائے گی۔ یاد رکھیے اگر آپ لوگ اپنے لوگوں کے جذبات کا خیال نہیں رکھیں گے تو پھر کامیابی آپ لوگوں سے روٹھ جائے گی ۔ مدبر سیاستدانوں کو ہنگامی و وقتی مفادات سے اوپر اٹھ کر وسیع تر عوامی مفادات کی فکر کرنی چاہیے۔ اگر سیاست میں زندہ رہنا ہے اور آگے بڑھنا ہے تو پی پی کی دلجوئی کرتے ہوئے وسیع تر ڈیمو کریٹک الائنس کا اہتمام کیجیے، چاہے اس کی قیادت مولانا صاحب کو دینی پڑے۔(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

پورے پاکستان میں ہرشہر ہر قصبہ ہر گائوں کی سڑکوں۔ راستوں اور پگڈنڈیوں پر یورینیم بکھرا پڑا تھا۔ اور اپنی افزودگی کے لئے کسی ڈاکٹر عبدالقدیر خاں کو پکار رہا تھا۔
14؍اگست جب بھی آتی ہے۔ واہگہ سے گوادر تک سب پاکستانی اسے سال میں ایک اپنا دن سمجھ کر گھروں سے باہر نکل آتے ہیں۔ اکیلے نہیں۔ سب گھر والوں کو ساتھ لے کر۔ سبز پرچم کے سائے میں ، ہاتھوں میں پرچم ستارہ و ہلال۔ چہروں پر سبز جھنڈا۔
کراچی کی خیابان اتحاد واقعتاً اتحاد کا استعارہ بن جاتی ہے۔ یہ دیکھئے چھوٹی سی گاڑی۔ ائیرکنڈیشنڈ نہیں ہے۔ اس میں گاڑی والے کی ماں بھی ہے۔ سہاگن بھی۔ بچے بھی۔ سب ہرے رنگ میں ملبوس ہیں۔ چھوٹی چھوٹی جھنڈیاں ہاتھوں میں۔ یہ گاڑی ایک ٹھاٹھیں مارتے سمندر کا ایک قطرہ ہے۔
یہ موٹر سائیکل ایک پورے کنبے کو لے کر چل رہی ہے۔ آگے بھی بچے بچیاں۔ بچے بھی۔ بیگم بھی۔ سب ہرے رنگ میں کسی نے ہرےرنگ کی قمیص پہنی ہے۔ کسی نے ٹی شرٹ۔
یہ نوجوانوں کی ٹولی۔ ہری ٹی شرٹوں میں۔ ایک ایک موٹر سائیکل پر دو تین۔ نوخیز۔ نوجوان۔ میرے اور آپ کے پاکستان کا توانا مستقبل۔ ہر موٹر سائیکل پر ایک سبز پرچم۔ دو تین موٹر سائیکل ساتھ اور ایک بہت بڑا پرچم مشکل سے سنبھالے ہوئے۔
پورے کراچی میں منی پاکستان میں ساری شاہراہوں۔ سڑکوں پر یہی عالم ہے۔
کراچی میں نہیں لاہور۔ ملتان۔ حیدرآباد۔ سکھر۔ پشاور۔ مردان۔ کوئٹہ۔ گوادر۔ سیالکوٹ۔ فیصل آباد۔ اسلام آباد سب جگہ پاکستانی خاندان باہر نکلے ہوئے ہیں۔ یہ 14؍اگست ہے۔ آج کے دن یہ آزاد وطن ہم نے قائد اعظم محمد علی جناح کی بے لوث قیادت میں حاصل کیا تھا۔ عظیم لیڈر، جس پر کرپشن کا کوئی داغ نہیں تھا۔ جو جذباتی مسلمان نہیں تھا۔ جو جاگیردار تھا نہ سردار۔ وہ نہ جھکتا تھا نہ بکتا تھا۔ اگر وہ نہ ہوتا تو شاید برصغیر کے مسلمانوں کو الگ وطن نہ ملتا۔
یہ بچی چھوٹی سی بچی۔ کتنی خوش ہے۔ چہرے پر پاکستانی پرچم۔ ہاتھ میں جھنڈی۔ چوڑیاں بھی سبز رنگ کی۔ اس کے بہن بھائیوں کے چہروں پر بھی وہی تسکین ہے۔
یہ پاکستانی قوم ہے۔ غریب۔ مقروض۔ بے روزگاری کی شکار۔ ہر روز مشکلات سے گزرتی ہے۔ اس کے لیڈر بہت خوشحال ہیں۔ اربوں روپے کی کرپشن کرتے ہیں۔ پھر بھی اپنے آپ کوقیادت کا اہل سمجھتے ہیں۔ لیکن آج سب پاکستانی سب کچھ بھول کر آزادی کا جشن منانے نکلے ہیں۔ انہیں پتہ ہے کہ ٹریفک جام ہوں گے۔ کئی کئی گھنٹے سڑکوں پر گزریں گے۔ گاڑیاں بند بھی ہوجائیں گی۔ لیکن اپنے جذبات کے اظہار کا یہی دن ہے۔ کوئی پی ٹی آئی، کوئی پی ایم ایل ن، کوئی پی پی پی، کوئی ایم کیو ایم، کوئی جے یو آئی، کوئی بی پی این، کوئی بی اے پی نہیں ہے۔ آج سب پاکستانی ہیں۔
کچھ من چلے پورا ٹرک کرائے پر لے کر اس پر بڑے بڑے اسپیکر لگا کر ملی نغمے بلند کررہے ہیں۔ جب موقع ملتا ہے۔ ٹرک سے اتر کر رقص بھی کرلیتے ہیں۔ یہ رقص آزادی ہے۔
آج کچھ جذبہ مختلف لگ رہا ہے۔ اس 14؍اگست پر کوئی باقاعدہ حکمراںنہیں ہے۔ نگراں حکومت ہے جو چند روز بعد رخصت ہوجائے گی۔ کوئی مانے نہ مانے۔ آج اس پرجوش قوم میں کرپشن سے نجات کا احساس بھی ہے۔ عوام باشعور ہیں۔ عوام سمجھدار ہیں۔ ہمیں اندازہ نہیں ہوتا کہ وہ کس بات سے خوش ہیں بعض چھوٹے موٹے واقعات بھی ان کے دل میں سکون پھیلا دیتے ہیں۔ ان سب نے پی ٹی آئی کو ووٹ نہیں دئیے۔ لیکن آج سب کی امیدیں نومنتخب حکومت سے ہیں۔ 14؍اگست پہلے بھی آتی رہی ہے۔ پہلے بھی جوش و جذبہ اسی طرح رہا ہے۔ لیکن آج یہ جذبہ فزوں تر ہے۔ ایک احساس ہے تبدیلی کا۔ نئے موسم کا۔ نئے حالات کا۔
دو پارٹیوں کی باریاں لد چکیں۔ اب نئے لوگوں کی آزمائش ہے۔ نئے انداز حکمرانی کا تقاضا ہے۔ پچھلے چالیس سال اور بالخصوص گزشتہ 10سال کی حکمرانیوں نے ملک میں جو بحران پیدا کئے۔ قرضے چڑھائے ادارے تباہ کئے۔ کلیدی عہدوں پر نااہل منظور نظر افراد بٹھائے۔ سرکاری کارپوریشنوں کی بدانتظامی اور بدعنوانی نے سیکڑوں ارب روپے کےخسارے کا بوجھ بڑھا دیا ہے۔ اب سفید شلوار قمیص اور واسکٹ مانگ کر تصویر اتروانے والے۔ مگر کروڑوں نوجوانوں کے آئیڈیل عمران خان پر پہلے حکمرانوں سے کہیں زیادہ بار گراں ہے۔ نواز شریف آصف زرداری سے زیادہ مسائل کا سامنا ہے۔ ادارے زیادہ ابتر حالت میں ملیں گے۔ اس لئے پہلے حکمرانوں کی نسبت زیادہ استعداد۔ زیادہ صلاحیتوں کا تقاضا ہے۔ اچھی بات یہ ہوگی کہ اسٹیبلشمنٹ ساتھ ہے۔ پھر اکثریت کی حمایت کی ایک ہیبت بھی ہے۔ پہلے چھ سات ماہ میں ہی بہت کچھ کرنا ہوگا۔
14؍اگست کو پورے پاکستان میں بزرگوں۔ نوجوانوں۔ مائوں بہنوں۔ سہاگنوں۔ بچوں بچیوں نے جس مثبت جوش اور جذبے کا مظاہرہ کیا ہے۔ جنہوں نے پی ٹی آئی کو ووٹ دئیے وہ بھی تھے۔ جنہوں نے دوسری پارٹیوں کوووٹ دئیے۔ وہ بھی ان جلوسوں میں تھے۔ خوبصورت بات یہ کہ ان جلوسوں کی قیادت کوئی نہیں کررہا تھا۔ یہ لوگ کسی سیاسی ٹھیکیدار سے کرایہ لے کر نہیں نکلے تھے۔ یہ سب اپنے خرچ پر۔ اپنی گاڑیوں۔ موٹر سائیکلوں میں پیٹرول ڈلواکر۔ خود پرچم جھنڈیاں۔ باجے خرید کرسڑکوں پر آئے تھے۔ یہ جیتنے والے ان ہارنے والوں کو بتا رہے تھے کہ ہم ایک ہیں۔ ہم متحد ہیں۔ اگر پاکستان کا نام ہے۔ پاکستان کا مفاد ہے تو ہم سب ایک ہیں۔ ہمارا پرچم ایک ہے۔ ہمارا لیڈر قائد اعظم ایک ہے۔
پہلے حکمرانوں نے 14؍اگست کے اس جذبے کو سمجھنے کی۔ قدرکرنے کی کوشش نہیں کی۔ پاکستان کا مفاد ہوتو یہ قوم اپنی مصیبتوں۔ مشکلوں کو بھول جاتی ہے۔ اس کا مظاہرہ زلزلوں۔ سیلابوں اور دوسرے سانحوں میں ہوچکا ہے مگر بدقسمتی سے ہمارے پیشہ ور روایتی سیاسی خاندان۔ قوم کو بھی اپنی عینک سے ہی دیکھتے رہے ہیں۔ قوم کو بکائو مال سمجھ کر قیمتیں لگاتے رہے ہیں۔ کاش وہ 14؍اگست پر قوم کے مزاج کو اس کی روح کو سمجھ کر ان جذبات کو ان بازوئوں کی طاقت کو ایک راستہ دے دیتے۔ اس سیلاب کو ایک دریا میں منتقل کرلیتے، کوئی بڑا ڈیم بناکر اس بہتے قیمتی پانی کو ذخیرہ کرلیتے۔
14؍اگست۔ یہ یورینیم بھی افزودگی چاہتا ہے
آج پھر 14؍اگست کو پاکستان نے یہ احساس دلادیا ہے کہ ہم زندہ دل قوم ہیں۔ ہم ایٹمی طاقت ہیں، ہم میں سے ہر ایک جوہری توانائی رکھتا ہے، ضرورت ہے کسی ڈاکٹر عبدالقدیر خان کی جو ان ذروں کی اس یورینیم کی افزودگی کرسکے، اسے ایٹمی طاقت میں ڈھال سکے، صحیح کرسکے۔ عمران خان بھی عقل کل نہیں ہیں۔ ملک جتنے مسائل اور جتنے قرضوں تلے دبا ہوا ہے ان سے نجات کے لئے اجتماعی قیادت کی ضرورت ہے۔ ایک ایک مخلص پاکستانی کو فیصلوں میں شریک کرنا وقت کا تقاضا ہے۔ کسی ایم این اے ایم پی اے کی گردن میں سریا نہیں آنا چاہئے۔ انہیں احتساب سے گررنا چاہئے۔ عوام انہیں بادشاہ یا بادشاہ کا مصاحب نہیں بناتے ۔ ملک کو آگے لے جانے کے لئے نمائندگی دیتے ہیں۔ عمران خان اس ساری صورت حال میں مرکز و محور ہیں، ان کو سب پاکستانیوں سے طاقت اور توانائی حاصل کرکے کلیدی عہدوں پر اہل افراد متعین کرکے اس طاقت اور توانائی کو ملک کے ایک ایک شہر کی رگ رگ میں منتقل کرنا ہے۔

(ایمرا نیوز)
سابق چیف جسٹس ناصر الملک نگراں وزیر اعظم بنے، جسٹس ریٹائرڈ سردار محمد رضا کو چیف الیکشن کمشنر بنایا گیا، اسی طرح پروفیسر حسن عسکری کو نگراں وزیر اعلیٰ پنجاب بنایا گیا۔ نگراں حکمرانوں اور دوسرے اعلیٰ عہدیداروں میں ان تین شخصیات سے بہت امید تھی کہ وہ اپنی repute کے مطابق انتخابات کو صاف شفاف بنانے میں اہم کردار ادا کریں گے لیکن افسوس کہ ان حضرات نے بہت مایوس کیا۔ محسوس ایسا ہوتا ہے کہ وہ اپنے اپنے CV کو بہتر بنانے کے لیے ان عہدوں پر براجمان رہے ورنہ جو ذمہ داریاں ان کے سپرد کی گئیں تھیں اُنہیں ادا کرنے میں وہ مکمل ناکام رہے۔ اگر چیف الیکشن کمشنر کے بارے میں چیف جسٹس آف پاکستان تک کو کہنا پڑا کہ وہ الیکشن کے دن سو رہے تھے تو نگراں وزیر اعظم تو ایسے محسوس ہوا کہ کہیں گم ہو گئے ہیں۔ نگراں وزیر اعلیٰ پنجاب تو انتخابات میں پارٹی بن کر ابھر آئے اور مخالفین سیاستدانوں پر ریلی نکالنے پر دہشت گردی کے پرچے تک کٹوا دیئے۔ نام تو یہ بڑے بڑے تھے لیکن کسی ایک نے بھی انتخابات میں دھاندلی کے متعلق سنجیدہ الزامات کا جواب دیا اور نہ ہی ان میں سے کسی کو انتخابات سے پہلے، الیکشن والے دن اور اُسی رات کوئی گڑ بڑ نظر آئی۔ الیکشن ایکٹ 2017 کے ذریعے الیکشن کمیشن کو بہت مضبوط بنایا گیا لیکن جسٹس سردار رضا کے ماتحت اس ادارے نے ایسے الیکشن کروائے جوشاید پاکستان کی تاریخ کے سب سے متنازع انتخابات رہے اور اسی بنا پر حتیٰ کہ جیتنے والی تحریک انصاف کے ترجمان نعیم الحق تک کو یہ کہنا پڑھا کہ انتخابات متنازع رہے اور الیکشن کمیشن اپنا کردار ادا کرنے میں کامیاب نہ ہوا۔ نعیم الحق نے کہا کہ نئی پارلیمنٹ میں اُن کی حکومت اور پارٹی الیکشن کمیشن کو بہتر بنانے کے لیے اقدامات کرے گی۔ لیکن میری ذاتی رائے میں مسئلہ قانون کا نہیں بلکہ افراد کا ہے۔ ڈھونڈ ڈھونڈ کر لمبی لمبی مشاورتی میٹنگز کے بعد الیکشن کمیشن کے سربراہ اور ممبران کے علاوہ نگراں وزیراعظم اور وزرائے اعلٰیٰ کو چنا گیا لیکن جب وقت آیا تو صاف اور شفاف انتخابات منعقد کرنے کی جو ذمہ داری اُن پر عائد کی گئی تھی اُس میں وہ مکمل ناکام ہو گئے۔ جب ضرورت تھی اور وقت تھا تو کوئی سو گیا، کوئی گم ہو گیا اور کسی نے تو اپنا رول ہی بدل لیا۔ چند روز دی نیوز اور جنگ میں شائع ہونے والی ایک خبر کے مطابق 90 فیصد سے زائد فارم 45 پر پولنگ ایجنٹوں کے دستخط ہی نہیں پائے گئے۔فخر درانی کی خبر کے مطابق90فیصد سے زائد فارم45 پر پولنگ ایجنٹوں کے دستخط نہیں ہیں۔ یہ وہ معاملہ ہے جو انتہائی سنگین نوعیت کا ہے لیکن الیکشن کمیشن کے ترجمان کا کہنا ہے کہ فارم 45پر پولنگ ایجنٹوں کے دستخط ضروری نہیں کیونکہ فارم پر دستخط کی جگہ ہے ہی نہیں۔ جب ترجمان سے پوچھا گیا کہ الیکشن ایکٹ،2017میں واضح طور پر کہا گیا ہے کہ پریذائڈنگ افسر پولنگ ایجنٹوں کے دستخط لے گا، تو ان کا کہنا تھا کہ پریذائڈنگ افسر کو الیکشن ایکٹ کا علم نہیں ہوگا، اسی لیے انہوں نے فارم 45پر دستخط نہیں لیے۔ سابق اسپیکر ایاز صادق نے کہا کہ الیکشن ایکٹ کے مطابق کسی بھی حلقے میں دوبارہ گنتی کے لیے آر اوز کو اُس وقت لازم حکم دینا ہے جب جیتنے اور ہارنے والے کے ووٹوں کا فرق پانج فیصد یا دس ہزار سے کم ہو لیکن اس کے باوجود آر اوز نے کہیں تو دوبارہ گنتی کی اجازت دی اور کہیں نہ دی۔ ایاز صادق کے مطابق جب انہوں نے الیکشن کمیشن سے بات کی تو جواب ملا کہ آر اوز کو الیکشن ایکٹ کی متعلقہ شق کا علم نہ ہو گا۔ چاہے فارم 45 کا مسئلہ ہو یا دوبارہ گنتی کا معاملہ یہ ناکامی اور ناہلی پریذائڈنگ افسر کی یا آر اوز کی نہیں بلکہ الیکشن کمیشن کی ہے جس نے اس قوم کے بیس ارب انتخابات کو صاف اور شفاف انداز میں کرانے کے لیے تو لے لیے لیکن اپنے عملے کو بنیادی ٹریننگ نہ دی کہ اُنہوں نے الیکشن کیسے کروانا ہے۔ اتنی بڑی بڑی خرابیاں سامنے آئیں لیکن نہ کسی کو معطل کیا گیا نہ سزا دی گئی۔ اس نااہلی اور ناکامی کی سزا تو الیکشن کمشنر اوراس کے ممبران کو ملنی چاہیے لیکن اس کے اپوزیشن تو مطالبات کر رہی ہے لیکن کوئی ذمہ داربولنے پر تیار نہیں۔ یہاں کہا جاتا ہے کہ اداروں کو بنائیں، اُنہیں مضبوط کریں جو درست بات ہے لیکن الیکشن کمیشن اور نگرانوں کے حالیہ رول کو دیکھ کر خیال آتا ہے کہ ادارے بنا بھی دیے تو ایسے افراد کہاں سے لائیں گے جو سچ بولنے کی بھی جرأت رکھتے ہوں اور اداروں کی آزادی اور خودمختاری کا بھی بھرم رکھ سکیں۔(بشکریہ جنگ لاہور)
(کالم نگار کے نام کے ساتھ ایس ایم ایس اور واٹس ایپ رائے دیں 00923004647998)

(ایمرا نیوز)
پہلی مثال احمدی نژاد کی ہے، 2005ء سے 2013ء تک آپ ایران کے صدر تھے، آٹھ برس تک انہوں نے حکمرانی کی، اس سے پہلے وہ تہران کے میئر، مرکزی حکومت میں وزیر اور ایک صوبے کے گورنربھی رہے، اس تمام عرصے میں انہوں نے سادگی کی اعلیٰ روایات قائم کیں، وہ معمولی لباس پہنتے تھے، ایک مرتبہ کسی تصویر میں اُن کا کوٹ پھٹا ہوا دیکھا گیا، بطور صدر انہوں نے اپنی کابینہ کا پہلا اجلاس مشہد میں امام رضا کے مزار پر منعقد کیا، کہا جاتا ہے کہ وہ اپنی کابینہ کے ہفتہ وار اجلاسوں میں بارہویں امام کے لئے جگہ خالی رکھتے تھے، انہوں نے صدر کے لئے مخصوص جہاز میں وی آئی پی نشست استعمال کرنے سے بھی احتراز کیا اور بعد میں اپنے سفر کے لئے کارگو جہاز مختص کر دیا، صدر بننے کے بعد وہ اپنے سادہ سے گھر میں ہی رہنا چاہتے تھے مگر سیکورٹی خدشات کی بنا پر انہیں قصر صدارت میں رہائش اختیار کرنی پڑی تاہم صدارتی محل میں موجود قدیم بیش قیمت ایرانی قالین انہوں نے عجائب گھر بھجوا دیئے اور اپنے لئے ارزاں قالین پسند کئے۔
جناح اور آج کے حکمراں
دوسری مثال ملا محمد عمر کی ہے، صحیح معنوں میں اگر کوئی حکمران اینٹ کو تکیہ بنا کر سونے والے معیار پر پورا اترتا تھا تو وہ ملا عمر تھے، آپ کو افغانستان میں پہلی مرتبہ اُس وقت پذیرائی ملی جب 1994میں انہوں نے اپنے تیس ساتھیوں اور سولہ رائفلوں کی مدد سے اُس افغان جنگجو کو کیفر کردار تک پہنچایا جس نے دو لڑکیوں کو آبروریزی کے بعد قتل کردیا تھا، بعد میں اسی طرح انہوں نے ظالموں کے خلاف جہاد جاری رکھا اور پھر دیکھتے ہی دیکھتے اُن کی حمایت میں اضافہ ہوتا چلا گیا اور ایک سال کے اندر اُن کا نہ صرف قندھار بلکہ ہرات پر بھی قبضہ ہو گیا، 1996میں ملا عمر کے حامیوں نے انہیں امیر المومنین منتخب کر لیا، ملا عمر کے دور میں افیون کی کاشت پر پابندی لگا دی گئی اور ایک اندازے کے مطابق اس کی پیداوار میں 99%کمی واقع ہوئی۔ اپنے پانچ سالہ دور حکمرانی میں ملا عمر کا کوئی قصر صدارت تھا اور نہ ہی کوئی کرو فر، وہ بلٹ پروف مرسڈیز گاڑیوں کے قافلے میں گھومتے تھے اور نہ ہی اعلیٰ کپڑے پہنتے تھے، پر تعیش زندگی کا تصور اُن کے لئے اجنبی تھا۔ تیسری مثال نیپالی وزیراعظم سشیل کوئیرالہ کی ہے، آپ قریباً پونے دو برس تک نیپال کے وزیراعظم رہے، اس سے پہلے 2010سے 2016تک آپ نیپالی کانگریس پارٹی کے صدر بھی تھے، نہایت سادہ انسان تھے، کوئی گھر تھا نہ جائیداد، معمولی لباس پہن کر دفتر آتے، سادہ روٹی کھاتے اور بالکل عام آدمی کی طرح رہتے، ان کے دور میں نیپال کی چاروں بڑی سیاسی جماعتوں نے ملک کو مشترکہ آئین دیا جس کے بعد وہ وعدے کے مطابق اپنے عہدے سے مستعفی ہو گئے، بعد میں انہوں نے انتخاب لڑا مگر انہیں اپنے مدمقابل سے شکست ہو گئی۔
اب ذرا اپنے لیڈر کی بات کرتے ہیں۔ ہمارے لیڈر کا لائف اسٹائل شاہانہ تھا، آپ بیش قیمت گاڑیوں میں گھومتے تھے، شہر کی سب سے مہنگی رہائش گاہ آپ کی تھی جس میں مہنگا ترین فرنیچر تھا، آپ اعلیٰ ترین سوٹ پہنتے، امپورٹڈ سگار پیتے، پرفضا مقامات پر تعطیلات گزارتے اور اشرافیہ کی پارٹیوں میں شرکت کرتے۔ اِس لیڈر کا نام محمد علی جناح تھا۔
یہ درست ہے کہ جناح صاحب یہ تمام خرچ اپنی جیب سے کرتے تھے اور کوئی بھی عیاشی حکومتی خزانے سے نہیں ہوتی تھی مگر یہ بھی درست ہے کہ وہ ملا عمر کی طرح اینٹ کا تکیہ بنا کر سوتے تھے اور نہ احمدی نژاد کی طرح پھٹا ہوا کوٹ پہنتے تھے، سشیل کوئیرالہ کی طرح سستے گھر میں رہتے تھے اور نہ مہاتما گاندھی کی طرح ریل کے تھرڈ کلاس ڈبے میں سفر کرتے تھے۔ اس کے باوجود وہ واحد لیڈر تھے جسے تمام مسلمانوں ،امیر غریب بوڑھے نوجوان، سب نے ووٹ دیئے، انہیں اپنا رہنما منتخب کیا، پاکستان کی باگ ڈور اُن کے ہاتھ میں دی اور انہیں قائد اعظم کا خطاب دیا۔
ہم نے یہ فرض کر لیا ہے کہ ہمارا حکمران اگر سادگی پسند ہوگا تو لازماً نیک نیت بھی ہوگا جبکہ سادگی اور نیک نیتی دو الگ خصوصیات ہیں، ضروری نہیں کہ سادہ طرز زندگی والا حکمران ایک اچھی طرز حکومت کی بنیاد بھی ڈالے، یقیناً سادگی اچھی چیز ہے، خاص طور سے غریب ممالک کے حکمرانوں کے لئے تو لازمی، مگر یہ مسائل کا حل نہیں، ہمارے مسائل ہمالیہ سے بلند ہیں اور انہیں کوئی حکمران محض اِس نیکی کی بنا پر حل نہیں کر سکتا کہ وہ اینٹ کا تکیہ بنا کر سوتا ہے۔ احمدی نژاد، ملا عمر اور سشیل کوئیرالہ یقیناً اپنے اپنے ممالک کے لئے اچھے ہوں گے، نیک نیت بھی ہوں گے مگر آخری تجزیئے میں یہ بات معنی نہیں رکھتی کہ کسی نے بزنس کلاس میں سفر کیا یا کارگو جہاز میں، حتمی فیصلہ اس بات پر ہوتا ہے کہ ملک کے شہریوں کو کیا فائدہ پہنچا۔ اگر آج لوگ کینیڈا، برطانیہ اور امریکہ کی شہریت چھوڑ کر ایران، افغانستان اور نیپال کی امیگریشن کے لئے تڑپ رہے ہیں تو پھر ہمیں مان لینا چاہئے کہ ان تینوں ممالک کو آئیڈیل حکمران نصیب ہوئے اور اگر ایسا نہیں تو پھر مسئلہ پھٹا ہوا کوٹ پہننے سے آگے کا ہے۔ ظاہری سادگی کے علاوہ ہم نے یہ بھی فرض کر لیا ہے کہ نوجوان قیادت ہی بہتر ہو تی ہے، ہم نے یہ بھی فرض کر لیا ہے کہ غریب یا مڈل کلاس ہونا ایمانداری کی دلیل ہے اور ہم نے یہ بھی فرض کر لیا ہے کہ امیر یا کاروباری ہونا کرپشن کی نشانی ہے۔ دراصل یہ تمام مفروضے غلط ہیں، انہیں خود قائداعظم نے غلط ثابت کیا، اُن کی زندگی کسی معیار سے بھی سادہ نہیں تھی، وہ ایک نہایت قابل اور مہنگے وکیل تھے، کروڑوں کی جائیداد انہوں نے ترکے میں چھوڑی (جس میں سے زیادہ تر عطیات میں دے دی، اِس ضمن آپ کی وصیت پڑھنے سے تعلق رکھتی ہے، اِس پر کبھی علیحدہ ایک کالم ہوگا)۔
جناح اور آج کے حکمراں
سوال یہ پیدا ہوتا ہے کہ آخر قائداعظم نے ایسا کیا کارنامہ انجام دیا کہ اُن کے شاہانہ اور مغربی لائف اسٹائل کے باوجود ہندوستان کے غریب مسلمان انہیں اپنا نجات دہندہ سمجھنے لگے، اِن مسلمانوں کو اِس سے کوئی غرض نہیں تھی کہ محمد علی جناح دن میں کتنی مالیت کے سگار پھونک ڈالتا ہے یا کتنے قیمتی سوٹ پہنتا ہے یا کیا کھاتا پیتا ہے! یہ مسلمان صرف ایک بات جانتے تھے کہ جناح نامی یہ شخص اِن کے حق حکمرانی کے لئے لڑ رہا ہے ورنہ انگریز کیا برے تھے، انگریزوں سے اچھی گورننس بھلا کس کی تھی، تاج برطانیہ میں بہرحال قانون کی حکمرانی تھی، کسی پولیس اسٹیشن کی حدود میں جب کوئی جرم ہوتا تو یہ ممکن نہیں تھا کہ مجرم نہ پکڑا جائے، ریلوے نیٹ ورک سے لے کر دنیا کا سب سے بڑا آب پاشی کا نظام اور بیوروکریسی سے لے کر فوج کا سسٹم، سب انگریز نے ہی تو دیا تھا، پھر مسئلہ کیا تھا؟ مسئلہ حق حکمرانی کا تھا جو محمد علی جناح نے ہمیں انگریزوں سے لے کر دیا اور یہی وہ بنیادی نکتہ ہے جو بدقسمتی سے آج اکہترویں یوم آزادی پر بھی غیرمتعلق نہیں ہوا، ہم آج بھی یہ بنیادی سوال طے نہیں کر پائے کہ انگریزوں کے بعد اِس ملک پر حق حکمرانی کس کا ہوگا حالانکہ بانی پاکستان نے یہ بات ہمیں ان الفاظ میں بتائی تھی
With the removal of foreign domination, the people are now the final arbiters of their destiny. They have perfect liberty to have by constitutional means any Government that they may choose. This cannot, however, mean that any group may now attempt by any unlawful methods to impose its will on the popularly elected Government of the day. The Government and its policy may be changed by the voters of the elected representatives…. (Broadcast, Radio Pakistan, Dacca, 28 March, 1948)
محمد علی جناح تو ہمیں یہ دے گئے تھے….. باقی جو مزاج یار میں آئے!(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)
2018کے عام قومی انتخابات کے نتیجے میں عمران خان کی نئی منتخب حکومت کا قیام عمل میں لایا جا چکا ہے۔ ہر نئی منتخب حکومت کے آنے سے پہلے اور آنے کے بعد ہمارے معاشرتی رویے خاص طور پر میڈیا کس قسم کے طرز عمل کا مظاہرہ کرتا ہے، اس کی چند جھلکیاں آئندہ سطور میں پیش کی جا رہی ہیں اور نہایت درد مندی سے تمام طبقوں کو خدا خوفی اور توازن سے کام لینے کی درد مندانہ اپیل کی گئی ہے، گو اس کے اثرات کا ایک فیصد بھی یقین نہیں، بہرحال انسان کو اچھے کاموں میں اپنی چونچ سے پانی کا قطرہ آگ بجھانے کے لئے ڈال دینا چاہئے، باقی دنیا جانے اور دنیا کا خالق! اب آپ اپنے مجموعی طرز فکر اور طرز عمل کی وہ جھلکیاں ملاحظہ فرمائیں جن کا اوپر کی سطور میں اشارہ کیا گیا ہے اور جن کے ہم عادی ہو گئے ہیں۔ ایسے تمام حضرات جنہوں نے پاکستان بننے سے لے کر آج تک قومی خزانے سے کسی نہ کسی شکل میں کوئی بھی مراعات حاصل کی ہوں، وہ ایک سرٹیفکیٹ دیں۔ تجویز کردہ سرٹیفکیٹ یہ ہے ’’میں تصدیق کرتا ہوں کہ میں نے قومی خزانے یا اختیارات و تعلقات کا ناجائز استعمال کر کے کوئی اثاثہ جات نہیں بنائے اور نہ ہی سرکاری فنڈز میں کوئی خورد برد کی ہے۔ اگر ایسا ثابت ہو جائے تو مجھے سزائے موت دی جائے اس سرٹیفکیٹ کو میرے خلاف ثبوت تصور کیا جائے۔‘‘ ان صاحب نے قومی گند صاف کرانے کے لئے ایسی چھلانگ لگائی ہے، جس کی طوالت نے ہمیں لرزے کی ہیجان انگیزی میں مبتلا کر دیا ہے۔ یہ روشنی کی رفتار سے زیادہ سرعت رفتار دکھائی دیتے ہیں۔
کیا ہم کسی کا مضحکہ اڑا رہے ہیں۔ ایسا ہرگز نہیں، ہمیں اس طرح نیت کے ساتھ دوسروں کا مذاق اڑانے کی عادت کبھی نہیں رہی۔ حقیقت میں ہمارے دماغی اوسان خطا کی قید میں ہیں۔ آپ خود سوچیں ہم گزشتہ چند ماہ سے ایسے تحریری دانش مندوں کی زد میں رہے ہیں، جن کے نزدیک قومی مفاہمت، ضمیر فروشی، آئین و قانون کی صبر آزما مسافت، بزدلی اور بین الاقوامی جنگوں میں دیانتدارانہ حکمت عملی بے غیرتی ہے۔ ابھی ہمارے دماغی اوسان اس سطح پر متوازن نہیں ہوئے تھے کہ 25جولائی کو قومی انتخابات انعقاد پذیر ہو گئے اور ایک بار پھر یہی دانش مند ہمارے لئے پیر تسمہ پا بن چکے ہیں، جو 70برس کا قومی گند چند ہفتوں میں ختم کرانے کے لئے ہماری اور قوم کی گردن پر سوار ہیں۔ ان سے رہائی کی کوئی صورت دکھائی نہیں دیتی۔ منتخب حکمران اور سیاستدان ان کا آسان ترین ہدف ہیں، جس کے بعد ان کے لفظی سوداگری کے کاروبار کو چار چاند لگ رہے ہیں۔ ہمارے دل کی گواہی ہمارا پیچھا نہیں چھوڑتی کہ پاکستان کے تمام سیاستدانوں کو ان سے کھربوں میل دور رہنا چاہئے۔ ان کی حسیات میں دھڑکن موجود نہیں۔ آخر اس سارے انتشار فکر اور اختلاخ قلب کی جڑیں کہاں پیوست ہیں؟
قدرت نے ہمیں غور و فکر کی جتنی اہلیت سے نوازا ہے۔ اس کے مطابق ان خبروں کی نشاندہی کچھ اس طرح سے ہوتی محسوس ہوئی ہے کہ ہم خدا کے نہیں تو کم از کم فطری قوانین کے براہ راست دشمن ضرور ہیں۔ ہماری ان سے روبرو جنگ جاری ہے۔ قانون اعتدال و توازن کو تو ہم نے تحت الثریٰ سے بھی کہیں گہری کھائیوں میں دفن کر دیا ہے۔ گرین پاسپورٹ کی حالت زار سے لے کر 25جولائی 2018کے انتخابات تک گزری ہوئی تاریخ ہمارے اعمال اور ہمارے ان متذکرہ دانشوروں کے سینے میں بدنصیبی کی صلیب بن کے پیوست ہو چکی ہے، تاہم انہیں نہ اپنے آپ پر نہ اس ملک اور اس کے سادہ لوح عوام کی اکثریت پر ترس آتا ہے، جن کے اجتماعی شعور نے ان کے تمام تجزیوں، پیش گوئیوں، بڑے بولوں اور زعم پرستیوں کا ہمیشہ جنازہ نکالا۔ ایسا نہ ہوتا تو آج پاکستان پیپلز پارٹی اور عوامی نیشنل پارٹی کم از کم صفحہ ہستی سے مٹ چکی ہوتیں۔ پھر آخر میڈیا کے لافانی ہونے کا اصرار کیوں کیا جاتا ہے؟ محض اپنی نفسانی تسکین کے لئے کیا ہم اس سے تھوڑا سا اِدھر ایسا سانس نہیں لے سکتے، جس سانس میں ملک اور قوم کی فلاح کا کوئی احساس بھی موجود ہو؟ اپنی روٹی روزی کے لئے بارعب اصطلاحات کے آسمانوں پر براجمان ہو کے قومی ارتقاء کے ہر نئے لمحے پر تیر اندازی اور خنجر پھینکنے کا ہنر حب الوطنی کے کس تقاضے کا تقاضا ہے؟
ہم شدت پسند نظریات بازوں اور انشاء پردازی کے ارمان پسندوں پر تبصرہ نہیں کر رہے۔ ہماری پریشان خاطری نے ہمیں اپنی برادری اور دیگر اہل فکر و نظر کے آتش فشانی مزاجوں کو چھونے پر مجبور کر دیا ہے اور اس مجبوری کو پاکستانی عوام سے ہماری محبت نے جنم دیا ہے۔ وہ ہم سے باقاعدہ استفسار کرتے ہیں:’’یہ دانش مند لوگ تو ہمیں کسی بھی مصیبت کے حل پر متفق نہیں ہونے دیتے۔ متفق ہو بھی جائیں تو ان کی بزم آرائیاں ہمارا سکھ چین چھین لیتی ہیں؟ انہیں آپ صبر و حکمت اور تدبر کی تلقین کریں۔‘‘ ان تینوں خیرہ کن صفات کے حوالے سے تو ہم خود شخصی بحران کا شکار رہتے ہیں۔ بہرحال پاکستانی عوام کی اکثریت کے اس نالہ و فغاں کا مطلب یہ ہے کہ شدت پسند نظریات بازوں نے 70برس میں پہلی بار ورطہ حیرت کی علامت بن جانے والے عوامی انتخابی فیصلے کے مقابلے میں قومی اربوں روپیہ لٹا دیا، جس کا آج تک کوئی حساب نہیں ہوا۔ اب چونکہ قومی غربت ہے۔ اس لئے اربوں کھربوں تو نہیں کروڑوں اور لاکھوں روپوں کی شکل میں ذرا مختلف طریقوں سے قومی دولت کا زیاں جاری ہے پاکستان کا واقعاتی اور حقیقی منظر یہ ہے کہ ہماری تیار کردہ پالیسیوں اور مذہبی ایکسپلاٹیشن کی پیداواری فصل مجاہدین پاکستان کے لئے عالمی ایف آئی آر کا سبب بن چکے ہیں۔ قبائلی علاقہ جات، سوات اور پشاور سمیت جہاں جہاں انہیں قدم جمانے کا موقع ملا وہاں وہاں لوگوں کی نارمل زندگی تباہ ہو چکی ان علاقوں سے صاحب حیثیت اور صاحب ذرائع خاندان اور افراد فی الحال سینکڑوں کی تعداد میں کراچی ہجرت کر چکے ہیں۔ سیاسی قیادت کی مومنانہ بصیرت کو اپنے تاریخی فیصلوں اور آفاقی پیش گوئیوں سے کچھ عرصے کے لئے بریت عنایت فرمائیں ہو سکتا ہے پاکستان اور پاکستانیوں کا تصور ہمیشہ کے لئے سنور جائے۔ ہو سکے تو یہ حضرات کانٹ کا یہ قول زبانی یاد کر لیں۔ ’’ہمیں قطعاً معلوم نہیں کہ اشیائے بجائے خود کیا ہیں۔ ان کے متعلق ہمارا علم صرف اشکال تک محدود ہے۔ ہم ’’حقیقت اشیاء کا حقیقت کل‘‘ کا علم کبھی حاصل نہیں کر سکتے۔ یہ ناممکن ہے لیکن یہ نیک شدت پسند نظریات باز پاکستان، عراق، افغانستان کے مسائل تو رہے ایک طرف لوگوں کی عاقبت تک کے قصے سنا دیتے ہیں۔
واقعاتی اور حقیقی منظر، پاکستان کے 70برس کے ماضی میں پوشیدہ ہے۔ یہ ماضی جس میں طالع آزمائوں، عوامی اور آئینی بالادستی کی نرسری شروع ہونے سے پہلے اس پر فوجی شپ کے خون کا بلڈوزر چلایا جا چکا۔ پاکستان کے تمام فوجی وغیرہ فوجی حکمرانوں اور ان کے ادوار میں ایوان اقتدار کی راہداریوں میں فائز ان کے ساتھیوں، حواریوں، طفیلیوں نے پاکستان کے لئے دی جانے والی بین الاقوامی امداد اور خود پاکستان کی اندرونی معیشت سے پاکستانی خزانے میں جمع ہونے والے اربوں اور کھربوں روپوں کی کرپشن کی، دوران اقتدار اپنی آن بان اور لذت حکمرانی کی شان و زیبائش سے بھرپور لطف اندوزی کے لئے ایڑیاں اٹھا اٹھا کے فیصلہ کن قرار دینا چاہئے، نہ ’’اگلے 48گھنٹے اہم ہیں‘‘ جیسی خبری عیاشیاں کرنی چاہئیں پاکستانی اپنے ملک کی فضا کے Clearہونے میں انتظار کی سولی پر لٹکے رہتے ہیں۔ چنانچہ ہمارے سمیت مقدس خطیب قلمکاروں سے لے کر ملک و قوم کی قیمت پر صحافتی چٹخارہ سازی سے گریز کرتے رہے۔ دانش و توازن کی فضا برقرار رکھنا ہو گی۔ پاکستان پر متوقع مصائب کے جو منحوس سائے گہرے ہو چکے ہیں ان کے انسداد کی دعائیں اور تدابیر کرنی ہوں گی۔ چنانچہ ہماری عاجزانہ رائے میں ہر لمحہ نازک آتشیں ہے اور تصادم ہی کا اندیشہ ہے۔ ہم پاکستان کی زہریلی سیاسی تاریخ کے تسلسل سے نمٹ رہے ہیں، یہی پاکستان کا واقعات اور حقیقی منظر ہے۔(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)