Category کالم

(ایمرا نیوز)
اس وقت اُن مسائل پر بات کی جارہی ہے جن کا ملک کے متوقع وزیر ِاعظم عمران خان کو سامنا کرنا پڑسکتا ہے، لیکن اُنہیں حاصل آسانیوں کا تذکرہ نہیں ہورہا ہے۔ مرکز میں کولیشن حکومت جیسے مسائل ، انتخابی نتائج پر دھاندلی کے کھلے الزامات، قومی اسمبلی میں تگڑی اپوزیشن، سینیٹ میں عددی برتری کا نہ ہوناکسی بھی حکومت کے لیے کٹھن مسائل ہوسکتے ہیں۔ اور پی ٹی آئی کی حکومت تو ویسے بھی اصلاحات اور تبدیلی کے ایجنڈے کے ساتھ آگے آئی ہے ۔ لیکن ان مشکلات کے باوجود عمران خان ایک ایسی حکومت کی قیادت کرنے جارہے ہیں جس کا راستہ بہت حد تک آسان اور سیدھا ہے۔
عمران خان کی خوش بختی
سب سے پہلے تو مرکزمیں اُن کی حکومت کو تین صوبوں کی حمایت حاصل ہوگی۔ اس کی ماضی میں کوئی مثال نہیں ملتی ۔ اُن کی پالیسیوں کو ملک گیر سطح پر تعاون میسر آئے گا، خاص طور پر اُس وقت جب اٹھارویں ترمیم نے طاقت کی مرکزیت کوتقسیم کردیا تھا۔ اور پھر کسی جماعت کے پاس بھی ایسی اکثریت اور حمایت نہیں جس کی بازگشت پورے ملک میں سنائی دے ۔ لیکن پی ٹی آئی حکومت کے منصوبوں اور ان کے نفاذ کے لیے اٹھائے گئے اقدامات کو ملک گیر حمایت حاصل ہوگی۔ سندھ میں البتہ پی پی پی کو واضح اکثریت حاصل ہے ، لیکن عین ممکن ہے کہ پی پی پی بعض اہم معاملات پر مرکز میں پی ٹی آئی سے تعاون کرتی دکھائی دے ۔ چنانچہ ملک میں مرکزیت کی ایسی فضا پہلے کبھی دیکھنے میں نہیں آئی ۔
یہ بات درست ہے کہ عمران خان اپنے کولیشن پارٹنرز پرانحصار کرتے ہوئے بمشکل اپنی اکثریت برقرار رکھیں گے، لیکن یہ بھی غلط نہیں کہ دوسری طرف ایسا کوئی متبادل دھڑا موجود نہیں جو ان کی حکومت کی جگہ لے سکے ۔ اس وقت تک ان کے سامنے ایسی کوئی اپوزیشن نہیں جو حکومت سازی کا خواب بھی دیکھ سکے ۔ مستقبل قریب میں ناممکن دکھائی دیتا ہے کہ پی پی پی اور پی ایم ایل (ن) مل کر کوئی ایسا دھڑا بنا پائیں جو عمران خان اور اُن کے کولیشن پارٹنرز کو کسی آزمائش میں ڈال سکے۔
ممکن ہے کہ تھیوری کے اعتبار سے ایسا ہوسکتا ہو لیکن عملی طور پر اس کاکوئی امکان دکھائی نہیں دیتا۔ اس وقت تمام چھوٹی جماعتیں، جیسا کہ ایم کیو ایم اور بی این پی (ایم) پی ٹی آئی کے ساتھ کھڑی ہیں۔
عمران خان کی خوش بختی
ان جماعتوں نے پی ایم ایل (ن) اور پی پی پی کے ساتھ بات تک نہیں کی۔ اور پھر یہ بھی حقیقت ہے کہ پی ایم ایل (ن) نے پی ٹی آئی کو چیلنج کرنے کے لیے حکومت سازی کی کوئی سنجیدہ کوشش کی بھی نہیں۔
جس رفتار سے پنجاب کے تمام آزاد ممبران نے پی ٹی آئی میں شمولیت اختیار کی اور کچھ نے مرکز میں بھی ، اس سے ہمارے وقت کے غالب رجحان کا پتہ چلتا ہے ۔ سیاست کا تجربہ رکھنے والے یہ ماہرین ہواکار خ پہچانتے ہیں۔ وہ جانتے ہیںکہ اس وقت قومی سیاست کا موسم عمران خان کے لیے ساز گار ہے۔ اس کا مطلب یہ ہے کہ عمران خان کو کولیشن پارٹنرز کے مطالبات کا غیر ضروری بوجھ نہیں اٹھانا پڑے گا۔وہ فیصلہ سازی میں کافی حد تک آزاد ہوں گے ۔
عمران خان اور عام طور پر ناقابل ِ اعتبار سمجھے جانے والے کولیشن پارٹنرز کے درمیان تعلق کو مرکزی دھارے کی اپوزیشن کے معاملات مضبوط کریں گے ۔ پی پی پی پر آصف زرداری اور ان کی بہن فریال تالپور کے خلاف مقدمات کا بوجھ ہے ۔ اس کے نوجوان لیڈر، بلاول بھٹو انتخابی نتائج کے بعدسے خاموشی اختیار کیے ہوئے ہیں۔ وہ پی ٹی آئی حکومت کے کاموں میں روڑے اٹکانے کی کوشش نہیں کریں گے ۔ وقتاً فوقتاً پی پی پی شور مچاتے، اور ایک دو پریس کانفرنسیں کرتی دکھائی دے گی، لیکن جب تک مذکورہ مقدمات ہیں، پی پی پی کی طرف سے راوی چین ہی چین لکھتا ہے۔ یہ مرکز میں کوئی گربڑ کرنے کی بجائے صوبے میں آرام سے اپنی حکومت چلانے کو غنیمت جانے گی۔ ہر قسم کے دبائو کے مقابلے میں اس کے مرد ِ بحران، آصف علی زرداری کے پاس ایک ہی پالیسی ہے۔ سر جھکاکےبائونسر کو گزار دو، اور اگلی گیند کا انتظا ر کرو۔ آنے والے برسوں میں پی پی پی اپنی سیاسی اننگز اسی طرح کھیلے گی۔
عمران خان کی خوش بختی
پنجاب اور قومی اسمبلی میں کافی بڑی تعداد میں نشستیں لینے کے باوجود پی ایم ایل (ن) کے سامنے بھی ایسی ہی صورت حال ہے۔ شہباز شریف کو کئی قسم کی تحقیقات کا سامنا ہے۔ ان کے سامنے سیاسی ڈیش بورڈ پر جلتے بجھتے سرخ بلب آرام سے بیٹھے رہنے اور کچھ نہ کرنے کی وارننگ دے رہے ہیں۔ بہرحال اُنھوں نے اپنے پتے واضح طو رپر کھیل دیئے ہیں۔ نواز شریف اور مریم کی لندن واپسی دراصل شہباز شریف کی سیاسی سکت کا امتحان تھی۔ اُس روز پیش آنے والے واقعات، جب پی ایم ایل (ن) کا کوئی کارکن بھی ائیرپورٹ پر نہ پہنچ سکا، کا معروضی تجزیہ بتاتا ہے کہ شہباز شریف اپنے بھائی اور بھتیجی کے بیانیے کے ساتھ چلنے کا کوئی ارادہ نہیں رکھتے ۔ جب وہ بے مقصد لاہور کی گلیوں میں ادھر اُدھر گھوم رہے تھے، اُن کے بہت سے ساتھی اُن کی ہدایات کے منتظر تھے، لیکن اُنھوںنے لب کشائی کی جسارت تک نہ کی۔ ایسا کرتے ہوئے وہ اُن رہنماؤں کی صف میں شامل ہوگئے جو اپنے گھوڑے کی لگام نہیں چھوڑتے۔
مزید یہ کہ ایک خائف رہنما کی قیادت میں پی ایم ایل (ن)بہت تبدیل شدہ جماعت دکھائی دے رہی ہے۔ اس کے زیادہ ترجوشیلے رہنمامیدان سے دور ہیں اور وہ جو مرکزی کمیٹی میں شامل ہیں، وہ اتنے خائف ہیں کہ احتجاج کا نام تک لینے کے روادار نہیں۔ درحقیقت اُن کے بہت سے سابق وزراء پر یہ بات آشکار ہوئی ہے کہ اگر نواز شریف اور مریم نواز کا جارحانہ بیانیہ نہ ہوتا تو وہ ایک بار پھر حکومت میں ہوتے ۔ درحقیقت شہباز شریف خود اس رویے کی حوصلہ افزائی کرتے ہیں۔ اُنہیں یقین ہے کہ وہ اپنے بھائی کے بیانیے سے دور ہوکر نہایت پرامن رویہ دکھاتے ہوئے اپنا سیاسی بچاؤ کرسکتے ہیں۔
شہباز شریف مرکز میں ، اور اُن کے بیٹے پنجاب میں قائد ِ حزبِ اختلاف ہوں گے تو پھر اندازہ ہے کہ ایوانوں میں کس قسم کی اپوزیشن ہوگی۔ یہ کمزور، بے جان اور بے صدا اپوزیشن ایک نیام زدہ تلوار کی طرح ہوگی۔ چنانچہ عمران کی حکومت کو یہاں بھی کسی رکاوٹ کا سامنا نہیں کرنا پڑے گا۔
عمران خان کی خوش بختی
یہ ضرور ہے کہ کچھ شور برپا کیا جائے گا، غصے کا اظہار بھی ہوگا، مکے لہرائے جائیں گے، لیکن خاطر جمع رکھیں، شہباز شریف کی قیادت میں اپوزیشن حکومت کے سامنے کوئی رکاوٹ نہیں ڈالے گی اور یہ عمران خان کے لیے ایک بہت بڑی آسانی ہے۔ وہ نہایت طمانیت سے اپنے وعدے پورے کرسکتے ہیں۔ کوئی بھی ایوان اُن کے سامنے رکاوٹ پیدا نہیں کرے گا۔
عمران خان کو منتخب شدہ اداروں سے باہر کی طاقتوں کی بھی حمایت حاصل ہے ۔ اُن کی پارٹی کا ووٹ بینک دوگنا ہوچکا ہے ۔ قوم گزشتہ پانچ سال کی ماردھاڑ(ستم ظریفی یہ ہے کہ ا س کے مرکزی کردار خود عمران تھے) سے تنگ آچکی ہے۔ اب لوگ چاہتے ہیں کہ حکومت کو آرام سے کام کرنے دیا جائے۔ عالمی برادری،خاص طور پر سرمایہ کار اور وہ جن کے پاکستان میں اونچے اسٹیک ہیں، پاکستان میں ایک مستحکم حکومت چاہتے ہیں۔ ایسی حکومت جو مشکل فیصلے کرسکے۔ چونکہ وہ پہلی مرتبہ حکومت سنبھالنے جارہے ہیں، چنانچہ اُن کے دامن پر ماضی کے کوئی داغ نہیں۔ وہ دنیا کے کئی ایک دارالحکومتوں میں پاکستان کو قدم رکھنے کے قابل بنا سکتے ہیں۔
گویا یہ بات پورے اعتماد سے کہی جاسکتی ہے کہ عمران خان کو کسی قسم کی محلاتی سازشوں کا سامنا نہیں کرنا پڑے گا۔ اُن کی ایسی نایاب حکومت ہوگی جو روز اول سے ہی صاف اور شفاف مانی جائے گی۔ اُنہیں اپنی شفافیت ثابت کرنے کی بھی ضرورت نہیں ۔ یہ بات عوام کو باور کرائی جاچکی ہے اور اتنا کافی ہے۔ یہ حقیقت ہے کہ عمران خان کی حکومت کا قیام کس طرح کےانتخابات کا نتیجہ ہے، اب زیادہ اہم نہیں رہی ۔ملک کے ہر ادارے نے انتخابات کو قبول کرلیا ہے۔ اب جب کہ وہ اپنی اننگز کا آغاز کرنے جارہے ہیں، تمام ریاستی ادارے اُن کے ساتھ کھڑے ہیں۔
عمران خان کی خوش بختی
یہ منفرد پوزیشن عمران خان کو فیصلہ کرنے اور اپنی پالیسی کو سکون سے آگے بڑھانے کا موقع دیتی ہے ۔ وہ خوش قسمت ہیںکہ اُنہیں ایسا ہموار راستہ مل گیا ہے جس پر قدم بڑھاتے ہوئے وہ اپنے خوابوں کو حقیقت کا روپ دے سکتے ہیں۔ ہمارے جیسے ملک میں جہاں سیاسی فساد اور نہ ختم ہونے والی چالبازی کی رت کبھی نہیں گزرتی، عمران خان کو ایسا صاف موسم میسر آنا کسی خوش بختی سے کم نہیں۔ اس سے زیادہ کسی کو کیا چاہیے ؟ اس سے پہلے ہم نے اتنے صاف افق کبھی نہیں دیکھے تھے ۔ چنانچہ اُن سے کارکردگی کی توقع ہے ۔ امید ہے کہ وہ اپنے تمام وعدے پورے کریں گے۔(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)

کچھ اندھے ہوتے ہیں، کچھ عقل کے اندھے اور کچھ دونوں طر ف سے فارغ ہوتے ہیں۔ آج کل ایسے لوگوں کی کمی بری طرح کھٹک رہی ہے۔ دھمالوں، چنڈالوں، خلالوں کےبغیر سیاست کی رونق آدھی بھی نہیں رہ گئی۔ یہ سب وہ لوگ تھے جنہیں عمران کے ہاتھوں پر وزارت ِعظمیٰ کی لکیر ہی نظر نہیںآتی تھی۔ جو آج لکیر سے کہیں بڑھ کر ان کے لئے سیاسی پل صراط بن چکی جس پر بکتربند گاڑیوںکی آمد و رفت بھی جاری ہے۔ آنکھوں اور عقل کے اندھوں کے بعد آج کل اک نئی کھیپ میدان میں ہے۔
’’میں تجھے بھول جاؤں اگر‘‘
یہ پہلوں جیسی رونقی تو نہیں لیکن ان کی کمی پوری کرنے کی پوری کوشش کر رہی ہے۔ یہ وہ نابغے ہیں جو ڈری ڈری دھمکیاں دے رہے ہیں یا بددعائیں۔ تازہ ترین دھمکی ملاحظہ فرمائیں…. ’’نواز شریف کے ساتھ ایسا سلوک نہ کریں۔ وقت بدلتے دیر نہیں لگتی‘‘کتنی آسانی سے بھول گئے کہ کبھی یہ آصف زرداری کو بکتربند گاڑیوں میں گھمایا کرتے تھے اور جان بوجھ کرگاڑی کودھوپ میں کھڑا رکھتے تھے اور جہاں تک تعلق ہے ’’وقت بدلنے میںدیر نہ لگنے کا‘‘ تو اسے صحیح معنوں میں سمجھنا ذرا مشکل ہے۔ گمنام، بے نام، بے چہرہ، بے شناخت و بے شجرہ خاندان صدیوں گمنامی، غربت، خانہ بدوشی کے اندھیروں میں گم رہنے کے بعد ’’سلاطین عثمانیہ‘‘ بنے اور پھر یوں بکھرتے، سمٹتے اورمٹتے ہیں کہ ان کا نام و نشان نہیں ملتا۔ آج جب کوئی خود کو ’’مغل‘‘کہتا ہے تو لوگ مسکرا دیتے ہیں، کورنش بجا نہیںلاتے۔ ایران کے صفوی ڈھونڈے سے نہیںملتے اور روس کے زاروںکا ایک شہزادہ مرا دوست ہے، میرے ساتھ ٹائم طے کرکے آئیں اور ’’کلام شاعر بزبان شاعر‘‘ سن لیں اوریہ خاندان جو چند ماہ پہلے تک “JIT”بھگتانے کے دوران خود کو ’’حکمران خاندان‘‘ قرار دیتا تھا تو میں تب بھی سوچا کرتا تھاکہ قیام پاکستان کے وقت جب قتل و غارت، کشت و خون، لوٹ مارعروج پر تھی، ٹرینیں لاشوں سے بھری تھیں، بچے ماؤں کے پیٹوں سے نکال کر تلواروں، نیزوں، کرپانوں پر اُچھالے جارہے تھے، مہاجرین قافلہ در قافلہ روندے جارہے تھے، مائیں، بہنیں، بہوئیں ، بیٹیاں درندگی کا نشانہ بن رہی تھیں، 14اگست 1947یہ ملک معرض وجود میں آ رہا تھا…..
’’میں تجھے بھول جاؤں اگر‘‘
تب کوئی سوچ بھی سکتا تھا کہ غربت کامارا جاتی امرا امرتسر سے آیا یہ مزدور خاندان نوزائیدہ پاکستان کی آدھی عمر تک اس پر قابض رہے گا اور خود کو ’’حکمران خاندان‘‘قرار دیتے ہوئے شرمائے گا بھی نہیں….. واقعی وقت بدلتے دیر نہیں لگتی لیکن اس کا مطلب صرف وہی جانتا ہے جو بے شک انسانوں کے درمیان دنوں کو پھیرتا رہتا ہے۔ شہباز شریف کو اس جملے کی سمجھ نہیں آ رہی تو وقت سمجھادےگا۔ انگریز بیوروکریٹ گیزیٹئرز تیار کیا کرتے تھے جو ریکارڈ پر ہیں تو کوئی زحمت فرمائے 1945، 1946 وغیرہ میں لاہور کے معززین، شرفا، رئوسا، عمائدین میں کون کون لوگ تھے اور کیا آج ان میں سے کسی ایک کا بھی نام و نشان، آل اولاد باقی ہے؟ ہے تو کہاں اور کس حال میں ہے؟’’کیسے کیسے، کیسے کیسے ہوگئے؟‘‘یہ جائے عبرت ہے لیکن رسی جل بھی جائے تو اس کے بل جانے میں کچھ وقت لگتا ہے۔کل تک مجھ جیسا کودن یہ سوچ سوچ کڑھتا تھا کہ پروردگار! یہ پاکستان کیا اس لئے بنایا تھا کہ یہ خاندان یہاں دندناتا اور من مانیاں کرتا پھرے، ادارے برباد کردے، میرٹ پامال کردے، اخلاقیات کے جنازے نکال دے، اقتصادیات کا حشرنشر کردے لیکن پھرسمجھ ہی نہ آئی سین کیسے تبدیل ہوتا چلا گیا کہ مجھے فیس بک پر ’’ایک زندان پورا خاندان‘‘ جیسا عنوان دینا پڑا۔ بخدا مجھے اس صورتحال پر نہ کوئی خوشی نہ غم…. کانپتا لرزتا اور توبہ توبہ کرتارہتا ہوں۔
’’میں تجھے بھول جاؤں اگر‘‘
دھمکیاں دینے والوں کے علاوہ جو دوسراگروہ ہے، اس کا گزر بسر آج کی ’’بددعائوں‘‘ پر ہے۔ وہ ناکامیوں کی پیش گوئیاں کرنے کے لئے ننگے پائوںپیدل دور دور کی کوڑیا ں لا رہے ہیں اور میں اپنے قلم کے کوڑے سے مٹی جھاڑتے ہوئے دل کی گہرائیوں سے دعا مانگ رہاہوں کہ اے میرے رب! سب ٹھیک کردے۔اس ملک کی سمت تبدیل کردے، ہمیں خوددار اور خودکفیل کردے، حکمرانوںکے دل ودماغ منور کردے، ان کی روحیں معطر کردے، ان کے لئے مشکلات مسخر کردے۔آج کل دوست، احباب، ملاقاتی اپنے اپنے انداز میں یہ سوال پوچھتے ہیں کہ ’’اب تو PTIاقتدار میںآگئی ، اب آپ کیا کریں گے؟‘‘ تو عرض کرتا ہوں کہ وہی کروں گا جو آج تک کرتا آیا ہوںکیونکہ بنیادی طور پر میری کمٹمنٹ کسی فرد یا پارٹی کے ساتھ نہیں، پاکستان اور اس کے عوام کے ساتھ ہے۔خود عمران نے ایک بار ہنستے ہوئے بہت سنجیدہ بات کی تھی کہ ’’اگر ہم اقتدار میں آگئے تو یہی حسن نثار ہمارا بدترین ناقد ہوگا‘‘ بے شک یہی آخری سچائی ہے۔ میں نے چند سال پہلے ملک چھوڑنے کی بات کی تھی۔
’’میں تجھے بھول جاؤں اگر‘‘
امیگریشن کا پراسیس شروع ہوئے 6سال ہوگئے، دوچار سال مزید لگ جائیں گے۔ وقت کے ساتھ ساتھ میرا خوف بڑھ رہا ہے اور اس دعا میںبھی شدت بڑھتی جارہی ہے کہ ’’مولا! میرا ملک ایساکردے کہ اسے چھوڑنے کاخیال بھی کسی کو نہ آئے۔‘‘ قلم کے کوڑے کو تھامے اگلی حکومت کی پرفارمنس کامنتظر ہوں اور عوام کے ساتھ یہ عہد….. تجدید عہد کہ میں تمہیں بھول جاؤں اگر مرا داہنا ہاتھ اپنا ہنر بھول جائے‘‘ مدینہ تو دور کی بات، ہمیں عکس مدینہ بھی دےدو تو ہم خوش، ہمارا خد ا خوش اور میرے قلم کے کوڑے پر مٹی جمتی جائے گی۔(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)
یہ ایک فرضی قصہ تھا مگر اس کے اندر علامتوں، معانی اور تشریحات کی ایک دنیا آباد تھی اس لئے اسے بہت شہرت ملی۔ انگریزی ادیب جوناتھن سوئفٹ کی ’’گلیورز ٹریولز‘‘ کو ادب اور سیاست دونوں میں کلاسیک کا درجہ حاصل ہے۔ سوئفٹ نے للی پٹ (Lilliput) کے ایک جزیرے کاذکرکیاہے جہاں چھ انچ قد کے بونے آباد تھے۔ ان کی اپنی اقدار اور اصول تھے۔ سوئفٹ نے بونوں کے دیس کی کہانی اپنے تخیل کی بنیاد پر لکھی اور اس کہانی کی علامات کے ذریعے برطانیہ اور دیگر ریاستوں کے اندر درباری سازشوں، خوشامدیوں اور مصنوعی کرداروں پرتنقید کی۔ یہ بونے فرضی اور تخیلاتی تھے مگر پروفیسر یوول نوح حراری کی تازہ کتاب “Sapiens” ’’انسان کی مختصر تاریخ‘‘ میں یہ سائنسی انکشاف کیاگیا ہے کہ ارتقا کے مراحل سے گزرتے ہوئے آج کے انسان (Homo sapiens)سے 12ہزارسال پہلے فلور جزیرے پربونوں کی ہڈیاں او رآثار ملے ہیںالبتہ بونوںکی اس نسل کے جین آج کی انسانی نسل میںبھی موجود ہیں۔ سوئفٹ کے بونے ہوںیا پروفیسرحراری کے اصلی انسانی بونے، یہ عقل میں پورے انسان تھے ان کے صرف قد چھوٹے تھے، دماغ اتنے ہی بڑے تھے جتنے آج کی انسانی نسل کے ہیں۔
مشہور مقولہ ہے کہ بونے کا قد نہیں دل ناپو تبھی اس کے ارادوں کا علم ہوگا۔ یہ بھی مشہور ہے کہ بونے ہمیشہ بڑے بڑے دعوے کرتے ہیں۔ کبھی کبھی مجھے یوں محسوس ہوتا ہے کہ میں خود ایک بونا ہوں اوربونوں کے دیس میں رہتا ہوں۔ اس دیس کے بونے صرف قد کے نہیں عقل کے بھی بونے ہیں۔ نفرت سے بھرے، حسد سے لتھڑے، سازش سے لدے اورشرکی دولت سے مالامال، اپنے کسی بھی ہم ذات کی ترقی سے خوفزدہ، اس کی جیت پر رنجیدہ اورہروقت آمادۂ بغاوت، شوریدہ سربھی نہیں اور مطمئن وقانع بھی نہیں، تضادات سے بھرپور ہم بونے خود کوبہت بڑا سمجھتے ہیں۔ اتنا بڑاکہ ہم اپنی خامیوں کاجائزہ لینے کوہی تیارنہیں۔
پروفیسر یوول نوح حراری کے مطابق آج تک کی سائنسی تحقیق کے مطابق جو قدیم ترین انسانی نام سامنے آیا ہے وہ ’’کشتم‘‘ ہے۔ اسی طرح جوسب سے پرانی تحریر دستیاب ہوئی وہ گندم کے حساب کتاب پر مبنی ہے اور انسانی موجودگی کا سب سے پہلا احساس نشان انگوٹھا لگا کر کیاگیا۔ یہ انکشاف بھی کیا گیا ہے کہ چھ قسم کی انسانی نسلوںاور قسموںکا سراغ ملتاہے جن میں بونوں کی نسل کے علاوہ پانچ اوربھی قسمیں تھیں لیکن بالآخر موجودہ انسانی نسل Homo Sapiens نے سب کی جگہ لے لی اور پچھلے سینکڑوںسالوں سے پوری دنیا میں ایک بھی ذی نفس ایسا نہیں ملتا جس کا تعلق کسی اور انسانی قسم سے ہو۔ بونے قد کے باشندوں کے دیس میں اگر فیصلے بالشتیے قد کے لوگ کریںتو کوئی حیرانی نہیں کہ ہم سب بالشتیے ہیں۔ حیرانی اورپریشانی تب ہوتی ہے کہ ہم قد کے بالشتیے ، سوچ کے بھی بالشتیے اور فکر کے بھی بونے نکلتے ہیں۔ ہمیں اپنی ناک سے آگے کچھ نظر نہیں آتا، قد کا بالشتیہ ہوناکوئی بری بات نہیں لیکن سوچ اورفکر کا بالشتیہ یا بونا ہوناملک وقوم کو نقصان دیتاہے۔
بونوںکے انتخابات ہوئے۔ سب بونوں کوتوقع ہے کہ اب ایک نیا ملک بنے گا جہاں کرپشن ہوگی نہ بے انصافی ، جہاں روزگار ملے گا اور خوشحالی ہوگی۔ بظاہر یہ سہانا خواب پورا ہونے میں چند ہی دن باقی ہیں لیکن بونوں کی ذہنیت وہی رہی، وہی سازشیں، وہی دھرنے، وہی بائیکاٹ اور وہی اقتدار کی رسہ کشی جاری رہی تو احتمال ہے کہ بونوںکا نیا دیس ٹوٹ پھوٹ کررہ جائے گا۔
ضلع گجرات کے نواح میں جگہ جگہ لمبی لمبی قبریں نظر آتی ہیں۔ مشہور یہی ہے کہ یہ نوگزوں کی قبریں ہیں اور ساتھ ہی یہ روایت بھی بیان کی جاتی ہے کہ ایک زمانے میں انسان کا قد بہت لمبا یعنی نوگز کے قریب ہوتا تھا۔ پروفیسر یوول نوح حراری یا کسی اورسائنسی تحقیق یا دریافت میں البتہ ابھی تک یہ ثابت نہیں ہوسکا کہ انسانی نسل کی کوئی اتنی لمبی قسم کبھی اس دنیا میں رہی ہو۔ سائنسی تحقیق یہ بتاتی ہے کہ سوائے بونوںکے انسان کا قد کم و بیش اتنا ہی رہا ہے جتنااب ہے۔ اصل تبدیلی دماغ کے سائز میں آئی۔ دماغ کاسائز بڑا ہوا تو سوچ و بچار اور سماجی رابطہ اور گپ شپ کا سلسلہ شروع ہوا، جس سے انسانوں کے گروہ میں تعاون بڑھا اور پہلے قبیلے اور پھرمعاشرے بنتے گئے۔ انسانی نسل کی ترقی میں ایک بڑی تبدیلی اس وقت آئی جب اس نے چارپایوں کے بجائے دوپایوں پرچلناسیکھ لیا۔ دوہاتھ فارغ ہوئے تو دماغ اور دو فارغ ہاتھوں سے اوزار بنائے اور نت نئی ایجادات شروع کردیں۔
یاد رکھیں کہ بونوںوالی سوچ بدلنا ہوگی ظالمانہ احتساب کے نام پرہر اپوزیشن کو انتقام کا نشانہ بنانا آسان ہے اور اس کی بجائے اپنے سمیت سب کا منصفانہ احتساب کرنا مشکل ہے۔ دنیا بھر کے پیمانے، معیارات اور روایات بدل چکیں۔ ہمیں بھی بالشتیوں سے انسان بننا ہوگا۔ ہمیں بھی چھوٹے قد اور چھوٹے ذہن سے آگے بڑھ کر قدآور بننا ہوگا۔ ایک ایسے ملک اورایسی ریاست کی بنیاد رکھناہوگی جس میں سب کا تحفظ اور سب کا احترام ہو۔ حکومت محب وطن اوراپوزیشن غدار قرار نہ دی جائے۔ جہاں ریاست کے طاقتورگروہ، عوام کے منتخب نمائندوں کوشریک ِاقتدار نہ کریں بلکہ انتقال اقتدارکریں۔
ہم بونے ضرور ہیں مگر ہم اگراپنی سوچ بڑی کرلیں، دماغ کو کھول لیں تو ہم بھی دنیا بھر کی طرح بدل سکتے ہیں۔ اس دیس میں بھی سازشوں، دہشت گردی اور بے یقینی کے سائے ہمیشہ کے لئے ختم ہوسکتے ہیں۔ ہم وہ قوم ہیں جنہیں بدلنے اور اپنے آپ کو بہتر کرنے کے بے شمارمواقع ملتے رہے ہیں اور ہم ہر موقع کو ضائع کرتے رہے ہیں۔ جب بھی ایسا موقع ملا ہم نے اپنے ذہن کو نہیں بدلا اور وہی غلطیاں دہرائیں جوپہلے دہراتے رہے۔ ہم بونوںکو ایک بار پھر سے نیا موقع ملا ہے ۔ موقع سے فائدہ اٹھاتے ہیں توتوقعات اور خوشحالی کا سفرشروع ہو سکتا ہے۔ ہم بھی مہذب جمہوری، معاشرہ بن سکتے ہیں۔ہم بھی اپنے معاملات خود بیٹھ کر طے کرسکتے ہیں۔ اگر جنوبی افریقہ میں کالے اورگورے نسلی منافرت ختم کر سکتے ہیں تو ہم سرخ ، سبز اور سیاہ کے دائروں سے نکل کر ایک قوم کیوں نہیں بن سکتے؟(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)
قارئین کرام اور اراکین سینٹرل ایگزیکٹو کمیٹی، تحریک انصاف!
گزرے ہفتے، 12اگست کے ’’آئین نو‘‘ بعنوان ’’پرائم منسٹر ہائوس پلس نیشنل سینٹر فار آراینڈ ڈی‘‘ میں ناچیز نے حددرجہ بگڑے وطن عزیز کا قبلہ درست کرنے کی سب سے بنیادی ضرورت’’یقینی اور نتیجہ خیز گڈ گورننس‘‘ کے لئے’’ڈیویلپمنٹ کمیونیکیشن‘‘ کا اسٹوڈنٹ ہوتے ہوئے ’’نالج اینڈ ٹیکنالوجی بیسڈ گورننس‘‘ کا ناصرف اپنا ماڈل پیش کیا ہے بلکہ پاکستان کی مخصوص صورتحال اور جملہ تحقیقیVariables(وقتی اور مقامی تخصیص کو پیش نظر رکھتے ہوئے کہ اسلام آباد کے پرائم منسٹر ہائوس کو فقط مرکز اقتدار یا وزیر اعظم کی سرکاری رہائش گاہ ہی کے طور پر استعمال کرنے کے بجائے اس کے وسیع و عریض کمپلیکس میں ہی قومی ترقی کے مرکزی دھارے کے سرچشمے کے لئے بھی2تہائی جگہ وقف کردی جائے، باقی ا یک حصے کا استعمال ایک سادہ مگر باوقار اور محفوظ’’پرائم منسٹر ہائوس‘‘ کے طور ہو۔ وزارتوں کےباقی ماندہ ایریا الگ الگ تھنک ٹینکس، ریسرچ ونگز اور پالیسی ڈوکومینٹس کی تیاری اور ایکشن پلان کے مطابق منصوبہ بندی کی سرگرمیوں کیلئے وقف ہو۔ خاکسار نے زیر بحث تجویز میں بھی واضح کیا ہے اور گڈ گورننس کا یہ نکتہ آئین نو میں واضح کیا جاتا رہے گا کہ مختلف النوع تجاویز اور منفرد اور اختراعی فیصلہ سازی (Innovative Decision Making) فقط پارٹی قیادت کو ہی نہیں کرنا چاہئے بلکہ اس سے قبل سنٹرل ایگزیکٹو یا مشاورتی حلقے کا غور و خوض اور سفارش اس میں شامل ہونی چاہئے۔ ابتداء میں ہی گزارش ہے کہ بطور وزیر اعظم خان صاحب خود لائل پور کا گھنٹہ گھر بننے سے بچیں اور سنٹرل ایگزیکٹو کمیٹی کے ممبر بھی انہیں ایسا بننے سے بچائیں، خود وزیر اعظم عمران خان اور ایگزیکٹو کے ارکان اپنی کمیٹی کو ایمپاورڈ کرنے پر چوکس رہیں اور بتدریج اس میں اضافہ کریں۔ اسی سے پارٹی میں داخلی استحکام بھی ہوگا اور گورننس اور اس کی فیصلہ سازی بھی بہتر سے بہتر ہوتی جائے گی۔
خبر ہے کہ وزیر اعظم عمران خان کی سرکاری اقامت گاہ(پرائم منسٹر ہائوس) کے بارے میں غور و خوض اور سفارش کے لئے پی ٹی آئی کی کمیٹی قائم کی جارہی ہے۔ ایسا ہے تو یہ ایسی ہی گورننس کا آغاز ہے جس پر خاکسار زور دے رہا ہے۔ گورننس جتنیSharedہوگی نتائج اتنے ہی بہتر نکلیں گے بشرطیکہ مشاورت میں سب سے بڑا شیئر جدید علوم، ٹیکنالوجی، تحقیق اور تجربے اور سیاسی انتظامی فہم کا ہونا چاہئے اور خان اعظم ایسا مشاورتی حلقہ بنانے میں کامیاب ہوگا تو یہ کبھی درباری انداز کا ہوگا نہ وزیر اعظم گھنٹہ گھر بن پائیں گے۔ وماعلینا الالبلاغ
آئندہ دو تین روز میں وزیر اعظم بننے والے عمران خان ا ور ان کی کابینہ کے ارکان(وزراء) کو اپنے اپنے مناصب کا حلف اٹھانے سے بھی قبل ’’آئین نو‘‘ میں یہ باور کرایا جارہا ہے کہ اگر انہوں نے وزارت عظمیٰ (جو پارلیمانی نظام میں اعلیٰ منصب سے زیادہ، سب سے زیادہ ذمہ دار ادارہ ہے ، اتنا کہ پارلیمان کی کوالٹی کا بڑا انحصار بھی اسی پر ہوگا) اور وزراء نے اپنی وزارتوں کو جدید موجود اور ظہور پذیر متعلقہ علوم سے جوڑ دیا تو پاکستان کا جاری شدید بحران تیزی سے کم ہوتا ہوتا تین سال میں بالکل ختم ہوجائے گا۔ اقتدار کے اگلے دو سال وزارتوں کے ماتحت تباہ اداروں کی مکمل بحالی کے بعد ان کی مزید ترقی اور استحکام کے سال ہوں گے، جس کے وسیع تر بینی فشریز پاکستان کے موجود استحصال زدہ عوام الناس بنیں گے۔
سارا زور اس پر لگنا چاہئے کہ گورننس کا مضبوط رشتہ برین اسٹارمنگ(دماغ سوزی) بشکل(فقط بحث و تمحیص والے نہیں) بلکہ رزلٹ اورئینٹڈ تھنک ٹینکس، پاکستان کی قومی ضروریات کو سمجھنے والے اور ان پر ہی سائینٹفک تحقیق کرنے والے اداروں، جدید اور ٹارگٹ اورئینٹڈ منصوبہ بندی اور فعال اور قابل پیمائش (Measurable) ایکشن پلانر سے کیسے؟ اور جلد سے جلد جوڑا جائے اور اس کے لئے ماہرین کو جنگی بنیاد پر انگیج کیا جائے۔
یہ درست ہے کہ اسٹیٹس کو کی آخری حکومتوں نے گورننس کو کرپشن سے گدلا ہی نہیں بلکہ غلیظ کرنے میں کوئی کسر نہیں چھوڑی۔ پھر بدتر حکمرانی کی اس کیفیت میں ادارہ شکنی کے لئے جو دھماچوکڑی مچائی اور ملکی سلامتی اور خود مختاری تک کو خطرے میں ڈالنے کی حد تک بحران پیدا کیا ہے، ایسے میں اب تمام تر حل’’مالی وسائل کی تلاش‘‘ میں سے نکالنے کی باتیں بہت ذمہ دار حلقوں میں ہورہی ہیں۔ غالب حد تک یہ درست ہی ہے کہ ملکی خزانہ اور عوامی خدمات کے ادارے جس بے رحمی سے بذریعہ بیڈ گورننس اجاڑے گئے ہیں اور جس طرح پاکستان پر آنے والے وقت اور نسل پر برہنہ مہلک قرض کی تلواریں لٹکا دی گئی ہیں، اس کے ممکنہ علاج کے آغاز کے لئے بھی واقعی بھاری بھرکم رقوم درکار ہیں، جبکہ بقول استاد گرامی ڈاکٹر شفیق جالندھری ’’گزشتہ پندرہ سال سے اٹھتے بیٹھتے انتباہ کئے جاتے ہیں کہ قوم کو سمجھ نہیں آرہا تو کسی طرح یوں سمجھا دو کہ جیسے ہمارے پاس زندہ رہنے کے لئے فقط دودھ ہی رہ گیا ہے، جس کا مکھن ملائی کریم سب نکال کر باہر لے جائی جارہی ہے اور قوم چھاچھ پر بھی گزار نہیں کررہی بلکہ اس میں بھی کرپٹ حکمران مزید پانی اور وہ بھی گدلا پانی ڈال کر قوم کو گزار کرارہے ہیں‘‘۔ملک کی حقیقی مالی صورتحال تو واقعی کچھ ا یسی ہی ہے۔
لیکن اس موجود بدتر، مایوس کن بلکہ نو منتخب حکومت کے لئے ہراساں کرنے والی صورتحال میں فقیر ملین ڈالر ٹپ پیش کرتا ہے۔ ’’ تمام مسائل کا تعلق وسائل(مطلب مالی وسائل) سے نہیں ہے‘‘۔ عمران خان! اس کو گلے کے تعویذ کی طرح پلے باندھ لو۔ سوال ہے کہ وہ کون سے ملکی، عوامی، قومی مسائل ہیں جن کا حل مالی وسائل سے ہٹ کسی اور ذریعے سے بھی ہے، جی ہاں ہے، ان ذرائع کی نشاندہی تو تعویذ میں درج ہو گی۔ تعویذ کے مندرجات پبلک نہیں ہوتے لیکن یہ چھپے اپنا کام دکھاتے ہیں۔ دلچسپ یہ ہے کہ تعویذ کے مندرجات سائنٹفک آزمودہ اور ثابت شدہ اور نتیجہ خیز ہیں۔ پبلک فقط اس لئے نہیں کئے جاسکتے کہ اسٹیٹس کو کے دفاع کے آخری جنگجو ’’کالے جادو‘‘ والے جادوگروں کی تلاش میں سرگرداں ہیں۔ سو، انشاءاللہ تعویذ آپ تک جلد پہنچا دیا جائے گا یا پہنچ کر آپ کے حوالے کردیا جائے گا۔ آگے صرف وماعلینا الالبلاغ نہیں ہوگا، بلکہ آپ جوابدہ ہوں گے کہ آپ کو بمطابق عملدرآمد میں آخر کہاں مشکل پیش آئی اور آپ نے اسے دور کرنے کی قانونی آئینی سکت اور اپنے حلف، فریضے کے مطابق اسے دور کیوں نہیں کیا۔اب آپ پاکستانی قوم کی امیدوں کا مرکز ہی نہیں ہیں، بلکہ دنیا میں جہاں جہاں پاکستان کے خیر خواہ ہیں ان کا بھی، یوں بھی آپ اس فارسی شعر کی عملی تصویر ہیں ؎
مشکل نیست کہ آسان نہ شود
مرد باید کہ ہراساں نہ شود
وہ مشکل ہی نہیں جو آساں نہ ہوجائے اور وہ مرد ہی نہیں جو ہراساں ہوجائے۔ وہ دن گئے جب خلیل خاں فاختہ اڑاتے تھے۔(بشکریہ جنگ لاہور)

(کالم نگار کے نام کیساتھ ایس ایم ایس اور واٹس ایپ رائےدیں00923004647998)

آج یوم آزادی ہے۔ اتفاق سے اس برس یوم آزادی عین ان دنوں میں پڑا ہے جب نئے پاکستان کی بنیاد رکھی جا رہی ہے۔ پاکستان کی پندرہویں قومی اسمبلی کا افتتاح ہو گیا ہے اور اگلے دو چار روز میں نئی حکومت پوری طرح سے ذمہ داریاں سنبھال لے گی۔ یہ حقیقت ہے کہ اکیس کروڑ کے اس ملک میں بہت سی آنکھوں میں امید کے دئیے جھلملا رہے ہیں۔ آوازوں میں اعتماد ہے، وعدوں پہ اعتبار ہے۔ کسی کی خوشی میں کھنڈت ڈالنا وضع داری کے منافی ہے۔ جو لوگ نئے پاکستان کی پذیرائی میں سرشار ہیں، خدا کرے کہ ان کے خواب پورے ہوں۔ درویش بے نشاں صاف کہے دیتا ہے کہ پھول کھلنے لگے، تم کہو، میں نہیں مانتا۔ آج صبح خواہش پیدا ہوئی کہ ایک مکتوب عالم بالا میں پاکستان کے بانی قائد اعظم محمد علی جناح کے نام لکھا جائے۔ قوم کے باپ کو اس ریاست کی کچھ خبر دی جائے جس کا افتتاح کرتے ہوئے عظیم رہنما نے گیارہ اگست 1947ء کو پاکستان کے شہریوں کو روشن مستقبل کی بشارت دی تھی۔ ابھی تین روز پہلے ہم نے بابائے قوم کے اسی فرمان کی یاد میں مذہبی اقلیتوں کا دن منایا ہے۔
بابائے قوم لفظوں کے استعمال میں بہت محتاط تھے اور گیارہ اگست کی اس مختصر تقریر پر تو، ہیکٹر بولائتھو کی روایت کے مطابق، انہوں نے کئی گھنٹے محنت کی تھی۔ ان کی اس تقریر کا بنیادی پیغام شہریوں کی مساوات تھا۔ قائد اعظم کے جانشین کیسے گریز پا نکلے کہ جس تاریخ ساز تقریر میں یہ نوید دی گئی تھی کہ پاکستان میں ہندو اور مسلم اپنے مذہب پہ قائم رہتے ہوئے سیاسی اعتبار سے ایک جیسے حقوق، رتبے اور اختیار کے مالک ہوں گے، ہم نے اس تقریر کی یاد میں گیارہ اگست کو مذہبی اقلیتوں کا دن قرار دے ڈالا۔ گویا عقیدے کے نام پر مستقل حدبندیاں، ناقابل عبور دیواریں اور شہریت میں درجہ بندی۔ ہمارے آئین میں کہیں نہیں لکھا کہ عقیدے کی بنیاد پر شہریوں میں کوئی امتیاز کیا جائے گا۔ آئین کی شق پچیس دو ٹوک لفظوں میں کہتی ہے کہ کسی کے ساتھ امتیاز نہیں کیا جائے گا۔ آئین کی شق بیس میں جہاں ہر شہری کو عقیدے کی آزادی کی ضمانت دی گئی ہے وہاں ریاست، کسی گروہ یا کسی فرد کو یہ حق نہیں دیا گیا کہ وہ پاکستان کے کسی شہری کی اس مطلق آزادی میں مداخلت کرے۔ قائد اعظم کے پاکستان میں ہم نے مختلف گروہوں کو اقلیت قرار دینے کے مطالبے کی روایت قائم کر ڈالی۔ اس کا مطلب یہ ہے کہ ہم نے کسی شناخت کی بنیاد پر اقلیت کو محض عددی گوشوارے کا معاملہ نہیں سمجھا بلکہ اقلیت ہونے کو گویا تعزیری درجہ قرار دیا۔ ہم قائد کا پیغام سمجھے ہی نہیں۔ ہم ان کے فرمان پر عمل کیا کرتے؟
قائد اعظم محمد علی جناح نے اپنی سیاسی کیریئر کا آغاز آل انڈیا کانگریس اور ہوم رول لیگ سے کیا تھا۔ محمد علی جناح اس زمین کے ان ابتدائی فرزندوں میں سے ایک تھے جنہوں نے اس اصول کو تسلیم کیا کہ کسی ملک پر حکومت کا حق اس دھرتی پر رہنے والے باشندوں کی امانت ہے۔ اسی اصول کی روشنی میں ہندوستان کی جدوجہد آزادی لڑی گئی۔ مہاتما گاندھی تو ابھی ہندوستان تشریف نہیں لائے تھے، بمبئی کا ذہین اور پرعزم بیرسٹر محمد علی جناح، دادا بھائی نورو جی، کرشن گوپال گوکھلے، گنگا دھرتلک اور ڈاکٹر اینی بیسنٹ کا ہم صفیر تھا۔ محمد علی جناح ہندوستان کی جدوجہد آزادی کے ہراول دستے میں شامل تھے۔ درویش بے نشاں نے بابائے قوم کی عظمت کے سامنے سر جھکاتے ہوئے مجوزہ مکتوب نہ بھیجنے کا فیصلہ کیا ہے۔ میں بابائے قوم کو کیسے بتاؤں کہ تین دستور، گیارہ قومی انتخابات اور چودہ قومی اسمبلیوں کی آزمائش سے گزرنے کے بعد بھی پاکستان میں عوام کا حق حکمرانی پامال ہے۔ جمہوری حاکمیت کے نشان ایوان بلند و بالا عمارتوں میں بدستور قائم ہیں لیکن ان ایوانوں کی حقیقت قوم کے خلاف جرائم پر ڈالے گئے پردے سے زیادہ نہیں ۔
بمئے کرانیکل کے ایڈیٹر بی جی ہارنیمن کے حق اظہار کی وکالت کرنے والے قائد اعظم محمد علی جناح نے روزنامہ ڈان کی بنیاد رکھی تو اس کے ایڈیٹر سے کہا تھا کہ آپ کو یہ بتانا میرا کام نہیں کہ آپ کو کیا لکھنا چاہئے۔ گورنر جنرل بننے کے بعد کراچی کی ایک ہندو اخبار نویس کو یقین دلایا کہ وہ بغیر کسی خوف کے اپنی رائے لکھتا رہے۔ اس سے حکومت کو رہنمائی ملے گی۔ ایک نوآموز سرکاری افسر کی حیثیت سے آغا شاہی آزادی صحافت محدود کرنے والا ایک مسودہ قانون لے کر گورنر جنرل کے حضور پیش ہوا۔ قائد اعظم نے فرمایا میں زندگی بھر آزادی صحافت کے تحفظ کے لیے لڑتا رہا ہوں۔ اب ایسے قوانین کی منظوری کیسے دے سکتا ہوں؟ درویش پاکستان کے یوم آزادی پر بابائے قوم کو مغموم نہیں کرنا چاہتا۔
اگرچہ میں نے بابائے قوم کو مکتوب نہ لکھنے کا فیصلہ کیا ہے لیکن اگر لکھتا تو یہ ضرور بتاتا کہ آپ کے ارشادات کے عین مطابق پاکستان کے سیاسی اور سماجی امور میں مذہبی پیشواؤں کو ہرگز کوئی خصوصی اہمیت حاصل نہیں۔ تمام ہمسایہ ممالک سے نہایت خوشگوار تعلقات استوار ہیں۔ ہمارے ملک کا انتخابی عمل ایسی مضبوط بنیادوں پر استوار ہے کہ یورپ وغیرہ سے مبصرین ہمارے انتخابات کا مطالعاتی دورہ کرنے تشریف لاتے ہیں اور ہمارے شفاف انتخابی عمل سے استفادہ کرتے ہیں۔ اقوام عالم میں پاکستان کی سربلندی ضرب المثل ہے۔ صحت، تعلیم، جان و مال کا تحفظ میں مملکت پاکستان کے اشاریے دنیا کی بہترین قوموں میں شمار کیے جاتے ہیں۔ اگر آپ آج حیات ہوتے تو آپ کا سر فخر سے بلند ہو جاتا کہ پاکستان کی عدلیہ کے تمام فیصلے قانون کے لفظ اور منشا پر پورے اترتے ہیں۔ آپ کو 1916ء میں بال گنگا دھر تلک کو حکومت کے اشارے پر سزا دینے والا جسٹس داور یاد ہو گا۔ آپ اس مقدمے میں وکیل صفائی تھے۔ آپ کو بصد افتخار اطلاع دی جاتی ہے کہ پاکستان کی عدالتی تاریخ میں جسٹس داور جیسی کوئی بدنما مثال نہیں۔ کسی کی مجال نہیں کہ ہمارے ججوں پر اثر انداز ہو سکے۔
اگرچہ یہ مکتوب لکھا نہیں گیا لیکن میری خواہش تھی کہ میں بابائے قوم کو یہ خوش خبری ضرور سناتا کہ آپ کے عطا کردہ وطن عزیز میں ہم ہر دس برس بعد ایک نیا پاکستان بناتے ہیں۔ ہم نے 1958میں انقلاب برپا کیا۔ 1971ء میں نیا پاکستان بنایا۔ 1977ء میں اپنا قبلہ درست کیا۔ 1988میں سلطانی جمہور کا اعلان کیا۔ 1999 میں شفاف احتساب کیا۔ 2008ء میں ریاستی اداروں کے سیاسی عمل سے لاتعلق ہونے کا اعلان کیا اور اب بفضل تعالی 2018ء میں کرپشن سے پاک پاکستان کی بنیاد رکھنے جا رہے ہیں۔ ہم قائد اعظم کی توصیف میں ہمیشہ رطب اللسان رہیں گے کیوں کہ انہوں نے ہمیں یہ آزاد مملکت عطا کی تاکہ ہم اپنی اخلاقی قامت، ذہنی استعداد، اجتماعی دیانت داری اور تخلیقی صلاحیتوں کا بھرپور ثبوت دے سکیں۔

(ایمرا نیوز)
پاکستان کے موجودہ سیاسی تناظر میں یہ سمجھنا ضروری ہے کہ قائد اعظم پاکستان کو ایک اسلامی جمہوری فلاحی ملک بنانا چاہتے تھے اور ان کے نزدیک اسلامی اور جمہوری اصولوں میں کوئی تضاد نہیں تھا۔ قائد اعظم نے اپنی تقریروں میں کبھی بھی لفظ سیکولرازم استعمال نہیں کیا جبکہ اسلام ان کی تقریروں اور تحریروں کا محور نظر آتا ہے۔ 11اگست 1947کی تقریر کا بنظر غائر مطالعہ کیا جائے تو محسوس ہوتا ہے کہ اس کا نفس مضمون اور مدعا اقلیتوں کو احساس تحفظ اور بحیثیت شہری برابری کا پیغام دینا تھا اور قوم کو اتحاد کی تلقین کرنا تھا جس میں پاکستان کی بقا کا راز مضمر ہے۔ قیام پاکستان کے بعد ہندوستان میں یہ پروپیگنڈہ کیا جارہا تھا کہ پاکستان ایک مذہبی ریاست ہوگی جہاں اقلیتوں کو غلام بنا کر رکھا جائے گا۔ اس تقریر میں قائد اعظم نے رومن کیتھولک اور پروٹسٹنٹ فرقوں کا ذکر کیا جو کہ عیسائیت کے دو فرقے ہیں۔ وہ اسلام اور ہندو مت کی طرح دو مختلف مذاہب نہیں۔ اس تقریر سے قبل اور بعد ازاں بھی قائد اعظم اقلیتوں کو یقین دہانیاں کراتے رہے اور بار بار یہ کہتے رہے کہ رواداری (Tolerance) اسلام کا بنیادی اصول ہے چنانچہ قائد اعظم نے 14اگست 1947کو دستور ساز اسمبلی کے افتتاح کے موقع پر مائونٹ بیٹن کی تقریر کاجواب دیتے ہوئے بھی اپنے اسی نقطہ نظر کو دہرایا۔
کچھ دنوں بعد قائد اعظم نے اپنی گیارہ اگست والی تقریر کے مدعا کواپنے ایک انٹرویو میں واضح کیا جو انہوں نے25اکتوبر 1947کو رائٹر کے ایک نمائندے کو دیا۔ اس انٹرویو میں انہوں نے کہا کہ میں دستور ساز اسمبلی کی افتتاحی تقریر(11اگست) میں یہ واضح کر چکا ہوں کہ اقلیتوں سے پاکستان کےشہریوں جیسا سلوک کیا جائے گا اور ان کو وہی حقوق حاصل ہوں گے جو دوسروں کو حاصل ہوں گے۔ پاکستان غیر مسلم اقلیتوں میں احساس تحفظ اور اعتماد پیدا کرنے کے لئے سب کچھ کرے گا۔
مسئلہ یہ ہے کہ ہمارے دانشور حضرات 11اگست والی تقریر کی تشریح و توضیح پر تو بہت زور صرف کرتے رہے ہیں لیکن 25اکتوبر والے انٹرویو کا ذکر نہیں کرتے جس میں خود قائد اعظم نے 11اگست کی تقریر کے نفس مضمون کی وضاحت کی۔ حقیقت یہ ہے کہ ہمارے دانشوروں کا ایک طبقہ قائد اعظم کی محض ایک تقریر کے چند فقروں کو اپنے سیاق و سباق سے الگ کرکے اپنا من پسند مفہوم کشید کرلیتا ہے اور قائد اعظم کی اس سے قبل یا بعد میں کی گئی تقاریر کو پس پشت ڈال دیتا ہے۔ قائد اعظم کی تقاریر کے مطالعے سے اندازہ ہوتا ہے کہ قائد اعظم کے خیالات میں ایک تسلسل تھا اور وہ مسلسل پاکستان میں اسلامی جمہوری فلاحی نظام کا تصور پیش کرتے رہے۔ اس حوالے سے چند ایک اقتباسات پیش کررہا ہوں جن سے قائد اعظم کی سوچ اور ویژن سمجھنے میں مددملے گی۔
نومبر1945میں قائد اعظم نے پشاور میں کہا’’آپ نے سپاسنامے میں مجھ سے پوچھا ہے کہ پاکستان میں کون سا قانون ہوگا۔ مجھے آپ کے سوال پر سخت افسوس ہے۔ مسلمانوں کا ایک خدا، ایک رسولؐ اورایک کتاب ہے۔ یہی مسلمانوں کاقانون ہے اور بس۔ اسلام پاکستان کے قانون کی بنیاد ہوگا اور پاکستان میں کوئی قانون اسلام کے خلاف نہیں ہوگا۔‘‘
14فروری1947کو شاہی دربار سبی بلوچستان میں تقریر کرتے ہوئے کہا’’میرا ایمان ہے کہ ہماری نجات اس اسوۂ حسنہ پر چلنے میں ہے جو ہمیں قانون عطا کرنے والے پیغمبر اسلامؐ نے دیا ہے۔ ہمیں چاہئے کہ ہم اپنی جمہوریت کی بنیاد صحیح معنوں میں اسلامی تصورات اوراصولوں پر رکھیں۔‘‘
30اکتوبر1947کو لاہور میں جلسہ عام سے خطاب کرتے ہوے کہا’’اگر ہم قرآن حکیم سے رہنمائی حاصل کریں تو بالآخر فتح ہماری ہوگی۔ میرا آپ تمام لوگوں سے یہی مطالبہ ہے کہ پاکستان کو اسلام کا قلعہ بنانے کے لئے بڑی سے بڑی قربانی سے بھی دریغ نہ کریں۔‘‘
25جنوری 1948کو عید میلاد النبیؐ کے موقع پر کراچی بار ایسوسی ایشن کے استقبالیے میں تقریر کرتے ہوئے قائد اعظم نے وکلاء کے سامنے ان حضرات کو بے نقاب کیا جو ان کے حوالے سے غلط فہمیاں پھیلا رہے تھے۔ اس وقت قائد اعظم پاکستان کے گورنر جنرل بھی تھے۔ اس لئے ان کے منہ سے نکلا ہوا ہر لفظ’’پالیسی بیان‘‘ کی حیثیت رکھتا تھا۔ قائد اعظم کے ان الفاظ پر غور کیجئے اور ان الفاظ کے آئینے میں ان چہروں کو تلاش کیجئے جنہیں قائد اعظم نے شرارتی اورمنافق کہا تھا۔ قائد اعظم نے کہا’’میں ان لوگوں کے عزائم نہیں سمجھ سکا جو جان بوجھ کر شرارت کررہے ہیں اور یہ پراپیگنڈہ کررہے ہیں کہ پاکستان کے آئین کی بنیاد شریعت پر نہیں ہوگی۔ ہماری زندگی پر آج بھی اسلامی اصولوں کا اسی طرح اطلاق ہوتا ہے جس طرح1300سال پہلے ہوتا تھا۔ اسلام نے ہمیں جمہوریت سکھائی ہے اور مساوات اور انصاف کا سبق دیا ہے اس لئے کسی کو بھی خوف زدہ ہونے کی ضرورت نہیں۔‘‘
پھر فروری1948میں قائد اعظم نے امریکی عوام کے نام ایک ریڈیو پیغام میں یہ واضح الفاظ کہہ کر نہ صرف ہر قسم کے شکوک و شبہات کی دھند صاف کردی بلکہ اس بحث کو بھی ہمیشہ ہمیشہ کے لئے سمیٹ دیا۔ قائد اعظم نے فرمایا’’پاکستان کی دستور ساز اسمبلی نے ابھی دستور بنانا ہے۔ مجھے علم نہیں کہ اس کی حتمی شکل و صورت کیا ہوگی؟ لیکن مجھے یقین ہے کہ پاکستان کا آئین جمہوری قسم کا ہوگا جسے اسلام کے بنیادی اصولوں کے مطابق تشکیل دیا جائے گا۔ اسلام کے اصول آج بھی عملی زندگی پر اسی طرح لاگو ہوتے ہیں جس طرح 1300برس قبل ہوتے تھے۔ اسلام نے ہمیں جمہوریت سکھائی ہے اور مساوات اورانصاف کا سبق دیا ہے۔ ہم ان شاندار روایات کے امین اور وارث ہیں اور دستور سازی میں انہی سے رہنمائی حاصل کی جائے گی۔ بہرحال پاکستان ایک تھیوکریٹ(مذہبی ریاست) نہیں ہوگی۔ پاکستان پریمئر اسلامک اسٹیٹ ہوگی۔‘‘ پریمئر اسلامک اسٹیٹ کے الفاظ ذہن میں رکھیے قائد اعظم مسلسل یہ کہتے رہے کہ اسلام مکمل ضابطہ حیات ہے۔ سیرت النبیؐ ہمارے لئے اعلیٰ نمونہ ہے۔ جمہوریت، مساوات اور انصاف ہم نے اسلام سے سیکھا ہے اور اسلام نے جمہوریت کی بنیاد1300برس قبل رکھ دی تھی۔ اس لئے ہمارے لئے یہ کوئی نئی چیز نہیں ہے۔
پاکستان میں اقلیتوں کو برابر کے حقوق حاصل ہوں گے۔ جو لوگ یہ کہتے ہیں کہ پاکستان کے آئین کی بنیاد شریعت پر نہیں رکھی جائے گی وہ سازشی اورمنافق ہیں اور آخر میں یہ کہہ کر تمام شکوک و شبہات کے تابوت میں آخری کیل ٹھونک دی کہ پاکستان کا آئین جمہوری ہوگا اور اس کی بنیاد اسلامی اصولوں پر رکھی جائے گی۔ گویا جہاں تک نظام حکومت کا تعلق ہے قائد اعظم کا تصور پاکستان پوری طرح واضح ہے اور وہ یہ کہ قائد اعظم ایک مارڈن اسلامی جمہوری فلاحی پاکستان چاہتے تھے۔ قائد اعظم کی تقاریر کا مطالعہ کریں تو محسوس ہوتا ہے کہ پاکستان کی داخلی صورتحال کے حوالے سے وہ صوبائیت کے مسئلے سے بہت پریشان تھے۔ پشاور سے لے کر ڈھاکہ ، چٹاگانگ تک ہر جلسہ عام اور خطاب میں انہوں نےعوام کو صوبائیت کے بارے میں وارننگ دی اور نصیحت کی کہ وہ صوبائیت کے زہر کو نکال باہر پھینکیں۔ ماضی پر نگاہ ڈالیں تو بابائے قوم کے وژن ، بصیرت اور دور بینی کی داد دینی پڑتی ہے کہ بالآخر صوبائیت نے1971میں پاکستان کو دولخت کردیا اور آج کئی دہائیوں کے بعد بھی پاکستان کو جو سب سے بڑا چیلنج درپیش ہے وہ صوبائیت کا ہے۔
قائد اعظم نے اپنی تقاریر میں قانون کی حکمرانی، معاشی عدل اور انسانی مساوات پر بہت زور دیا جو ان کے تصور پاکستان کا ناگزیر حصہ ہیں۔ معاشی عدل کا مطلب ہے دولت کی منصفانہ تقسیم۔ کوئی غریب اتنا غریب نہ ہو کہ بھوکا سوئے۔ وہ چاہتے تھے یہاں قانون کی حکمرانی، سماجی اور معاشی انصاف ہو، تمام شہریوں کو برابر کے حقوق حاصل ہوں، پاکستانی معاشرہ رشوت خوری، بلیک مارکیٹنگ، اقربا پروری، سفارش اور مذہبی فرقہ واریت سے بالکل پاک ہو۔ وہ فیوڈل ازم اور جاگیرداری نظام کا خاتمہ بھی چاہتے تھے۔ انہوں نے کئی مواقع پر واضح کیا کہ وہ جاگیرداروں اور وڈیروں کے لئے نہیں بلکہ عام مسلمانوں کے لئے پاکستان حاصل کررہے ہیں۔ وہ فوج اور بیوروکریسی کو بہرحال سیاست سے دور رکھنا چاہتے تھے اور کبھی یہ تصور بھی نہ کرسکتے تھے کہ پاکستان میں فوج حاکم ہوگی یا بیوروکریسی سیاست میں ملوث ہوگی لیکن ہماری بدقسمتی کہ قائد اعظم پاکستان بننے کے تقریباً ایک برس بعد انتقال کرگئے اور ان کے جانشین قائد اعظم کے خواب کو شرمندہ تعبیر نہ کرسکے۔ نتیجے کے طور پر غریب عوام جن کے لئے قائد اعظم نے پاکستان حاصل کیا تھا ظلم وستم، بےانصافی ، غربت اور محرومی کی چکی میں پس رہے ہیں۔ کئی دہائیاں گزرنے کے بعد بھی ہم قائد اعظم کے تصور پاکستان سے بہت دور ہیں لیکن میں سمجھتا ہوں کہ قوم کے ذہن میں قائد اعظم کے وژن کو تازہ رکھنا ضروری ہے تاکہ ہمیں یہ احساس رہے کہ ہماری قومی منزل کیا ہے اور ہمیں بہرحال اسے ایک دن حاصل کرنا ہے۔منزل دور سہی، منزل کا شعور اور احساس تو زندہ رہے۔ خواب زندہ رہے تو کبھی حقیقت بھی بن جاتا ہے۔ تحریک انصاف کے قائد یہی نعرہ لگا کراقتدار میں آئے ہیں۔ دیکھتے ہیں کہ اس خواب کو شرمندہ تعبیر کرنا ان کے نصیب میں ہے یا کسی اور کے؟ غربت کے خاتمے کے لئے قوم کی دعائیں عمران خان کے ساتھ ہیں لیکن جاگیرداروں میں گھرا ہوا عمران جاگیرداری سے نجات حاصل کرتا ہے یا نہیں کیونکہ اس کا خاتمہ قائد اعظم کے پاکستان کا تقاضا ہے اور قائد اعظم کا پاکستان عمران کا وعدہ ہے۔ 24اپریل 1943کو مسلم لیگ کے اجلاس میں تقریر کرتے ہوئے قائد اعظم نے کہا’’یہاں میں جاگیرداروں اور سرمایہ داروں کو انتباہ کردینا چاہتا ہوں جو ہمارا خون چوس کر……خودغرض بن چکے ہیں۔ عوام کا استحصال ان کی رگوں میں شامل ہوچکا ہے۔ ہمارے لوگوں میں لاکھوں ایسےہیں جنہیں ایک وقت کا کھانا میسر نہیں……اگر پاکستان کا تصور یہ ہے تو مجھے ایسا پاکستان نہیں چاہئے۔‘‘ 27فروری 1946کو مسلم لیگی کارکنوں سے خطاب میں انہوں نے کہا’’مجھے سرمایہ داروں سے کوئی ہمدردی نہیں، میں بڑھاپے میں خون پسینہ ایک کررہا ہوں، ادھر ادھر مارا مارا پھر رہا ہوں، یقیناً سرمایہ داروں کے لئے نہیں بلکہ آپ غریبوں کے لئے۔‘‘(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)
میاں نواز شریف، مریم نواز اور کیپٹن صفدر احتساب عدالت کے ایک ناقص فیصلہ کی بنا پر اڈیالہ جیل میں قید ہیں۔ یہ فیصلہ ناقص ہے یہ میری ذاتی رائے نہیں بلکہ پاکستان کے نامور قانون دان اسے ایک ایسا فیصلہ تصور کرتے ہیں جس کا نہ تو قانونی طور پر دفاع کیا جا سکتا ہے اور نہ ہی اس فیصلہ پر عدلیہ فخر کر سکتی ہے۔ سابق چیف جسٹس افتخار چوہدری جو نواز شریف حکومت کے سخت مخالف رہے، جنہوں نے پاناما کیس میں نواز شریف کے خلاف سپریم کورٹ میں ریفرنس بھی بھیجا، اُنہوں نے بھی اپنے ایک ٹی وی انٹر ویو میں کہا کہ فیصلہ ناقص ہے اور یہ بھی کہ نیب نواز شریف کے خلاف کیس میں شواہد پیش کرنے میں ناکام رہا۔ احتساب عدالت نے اپنے فیصلہ میں یہ تسلیم کیا کہ نواز شریف کے خلاف کرپشن کرنے کا ثبوت نہیں ملا اور یہ بھی کہ نیب یہ ثابت کرنے میں کامیاب نہیں ہوا کہ لندن فلیٹس کرپشن کے پیسہ سے بنائے گئے۔ اس بنیادی الزام سے بری کرنے کے بعدعدالت نے یہ بھی مانا کہ نواز شریف کے خلاف نیب کوئی ٹھوس ثبوت نہیں فراہم کر سکا کہ لندن فلیٹس کے نواز شریف مالک ہیں لیکن حیران کن انداز میں عدالت نے نیب کی طرف سے پیش کیے گئے مفروضہ کا باقائدہ ذکر کیا کہ چونکہ لندن فلیٹس میں نواز شریف اور اُن کے مرحوم والد میاں شریف رہتے رہے جس سے ثابت ہوا کہ نواز شریف ہی ان فلیٹس کے مالک ہیں۔ اس مفروضہ کی بنا پر نواز شریف کو لندن فلیٹس کا مالک ’’ثابت‘‘ کرتے ہوئے عدالت نے سزا کا حکم سناتے ہوئے کہا کہ لندن فلیٹس کے مالک نواز شریف چونکہ یہ ثابت نہیں کر سکے کہ اُنہوں نے یہ فلیٹس کیسے خریدے اس لیے انہیں اس بنا پر سزا دی جاتی ہے۔ سابق چیف جسٹس افتخار محمد چوہدری اور دوسرے کئی قانون دان حیران ہیں کہ اگر کرپشن ثابت نہیں ہوئی تو پھر آمدن سے زائد اثاثہ رکھنے کے جرم میں کیسے سزا دی جا سکتی ہے اور یہاں تو نواز شریف اور لندن جائیداد کا تعلق بھی مفروضہ کی بنا پر جوڑا گیا۔ احتساب عدالت کے اس فیصلہ میں کہیں تین سو ارب کی کرپشن کا کوئی ذکر نہیں نہ ہی کہیں منی لانڈرنگ کی کوئی بات کی گئی۔ چند ہفتہ قبل احتساب عدالت کے اس ناقص فیصلہ کو معطل کرنے کی اپیل اسلام آباد ہائی کورٹ میں نواز شریف، مریم نواز اور کیپٹن صفدر کی طرف سے دائر کی گئی۔اسلام آبادہائی کورٹ اس کیس میں کبھی ایک بنچ بنتا ہے تو کبھی دوسرا۔ ابھی تک نواز شریف وغیرہ کی طرف سے دائر کی گئی کچھ دوسری درخواستوں کو تو سنا گیا لیکن احتساب عدالت کے اس ناقص فیصلہ کو معطل کرنے کی درخواست کو ہائی کورٹ نے نہیں سنا۔ پاکستان کی سیاست اور آئین و قانون کے حوالہ سے جانے والا ایک نامور نام وسیم سجاد کا ہے۔ وسیم سجاد صاحب سیاسی طور پر نواز شریف اور ن لیگ کے مخالف ہیں۔ وسیم سجاد کے مطابق عام حالات میں عدالتیں ضمانت کے مقدمات کی سماعت پہلے کرتی ہیں کیونکہ ایسی صورتحال میں ملزم یا مجرم جیل میں ہوتے ہیں جبکہ اس کیس میں مجرموں نے رضاکارانہ طور پر اپنے آپ کو قانون کے حوالے کیا تھا۔ وسیم سجاد کے مطابق کیپٹن صفدر کو چونکہ ایک سال کی سزا سنائی گئی اس لیے اُن کی ضمانت کاتو کوئی مسئلہ نہیں۔ مریم نواز کے بارے میں وسیم سجاد کا کہنا تھا کہ مریم کو سات سال کی سزا ہوئی لیکن خاتون ہونے کی وجہ سے اُنہیں ضمانت دی جا سکتی ہے جبکہ نواز شریف کے دل کی مرض کی شدت دیکھتے ہوئے اُنہیں بھی ضمانت دی جا سکتی ہے۔ وسیم سجاد صاحب نے اس کیس کے میرٹ پر بات ہی نہیںکی۔ سینئر وکیل بابر ستار نے اس احتساب عدالت کے فیصلہ پر تبصرہ کرتے ہوئے لکھا:
’’بہت سے افراد کا کہنا ہے کہ اُس وقت قانون کا مقصد فوت ہوجاتا ہے جب قانونی طریق کار، قانون کی نرمی اور چالاک وکلا کی وجہ سے وہ افراد بھی بچ نکلتے ہیں جن کے بارے میں ’ہر کوئی‘ جانتا ہے کہ وہ بدعنوان اور مجرم ہیں۔ اُن کا کہنا ہے کہ بُرے آدمی کو ہر قیمت پر سزا ملنی چاہیے، خواہ اس کے لیے قانونی طریق کار اور طے شدہ اصول و ضوابط میں کچھ تبدیلی کیوں نہ کرنی پڑے۔ جب یہ سوچ غالب اور فعال ہو جائے تو پھر فیصلوں کے نتائج بہت حد تک واضح ہو جاتے ہوں گے، یہ اور بات ہے کہ ان میں قانونی استدلال موجود نہیں ہو گا۔ نیب عدالت کا فیصلہ اسی کیٹیگری میں آتا ہے۔ اس میں قانونی استدلال ڈھونڈنے سے نہیں ملتا۔ یہ بڑی حد تک اُس قیاس اور تاثر کا نتیجہ ہے جو نواز شریف کے خلاف میڈیا ٹرائل نے پیدا کیا ہوا تھا۔‘‘
بابر ستار نے درست کہا کہ فیصلہ تو میڈیا ٹرائل کے ذریعے پیداکیے گئے تاثر کا نتیجہ ہے۔ دیکھنا اب یہ ہے کہ کیا پاکستان کے عدالتی نظام میں واقعی فیصلہ قانون اور شواہد کی بجانے کھا گئے، لوٹ کے لے گئے تین سو ارب روپے کی کرپشن کر گئے جیسے تاثر کی بنیاد پر ہی کیے جائیں گے۔ اس کا فیصلہ بھی عدلیہ کو ہی ہی کرنا ہے۔ اس کیس سمیت، سیاسی فیصلے دراصل عدلیہ کا ٹرائل ہوتے ہیں۔ دیکھتے ہیں اس ٹرائل میں عدلیہ کامیاب ہوتی ہے یا نہیں؟(بشکریہ جنگ لاہور)
(کالم نگار کے نام کے ساتھ ایس ایم ایس اور واٹس ایپ رائے دیں 00923004647998)

جی ہاں میرے کالم کے نام سے یہی آپ کو اندازہ ہو گیا ہو گا کہ میرا اشارہ ان نوازشات کی جانب ہے جو پنجاب لینڈ ریکارڈ اتھارٹی سے ختم ہونے کا نام ہی نہیں لے رہی جس کی ایک بڑی وجہ یہ بھی ہے کہ کسی بھی احتساب اداروں نے ابھی تک درست سمت کا رخ نہیں کیا ہے صرف اضافی تنخواہوں کے ایک اجتماعی ایشو میں صرف 4افسران کی پیشی نے باقی سب کا بھی حلق خشک کر ڈالا ہے اگر چیئرمین نیب اور ڈی جی نیب کو ذرا سا بھی شک ہو جائے کہ کیسے ورلڈ بنک کے پیسوں سے اربوں روپے خرد برد کئے گئے ہیں کیسے من پسند ٹھیکیداروں سے اراضی ریکارڈ سنٹر انتہائی ناقص میٹریل سے تیار کروائے گئے ہیں کیسے بلیک لسٹ کمپنیوں کو ڈیٹا انٹری، سکینگ اور سوفٹ ویئر کی تیاری کے ٹھیکے دیدیئے گئے ہیں یہ نوازشات کی ایک لمبی فہرست میرے پاس موجود ہے بمعہ ثبوت اگر چیئرمین نیب، ڈی جی نیب یا ڈی جی اینٹی کرپشن پنجاب سمیت کوئی بھی ادارہ موصول کرنا چاہتا ہے تو بندہ حاضر خدمت ہے آج کے میرے اس کالم میں نئے ڈی جی PLRA کی توجہ دلاﺅ نوٹس ہے حضور پنجاب لینڈ ریکارڈ اتھارٹی میں مانیٹرنگ کے غیر فعال سسٹم نے ادارے کی بنیادیں مزید کھو کھلی کر دی ہیں نان پروفیشنل سٹاف 1400سال سے انگریز کے بنائے ہوئے اس سسٹم کو دھکا لگانے کی ناکام کوششیں کر رہا ہے جس کی تیاری میں کئی سو سال لگے اور انتھک محنت، حاضر دماغی اور نان سٹاپ سروس یعنی کے نہ دن دیکھا نہ رات ہر وقت ڈیوٹی دینے والا وہ سٹاف اس محکمہ میں تعینات رہا جو کہ 24گھنٹے تو کیا48.48 گھنٹے فیلڈ میں ڈیوٹی سرانجام دیتے تھے جن کو بدنام زمانہ پٹواری، تحصیلدار کلچر قرار دیتے ختم کیا جا رہا ہے مگر آپ کا سٹاف تو گھڑی کو دیکھ کر مطلوبہ ٹائم پر ہی روزانہ اٹھ جاتا ہے اور کرپشن جناب پٹواریوں سے 4ہاتھ زیادہ ہو چکی ہے خیر میں اب نشاندہی کرتا ہوں مختصر اشاروں میں جس کو با آسانی آپ سمجھ پائیں گے جناب صوبے بھر میں چیک کروایں کہ ایک ہی مشتری کے انتقال کو توڑتے ہوئے آدھی سے زیادہ حکومت خزانے میں جمع ہونے والی فیس کو ن کس کیلئے بچا رہا ہے اور حکومتی خزانے کو کتنا نقصان پہنچایا جا رہا ہے مگر آپ کے پاس تو کوئی ٹی او ایس ڈی ہی نہیں ہے تو پھر یہ کون چیک کرے گا چلو کسی نان پروفیشنل بندے کی ہی ڈیوٹی لگا دیں۔
بعض اضلاع میں چالان بناتے وقت فیسوں میں اضافہ کیساتھ بھی اراضی ریکارڈ سنٹر سٹاف فائدہ اٹھا رہا ہے کیوں کہ لوگ سمجھتے ہیں کہ جو چالان تیار کیا گیا ہے اس میں سرکاری فیس میں جمع ہوتی ہے مگر بعد ازاں جتنی سرکاری فیس جمع ہونی ہے وہ تو ہو جاتی ہے مگر اضافی فیس بد نیتی سے اپنے استعمال میں کی جا رہی ہے اس پریکٹس کے عوض 2سے زیادہ اے ڈی ایل آر معطل بھی ہو چکے ہیں مگر پریکٹس نہیں روکی اب ان چالانوں کو کون چیک کرے گا جی ہاں اپنے اکاﺅنٹس کے کسی بھی ٹیکنیکل سٹاف سے تصدیق کروا لیں شاید وہ یہ کام کر سکے اب آتے ہیں لوکل کمیشن کے اپانمنٹ کرنے پر جو کہ ایس او پی کے مطابق اس وقت اپانمنٹ ہوتا ہے جب بندہ جیل میں ، ہسپتال میں، سیریس حالت میں ہو ،یا معذوری کے باعث آن بیڈ ہو مگر اس کسی بھی شق کو مدنظر نہیں رکھا جا رہا بلکہ وی آئی پی کلچر سے بڑی بڑی فیس وصول کرتے ہوئے یہ سروس ان کی خدمات کے لئے وقف کی جا رہی ہے بعض جگہ سے تو لاکھوں بھی وصول ہوئے ہیں مگر اب ان کو کون چیک کرے گا ۔ میری اطلاعات کے مطابق جو اعداد و شمار بنائے گئے ہیں وہ 2سے 3 ہزار سے زیادہ نہیں بتائے گئے ۔اب یہاں کام آپ کے محکمے کی انٹیلی جنس کا شروع ہوتا ہے جو کہ اس وقت اپنی مثال آپ ہے اور اراضی ریکارڈ سنٹر میں داخل ہوتے ساتھ ہی بلند آواز میں اپنا تعارف بطور انٹیلی جنس سٹاف PLRA کرواتے ہیں شاید ان کو یقین نہیں ہے کہ وہ انٹیلی جنس سٹاف بھرتی ہوئے ہیں میرا تو خیال ہے کہ انٹیلی جنس سٹاف کو تو اپنا آپ ظاہر یہی نہیں کرنا چاہئے وہ تو ایک گمنام بندہ ہونا چاہئے ۔جیسے کوئی چائے والا، جیسے کوئی اشٹام فروش، جیسے کوئی کمپیوٹر آپریٹر، جیسے کوئی ٹاﺅٹ ،جیسے کوئی فقیر کے روپ میں اپنی جاب کے اندر اپنا پورا کردار ادا کرتا ہوادیکھائی دینا چاہئے مگر یہاں پر ایسا بالکل نہ ہے اب دیکھتے ہیں یہ ذمہ داری پوری کر سکتے ہیں یانہیں ۔سنا ہے کہ پنجاب لینڈ ریکارڈ اتھارٹی کا 700 کروڑ روپے کا بجٹ حکومت دینے سے قاصر ہے اور ضلع بھر میں15 کروڑ سے زائد ملازمین کی تنخواہ بھی اب نکالنا مشکل ہو چکا ہے یہی وجہ ہے کہ فرد فیس اور انتقال کی سرکاری فیس میں 500 ریکارڈ اضافہ کر دیا ہے جناب والی پانچ سو روپے سائل رجسٹری کی پاسنگ کے دوران حکومت کو دے گا اور پانچ سو روپے سائل PLRA کے ملازمین کیلئے وقف کرے گا اور بدتمیزی الگ سے برداشت کرے لمبی لائنوں میں ٹوکن کے حصول کے لئے الگ سے خوار ہو۔ جبکہ سسٹم میں تاخیری، کھاتہ بلاک یا آپ کے انتظامی افسران کی غیر موجودگی میں وہ الگ سے خواری برداشت کرے کیا گفٹ دیا ہے عوام الناس کو میری جناب سے گذارش ہے کہ کبھی ماڈل ٹاﺅن اراضی ریکارڈ سنٹر یا قصور کے کسی اراضی ریکارڈ سنٹر پر اپناسپرائز وزٹ رکھیں اور دیکھیں اذیت کسے کہتے ہیں اور عوام کیساتھ کیسا سلوک ہو رہا ہے عوام اب پٹواریوں سے زیادہ آپ کے اس بدتمیزی ، غرور تکبر سے بھرے ہوئے سٹاف کے خلاف سراپا احتجاج ہے جو کہ بند کمروں میں بیٹھ کر عوام کو اپنے پی اے کے ذریعے حکم صادر کر رہے ہیں ، ایک اہم نشاندہی، ڈی جی صاحب کیا آپ کے شعبہ فنانس اور دیگر انتظامی افسران کو بالکل کوئی ڈر فوف نہ ہے اتنا بڑا بوگس فرضی اور جعلسازی سے بھرا کام کیا جا رہا ہے جس کی میں نے قبل ازیں نشاندہی کی مگر کوئی نوٹس نہ لیا گیا مگر اس وقت محکمہ کی ذمہ داری آپ کی ہے تو جناب خبر یہ ہے کہ ایل او ایس آرگنائزیشن میں بھرتی ہونے والا علی سعید اصغر خود کو لاہور ڈویلپمنٹ اتھارٹی (LDA) کا ملازم ظاہر کر رہا ہے اور پنجاب لینڈ ریکارڈ اتھارٹی بغیر کسی تصدیق کے آرگنائزیشن کے بھرتی کردہ پرائیویٹ افراد کو بطور ایڈیشنل ڈائریکٹر ایڈمن لگا رکھا ہے جو کہ خلاف قانون اور انتہائی سنگین غلطی میں شمار کیا جا رہا ہے اس سے بڑھ کر اور کیا نوازش ہو گی اس طرح آپ کے اردگرد بھی بہت سے افراد جو کسی کام کے نہیں ہیں صرف نوازشات کے تحت لاکھوں روپے تنخواہیں وصول کرتے ہوئے اس اتھارٹی کو سنبھالنے کی بجائے گرانے میں مصروف ہے جب تک محکموں سے ایکسپرٹ اور ریونیو کی سمجھ بوجھ رکھنے و الاسٹاف آپ کے پاس موجود نہیں ہو گا ۔آڈٹ کرنے والے آڈیٹر نہیں ہوں گے ،مانیٹرنگ کرنے والے آفیسر نہیں ہوں گے ،کرپشن کی صحیح معنوں میں روک تھام کیلئے انٹیلی جنس ونگ کو کھلے اختیارات اور مضبوط کرنا ہو گا تاکہ کوئی بھی آفسر پھر بہانہ لگا کر ایک دوسرے پر ذمہ داری نہ ڈال سکے۔ ہو سکتا ہے یہ سارے پوائنٹ جو میں نے اٹھا ئے ہیں ان پر جناب کی جانب سے کوئی ہدایت بھی جاری کی گئی ہوں یا آپ کے نوٹس میں بھی لائی گئی ہوں مگر ان پوائنٹ کا رزلٹ آج بھی آپ حاصل کرنے میں ناکام ہوں گے اللہ تعالیٰ آپ کو اپنے حفظ و امان میں رکھے اور آپ اس اتھارٹی کو آباد کریں یہاں پر ایمانداری سے کام کرنے والے سٹاف ملازمین کے لئے آپ باعث رحمت ثابت ہوں اور اس مشکل گھڑی میں آپ ان سب کو ساتھ لیکر چلیں میری دعائیں آپ کے ساتھ ہیں خدارا یہ نوازشات والا سسٹم بند کروائیں کام کرنے والوں کو اس اتھارٹی میں جگہ دیں ناکام اور کرپشن زدہ پرزے اس محکمہ سے باہر نکال دیں تب میرٹ بھی بحال ہو گااور PLRA کا ڈوبتا ہوا ٹائی ٹینک بھی اپنے پاﺅں پر کھڑا ہو جائے گا اور بدنامی کی چھاپ بھی دور ہو سکے۔ اللہ تعالیٰ ہم سب کا حامی و ناصر ہو۔

(ایمرا نیوز)

بلاشبہ غیب کا علم اللہ کو ہے، بے شک ہو وہی جو پاک پروردگار چاہے، لیکن یہ بھی اک حقیقت کہ علمِ نجوم ،دست شناسی، علم الاعداد سے انکار بھی ناممکن ہے۔
جون 93ء، چار خواتین مسز سائرہ جہانگیر، بیگم خورشید نیازی، ڈاکٹر ثمین ذکاء، ڈاکٹر عائشہ ذکاء (جو شاہدرہ لاہور میں ’’فری میڈیکل ڈسپنسری‘‘ چلارہی تھیں) کامری میں ساملی ٹی بی اسپتال سوشل ویلفیئر سیٹ اپ دیکھنے آنا، اسپتال کے دورے، بریفننگ کے بعد باتوں باتوں میں ان خواتین کو پتا چلنا کہ سوشل ویلفیئر افسر کو آسٹرولوجی (علم نجوم ) کی سوجھ بوجھ ہے، مسز سائرہ جہانگیر (کرکٹر ماجد خان) کی بہن کا عمران خان کا ذکر چھیڑ کر کہنا ’’وہ شادی نہیں کر رہا، ہماری شدید خواہش کہ اس کا گھر بس جائے، لیکن ہم جب بھی کہیں تو ایک ہی جواب دیتے ہیں کہ ’’شادی نہیں کروں گا، مجھے ملک و قوم کیلئے کچھ کرنا ہے، میرے پاس بیوی بچوں کیلئے وقت نہیں‘‘ چند معلومات لے کر سوشل ویلفیئر افسر کا حساب کتاب لگا کر بتانا کہ ’’فکرنہ کریں، عمران خان کی مارچ 95ء سے ستمبر 95ء کے دوران شادی ہو جائے گی، شادی پسند کی ہوگی اور کسی غیر ملکی خاتون سے ہوگی‘‘، چند دن بعد ان خواتین کا ’’برکی ہاؤس‘‘ گھوڑا گلی مری میں اسی سوشل ویلفیئر افسر کو لنچ پر بلانا، وہاں ماجد خان کی والدہ سے ملاقات ہونا، ماجد خان کی ضعیف والدہ کا بتانا کہ عمران خان کی تاریخ پیدائش 25نومبر نہیں 5اکتوبر ہے، سوشل ویلفیئر افسر کا پھر سے عمران کی شادی والی اپنی بات دہرانا، خواتین کا خوشی خوشی یہ سب سننا اور پھر واقعی دوستو… 16مئی 1995ء کو عمران خان کی جمائما سے شادی ہوجانا۔
عمران خان اتوار کو حلف اُٹھائیں!
بات آگے بڑھانے سے پہلے بتادوں کہ کل کے یہ سوشل ویلفیئر افسر اور آج پلاننگ کمیشن میں چیف قمر عباس شاہ، ساڈے شاہ جی، جو گزشتہ 30سال سے شوقیہ علم نجوم کا سفر جاری رکھے ہوئے ہیں، جن کے پاس آسٹرولوجی، پامسٹری اور نمرالوجی کے حوالے سے نادر و نایاب کتابوں پر مشتمل پاکستان کی ایک بہترین لائبریری اورجن کی نہ صرف عمران خان سے متعلق پیشن گوئی سچ نکلیں بلکہ سینکڑوں باتیں سچ ثابت ہوچکیں، جیسے انہوں نے پی پی وزراء کو 6ماہ پہلے بتا دیا کہ ’’وزیراعظم بے نظیر بھٹو کا ستمبر 1996ء میں ڈاؤن فال شروع ہونے والا ہے، وہ مجھے 27اکتوبر سے 7نومبر کے دوران جاتی ہوئی دکھائی دے رہیں، وہی ہوا، 5نومبر کو لغاری صاحب نے بی بی حکومت برطرف کردی‘‘، پھر جب صدر لغاری اور وزیراعظم نواز شریف کی لڑائی انتہا کو پہنچ چکی، چند لیگی رہنما ان کے پاس آئے، شاہ صاحب نے حساب کتاب کر کے بتایا’’ فکر نہ کریں نواز شریف صاحب کو کچھ نہیں ہوگا، لغاری صاحب فارغ ہوجائیں گے‘‘، ایسا ہی ہوا، پھر جب نواز شریف نے 17فروری 1997ء کو 3 بجکر 18 منٹ پر دوسری بار وزارتِ عظمیٰ کا حلف اُٹھایا تو شاہ جی نے اسی شام بتا دیا کہ یہ دن اور وقت حلف لینے کیلئے مناسب نہیں تھا، بعد میں ایک دن اس وقت کے لیگی رہنما ظفر علی شاہ کے داماد عسکری حسن سید (زلفی بخاری کے ہم زلف) کو شاہ صاحب نے حساب کتاب کر کے جب بتایا کہ ستمبر 99ء کے آخری ہفتے کے بعد میاں نواز شریف کو اچانک اور زبردستی وزارت ِ عظمیٰ سے ہٹا دیا جائے گا تو تب غصہ کرنے اور مذاق اڑانے والے عسکری سید12اکتوبر 1999ء کو مارشل لاء لگنے کے بعد شاہ جی کو ڈھونڈتے پھر رہے تھے۔
عمران خان اتوار کو حلف اُٹھائیں!
اور سنیئے، 2008ء کا الیکشن زوروں پر تھا، شاہ جی نے راجہ پرویز اشرف کے خاندان اور ایک سینئر بیوروکریٹ کو خاص طو ر پر کہا کہ ’’خدا کیلئے بے نظیر بھٹو کو 26دسمبر سے 6جنوری تک جلسے جلوسوں سے روکیں، وہ کسی عو امی اجتماع میں آنے کی بجائے ٹیلی فونک خطاب کریں، یہ ان کی زندگی کے خطرناک ترین دن ہیں، شاہ جی نے بڑی عید کے دوسرے دن 22دسمبر کو اپنے گھر آئے ایک بیوروکریٹ سے بھی یہ بات کہی، لیکن بی بی کب کسی کی سننے والی، وہ بھلا کب کسی کے کہنے پر رُکیں اور پھر 27دسمبر کو سانحہ لیاقت باغ ہو گیا، آگے سنیئے، شاہ جی کے کہنے پر اپنا حلف مقررہ وقت سے آدھا گھنٹہ آگے کرنے اور یہ آدھا گھنٹہ صدر پرویز مشرف کے ساتھ بیٹھ کر چائے پی کر گزارنے والے یوسف رضا گیلانی کو شاہ جی نے 3ماہ پہلے بتا دیا تھا کہ اپریل 2012ء میں آپ کی وزاتِ عظمیٰ جاتی نظر آرہی اور یہی ہوا، اسی طرح راجہ پرویز اشرف (جن سے شاہ جی کے پرانے تعلقات) کو حساب کتاب لگا کر کئی سال پہلے شاہ جی نے بتادیا کہ ’’آپ کی منزل وزارت سے بھی اوپر اور گیلانی صاحب کے آخری دنوں میں شاہ جی نے راجہ پرویز اشرف کو بتایا کہ تیار ہوجائیں حالات آپ کو وزیراعظم بنانے والے ہیں‘‘، یہ بات بھی بڑی مزے کی کہ راجہ پرویز اشرف کو نومبر 1998ء کے شروع میں شاہ جی نے کہا کہ ’’راجہ صاحب اگلے دو ماہ آپ نے تھانے، کچہری سے دور رہنا ہے‘‘، انہوں نے اس بات پر عمل تو کیا مگر ایک روز انہیں بینظیر بھٹو کے ساتھ عدالتی پیشی پر آنا پڑا، عدالت میں ان کا جھگڑا ہو گیا، بات مارکٹائی تک جا پہنچی، مقدمہ درج ہوا اور راجہ صاحب کو 5ماہ تک جیل کاٹنا پڑی۔ پرویز مشرف بھارت کے دورے پر روانہ ہونے والے تھے، صدر کے ایک دوست نے شاہ جی سے رابطہ کیا، حساب کتاب لگا کر انہوں نے کہا کہ ’’یہ دن اچھے نہیں، چاہے جتنی کوششیں کر لیں، دونوں ممالک کے درمیان کوئی معاہدہ نہیں ہوگا‘‘، یہ سن کر صدر کے دوست نے کہا کہ ’’شاہ جی تاریخ کا اعلان ہو چکا ہے، سب کچھ طے ہے، اب دورہ تو کسی صورت ملتوی نہیں ہوسکتا‘‘، مزید حساب کتاب کے بعد شاہ جی بولے ’’ہاں اگر صدر مشرف صبح ساڑھے 5بجے بھارت کیلئے روانہ ہوں تو یہ ہو جائے گا کہ صدر لائم لائٹ میں آئیں گے، ان کا اور پاکستان کا امیج بہت بہتر ہوگا، ایسا ہی کیا گیا، صدر مشرف ساڑھے 7 بجے کی بجائے صبح ساڑھے 5بجے روانہ ہوئے اور باقی سب آپ کے سامنے ہے، شاہ جی نے افتخار چوہدری کو برطرف کرنے والے دن ہی ایک جنرل صاحب کو فون کر کے کہا ’’آج کا دن جوڈیشنری کو سپورٹ کرے، یہ تو مشرف نے خود کشی کر لی‘‘ شاہ جی نے ہمیں اپریل میں بتا دیا کہ مشرف کا اگست میں جانا ٹھہر گیا ہے، یہاں یہ بات بھی ضرور بتانی ہے کہ 2000ء میں امریکی انتخابات ہورہے، بش، الگور میں مقابلہ، شاہ جی کا 8صفحات پر مشتمل مضمون امریکی الیکشن ڈے سے ایک ماہ پہلے دنیائے آسٹرولوجی کے سب سے بڑے بین الاقوامی فورم ’’سوسائٹی فار آسٹرالوجیکل ریسرچ (آئی ایس اے آر) کی ویب سائٹ نے چھاپا، شاہ جی نے اس مضمون میں بتایا کہ نہ صرف بش 2000ء کا الیکشن جیتے گا بلکہ وہ 2004ء کا الیکشن بھی جیت جائے گا، یہ وہ وقت تھا جب بھار ت سمیت دنیا کے ٹاپ آسٹرالوجسٹ الگور کو جتوا رہے تھے لیکن شاہ جی کی پیشن گوئی سچی نکلی، بش نہ صرف 2000ء کے انتخابی معرکے میں فتح یاب ہوا بلکہ بعد میں 2004ء کا الیکشن بھی جیت گیا۔
عمران خان اتوار کو حلف اُٹھائیں!
یہ تو شاہ جی کی چند پیشنگوئیاں، اس کے علاوہ سینکڑوں اور بھی، یہ پھر کبھی سہی، آج یہ چند مثالیں دینے کی وجہ یہ کہ دو دن پہلے شاہ صاحب سے ملاقات ہوئی تو انہیں عمران خان کے حوالے سے متفکر پایا، پوچھا تو کہنے لگے ’’عمران خان 18اگست ہفتے کے دن حلف اُٹھا رہے ہیں، لیکن یہ دن ٹھیک نہیں، اگر اس روز حلف برداری ہوئی تو نئی حکومت مسلسل مشکلات میں گھری رہے گی، یہ سن کر میں نے کہا ’’شاہ جی آپ کا پیغام تو پہنچ جائے گا، مگر اب تو حلف برداری کے کارڈ بھی چھپ گئے، پھر بھی آپ کے خیال میں عمران خان کو حلف اُٹھانا کب چاہیے؟‘‘ شاہ جی بولے ’’میرے حساب کے مطابق اگر عمران خان ہفتے کی بجائے اتوار 19اگست کو دن 11بجکر 45منٹ سے 11بجکر 54منٹ کے دوران حلف اُٹھائیں تو نہ صرف عمران خان کی حکومت مضبوط اور مستحکم رہے گی بلکہ ملک کیلئے بھی یہ بہت بہتر ہوگا‘‘۔
اتنا کہہ کر شاہ جی خاموش ہوئے، چند لمحے خاموشی رہی، پھر ان کا موبائل بجا، وہ فون سننے لگے اور اب میرا متفکر ہونا فطری عمل تھا، کیونکہ مجھے یہ علم کہ بلاشبہ غیب کا علم اللہ کو، بے شک ہو وہی جو پاک پروردگار چاہے، لیکن یہ بھی اِک حقیقت کہ علم نجوم، دست شناسی، علم الاعداد سے انکار بھی ناممکن ہے۔(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)
اس مرتبہ ہم جو جشن آزادی منا رہے ہیں ۔ وہ کچھ حلقوں کے بقول ’’ نئے پاکستان ‘‘ کا پہلا جشن آزادی ہے ۔ نیا پاکستان کیا ہے اور پرانا پاکستان کیا تھا ؟ اس حوالے سے ہر کوئی اپنی اپنی تعبیر کر رہا ہے ۔ جسے پرانا پاکستان کہا جا رہا ہے ، اس میں ہم 71سال گزار چکے ہیں اور نیا پاکستان تعمیر ہونا ابھی ہے ۔ 25جولائی 2018 کے عام انتخابات میں پاکستان تحریک انصاف ملک کی ایک بڑی سیاسی جماعت بن کر ابھری ہے ۔ وہ مرکز کے ساتھ ساتھ پنجاب اور خیبر پختونخوا میں بھی حکومت بنا رہی ہے جبکہ بلوچستان میں وہ مخلوط حکومت کا حصہ ہو گی ۔ کچھ حلقے اس کو نیا پاکستان سے تعبیر کر رہے ہیں ۔ ان کے خیال میں پاکستان تحریک انصاف کے سربراہ عمران خان اس نئے پاکستان کی تعمیر کریں گے ۔ نئے پاکستان کے بارے میں عمران خان کے پاس واضح تصور ہو گا لیکن یوم آزادی کی مناسبت سے بانی پاکستان قائد اعظم محمد علی جناحؒ کی اس تقریر کا حوالہ بہت زیادہ موزوں ہو گا ، جو انہوں نے 11 اگست 1947 ء کو پاکستان کی آئین ساز اسمبلی میں کی تھی اور جس میں انہوں نے بتایا تھا کہ مملکت خداداد پاکستان کو کیسا ہونا چاہئے ۔ اب جسے پرانے پاکستان سے تعبیر کیا جا رہا ہے ، میرے خیال میں وہ پاکستان قائد محمد علی جناحؒ کے تصورات اور علامہ اقبال کے خدوخال کے مطابق نہیں تھا ۔ لہٰذا نیا پاکستان ایسا ہونا چاہئے ، جو بابائے قوم کے خوابوں کی تعبیر ہو ۔ 11 اگست 1947 ء کے تاریخی خطاب میں اس پاکستان کی تعمیر کے لئے تمام رہنما اصول موجود ہیں ۔ ایسا پاکستان جہاں مذہبی آزادی ، قانون کی حکمرانی اور مساوات ہو او ر کرپشن ، اقربا پروری سے پاک ہو ۔ محمد علی جناح ؒ نے پاکستان کے قیام کو ایک غیر معمولی واقعہ قرار دیا تھا اور اپنے خطاب میں فرمایا تھا کہ ’’ دنیا کی تاریخ میں اس طرح کی کوئی مثال نہیں ملتی ۔ پوری دنیا اس انقلاب سے حیران ہے ، جس نے برصغیر میں دو خود مختار ریاستوں کو جنم دیا ہے ۔بہت سے لوگ ہیں ، جو انڈیا کی تقسیم سے متفق نہیں ہیں …لیکن یہ بے مثل انقلاب رونما ہو چکا ہے… میرا فیصلہ یہ ہے کہ اسکے سوا کوئی حل نہیں تھا اور تاریخ میرے فیصلے کو درست ثابت کریگی ۔ ‘‘ پھر تاریخ نے یہ دیکھا کہ بانی پاکستان کو جب بیماری کی حالت میں زیارت ( بلوچستان ) سے کراچی کے ماڑی پور ایئربیس پر لایا گیا اور وہاں سے مہتا پیلس تک لیجانے کیلئے ایمبولینس میں لٹایا گیا تو ایمبولینس گاڑی راستے میں بند ہو گئی اور اسکے بعد بے مثال طریقے سے ایک نئی ریاست قائم کرنیوالے اور اسے تاریخ کی بے مثال ریاست بنانے کاعزم رکھنے والے قائد نے کراچی کے ستمبر کے قہر آلود گرم موسم میں ماڑی پور روڈ پر بے بسی کے عالم میں اپنی زندگی کے آخری سانس لئے اور پھر وہ پاکستان کبھی تعمیر نہ ہو سکا ، جس کا انہوںنے خواب دیکھا تھا ۔ 11ستمبر 1948ءکو بانی پاکستان اس دنیا سے رخصت ہوئے اور ان لوگوں نے پھر یہ کہنا شروع کردیا کہ برصغیر کی تقسیم غلط تھی ۔ ان لوگوں نے محمد علی جناح ؒ کے اس فیصلے کو غلط ثابت کرنا شروع کر دیا ، جس کی توثیق محمد علی جناح تاریخ سے کرانا چاہتے تھے ۔ جب 16دسمبر 1971ء کو سقوط ڈھاکا ہوا تو برصغیرکی تقسیم کے مخالفین نے یہ دعوی کیا کہ تاریخ نے محمد علی جناح کے فیصلے کو غلط ثابت کر دیا ہے ۔ اس بات کو چیلنج کرنے کیلئے ذوالفقار علی بھٹو میدان میں آئے تو 4 اپریل 1979ء کو انہیں بھی گڑھی خدا بخش کے قبرستان میں ابدی نیند سلا دیا گیا ۔ ان کے بعد محترمہ بے نظیر بھٹو نے بابائے قوم محمدعلی جناحؒ کے فیصلے کو درست ثابت کرنے کیلئے کوششیں شروع کیں تو 27 دسمبر 2007ء کو ایک بار پھر برصغیر کی تقسیم کے مخالف برملا یہ کہہ رہے تھے کہ پاکستان کا قیام غیر فطری تھا ۔
میرے خیال میں نیا پاکستان وہ ہو سکتا ہے ، جو بانی پاکستان کے فیصلے کو درست ثابت کرے اور انکے تصورات کے مطابق ہو ۔ عمران خان کو وزارت عظمی کا حلف لینے سے پہلے بانی پاکستان کے 11 اگست 1947 کے خطاب اور اس کے تاریخی پس منظر کا دانشورانہ ادراک کرنا چاہئے ۔ انہیں یہ سمجھنا چاہئے کہ قائد اعظم کس طرح کا پاکستان بنانا چاہتے تھے اور وہ کیوں نہیں بنا سکے۔ یہ ادراک حاصل کرنے سے قبل اس بات پر ایمان لانا ضروری ہے کہ قائد اعظم ایسے رہنما تھے ، جو اپنے عہد تک تاریخ کا مکمل شعور رکھتے تھے اور مستقبل کے بارے میں ان سے بہتر کسی کا وژن نہیں تھا ۔ اس کے بعد اس بات پر غور کرنا ہو گا کہ قائد اعظم کا یہ انجام کیوں ہوا اور ان کے تصور کے مطابق پاکستان کیوں نہیں بن سکا ۔ اس کیلئے ضروری ہے کہ 11اگست کی تقریر کے جزئیات پر غورکیا جائے ۔ پاکستان کی آئین ساز اسمبلی سے 11 اگست 1947ء کو اپنے پہلے خطاب میں بانی پاکستان نے سب سے پہلے ارکان اسمبلی کو یہ باور کرایا تھا کہ یہ اسمبلی ہر طرح کے فیصلوں کی مجازہے اور وہی اس ملک کا بالادست ادارہ ہے ۔ بابائے قوم نے دوسری بات یہ فرمائی تھی کہ ریاست کی بنیادی ذمہ داری لوگوں کے جان و مال کا تحفظ فراہم کرنا ہے ۔ ان کی تیسری بات یہ تھی کہ ’’ رشوت اور کرپشن ‘‘ زہر قاتل ہیں اور ہمیں ان لعنتوں سے آہنی ہاتھ کے ساتھ نمٹنا ہو گا ۔ ‘‘ انہوں نے اپنے خطاب میں کئی بار فرمایا ’’ سنو ، سنو ، یہ زہر ہے ‘‘ ۔ اس کے بعد انہوں نے اقرباپروری اور من پسندی کو بڑی لعنت قرار دیا۔ بانی پاکستان نے 11اگست 1947ء کے خطاب میں ریاست کے آئین کا بنیادی ڈھانچہ بھی واضح کر دیا تھااور فرمایا تھا کہ ’’ اس ملک میں مذہب ، مسلک ، رنگ و نسل اورزبان پر کوئی تفریق نہیں ہو گی اور پاکستان میں رہنے والے ہر شہری کو مساوی حقوق حاصل ہونگے ۔ ‘‘ قائد اعظم لوگوں کی مذہبی ، مسلکی ، نسلی ، لسانی ، قومی یا گروہی شناخت کے منکر نہیں تھے ۔ وہ صرف یہ واضح کرنا چاہتے تھے کہ ہر کوئی اپنی شناخت برقرار رکھے لیکن وہ یہ بھی مدنظر رکھے کہ دوسری شناخت رکھنے والوں کے بھی مساوی حقوق ہیں ۔ کچھ لوگ اس بات سے چڑ جاتے ہیں کہ یہ تو سیکولرائیٹ کا تصور ہے لیکن وہ اس امر سے انکار نہیں کر سکتے ۔ حرم شریف میں ہر مسلک، نسل، رنگ، قوم اور فرقے کے لوگوں کو داخل ہونے کی اجازت ہے۔ دراصل قائد اعظم کا تصور تھا ، جس کا ماخذ اسلام کے بنیادی تصورات تھے ۔ قائد اعظم نے اپنے خطاب میں طبقاتی تفریق کی بھی نفی کی اور فرمایا کہ ہر شہری کے مساوی حقوق ہیں ۔
اب آتے ہیں کہ قائد اعظم کا پاکستان کیوں نہیں بن سکا ۔ قیام پاکستان کے بعد غیر سیاسی اور انتہا پسند قوتیں قابض ہو گئیں ، جو یہ نہیں چاہتی تھیں کہ پاکستان ایک جمہوری اور روشن خیال ریاست ہو اور یہاں سب کو مساوی حقوق حاصل ہوں ۔ ان قوتوں نے کرپشن اور اقربا پروری کے خلاف احتساب کے نام پر صرف سیاستدانوں کو سیاست سے باہر کرنے اور سماج کو غیر سیاسی بنانے کیلئے کام کیا ۔ انہوں نے سیاست دانوں کا مقابلہ کرنے کیلئے مذہبی انتہا پسندوں کا سہارا لیا ۔ انہوں نے امن وامان کے قیام کے نام پر بدامنی رائج کی اور جمہوری و سیاسی نظام کی جڑوں پر وار کیا ۔ انہوں نے پارلیمنٹ کی خود مختاری کے نام پر پارلیمنٹ کے اختیارات چھیننے کیلئے قانون سازی کی ۔ انہوں نے بھٹو کو پھانسی دی اور بے نظیر کا قتل کیا ۔ اب دیکھنا یہ ہے کہ عمران خان اس انتہا پسند سوچ سے کس طرح نمٹتے ہیں۔
یہ یوم آزادی ہم اس امید کے ساتھ منا رہے ہیں ۔ عمران خان کو یہ سوچنا چاہئے کہ کہیں انکے ارد گردکرپٹ کھرب اور عرب پتی ، جمہوریت دشمن اور انتہا پسند تو نہیں ہیں ۔
نیا سفر ہے پرانے چراغ گل کر دو
(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)