Category لاھور نامہ

لاہور(ویب ڈیسک) محکمہ بلدیات پنجاب نے سول رجسٹریشن فیس میں 100 روپے کمی کردی۔

فیس میں کمی کے بعد اب پیدائش، موت، شادی اور طلاق کے اندراج کے لیے 300 کی بجائے 200 روپے وصول کیے جائیں گے۔سیکرٹری بلدیات پنجاب نورالامین مینگل کا کہنا ہے کہ تاخیر سے اندراج کی مدت کو 2 سال سے بڑھا کر 7سال کر دیا گیا ہے جب کہ تاخیر سے اندراج کی فیس 300 روپے ہے۔

اس کے علاوہ پیدائش اور موت کے سرٹیفکیٹ میں تبدیلی یا غلطی کی صورت میں درخواست گزار کو 500 روپے ادا کرنا ہوں گے۔ انہوں نے کہا کہ عوام کی مالی مشکلات کو مدنظر رکھتے ہوئے فیسوں میں کمی کا فیصلہ کیا گیا ہے۔

لاہور(ویب ڈیسک)بنکنگ عدالت نے شوگر ملز انکوائری کیس میں شہباز شریف اور حمزہ شہباز کی عبوری ضمانت میں توسیع کردی۔
شوگر ملز انکوائری کیس میں ایف آئی اے بنکنگ جرائم کورٹ لاہور میں شہباز شریف اور حمزہ شہباز کی عبوری ضمانت کی درخواست پر سماعت ہوئی تو دونوں سیاسی رہنما پیش ہوئے۔ ڈیوٹی جج محمد اسلم گوندل نے پوچھا کہ الزام کیا ہے اور تفتیش کس مرحلے پر ہے۔
ایف آئی اے کے تفتیشی افسر علی رضا نے جواب دیا کہ کچھ اکاؤنٹس کھولے گئے جس میں مشکوک ترسیلات ہوئیں، ملزمان پر الزام ہے کہ رمضان شوگر مل کے ملازمین کے ذریعے منی لانڈرنگ کی گئی۔ شہباز شریف نے روسٹرم پر آکر کہا کہ میرا رمضان شوگر ملز سے کوئی تعلق نہیں۔
عدالت نے جاری تفتیش پر عدم اطمینان کا اظہار کرتے ہوئے تفتیشی افسر سے کہا کہ بتائیں 2 مہینوں میں دو سے چار لائنیں لکھنے کے علاوہ کیا کیا ہے، آپ کی ڈائری تو بتا رہی ہے کہ کچھ بھی نہیں ہورہا، آپ تفتیش مکمل کریں، آئندہ سماعت پر ڈی جی ایف آئی اے پیش ہوں۔
عدالت نے شہباز شریف اور حمزہ شہباز کی ضمانت میں 25 ستمبر تک توسیع کردی۔

لاہور(ویب ڈیسک) عائشہ اکرم کے معاملے نے سوشل میڈیا کے بعد پرنٹ اور الیکٹرانک میڈیا کی خبروں‌میں بھی خوب پذیرائی حاصل کی اور عائشہ اکرم کو وہ لوگ بھی جاننا شروع ہوگئے جو اس سے پہلےانہیں‌نہیں جانتے تھے….اب مینار پاکستان واقعہ میں اہم پیشرفت سامنے آئی ہے۔ عدالت نے شناخت نہ ہونے والے 98 ملزمان کو کیس سے ڈسچارج کرنے کا حکم دے دیا۔
ضلع کچہری میں مینار پاکستان واقعہ میں ٹک ٹاکر عائشہ اکرم سے بدتمیزی کے کیس میں سماعت ہوئی، جوڈیشل مجسٹریٹ حسن سرفراز چیمہ نے کیس پر سماعت کی۔
عدالت کے مطابق 104 ملزمان کو شناخت پریڈ کے لیے جیل بھجوایا گیا، عدالت 98 ملزمان کو کس بنیاد پر گرفتار کیا گیا۔ ملزمان کو جیل بھجوانے سے پہلے کون سے ثبوت لیے گٸے۔ عدالت 98 ملزمان کو جیل میں رکھنے کا جواز نہیں ہے۔

تفتیشی افسر کا کہنا ہے کہ ملزمان کی شناخت پریڈ کے دوران شناخت نہیں ہوٸی۔گزشتہ روز مینار پاکستان میں بدسلوکی کا نشانہ بننے والی ٹک ٹاکر خاتون عائشہ اکرم کی شناخت پریڈ کی عدالت نے رپورٹ جاری کی تھی۔رپورٹ کے مطابق خاتون نے 104 ملزمان میں سے 6 ملزم شناخت کیے۔ عائشہ اکرم نے شہر یار، مہران، عابد ، ارسلان، ساجد اور افتخار کو شناخت کرلیا۔

رپورٹ کے مطابق خاتون نے 3 گواہوں بلال، ریمبو اور صدام کی موجودگی میں شناخت کی۔ خاتون نے چار ملزمان کو غلط شناخت کیا۔ چاروں ملزمان جیل میں 6 ماہ سے مختلف مقدمات میں قید تھے۔خاتون کے مطابق افتخار نے میرے کپڑے پھاڑے اور ہاتھوں میں اٹھایا۔ عائشہ کے مطابق ارسلان پر تشدد کرنے کا الزام عائد کیا۔ شہر یار نے دھکے دیکر جنگلا کے ساتھ مارا۔ مہران نے زد دو کوب کیا۔خاتون کے مطابق عابد نے سیلفیاں لیں اور غلط حرکات کیں۔ ملزم ساجد نے لڑکوں کو میری طرف اکسایا۔

لاہور(ویب ڈیسک) بیوی کے چھوڑنے کے غم سے شوہر چھلانگ لگانے کے لئے ضلع کچہری کی چھت پر چڑھ گیا۔میڈیارپورٹس کے مطابق لاہور کی عدالت میں بیوی کے چھوڑنے کے غم میں شوہر ضلع کچہری کی چھت پر چھلانگ لگانے کیلئے چڑھ گیا، تاہم احاطہ عدالت میں موجود لوگوں نے عبدالرحمان نامی شوہر کی خود کشی کی کوشش ناکام بنا دی۔

عبدالرحمان کا کہنا تھا کہ بیوی سے بہت پیار کرتا ہوں لیکن صباء نے عدالت میں والدین کے ساتھ جانے کا بیان دے دیا، بیوی مجھے چھوڑ گئی، مجھے خودکشی کرنی ہے۔ عبدالرحمان احاطہ عدالت میں سر دیواروں میں مارتا رہا۔

پاکستان کے سب سے بڑے رئیل اسٹیٹ پورٹل زمین ڈاٹ کام کے تعمیراتی ادارے زمین ڈویلپمنٹس کا بحریہ گارڈن سٹی اسلام آباد میں کثیر المنزلہ منصوبے کی تعمیر کے لئے ٹوٹل کئیر ڈویلپرز اور فور والز ڈویلپرز کے ساتھ معاہدہ طے پا گیا ہے۔ معاہدے پر دستخط کرنے کی تقریب زمین ڈاٹ کام کے ہیڈ آفس لاہور میں منعقد ہوئی، جس میں زمین ڈاٹ کام، زمین ڈویلپمنٹس کے سی ای اوذیشان علی خان، سی ای او ٹوٹل کئیر ڈویلپرز چوہدری محمد سجاد قیصراور سی ای او فور والز ڈویلپرز عامر عزیز نے دستخط کئے۔
اس موقع پر گفتگو کرتے ہوئے زمین ڈاٹ کام کے سی ای او ذیشان علی خان نے کہا کہ وفاقی دارالحکومت کی تیزی سے بڑھتی ہوئی آبادی کیلئے رہائشی و کمرشل انتظامات کرنا وقت کی اہم ترین ضرورت ہے۔ جڑواں شہروں میں رہائشی و کمرشل سہولیات کے حامل کثیر المقاصد منصوبوں کی مانگ میں دن بدن اضافہ ہو رہا ہے، جسے پورا کرنے کے لئے ہم ایک اور شاندار پراجیکٹ سامنے لائے ہیں۔ راولپنڈی ،اسلام آباد میں ایسی تعمیرات سے نا صرف یہاں پر رہائش کی مانگ کے بابت دباؤ میں کمی آئےگی بلکہ پراپرٹی کی قدر میں بھی اضافہ ہوگا۔
زمین ڈویلپمنٹس کے ڈائریکٹر فہد عارف خواجہ کا کہنا تھا کہ اہلیان پاکستان کو دارالحکومت اسلام آباد کی سب سے پُرکشش لوکیشن پر شاندار، پُر تعیش اور مناسب قیمت پررہائشی و کمرشل منصوبہ فراہم کرنے کے لئے کوشاں ہیں۔ بحریہ گارڈن سٹی کی شاندار لوکیشن پر سنے گولڈ سینما کے ساتھ گالف کورس کے سامنے تعمیر ہونے والا یہ منصوبہ اپنی مثال آپ ہو گا۔

سیشن کورٹ نے مدرسہ طالب علم سے بد فعلی کیس میں ملوث ملزم عزیز الرحمان کی ویڈیو فرانزک کروانے کی درخواست مسترد کر دی۔

تفصیلات کےمطابق عدالت نے مفتی عزیز الرحمان کی درخواست کو عدم پیروی کی بنیاد پر خارج کیا، ایڈیشنل سیشن جج شفیق عباس نے درخواست پر سماعت کی مفتی عزیز الرحمان نے مدرسہ طالب علم سے بد فعلی سے متعلق وائرل ہونے والی ویڈیو کا فرانزک کرانے کے لئے درخواست دائر کی تھی،ملزم نے موقف اختیار کیا تھا کہ تفتیشی افسر نے تفتیش کے دوران کیس کے حقائق کو چھپایا، تفتیش کے دوران مجھ پر تشدد کیا گیا۔

مفتی عزیز رحمان نے کہا کہ بد فعلی سے متعلق وائرل ہونے والی ویڈیو جعلی ہے، ویڈیو کو ایڈیٹ کرکے میرے نام کے ساتھ منسوب کیا گیا،عدالت سے استدعا ہے کہ عدالت ویڈیو کا فرانزک کروانے کا حکم دے، البتہ مفتی عزیر الرحمان کے وکیل عدالت میں پیش نہیں ہوئے جس پر عدالت نے مفتی عزیر الرحمان کی درخواست عدم پیروی کی بنیاد پر مسترد کر دی۔

واضح رہے کہ مفتی عزیز الرحمان کی طالب علم کےساتھ نازیبا ویڈیو منظر عام پر آئی تھی،طالب علم کی مدعیت میں لاہور پولیس نے مدرسے کے طالب سے مبینہ بدفعلی کی ویڈیو وائرل ہونے کے بعد عہدیدار مفتی عزیز الرحمٰن کے خلاف مقدمہ درج کیا تھا،ملزم مفتی عزیزالرحمان پر طالبعلم صابر شاہ سے زیادتی کا الزام ہے۔

رنجیت سنگھ کے مجسمے کو نقصان پہنچانے کا معاملہ، لاہو پولیس نے ملزم کو گرفتار کرلیا۔

سی سی پی او لاہور غلام محمود ڈوگر کے مطابق رنجیت سنگھ کے مجسمے کو نقصان پہنچانے والے ملزم رضوان کو گرفتار کر لیا گیا۔ ملزم نے ہتھوڑے سے مجسمے کو نقصان پہنچایا۔ ملزم کے خلاف سخت قانونی کارروائی عمل میں لائی جائے گی۔ سی سی پی او لاہور غلام محمود ڈوگر نے ایس پی سٹی کو فوری موقع پر دورہ کرنے کی ہدایت کر دی۔

دوسری جانب وزیراعظم کے معاون خصوصی ڈاکٹر شہباز گل نے ٹویٹ کرتے ہوئے کہا کہ ‏لاہور میں رنجیت سنگھ کے مجسمے کو نقصان پہنچانے والے ملزم کے خلاف فوری کاروائی ہوگی، پچھلے دنوں سمیع اللہ کے مجسمے کی بھی بے حرمتی کی گئی، یہ بیمار ذہنیت کی علامات ہیں، ایسے اقدام سے پاکستان کے تشخیص کو نقصان پہنچانے کی کوشش کی جاتی ہے، پولیس ایسے ملزموں کے خلاف سخت کاروائی کرے گی۔

شہر کی اہم شاہراہیں کچہرا منڈیاں بن گئیں، سروس روڈ پر تجاوزات کی بھرمار۔ شہریوں کا سڑک سے گزرنا مشکل ہوگیا، صفائی کے عملے نے آنکھیں بند کرلیں۔

شہر کی اہم شاہراہوں جی ٹی روڈ، شاہدرہ ونڈالہ روڈ، دولت خان روڈ اور لاجپت روڈ کچرا منڈیاں بن گئیں۔ صفائی نہ ہونے کے باعث بیماریاں پھلینے کا خدشہ پیدا ہوگیا جبکہ صفائی کے عملے نے بھی اپنی آنکھیں بند کرلیں۔ اہم شاہراہوں کی سروس روڈ پر بھی تجاوزات قائم ہونے سے شہریوں کا پیدل چلنا بھی دشوار ہوگیا۔ شاہدرہ 150 فٹ چوڑی سروس روڈ پر ریڑھی بان چنگ چی رکشہ مافیا عرصہ دراز سے قابض ہیں، جس کی وجہ سے سڑک سے گزرنے والی ٹریفک کی روانی متاثر ہوتی ہے بلکہ پیدل چلنے والوں کو بھی شدید مشکلات کا سامنا ہے۔

ایمرجنسی کی صورتحال میں ایمبولینسز کئی کئی دیر ٹریفک میں پھنسی رہنا معمول بن گیا ہے جبکہ شہر میں جگہ جگہ کچرے کے ڈھیر بھی لگے ہوئے ہیں مگر ایل ڈبلیو ایم سی کا عملہ ہفتوں کچرا نہیں اٹھاتا ۔ شہریوں کا کہنا ہے کہ انتظامیہ کو بارہا شکایت کے باوجود صفائی کی جاتی ہے اور نا ہی تجاوزات ہٹائی جاتی ہیں۔

شہریوں کا کہنا ہے کہ انتظامیہ وقتی طور پر کاروائی کر کے ریڑھی بانوں سے ہفتہ وصولی کرکے واپس چلے جاتے ہیں شہریوں نے انتظامیہ سے تجاوزات کے خاتمے کا مطالبہ کیا ہے۔

دوسری جانب ماہرین کا کہنا ہے کہ کچرے کوجلانے سے شہریوں میں سانس اور جلدی امراض کی بیماریاں تیزی سے پھیلنے کا خدشہ ہے جبکہ ٹھوس فضلات کی وجہ سے ہیپاٹائٹس، ہیضہ، دست، پیچش اور دیگر بیماریوں کا قہر بڑھ سکتا ہے۔

لاہور ہائیکورٹ کا مبینہ پولیس مقابلوں کے متعلق بڑا فیصلہ، پولیس افسروں کی درخواست پر لاہورہائیکورٹ نےمبینہ پولیس مقابلوں کی جوڈیشل انکوائری پر پابندی عائد کردی گئی۔جسٹس سہیل ناصر نےاپنے فیصلے میں لکھا کہ مفاد عامہ کے وقوعہ کی تحقیقات جوڈیشل کمیشن کر سکتا ہے، سی پی او یا آر پی او حکومت کو انکوائری کی درخواست دے سکتے ہیں۔

تفصیلات کے مطابق جسٹس سہیل ناصر نے شاہد چودھری کی درخواست پر 18 صفحات پر مشتمل تحریری فیصلہ جاری کردیا ،تحریری فیصلہ عدالتی نظیر بھی قرار، فیصلے کی نقول صوبہ بھر کے سیشن ججز کوبھجوانے کابھی حکم دیا گیا ہے۔جسٹس سہیل ناصر نے اپنے تحریری فیصلہ میں لکھا ہے کہ پولیس کو جوڈیشل انکوائری کروانے کی از خود درخواست دینے کا کوئی اختیار نہیں، پولیس افسران کی درخواست پر مبینہ پولیس انکوائری کی کوئی قانونی حیثیت نہیں,, پولیس مقابلوں کی جوڈیشل انکوائری کروانے کی درخواستیں دیکر پولیس افسران اپنے اختیارات سے تجاوز کرتے رہے ہیں، فیصلہ میں مزید کہا گیا ہے کہ سی پی او یا آر پی او حکومت کی تعریف میں نہیں آتے، سیشن ججز پولیس کی درخواستوں پر ضابطہ فوجداری کی دفعہ 174 اور 176 کی غلط تشریح کر کے جوڈیشل انکوائری کا حکم دیتے رہے، سیشن ججز کو پولیس افسر کی درخواست پر پولیس مقابلے کی جوڈیشل انکوائری کی منظوری دینے کا اختیار نہیں۔

تحریری فیصلہ کے مطابق مجسٹریٹ قتل، حادثاتی موت یا خود کشی کیس میں صرف موت کے سبب کی انکوائری کر سکتا ہے، مجسٹریٹ یہ نہیں کہہ سکتا کہ وقوعہ کا ذمہ دار کون ہے، مجسٹریٹ کو حقائق کی تلاش کرنے کا بھی اختیار نہیں، مجسٹریٹ انکوائری رپورٹ میں کسی کو ذمہ دار بھی نہیں ٹھہرا سکتا، پولیس مقابلے، قتل یا خود کشی کیس کی جوڈیشل انکوائری پولیس تحقیقات سے پہلے کروائی جاتی ہے، مفاد عامہ کے وقوعہ کے حقائق کی تحقیقات محض پنجاب ٹربیونلز آف انکوائریز ایکٹ کے تحت قائم جوڈیشل کمیشن ہی کر سکتا ہے، سی پی او یا آر پی حکومت کو ہی پولیس مقابلے کی جوڈیشل انکوائری کی درخواست دے سکتے ہیں، فیصلہ میں مزید کہا گیا ہے کہ۔حکومت کا اختیار ہے کہ سی پی او کی جوڈیشل انکوائری کروانے کی درخواست پر انکوائری ٹربیونل بنائے یا نہ بنائے،سیشن ججز پولیس مقابلوں کی انکوائری کی براہ راست موصول ہونیوالی درخواستوں کا بغور جائزہ لیں، سیشن جج صرف کسی کی موت کی وجہ کی انکوائری کرنے کی منظوری دیں۔

جوڈیشل انکوائری کے دوران مجسٹریٹ کسی بھی صورت میں ضابطہ فوجداری کی دفعہ 176 کے دائرہ اختیار سے تجاوز نہیں کر سکتا، مجسٹریٹ انکوائری میں یہ نہیں واضح کر سکتا کہ موت کا ذمہ دار کون ہے، جوڈیشل انکوائری کے دوران مجسٹریٹ یہ بھی قرار نہیں دے سکتا کہ کونسا ملزم گنہگار اور بے گناہ ہے، عدالت نے فیصلہ پنجاب کے تمام ججوں اور ایکس کیڈر ججوں کو مکمل عملدرآمد کیلئے بھجوانے کا حکم دیا ہے۔درخواست گزار نےاپنےخاونداوربھائی کو پولیس مقابلےمیں قتل کرنےکیخلاف درخواست دائر کی تھی،خاتون نے خاوند زاہد محمود اور بھائی شاہد انجم کے قتل کا مقدمہ درج کرنے کی بھی استدعا کی تھی۔پولیس پر خاتون کے خاوند اور بھائی کو جعلی پولیس مقابلے میں قتل کرنے کا الزام تھا۔پولیس نے انسپکٹر عمران عباس کے قتل کے الزام پرخاتون کے خاوند اور بھائی کا حقیقی پولیس مقابلہ ہونے اور جوڈیشل انکوائری کروانے کا دعویٰ کیاتھا۔

سیکرٹری بلدیات نورالامین مینگل کا ایک اور بڑا انتظامی فیصلہ ، سیف سٹی لاہور کو سمارٹ سٹی لاہور بنانے کی منتقلی کے منصوبے پر عملدرآمدکا اختیار سیف سٹی کو دے دیا گیا۔

تفصیلات کے مطابق سیکرٹری بلدیات نورالامین مینگل کا ایک اور بڑا انتظامی فیصلہ کیا ہے ۔ سیف سٹی لاہور کو سمارٹ سٹی لاہور بنانے کی منتقلی کے منصوبے پر عملدرآمد کا اختیار ایم سی ایل سے لے کر سیف سٹی کو دیدیا گیا ہے۔ منصوبے کے لئے مختص 85 کروڑ 20 لاکھ کے فنڈز بھی منتقل کرنے کی باقاعدہ منظوری دے دی گئی ۔ سیکرٹری بلدیات نے ایم سی ایل کو منصوبے کی لاگت ، فزبیلٹی سمیت تمام ابتدائی پلاننگ سیف سٹی کو دینے کی ہدایت کردی ہے ۔ اس سے قبل سیف سٹی کو سمارٹ سٹی بنانے کے لئے ایم سی ایل عملدرآمد ایجنسی کا کام کررہی تھی

سیکرٹری بلدیات نے منصوبے کی اہمیت اور سیف سٹی کے ساتھ بہتر کوارڈینیشن کے باعث فیصلہ کیا ۔ سیکرٹری بلدیات نورالامین مینگل کا کہنا ہے کہ میونسپل اداروں کو بھی ہوگی انتظامی امور چلانے کے لئے سیف سٹی اتھارٹی کی رہنمائی حاصل ہوگی ۔