Category لاھور نامہ

سانحہ سیالکوٹ میں ملوث ملزموں کی پکڑ دھکڑ کا سلسلہ جاری ہے،، مزید سات ملزموں کو گرفتار کرلیا گیا،، اب تک 26مرکزی ملزموں سمیت 132ملزموں کو گرفتار کیا جاچکا ہے۔ سی سی ٹی وی فوٹیجز اور موبائل کالز ڈیٹا کی مدد سے چھاپے جاری ہیں۔
پولیس نے سری لنکن شہری پریانتھا کمارا کے قتل کے الزام میں مزید 7افراد کو گرفتار کرلیا، پولیس کے مطابق گرفتار کیے جانے والوں میں سکندر، راشد، احمد شہزاد، زوہیب، محمد ارشاد، سبحان اور عمیر علی شامل ہیں، ساتوں ملزمان کو سی سی ٹی وی اور موبائل کالز ڈیٹا کی مدد سے گرفتار کیا گیا ہے۔
پولیس کے مطابق ملزم سکندر پریانتھاکمارا پر تشدد کے لیے چھت پر لوگوں کو اکٹھا کرتا رہا، جبکہ ملزم راشد تشدد کرنے والے ہجوم میں شامل تھا، ملزم احمد شہزاد ہجوم میں ڈنڈے سے لیس تھا۔
پولیس کے مطابق ملزم زوہیب تشدد کے لیے اکسانے کی پلاننگ میں ملوث تھا جبکہ محمد ارشاد،سبحان اور عمیر علی بھی ہجوم میں شامل تھے۔ اب تک کی تحقیقات کےمطابق گرفتارملزمان میں 26کا مرکزی کردار سامنے آیا۔

لاہور (پ۔ر)یونائیٹڈ جرنلسٹس فورم آف پاکستان کے وفد نے قاسم علی شاہ فاؤنڈیشن میں معروف موٹیویشنر سپیکر سید قاسم علی شاہ سے ملاقات کی۔ چیئرمین یونائیٹڈ جرنلسٹس فورم برہان الدین نےوفدکی قیادت کی۔ سیکرٹری جنرل رضا محمد نے عہدیداروں کا تعارف کرایا، سینئر نائب صدر یونائیٹڈ جرنلسٹس فورم مناظر علی نے قاسم علی شاہ کو فورم کے اغراض و مقاصد سے آگاہ کیا۔ وفد میں وائس چیئرمین احتشام الرحمان،نائب صدر عرفان ریاض،فنانس سیکرٹری محمد احمد خالد، جوائنٹ سیکرٹری عمران علی،ایڈوائزر طاہر امین بھٹی،اینکر پرسن محمد موسیٰ، سید ذیشان الحسن گیلانی،محی الدین،نوید احمد، عمران علی،رضوان احمد سمیت دیگر شامل تھے۔ ملاقات میں مختلف اہم امور پر تبادلہ خیال کیا گیا،قاسم علی شاہ نے فاؤنڈیشن کی خدمات سے آگاہ کیا جسے وفد نے سراہا۔

وفدسے گفتگو کرتے ہوئے سیدقاسم علی شاہ نے کہاکہ اصلاح معاشرہ کے لیے ہم سب کو مل کر اپنا اپنا کردار اداکرنے کی ضرورت ہے،سسٹم ٹھیک کرنے میں وقت لگتاہے یہ صرف ایک دم ٹھیک نہیں‌ہوجاتاہے اور اسے ٹھیک کرنے میں‌ معاشرے کے تمام افراد کو اپنا اپنا حصہ ڈالنا ہوتاہے،کوئی ایک فرد اکیلے اپنی سطح پر تو بہتری لاسکتا ہے مگر جب پورے معاشرے کی بات کی جاتی ہے تو پھراسے بدلنے کے لیے بھی اجتماعی کوشش کی ضرورت ہوتی ہے..

سید برہان الدین،مناظرعلی،رضامحمد،احتشام الرحمان اورطاہرامین بھٹی نے سیدقاسم علی شاہ سے مختلف سوالات بھی کیے اور ان سے پوچھا کہ کامیابی کے لیے کیا کرنا ضروری ہےجس پر موٹیویشنرسپیکرقاسم علی شاہ نے کامیابی کے گر بھی بتائے،انہوں‌نے کہاکہ اس کے لیے محنت کرنے سے قبل اللہ تعالیٰ پر بھروسہ اولین ہے،جب انسان توکل علی اللہ کرکے میدان عمل میں‌قدم رکھتاہے تو پھر کامیابی قدم ضروری چومتی ہے،سیدقاسم علی شاہ نے سینئرصحافیوں کی فاونڈیشن امد پرشکریہ اداکرتے ہوئے کہاکہ وہ جب چاہیں‌ یہاں‌ آئیں،یہاں ہرقسم کی رہنمائی فراہم کرنے کی بھرپورکوشش کی جاتی ہے…

لاہور(ویب ڈیسک)کورونا سے لاہورسمیت پوری دنیا متاثر ہوئی ہے جس نے نظام درہم برہم کرکے رکھ دیاہے.لاہور سمیت پنجاب بھر میں کورونا کے ساتھ ڈینگی بھی سر اٹھانے لگا ہے،گزشتہ 24 گھنٹوں کے دوران صوبے بھر میں ڈینگی کے 34کنفرم کیس رپورٹ ہوئے ہیں۔محکمہ صحت پنجاب کے اعدادو شمار کے مطابق لاہور سمیت پنجاب بھر میں ڈینگی کے کیسز میں اضافہ ہو رہا ہے۔گزشتہ 24 گھنٹوں کے دوران صوبے بھر میں ڈینگی کے 34کنفرم کیس رپورٹ ہوئے ہیں جن میں سے لاہور میں 29 ، راولپنڈی میں 2 ، گجرات، جھنگ اور پاکپتن سے ایک، ایک مریض رپورٹ ہوا ہے۔
پنجاب میں ڈینگی وائرس بھی سر اٹھانے لگا
محکمہ صحت کے مطابق رواں سال اب تک صوبے بھر سے ڈینگی کے 398کنفرم کیسز میں سے 320 کیسز لاہور میں رپورٹ ہوئے ہیں۔پنجاب میں ڈینگی کے 20 مریض مختلف اسپتالوں میں زیرعلاج ہیں جن میں سے 11 مریض لاہورکےاسپتالوں میں داخل ہیں۔دوسری جانب 24 گھنٹوں میں پنجاب بھر میں کورونا مثبت کیسز کی شرح 6.5 فیصد ریکارڈ ہوئی ہے۔محکمہ صحت پنجاب کے مطابق لاہور میں کورونا کیسز کی شرح 9.2 فیصد، راولپنڈی میں8.7 فیصد اور فیصل آباد میں کورونا کیسز کی شرح 8.7 فیصد ریکارڈ کی گئی۔ گزشتہ 24 گھنٹوں کے دوران صوبے بھر سے ایک ہزار 192 نئےکورونا کیسز رپورٹ ہوئے، لاہورمیں 5 اور صوبے بھرمیں 20 اموات رپورٹ ہوئیں۔

لاہور (ویب ڈیسک) کنٹونمنٹ بورڈ انتخابات کے نتائج کے حوالے سے اہم خبر سامنے آئی ہے.تفصیلات کے مطابق الیکشن کمشن نے کنٹونمنٹ بورڈ انتخابات کے وارڈ نمبر 5 کے حتمی نتائج جاری کرنے سے روک دیا ہے۔ ای سی پی کا جانب سے ریٹرننگ افسر، مخالف امیدوار سمیت دیگر کو 23 ستمبر کے لیے نوٹس جاری کر دئیےگئے ہیں .الیکشن کمیشن نے 12 ووٹوں سے شکست کھانے والے تحریک انصاف کے میجر (ر) جاوید ضمیر کی درخواست پر سماعت کی۔ درخواست میں کہا گیا کہ ریٹرننگ افسر نے بددیانتی اور بدنیتی سے نتیجے کا اعلان کیا ہے .درخواست گزار نے موقف اپنایا کہ کنٹونمنٹ بورڈ الیکشن وارڈ نمبر 5 میں صرف 12 ووٹوں سے شکست ہوئی، مسترد ہونے والے وٹوں کی تعداد ہارے جانے والے وٹوں سے زیادہ ہے۔.درخواست گزار کے مطابق ریٹرننگ افسر کو دوبارہ گنتی کی درخواست دی جو کہ مسترد کر دی گئی، استدعا ہے کہ وارڈ کے حتمی نتائج روکنے اور دوبارہ گنتی کرنے کا حکم دیا جائے۔

لاہور (ویب ڈیسک) افغانستان میں طالبان کے قبضے کے بعد صورتحال معمول پر آ رہی ہے.اس حوالے سے افغانستان کی خواتین فٹبالرز کا دستہ اپنے گھر والوں اور کوچز کے ساتھ لاہور پہنچ گیا ہے. تفصیلات کے مطابق افغانستان کی خواتین فٹبالرز کا81رکنی دستہ طورخم بارڈر کے ذریعے لاہور پہنچا اور پاکستان پہنچنے پر حکومت اور پاکستان فٹبال فیڈریشن کا شکریہ ادا کیا۔پاکستان فٹبال فیڈریشن کے نائب صدر سردار نوید حیدر خان اور دییگر عہدیداروں سمیت اسپورٹس بورڈ پنجاب کے افسران نےفٹبال ہاﺅس پہنچنے پر افغان دستے کا پرتپاک استقبال کیا۔
اس موقع پر دستے نےمیڈیا سے گفتگو کی اور ان کا کہنا تھا کہ پاکستان میں ان کا شاندار استقبال کیا گیا اور بہترین مہمان نوازی کی جا رہی ہے۔
واضح رہے کہ حکومت پاکستان نے 115افغانی باشندوں کو 30 دن کے لئے ویزے جاری کئے ہیں جس کے بعد پہلے مرحلے میں 81افراد کا دستہ پاکستان پہنچا ہے۔

لاہور(ویب ڈیسک)تحریک انصاف کی لاہور کنٹونمنٹ بورڈ میں انتخابی شکست کے بارے میں ابتدائی رپورٹ مرتب کرلی گئی۔رپورٹ میں لاہور میں ترقیاتی کام سے متعلق اہم سوال اٹھاتے ہوئے صوبائی دارالحکومت کو ترقیاتی کاموں کے حوالے سے ترجیح نہ دینے کو شکست کی اہم وجہ قرار دیا گیا۔ لاہور کے حوالے سے پارٹی کے مختلف رہنماؤں کا منفی پراپیگنڈہ بھی پی ٹی آئی کی عدم مقبولیت کی وجہ بنا۔

ذرائع کے مطابق تحریک لبیک کے خلاف محاذ کھولنے کے بارے میں بھی تحفظات کا اظہار کیا گیا۔ رپورٹ میں دعویٰ کیا گیا کہ دیہی سطح پر پی ٹی آئی کی مقبولیت بڑھی لیکن شہری حلقوں میں تاحال چیلنجز کا سامنا ہے۔
تحریک انصاف کی قیادت نے لاہور میں جعلی ووٹوں پر بھی اصرار کرتے ہوئے کہا کہ پنجاب میں پچیس فیصد کے قریب جعلی ووٹ ہیں جو سابق دور حکومت میں بنے، لاہور اور شہری حلقوں میں جعلی ووٹوں کے خلاف الیکشن کمیشن سے رجوع بھی کرچکے ہیں اور کمیشن کو اس حوالے سے خط بھی لکھ چکے ہیں ، رپورٹ میں جعلی ووٹوں کے اخراج کے لئے الیکشن کمیشن اوردیگر متعلقہ فورمزسے ریلیف لینے کی کوششوں کو تیز کرنے کی تجویز دی گئی۔

رپورٹ میں کہا گیا کہ ٹکٹ کی تقسیم میں کوئی ایشو پیدا نہیں ہوا ، تاہم کچھ پارٹی رہنماؤں نےمہم میں کام نہیں کیا۔ رپورٹ میں پارٹی قیادت اورحکومتی قیادت کےدرمیان رابطے کو بہتر بنانے کی تجویز دیتے ہوئے کہا گیا کہ پارٹی کی تنظیم کی حکومتی سطح پر شنوائی نہ ہونا بھی شکست کی وجہ ہے۔گزشتہ انتخابات کے قومی اور صوبائی اسمبلی کے امیدواران کی عدم دلچسپی کو بھی شکست کی اہم وجہ قرار دیتے ہوئے کہا گیا کہ 2018 کے انتخابات کے بعد امیدواران نے حلقے کا رخ نہیں کیا۔ رہنماؤں کی عدم دلچسپی کے باعث کارکنان تذبذب کا شکار رہے۔
دوبارہ گنتی کی درخواست دینے کا فیصلہ
علاوہ ازیں تحریک انصاف کے کم ووٹوں سے ہارنے والے امیدواروں نے دوبارہ گنتی کی درخواست دینے کا فیصلہ کیا ہے۔ تحریک انصاف نے 6 نشستیں معمولی ووٹوں سے ہارنے کا دعوی کیا ہے۔ صدر وسطی پنجاب اعجاز چوہدری نے بتایا ہے کہ کم ووٹوں والی نشستوں پر دوبارہ گنتی کی درخواست دے رہے ہیں۔
وارڈ نمبر دس لاہور کنٹونمنٹ سے امیدوار حافظ ابرار، وارڈ نمبر چار والٹن سے امیدوار چوہدری اسلم جٹ، وارڈ نمبر 8 سے ہمایوں رشید اور وارڈ نمبر پانچ والٹن سے میجر ریٹائرجاوید ضمیر نے دوبارہ گنتی کی درخواست دیدی ہے ۔ عرفان اکبر اور راجہ شہزاد بھی تھوڑے ووٹوں سے ہارے ہیں۔

لاہور(ویب ڈیسک)صاف پانی ریفرنس میں شہباز شریف کی بیٹی اور داماد کی جائیدادیں قرق کرلی گئیں۔صاف پانی ریفرنس میں سابق وزیراعلیٰ پنجاب شہباز شریف کی بیٹی رابعہ عمران اور داماد کی جائیدادیں قرق کرلی گئیں جب کہ اس حوالے سے رپورٹ بھی عدالت میں جمع کرادی گئی ہے، عدالت نے دیگر شریک ملزمان کی بریت کی درخواستوں پر دلائل طلب کرنے کے بعد کارروائی 23 ستمبر تک ملتوی کردی۔

نیب تفتیشی ٹیم نے شہباز شریف کے داماد عمران علی یوسف اور بیٹی رابعہ عمران کی جائیداد قرقی کی رپورٹ عدالت میں جمع کرائی جس میں کہا گیا ہے کہ میسرز فاطیمہ ڈویلپرز میں عمران علی کے 65 لاکھ شئیرز اور رابعہ عمران 35 لاکھ شئیرز کی مالک ہیں، میسرز ایس ایم سی میں عمران علی یوسف کے 60 لاکھ مالیت کے شئیرز ہیں، حدیبیہ انجینئرنگ میں شہباز شریف کی بیٹی رابعہ عمران کے 7 ہزار مالیت کے شئیرز شامل ہیں۔
رپورٹ میں کہا گیا ہے کہ شریف پولٹری فارم میں رابعہ عمران کے 1 ہزار مالیت کے شئیرز بھی قرق کیے گیے ہیں، مدینہ فیڈ میں عمران علی کے شئیرز کی مالیت 1 کروڑ 25 لاکھ جبکہ رابعہ عمران 50 لاکھ مالیت کے شئیرز کی مالک ہیں، میسرز پروسیڈ فوڈ میں عمران علی اور رابعہ عمران کے 25 لاکھ مالیت کے شئیرز ہیں، اس کے علاوہ علی ٹریڈ سینٹر اور علی ٹاور میں عمران علی اور رابعہ عمران متعدد دوکانوں کے مالک ہیں۔ واضح رہے کہ احتساب عدالت نے سابق وزیراعلیٰ پنجاب اور مسلم لیگ (ن) کے صدر شہباز شریف کی بیٹی رابعہ عمران اور داماد کے پیش نہ ہونے پر اشتہاری قرار دیتے ہوئے جائیدادوں کو قرق کرنے کا حکم دیا تھا۔

لاہور میں بارشوں کے باعث مختلف حادثات میں بچوں سمیت پانچ افراد جاں بحق ہوگئے جب کہ کرنٹ لگنے سے 6 جانور بھی ہلاک ہوئے۔لاہور میں بادلوں کی گھن گرج اور دھواں دھار بارش سے شہر کے متعدد علاقے پانی پانی ہوگئے، نشیبی علاقے زير آب آگئے اور سڑکیں ڈوب گئیں جب کہ گلیاں ندی نالوں میں تبدیل ہوگئيں۔

شہر میں سب سے زيادہ بارش لکشمی چوک پر 161 ملی میٹر ریکارڈ کی گئی لیکن بارش رکنے کے کچھ دیر بعد ہی شہر کا زيادہ تر علاقہ کلیئر ہوگیا جب کہ بارش سے لیسکوکے 100 سے زائد فيڈرز ٹرپ کرگئے۔شہر میں بارش سے ہونے والے حادثات میں تین بچے کاہنہ میں چھت گِرنے سے ملبے تلے دب کر دم توڑ گئے جب کہ قصور میں آسمانی بجلی گِرنے اور اوکاڑہ میں بجلی کے کھمبے سے کرنٹ لگنے سے ایک شخص جاں بحق ہوگيا۔

پولیس کے مطابق شہر میں بارش کے دوران کرنٹ لگنے سے 6 جانور بھی ہلاک ہوئے جہاں شیراکوٹ میں کرنٹ سے ایک گائے اور بھینس جب کہ مانگا منڈی میں آسمانی بجلی گرنے سے 4 بھینسیں ہلاک ہوئیں۔

لاہور(ویب ڈیسک)میاں‌نوازشریف طویل عرصے سے بیرون ملک قیام پذیر ہیں اور ابھی تک ان کے بارے میں‌حتمی طورپر کچھ نہیں کہاجاسکتاالبتہ مسلم لیگ (ن) کے رکن قومی اسمبلی میاں جاوید لطیف نے دعویٰ کیا ہےکہ نواز شریف اسی سال واپس آرہے ہیں۔

نیب لاہور میں پیشی کے بعد میڈیا سے گفتگو کرتے ہوئے جاوید لطیف نے کہا کہ جنہوں نے نا اہل کیا، وہی سمجھ رہےہیں کہ نواز شریف کے سواکوئی آپشن نہیں، وہ نواز شریف کو چوتھی بار وزیراعظم منتخب ہونے دیں گے۔ انہوں نے دعویٰ کیا کہ نوازشریف اسی سال واپس آ رہے ہیں، وہ قوم کی قیادت کریں گے، نواز شریف پاکستانی قوم کو اس بھنور میں پھنسے دیکھ کرباہر نہیں رہ سکتے۔
جاوید لطیف کا کہنا تھا یہ تاثر دیا جا رہا ہے کہ پیپلزپارٹی کو لایا جا رہا ہے، بلاول عوامی ووٹوں سے آئیں تو کوئی اعتراض نہیں۔

لاہور(ویب ڈیسک) لاہور میں خواتین کیساتھ بڑھتے زیادتی اور بدتمیزی کے واقعات افسوس ناک ہیں جس پرادارےاپنا اپنا کرداراداکررہے ہیں،گزشتہ دنوں‌میں‌مینار پاکستان کے سامنے افسوسناک واقعہ ہوا اور پھر رکشے پر بیٹھی خواتین کیساتھ بدتمیزی ہوئی. چنگ چی رکشے میں اوباش نوجوان کی لڑکی سے نازیبا حرکت کے کیس میں بڑی پیش رفت ہوگئی۔

متاثرہ لڑکی نے چار ملزمان کو شناخت کرلیا۔ رکشا سوار متاثرہ لڑکی نے جوڈیشل مجسٹریٹ کی موجودگی میں ملزمان کو شناخت کیا۔
لڑکی نے بتایا کہ چاروں ملزمان نے چلتے رکشے کا پیچھا کیا اور بار بار تنگ کیا، ملزم ساجد نے موٹر سائیکل سے اتر کر بدتمیزی کی، اس کے ساتھ رکشے کے پیچھے شریک ملزمان نے نازیبا جملے کسے،لڑکی نے عثمان، عرفان ،عبدالرحمان اور ساجد کو شناخت کیا۔ جوڈیشل مجسٹریٹ کامران ظفر نے شناخت پریڈ کا عمل مکمل کرائی.