Category تازہ ترین

سوشل میڈیا پر جہیز کی لعنت کے خلاف پاکستانی فیشن ڈیزائنر کی پُراثر آگاہی مہم نے سوشل میڈیا صارفین کے دل موم کردیے جس پر کسی نے داد دی توکسی نے جہیز نہ لینے کا عہد کیا۔
برائیڈل کوٹیور ریک میں جہیز سے لدی ایک گاڑی کو کرب میں گھسیٹتی ایک دلہن نے سوشل میڈیا صارفین اور دیکھنے والوں کے دل پگھلادیے۔
’نمائش نہ لگاؤ، جہیزخوری بند کرو‘ کے عنوان سے پاکستانی ڈیزائنر علی ذیشان نے ایک فیشن شوٹ کو جہیز کی لعنت کے خلاف عوام میں شعور جگانے کا ذریعہ بنایاجسے سماجی تنظیموں اور عوام کی جانب سے بڑی پزیرائی ملی۔
سوشل میڈیا صارفین نے ڈیزائنر کے اس اقدام کو کہیں ایک طاقتور پیغام قرار دیا تو کسی نے جہیز نہ لینے کا عہد کیا۔
ایک صارف نے تبصرہ کیا کہ یہ تصاویر جہیز کے بوجھ تلے دبی ایک دلہن اور اس کے والدین کے درد کی حقیقی ترجمانی کرتی ہیں۔
ایک صارف کا کہنا تھا کہ تعجب ہے کہ تعلیم یافتہ ہونے کے باوجود آج تک لوگ جہیز لے رہے ہیں۔
سوشل میڈیا پر ایک اور صارف کا کہنا تھا کہ لالچ سے شروع ہونےوالی شادیوں کا انجام بھی برا ہوتا ہے۔
دوسری جانب کچھ سوشل میڈیا صارفین ایسے بھی تھے جنہوں نے الٹا ڈیزائنر ہی کو آئینہ دکھا دیا اور توپوں کا رخ ڈیزائنر کی جانب موڑ تے ہوئے صارفین نے خود ان کے مہنگے ترین ملبوسات کی ہوش رُبا قیمتوں پر سوال اٹھادیے۔
ایک صارف کا کہنا تھا کہ خود آپ کا ایک عروسی جوڑا 10 لاکھ سے کم کا نہیں، اس پر آپ سادگی کی باتیں کررہے ہیں۔
ایک اور صارف نے ان ہی کے فیشن شوٹ سے قیمتی ملبوسات میں تصویر شیئر کرتے ہوئے سوال کیا کہ،کیا یہ نمود نمائش میں نہیں آتا؟

پاکستان جنوبی افریقہ کیخلاف ٹیسٹ سیریز میں 0-2 سے کامیابی حاصل کرنے کے بعد نئی آئی سی سی ٹیسٹ رینکنگ میں 5ویں پوزیشن پر آگیا ہے۔ تفصیلات کے مطابق پاکستان 8 ریٹنگ پوائنٹس حاصل کرنے کے بعد ٹاپ 5 میں شامل ہوگیا ہے۔قومی ٹیم نے 82 پوائنٹس سے 90 پوائنٹس پر چھلانگ لگائی،پاکستان اب جنوبی افریقہ(89) سے ایک پوائنٹ اوپر ہے جو سیریز ہارنے کے ساتھ ہی ٹیسٹ رینکنگ میں پانچواں مقام بھی گنوا بیٹھی ہے۔
نیوزی لینڈ آئی سی سی ٹیسٹ رینکنگ میں پہلی پوزیشن پر موجود ہے جس کے بعد بھارت ، آسٹریلیا اور انگلینڈ کا نمبر ہے۔ پاکستان نے راولپنڈی میں پانچویں اور آخری دن دوسرے ٹیسٹ میچ میں 95 رنز سے فتح حاصل کرکے 2003 کے بعد جنوبی افریقہ کے خلاف اپنی پہلی ٹیسٹ سیریز 0-2 سے جیت لی۔ جنوبی افریقہ کو جیتنے کے لئے 370 رنز کا ہدف ملا تھا جس کے جواب میں مہمان ٹیم 274 رنز پر آؤٹ ہوگئی جبکہ فاسٹ بولر حسن علی نے دوسری اننگز میں 60 رنز کے عوض 5 اور میچ میں مجموعی طور پر 114 رنز دیکر 10 وکٹیں حاصل کیں۔ اوپنر ایڈن مارکرم نے 108 اور ٹمبا باوما نے 61 رنز بنائے۔ یاد رہے کہ پاکستان نے جنوبی افریقہ کے خلاف کراچی میں پہلا ٹیسٹ سات وکٹوں سے جیتا تھا۔
جبکہ دوسری طرف بدترین تنقید کے باوجود قومی ٹیم کے ہیڈ کوچ مصباح الحق اور کپتان بابر اعظم تاریخ میں امر ہوگئے، ایسا شاندار اعزاز اپنے نام کر لیا جو آج تک کوئی پاکستانی کپتان یا کوچ حاصل نہ کر سکا۔ بابر اعظم جنوبی افریقہ کیخلاف ٹیسٹ سیریز میں کلین سوئپ کرنے والے واحد ملکی کپتان جبکہ مصباح الحق واحد پاکستانی کوچ ہیں۔
اس کے علاوہ بابراعظم بطور کپتان اپنی ڈیبیو ٹیسٹ سیریز جیتنے والے پاکستان کے 5ویں کپتان بھی بن گئے۔ پاکستان نے دوسرے ٹیسٹ میچ میں جنوبی افریقہ کو 95 رنز سے شکست دیکر 2 میچوں پر مشتمل سیریز میں کلین سویپ مکمل کیا۔ پنڈی سٹیڈیم میں کھیلے جانیوالے میچ میں حسن علی اور شاہین شاہ آفریدی کی عمدہ گیند بازی کی بدولت قومی ٹیم نے جنوبی افریقہ کو شکست دی۔
پاکستان نے ٹیسٹ کرکٹ کی تاریخ میں پہلی بار جنوبی افریقہ کو وائٹ واش جب کہ دوسری بار ٹیسٹ سیریز میں شکست دی ۔ اس سے قبل 2003ء میں پاکستان نے جنوبی افریقہ کو0-1 سے ٹیسٹ سیریز میں شکست دی تھی۔ یہ بابراعظم کی بطور ٹیسٹ کپتان پہلی ٹرافی تھی ، وہ بطور کپتان ڈیبیو ٹیسٹ سیریز جیتنے والے پاکستان کے 5ویں کپتان بھی بن گئے ہیں، اس سے قبل فضل محمود نے ویسٹ انڈیز کے خلاف 1959ء میں بطور ٹیسٹ کپتان اپنی پہلی ہی ٹیسٹ سیریز میں کامیابی حاصل کی، مشتاق محمد نے 1976ء میں نیوزی لینڈ کے خلاف یہ کارنامہ سرانجام دیا، جاوید میانداد نے 1980ء میں آسٹریلیا کے خلاف بطور کپتان اپنی پہلی ہی ٹیسٹ سیریز میں کامیابی سمیٹی جب کہ سلیم ملک نے 1994ء میں نیوزی لینڈ کے خلاف بطور کپتان اپنی پہلی ٹیسٹ سیریز جیتی ۔

حریت رہنما محمد افضل گورو کی ساتویں برسی پر آج مقبوضہ کشمیر میں مکمل ہڑتال کی جارہی ہے۔

کشمیر میڈیا سروس کے مطابق کشمیری شہری بھارتی قابض افواج کے خلاف سراپا احتجاج ہیں۔

دوسری جانب مظاہروں پرقابوپانے کے لیے کٹھ پتلی سرکار الرٹ ہے اور مقبوضہ وادی میں انٹرنیٹ بھی بندکردیا گیا ہے۔

یاد رہے کہ بھارت نے افضل گورو کو 13 دسمبر 2001 کو بھارتی پارلیمنٹ پر ہونے والے حملے کے الزام میں 9 فروری 2013 کو نئی دہلی کی تہاڑ جیل میں خفیہ طور پر پھانسی دے کر جیل کے احاطے میں ہی دفن کردیا تھا۔

پھانسی کے وقت افضل گورو کی عمر 44 برس تھی، انہیں نہ تو قانونی پیروی کا موقع دیا گیا اور نہ ہی پھانسی سے قبل اہلخانہ سے ان کی ملاقات کروائی گئی۔ محمد افضل گورو کی زندگی علم، فن اور مزاحمت سے عبارت تھی۔ اس سے قبل حریت رہنما مقبول بھٹ کو بھی تہاڑ جیل میں ہی پھانسی دینے کے بعد دفن کیا جاچکا ہے جب کہ حریت قیادت کا مطالبہ ہے کہ شہدا کے جسد تہاڑ جیل سے مقبوضہ وادی میں منتقل کیے جائیں۔

پاکستان اور ترکی کے درمیان جنگی مشقیں ’ اتا ترک 11‘ کا آغاز ہو گیاہے جو کہ تین ہفتے تک جاری رہیں گی ۔
تفصیلات کے مطابق پاکستان اور ترکی کے درمیان مشترکہ جنگی مشقیں اتاترک الیون کی افتتاحی تقریب سپیشل سروسز ہیڈکوارٹرز تربیلا میں ہوئی، پاکستان کے ایس ایس جی اور ترک سپیشل فورسز مشقوں میں حصہ لیں گی، پاکستان اور ترکی کی مشترکہ جنگی مشقیں تین ہفتے جاری رہیں گی۔
مشقوں میں انسداد دہشتگردی، تلاشی و محاصرہ آپریشنز، دہشتگردوں کے ٹھکانے کلیئر کرنا اور مغویوں کی بازیابی کے آپریشنز بھی شامل ہیں جب کہ فری فال آپریشنز بھی تربیتی مشقوں کا حصہ ہوں گے۔ آئی ایس پی آر کے مطابق مشترکہ جنگی مشقیں دونوں برادر ممالک کے تعلقات کو مزید مضبوط بنائیں گی اور اس سے عسکری شعبوں میں جدت اور نئے رجحانات سے استفادہ کرنے کا موقع ملے گا۔

پاکستان ڈیموکریٹک موومنٹ (پی ڈی ایم ) آج حیدرآباد میں جلسہ کرکے سیاسی طاقت کا مظاہرہ کرنے جا رہی ہے۔
حیدرآباد میں پی ڈی ایم کی جانب سے جلسے کی تیاریاں مکمل کر لی گئی ہیں اور جلسے کیلئے سکیورٹی کے سخت انتظامات کئے گئے ہیں۔جلسے سے سربراہ پی ڈی ایم مولانا فضل الرحمان اور چیئرمین پیپلز پارٹی بلاول بھٹو زرداری سمیت اہم رہنما خطاب کریں گے۔
مولانا فضل الرحمان کا کہنا ہے کہ ان کی کسی سے لڑائی نہیں ہے، ہر ادارہ اپنی حدود میں رہ کر کام کرے، لانگ مارچ سے حکومت ختم کریں گے۔ دوسری جانب بلاول بھٹو نے کہا کہ فوج کا سیاست میں کردار نہیں ہونا چاہیے، انہوں نے سینیٹ سے متعلق صدارتی آرڈیننس کو عدالت میں چیلنج کرنے کا اعلان بھی کیا۔

پاکستانی کوہ پیما محمد علی سد پارہ کے بیٹے ساجد سد پارہ نے نجی ٹی وی سے بات کرتے ہوئے کہا کہ میرے والد کے آخری الفاظ تھے کہ ” میرے پاس اوپر آ جاؤ”۔ وہ مجھے اپنے پاس بُلا رہے تھے۔ ساجد سدپارہ نے بتایا کہ ہم کُل 25 سے 30 کوہ پیما جا رہے تھے کہ مگر وہ سب واپس آگئے اور صرف ہم 4 رہ گئے۔ اس کے بعد جب ہم نے سفر شروع کیا تو میری بھی بس ہوگئی کیوں کہ بغیر آکسیجن کے وہ انتہائی مشکل راستہ تھا۔
مجھے والد نے کہا کہ تمہارے پاس آکسجین سلنڈر ہے تم اسے استعمال کرو اور اوپر آجاؤمگر بد قسمتی سے میری صحت نے مجھے اجازت نہ دی اور میں مزید اوپر چڑھ نہ سکا۔ ساجد سدپارہ کا کہنا ہے کہ میرے پاس جو بچی کُھچی آکسجین تھی وہ میں کچھ خرابی کے باعث استعمال نہیں کرسکا ، یہی وجہ تھی کہ مجھے واپس آنا پڑا۔
انہوں نے بتایا کہ میرے والد اور جان اسنوری اور جے پی جب اوپر جا رہے تھے تو سب بالکل ٹھیک تھا، بس ہلکی سی تیز ہوا اور فوگ سی موجود تھی۔

ساجد سد پارہ نے کہا کہ آرمی اور حکومت ہمارا مکمل ساتھ دے رہی ہے۔ میں نے خود وہ موسم دیکھا ہے۔ وہاں بغیر امداد کے رہنا نا ممکن ہے۔ میں بھی آخری سرچ آپریشن میں ساتھ گیا تھا۔ ہم نے اپنی بھرپور کوشش کی تھی۔ ہم سے جتنا ہوسکا ہم اوپر تک گئے۔ وہ لوگ بہت تجربہ کار تھے۔ ساجد سد پارہ نے ایک سوال کے جواب میں کہا کہ جب وہ اوپر چڑھ رہے تھے تو دوپہر کا وقت تھا، میرا دل تو یہی کہتا ہے کہ شام تک میرے خیال سے انہوں نے “کے ٹو” کو سر کرلیا تھا اور واپسی پر انہیں کوئی حادثہ پیش آیا ۔
خیال رہے کہ عالمی شہرت یافتہ پاکستانی کوہ پیما محمد علی سدپارہ اور ان کی ٹیم کی کے ٹو پر تلاش کے لیے سرچ آپریشن آج تیسرے روز بھی جاری ہے۔ گذشتہ دو روز کیے جانے والے فضائی سرچ آپریشن میں بھی موسم سرما میں کے ٹو سر کرنے کی کوشش کے دوران لاپتہ ہونے والے علی سدپارہ اور ان کے ساتھیوں کا کوئی سُراغ نہیں مل سکا تھا۔ یاد رہے کہ کے ٹو کی چوٹی کو سر کرنے کی کوشش میں لاپتہ ہونے والے کوہ پیماؤں محمد علی سدپارہ اور ان کی ٹیم کی تلاش میں ریسکیو اراکین نے ہیلی کاپٹرز سے 7 ہزار 800 میٹر بلندی پہ پرواز کی لیکن انہیں کسی بھی قسم کا کوئی سراغ نہیں ملا۔
لاپتہ ہونے والے کوہ پیماؤں کی تلاش کے لیے کیے جانے والے فضائی سرچ آپریشن میں نامور نیپالی کوہ پیما شرپا چنگ دوا اور ساجد سدپارہ نے بھی حصہ لیا۔ فضائی سرچ آپریشن کے بعد ساجد سدپارہ کو ہیلی کاپٹر کے ذریعے اسکردو پہنچا دیا گیا تھا۔ محمد علی سدپارہ کے بیٹے ساجد سدپارہ بھی سرمائی مہم جوئی ٹیم کا حصہ تھے۔ ساجد سدپارہ کا اسکردو پہنچنے پر کمشنر بلتستان شجاع عالم اور ڈپٹی کمشنر اسکردو کریم داد چغتائی نے استقبال کیا۔
ساجد سدپارہ اپنے والد کے ساتھ مہم میں شامل تھے لیکن کے ٹو کی انتہائی بلندی کے قریب پہنچنے پر ان کے آکسیجن ریگولٹر میں خرابی آئی تو والد کے اصرار اور ہدایت پر وہ واپس نیچے آگئے تھے۔ گذشتہ روز اپنے ایک بیان میں علی سدپارہ کے صاحبزادے ساجد سدپارہ نے بلند حوصلے کا مظاہرہ کرتے ہوئے والد کے زندہ ہونے کا امکان معدوم ہونے کا بیان دیا تھا اور کہا تھا کہ اب سرچ آپریشن میتوں کی تلاش کے لئے کیا جانا چاہئیے ،کیونکہ 8 ہزار میٹر بلندی پر اتنی دیر زندہ رہنے کے امکانات بہت کم ہوتے ہیں۔

سام سنگ کے موبائلز کی فہرست میں اس وقت A32 سب سے سستا ترین 5g فون ہے جو کہ حال ہی میں یورپ میں متعارف کروایا گیا تھا لیکن اب یہ موبائل فون تھائی لینڈکے صارفین کیلئے بھی پیش کر دیا گیاہے ، چینی موبائل ساز کمپنیوں کے ساتھ مقابلہ بازی کے باعث سام سنگ نے اس کی قیمت بہت زیادہ نہیں رکھی ہے ۔

پاکستان میں ابھی 5g عوام کیلئے میسر نہیں ہے جس کے باعث A32 کا 5g ورژن بھی پاکستان میں متعارف نہیں کروایا جارہاہے لیکن پاکستانیوں کیلئے سام سنگ A32 کا 4g ورژن جلد ہی متعارف کروانے جارہاہے جس کی ممکنہ قیمت 43 ہزار روپے تک ہو سکتی ہے ۔

کورونا وبا: مزید 28 افراد جاں بحق، فعال کیسز کی تعداد 32 ہزار514 ہوگئی

سام سنگ کے موبائل فون A32 میں 5g واحد خاص بات ہے جو کہ اسے A31 سے منفرد کرتی ہے جب کہ اس میں ” میڈیا ٹیک ڈیمنسٹی 720 “ چپ نسب کی گئی ہے جو کہ اس کا دل ہے ۔موبائل فون تین مختلف ویرنٹس کے ساتھ دستیاب ہے ، آپ اپنی پسند کے مطابق 4،6 یا 8 جی بی ریم کے ساتھ فون کا انتخاب کر سکتے ہیں جبکہ اس کے ساتھ 64 یا 128 جی بی سٹوریج سپیس کی آپشن بھی موجود ہے ۔
سام سنگ کے اس نئے موبائل فون میں 5 ہزار ایم اے ایچ کی بیٹری لگائی گئی ہے جو کہ صارفین کو دیر تک بغیر چارج کیے فون استعمال کرنے کی بہترین سہولت فراہم کرتی ہے جبکہ کم وقت میں زیادہ چارجنگ کیلئے 15 واٹ کا تیز ترین چارجر دیا گیاہے جو کہ اسے مزید کارآمد اور طاقتور بناتاہے ۔سام سنگ A32 میں اینڈرائڈ ورژن 11 ،ون یو آئی 3.0 دیا گیاہے ۔
A32 کا سکرین سائز 6.5 انچ ہے اور اس میں روایتی ٹی ایف ٹی پینل نصب کیا گیاہے جو کہ 720p ریزولوشن رزلٹ فراہم کرتاہے ۔ فون میں چار کیمرے لگائے گئے ہیں جن میں مین کیمرہ 48 میگا پگسل ، 5 میگا پگسل میکرو شوٹر ، الٹر وائڈ کیمرہ 8 میگا پکسل ، ڈیپتھ کیمرہ 2 مگیا پکسل کا ہے ۔اس کے علاوہ سیلفی کے شوقین افراد کیلئے فرنٹ کیمرہ 13 میگا پگسل کا دیا گیاہے ۔
اس کے علا وہ فون میں تھمب پرنٹ ، ڈیول سپیکر ، 3.5 ایم ایم کا ہیڈ فون جیک لگایا گیاہے ، یہ فون سفید ، سیاہ ، نیلے اور وائلٹ رنگ میں دستیاب ہے ،تھائی لینڈ میں اس کی قیمت 333 ڈالر رکھی گئی ہے جو کہ پاکستانی 53 ہزار روپے بنتی ہے ۔
پاکستان میں ابھی 5g عوام کیلئے میسر نہیں ہے جس کے باعث A32 کا 5g ورژن بھی پاکستان میں متعارف نہیں کروایا جارہاہے لیکن پاکستانیوں کیلئے سام سنگ A32 کا 4g ورژن جلد ہی متعارف کروانے جارہاہے جس کی ممکنہ قیمت 43 ہزار روپے تک ہو سکتی ہے ، یہ موبائل فون چار جی بی ریم کے ساتھ پاکستانی موبائل مارکیٹ میں فروخت کیلئے پیش کیا جائے گاجبکہ اس میں 128 جی بی سٹوریج سپیس دی جائے گی ۔

حکومت نے روسی کورونا ویکسین کے ہنگامی استعمال کی اجازت دیدی۔
نجی ٹی وی اے آر وائی نیوز نے ذرائع کے حوالے سے کہا ہے کہ سپتنک فائیو کے ہنگامی استعمال کی اجازت ڈریپ رجسٹریشن بورڈ نے دی،سپتنک فائیو کو ڈرگ ایکٹ 1976 سیکشن 7 کے تحت اجازت دی گئی ۔ذرائع کاکہنا ہے کہ ڈریپ منظوری پر سپتنک فائیو ویکیسن پاکستان میں استعمال ہوسکے گی۔
ذرائع کا مزید کہنا ہے کہ پاکستانی کمپنی نے سپتنک فائیو کے ہنگامی استعمال کی اجازت مانگی تھی،ذرائع کاکہناہے کہ کراچی کی فارما کمپنی سپتنک فائیو کورونا ویکسین درآمدکرے گی،فارما کمپنی کو سپتنک فائیو کے استعمال کی اجازت تین ماہ کیلئے دی گئی،سپتنک فائیو کے ہنگامی استعمال کا اجازت نامہ یکم اپریل تک موثر رہے گا۔

بینکوں کا قرضہ واپس نہ کرنے کے کیس میں بینکنگ کورٹ نے نواز شریف کے کزنز کی کورونا وائرس کی رپورٹس شام چار بجے تک طلب کرلیں، فاضل جج نے ریمارکس دیتے ہوئے کہا کہ رپورٹس پیش کی جائیں ورنہ قانون کے مطابق حکم جاری کروں گا۔
لاہوربینکنگ کورٹ میں نوازشریف کے کزنزکےخلاف قرضہ واپس نہ کرنے کے کیس کی سماعت ہوئی،بینکنگ کورٹ کے جج منیراحمدجوئیہ نے مختلف بینکوں کی درخواستوں پر سماعت کی،ملزمان میں شفیع،طارق شفیع سمیت5ملزمان شامل ہیں۔
ملزمان کے وکیل نے کہاکہ نوازشریف کے پانچوں کزن کوروناوائرس کاشکارہوچکے ہیں،نوازشریف کے کزن عدالت میں پیش نہیں ہوسکتے،عدالت حاضری سے استثنیٰ دے۔فاضل جج نے کہاکہ اگرملزمان کوکوروناوائرس ہواہے توثبوت فراہم کریں،رپورٹس پیش کی جائیں ورنہ قانون کے مطابق حکم جاری کروں گا۔
عدالت سے وکیل نے کوروناوائرس کی رپورٹ پیش کرنے کی مہلت مانگ لی،عدالت نے شام4بجے تک کوروناوائرس کی رپورٹس پیش کرنے کاحکم دیدیا۔

رائیونڈ روڈ پر رائیاں پنڈ کے قریب کھیتوں سے میاں بیوی کی لاشیں ملی ہیں۔
تفصیلات کے مطابق پولیس کا کہنا ہے کہ مقتولین نے کچھ عرصہ قبل پسند کی شادی کی تھی جنہیں فائرنگ کرکے قتل کیا گیا ہے۔پولیس کا کہنا ہے کہ لاشوں کو قبضے میں لے کر کارروائی کا آغاز کردیا گیا ہے۔