Category تازہ ترین

بالی ووڈ اداکارہ زرین خان نے اپنی نجی زندگی اور ابتدائی دنوں میں پیش آنے والی مشکلات کے حوالے سے بتاتے ہوئے کہا کہ انڈسٹری میں برے لوگ بھی ہوتے ہیں جن سے سامنا ہوا۔
33سالہ زرین خان نے ایک انٹرویو میں نام لئے بغیر بتایا کہ ابتدائی دنوں کے بعد انڈسٹری میں ایک شخص نے مزید کام کا لالچ دے کر نازیبا حرکات کرنے کا بھی کہا جس پر میں نے انکار کردیا، میں اپنی عزت کے خلاف کبھی کوئی کام نہیں کرتی۔
زرین خان نے بتایا کہ میں اداکارہ کے علاوہ سب کچھ بننا چاہتی تھی، ممبئی میں 12ویں جماعت تک تعلیم حاصل کی۔ جس کے بعد میرے والد نے مجھ سے اور میری والدہ سے علیحدہ ہونے کا فیصلہ کیا۔ میرا تعلق دولت مند گھرانے سے نہیں تھا، میرے والد کے الگ ہونے کے بعد مجھے گھر کے اخراجات اور اہلخانہ کو سپورٹ کرنے کے لئے کام کے لئے گھر سے نکلنا پڑا۔
انہوں نے مزید کہا کہ میرے کزنز ایئر انڈسٹری میں کام کرتے تھے، مجھے لگا کہ یہ اچھی ملازمت ہے۔ میں نے فیصلہ کیا کہ میں ایئر ہوسٹس بنوں گی لیکن اس وقت میرا وزن 100 کلو سے بھی زیادہ تھا اور کوئی بھی اتنے وزن والی ایئر ہوسٹس کو نوکری نہیں دیتا۔
زرین خان نے انٹرویو میں کہا کہ پھر میں نے کال سینٹر میں ملازمت کی اور اپنے وزن کو بھی کم کرنے کا فیصلہ کیا۔ میں کھانے پینے کی بہت شوقین تھی اور وزن کم کرنا بہت مشکل کوشش تھی۔ کال سینٹر کی نوکری کے بعد میں نے اسٹالز پر پروموشن کی ملازمت بھی کی۔
اداکارہ نے اپنے انڈسٹری میں سفر کے آغاز سے متعلق بتایا کہ ایک دن شوٹنگ کی کال آئی جس پر میں نے منع کردیا۔ انہوں نے بتایا کہ سلمان خان بھی اس میں شامل ہیں جس پر میں حیران رہ گئی اور میں نے فوراً حامی بھر دی۔ شوٹنگ پر کترینہ کیف بھی موجود تھیں جہاں میں نے پہلی مرتبہ سلمان خان کو السلام علیکم کہا۔

شہر قائد میں سال کے پہلے دن سردی کی شدت برقرار ہے اور کم سے کم درجہ حرارت 5.6 ریکارڈ کیا گیا، یوں سردی کی شدت کا دس سالہ ریکارڈ ٹوٹ گیا۔
شہر میں رواں سال کا آغاز 10 سالہ سردی کا ریکارڈ ٹوٹنے سے ہوا ، آج کا درجہ حرارت دس سالوں میں کم ترین رہا۔ محکمہ موسمیات کے مطابق سائبیرین ہواؤں نے شہر کے موسم کو مزید سرد بنادیا۔ آج شہر کا کم سے کم درجہ حرارت 5.6 ریکارڈ کیا گیا۔ اس سے قبل 2014 میں درجہ حرارت 6.5 ریکارڈ کیا گیا تھا۔ محکمہ موسمیات کا کہنا ہے کہ آئندہ 24 گھنٹوں کے دوران شہر کا موسم خشک اور سرد رہنے کا امکان ہے۔ جب کہ کم سے کم درجہ حرارت 7 سے 9 ڈگری سینٹی گریڈ کے درمیان رہے گا۔ شہر میں شمالی سمت سے ہوائیں10کلو میٹر فی گھنٹہ کی رفتار سے چل رہی ہیں۔

لاہور میں نیوایئر نائٹ پر قانون کی خلاف ورزی کرنے والوں کیخلاف 112 مقدمات درج کیے گئے ہیں ۔
تفصیلات کے مطابق سی سی پی او عمر شیخ نے بیان جاری کرتے ہوئے کہاہے کہ ہوائی فائرنگ ، ون ویلنگ ، شراب نوشی ، آتشبازی پر لاہور کے مختلف تھانوں میں 112 مقدمات درج ہوئے ، جن میں 126 افراد کو حراست میں لیا گیاہے ۔ عمرشیخ کا کہناتھا کہ نیوا یئر نائٹ پر ون ویلنگ کرنے والوں کے خلاف 36 اور ہوائی فائرنگ کرنے والوں کے خلاف 26 مقدمے درج ہوئے ہیں ۔ آتشبازی پر 20 مقدمات درج کرتے ہوئے 30 افراد کو گرفتار کیا گیاہے ۔

پاکستان کرکٹ بورڈ نے سال دو ہزار بیس کے ایوارڈز کا اعلان کردیا۔ پی سی بی نے سال 2020 کے ایوارڈز کا اعلان کردیا۔ 12 کیٹگریزمیں ایوارڈز کی نامزگیوں کا فیصلہ آزاد جیوری نے کیا۔ بابر اعظم کو موسٹ ویلیو ایبل اور وائٹ بال کرکٹر آف دی ایئر قرار دیا گیا۔ محمد رضوان ٹیسٹ کرکٹر آف دی ایئر اور فواد عالم کو انفرادی کارکردگی کا ایوارڈ مل گیا۔
فاسٹ بولر نسیم شاہ کوبیسٹ ایمرجنگ انٹرنیشنل کرکٹرکا ایوارڈ دیا گیا۔ ایمرجنگ ڈومیسٹک کرکٹر کا ایوارڈ وکٹ کیپر روحیل نذیر کے نام رہا۔
کامران غلام کو ڈومیسٹک کے بہترین کرکٹر کا ایوارڈ مل گیا۔ آصف یعقوب سال ٹونٹی ٹونٹی کے بہترین امپائر قراردیے گئے۔
ایمرجنگ ڈومیسٹک بہترین خاتون کرکٹر فاطمہ ثناءکو قراردیا گیا جب کہ عالیہ ریاض بیسٹ وومن کرکٹر آف دی ایئرقرارپائیں۔

پولیس نے 60 سے 70 سالہ چار کنوارے بہن بھائیوں کے گھر 80 لاکھ روپے سے زائد کی ڈکیتی کرنے والے چار ملزم پانچ ماہ بعد گرفتار کر لیے، 19 جولائی کو گاؤں بکھر بار کے ایک گھر سے ڈکیتی کی واردات کے دوران لوٹ مار کی گئی تھی ۔

ڈی پی او ذوالفقار احمد نے میڈیا سے گفتگو کرتے ہوئے بتایا کہ متاثرہ چاروں بہن بھائی چھوٹے زمیندار ہیں اور انہوں نے زندگی بھر کی جمع پونجی مٹی کے گھڑوں میں چھپا رکھی تھی۔پولیس کا کہنا ہے کہ گاؤں کے ہی ایک مخبر کی نشاندہی پر ڈاکوؤں نے انہیں لوٹا تھا، پولیس نے سائنسی بنیادوں پر تفتیش کرتے ہوئے موقع سے فنگر پرنٹ حاصل کیے اور پانچ ماہ بعد 62 لاکھ 42 ہزار روپے مالیت کا مسروقہ مال برآمد کرکے ڈاکوؤں کو گرفتار کیا جب کہ رقم اصل مالکان کے حوالے کردی۔پولیس کے مطابق گرفتار ملزمان دیگر مقدمات میں بھی ملوث ہیں جن سے مزید تفتیش کی جارہی ہے۔

گزشتہ رات نیو ایئر نائٹ کے موقع پر ماسک پہن کر بچوں اور خواتین کو ڈرانے والے منچلے کو گرفتار کر لیا گیا ہے۔

پشاور پولیس کے مطابق موتی محلہ کے نوجوان اسد کو نیو ایئر نائٹ کے موقع پر پرماسک پہن کر بچوں اور خواتین کو ڈرانے کے نتیجے میں تھانہ شاہ قبول پولیس کی جانب سے گرفتار کیا گیا ہے۔
واضح رہے کہ نیو ایئر نائٹ پر مختلف شہروں میں انتظامیہ کی جانب سے پابندیوں کا اعلان کیا گیا تھا۔
شہر قائد کراچی میں نئے سال کی آمد کے موقع پر نوجوانوں اور فیملیز کی بڑی تعداد سی ویو پہنچی ہے جہاں سیکیورٹی کے بھی خصوصی اقدامات کیے گئے تھے۔
نئے سال کے آغاز پر کراچی میں ہوائی فائرنگ کے مختلف واقعات میں لڑکی سمیت کئی افراد زخمی ہوگئے۔
شہرمیں ہوائی فائرنگ اور ون ویلنگ کے الزام میں 16 افراد کو حراست میں لےکر مقدمات درج کرلیے گئے۔
دوسری جانب پنجاب کے شہر فیصل آباد کے علاقے کوہ نور میں بھی کئی نوجوان احکامات کی خلاف ورزی کرنے پر دھر لیے گئے۔
اسلام آباد کے نجی مال کی انتظامیہ کی جانب سے سال نو کو خوش آمدید کرنے کے لیے آتش بازی کا اہتمام کیا گیا تھا، آتش بازی دیکھنے کے لیے شہریوں کی ایک بری تعداد نجی مال کے باہر پہنچی۔

لاہورڈویلپمنٹ اتھارٹی کے ڈائریکٹر جنرل احمد عزیز تارڑ کی ہدایت پر ٹاون پلاننگ ونگ زون فائیو کے عملے کاانفورسمنٹ سٹاف اور پولیس کے ہمراہ ،ڈائریکٹر سلمان محفوظ ،ڈپٹی ڈائریکٹر افراز اختر،طیب علی اوراحسان نواز کی زیرنگرانی ڈیفنس روڈ، رائے ونڈ روڈ اور پرائیویٹ رہائشی سکیم چنار کورٹس، سلطان ٹاون اور ویسٹ وڈ کالونی میں آپریشن ۔ غیر قانونی کمرشل استعمال کی بنا پر چنار کورٹس میں تین عمارتیں، پلاٹ نمبر 58 پر قائم کالج ،پلاٹ نمبر 82 پر قائم گرلز ہوسٹل ،پلاٹ نمبر ایک تا 15 پر قائم ٹائل سٹور اور دفاتر سر بمہر کر دیے گئے۔ سلطان ٹاون اورویسٹ وڈ کالونی میں بھی غیر قانونی کمرشل استعمال کی بنا پر پانچ پانچ عمارتیں سربمہرکردی گئیں۔ یونیورسٹی آف لاہور کو سیل کر دیا گیا.

شدید دھند کے باعث موٹروے کو ہر قسم کی ٹریفک کیلئے بند کردیا گیا۔

ترجمان موٹروے پولیس کے مطابق حد نگاہ کم ہونے کے باعث موٹروے ایم تھری کو لاہور سے رجانہ تک بند کردیا گیا ہے۔ ایم تھری پر حد نگاہ 200 سے 300 میٹر تک ہے۔ ترجمان نے مزید بتایا کہ دھند کی وجہ سے موٹروے ایم ٹو شیخوپورہ سے پنڈی بھٹیاں تک بند کردی گئی ہے۔

ترجمان موٹروے پولیس نے ہدایت کی ہے کہ لوگ غیر ضروری سفر سے گریز کریں اور سفر کے دوران گاڑیوں پر فوگ لائٹس کے استعمال کو یقینی بنائیں۔

خیال رہے کہ اتوار کے روز ہونے والی بارش کی وجہ سے دھند میں کمی آئی تھی اور پیر کو مطلع صاف رہا لیکن رات ہوتے ہی ایک بار پھر دھند نے ڈیرے ڈال لیے۔

کراچی کے علاقے کشمیر کالونی میں واقع گھر میں آگ لگنے سے جھلس کر 3 بچے جاں بحق ہو گئے جبکہ 3 افراد زخمی ہوئے ہیں۔
پولیس کے مطابق فائر بریگیڈ نے پہنچ کر گھر میں لگی ہوئی آگ پر قابو پا لیا ہے، آگ لگنے کے وقت گھر میں میاں بیوی اور ان کے 4 بچے تھے۔آگ سے جھلس کر 3 بچے جاں بحق، جبکہ ایک بچہ اور اس کے والدین زخمی ہو گئے۔
جاں بحق ہونے والے بچوں کی لاشوں اور زخمیوں کوہسپتال منتقل کر دیا گیا ہے جہاں برنس وارڈ میں زخمیوں کو طبی امداد دی جا رہی ہے۔علاقہ پولیس کا کہنا ہے کہ گھر میں آگ لگنے کی وجوہات معلوم نہیں ہو سکی ہیں جنہیں جاننے کیلئے تحقیقات کی جا رہی ہیں۔

اداکار فیروز خان نے شوبز انڈسٹری چھوڑکر واپس آنے کی وجہ بتاتے ہوئے کہا ہے کہ کچھ مختلف کام کرنے ہیں اسی لیے انڈسٹری میں واپس آیا ہوں۔
ویب سائٹ کو دیئے گئے انٹرویو کے مطابق فیروز خان نے کہا کہ میرے شیخ حضرت سلطان محمد علی صاحب ہیں جوکہ حضرت سلطان باہوؒ کی دسویں اولاد ہیں، انہوں نے مجھے حکم دیا تھا کہ میں یہ انڈسٹری نہ چھوڑوں۔
فیروز خان نے یہ بھی کہا کہ شیخ صاحب نے مجھے کہا ہے کہ میرے لیے ضروری ہے کہ میں شوبز انڈسٹری سے جڑا رہوں۔ یہی وجہ ہے کہ مجھے یہاں رہتے ہوئے کچھ مختلف کرنا ہے اس لیے میں انڈسٹری میں واپس آیا، آج کل نئے ڈراموں پر کام کر رہا ہوں اور بہت جلد اپنا پروڈکشن ہاو¿س بھی شروع کرنے والا ہوں۔
واضح رہے کہ فیروز خان نے رواں سال کی ابتداءمیں ٹویٹر پر اعلان کرتے ہوئے کہا تھا کہ میں شوبز انڈسٹری کو خیرباد کہہ رہا ہوں اور اگر ضرورت پڑی تو اداکاری محض اسلام کی تعلیمات کے لیے ہی کروں گا۔