Category تازہ ترین

ممبئی : بھارتی اداکار سنی دیول کا کہنا ہے کہ پاکستانی اور بھارتی عوام امن اور محبت کے ساتھ رہنا چاہتے ہیں۔بھارتی میڈیا کے مطابق بالی ووڈ کے اداکار سنی دیول نے اپنی نئی فلم ’ غدر 2‘ کے ٹریلر لانچ کی تقریب میں میڈیا سے گفتگو میں کہا کہ دونوں ملکوں کے عوام ایک دوسرے کے لیے محبت اور امن چاہتے ہیں لیکن سیاسی کھیل لوگوں میں نفرت پیدا کررہا ہے۔سنی دیول نے کہا کہ بات انسانیت کی ہوتی ہے۔ دونوں ممالک کے لوگ ایک دوسرے سے لڑائی نہیں چاہتے۔

ممبئی: سابق بھارتی کپتان مہندرا سنگھ دھونی کی اہلیہ ساکشی نے انکشاف کیا ہے کہ انکے شوہر جلد ہی اداکاری کی دنیا میں اپنی صلاحیتوں کا لوہا منوانے کا ارادہ رکھتے ہیں۔میڈیا سے گفتگو کرتے ہوئے ساکشی دھونی نے کہا کہ کرکٹ سے کنارہ کشی اختیار کرنے کے بعد مہندرا سنگھ دھونی اداکاری کی دنیا میں جلد قدم رکھیں گے، وہ کیمرے سے نہیں شرماتے اگر انکے مطابق فلم ہوئی تو ضرور کریں گے۔ ساکشی نے کہا کہ دھونی ایکشن فلمیں کرتے ہوئے اچھے لگیں گے کیونکہ وہ ہمیشہ ایکشن میں رہتے ہیں۔

اسلام آباد : وزیر مملکت برائے پٹرولیم مصدق ملک نے کہا ہے کہ ہم نے ایک سو اڑتیس ایم ایم ایف ڈی نئی گیس سسٹم میں شامل کی ہے ۔ ملک میں ایک اعشاریہ ایک بلین ڈالر کی نئی گیس میں اضافہ ہوا ۔ گیس کے شعبے میں ملک کو خود کفیل بنا رہے ہیں ۔ ان خیالات کا اظہار انہوں نے گرین فیلڈ ریفائنری پروجیکٹ کی مفاہمتی یادداشت پر دستخط کی تقریب سے خطاب کرتے ہو ئے انہوں نے کہاکہ گیس کے شعبے میں ملک کو مکمل خود کفیل بنا رہے ہیں ۔ انہوں نے کہا کہ ہم نے ایک سو اڑتیس ایم ایم ایف ڈی نئی گیس سسٹم میں شامل کی ہے ، ملک میں ایک اعشاریہ بلین ڈالر کی نئی گیس میں اضافہ ہوا ہے ۔ انہوں نے کہا کہ ملک اب ترقی کی راہ پر گامزن ہو چکا ہے اور ترقی کا یہ سلسلہ اب جاری رہے گا ۔ انہوں نے کہا آذربائیجان کے ساتھ ایل این جی کے حوالے سے معائدہ کیا ۔ معائدے کے دوران پاکستان ہر ماہ ایل این جی کا ایک جہاز خریدے گا، خریداری کا اختیار پاکستان کے پاس ہو گا ، نہ خریدنے پر کوئی ہرجانہ نہیں ہو گا ۔ انہوں نے کہا کہ روس کے ساتھ تیل کی خریداری کا معائدہ کیا ہے ۔ جس کا فائدہ جلد عوام کو پہنچے گا ۔ انہوں نے کہا کہجی سی سی ممالک کے ساتھ بھی تیل کی خریداری حوالے سے بات چیت جاری ہے ۔ گرین فیلڈ ریفائنری پروجیکٹ سے زرمبادلہ پر بو جھ میں کمی آئیگی ۔ انہوں نے کہا کہ پاکستان میں قابل تجدید تونائی کے منصوبوں کو فروغ دے رہے ہیں ،ملک میں کارخانے چلانے لوگوں کو روزگار کے مواقع فراہم کرنے کے لئے سستی توانائی کی فراہمی اہم ہے ۔ انہوں نے کہا کہ وزیر اعظم شہباز شریف کا وژن ہے کہ ملک کو تمام شعبوں میں ترقی کی راہ پر گامزن کیا جائے

اسلام آباد : پاکستان تحریک انصاف کے سیکرٹری جنرل عمر ایوب نے حکومت پر شدید تنقید کرتے ہوئے کہاہے کہ ملک میں تاریخ کی بلند ترین مہنگائی پر پہنچ چکی ہے فاشسٹ حکومت نے اپنے تباہ کن 15 ماہ کے دور حکومت میں ریکارڈ مہنگائی اور معاشی بدانتظامی سے پاکستان کے محنتی عوام کی کمر توڑ دی ہے۔ اپنے ایک بیان میں انہوں نے کہا کہ آئی ایم ایف ٹیم نے اپنی رپورٹ میں واضح طور پر لکھا ہے کہ مہنگائی اور معاشی بدحالی اس فاشسٹ حکومت کی کرنسی مارکیٹ میں مداخلت اور درآمدی پابندیوں جیسی معاشی بدانتظامیوں کی وجہ سے ہے، حکومت کے اقتدار سنبھالنے کے بعد سے 15 مہینوں میں بجلی کی قیمتوں میں 275 فیصد اضافہ ہوا ہے، روزانہ 10 سے زائد گھنٹے وسیع پیمانے پر لوڈشیڈنگ ایک نیا معمول بن گیا ہے۔ عمر ایوب کا کہنا تھا کہ ایس پی آئی جو اوسط گھرانوں کے ضروری اخراجات کی افراط زر کی پیمائش کرتا ہے ڈرامائی طور پر بڑھ چکا ہے، لوگوں کے پاس اتنا پیسہ نہیں ہے کہ وہ اپنا گزارہ کر سکیں ،12 ماہ میں قیمتوں میں اضافے کی مثال یہ ہے کہ گندم کا آٹا 132.36 فیصد ، گیس چارجز 108.38، چائے 97.71، چاول 79.60 فیصد مہنگے ہوچکے، چینی 63.72 فیصد ، آلو 62.65، ٹماٹر 60.50، گڑ 57.57، مرچ پاؤڈر 55 اور چکن کی قیمتوں میں 54.52 کا اضافہ ہوا ہے ۔ انہوں نے کہا کہ جو سوال ذہن میں آتا ہے وہ یہ ہے کہ اس نااہل فاشسٹ حکومت کی اولین ذمہ داری معیشت کو سنبھالنا تھی، لیکن انہوں نے صرف پی ٹی آئی کو توڑنے اور عمران خان کو گھیرنے پر اکتفا کیا ہے، عمران خان ایک کارنرڈ ٹائیگر ہے جو انشاء اللہ بھاری اکثریت سے واپس آئے گا، خواتین و حضرات اپنے شناختی کارڈ تیار کروائیں، اپنے ووٹ کا اندراج اور مقام چیک کریں، ایک محلہ ٹیم بنائیں، پی ٹی آئی کو سپورٹ کریں اور پولنگ ڈے پر اپنے پولنگ اسٹیشن پر جا کر ‘بلے’ کے نشان پر مہر لگائیں، وطن واپس آکر عمران خان کی شاندار فتح دیکھیں۔

اسلام آباد: ایوان بالا میں وفاقی وزیر قانون سینیٹر اعظم نذیر تارڑ نے کہاہے کہ ڈاکٹر عافیہ صدیقی کی رہائی کیلئے تمام وسائل بروئے کار لائیں گے۔جمعرات کے روز سینیٹ اجلاس کے دوران سینیٹر مشتاق احمد خان نے توجہ دلائو نوٹس پر بات کرتے ہوئے کہاکہ امریکہ میں قید عافیہ صدیقی سے ملاقات کیلئے امریکہ گیا تھا انہوں نے کہاکہ ڈاکٹر عافیہ کو امریکی جیل میں 7ہزار 425دن ہوگئے ہیں اس پر شدید قسم کا تشدد کیا جارہا ہے ہم نے 20سال کے بعد ڈاکٹر عافیہ سے ملاقات کی ہے اس کو ملاقات میں زنجیروں میں لایا گیا اور اس کے چار دانت ٹوٹ چکے ہیں اس کی سماعت متاثر ہوچکی ہے اور سکارف پھٹا ہوا تھا ہمیں ان کے بچوں کی تصویریں بھی نہیں دکھا سکے ہیں انہوں نے کہاکہ جب 2033میں یہ اغوا ہوگئی تھی تو اس کے ساتھ چھ ماہ کا بیٹا سلیمان بھی تھا جو ابھی تک لاپتہ ہے انہوں نے کہاکہ تین گھنٹو ں تک اس سے ملاقات کی انہوں نے کہاکہ میری حکومت سے درخواست ہے کہ اس کیس کو دیکھے نہ تو وہ امریکی شہری ہے اور نہ ہی کسی قسم کی دہشت گردی میں ملوث ہے اس پر الزام ہے کہ وہ غزنی میں پائی گئی اور چار امریکی فوجیوں نے ان سے تفتیش کی تھی اس دوران انہوں نے ایک امریکی سے بندوق چھین کر ان پر فائرنگ کی تھی تاہم اس فائرنگ سے کوئی بھی امریکی فوجی زخمی نہیں ہوا اور نہ ہی مرا تھا انہوں نے کہاکہ جس جیل میں وہ ہے اس میں 235ایسے قیدی موجود ہیں جو جنسی جرائم میں قید ہیں وہ ایک جہنم میں قید ہیں ان کا مطالبہ ہے کہ مجھے اس جہنم سے نکالا جائے انہوں نے کہاکہ حکومت ڈاکٹر عافیہ کے کیس میں مدعی بن جائے وہ 15سال سے ذہنی مریضوں کے قید میں ہے اس کو ریلیف دیا جائے انہوں نے کہاکہ اس حوالے سے حکومت اس کیس کی مدعی بن جائے اور یہ مقدمہ لڑے انہوں نے کہاکہ امریکہ میں صدارتی انتخابات کے موقع پر بھی صدر کے پاس کسی بھی غیر ملکی قیدی کو معاف کرنے کا اختیار ہوتا ہے اور روس و ایران کے جاسوسی کے الزام میں قید افراد کو بھی رہا کیا گیا ہے انہوں نے کہاکہ اسی طرح حکومتی سطح پر بھی پاکستان نے امریکہ کیلئے جو اقدامات کئے ہیں اس کے جواب میں ڈاکٹر عافیہ صدیقی کی رہائی کا مطالبہ کیا جائے انہوںنے کہاکہ ڈاکٹر عافیہ صدیقی کو ٹیکساس جیل سے کسی مناسب مقام پر منتقلی کیلئے بھی کوششیں کی جائیں انہوں نے کہاکہ تمام سیاسی جماعتیں مانتی ہیں کہ ڈاکٹر عافیہ صدیقی بے گناہ ہیں اگر ہم ریمنڈ ڈیوس کو رہا کر سکتے ہیں تو عافیہ صدیقی کی رہائی کیلئے اقدامات کیوں نہیں کر سکتے ہیں انہوں نے کہاکہ ہمیں اس کیس کے حوال سے کسی قسم کی دستاویزات نہیں دی جارہی ہیں ڈاکٹر عافیہ صدیقی بے گناہ اور مظلوم ہیں انہوں نے چیرمین سینیٹ سمیت تمام سیاسی جماعتوں کے ارکین سے التجاء￿ کی کہ ڈاکٹر عافیہ صدیقی کی رہائی کیلئے مخلصانہ کوششیں کی جائیں اس موقع پر وفاقی وزیر قانون سینیٹر اعظم نذیر تارڑ نے کہاکہ وزارت خارجہ کی جانب سے تحریری طور پر اگاہ کیا گیا ہے کہ وفاقی وزیر اور وزیر مملکت ملک میں موجود نہیں ہیں اس حوالے سے جب بھی وہ موجود ہونگے تو مفصل رپورٹ ایوان میں پیش کی جائے گی انہوں نے کہاکہ شہریوں کے حقوق کا تحفظ ریاست کی ذمہ داری ہے انہوں نے کہاکہ ڈاکٹر عافیہ صدیقی اس قوم کی بیٹی ہیں اور اس مسئلے پر ہر حکومت نے کوششیں کی ہیں انہوں نے کہاکہ ڈاکٹر عافیہ صدیقی کی رہائی کے حوالے سے تمام تر وسائل بروئے کار لائیں گے۔۔

اسلام آباد:شہدائے کربلا کی لازوال قربانیوں کی یاد میں یوم عاشور 10محرم الحرام29جولائی ہفتہ کو نہایت عقیدت و احترام اور مذہبی رواداری کے ساتھ منایا جائے گا، یوم عاشور کے موقع پر ملک بھر میں مجالس عزاء منعقد ہوں گی جبکہ علم،تعزیے اور ذوالجناح کے ماتمی جلوس نکالے جائیں گے شام کو مجالس شام غریباں برپا ہوں گی۔نواسہ رسول ؐ ،جگر گوشہ بتول ؑ،حضرت امام حسین ؑ اورشہدائے کربلا کو خراج عقیدت پیش کرنے کیلئے10محرم کو ملک کے طول و عرض میںمجالس عزاء،علم وتعزیہ اورذوالجناح کے ہزاروں جلوس برآمد ہوں گے جس میں لاکھوں کی تعداد میں عزادار شامل ہو کر ماتم داری ور نوحہ خوانی کرکے اپنا پر سہ پیش کریں گے۔ملک بھر میں منعقدہ مجالس عزاء میں علمائے کرام اور ذاکرین فلسفہ شہادت بیان کرتے ہوئے حضرت امام حسین ؑ اور ان کے رفقاء کی دین اسلام کی سربلندی کیلئے کربلا کے تپتے ریگزار میں پیش کی گئی عظیم قربانیوںکو خراج عقیدت پیش کریں گے مجالس عزا ء کے اختتام پرشبیہہ علم وذوالجناح اور تعزیے کے بڑے بڑے جلوس برآمد ہوں گے جو کہ اپنے مقررہ راستوں سے گزر کر شام کو واپس آستانوں پر اختتام پذیر ہوں گے جہاں پر مجالس شام غریباؓ بپا ہوں گی اس موقع پر پولیس و انتظامیہ کی جانب سے انتہائی سخت حفاظتی اقدامات کیے جائیں گے پولیس اہلکاروں کی چھٹیاں منسوخ کی جا چکی ہیں۔نواسہ رسول ؐ حضرت امام حسین ؑ کا یوم شہادت ملک بھر کی طرح جہانیاںمیں بھی نہایت عقیدت و احترام سے منایا جائے گا۔شہدائے کربلا کو خراج عقیدت پیش کرنے کیلئے امام بارگاہ حسینیہ ؓ ملتان روڈ جہانیاںسے دس محرم کو صبح نو بجے علم و ذوالجناح اور تعزیہ کا ماتمی جلوس برآمد ہو گا اس ماتمی جلوس میں بڑی تعداد میں عزادار شامل ہو کر ماتم داری اور نوحہ خوانی کرکے اپنا پرسہ پیش کریں گے۔ دوپہر بارہ بجے مرکزی چوک میں مجلس عزاء منعقد ہو گی جس میں ملک کے ممتاز علماء کرام اور ذاکرین فلسفہ شہادت بیان کرتے ہوئے حضرت امام حسین ؑ اور ان کے رفقاء کی دین اسلام کی سربلندی کیلئے کربلا کے تپتے ریگزار میں پیش کی گئی عظیم قربانیوںکو خراج عقیدت پیش کریں گے جبکہ بعد از مجلس سہہ پہر تین بجے مذکورہ چوک میں زنجیر زنی ہو گی ا س موقع پر پولیس و انتظامیہ کی جانب سے انتہائی سخت حفاظتی اقدامات کیے جائیں گے حکومت کی جانب سے 9اور 10محرم الحرام کو تعطیل کا اعلان کیا گیا ہے مختلف شہروں میں پاک فوج اور رینجرز کے دستے تعینات کیے گئے ہیںمختلف اضلاع میں موٹر سائیکل کی ڈبل سواری پر پابندی اور موبائل فون سروس بھی معطل رہے گی کسی بھی ناخوشگوار واقعہ سے نمٹنے کیلئے ہسپتالوں میں ایمر جنسی کا نفاذ کرکے ڈاکٹرز اور پیرا میڈیکل سٹاف کی چھٹیاں منسوخ کر دی گئی ہیں۔

لاہور :ایک سال سے تنخواہوں سے محروم انصاف سکولوں میں پڑھانے والے اساتذہ کی سنی گئی، محکمہ خزانہ پنجاب نے لاہور سمیت صوبے بھر کے انصاف سکولوں کے لیے 1ارب 68کروڑ روپے کے فنڈز جاری کر دیئے ہیں بتایا گیا ہے کہ مذکرہ فنڈز انصاف سکولوں کے اساتذہ کی تنخواہوں اور انتظامی اخراجات کی ادائیگی کے لیے جاری کیے گئے ہیں۔لاہور میں انصاف سکولوں کو تنخواہوں کی ادائیگی کیلئے ایک کروڑ نوے لاکھ روپے جاری کئے گئے ہیں۔ اس طرح ملتان کیلئے 4 کروڑ تیس لاکھ روپے ،فیصل آباد کیلئے 5 کروڑ چالیس لاکھ روپے ،ٹوبہ ٹیک سنگھ کیلئے 6 کروڑ ستر لاکھ ،راولپنڈی کیلئے 1 کروڑ بیس لاکھ روپے ،جھنگ کیلئے 9 کروڑ اور حافظ آباد کیلئے 3 کروڑ ساٹھ لاکھ روپے ،جہلم کیلئے 4 کروڑ اور چنیوٹ کیلئے 4 کروڑ چالیس لاکھ روپے جاری،اٹک کیلئے 40 کروڑ اوربہاولنگر کیلئے 7 کروڑ پچاس لاکھ روپے ،چکوال کیلئے 80 لاکھ اوربہاولپور کیلئے3 کروڑ ساٹھ لاکھ روپے ،سیالکوٹ کیلئے5 کروڑ اور وہاڑی کیلئے 6 کروڑ ستر لاکھ روپے جاری کر دیئے گئے ہیں۔ بتایا گیا ہے کہ مذکورہ فنڈز صرف انصاف سکولوں کے اساتذہ کی تنخواہوں کی ادائیگی پر خرچ ہوسکیں گے۔پنجاب بھر میں انصاف سکولوں کی تعداد 7 ہزار اور لاہور میں 108 ہے،مذکورہ سکولوں میں پڑھانے والے اساتذہ کی تعداد دس ہزار ہے۔

تل ابیب:اسرائیل میں وزیراعظم بنیامین نیتن یاہو کی حکومت کی جانب سے سپریم کورٹ کے اختیارات کو محدود کرنے کے متنازع قانون کی منظوری کے خلاف بہ طور احتجاج ہزاروں اسرائیلی ڈاکٹروں نے کام چھوڑ دیا ہے،مزدور رہ نمائوں نے عام ہڑتال کی دھمکی دی ہے اور سینیر جج صاحبان بیرون ملک دورے سے ایک روز قبل ہی عجلت میں لوٹ آئے ہیں۔میڈیارپورٹس کے مطابق ناقدین کا کہنا تھا کہ اس قانون سازی سے چیک اینڈ بیلنس کا نظام ختم ہوکررہ جائے گا۔اسرائیل کے چار معروف اخبارات نے اپنے اپنے صفح اول پر کوئی شہ سرخی یا سرخیاں نہیں جمائیں اور منفرد انداز میں احتجاج کرتے ہوئے انھیں صرف سیاہ روشنائی میں چھاپا تھا۔اس کی قیمت ہائی ٹیک کمپنیوں کے اتحاد نے ادا کی تھی۔ان کالے سیاہ صفحات کے زیریں حصے میں صرف ایک سطر میں یہ الفاظ لکھے تھے،اسرائیلی جمہوریت کے لیے سیاہ دن۔وزیر اعظم بنیامین نیتن یاہو کی متعارف کردہ عدالتی اصلاحات کے سلسلے کے پہلے مرحلے میں کنیست میں رائے شماری کی گونج پورے ملک میں سنائی دی۔نیتن یاہو کی جانب سے حتمی سمجھوتے کے وعدوں، سات ماہ کی شدید عوامی مزاحمت اور اسرائیل کے قریبی اتحادی امریکا کی جانب سے تبدیلی کے خلاف ایک نادر انتباہ کے باوجود یہ فیصلہ کیا گیا ہے۔اس بل کو حکومتی اتحاد نے متفقہ طور پر منظور کیا، جس میں انتہائی قوم پرست اور کٹڑ مذہبی جماعتیں شامل ہیں، جبکہ حزب اختلاف کے ارکان شرم کرو! کا نعرہ لگاتے ہوئے ایوان سے باہر نکل گئے تھے۔اب شہری حقوق کی تنظیموں نے سپریم کورٹ میں درخواستیں جمع کرائی ہیں جن میں اس نئے قانون کو منسوخ کرنے کا مطالبہ کیا گیا ہے۔اسرائیل کی بڑی شاہراہوں پر ایک بار پھر احتجاجی مظاہرے شروع ہو گئے ہیں۔

واشنگٹن:امریکی محکمہ خارجہ نے باورکرایا ہے کہ اسرائیلی کنیسٹ (پارلیمنٹ)کی جانب سے انتہائی دائیں بازو کی حکومت کے عدلیہ کے اختیارات محدود کرنے کے منصوبے کے بعد امریکا اسرائیل کی فوجی امداد میں کمی کرے گا اور نہ ہی امدادی پروگرام بند کیا جائے گا۔میڈیارپورٹس کے مطابق اسرائیل میں منظور ہونے والے عدالتی اصلاحات کے متنازع قانون پر امریکا کو بھی اعتراضات ہیں جب کہ اسرائیل میں اپوزیشن قوتیں اس قانون کو عدلیہ کی آزادی کے لیے خطرناک قرار دیتی ہیں۔امریکی وزارت خارجہ کے نائب ترجمان ویدانت پٹیل نے نامہ نگاروں کو بتایا کہ فوجی امداد میں کوئی کمی یا بندش نہیں کی جائے گی، کیونکہ اسرائیل سے ہماری وابستگی اور اسرائیل کی سلامتی کے لیے ہمارا عزم غیر متزلزل ہے۔

نائیجیر :نائیجیریا کی شمال مغربی ریاست زمفارا میں مسلح افراد کے ایک گروہ کے حملے میں 7فوجیوں سمیت 34 افراد ہلاک ہو گئے۔برطانوی اخبار کے مطابق ریاست کے علاقے مارو کے دور دراز دان گلبی نامی ضلع میں مسلح افراد کے گروہ نے حملہ کیا جس میں 27 دیہاتی ہلاک ہو گئے جبکہ کمیونٹی کی مدد کے لیے جاتے ہوئے 7 فوجی اہلکاروں کو موت کے گھاٹ اتار دیا۔