Category سیاست

اسلام آباد: پاکستان اور آئی ایم ایف کے درمیان سٹاف لیول کا معاہدہ کل (جمعرات ) کو ہونے کا امکان ہے ، ذرائع کے مطابق پاکستان اور آئی ایم ایف کے درمیان اسٹاف لیول معاہدہ 9 فروری کو ہونا تھا جو اب 2مارچ میں ہونے کا امکان ہے ۔ ذرائع کے مطابق گزشتہ روزپاکستان اورآئی ایم ایف کے درمیان مذاکرات نہیں ہوئے جو بجلی بلوں کی رکی ہوئی وصولیاں شروع کرنے کے بعد ہوں گے۔ذرائع کا کہنا ہے کہ قرضہ پروگرام کی بحالی کے لیے آئی ایم ایف کی کئی شرائط پرعمل درآمدکرناہوگا جس کے تحت حکومت کو سیلز ٹیکس میں اضافے کا نوٹی فکیشن اور مانیٹری پالیسی میں اضافے کا بھی اعلان کرنا ہوگا۔ذرائع کے مطابق مانیٹری پالیسی کمیٹی کا اجلاس 16 کے بجائے 2 مارچ کو ہونے کا امکان ہے جس میں مانیٹری پالیسی کمیٹی شرح سود میں اضافے کا جائزہ لے گی اور کمیٹی کے فیصلے سے آئی ایم ایف کو آگاہ کیا جائے گا۔

لاہور: پاکستان تحریک انصاف کے رہنما شہباز گل نے کہا ہے کہ سپریم کورٹ میں کیس چل رہا ہے مگر مریم نواز نے پہلے فیصلہ سنا دیا۔لاہور ہائی کورٹ کے بار میڈیا سے گفتگو کرتے ہوئے شہباز گل نے کہا کہ مریم نواز کہتی ہیں پہلے انصاف ہو گا پھر الیکشن ہو گا۔شہباز گل کا کہنا ہے کہ وہ کہتی ہیں میرے والد کو چور کہا گیا اب دوسروں کو بھی چور کہا جائے۔انہوں نے کہا کہ مجھے مڈل کلاس سے ہونے کی سزا دی جا رہی ہے، میں ای سی ایل سے نام نکلوا کر باہر گیا پھر واپس بھی آیا، میرے اوپر جعلی مقدمے بنائے گئے۔دوسری جانب لاہور ہائی کورٹ میں شہباز گل کا نام ای سی ایل سے نکلوانے کی درخواست پر سماعت ہوئی۔جسٹس جواد حسن نے شہباز گل کی درخواست پر سماعت کی۔سنگل بینچ نے معاملے پر لارجر بینچ بنانے کی سفارش کر دی، کیس کی فائل چیف جسٹس لاہور ہائی کورٹ کو ارسال کر دی گئی۔شہباز گل نے نام ای سی ایل سے نکلوانے کی درخواست دائر کر رکھی ہے۔

اسلام آباد:الیکشن کمیشن نے آئندہ عام انتخابات میں آر ایم ایس کے استعمال کیلئے اہم اقدام اٹھا لیا ہے۔ الیکشن کمیشن کی جانب سے ملازمین کو آر ایم ایس کے استعمال کی ٹریننگ کا آغاز کرنے کا فیصلہ کیا گیا ہے۔ الیکشن کمیشن نے صوبائی الیکشن سے قبل پرانے آر ایم ایس پر ایک دن کی موک ایکسرسائز کافیصلہ بھی کیا ہے۔ صوبائی الیکشن کمیشن نے آرایم ایس مشین پرفرائض انجام دینے والے آپریٹرزکیلئے فہرست جاری کردی ہے۔ صوبائی الیکشن کمیشن آف خیبرپختونخواہ نے تمام ریجنل الیکشن کمشنرزکواس حوالے سے مراسلہ جاری کر دیا ہے۔ الیکشن کمیشن نے اس حوالے سے 23فروری کو بھی تمام ریجنل الیکشن کمشنرز کومراسلہ جاری کیاتھا۔ مراسلہ کے مطابق صبح 10بجے سے دوپہر2بجے تک قومی اسمبلی کی 51نشستوں میں رزلٹ منیجمنٹ سسٹم کے استعمال کی مشق کی جائے گی۔ آپریٹرزصوبے کی 145صوبائی نشستوں میں بھی آر ایم ایس مشین کے استعمال کی مشق کرینگے۔ مراسلہ میں ہدائت کی گئی ہے کہ الیکشن کمیشن آف پاکستان کی جانب سے دی گئی گائینڈ لائنزپرعمل یقینی بنائیں۔ الیکشن کمیشن نے تمام صوبائی الیکشن کمیشنرزاورڈسٹرکٹ الیکشن کمیشنرزکوپہلے ہی پروٹوکولزجاری کی ہیں۔ مشین میں ڈیٹاانٹڑی کرتے وقت اگرمسائل کاسامنا ہوتومتعلقہ الیکشن آفیسر کو رپورٹ کریں۔ مراسلے میں ہدائت کی ہے کہ اس اہم عارضی مشق کوترجیح دی جائے اورتجاویز بھی پیش کریں۔ تمام آپریٹرز کومشق کیلئے یوزرنام اورپاسورڈ بھیج دیاگیا ہے ۔ذرائع کا کہنا ہے کہ الیکشن کمیشن نے آر ایم ایس کو موڈیفائی کرنے کے لیے کروڑوں روپے کا ٹھیکہ بھی دے رکھا ہے۔الیکشن کمیشن دونوں صوبوں میں عام انتخابات، 2018 میں استعمال کردہ رزلٹ مینجمنٹ سسٹم ے ذریعے کروائے جانے کا فیصلہ کیا۔

لاہور:عدلیہ کیخلاف توہین آمیز تقریرکا معاملہ، لاہور ہائی کورٹ میں عدلیہ کیخلاف توہین آمیز تقریر پر مریم نواز کیخلاف توہین عدالت کی درخواست پر سماعت ہوئی۔ جسٹس شجاعت علی خان نے توہین عدالت کی درخواست پر سماعت کی۔عدالت نے سماعت بدھ(آج)تک ملتوی کرتے ہوئے درخواست گزار سے مزید دلائل طلب کرلئے۔دوران سماعت عدالت نے استفسار کیا کہ بتائیے آپ کی درخواست کیسے قابلِ سماعت ہے؟ بتائیے اس عدالت کے پاس سماعت کا اختیار کیسے ہے؟ یہ تو سپریم کورٹ کے ججز کے متعلق ہے تو آپ وہاں جائیں۔درخواست گزار نے موقف اختیار کیا کہ سپریم کورٹ کے ججز کیخلاف توہین آمیز جملے بھرے جلسے میں ادا کیے گئے۔ عدالت نے ریمارکس میں کہا کہ آپ قانون بتادیں کس قانون کے تحت حکم جاری کروں؟ درخواست گزار نے کہا کہ میں نے توہین عدالت کی درخواست دائر کی ہے۔ اسی قانون کے تحت کارروائی کی استدعا کی ہے۔ مریم نواز نے چھ توہین آمیز باتیں کی ہیں۔

اسلام آباد :پاکستان پیپلزپارٹی کے رہنما منظور وسان نے کہا ہے کہ پی ٹی آئی چیئرمین عمران خان مارچ میں نا اہل ہو نے کے ساتھ ساتھ جیل بھی چلے جائیں گے ۔ اپنے ایک بیان منظور وسان کا کہنا تھا کہ عمر ان خان مارچ میں نااہل ہوجائیں گے،عمران خان کے خلاف پرانے کیسز بھی کھل جائیں گے۔ان کا کہنا ہے کہ چیئرمین پی ٹی آئی عمران خان جیل بھی جائیں گے۔ عمران خان جیل جانے سیجانے سے ڈررہے ہیں،جیل بھرو تحریک چلانا کوئی آسان کام نہیں ہے۔انہوں نے کہا ہے کہ مہنگائی سے سرکاری ملازمین اور مزدور طبقہ پریشان ہے۔سرکاری ملازمین کی تنخواہیں 70 فیصد بڑھائی جائیں۔مزدوروں کی بھی مزدوری میں اضافہ کا اعلان کیا جائے

اسلام آباد: وزیرِ اعظم محمد شہباز شریف نے اسلام آباد میں اسکول آن ویلز منصوبے کا افتتاح کردیا۔ابتدائی طور پر 8 بسوں پر مشتمل اسکول آن ویلز منصوبہ اسلام آباد اور گردو نواح کے بچوں کو موبائل اسکولز کے ذریعے تعلیم فراہم کرے گا۔وزیر اعظم شہباز شریف نے اسکول کے بچوں سے ملاقات کی اور کہا کہ بچوں کوتعلیم کے زیور سے آراستہ کرنااولین ترجیح ہے ، موبائل لائبریری دور دراز کے بچوں کوتعلیم دلوانے کا بہترین ذریعہ ہے ،بچے قو م کے معمار ہوتے ہیں ،تعلیم کے لیے ہرممکن اقدام کریں گے۔بعد ازاں وزیرِ اعظم نے پودا لگا کر ملک گیر موسمِ بہار شجرکاری مہم کا آغاز کیا. وزیرِ اعظم نے اس موقع پر خطاب کرتے ہوئے کہا کہ ملک گیر شجر کاری مہم کا آغاز کردیا ہے ، رواں سال 24کروڑ سے زائد درخت لگائے جائیں گے، شجر کاری کوملکی سطح پر فروغ دینا ہوگا

لاہور:جیل بھرو تحریک کے دوران گرفتار رہنمائوں کی بازیابی کے لیے لاہور ہائی کورٹ میں دائر درخواستوں پر پنجاب حکومت نے گرفتاریاں دینے والے پاکستان تحریک انصاف کے رہنمائوں سے متعلق رپورٹ جمع کروا دی۔پنجاب حکومت کی رپورٹ میں بتایا گیا ہیکہ شاہ محمود قریشی، اسدعمر اور اعظم سواتی سمیت 9 رہنمائوں کو 30 روزکے لیے مینٹیننس آف پبلک آرڈر (ایم پی او) کے تحت نظربندکیا ہے۔ پنجاب حکومت کے وکیل نے لاہور ہائی کورٹ کو بتایا ہیکہ پنجاب کے مختلف اضلاع میں77 لوگوں کو نظر بندکیا گیا ہے، ڈپٹی کمشنر لاہور نے نظر بندی کے احکامات جاری کیے۔

لاہور :نئے چیئرمین نیب کی تعیناتی کاعمل روکنے کے لیے لاہور ہائیکورٹ میں متفرق درخواست دائر کر دی گئی۔لاہور ہائی کورٹ میں دائر متفرق درخواست میں موقف اختیار کیا گیا ہے کہ چیئرمین نیب نے اپنے عہدے سے استعفیٰ دے دیا ہے، قانون کے مطابق چیئرمین نیب کی تعیناتی کے لیے قومی اسمبلی میں اپوزیشن لیڈر سے مشاورت ہونی ہے۔درخواست میں کہا گیا ہے کہ راجہ ریاض قومی اسمبلی میں اپوزیشن لیڈر نہیں ہو سکتے، حکومت راجہ ریاض سے مشاورت کر کے مرضی کا چیئرمین نیب لگانا چاہتی ہے۔درخواست میں استدعا کی گئی ہے قومی اسمبلی میں راجہ ریاض کی بطور اپوزیشن لیڈر تعیناتی عدالت میں چیلنج کر رکھی ہے، اپوزیشن لیڈر پر فیصلہ ہونے تک نئے چیئرمین نیب کی تعیناتی کاعمل روکنے کا حکم دیا جائے۔گزشتہ ہفتے ا?فتاب سطان نے چیئرمین نیب کے عہدے سے استعفیٰ دے دیا تھا، اپنے استعفے میں انہوں نے عہدہ چھوڑنے کی وجہ ذاتی معاملات بتائی تھی۔ا?فتاب سلطان نے نیب افسران سے اپنے الوداعی خطاب میں کہا تھا کہ میں نے اصولوں پر کبھی سمجھوتہ نہیں کیا، میں کسی کے خلاف جھوٹا مقدمہ نہیں چلا سکتا، نہ کسی کے خلاف قائم ریفرنس محض اس بنیاد پر ختم کر سکتا ہوں کہ ملزم کسی بڑی شخصیت کا رشتہ دار ہے۔

لاہور: چیئرمین پاکستان تحریک انصاف نے کہا ہے کہ ?27 فروری 2019 کو ہماری حکومت نے بالاکوٹ پر بھارتی فضائی حملے کے جواب میں مقبوضہ کشمیر میں بھارت کے فوجی اہداف کو نشانہ بنانے کے احکامات دیئے۔سماجی رابطے کی ویب سائٹ ٹوئٹر پر عمران خان نے اپنی ٹوئٹ میں لکھا کہ پاک فضائیہ نے پاکستان کی فضائی حدود میں ایک بھارتی طیارہ مار گرایا جس کا ہوا باز گرفتار ہوا۔27فروری2019کو ہماری حکومت نیبالاکوٹ پر بھارتی فضائی حملیکیجواب میں مقبوضہ کشمیرمیں بھارت کیفوجی اہداف کونشانہ بنانیکیاحکامات دییاور پاک فضائیہ نے کی حدود میں ایک بھارتی طیارہ مار گرایا جسکا ہواباز گرفتار ہوا۔سابق وزیراعظم کا مزید کہنا تھا کہ ہم ایک محدود جوابی حملے کے ذریعے بھارت کو دوٹوک پیغام بھجوانے میں کامیاب رہے۔

لاہور : احتساب عدالت نے سابق وزیراعلیٰ پنجاب عثمان بزدار کو کرپشن اور آمدن سے زائد اثاثوں کے کیس میں شامل تفتیش ہونے کا حکم دے دیا۔لاہور کی احتساب عدالت میں عثمان بزدارکے خلاف آمدن سے زائد اثاثہ جات کے کیس کی سماعت ہوئی جس سلسلے میں سابق وزیراعلیٰ عدالت کے روبرو پیش ہوئے۔دورانِ سماعت عدالت نے کہا کہ ملزم کو علم ہونا چاہے کہ الزام کیا ہے، اس دوران نیب نے عدالت کو بتایا کہ عثمان بزدار شامل تفتیش نہیں ہوئے۔فاضل جج نے عثمان بزدار سے استفسار کیا کہ آپ شامل تفتیش کیوں نہیں ہو رہے، اس پر سابق وزیراعلیٰ نے کہا کہ میں جلد شامل تفتیش ہو جاؤں گا، ایک شادی کی تقریب ہے، 10 دن کی مہلت دے دیں۔جج نے کہا کہ آپ بہانے نہ بنائیں شادی کوئی بہانہ نہیں ہے، بزدار صاحب شادی میں کیا کرنا ہے، 10 دن کی تاریخ مانگ رہے ہیں، خدا کا خوف کریں، اگر آپ شامل تفتیش نہیں ہوتے تو آپ کو مجھ سے ریلیف نہیں ملے گا، نیب سے بھی پوچھیں آپ نے کن شواہد کی بنیاد پر انکوائری شروع کی۔فاضل جج کے ریمارکس پر سابق وزیراعلیٰ عثمان بزدار نے کہا کہ نیب والے کہتے ہیں میرے 10 ارب کے اثاثے ہیں، میرے پورے قبیلے کے 10 ارب کے اثاثے نہیں۔بعد ازاں عدالت نے کیس میں عثمان بزادر کی ضمانت میں 7 مارچ تک توسیع کر دی اور انہیں شامل تفتیش ہونے کا حکم دیا، عدالت نے عثمان بزدار کو 3 مارچ کو نیب آفس میں پیش ہونے کا حکم دیا اور انہیں انکوائری کی کاپی فراہم کرنے کی بھی ہدایت کی۔