Category سیاست

لاہور : امیر جماعت اسلامی پنجاب وسطی محمد جاوید قصوری نے کہا ہے کہ آئی ایم ایف کے غلام حکمرانوں کی عوام دشمن پالیسیوں کے خلاف جماعت اسلامی 10 تا 12فروری تک مہنگائی مارچ کرے گی ۔مارچ کی قیاد ت امیر جماعت اسلامی سراج الحق کریں گے ۔لاہور منصورہ سے شروع ہونے والا مارچ مریدکے، گوجرانوالہ ، وزیر آباد ،گجرات سے ہوتا ہوا راولپنڈی پہنچے گا۔ جگہ جگہ امیر جماعت اسلامی سراج الحق کا استقبال جماعت اسلامی کے مرکزی ذمہ داران ،صوبائی و ضلعی قیادت، ہزاروں کارکن اور عوام الناس کی بڑی تعداد کرے گی ۔ ان خیالات کا اظہار انہوں نے گزشتہ روزصوبائی دفتر منصورہ میں جائزہ اجلاس سے خطاب کرتے ہوئے کیا ۔اس موقع پر نصر اللہ گورائیہ ،وقاص بٹ، ضیا الدین انصاری ،محمد فاروق چوہان، اکرام الحق سبحانی و دیگر بھی موجود تھے۔محمد جاوید قصوری نے کہا کہ آئی ایم ایف کی شرائط پر عمل درآمد کیلئے حکومت کی جانب سے بجلی کی قیمت میں 10روپے فی یونٹ تک اضافہ ، جی ایس ٹی کی شرح18فیصد تک بڑھانے کی منظور ی قابل مذمت ہے ،اس سے مہنگائی کا طوفان آئے گا جو سب کچھ بہا کر لے جائے گا ۔پی ٹی آئی اورپی ڈی ایم دونوں نے ملک و قوم کو آئی ایم ایف کی غلامی میں دینے کے سوا کچھ نہیں کیا ۔آئی ایم ایف کے ساتھ ہونے والے معاہدوں کو قوم کے سامنے لایا جائے ۔ انہوں نے کہا کہ لاہور ہائی کورٹ کا بجلی پر فیول ایڈجسٹمنٹ چارجز کو غیر قانونی قرار دینا اور 500یونٹس تک سبسڈی دینے کا حکم خوش آئند ہے ۔حکومت عدالتی حکم پر عمل درآمد کو یقینی بنائے ۔حکمران اپنی شاہانہ طرز زندگی اور اللوں تللوں کو ختم کرنے کی بجائے عوام پر مسلسل ٹیکسوں کا بوجھ ڈال رہے ہیں ۔معاشرے کو اقتصادی موت سے بچانے کے لئے ہنگامی بنیادوں پر ٹھوس منصوبہ بندی کرنے کی ضرورت ہے ۔محمد جاوید قصوری نے مزید کہا کہ موجودہ حالات کا تقاضا ہے کہ نااہل اور کرپٹ حکمرانوں سے نجات حاصل کی جائے ،یہ ظالموں کا ٹولہ ہے جس کو عوامی مشکلات کے حل سے کوئی غرض نہیں ۔ہر دور حکومت میںچہرے اور پارٹیاں بدل بدل کر انہی لوگوں نے قومی خزانے کو لوٹا اور بیرون ممالک جائیدادیں بنائی ہیں۔صرف جماعت اسلامی ہی ملک و قوم کو ایماندار ، محب وطن اور بے داغ قیادت فراہم کر سکتی ہے ۔

لاہور:وفاقی وزیر برائے ریلوے خواجہ سعد رفیق نے کہا ہے کہ عمران خان نے پہلے صوبوں کی اسمبلیاں توڑیں پھر مطالبہ کررہے ہیں کہ الیکشن کروائے جائیں، میری ذاتی رائے ہے کہ ملک میں ایک وقت میں انتخابات ہونے چاہیئے ، یہ کوئی کھیل نہیں، دوسری بات یہ ہے کہ آئین نے اختیار دیا ہے قائد ایوان کو کہ وہ اسمبلی توڑ سکتا ہے لیکن یہ ہر گز نہیں ہوسکتا ہے کہ ایک فرد بغیر وجہ بتائے اسمبلی توڑ دے۔ لاہور میں میڈیا سے گفتگو کرتے ہوئے وفاقی وزیر خواجہ سعد رفیق نے کہا کہ دہشتگردی کے خلاف جنگ میں پوری قوم کو متحد ہونا چاہیے اور تحریک انصاف کو اے پی سی میں شرکت کرنی چاہیے، انہیں سنجیدگی کا مظاہرہ کرنا چاہیے، دہشتگردی کے خلاف تمام سیاسی جماعتوں کو متحد ہوکر کردار ادا کرنا چاہیے۔ انہوں نے کہا کہ یہ میری ذاتی رائے ہے کہ ملک بھر میں انتخابات ایک ساتھ ہونے چاہیئے کیونکہ الگ الگ انتخابات مزید تقسیم کا باعث بنے گا آئین کی پاسداری اپنی جگہ پر ہے لیکن اس ملک میں مختلف مواقع پر انتخابات کا التوا ہوا ہے۔انہوں نے کہا کہ انتخابات میں التوا کا مقصد ہر گز یہ نہیں ہے کہ ہم الیکشن سے بھاگنا چاہتے ہیں جبکہ ہم نے الیکشن بدترین حالات میں بھی لڑا گیا ہے۔ الیکشن سے پی ڈی ایم کی کوئی جماعت نہیں بھاگتی ہے کیونکہ یہ پرانی جماعتیں ہیں اور کئی بار الیکشن لڑ چکی ہیں جس میں ہار جیت ہوتی رہتی ہے لیکن ملک کو مزید کسی بحران کا شکار نہیں کیا جاسکتا ہے۔وفاقی وزیر کا کہنا تھا کہ ہم انتخابات کے لے مان جائیں اور پھر اگلہ الیکشن کمیشن کو تبدیل کرنے کا مطالبہ کرے جبکہ وہ ادارہ آئین کے تحت بنا ہوا ہے جسے آئینی تحفظ حال ہے۔ان کا کہنا تھا کہ عمران خان کی یہ فطرت ہے ان کی ایک بات مانی جائے وہ دوسرا مطالبہ سامنے رکھ دیتے ہیں، دوسرا مانا جائے تو ایک اور مطالبہ سامنے آجاتا ہے۔انہوں نے کہا کہ بغیر کسی وجہ کے کے پی اور پنجاب کی اسمبلیاں توڑ دی گئیں جس کا حکم وہ شخص دے رہا ہے جس کی کوئی آئینی حیثیت نہیں ہے اور اس حوالے سے ان کا بیان آن ریکارڈ ہے۔انہوں نے مزید کہا کہ عمران خان نے اسمبلیاں توڑ کر کون سا آئینی کام کیا ہے اور کوئی کیوں نہیں اس طرف دیکھتا ہے کہ بغیر کسی وجہ کے دو صوبائی اسمبلیاں توڑ دی گئیں اور پھر مطالبہ کیا جارہا ہے کہ الیکشن کروائیں۔ان کا کہنا تھا الیکشن ہونگے لیکن اکھٹے ہونگے کیونکہ پاکستان کی عوام جن کے پاس اس وقت کھانے کو روٹی نہیں ہے وہ الیکشن الیکشن نہیں کھیل سکتے ہیں، یہ میری ذاتی رائے ہے

اسلام آباد :سابق وزیراعظم اور چیئرمین پاکستان تحریک انصاف عمران خان کے خلاف توشہ خانہ ریفرنس میں آج فرد جرم عائد نہ ہو سکی،عدالت نے حاضری سے استثنیٰ کی درخواست منظور کرلی ۔الیکشن کمیشن کی عمران خان کے خلاف توشہ خانہ ریفرنس میں فوجداری کارروائی کے معاملے پر ڈسٹرکٹ اینڈ سیشن کورٹس اسلام آبادکے جج ظفر اقبال کیس نے سماعت کی،عمران خان کی جانب سے کیس لڑنے کے لیے 4 وکلا کی ٹیم تشکیل دی گئی، علی ظفر، علی بخاری، خواجہ حارث اور گوہرعلی خان کیس لڑیں گے، چاروں وکلا کی جانب سے وکالت نامہ جمع کرادیاگیا،سماعت کے آغاز پر عمران خان کی جانب سے طبی بنیادوں پر حاضری سے استثنیٰ کی درخواست دائر کی گئی جس پر جج ظفراقبال نے استفسار کیا کہ کیا مچلکے جمع کرا دیئے؟ اس پر عمران خان کے وکیل گوہر علی خان نے بتایا کہ جی عمران خان کے ضمانتی مچلکے کل جمع کرادیئے،جج نے ریمارکس دیے کہ ایسے حاضری سے استثنیٰ کی درخواست دائر ہوتی رہی تو فردجرم کیسے عائد ہوگی؟عمران خان کے دوسرے وکیل علی بخاری نے اعتراض کیا کہ ہمیں مصدقہ کاپیاں فراہم نہیں کی گئیں، واٹس ایپ کی اسکرین شارٹس لگا کر کاپیاں فراہم نہیں کی جاتیں،اس پر الیکشن کمیشن کی وکیل سعد حسن نے کہا کہ ہم نے پی ٹی آئی وکلا کو مصدقہ کاپیاں فراہم کی ہیں، عدالت کے سامنے پی ٹی آئی وکلا کو مصدقہ کاپیاں فراہم کی ہیں،جج نے ہدایت کہ کہ تمام ثبوتوں کی تصدیق شدہ کاپیاں عدالت اور پی ٹی آئی کو فراہم کریں جس پر الیکشن کمیشن کے وکیل سعد حسن نے کہا کہ ہم آج ہی شکایات اور ثبوتوں کی مصدقہ کاپیاں فراہم کردیں گے،سعد حسن نے اعتراض کیا کہ عمران خان ابھی تک عدالت کیوں نہیں آئے؟ کنٹینرز پر دوڑ کر آ جاتے ہیں،اس پر عمران خان کے وکیل علی بخاری نے کہا کہ ایسے بیانات نہ دیئے جائیںجس سے لگے کہ منشیوں والا کام کیا جا رہا ہے، قانون کی بات کی جائے،ہمیں بھی بولنا آتا ہے یہ نا ہو کہ ہمیں بھی بولنا پڑے اور ماحول کشیدہ ہو، 15 فروری کو جج رخشندہ شاہین کی عدالت میں عمران خان کی پیشی ہے، اس کے بعد کی تاریخ دیدیں،جج نے استفسار کیا کہ کیا عمران خان نے 15 فروری کو جج رخشندہ شاہین کی عدالت میں آنا ہے؟ مجھے ایک تاریخ بتادیں کہ عمران خان کب عدالت آئیں گے؟عمران کے وکیل علی بخاری نے کہا کہ عمران خان کی صحت نے اجازت دی تو آئیں گے، ڈاکٹرز کی ہدایت پر عمل کر رہے ہیں،اس پر الیکشن کمیشن کے وکیل نے کہا کہ عمران خان کے وکیل اپنے ساتھ مراثی لاتے ہیں،اس دوران پی ٹی آئی وکلا کی جانب سے شورشرابا کیا اور الیکشن کمیشن کے وکیل سے اپنے الفاظ واپس لینے کا مطالبہ کیا،انہوں نے کہا کہ الیکشن کمیشن کے وکیل منشی ہیں، ہمارے ساتھ سیاسی میدان میں مقابلہ کریں، پھر جواب دیتے ہیں،عدالت کی جانب سے الیکشن کمیشن کو عمران خان کے وکلا کو تصدیق شدہ کاپیاں فراہم کرنے کی ہدایت کی گئی اور عمران خان کی آج حاضری سے استثنی پر فیصلہ محفوظ کرتے ہوئے تصدیق شدہ کاپیاں عمران خان کے وکلا کو فراہم کرنے تک سماعت میں وقفہ کردیاگیا۔بعدازاں ایڈیشنل سیشن جج ظفر اقبال نے محفوظ شدہ فیصلہ سناتے ہوئے عمران خان کی آج طبی بنیادوں پر حاضری سے استثنیٰ کی درخواست منظور کرلی جس کے سبب عمران خان پر آج بھی فردجرم عائد نہ ہوسکی،عدالت نے کہا کہ الیکشن کمیشن کی جانب سے پی ٹی آئی وکلا کو تصدیق شدہ کاپیاں فراہم کرنے کے بعد فردجرم کی اگلی تاریخ مقرر کی جائیگی۔

لاہور:لاہور ہائیکورٹ نے پنجاب میں الیکشن کی تاریخ سے متعلق کیس کی سماعت کرتے ہوئے ریمارکس دیے ہیں کہ گورنر کو چھوڑیں الیکشن کمیشن الیکشن کی تاریخ دے دے، آپ اتنا کام کر رہے ہیں، آپ خود الیکشن کی تاریخ دے دیں۔لاہور ہائیکورٹ میں پنجاب میں الیکشن کی تاریخ دینے کے لیے تحریک انصاف کے رہنما اسد عمر درخواست پر سماعت ہوئی۔ لاہور ہائیکورٹ نے الیکشن کمیشن کے وکیل سے استفسار کیا کہ انتخابات کب کرائیں گے ؟ وکیل الیکشن کمیشن نے عدالت میں جواب دیا کہ ہم الیکشن کرانے کیلیے تیار ہیں۔جسٹس جواد حسن نے ریمارکس دیے کہ عوامی مفاد کا معاملہ ہے، الیکشن ہونے ہیں، کوئی سنجیدہ نہیں لے رہا۔ہر جگہ لکھا ہے کہ الیکشن وقت پر ہوں۔لاء افسر کہاں ہیں ؟ آپ کیا ہدایات لیکر آئے ہیں؟گورنر کی جانب سے کوئی پیش کیوں نہیں ہوا ؟وکیل پی ٹی آئی علی ظفر کا کہنا ہے کہ گورنر نے پنجاب میں الیکشن سے متعلق کوئی تاریخ نہیں دی۔عدالت میں بیرسٹر علی ظفر نے گورنر پنجاب کا آرڈر پڑھ کر سنا یا۔سرکاری وکیل نے عدالت کو بتایا کہ گزشتہ روز نئی پیش رفت ہوئی ،گورنر نے الیکشن کمیشن کے خط کا جواب دیا۔گورنر نے لکھا ہے کہ الیکشن کمیشن تمام اسٹیک ہولڈرز سے مشاورت کرے۔ جسٹس جواد حسن نے کہا ہے کہ آئین میں درج ہے کہ الیکشن 90 روز میں ہونے ہیں۔آپ کیسے کہہ سکتے ہیں کہ معاشی صورتحال خراب ہوچکی ہے ؟اس سے پہلے بھی معاشی صورتحال خراب تھی مگر الیکشن تو ہوئے تھے۔اعلیٰ عدلیہ کے اس حوالے سے متعدد فیصلے ہیں۔وفاقی حکومت کے وکیل نے کہا کہ 90 روز پورے ہونے میں ابھی کافی وقت ہے، جس پر جسٹس جواد حسن نے کہا کہ آپ تاریخ تو دیں کہ الیکشن کب کرائیں گے، ہم تو وہ بات کر رہے ہیں جو آئین میں درج ہے۔وکیل وفاقی حکومت نے کہا کہ کوئی یہ نہیں کہہ رہا کہ الیکشن نہیں ہوں گے۔عدالت نے الیکشن کمیشن کے وکیل سے مکالمہ کرتے ہوئے کہا کہ گورنر کو چھوڑیں آپ الیکشن کی تاریخ دے دیں، آپ اتنا کام کر رہے ہیں، آپ خود الیکشن کی تاریخ دے دیں۔لاہور ہائیکورٹ نے گورنر پنجاب کے وکیل کو جواب جمع کرانے کی مہلت دے دی۔عدالت نے آئندہ سماعت سے قبل فریقین کو جواب عدالت میں جمع کرانے کی ہدایت کی۔فریقین سماعت سے قبل جواب جمع کرائیں اور کاپی درخواست گزار کو فراہم کریں۔لاہور ہائیکورٹ نے درخواست پر سماعت 9فروری تک ملتوی کر دی

اسلام آباد:اسلام آباد ہائی کورٹ جسٹس طارق محمود جہانگیری کی عدالت نے شیخ رشید کی گرفتاری پر تھانہ آبپارہ کے ایس ایچ او کے خلاف توہین عدالت کی کاروائی کے لیے دائر درخواست پر سماعت کی درخواست گزار کی جانب سے انتظار پنجوتہ اور نعیم حیدر پنجوتہ عدالت میں پیش ہوئے عدالت نے استفسار کیا کہ کونسی آرڈر کی توہین ہوئی ہے جس پر شیخ رشید کے وکیل نے عدالت کو بتایا کہ اس عدالت نے جو نوٹیفکیشن معطل کیا تھا اسی پر عملدرآمد نہیں ہوا جس پر عدالت نے کہا کہ آپ نے نوٹس چیلنج کیا تھا اس وقت ایف آئی آر ہی نہیں تھی تو توہین عدالت کیسی ہوئی اس موقع پر درخواست گزار کے وکیل نے عدالت کو بتایا کہ جس انکوائری کا نوٹس تھا اسی انکوائری کے اندر یہ ایف آئی آر ہوئی ہیجس پر عدالت نے کہا کہ اس عدالت نے پولیس کو مقدمہ درج کرنے سے تو نہیں روکا تھااسی عدالت نے صرف طلبی کے نوٹس کو معطل کیا تھاعدالت کو مطمئن کیا جائے کہ یہاں توہین عدالت کیسی ہوئی؟ جس پر درخواست گزار کے وکیل نے کہا کہ ایک تاثر یہ گیا کہ معاملہ ہائی کورٹ میں گیا رپورٹ طلب کرلی گئی جس پر عدالت نے کہا یہاں ایک کیس میں ضمانت ہوتی ہے دوسرے میں گرفتاری ہو جاتی ہے ایک کیس میں جوڈیشل کیا جاتا ہے تو دوسرے میں فزیکل کیا جاتا ہے اس کیس کو مرکزی درخواست کے ساتھ سن لیتے ہیں عدالت نے تھانہ ایس ایچ او کو آئندہ سماعت پر ریکارڈ سمیت طلب کرلیا عدالت نے اٹارنی جنرل اور ایڈوکیٹ جنرل کو نوٹسسز جاری کرتے ہوئے کیس کی سماعت پیر تک کے لئے ملتوی کردی

واشنگٹن :وزیرخارجہ بلاول بھٹو زرداری سے امریکی وزارت خارجہ کے سینئر عہدیدار ڈیرک شولے نے ملاقات کی۔واشنگٹن میں قائم پاکستانی سفارتخانے میں ہونے والی ملاقات میں ڈیرک شولے نے پشاور کی مسجد میں خودکش حملے سے ہونے والے جانی و مالی نقصان پر افسوس کا اظہار کیا۔اس موقع پر ڈیرک شولے نے کہا کہ انسداد دہشت گردی کے لیے امریکا پاکستان کے ساتھ کھڑا ہے۔دونوں رہنمائوں نے پاکستان کے معاشی استحکام اور سیلاب سے متاثرہ افراد کی بحالی کی جانب پیش رفت پر بھی تبادلہ خیال کیا۔

اسلام آباد:آئی ایم ایف نے پاکستانی سیاستدانوں ، بیوروکریٹس اور دیگر اہم عہدیداروں کے اثاثہ جات منظر عام پر لانے کا مطالبہ کردیا ،ذرائع نے بتایا کہ آئی ایم ایف اورحکومت کے درمیان مذاکرات کا تیسرا دور ہوا جس میں آئی ایم ایف پروگرام اور شفافیت کا نظام زیر بحث آیا،آئی ایم ایف حکام نے سیاست دانوں اور بیورو کریٹس اور دیگر عہدیداروں کے اثاثہ جات کی تفصیل مانگ لیں،آئی ایم ایف کا کہنا ہے کہ تمام اہم اور اعلی عہدوں پر فائز لوگوں کے اثاثے الیکٹرانک سسٹم کے زریعے پبلک کئے جائیں ،ذرائع کے مطابق آئی ایم ایف نے بیورکریسی کے بیرون ملک اثاثوں کی تفصیلات بھی طلب کرلیں ہیں اور مطالبہ کیا کہ بیوروکریسی کے بیرون ملک منقولہ اور غیرمنقولہ اثاثے پبلک کئے جائیں ،حکام نے کہا کہ پروگرام کی شفافیت پر اقدامات کے حوالے سے بتایا جائے، پبلک فنڈز کے استعمال اور آڈیٹر جنرل آف پاکستان کی رپورٹس پر کاروائی سے آگاہ کیا جائے،ذرائع نے بتایا کہ آئی ایم ایف سرکاری افسران کے اثاثے پبلک کرنے پر بضد ہے اور سرکاری افسران کے اثاثے بھی عوام کے سامنے رکھنے کا مطالبہ کیا ہے اور اس حوالے سے سرکاری افسران کے اثاثے پبلک کرنے کیلئے اتھارٹی کے قیام کا مطالبہ کیا ہے ،ذرائع نے بتایا کہ بیورکریسی کے بیرون ملک اثاثوں کی تفصیلات بھی آئی ایم ایف نے مانگ لی جبکہ بیوروکریسی کے بیرون ملک منقولہ اور غیرمنقولہ اثاثوں کو پبلک کرنے کا مطالبہ کیا ہے،شفافیت اور احتساب کیلئے الیکٹرونک ایسٹ ڈیکلریشن سسٹم قائم کیا جائے ،بینک میں اکاؤنٹس کھلوانے سے پہلے بیورکریسی کے اثاثے چیک کیے جائیں گے،بیوروکریسی کے اکاؤنٹس کھولنے کیلئے بینک ایف بی آر سے معلومات لے سکیں گے،بینک اکاؤنٹس کھولنے کیلئے 17 سے 22 گریڈ کے افسران کو تمام معلومات دینا ہوں گی۔ذرائع نے بتایا کہ گزشتہ روز ہونے والے مذاکرات پرآئی ایم ایف نے عدم اطمنان کا اظہار کر دیا ،آئی ایم ایف نے بجلی کی حکومتی تقسیم کارکمپنیوں کی کارکردگی پرعدم اعتماد کا اظہار کیا ،ڈسکوزکے سوفیصد بل وصولی میں ناکامی پرشدید تحفظات ااظہا رکیا،آئی ایم ایف حکام کا کہنا تھا کہ سوفیصد بل وصولی کے بغیرگردشی قرضوں کا خاتمہ ممکن نہیں،حکومت ڈسکوزسے سوفیصد بل ریکوری کیلئے سخت اقدامات لے،آئی ایم ایف تین کے علاوہ دیگرتمام ڈسکوزکی کارکردگی سے مطمئن نہیں،آئی ایم ایف کا گردشی قرض مینجمنٹ پلان کیاہداف حاصل کرنے کابھی مطالبہ کیا ہے،حکام کا کہنا تھا کہ بجلی ٹیرف میں سبسڈی ختم کی جائے اور صارفین سے بجلی کا مکمل ٹیرف وصول کیا جائے ، جبکہ صنعتی شعبے کی ٹیرف سبسڈی بھی ختم کی جائے

اسلام آباد:سابق وزیر داخلہ شیخ رشید نے الکوحل ایگزامینیشن ٹیسٹ کرانے سے انکار کردیا۔ذرائع کے مطابق پولیس شیخ رشید کو الکوحل ٹیسٹ کے لیے اسلام آباد کے پولی کلینک اسپتال لائی لیکن شیخ رشید نے الکوحل ایگزامینیشن ٹیسٹ کرانے سے انکار کردیا اور ہسپتال کے عملے کو یورین کا سیمپل نہیں دیا تاہم انہوں نے ٹیسٹ کے لیے ڈاکٹرز کو بلڈ سیمپل لینے دیا۔ اسپتال ذرائع کا کہنا ہے کہ شیخ رشید احمد چاق و چوبند اور مکمل ہوش و ہواس میں تھے، شیخ رشید نے ای سی جی کرانے سے بھی انکار کیا۔

عوامی مسلم لیگ کے سربراہ اور  سابق وزیر داخلہ شیخ رشید کو پنڈی پولیس نے موٹر وے سے گرفتار کر کے اسلام آباد کے تھانہ آبپارہ منتقل کردیا۔

بعد ازاں پولیس کی جانب سے شیخ رشیدکو اسلام آباد کے تھانہ آبپارہ سے  میڈیکل کیلئے پولی کلینک اسپتال منتقل کیا گیا۔

پولیس حکام کا دعویٰ ہے کہ شیخ رشید نشے کی حالت میں تھے، شیخ رشید کے پاس سے مہنگے برانڈ کی شراب برآمد ہوئی ہے۔

پولیس کے مطابق شیخ رشید کے قبضے سے ایم 4 رائفل، کلاشنکوف اورآٹومیٹک گن بھی برآمد کی گئی ہے۔

پولیس کا کہنا ہے کہ شیخ رشید کے خلاف آبپارہ تھانے میں مقدمہ درج ہے۔

ایف آئی آر کے مطابق شیخ رشید نے الزام لگایا ہے کہ آصف زرداری نے عمران خان کو مروانے کیلئے دہشتگردوں کی خدمات حاصل کرلی ہیں، جس کا مقصد آصف زرداری کو بدنام کرنا ہے۔

ذرائع کے مطابق شیخ رشید کےخلاف آب پارہ تھانے میں  پی پی راولپنڈی ڈویژن کے صدر راجہ عنایت الرحمان کی درخواست پرمقدمہ درج کیا گیا تھا۔

اسلام آباد:مبینہ بیٹی چھپانے پر نااہلی کی درخواست، اسلام آباد ہائی کورٹ نے عمران خان کیخلاف لارجر بنچ بنانے کا فیصلہ کرلیا ۔اسلام آباد ہائیکورٹ میں مبینہ بیٹی کو ظاہر نہ کرنے پر عمران خان کی نااہلی کی درخواست پر سماعت ہوئی۔ چیف جسٹس عامر فاروق نے کیس کی سماعت کی۔ درخواست گزار ساجد محمود کی جانب سے سلمان بٹ عدالت میں پیش ہوئے جبکہ عمران خان کے وکیل سلمان اکرم راجہ سپریم کورٹ میں مصروفیت کے باعث پیش نہ ہوسکے ،معاون وکیل نے عدالت کو بتایا کہ سلمان اکرم راجہ سپریم کورٹ کے بنچ نمبر ون میں پیش ہوئے ، سلمان اکرم راجہ نے تحریری جواب جمع کرایاجواب میں کہا گیا کہ عمران خان مزید رکن قومی اسمبلی نہیں ہے ،الیکشن کمیشن نے خود ہی عمران خان کو ڈی نوٹی فائی کیا ہے اس موقع پر عدالت نے کہا کہ مناسب ہوگا کہ عمران خان سے متعلق نئی صورتحال کا پتہ چلے ،جس بیان حلفی پر درخواست آئی ہے وہ 2018 کی ہے جس پر معاون وکیل نے عدالت کو بتایا کہ الیکشن کمیشن نے عمران خان کو ڈی سیٹ کیا اور وہ مستعفی بھی ہوئے جس پر عدالت نے کہا کہ جواب میں بنچ کے اوپر بھی اعتراض اٹھایا گیا جس پر معاون وکیل نے کہا کہ آپ قابل قدر جج ہے ایسی کوئی بات نہیں کچھ وجوہات کی بنا پر کیس سے علیحدگی ہوئیں تھی اس کیس میں کوئی جلد بازی تو ہے نہیں مارچ کی کوئی تاریخ دے دیں ،چیف جسٹس نے اپنے ریمارکس میں کہا کہ عمران خان کا اعتراض ہے کہ وہ اب پبلک آفس ہولڈر نہیں۔ الیکشن کمیشن سے کنفرم کرنا ہے کہ موجودہ پوزیشن کیا ہے، الیکشن کمیشن سے ڈی نوٹیفائی ہونے کا نوٹیفکیشن منگوا لیتے ہیں، درخواستگزار نے عمران خان کا 2018 والا بیان حلفی چیلنج کیا تھاجس کے بعد عدالت نے کیس پر لارجر بنچ بنانے کا فیصلہ کرلیا۔عدالت نے مزید سماعت9 فروری تک ملتوی کر دی۔