Category ہاکی

بھونیشور(نیٹ نیوز) ہاکی ورلڈ کپ 2018 کا فائنل آج بیلجیئم اور ہالینڈ (نیدر لینڈ) کے درمیان کھیلا جائے گا۔

بھارت کے شہر بھونیشور میں ہاکی ورلڈ کپ کا فائنل میچ مقامی وقت کے مطابق شام 7 بجے شروع ہوگا جس میں بیلجیئم اور ہالینڈ کی ٹیمیں آمنے سامنے ہوں گی۔

آج کھیلے جانے والے فائنل ٹاکرے میں اگر ہالینڈ نے کامیابی حاصل کی تو وہ چار مرتبہ ٹائٹل جیتنے کا پاکستان کا ریکارڈ برابر کرے گا، اگر ٹائٹل بیلجیئم کے نام رہا تو وہ پہلی مرتبہ ہاکی ورلڈ کپ کا تاج اپنے سر سجائے گا۔

بیلجیئم کی ٹیم نے گزشتہ روز سیمی فائنل میں انگلینڈ کو 0-6 سے شکست دے کر پہلی مرتبہ فائنل کے لیے کوالیفائی کیا جب کہ دوسرے سیمی فائنل میں نیدرلینڈز نے آسٹریلیا کو 3-4 سے شکست دے کر فائنل میں جگہ بنائی۔

تیسری پوزیشن کے لیے انگلینڈ اور آسٹریلیا کے درمیان میچ بھی آج ہوگا۔

نئی دہلی(سپورٹس ڈیسک/ایمرا نیوز) ورلڈ کپ ہاکی ٹورنامنٹ اپنے فائنل فور مرحلے میں پہنچ گیا، ایونٹ کے سیمی فائنلزکا آغاز کل سے ہوگا۔بھارت میں جاری دنیائے ہاکی کے سب سےبڑے ایونٹ کے اب آخری 4 میچز باقی ہیں ،ایونٹ میں آج آرام کا دن ہے اور کل سے سیمی فائنلز شروع ہونگے۔پاکستانی وقت کے مطابق شام پونے 5 بجے ایونٹ کا پہلا سیمی فائنل انگلینڈ اور بیلجئم کے درمیان کھیلا جائے گا، جبکہ شام 6 بجے آسٹریلیا اور نیدرلینڈز کی ٹیمیں آمنے سامنے ہوں گی۔واضح رہے کہ ورلڈ کپ ہاکی کا فائنل اتوار 16 دسمبر کو کھیلا جائے گا۔

انڈیا(سپورٹس ڈیسک/ایمرا نیوز) ہاکی ورلڈ کپ میں اب ٹرافی کے لیے مقابلہ 8 ٹیموں کے درمیان رہ گیا ہے، ایونٹ کے دو کوارٹر فائنلز آج کھیلے جائیں گے، ارجنٹینا کا مقابلہ انگلینڈ سے اور آسٹریلیا کا فرانس سے ہوگا ۔

بھوونیشور میں جاری ہاکی کے سب سے بڑا ایونٹ ورلڈ کپ پاکستان ٹیم کے لیے تو اس وقت ختم ہوگیا جب بیلجیئم نے اسے 5 گول سے ہرا کر ایونٹ سے باہر کر دیا تھا۔ایونٹ میں آج سے کوارٹر فائنلز شروع ہو رہے ہیں، پہلے کوارٹر فائنل میں ارجنٹینا اور انگلینڈ کی ٹیمیں مد مقابل ہوں گی، یہ میچ پاکستانی وقت کے مطابق سوا 4 بجے شروع ہوگا ۔دوسرے کوارٹر فائنل میں آسٹریلیا اور فرانس کی ٹیمیں مدمقابل ہونگی یہ میچ شام ساڑھے 6 بجے کھیلا جائے گا۔واضح رہے کہ ایونٹ میں پاکستان ٹیم کا سفر 12ویں پوزیشن پر ختم ہوا ہے۔

لاہور: (سپورٹس ڈیسک/ایمرا نیوز) ہاکی ورلڈ کپ میں کل پاکستان کا پری کوارٹر فائنل مقابلہ بیلجئم سے ہو گا، جیت سے محروم قومی شاہین اونچی اڑان بھرنے کے لیے پرعزم ہیں۔بھارتی ریاست اڑیسا میں ہاکی ورلڈ کپ کا میلہ جاری ہے، پول مرحلہ ختم ہو گیا۔ ٹاپ کی چار ٹیموں ارجنٹینا، جرمنی، آسٹریلیا اور بھارت کی کوارٹر فائنل تک رسائی ہو گئی۔

آخری گروپ میچ میں نیدرزلینڈ سے پانچ ایک کی شکست کے باوجود بہتر گول اوسط پر قومی ٹیم کو پری کوارٹر کھیلنے کا موقع مل گیا۔آٹھ ٹیموں کا گروپ جوائن کرنے کے لیے پاکستان کا بیلجئم سے مقابلہ شیڈول ہے جس کیلئے شاہینوں نے تیاریاں مکمل کر لیں۔ کہتے ہیں کہ خامیاں اور ناکامیاں بھلا کر اِن ایکشن ہوں گے۔ گیارہ دسمبر (کل) دوسرا پری کوارٹر فائنل مقابل نیدرزلینڈ اور کینیڈا کے درمیان کھیلا جائے گا۔

نئی دہلی(سپورٹس ڈیسک/ایمرا نیوز) ہاکی ورلڈ کپ میں آج دو میچز کھیلے جائیں گے جس میں بیلجئم کا مقابلہ جنوبی افریقا سے جبکہ کینیڈا کا بھارت سے ہوگا۔بھونیشور میں جاری ورلڈ ایونٹ میں آج پول سی کے میچز ہوں گے جن میں پوائنٹس ٹیبل پر دوسرے نمبر پر موجود بیلجئم کا سامنا جنوبی افریقا سے ہوگا جو ٹیبل پر آخری نمبر پر ہے۔جنوبی افریقہ نے دو میچز کھیلے ایک ہارا اور ایک ڈرا رہا ، دونوں ٹیموں کے درمیان یہ میچ پاکستانی وقت کے مطابق شام ساڑھے 4 بجے شروع ہوگا۔دن کا دوسرا میچ ٹیبل لیڈرز بھارت اور کینیڈا کے درمیان ہوگا، یہ میچ شام ساڑھے 6 بجے کھیلا جائے گا۔

لاہور:(سپورٹس ڈیسک/ایمرا نیوز) ہاکی ورلڈ کپ میں فاتحانہ انٹری کیلیے پاکستان نے گیم پلان بنالیا۔پاکستان ٹیم کی میٹنگ میں مینجمنٹ کی طرف سے کھلاڑیوں پر واضح کیا گیا کہ وہ کسی سے کم نہیں، اگر جوش کے ساتھ ہوش کا مظاہرہ کرتے ہوئے کھیلیں تو ورلڈ کپ کے پہلے میچ میں کامیابی حاصل کی جا سکتی ہے۔یاد رہے کہ مقابلوں کا باقاعدہ آغاز28 نومبر سے ہو چکا تاہم پاکستان ٹیم اپنا پہلا میچ ہفتے کو جرمنی کے خلاف کھیلے گی، دوسرا میچ 5 دسمبر کو ملائشیا سے ہوگا،9تاریخ کو ہالینڈ کے خلاف تیسرا میچ شیڈول ہے۔ادھر جمعرات کو ورلڈ کپ کے مزید 2 میچوں کا فیصلہ ہوا، پول اے میں ارجنٹائن نے اسپین کو3کے مقابلے میں4گولز سے ہرا دیا۔ فاتح سائیڈ کی طرف سے مزیلی اور پلییئٹ نے 2، 2 بار گیند کو جال میں پھینکا۔اس کے علاوہ نیوزی لینڈ نے دلچسپ میچ میں فرانس کو 2-1 سے مات دے دی، فاتح ٹیم کی جانب سے رسل اور جینسز نے1،1 گول کیا۔

بھارت(سپورٹس ڈیسک/ایمرا نیوز) بھارت کا شہر بھونیشور آج سے 16 ٹیموں کے ہاکی ورلڈ کپ کے 14ویں ایڈیشن کی میزبانی کرنے جارہا ہے۔ٹورنامنٹ کے افتتاحی روز یعنی 28 نومبر کو دو میچ کھیلے جائیں گے، جہاں گروپ ‘سی’ میں میزبان بھارت کا مقابلہ جنوبی افریقا جبکہ بیلجیئم کا مقابلہ کینیڈا کی ٹیم سے ہوگا۔ہاکی ورلڈ کپ ٹورنامنٹ کا فائنل 16 دسمبر کو کھیلا جائے گا۔ہاکی ورلڈ کپ 2018 اور ٹیمیں بھونیشور کے کالینگا اسٹیڈیم میں کھیلے جانے والے 14ویں ہاکی ورلڈ کپ میں شریک 16 ٹیموں کو چار مختلف گروپس میں تقسیم کیا گیا ہے۔ہر گروپ کی سر فہرست ٹیم براہ راست کوارٹر فائنل کھیلنے کی اہل ہوگی جبکہ دوسرے اور تیسرے نمبر پر رہنے والی ٹیمیں دوسرے راؤنڈ میں مد مقابل ہوں گی۔ہاکی ورلڈ کپ گروپ ‘اے’ ارجنٹائن، نیوزی لینڈ، اسپین اور فرانس کی ٹیموں پر مشتمل ہے.گروپ ‘بی’ میں دفاعی چیمپئن آسٹریلیا، انگلینڈ، آئر لینڈ اور چین کی ٹیمیں ہیں۔گروپ ‘سی’ میں میزبان بھارت، بیلجیئم، جنوبی افریقا اور کینیڈا شامل ہیں۔جبکہ گروپ ‘ڈی’ میں پاکستان، جرمنی، ہالینڈ اور ملائیشیا کی ٹیموں کو رکھا گیا ہے۔

لاہور(نیٹ نیوز) تیسویں نیشنل وومن ہاکی چیمپئن شپ کا آغاز۔ صوبائٰی وزیر برائے کھیل رائے تیمور نے بطور مہمان خصوصی شرکت کی۔ صوبائی وزیر نے سپورٹس بورڈ پنجاب کے ڈیلی ویجز ملازمین کی بر طرفی کو جائز قرار دیا۔ پاکستان ہاکی فیڈریشن ومن ونگ کے زیر اہتمام۔ 30 ویں نیشنل سینئر ویمن ہاکی چیمپئن شپ کا نیشنل ہاکی سٹیڈیم میں پہلا روز۔ صوبائی وزیر کھیل رائے تیمور اور ڈی جی سپورٹس پنجاب ندیم سرور کی بطور مہمان خصوصی شرکت ۔ ملک بھر سے 11 ٹیموں کی شرکت پہلے روز پاک آرمی، پنجاب وائٹ ،واپڈ اور پاکستان ریلوے نے اپنے اپنے میچ جیت لیے۔ صوبائی وزیر کھیل نے سپورٹس بوڈر پنجاب میں ڈیلی ویجز کے 105 ملازمین کی برطرفی کو جائزقراد د یا ۔ کہا کہ ن لیگ نے غیر قانونی بھرتیاں کیں ۔ نیشنل ومن ہاکی چیمپئن شپ کا فائنل 3 دسمبر کو ہو گا۔

لاہور( نیٹ نیوز) قومی ہاکی ٹیم کے ہیڈ کوچ اور منیجر حسن سردار نے بھارت کیلئے روانگی سے قبل میڈیا سے گفتگو کرتے ہوئے قوم سے دعاوں کی اپیل کی اور جیت کی یقین دہانی کروائی۔ ان کا کہنا تھا کہ بھارت میں جاکر اپنا جھنڈا لہرائے گے اور اچھے کھیل کا مظاہرہ کریں گے۔ قومی ہاکی ٹیم کے ہیڈ کوچ توقیر ڈار کا کہنا تھا کہ پاکستانی ٹیم میں صلاحیت ہے کہ وہ کسی بھِی ٹیم کو ہرا سکتی ہے۔ ان کا مزید کہنا تھا کہ ہم ہاکی کھیلنے جارہے ہیں اور محبت کا پیغام لے کر جارہے ہیں ۔ قومی ٹیم پہلا میچ یکم دسمبر کو جرمنی کیخلاف کھیلے گی جبکہ ہاکی ورلڈ کپ کا میلہ 28 نومبر کو سجے گا۔

کراچی(نیٹ نیوز) وزیراعلیٰ سندھ مراد علی شاہ کے مشیر مرتضیٰ وہاب نے اس بات کی تصدیق کی ہے کہ صوبائی حکومت کی جانب سے ہاکی فیڈریشن کو 10 کروڑ روپے کی گرانٹ دی گئی ہے۔

جیو نیوز کے پروگرام ‘اسکور’ میں گفتگو کرتے ہوئے مرتضیٰ وہاب کا کہنا تھا کہ قومی کھیل ہاکی کے لیے سندھ حکومت کا تعاون جاری رہے گا اور ورلڈ کپ میں شرکت سے قبل ہاکی فیڈریشن کی بروقت مالی اعانت کرکے ہم نے اپنا قومی فریضہ ادا کیا ہے۔

اس سوال کے جواب میں کہ سندھ حکومت کی گرانٹ فیڈریشن کس طرح خرچ کرے گی اور کیا صوبائی حکومت تفصیلات طلب کرے گی؟ مرتضیٰ وہاب کا کہنا تھا کہ ‘ایسا نہیں ہو سکتا، یہ فیڈریشن کی صوابدید ہے کہ وہ کس انداز میں اس رقم کو خرچ کرے’۔

واضح رہے کہ پاکستان ہاکی فیڈریشن نے ورلڈ کپ سے قبل حکومت سے آٹھ کروڑ روپے مانگے تھے، جو تاحال نہیں مل سکے، البتہ اطلاعات کے مطابق ہائیر (HAIER) کمپنی نے فیڈریشن کو اسپانسر شپ کی مد میں 90 لاکھ روپے کی ادائیگی کی ہے۔

دوسری جانب معروف بزنس مین ملک ریاض کی صاحبزادی نے چند روز قبل لاہور میں قومی ہاکی ٹیم کے تربیتی کیمپ کے دوران 25کھلاڑیوں کو ایک، ایک لاکھ روپے نقد ادا کیے تھے، جب کہ کوچ دانش کلیم اور ریحان بٹ کو بھی ایک، ایک لاکھ روپے دیئے تھے۔

حکومت سندھ کی طرف سے ہاکی فیڈریشن کو دیئے جانے والے دس کروڑ روپے کی ادائیگی سے قریباً پونے 2 کروڑ روپے کھلاڑیوں اور ٹیم مینجمنٹ میں ڈیلی الاؤنس کی مد میں تقسیم کیے جائیں گے۔

حکومت سندھ نے ایک ایسے مرحلے پر ہاکی فیڈریشن کو گرانٹ دی ہے، جب ورلڈ کپ سے قبل فیڈریشن مالی بحران کا شکار تھی اور کھلاڑیوں نے ڈیلی الاؤنس کے بغیر ورلڈ کپ جیسے اہم ٹورنامنٹ میں نہ جانے کا عندیہ دیا تھا۔

وزیراعلیٰ سندھ کے مشیر مرتضیٰ وہاب نے فیڈریشن کی مالی اعانت کی خبر کی بڑے پیمانے پر تشہیر نہ ہونے کے سوال پر جواب دیا کہ ‘اس سے کوئی فرق نہیں پڑتا، کیونکہ پاکستان پیپلز پارٹی کا منشور ہے کہ قومی اداروں اور عوامی خدمت کے راستوں پر چلنا ہے اور اگر اس کی تشہیر نہ بھی ہو، تو بھی ہمیں کوئی فرق نہیں پڑتا’۔