Tag الیکشن کمیشن

اسلام آباد(ویب ڈیسک)شفاف الیکشن کے حوالے سے الیکشن کمیشن نے متعلقہ حکام کو ہدایات جاری کر دی ہیں .تفصیلات کے مطابق الیکشن کمیشن نے غلطیوں سے پاک الیکٹرانک ووٹنگ مشین تیار کرنے کی ہدایات جاری کر دی ہیں‌.۔آئندہ عام انتخابات کی تیاریوں کے سلسلے میں الیکشن کمیشن کا اجلاس ہوا جس میں الیکشن کمیشن کے ممبران، سیکریٹری الیکشن کمیشن اور اسپیشل سیکرٹری سمیت تمام ونگز کے حکام نے شرکت کی۔ اجلاس میں انتخابی امور اور تیاریوں پر بریفنگ دی گئی۔ اجلاس کے شرکا کو بریف کیا گیا کہ حکومت کی جانب سے تاحال ای وی ایم سے متعلق مانگی گئی چیزیں فراہم نہیں کی گئیں۔ذرائع کے مطابق الیکشن کمیشن نے ووٹرز فہرستوں کی ڈور ٹو ڈور تصدیقی مہم شروع کرنے اور ہر منگل کو اجلاس بلانے کا اعلان کیا ہے۔
الیکشن کمیشن نے ہدایات دیتے ہوئے کہا ہےکہ غلطی اور خامی سے پاک ٹیکنالوجی کا استعمال چاہتے ہیں ، ٹیکنیکل کمیٹی ای وی ایم پر جائزہ جلد مکمل کرے۔

اسلام آباد: وفاقی حکومت نے چیف الیکشن کمشنر کے معاملے پر جارحانہ رویہ اختیار کرنے کا فیصلہ کیا ہے۔
وزیراعظم عمران خان کی سربراہی میں وفاقی کابینہ کا اجلاس ہوا جس میں ملکی سیاسی، معاشی صورتحال کا جائزہ اور نیوزی لینڈ کرکٹ ٹیم کے دورہ منسوخی سمیت 21 نکاتی ایجنڈے پر غور کیاگیا۔ اجلاس میں ازبکستان کو بزنس ویزا لسٹ میں شامل کرنے ، ٹریڈنگ کارپوریشن پاکستان کے چیئرمین ، سی ای او ڈریپ اور ریلوے بورڈ ممبران کی تقرری و تعیناتی کی منظوری، خطے کے ممالک سے فلموں کی درآمد، جموں کشمیر اسٹیٹ پراپرٹی بجٹ کی منظوری اور دیگر معاملات زیر غور آئے۔

کابینہ کے اجلاس میں الیکٹرانک ووٹنگ مشین اور بیرون ملک مقیم پاکستانیوں کو ووٹ کا حق دینے کے معاملے پر بریفنگ لی گئی، اس موقع پر چیف الیکشن کمشنر کے وفاقی وزرا کو نوٹسز پر بھی گفتگو ہوئی، اجلاس میں حکومت نے چیف الیکشن کمشنر کے معاملے پر جارحانہ رویہ اختیار کرنے کا فیصلہ کیا ہے۔
اجلاس کے بعد میڈیا بریفنگ کے دوران وفاقی وزیر اطلاعات فواد چوہدری نے کہا کہ ہمیں انتخابی اصلاحات کو آگے بڑھانا ہے، یہ نہیں ہوسکتا کہ اوورسیز پاکستانیوں کو ووٹ کا حق نہ دیں، ہم اوورسیز پاکستانیوں کو ان کا حق دلائیں گے۔ اگلا الیکشن نئی مردم شماری اور حلقہ بندیوں پر ہونا ہے، مردم شماری کے لیے 18 ماہ کا وقت درکار ہوگا۔واضح رہے کہ انتخابات میں الیکٹرانک ووٹنگ مشین کے استعمال کے معاملے پر حکومت اور الیکشن کمیشن کے درمیان شدید اختلافات ہیں۔ اس حوالے سے وفاقی وزرا نے چیف الیکشن کمشنر پر الزام لگایا ہے کہ وہ اپوزیشن کی زبان بول رہے ہیں۔

امیر جماعت اسلامی سراج الحق کاتقریب سےخطاب کرتے ہوئے کہنا تھا کہ حکومت اپنی کارکردگی بہتر بنانے کی بجائے اداروں پر حملہ آور ہے۔ الیکشن کمیشن پر حملوں کی تاریخ میں کوئی ایسی مثال نہیں ملتی۔ انہوں نے کہا کہ حکومت ڈیجیٹل دھاندلی کے لیے الیکٹرانک ووٹنگ مشین پر بضد ہے۔سراج الحق کا کہنا تھاکہ بجلی کےنرخوں میں اضافےسےمتعلق صدارتی آرڈنینس کومسترد کرتے ہیں۔ حکومت کی نالائقی اورنااہلی کوروناسےزیادہ خطرناک ثابت ہورہی ہے۔
امیر جماعت اسلامی سراج الحق کہناتھا کہ ملک میں بے روزگاری،مہنگائی کی وجہ سے معاشی بدحالی کے زلزلے کی گرفت میں ہے، حکومتی ٹیم مافیاز پر مشتمل ہے جس کو عوام کی کوئی فکر نہیں ہے،پی ٹی آئی کا تین سالہ دورہ حکومت عوام کی محرمیوں،مایوسیوں اور پریشانیوں کی داستان ہے. حکومت کاکرپشن ختم کرنے کا دعویٰ کرپشن میں ریکارڈ اضافے میں تبدیل ہو گیا ہے.
امر جماعت اسلامی کامزید کہنا تھا کہ الیکشن کمیشن جیسے ادارے پر آئے روز تنقید اس کو کنٹرول کرنے کی سازش کا حصہ ہے۔ پاکستان میڈیا ڈویلپمنٹ اتھارٹی آمرانہ سوچ کی عکاس ہے.

لاہور(ویب ڈیسک) الیکشن کمیشن کی خالی نشستوں پر تقرری کیلئے قائد حزب اختلاف شہباز شریف نے وزیر اعظم عمران خان کو 6 نام تجویز کر دیے۔تفصیلات کے مطابق شہباز شریف نے الیکشن کمیشن کی خالی نشستوں پر پنجاب اور خیبرپختون خوا سے 2 ممبران کے لئے وزیراعظم کو جوابی خط لکھ دیا ہے۔شہباز شریف نے خط میں پنجاب کےلیے جسٹس ر طارق افتخار، جسٹس ر مشتاق احمد ، محمد جاوید انور، خالد مسعود چوہدری ، عرفان قادر اور عرفان علی کے نام تجویز کئے ہیں‌.
علاوہ ازیں خیبرپختون خوا میں سید افسرشاہ ، سردار حسین شاہ اور سہیل الطاف کے نام الیکشن کمیشن کے ممبران کے طور پر تجویز کیے ہیں۔ خیال رہے کہ 26 اگست کو وزیراعظم عمران خان نے شہبازشریف کو خط لکھ کر ان سے الیکشن کمیشن کی خالی آسامیوں کے لیے نام بتانے کے لیے کہا تھا.

اسلام آباد(ویب ڈیسک) شیری رحمان نے الیکشن کے حوالے سے بیان جاری کیا ہے کہ ووٹر کی رازداری ای وی ایم سے برقرارنہیں رہے گی۔پاکستان پیپلزپارٹی کی رہنما شیری رحمان نے میڈیا سے گفتگوکی جس میں انکا کہنا تھا کہ آج جمہوریت کا عالمی دن منایا جا رہا ہے جبکہ حکومت اس دن پر بیانات دے رہی ہے مگر جمہوری روایات سے متصادم پر ہیں. دیگر ممالک اور الیکشن کمیشن نے جس ووٹنگ مشینری کی مخالفت کی ہے اسے ملک میں تسلط کیا جا رہا ہے.الیکشن پر ہمیشہ ہمیں تحفظات رہے مگر آئینی اداروں کو متنازعہ نہیں کیا.بس ہم یہ چاہتے ہیں کہ لیول پلئینگ فیلڈنہ ہو.

وزیر مملکت فرخ حبیب نے کہا کہ الیکشن کمیشن نے اعتراضات خود اپنے ہی اوپر اٹھا دیے جبکہ ہم تو انتخابی اصلاحات کر کے الیکشن کمیشن کی مدد کر رہے ہیں۔
وزیر مملکت نے کہا کہ حزب اختلاف نے ای وی ایم مشین کو دیکھے بغیر مسترد کر دیا جبکہ الیکشن کمیشن کی پریس ریلیز میڈیا کو پہلے اور حکومت کو بعد میں ملتی ہے۔
الیکٹرانک ووٹنگ مشین کا استعمال دنیا کے بڑے ملکوں میں ہوتا ہے اور الیکشن کمیشن نے اپنی استعداد پر ہی سوالات اٹھا دیے۔
انہوں نے کہا کہ سپریم کورٹ کے حکم پر نئی فہرستیں تیار کی گئیں کیونکہ پرانی فہرستوں میں لاکھوں بوگس ووٹ درج تھے۔ پارلیمنٹ سپریم ادارہ ہے اور جو فیصلہ پارلیمنٹ میں ہو گا اسی پر عملدرآمد ہو گا۔
انہوں نے کہا کہ دھاندلی کی پیداوار ہمیں کہتے ہیں کہ وزیر اعظم ہاؤس دھاندلی کا گڑھ بنا دیا لیکن صاف شفاف انتخابات کی بنیاد الیکٹرانک ووٹنگ مشین پر ہی ہے اور دنیا شفاف انتخابات کے لیے ای وی ایم مشین پر کام کر رہی ہے۔

الیکٹرانک ووٹنگ مشینوں سے متعلق الیکشن کمیشن اور وزرات سائنس اینڈ ٹیکنالوجی کی ٹیکنیکل کمیٹی کا اجلاس 15 ستمبر کو طلب کر لیا گیا ہے
ذرائع وزارت سائنس و ٹیکنالوجی کا کہنا ہے کہ الیکشن ایکٹ مسترد ہونے کے باوجود ٹیکنیکل ٹیموں کا اجلاس ہوگا اجلاس میں وزارت سائنس اینڈ ٹیکنالوجی کی ٹیم الیکشن کمیشن کے اعتراضات پر جواب دے گی۔
اجلاس میں وزارت سائنس اینڈ ٹیکنالوجی37اعتراضات پرجواب دےگی۔الیکشن کمیشن کے اعتراضات میں سے27استعداد،10 مشین سے متعلق ہیں۔
واضح رہے سینیٹ کی قائمہ کمیٹی برائے پارلیمانی امور نے الیکٹرونک ووٹنگ مشین، اوورسیز پاکستانیوں کیلئےآئی ووٹنگ،اوپن بیلٹ کے ذریعے سینیٹ انتخابات سمیت الیکشن ایکٹ میں بیشترحکومتی ترامیم کو مسترد کرچکی ہے
کمیٹی نےسینیٹ انتخابات خفیہ کی بجائےاوپن رائےشماری سےکرانے سےمتعلق ترمیم بھی مسترد کر دی ہے۔
دوسری جانب 60 روز کے اندر حلف نہ اٹھانے والے رکن کی نشست ختم کرنے سے متعلق سیکشن میں ترمیم مستردنہیں کی گئی تاہم اس ترمیم کااطلاق آئندہ الیکشن کے بعد ہوگا۔ اجلاس میں الیکٹرانک ووٹنگ مشین کے معاملے پر وفاقی وزیر اعظم سواتی نے الیکشن کمیشن پر چڑھائی کی اور الزام عائد کیا کہ الیکشن کمیشن حکومت کا مذاق اڑا رہا ہے اس نے پیسے پکڑے ہوئے ہیں۔ اعظم سواتی نےاجلاس میں کہاکہ الیکشن کمیشن جیسےاداروں کوآگ لگا دینی چا ہئے۔جس کےبعدکمیٹی اجلاس میں ماحول گرم ہو گیا اور الیکشن کمیشن ارکان میٹنگ سے اٹھ کر چلے گئے۔ ای وی ایم کے مسئلے پر الیکشن کمیشن اورحکومت کےآمنے سامنےہونےکے باوجود ٹیکنیکل ٹیموں کا اجلاس طلب کر لیا گیا ہے

لاہور (میڈیا 92 نیوز آن لائن ) الیکشن کمیشن آف پاکستان (ای سی پی) کی جانب سے پنجاب اسمبلی کے اراکین کے اثاثوں کی تفصیلات جاری کردی گئی ہیں جس کے مطابق پی پی 178 (قصور) سے ایم پی اے شیخ علاؤالدین کے ملک میں 42 کروڑ 90 لاکھ روپے کے بزنس کیپیٹل ہیں۔

اس کے علاوہ ان کے پاس 30 کروڑ روپے نقد اور بینکوں میں موجود ہے جبکہ ان کی جائیدادوں کی بھی طویل فہرست ہے، جس کی مالیت 21 کروڑ 30 لاکھ روپے ہے جبکہ انہوں نے مالی سال کے دوران ایک کروڑ 68 لاکھ 90 ہزار روپے کا ٹیکس بھی ادا کیا۔ (شیخ علاؤالدین پنجاب اسمبلی کے سب سے بڑے امیر ترین رکن)

دوسرے نمبر پر پی پی 13 (راولپنڈی) سے پاکستان تحریک انصاف (پی ٹی آئی) کے رکن اسمبلی امجد محمود چوہدری پنجاب سے دوسرے امیر ترین ایم پی اے ہیں، جن کے پاس ایک ارب 48 کروڑ روپے کی دولت ہے۔

وہ اسلام آباد، لاہور اور کراچی میں ایک ارب 6 کروڑ مالیت کی تجارتی، رہائشی اور زرعی جائیدادوں کے مالک ہیں، جن میں سے زیادہ تر بحریہ ٹاؤن اسکیمز ہیں، اس کے علاوہ ان کے پاس 12 کروڑ 30 لاکھ روپے نقد بھی ہیں۔

تیسرے نمبر پی پی 158 (لاہور) سے پی ٹی آئی کے رکن اسمبلی عبدالعلیم خان ہیں جن کے اثاثوں کی مالیت 94 کروڑ 10 لاکھ روپے ظاہر کی ہے لیکن اس میں انہوں نے اپنی والدہ کی طرف سے اور اہلیہ کو تحفے پر دیے گئے 24 پلاٹس کی مالیت کو شامل نہیں کیا۔

علیم خان اور ان کی اہلیہ متحدہ عرب امارات اور برطانیہ میں کمپنیوں میں شراکت دار بھی ہیں، اس کے علاوہ پاکستان میں ان کی 12 کروڑ 90 لاکھ روپے کے شیئرز ہیں

چوتھے نمبر پر پی پی 19 (راولپنڈی) کے رکن اسمبلی عمارصدیق خان نے اپنے اثاثوں کی مالیت 61 کروڑ 30 کروڑ روپے ظاہر کیے ہیں لیکن انہوں نے وراثت میں ملنے والی 18 تجارتی، رہائشی اور زرعی جائیدادوں کی مالیت نہیں بتائیں۔

اس کے علاوہ وہ 10 ہزار کینال کی زمین کے مالک ہیں اس کے علاوہ ٹیکسلا میں بڑی تعداد میں دکانوں میں ان کے شیئرز ہیں، ساتھ ہی انہوں نے 4 کاروبار، 2 پیٹرول پمپ، ایک سی این جی اسٹیشن اور پتھروں کی کرشنگ پلانٹ میں اپنی سرمایہ کاری کو بھی ظاہر نہیں کیا جبکہ ان کے پاس 44 کروڑ 10 لاکھ روپے نقد اور بینکوں میں ہیں۔

اسلام آباد (میڈیا 92 نیوز آن لائن ) الیکشن کمیشن نے وزیراعظم عمران خان کے اثاثوں کی تفصیلات جاری کردی ہیں جن میں اہلیہ بشری بی بی کے اثاثوں کی تفصیلات بھی شامل ہیں جن کے مطابق وہ سیکڑوں کنال اراضی کی مالک ہیں۔

الیکشن کمیشن نے ارکان قومی اسمبلی کے مالی سال 2018-19 کے گوشواروں کی تفصیلات جاری کردیں۔ وزیراعظم نے اپنی اہلیہ بشری بی بی کے اثاثوں کی تفصیلات بھی پیش کردیں جن کے مطابق بشری بی بی کے نام بنی گالا میں 3 کنال کا گھر، پاک پتن میں 431 کنال اراضی، اوکاڑہ میں 266 کنال اراضی شامل ہے۔

ادھر وزیراعظم عمران خان 10 کروڑ 82 لاکھ 36 ہزار روپے سے زائد اثاثوں کے مالک ہیں، جبکہ انہوں نے بنی گالا رہائش کی مالیت ظاہر نہیں کی بلکہ بنی گالا زمین کو تحفہ کے طور پر ظاہر کیا ہے۔ وزیراعظم کے ڈالر، پاؤنڈ اسٹرلنگ اور یورو اکاؤنٹس ہیں۔ وہ 2 لاکھ روپے کی 4 بکریوں، 6.2 مربع زرعی اور کمرشل اراضی کے بھی مالک ہیں۔

ہم حجروں اور گاؤں کی سطح پر انتخابی مہم کے حوالے سے کارنر میٹنگ تو کرتے ہیں لیکن دفعہ 144 کے نفاذ کی وجہ سے بڑا جلسہ نہیں کر سکتے۔ اور اگر انتظامیہ چاہے تو کارنر میٹنگ پر بھی ہمیں اس دفعہ کے تحت گرفتار کر سکتی ہے۔‘

یہ کہنا تھا اسداللہ شاہ کا جو شمالی وزیرستان کے حلقہ 111 سے آزاد حیثیت سے انتخابات میں حصہ لے رہے ہیں۔ اسداللہ کو علاقے میں دفعہ 144کے نفاذ پر تشویش ہے۔

تاہم ان کا کہنا ہے کہ اب تک وہ کارنر میٹںگ اور اتنخابی مہم چلا رہے ہیں لیکن پھر بھی انتخابات سے قبل اس قسم کے دفعات لاگو کرنا سمجھ سے بالاتر ہے۔

انہوں نے انڈپینڈنٹ اردو کو بتایا کہ وہ 70 سے 80 لوگوں کی کارنر میٹنگ کرتے ہیں اور ابھی تک انہیں انتظامیہ کی جانب سے کچھ نہیں کہا گیا ہے۔

خیبر پختونخوا کے ساتھ ضم شدہ شمالی اور جنوبی وزیرستان سمیت دیگر قبائلی اضلاع میں صوبائی اسمبلی کے لیے انتخابات 20 جولائی کو ہو رہے ہیں۔

انتخابات کے لیے سیاسی جماعتوں نے اپنے امیدواران میدان میں اتار دیے ہیں تاہم کچھ امیدواران شکایت کر رہے ہیں کہ انہیں دفعہ 144 کے نفاذ کی وجہ سے ہراساں کیا جارہا ہے اور ان کی مہم میں مسائل پیدا کیے جا رہے ہیں۔

جمعرات کو عوامی نیشنل پارٹی (اے این پی ) نے دعویٰ کیا کہ پولیس نے جنوبی وزرستان کے وانا بازار میں ان کے ضلعی دفتر پر چھاپہ مارا اور انہیں ’بے جا تنگ کیا۔‘

اے این پی کے امیدواران تاج وزیر نے میڈیا کو جاری کردہ بیان میں الزام عائد کیا ہے کہ پولیس اور انتظامیہ دفعہ 144 کے بہانے سیاسی جماعتوں کو بے جا تنگ کر رہی ہے۔ ان کے مطابق چھاپے کے دوران ضلعی راہنماوں کو گرفتار بھی کیا گیا۔

انہوں نے بتایا: ’تحریک انصاف کے علاوہ تمام جماعتوں کو دیوار سے لگایا جا رہا ہے اور اس سارے معاملے پر الیکشن کمیشن کی خاموشی معنی خیز ہے۔‘

اسی طرح گذشتہ روز شمالی وزیرستان میں آزاد حیثیت سے انتخابات لڑنے والے امیدواران نے دفعہ 144 کے نفاذ کے خلاف بنوں پریس کلب میں پریس کانفرنس بھی کی۔

پریس کانفرنس سے خطاب کرتے ہوئے حلقہ پی کے 112 سے آزاد امیدوار اجمل داوڑ نے بتایا کہ انتظامیہ کی جانب سے انہیں بتایا گیا ہے کہ دفعہ 144 نافذ ہوچکی ہے اور اب ایک امیدوار کے ساتھ پانچ بندوں سے زیادہ کارکنان الیکشن مہم میں حصہ نہیں لے سکتے۔

انہوں نے الزام عائد کیا کے انتظامیہ مخصوص امیدواروں کو سپورٹ کر رہی ہے جبکہ باقی امیدواران کو انتخابی مہم سے دور رکھا جا رہا ہے۔ انہوں نے مزید کہا کہ یہ کس قسم کے انتخابات ہو رہے ہیں جہاں امیدواروں پر جلسے جلوس کرنے پر بھی پابندی عائد کی گئی ہے۔

اس حوالے سے اے این پی کے صوبائی صدر ایمل ولی نے بتایا کہ دفعہ 144 کا بہانہ بنا کر غیر قانونی چھاپے مارے جا رہے ہیں۔ الیکشن کمیشن سے مطالبہ کرتے ہوئے، انہوں نے کہا کہ وہ اس ’غیر قانونی اقدام‘ کا سخت نوٹس لیں کیونکہ سیاسی جماعتوں کے کارکنان کو قید کیا جارہا ہیں۔

حکومتی موقف

الیکشن کمیشن آف پاکستان کے مرکزی ترجمان الطاف خان نے انڈپینڈنٹ اردو کو بتایا کہ اس معاملے پر الیکشن کمیشن نے صوبائی محکمہ داخلہ و قبائلی امور کو خط لکھا ہے اور اس سلسلے میں سیکرٹری محکمہ داخلہ جمعے (آج) کو کمیشن کے سامنے پیش ہوں گے۔

ان سے جب پوچھا گیا کہ کیا دفعہ 144 کا نفاذ الیکشن قوانین کی خلاف ورزی ہے، تو انہوں نے کہا کہ اس طرح کی دفعات میں لوگوں کی گرفتاریوں سے انتخابی مہم متاثر ہوتی ہے اور اسی وجہ سے متعلقہ محکمہ کو بتایا ہے کہ وہ کمیشن میں پیش ہو کر اس کی وضاحت کریں۔

ترجمان نے مزید کہا: ’اس معاملے پر مزید بات سیکرٹری محکمہ داخلہ و قبائلی امور کی پیشی کے بعد ہو سکتی ہے کہ کس وجہ سے یہ دفعہ لگائی گئی ہے جو انتخابی مہم کو متاثر کرہی ہے۔‘

یاد رہے کہ وزیرستان میں ضلعی انتظامیہ نے امن وامان کی مخدوش صورتحال کی وجہ سے علاقے میں دفعہ 144 نافذ کی ہے۔ اس حوالے سے جاری کردہ نوٹیفیکشن میں لکھا گیا ہے کہ چونکہ ضلعی انتظامیہ کو خدشہ ہے کہ کچھ عناصر کی جانب سے جلسے جلوس منعقد کرنے اور اس میں ریاستی اداروں کے خلاف اشتعال انگیز تقروں سے امن و امان کی صورتحال کو خطرہ لاحق ہو سکتا ہے اس لیے ہر قسم کے جلسے جلوسوں پر ایک مہینے کے لیے پابندی ہوگی۔

اس حوالے سے انڈپینڈنٹ اردو نے ضلعی پولیس افیسر شفیع اللہ اور ریجنل پولیس افیسر فیروز شاہ سمیت ڈپٹی کمشنر عبدالناصر سے رابطہ کرنے کی کوشش کی لیکن رابطہ نہ ہو سکا۔