Tag شاہ رخ خان

ممبئی (ویب ڈیسک) بالی ووڈ اداکار اور سیاستدان شتروگھن سنہا نے کہا ہے کہ آریان خان کو اس لیے نشانہ بنایا جارہا ہے کیونکہ وہ شاہ رخ خان کا بیٹا ہے۔منشیات کیس میں گرفتار آریان کے حق میں بھارتی فلم انڈسٹری کے کئی اداکار آواز اٹھا رہے ہیں انہی میں سے ایک سینئر اداکار اور سیاستدان شتروگھن سنہا کا نام بھی شامل ہو گیا ہے.انہوں نے ایک انٹرویو کے دوران کہا کہ آریان خان کو شاہ رخ خان کا بیٹا ہونے کی وجہ سے نشانہ بنایا جارہا ہے۔ انڈسٹری سے وابستہ لوگ شاہ رخ خان کےلیے متحد ہونے میں وقت لے رہے ہیں اور چاہتے ہیں کہ کنگ خان اپنی جنگ خود لڑیں۔
شتروگھن سنہا نے مزید کہا کہ کوئی بھی سامنے نہیں آنا چاہتا۔ ہر کوئی یہ سوچ رہا ہے کہ یہ دوسرے شخص کا معاملہ ہے اور وہ خود ہی معاملے سے نمٹے۔ یہ انڈسٹری خوف زدہ لوگوں کا ایک گروپ ہے۔و شتروگھن سنہا نے کہا ہم نہیں کہہ سکتے کہ ان کا مذہب ان کے راستے میں آرہا ہے، لیکن کچھ لوگوں نے اب اس موضوع کو استعمال کرنا شروع کردیا ہے جوکہ بالکل ٹھیک نہیں ۔کوئی بھی شخص جو ہندوستانی ہے وہ ہندوستان کا بیٹا ہے اور ہمارے آئین کے مطابق سب برابر ہیں۔

ممبئی(ویب ڈیسک)بالی وڈ اداکار شاہ رخ خان کے بیٹے آریان کو منشیات کیس میں گرفتار کرنے والے این سی بی کے زونل ڈائریکٹر سمیر وانکھیڈے کی طرف سے سنگین انکشافات کیے گئے ہیں .تفصیلات کے مطابق سمیروانکھیڈے نے پولیس کوجاسوسی کی شکایت درج کرائی ہیں .ان کا کہنا ہے کہ گزشتہ روز سے میرا پیچھا کیا جا رہا ہے. سمیر وانکھیڈے کا کہنا ہے کہ اپنی والدہ کی قبر پر قبرستان جاتے ہوئے احساس ہوا کہ کوئی مسلسل میرے پیچھے آرہا ہے، مجھے شک ہے کہ میری جاسوسی کی جارہی ہے۔انہوں نے دعویٰ کیا کہ پولیس کے دو افسران کے ہمراہ دو افراد ان کے قبرستان جانے کی سی سی ٹی وی فوٹیج بھی ساتھ لے گئے۔بھارتی میڈیا کے مطابق سمیر وانکھیڈے نے اپنے اور اہلخانہ کیلئے سخت سکیورٹی فراہم کرنے کا مطالبہ بھی کیا ہے۔

مبئی (ویب ڈیسک)شاہ رخ خان کے بیٹے آریان منشیات لینے کے حوالے سے کیس میں اہم انکشافات سامنے آئے ہیں .تفصیلات کے مطابق بھارتی نیشنلسٹ کانگریس پارٹی کے کارکن نواب ملک نے ایک پریس کانفرنس کی ہے جس میں انہوں نے کہا ہے کہ شاہ رخ خان کے بیٹے آریان خان کو جھوٹے مقدمے میں پھنسایا جارہا ہے۔
پارٹی کارکن نے شواہد پیش کیے جس میں انہوں نے الزام لگایا ہے کہ بالی ووڈ کنگ کے بیٹے کو جھوٹے مقدمے میں پھنسایا جارہا ہے اور این سی بی کے ذریعے مقدمے میں ہیرا پھیری بھی کی جارہی ہے۔
نواب ملک نے بتایا کہ 2 اکتوبر کی رات جب بحری جہاز پر این سی بی نے چھاپہ مارا اس وقت آریان خان اور ارباز مرچنٹ کو دو نامعلوم افراد کے ساتھ جاتے ہوئے دیکھا گیا۔ ان دونوں افراد کے بھارتیا جنتا پارٹی (بی جے پی) کے سینئر کارکنوں کے ساتھ روابط ہیں۔اس کے علاوہ نواب ملک نے دو ویڈیوز میڈیا کے ساتھ شیئر کیں جن میں ایک شخص کو آریان کے ساتھ این سی بی کے آفس جاتے ہوئے دیکھا جاسکتا ہے جب کہ دوسرا شخص ارباز مرچنٹ کے ساتھ موجود ہے۔ جو شخص آریان کے ساتھ موجود تھا اس نے گرفتاری کے بعد آریان کے ساتھ سیلفی بھی لی تھی۔ این سی بی نے اس شخص کے بارے میں لاعلمی کا اظہار کرتے ہوئے کہا تھا کہ اس کا تعلق ایجنسی سے نہیں ہے۔ ہم نے معلوم کر لیا کہ اس شخص کا تعلق بی جے پی سے ہے اور یہ ایک پرائیویٹ جاسوس ہونے کا دعویداربھی ہے۔دوسری طرف نیشنلسٹ کانگریس پارٹی کے الزامات پر نارکوٹکس کنٹرول بیورونے ردعمل دیتے ہوئے کہا کہ آریان اور ارباز کے ساتھ موجوددونوں افراد آزاد گواہ ہیں۔

ممبئی (ویب ڈیسک) بالی ووڈ کنگ شاہ رخ خان نے لوگوں سے اپیل کی ہے کہ وہ ان کے گھر نہ آئیں .تفصیلات کے مطابق شاہ رخ آریان خان کی گرفتاری کے بعد بالی ووڈ فنکاروں سے اپنے گھر ’منت‘ نہ آنے کی درخواست کی ہے۔آریان کی گرفتاری کے بعد بالی ووڈ کے سلو میاں سلمان خان سب سے پہلے شاہ رخ کے گھر پہنچے. بعد ازاں ان کی بہن الویرا خان، سیما خان، ماہیپ کپور، اداکارہ نیلم کوٹھاری سمیت متعدد بالی ووڈ شخصیات کو شاہ رخ خان کے بنگلے کے باہر دیکھا گیا۔
جو لوگ ان کے گھر نہیں پہنچ سکے انہوں نے سوشل میڈیا کے ذریعے شاہ رخ خان کی سپورٹ کی جن میں سنیل شیٹھی، پوجا بھٹ، اداکارہ سوچیترا کرشنا مورتی اورمیکا سنگھ وغیرہ شامل ہیں۔ تاہم اب رپورٹس سامنے آئی ہیں کہ شاہ رخ خان نے اپنے دوستوں سے ان کے گھر نہ آنے کی درخواست کی ہے۔
رپورٹس کے مطابق معاملے کی سنگینی کو دیکھتے ہوئے اور سیکیورٹی خدشات کے پیش نظر شاہ رخ خان اور ان کی ٹیم نے تمام اداکاروں اور دوستوں سے درخواست کی ہے کہ وہ ان کے گھر نہ جائیں۔

ممبئی(ویب ڈیسک)بالی ووڈ کنگ شاہ رخ خان کے بیٹے آریان خان کو منشیات استعمال کرنے کے الزام میں این سی بی نے حراست میں لے لیا۔
بھارتی میڈیا کے مطابق نارکوٹکس کنٹرول بیورو(این سی بی) نے 2 اکتوبر کی رات ممبئی کے ساحل پر ایک بحری جہاز پر پر منعقد ہونے والی پارٹی پر اچانک چھاپہ مارا اور چھاپے کے دوران دس افراد کو گرفتار کیا گیا ہے۔ رپورٹس میں یہ بھی کہا جارہا ہے کہ ایک بڑے بالی ووڈ اداکار کے بیٹے کو اس معاملے میں حراست میں لیا گیا ہے۔
بھارتی چینل ای ٹائمز نے آج صبح این سی بی کے ایک سینئر عہدیدار سے بالی ووڈ اداکار کے بیٹے کو حراست میں لینے کی تصدیق کی اور یہ بات سامنے آئی کہ بالی ووڈ کنگ شاہ رخ خان کے بڑے بیٹے آریان خان کو این سی بی حکام نے منشیات استعمال کرنے کے الزام میں حراست میں لیا ہے۔
این سی بی کے سینئر عہدیدار نے بتایا کہ اس پر تحقیقات جاری ہیں۔ ذرائع نے بتایا کہ آریان خان کو تفتیش کے لیے لے جایا گیا ہے اور این سی بی حکام اس سے کروز شپ پر ہونے والی ریو پارٹی کے سلسلے میں پوچھ گچھ کررہے ہیں۔
تاہم این سی بی کے زونل ڈائریکٹر سمیر وان کھیڑے کا کہنا ہے کہ آریا ن خان پر فی الحال کسی الزام کے تحت مقدمہ درج نہیں کیا گیا ہے اور نہ ہی اسے گرفتار کیا گیا ہے۔ این سی بی آریان سے صرف پوچھ تاچھ کررہی ہے۔ اس کے علاوہ این سی بی نے کروز پارٹی کی منصوبہ بندی کرنے والے چھ منتظمین کو بھی طلب کیا ہے۔
این سی بی کے ذرائع نے بتایا کہ آریان خان کا فون ضبط کرلیا گیا ہے اور حکام کی جانب سے فون کی اسکیننگ کی جارہی ہے تاکہ اس کے منشیات کے قبضے یا منشیات کےاستعمال میں ملوث ہونے کے سلسلے میں جانچ پڑتال کی جاسکے۔
این سی بی نے دہلی سے کروز پارٹی میں شامل ہونے والی تین لڑکیوں کو بھی حراست میں لیاہے اور ان سے تفتیش کی جا رہی ہے، بتایا جا رہا ہے کہ یہ تینوں لڑکیاں بھارت کے نامور بزنس مین کی بیٹیاں ہیں۔گزشتہ روز اے این آئی نے ممبئی کے ساحل پر موجود کروز شپ پر منعقد ہونے والی پارٹی میں چھاپہ مارنے کی تصدیق کی تھی اور کہا تھا کہ نارکوٹکس کنٹرول بیورو نے چھاپے کے دوران کم از کم 10 افراد کو حراست میں لیا ہے۔

ممبئی(ویب ڈیسک) بالی ووڈ اداکارہ ایشوریا رائے بچن نے انکشاف کرتے ہوئے کہا ہے کہ جب شاہ رخ خان نے انہیں بغیر وجہ بتائے 5 فلموں سے نکالا تو انہیں بہت تکلیف ہوئی۔

بالی ووڈ کنگ شاہ رخ خان اور ایشوریا رائے بچن ایک ساتھ کئی ہٹ فلموں میں کام کرچکے ہیں جن میں ’’دیوداس‘‘،’’جوش‘‘ اور’’محبتیں‘‘ شامل ہیں۔ دونوں کو شوبز انڈسٹری میں اچھا دوست بھی مانا جاتا ہے۔ لیکن ایک وقت تھا جب دونوں کے پیشہ ورانہ تعلقات میں دراڑ آگئی تھی۔
ایشوریا رائے نے ایک ٹی و ی شو کے دوران اس بات کا اقرار کیا تھا کہ شاہ رخ خان نے انہیں سپر ہٹ فلم ’’ویرزارا‘‘ اور ’’چلتے چلتے‘‘ سمیت 5 فلموں سے الگ کردیا تھا۔
ماضی میں سیمی گریوال کے شو میں جب ایشوریا سے پوچھا گیا کہ کیا یہ سچ ہے کہ ایک ساتھ بہت اچھا کام کرنے کے باوجود شاہ رخ خان نے آپ کو کئی فلموں سے نکال دیا تھا؟ اس سوال پر ایشوریا کا کہنا تھا ’’میں کیسے اس سوال کا جواب دے سکتی ہوں؟‘‘ ہاں ایک وقت تھا جب ایک دو فلموں میں میرے اور شاہ رخ کے ایک ساتھ کام کرنے کے بارے میں بات ہورہی تھی۔ اور پھر اچانک بغیر کسی وضاحت کے یہ نہیں ہوا۔ میرے پاس اس کا کبھی جواب نہیں تھا کہ کیوں‘‘۔

بعد میں شاہ رخ خان نے اپنے فیصلوں پر افسوس کا اظہار کیا تھا۔ 2003 میں انڈیاٹوڈے کے ساتھ بات کرتے ہوئے کنگ خان نے کہا تھا ’’کسی کے ساتھ پراجیکٹ کا آغاز کرنا اور پھر اسے بغیر اس کی کسی غلطی کے تبدیل کردینا بہت مشکل ہے۔ ایش میری بہت اچھی دوست ہے لہذا یہ افسوناک ہے۔ ذاتی طور پر مجھے لگتا ہے کہ میں نے غلط کیا تھا لیکن بطور پروڈیوسر اس کی وجہ تھی، اور میں نے ایش سے اس کے لیے معافی مانگی تھی۔

جب یہ بات ایشوریا کو بتائی گئی تو انہوں نے سیمی کو ردعمل دیتے ہوئے کہا میرے پاس کوئی جواب نہیں ہے۔ اور میں نے اس بارے میں کبھی شاہ رخ سے کوئی بات نہیں کی کیونکہ یہ میری فطرت میں نہیں ہے۔

ایشوریا رائے کا مزید کہنا تھا کہ وہ اس بارے میں بہت کنفیوز تھیں اور انہیں تکلیف ہوئی تھی۔ دیکھیں جب آپ کے پاس وضاحت نہیں ہوتی تو آپ کو تکلیف ہوتی ہے اور آپ حیران اورکنفیوز (الجھے ہوئے) ہوتے ہیں۔ اگر کوئی شخص کسی چیز کی وضاحت کرنے کی ضرورت محسوس کرتا ہے تو وہ کرے گا۔ یہ میری فطرت میں نہیں ہے کہ سوال کروں کہ کیا اور کیوں۔ اور میں کبھی کسی کے پاس جاکر نہیں پوچھوں گی کہ آپ نے ایسا کیوں کیا۔

واضح رہے کہ شاہ رخ خان اور ایشوریا رائے بچن آخری بار کرن جوہر کی 2016 میں ریلیز ہوئی فلم ’’اے دل ہے مشکل‘‘ میں نظرآئے تھے جس میں شاہ رخ خان نے مہمان اداکار کے طور پر کام کیا تھا۔

ممبئی (ویب ڈیسک) شاہ رخ خان کو بالی ووڈ کنگ کا خطاب دیا گیا ہے.اب تک ان کی بے شمار فلمیں آ چکی ہیں اور دنیا میں ان کی مقبولیت کا ڈنکا بجتا ہے مگر مسلمان ہونے اور ہندوستان میں رہنے کی وجہ سے انہیں بہت سی مشکلات کا سامنا بھی رہتا ہے.بالخصوص انتہا پسند ہندئوں کی جانب سے وہ اکثر وبیشتر مشکلات میں گھرے رہتے ہیں .اسی حوالے سے شاہ رخ ایک بار پھر انتہا پسندوں کے نشانے پر ہیں .تفصیلات کے مطابق ٹوئٹر انڈیا پر آج صبح سے ہی شاہ رخ خان کے خلاف ’’بائیکاٹ شاہ رخ خان‘‘ کا ہیش ٹیگ ٹرینڈ کررہا ہے۔
یہ مہم بھارتی ریاست ہریانہ کے بھارتی جنتا پارٹی کے اسٹیٹ انچارج آف انفارمیشن ٹیکنالوجی ڈیپارٹمنٹ ارون یادو نے شاہ رخ خان اور ان کی فلموں کے خلاف شروع کی ہے جس میں انہوں‌ نے لکھا میں شاہ رخ خان کی فلموں کا بائیکاٹ کرتا ہوں۔
ٹوئٹر پر اس مہم کا زور تب بڑھا جب شاہ رخ خان کی ایک پرانی ویڈیودکھائی گئی جس میں انہوں نے پاکستانی کرکٹ ٹیم کی تعریف کرتے ہوئےانہیں دنیا کے بہترین کھلاڑی اور چیمپئنز کہہ دیا تھا۔اس کے بعد کئی اور لوگوں نے بھی شاہ رخ خان کے خلاف ٹوئٹس کرنی شروع کردیں۔اس کے علاوہ ٹوئٹر پر ایک پرانی تصویر بھی وائرل ہورہی ہے جس میں شاہ رخ خان وزیراعظم پاکستان عمران خان کی طرف دیکھ رہے ہیں۔
تاہم اس ہیش ٹیگ کے تقریباً ایک گھنٹے بعد ’’وی لو شاہ رخ خان‘‘ کا ہیش ٹیگ بھی ٹرینڈ کرنے لگا۔ جس میں شاہ رخ خان کے مداحوں نے ان کی اچھی باتیں شیئر کیں اور لکھا کہ شاہ رخ ایک اچھے اداکار ہی نہیں بلکہ اچھے انسان بھی ہیں۔

ممبئی(ویب ڈیسک) اداکار راج کمار راؤ کو کون نہیں جانتا،فلم بین تو انہیں اچھی طرح جانتے ہیں اور یہ بھی معلوم ہوگا کہ نوجوانی میں بالی وڈ کے ’کنگ خان‘ شاہ رخ خان کے بڑے فین تھے اور شاہ رخ خان کی وجہ سے انہیں لڑکی سے اظہار محبت کرنا مہنگا پڑگیا تھا۔
’ایسٹ انڈیا کمپنی بمقابلہ بالی وڈ‘ نامی یوٹیوب چینل سے گفتگو کرتے ہوئے اداکار راج کمار راؤ نے بتایا کہ میں اپنے اسکول کے دنوں میں بہت شرارتی ہوا کرتا تھا اور میری خواہش تھی کہ میں بڑا ہو کر اداکار بنوں۔ یہی وجہ تھی کہ جب میں نے کالج میں قدم رکھا تو اپنی تمام بری عادتیں ختم کردیں۔راج کمار راؤ نے بتایا کہ کالج کے دنوں میں، میں نے شاہ رخ خان کی فلم ’کچھ کچھ ہوتا ہے‘ دیکھی تھی۔ کالج میں مجھے ایک لڑکی سے محبت ہوگئی جو بالکل فلم میں ’انجلی‘ نامی لڑکی جیسی تھی، میں نے اس لڑکی کی ماں کو تلاش کیا اور پھر کسی نہ کسی طرح ہم دونوں ملاقاتیں کرنے لگے لیکن بدقسمتی سے اس کا ایک بوائے فرینڈ بھی تھا۔
اداکار نے بتایا کہ لڑکی کے بوائے فرینڈ نے ہمیں دیکھ لیا تھا اور اس نے 25 لڑکوں کے ساتھ مل کر میری پٹائی کی، وہ مجھے گولی مارنا چاہتے تھے لیکن میرے دوستوں نے موقع پر پہنچ کر مجھے وہاں سے بچایا۔

(ایمرا نیوزآنلائن) بالی ووڈ کے کنگ شاہ رخ خان نے گزشتہ روز سوشل میڈیا پر ایک تصویر شیئر کی جس میں وہ، اُن کی اہلیہ گوری خان اور چھوٹا بیٹا ابراہم ووٹ ڈالنے جارہے ہیں۔ اس پر لوگوں نے سوال کیا کہ آپ ابراہم کو کیوں ساتھ لے کر گئے؟

بھارتی اخبار ہندوستان ٹائمز کے مطابق سوشل میڈیا سائٹ انسٹا گرام پر سپر اسٹار شاہ رخ خان کی جانب سے شیئر کی گئی تصویر پر مداحوں کے سوال کا جواب دیتے ہوئے شاہ رخ خان نے لکھا کہ ’’وہ ابراہم کو ’بوٹنگ اور ووٹنگ‘ میں فرق بتانے کے لیے اپنے ساتھ پولنگ اسٹیشن لے کر گئے۔ ‘‘
https://www.instagram.com/p/Bw1uXvgALLB/
شاہ رخ خان نے مزید کہا کہ کیونکہ ابراہم ہمیشہ ان دو لفظوں میں بہت پریشان نظر آتا ہے اس لیے انہوں نے فیصلہ کیا کہ ابراہم کو ساتھ لے جاکر انہیں اس کا فرق بتا ئیں۔

اس کے علاوہ کنگ خان نے اپنے انسٹاگرام اکائونٹ پر ایک ویڈیو بھی شیئر کی ہے جو کہ مداحوں کی جانب سے بے حد پسند کی جارہی ہے، اس ویڈیو میں شاہ رخ خان کے ہاتھ میں ایک کافی کا کپ موجود ہے اور کافی کے اُوپر اُن کی تصویر بنی ہوئی ہے۔

https://www.instagram.com/p/BwwoHiFAv5D/

ویڈیو کے ساتھ انہوں نے کیپشن میں لکھا کہ ’’دبئی میں کالیان جیولرز کے ساتھ کافی ، براہ مہربانی میری کافی میں میٹھا (شکر) نہیں۔۔ میں صرف خود کو چاٹنا(lick) چاہتا ہوں۔ ‘‘

دوسری جانب شاہ رخ خان نے یہ بھی بتایا ہے کہ وہ اگلے دو تین مہینوں میں کوئی فلم سائن کرنے کے موڈ میں نہیں ہیں بلکہ اس وقت وہ اپنا زیادہ سے زیادہ ٹائم صرف فلمیں دیکھنے، فلموں کے اسکرپٹ پڑھنے اور کتابیں پڑھنے کے لیے نکالنے چاہتے ہیں۔ اس کے علاوہ انہوں نے یہ بھی کہا کہ اُن کے بچے تقریباً اپنا کالج ختم کرچکے ہیں، وہ اپنے گھر والوں کے ساتھ وقت گزارنا چاہتے ہیں۔

انہوں نے مزید کہا کہ وہ اب تک 15 سے 20 فلموں کے اسکرپٹ پڑھ چکے ہیں، جس میں سے دو تین اُن کو پسند بھی آئے ہیں لیکن ابھی تک انہوں نے یہ فیصلہ نہیں کیاکہ وہ کون سی فلم سائن کریں گے۔

فلم زیرو کی ناکامی کے بعداُن کا کہنا ہے کہ وہ اگلی مرتبہ کم نقصان پہنچانی والے پروجیکٹ کا انتخاب کریں گے۔