Tag pm imran khan

اسلام آباد: (ایمرا نیوزآن لائن) پاکستان ایران کے ساتھ گیس پائپ لائن مکمل کرنے کا خواہشمند، حکومت نے امریکا، یورپی کونسل اور دیگر فورمز کو قانونی یادداشت بھیجنے کا فیصلہ کرلیا۔وزیراعظم نے وزارت خارجہ کو ایران کے ساتھ تناؤ ختم کرنے کیلئے اقدامات کی ہدایت کر دی۔ عمران خان نے کہا کہ ایران کے ساتھ گیس منصوبے کیلئے مفاہمتی طریقہ اختیار کیا جائے، گیس کی قیمت خرید نظرثانی کا عمل بھی شروع کیا جائے، منصوبے پر عملدرآمد کیلئے ایران کیساتھ مل کر امکانات تلاش کئے جائیں۔عمران خان کا کہنا تھا ایران پر عالمی پابندیاں منصوبے پر ذمہ داریاں پوری کرنے میں رکاوٹ ہیں۔

اسلام آباد(ایمرا نیوزآن لائن) وزیراعظم عمران خان بورڈ آف انویسٹمنٹ کے صدر کے فرائض بھی انجام دیں گے۔سرکاری نوٹیفکیشن کے مطابق وزیراعظم عمران خان سرمایہ کاری بورڈ کے صدر کی حیثیت سے بھی اپنی خدمات انجام دیں گےجبکہ نجی شعبے سے 7 افراد کو بھی بورڈ آف انویسٹمنٹ میں شامل کرلیا گیا ہے۔ڈاکٹر سلمان شاہ سمیت ڈاکٹر شمشاد اختر، احمر بلال صوفی، علی نقوی اور نوید اے خان کو بورڈ آف انویسٹمنٹ میں شامل کیا گیا ہے۔

اسلام آباد:(ایمرا نیوزآن لائن) وزیراعظم عمران خان نے جھوٹی خبریں پھیلانے والوں سے متعلق ٹویٹ کیا ہے۔سماجی رابطے کی ویب سائٹ ٹوئٹرپروزیراعظم عمران خان نے سورة البقرہ کی آیت 42 کا حوالہ دیا۔
وزیراعظم عمران خان نے قرآنی آیت کا ترجمہ شیئرکیا، جوجھوٹی خبریں پھیلاتے ہیں ان کیلئے: “اورحق سے باطل کونہ ملاؤ اوردیدہ ودانستہ حق نہ چھپاؤ”

اسلام آباد(ایمرا نیوزآن لائن) وزیر اعظم عمران خان نے کہا ہے کہ آج کا تاریخی دن دنیا بھر کے مزدوروں کے لیے مشعل راہ ہے، تحریک انصاف حکومت مزدور کی عظمت پر یقین رکھتی ہے۔وزیر اعظم عمران خان نے عالمی یوم مزدور پر اپنے پیغام میں کہا کہ شکاگو میں مزدوروں کی شاندار جہدوجہد اور قربانیوں کو خراج تحسین پیش کرتا ہوں، تحریک انصاف نے دو دہائیوں سے زیادہ جدوجہد کی، آج سے ہم ’مزور کا احساس پروگرام‘ کا آغاز کر رہے ہیں۔عمران خان نے کہا کہ پروگرام غربت کے خاتمے کے حوالے سے اہم قدم ہوگا، اوورسیز پاکستانی مزدوروں کے لیے بھی پروگرام کے تحت اقدامات کیے جائیں گے، ملک کی ترقی اور خوشحالی میں محنت کش کا کلیدی کردار ہے۔

وزیر اعظم نے کہا کہ لیبر مارکیٹ کو مضبوط بنانے کی کوشش کر رہے ہیں، لیبر مارکیٹ کو ریگولیٹ کرنے پر بھی توجہ مرکوز کر رہے ہیں جبکہ بیرون ملک مزدوروں کے حقوق کا تحفظ یقینی بنانے کے لیے متعلقہ ملکوں سے بات کریں گے۔

اسلام آباد(ایمرا نیوزآن لائن) وزیرِاعظم عمران خان کی زیر صدارت مزدوروں کی فلاح و بہبود کے ضمن میں حکومتی اقدامات کے حوالے سے اعلیٰ سطح کا اجلاس ہوا۔اجلاس سے خطاب کرتے ہوئے وزیرِ اعظم عمران خان نے کہا کہ مزدوروں کے حقوق کے تحفظ کے حوالے سے اصل چیلنج متعلقہ قوانین پر مکمل عمل درآمد ہے، اس پر بھرپور توجہ دینے کی ضرورت ہے۔اجلاس میں وزیرِ اعظم کو بتایا گیا کہ ’’مزدور کا احساس‘‘ پروگرام کے تحت مختلف شعبوں سے منسلک مزدوروں اور ملک سے باہر کام کرنے والے پاکستانی مزدوروں کی فلاح و بہبود پر توجہ دی جا رہی ہے۔انہیں مزید بتایا گیا کہ ’’مزدور کا احساس‘‘ پروگرام کے تحت آئندہ ایک سال میں روایتی و غیر روایتی شعبوں سے منسلک مزدوروں کی رجسٹریشن عمل میں لائی جائے گی۔

وزیرِ اعظم کو بتایا گیا کہ اس وقت روایتی و غیر روایتی شعبوں سے منسلک مزدوروں کی فلاح و بہبود اور ان کے حقوق کے تحفظ کو یقینی بنانے کا کوئی مناسب و مؤثر نظام موجود نہیں جس کی وجہ سے ان کا استحصال ہوتا ہے ۔۔ اجلاس کو بتایا گیا کہ رجسٹریشن کے عمل سے مزدوروں کو پنشن و دیگر سہولتوں کی فراہمی کو یقینی بنانے میں مدد ملے گی۔وزیرِ اعظم کی ہدایت پر بیرون ملک کام کرنے والے ان غریب مزدوروں کو جو 7 سال سے وطن واپس نہیں آ سکے، ایئر ٹکٹ پر حکومت کی جانب سے سبسڈی فراہم کی جائے گی۔اجلاس میں بتایا گیا کہ بیرون ملک کام کرنے والے مزدوروں کے حقوق کے تحفظ کو یقینی بنانے کے لیے لیبر مارکیٹ انفارمیشن سسٹم شروع کیا گیا ہے۔

اسلام آباد(ایمرا نیوزآن لائن) وزیر اعظم عمران خان نے وفاقی کابینہ کا اجلاس آج طلب کر لیا، ذرائع کے مطابق وزیر اعظم عمران خان اور وزیر خارجہ شاہ محمود قریشی اجلاس کے دوران کابینہ کو دورۂ چین پر اعتماد میں لیں گے۔ذرائع کا کہنا ہے کہ وفاقی کابینہ کے اجلاس میں مشیر خزانہ اور تجارت عبدالحفیظ شیخ پاک چین معاہدوں پر کابینہ کو بریفنگ دیں گے، وزیر منصوبہ بندی سی پیک کے دوسرے مرحلے کےبارے میں کابینہ کوآگاہ کریں گے۔

ذرائع نے بتایا ہے کہ کابینہ کے اجلاس میں 16 نکاتی ایجنڈے پر غور کیا جائے گا۔اجلاس میں پٹرولیم اور پاور ڈویژن کو الگ الگ وزارت بنانے کا جائزہ بھی لیا جائے گا، یہ وزارتیں الگ کرنے کی قرارداد قومی اسمبلی نے منظور کی تھی ۔ذرائع کا کہنا ہے کہ کابینہ آف شور ڈرلنگ کے لیے مشینری کی درآمد پر اضافی اسپیشل ڈیوٹی کے استثنیٰ کی منظوری دے گی۔

ذرائع کا مزید کہنا ہے کہ کابینہ کے اجلاس میں مختلف عدالتوں میں ججوں کی تعیناتی کی منظوری کا بھی امکان ہے جبکہ رولز آف پروسیجر کے شیڈول 2 میں انکوائری ایکٹ 2017ء کی شمولیت کی منظوری کابینہ اجلاس کے ایجنڈے میں شامل ہے۔ذرائع کا یہ بھی کہنا ہے کہ وفاقی کابینہ کے اجلاس میں کمیٹی برائے توانائی کے فیصلوں کی توثیق کی جائے گی، جبکہ کابینہ کو موجودہ نظام تعلیم کی تجدید نو پر بریفنگ بھی دی جائے گی۔

اسلام آباد:(ایمرا نیوزآن لائن) وزیراعظم عمران خان کی کابینہ کو دورہ ایران پر اعتماد میں لیں گے اور کئی اہم منظوریاں بھی دی جائیں گی۔وزیراعظم کی زیرصدارت کابینہ اجلاس جاری ہے جس میں 16 نکاتی ایجنڈے پر غور کیا جارہا ہے۔کابینہ اجلاس کے دوران نیشنل ہائی ویز اتھارٹی (این ایچ اے) میں ڈیپوٹیشن پر ممبر فنانس کی تعیناتی کی منظوری دی جائے گی جب کہ سعودی فنڈ برائے ترقی کے منصوبوں کے لیے ٹیکس چھوٹ پر غور کیا جائے گا۔

ملک کے موجودہ تعلیمی نظام میں تبدیلی پر کابینہ کو بریفنگ دی جائے گی اور رحم کی اپیلوں میں تاخیر اور کمزوریوں کو دور کرنے کی منظوری دی جائے گی۔اپیلیٹ ٹریبونل ان لینڈ ریونیو کے لیے جوڈیشل ممبر کی تعیناتی، بینکنگ کورٹ ون پشاور کے جج کو واپس بلانے، ڈراوٹ ریسپانس پلان 2019 کی منظوری، او پی ایف کے بورڈ آف گورنرز کے سابق ممبران کے کیسز کا جائزہ اور نیشنل انڈوومنٹ اسکالرشپ وزارت منصوبہ بندی کے حوالے کرنے کی منظوری دیے جانا ایجنڈے کا حصہ ہے۔

اجلاس میں قیمتوں میں اضافے پر وزیر دفاع کی سربراہی میں قائم کمیٹی کی سفارشات پیش کی جائیں گی جب کہ چیف شماریات کا اضافی چارج دینے کی منطوری اور ریلوے کی مال بردار گاڑیوں کی حکومتی اداروں کے استعمال سے متعلق عملدرآمد کا جائزہ لیا جائے گا۔

لاہور (ایمرا نیوزآن لائن) وزیر اعظم عمران خان سے گورنر پنجاب چوہدری محمد سرور کل اہم ملاقات کریں گے، اس موقع پر پنجاب کی سیاسی صورت حال پر بات چیت کی جائے گی۔

ذرائع کے مطابق گورنر پنجاب محمد سرور نے گزشتہ رات وزیر اعلیٰ پنجاب عثمان بزدار سے بھی ملاقات کی جس کے دوران پنجاب کے سیاسی حالات پر تبادلہ خیال کیا گیا۔

گورنر پنجاب محمد سرور نے رکن قومی اسمبلی چوہدری مونس الٰہی سے بھی رابطہ کر کے سیاسی صورت حال پر بات کی ہے۔

پنجاب کے محاذ پر حکومت اور اپوزیشن نے نئے حالات میں صف بندی کر لی ہے، حکومت اور اپوزیشن نے آج اسمبلی اجلاس سے پہلے پارلیمانی پارٹیوں کا اجلاس طلب کر لیا ہے۔

واضح رہے کہ وزیراعلیٰ پنجاب عثمان بزدار کی زیر صدارت پارلیمانی پارٹی کا اجلاس آج ہو گا جبکہ دوسری جانب اپوزیشن لیڈر حمزہ شہباز نے بھی آئندہ سیاسی حکمت عملی طےکرنے کے لیے مسلم لیگ نون کی پارلیمانی پارٹی کا اجلاس طلب کر لیا ہے۔

اسلام آباد:(ایمرا نیوزآن لائن) ورلڈ کپ کے لیے منتخب ہونے والی قومی ٹیم کی وزیر اعظم عمران خان سے ملاقات جاری ہے۔وزیراعظم آفس میں ہونے والی ملاقات میں 17 کھلاڑیوں کے ہمراہ چیئرمین پاکستان کرکٹ بورڈ احسان مانی، کوچ مکی آرتھر اور چیف سلیکٹر انضمام الحق بھی شریک ہیں۔پاکستان کرکٹ بورڈ کی مینجمنٹ کے حکام بھی ملاقات کا حصہ ہیں۔ذرائع کے مطابق وزیر اعظم قومی کھلاڑیوں کو ورلڈ کپ کی تیاریوں کے لئے مشورے دیں گے اور بڑے ٹورنامنٹ سے متعلق قومی ٹیم کی حوصلہ افزائی کریں گے۔ واضح رہے کہ انگلینڈ میں ہونے والے ورلڈ کپ 2019 کے لیے قومی ٹیم کا اعلان گزشتہ روز کیا گیا جس میں کپتان سرفراز احمد، فخر زمان، امام الحق عابد علی، حارث سہیل، بابراعظم، شعیب ملک، محمد حفیظ، شاداب خان، عماد وسیم، حسن علی، فہیم اشرف، شاہین شاہ آفریدی اور محمد حسنین شامل ہیں۔فاسٹ بولر محمد عامر کو ڈراپ کر کے جنید خان کو ٹیم میں شامل کیا گیا ہے اور ان کی شمولیت کا دار و مدار ورلڈ کپ سے قبل انگلینڈ کے خلاف کھیلی جانے والی سیریز میں پرفارمنس پر ہوگا۔

اسلام آباد (ایمرا نیوزآن لائن)وزیراعظم عمران خان نے وزرا کی کارکردگی پر نظر ثانی کے بعد اہم فیصلہ کر لیا ہے۔ تفصیلات کے مطابق وزیراعظم عمران خان نے پانچ وفاقی وزرا کی کارکردگی کو دیکھتے ہوئے ان کے قلمدان تبدیل کرنے کا فیصلہ کیا ہے۔ ان وزارتوں میں وزارت خزانہ ، وزارت پٹرولیم اور وزیر مملکت برائے داخلہ کے قلمدان تبدیل کیے جانے کا فیصلہ کیا گیا ہے۔اسد عمر سے وزارت خزانہ کا قلمدان لے کر انہیں وزارت پٹرولیم کا قلمدان دیا جائے گا جبکہ وزیر مملکت برائے داخلہ کا عہدہ لے کر اعجاز شاہ کو دیا جائے گا۔

جبکہ وزیر پٹرولیم غلام سرور خان سے وزارت کا قلمدان واپس لے لیا جائے گا اور ان کو آگے کابینہ میں شامل کیا جاتا ہے یا نہیں اس حوالے سے تاحال کوئی فیصلہ سامنے نہیں آسکا۔وزیراعظم عمران خان کی جانب سے وزرا کی کارکردگی پر نظر ثانی کی گئی جس میں وزارت ریلوے ، توانائی اور مواصلات کی کارکردگی اچھی رہی۔سینئیر تجزیہ کار صابر شاکر نے کہا کہ وفاقی کابینہ میں یہ تبدیلی گذشتہ کافی عرصہ سے متوقع تھی لیکن اس کے بعد ہی پلوامہ کا حملہ ہوا اور یکے بعد دیگرے بھارت کی جانب سے جو جارحیت کی گئی اس کی وجہ سے اس فیصلے کو مؤخر کر دیا گیا تاہم اب وزیراعظم عمران خان نے 5 وفاقی وزرا کے قلمدان تبدیل کرنے کا فیصلہ کر لیا ہے جس میں سے 3 کے نام منظر عام پر آگئے ہیں۔وزارت خزانہ کے حوالے سے کہا جا رہا ہے کہ وزارت خزانہ ممکنہ طور پر وزیراعظم خود اپنے پاس رکھیں گے اور ہو سکتا ہے کہ وہ وزارت خزانہ کے معاملات کے لیے معاشی ٹیم یا ٹیکنوکریٹس پر مشتمل ایڈوائزرز کی ایک ٹیم رکھ لیں اور سارے معاملات براہ راست خود ہی دیکھیں۔

واضح رہے کہ ایسے موقع پر جب ملک کے معاشی حالات غیر مستحکم ہیں، وزیر خزانہ اسد عمر ہی عوام کی اُمید تھے کہ وہ ملک کے معاشی حالات تبدیل کر دیں گے لیکن اب وزیراعظم عمران خان نے ان کی وزرات کا قلمدان تبدیل کرنے کا فیصلہ کیا ہے جس سے سیاسی حلقوں میں بھی تشویش کا اظہار کیا جا رہا ہے۔کیونکہ ایک جانب بجٹ سر پر ہے اور آئی ایم ایف سے قرض حاصل کرنے کے لیے مذاکرات جاری ہیں تو دوسری جانب وزارت خزانہ کا قلمدان اسد عمر سے واپس لینے کا فیصلہ کر لیا گیا ہے ایسے میں ملک کے معاشی حالات میں مزید بگاڑ پیدا ہونے کا خدشہ پیدا ہو گیا ہے۔