Tag pm imran khan

اسلام آباد (ایمرا نیوزآن لائن) :وزیراعظم عمران خان نے معاشی بحران سے نمٹنے کے لیے پُرانے چہرے آزمانے کا فیصلہ کر لیا ہے۔ تفصیلات کے مطابق اقتصادی ٹیم میں سابق وزیر تجارت ہمایوں اختر اور سابق وزیر خزانہ شوکت ترین کو شامل کیے جانے پر غور کیا جا رہا ہے۔ ہمایوں اختر مسلم لیگ ق کے دور میں وزیر تجارت رہ چکے ہیں جنہوں نے پرویز مشرف کے دور میں چین سمیت دیگر ممالک کے ساتھ آزادانہ تجارت کے معاہدے بھی کیے تھے، اس دور میں ملکی برآمدات میں بھی اضافہ ہوا تھا۔جبکہ شوکت ترین 2008ء میں وزیر خزانہ بنے اور 2010ء میں انہوں نے اپنے عہدے سے استعفیٰ دے دیا تھا۔ ان کے بارے میں بھی خیال کیا جاتا ہے کہ اقتصادی حوالے سے ان کا ہمیشہ ہی مثبت کردار رہا ہے۔ اسی بنیاد پر ملک کی معاشی صورتحال کے پیش نظر وزیراعظم عمران خان عوام کو مزید مشکلات میں ڈالنے کی بجائے معاشی مسائل کے حل پر جلد از جلد غور کرنا اور ان کو حل کرنا چاہتے ہیں۔اس ضمن میں وزیراعظم عمران خان نے اپنے قریبی رفقا سے مشاورت بھی کی۔ ذرائع کے مطابق سابق وزیر تجارت ہمایوں اختر اور سابق وزیر خزانہ شوکت ترین کو معاشی ٹیم میں شامل کرنے پر غور کیا جا رہا ہے اور آنے والے دنوں میں ان رہنماؤں سے وزیراعظم عمران خان کے رابطے متوقع ہیں جبکہ عین ممکن ہے کہ آنے والے دنوں میں ہی ان دونوں رہنماؤں کو اہم ذمہ داریاں بھی سونپ دی جائیں۔ذرائع کے مطابق وزیراعظم عمران خان موجودہ اقتصادی و معاشی ٹیم میں بھی رد و بدل پر غور کر رہے ہیں۔ گذشتہ ہفتے ایک نوٹی فکیشن بھی جاری کیا گیا تھا جس میں تمام وزرا کی کارکردگی 15 روز میں فراہم کرنے کی ہدایت کی گئی تھی۔ اس نوٹی فکیشن کے بعد یہ بھی خیال کیا جا رہا ہے کہ وزرا کی کارکردگی کی رپورٹ آنے کے بعد کچھ وزرا کے قلمدان تبدیل کیے جانے کا امکان ہے۔ ذرائع کے مطابق ادویات کی قیمتوں میں اضافے اور اس سلسلے میں وزارت صحت کی ناکامی پر وزارت صحت میں بھی اہم تبدیلیاں ہونے کا امکان ہے۔

اسلام آباد:(ایمرا نیوزآن لائن رپورٹ عمر خالد سے) وزیراعظم عمران خان کا کہنا ہے کہ پاکستان اور بھارت کے درمیان صرف ایک اختلاف ہے اور وہ کشمیر ہے، جوہری طور پر مسلح ہمسائے اپنے اختلافات کو صرف مذاکرات کے ذریعے حل کر سکتے ہیں۔برطانوی نشریاتی ادارے کو انٹرویو کے دوران وزیراعظم عمران خان کا کہنا تھا کہ کشمیر کا مسئلہ حل کرنا ہوگا، یہ مسئلہ ابلتا ہوا نہیں رہ سکتا، متنازع علاقے کشمیر میں امن خطے کے لیے بہت زبردست ہوگا، پاکستان اور بھارت اختلافات کو مذاکرات کے ذریعے حل کریں۔وزیراعظم نے کہا کہ کشمیر میں جو کچھ بھی ہو رہا ہے وہ وہاں کے لوگوں کا رد عمل ہے، اگر ہم کشمیر کو حل کر سکتے ہیں تو برصغیر میں امن کے زبردست فوائد ہیں۔وزیراعظم عمران خان کا کہنا تھا کہ پاکستان اور بھارت کی حکومتوں کی اولین ترجیح غربت میں کمی لانا ہونی چاہیے اور غربت کو کم کرنے کا راستہ یہ ہے کہ ہم اپنے اختلافات کو مذاکرات کے ذریعے حل کریں۔ایک سوال پر وزیراعظم نے کہا کہ پاکستان پر بھارت دوبارہ حملہ کرتا تو ہمارے پاس جواب دینے کے سوا کوئی چارہ نہیں تھا۔ایک اور سوال کے جواب میں عمران خان نے کہا کہ جیش محمد اور اس جیسی تنظیموں کو ہم پہلے ہی غیر مسلح کر رہے ہیں اور حکومت نے جیش محمد کے مدارس کا کنٹرول سنبھال لیا ہے، پاکستان کے مستقبل کے لیے حکومت ان تنظیموں کے خلاف کارروائی کے لیے پُرعزم ہے۔وزیراعظم نے آسیہ بی بی سے متعلق میزبان کے سوال پر کہا کہ وہ محفوظ ہیں اور ہفتوں کے اندر اندر پاکستان سے چلی جائیں گی۔

اسلام آباد(ایمرا نیوزآن لائن رپورٹ اظہر محمود سے) وزیراعظم عمران خان نے بھارتی اور اسرائیلی قیادت کو ہدفِ تنقید بنایا ہے، ان کا کہنا ہے کہ اسرائیلی اور بھارتی لیڈر اقوام متحدہ کی قراردادوں کی دھجیاں اڑا رہے ہیں۔وزیر اعظم عمران خان نے سماجی رابطے کی ویب سائٹ ٹوئٹر پر اپنے بیان میں کہا ہے کہ اسرائیلی اور بھارتی لیڈر ووٹ لینے کے لیے اخلاقی پستی کا مظاہرہ کر رہے ہیں۔انہوں نے کہا کہ اسرائیلی اور بھارتی لیڈر مغربی کنارے اور مقبوضہ کشمیر پر جبری قابض ہیں،یہ لیڈر عالمی قوانین کی کھلم کھلا خلاف ورزی کر رہے ہیں۔وزیر اعظم نے سوشل میڈیا میں اپنے بیان میں سوال کیا ہے کہ اسرائیلی اور بھارتی عوام اپنے لیڈروں پر غصے کا اظہار کیوں نہیں کرتے؟عمران خان نے یہ بھی کہا کہ اسرائیلی اور بھارتی عوام اپنے لیڈروں سے کیوں نہیں پوچھتےکہ وہ الیکشن جیتنے کے لیے کس حد تک گر سکتے ہیں۔

سچ ہمیشہ قائم رہتا ہے ‘امریکی حکام نے تصدیق کی کہ پاکستانی بیڑے میں سے ایک بھی ایف 16 طیارہ کم نہیں‘عمران خان
اسلام آباد(ایمرا نیوز آن لائن) امریکی جریدے فارن پالیسی کی رپورٹ میں ایف 16 طیارہ گرانے کے بھارتی دعویٰ کی نفی سامنے آنے پر وزیراعظم عمران خان نے کہا ہے کہ سچ ہمیشہ قائم رہتا ہے اور صداقت ہی بہترین پالیسی ہے ۔ہفتہ کو سماجی رابطے کی ویب سائٹ ٹوئٹر پر اپنے پیغام میں وزیراعظم عمران خان نے کہا کہ امریکی دفاعی حکام نے تصدیق کی کہ پاکستانی بیڑے میں سے ایک بھی ایف 16 طیارہ کم نہیں اس رپورٹ سے بھارت کا جھوٹا دعویٰ بے نقاب ہوگیا ہے۔اپنے ایک اور پغام میں انہوں نے کہا کہ ہماری حکومت کے فیڈرل اور صوبائی نمائندگان کو اپنے علاقوں میں موجود پناہ گاہوں کا دورہ کرنا چاہیئے اور پناہ گاہوں میں موجود افراد کے ساتھ کھانا کھانا چاہیئے، اس اقدام سے ہمارے نمائندگان کو احساس ہوگا کہ ہمارے معاشرے کے سب سے نچلے درجے کا افراد کے مسائل کیا ہیں اور آنے والے مہینوں میں میں بذات خود غربت کے خلاف اس جہاد کی نگرانی کروں گا۔( درانی )

خیبر(ایمرا نیوزآن لائن رپورٹ اظہر محمود سے) وزیر اعظم عمران خان آج خیبر پختون خوا کے ضلع خیبر میں جلسہ عام سے خطاب کریں گے، وزیراعظم عمران خان ضلع خیبر کے دورے میں جمرود اسٹیڈیم میں جلسہ عام سے خطاب کریں گے۔اس حوالے سے جمرود اسٹیڈیم کو عمران خان کی تصاویر اور بینرز سے سجایا گیا ہے، جبکہ وہاں سیکیورٹی کے بھی سخت انتظامات کیے گئے ہیں۔فرنٹیئر کور کے اہل کاروں نے جمرود اسٹیڈیم اور ملحقہ بازار کو حفاظتی حصار میں لے رکھا ہے۔جمرود بازار سے اسٹیڈیم جانے والے راستوں سے تجاوزات کا خاتمہ کر کے انہیں بھی بینروں اور تصاویر سے سجایا گیا ہے۔قبائلی اضلاع میں دہشت گردی کے دوران 31 لاکھ 50 ہزار افراد نے گھربار چھوڑ کر نقل مکانی کی، جبکہ کامیاب ملٹری آپریشن کے نتیجے میں 99 فیصد متاثرین کی واپسی ممکن ہوئی۔متاثرین نے اپنے مسائل کے حل کے سلسلے میں وزیر اعظم عمران خان کے ممکنہ دورے سے امیدیں وابستہ رکھی ہیں۔قبائلی اضلاع میں دہشت گردوں کے خلاف 2009ء میں آپریشن شروع کردیا گیا تھا جس کے باعث 31 لاکھ 50 ہزار افراد نقل مکانی پر مجبور ہوئے۔کامیاب ملٹری آپریشن کے باعث دہشت کے عفریت سے نجات ملی تو گزشتہ 2 سال سے متاثرین کی بحالی کا سلسلہ بھی شروع ہوا۔حکومت کی طرف سے متاثرین کو مکمل تباہ ہونے والے مکان کے عوض 4 لاکھ جبکہ جزوی طورپر تباہ ہونے والے مکان کے بدلے 1 لاکھ 60 ہزار روپے فراہم کیے گئے ہیں، تاہم متاثرین ملنے والا معاوضے کو اونٹ کے منہ میں زیرے کے مترادف سمجھتے ہیں۔نقل مکانی کرنے والوں میں سے 16 ہزار افراد کی بحالی کا مرحلہ باقی ہے،متاثرین نے وزیر اعظم عمران خان سے اپیل کی ہے کہ روٹی، کپڑا اور مکان کے محتاج متاثرین خصوصی توجہ کے مستحق ہیں۔

اسلام آباد(ایمرا نیوزآن لائن رپورٹ اظہر محمود سے) وزیراعظم عمران خان آج وفاقی اردو یونیورسٹی حیدرآباد کا سنگ بنیاد رکھیں گے جس کی تقریب اسلام آباد میں ہوگی۔سندھ کے دوسرے بڑے شہر حیدرآباد میں یونیورسٹی کے قیام کا دیرینہ مطالبہ آج پورا ہونے جارہا ہے، حیدرآباد کی سیاسی و سماجی تنظیموں کی جانب سے یونیورسٹی کے کیمپس کے سنگ بنیاد کا خیر مقدم کیا گیا ہے۔حیدرآباد یونیورسٹی کے سنگ بنیاد کی تقریب آج سہہ پہر چار بجے وزیراعظم سیکریٹریٹ میں ہوگی جس کے لیے تحریک انصاف اور ایم کیو ایم پاکستان کے رہنماؤں کو تقریب کے دعوت نامے جاری کیے گئے ہیں۔تقریب میں گورنر سندھ عمران اسماعیل، تحریک انصاف کے اراکین قومی و صوبائی اسمبلی شریک ہوں گے۔دوسری جانب وزیر تعلیم سندھ سید سردار شاہ کا کہنا ہے کہ وزیراعظم کے اعلان سے کچھ نہیں ہوگا، یونیورسٹی بنانے کے لیے سندھ اسمبلی سے رجوع کرنا پڑے گا۔

پراجیکٹ کےلئے عمران خان،عثمان بزدار اور آرمی چیف نے اہم کردار ادا کیا
پراجیکٹ کی منظوری دل سے شکر گزار ہوں :شیخ رشید
راولپنڈی (ایمرا نیوز آن لائن) وزیر اعظم عمران خان رواں ماہ ”لئی ایکسپریس وے‘ ‘کا سنگ بنیاد رکھیں گے۔ذرائع کا کہنا ہے کہ عمران خان رواں ماہ کے آخرمیں سگنل فری ”لئی ایکسپریس وے‘ ‘کا سنگ بنیاد رکھیں گے،پراجیکٹ کےلئے وزیر اعظم عمران خان،وزیر اعلیٰ سردار عثمان بزدار اور چیف آف آرمی اسٹاف جنرل قمر جاوید باجوہ نے اہم کردار ادا کیا ہے۔بدھ کے روز وزیر ریلوے شیخ رشید احمد نے نجی ٹی وی سے گفتگو کے دوران تصدیق کرتے ہوئے بتایا کہ کے پراجیکٹ کی منظوری میں اہم کردار ادا کرنے پر وہ وزیر اعظم اور آرمی چیف کے دل سے شکر گزار ہیں۔واضح رہے کہ اس پراجیکٹ کا تخمینہ لاگت 80 ارب روپے تک پہنچ گیا جبکہ 2007 میں یہ تخمینہ لاگت صرف17ارب روپے تھا،یہ سگنل فری ایکسپریس وے ہے جس میں الگ سیوریج ٹنل بنے گی۔

65 مختلف سرکاری اداروں میں چیف ایگزیکٹو افسرکی تعیناتی کیلئے یکساں ادارہ جاتی طریقہ کارکی منظوری
اسلام آباد(ایمرا نیوز آن لائن )پاکستان تحریک انصاف کی حکومت نے وزیراعظم کے صوابدیدی اختیارات کم کر دیے ہیں اور 65 مختلف سرکاری اداروں میں چیف ایگزیکٹو افسر (سی ای او) کی تعیناتی کیلئے یکساں ادارہ جاتی طریقہ کار (میکنزم) کی منظوری دی ہے۔میڈیا رپورٹس کے مطابق ان اداروں میں پی آئی اے، واپڈا، پی ایس او، او جی ڈی سی، ایس ایس جی سی، ایس این جی سی، ایس ای سی پی، نیشنل بینک، بورڈ آف انوسٹمنٹ، نجکاری کمیشن، پاور اور جنریشن کمپنیاں، ریگولیٹری اتھارٹیاں، پی ٹی وی، پی ٹی اے، سول ایوی ایشن اتھارٹی، نادرا اور دیگر ادارے شامل ہیں۔ان تمام 65 سرکاری اداروں میں تقرری کیلئے عوامی اشتہار کی اشاعت، اہل امیداروں کی حتمی فہرست کی تیاری اور سلیکشن کمیشن کی جانب سے انٹرویو کا طریقہ اختیار کیا جائے گا۔سلیکشن کمیٹی تین سے پانچ افراد کے حتمی نام وزیراعظم کو پیش کرے گی جو کسی بھی ادارے میں انہیں چیف ایگزیکٹو افسر مقرر کر سکیں گے۔ سلیکشن کمیشن متعلقہ وزیر، ڈویژن کے سیکریٹری، متعلقہ شعبے سے تعلق رکھنے والے تین سے پانچ ماہرین اور بورڈ آف ڈائریکٹرز کے نان ایگزیکٹو چیئرمین پر مشتمل ہوگی۔سرکاری ذرائع کے مطابق، یہ اقدام اس لئے کیا گیا ہے کہ اہم ترین سرکاری اداروں میں چیف ایگزیکٹو افسر کے انتخاب کیلئے یکساں نظام لایا جا سکے اور بہترین امیدواروں کو مقابلے کے مرحلے کی جانب راغب کیا جا سکے۔سرکاری ذرائع کا کہنا ہے کہ کابینہ اس نئے طریقہ کار کی منظوری دے چکی ہے جس میں وزیراعظم کے صوابدیدی اختیارات کم کر دیے گئے ہیں جبکہ سلیکشن کا کام کمیٹی کے سپرد کر دیا گیا ہے۔کابینہ دستاویز کا حوالہ دیتے ہوئے ذرائع کا کہنا تھا کہ سلیکشن کمیٹی میں متعلقہ ڈویژن کا انچارج وزیر،ڈویژن کا سیکریٹری، ادارے کے ڈومین اور اس کی سرگرمیوں اور کام کے متعلق ماہرانہ معلومات رکھنے والے اسپیشلسٹ، جس ادارے میں بورڈ ہوگا اس کے بورڈ آف ڈائریکٹرز کا نان ایگزیکٹو چیئرمین یا بورڈ کا سینئر رکن، اور جس ادارے میں بورڈ نہیں وہاں وزیراعظم کسی رکن کو نامزد کر سکتے ہیں۔کہا جاتا ہے کہ 65 سرکاری اداروں میں سے کسی ایک سرکاری ادارے میں بطور چیف ایگزیکٹو بھرتی کیلئے متعلقہ ڈویژن کام کی نوعیت (Job Description)، اہلیت کا معیار اور کام کیلئے ضروری ہنر (Skills) تیار کرے گی۔سلیکشن کمیٹی کام کیلئے جائزہ معیار (Evaluation Parameters) کا تعین بھی کرے گی۔ متعلقہ ڈویژن سرکردہ اخبارات میں اسامی کا اشتہار شائع کرائے گا اور یہی اشتہار سرکاری ویب سائٹس پر بھی پبلش کیا جائے گا۔ڈویژن اس کے بعد سلیکشن کمیٹی کو اہل امیدواروں کی فہرست (شارٹ لسٹ) پیش کرے گی تاکہ ابتدائی جائزہ لیا جا سکے۔ جب شارٹ لسٹنگ کا کام مکمل ہو جائے گا تو ڈویژن انٹرویز کا اہتمام کرے گا۔

وزیر اعظم کا 5 افسران کی گریڈ 22 میں ترقی کی منظور ی دے دی ، نوٹیفیکیشن جاری
ترقی پانے والوں میں محمد اعظم ، اسد حیا الدین ، ظفر حسین ، حسن ناصر جامی ، محمد اسلم شامل ہیں
اسلام آباد(ایمرا نیوز آن لائن) وزیر اعظم عمران خان نے گریڈ 22 میں ترقی پانے والے 5 افسران کی منظوری دے دی ۔ جس کا اسٹیبلشمنٹ ڈویژن نے نویٹفیکیشن جاری کر دیا ۔ تفصیلات کے مطابق وفاقی بیوروکریسی میں ترقی دے کر وزیر اعظم عمران خان نے تقرر و تبادلے کر دیئے ہیں اور گریڈ 22 میں ترقی پانے والے 5 افسران کی منظوری بھی دے دی ہے ۔ جن میں وزیر اعظم کے سیکرٹری محمد اعظم کو بھی گریڈ 22 میں ترقی دی گئی ہے لیکن وہ بدستور وزیر اعظم کے سیکرٹری کے عہدے پر فائض رہیں گے ۔ اس کے علاوہ محمد اسلم کو گریڈ 22 میں ترقی دے کر سیکرٹری سیفران تعینات کیا گیا ہے ۔ایڈیشنل سیکرٹری ظفر حسین کو بھی گریڈ 22 میں ترقی دے دی گئی ہے ۔ حسن ناصر جامی کو ترقی دے کر سیکرٹری ماحولیاتی تبدیلی مقرر کر دیا گیا ہے ۔اسد حیا الدین کو بھی گریڈ 22 میں ترقی دے کر سیکرٹری پٹرولیم تعینات کر دیا گیا ہے ۔ جن کا اسٹیبلشمنٹ ڈویژن کی جانب سے ترقی و تبادلوں کا نوٹیفیکیشن بھی جاری کر دیا گیا ہے ۔( جاوید/اشفاق)

چیئرمین احسان مانی اپنے ہمراہ ڈائریکٹر ڈومیسٹک ہارون رشید کو بھی لے کر جائیں گے، اگر عمران خان نے تجاویزکومنظور کر لیا تو اس حوالے سے مزید تفصیلات طے کی جائیں گی
کراچی(ایمرا نیوز آن لائن) پی سی بی نے8ریجنز پر مشتمل ڈومیسٹک سسٹم کی منظوری کیلیے وزیر اعظم سے ملاقات کا وقت مانگ لیا۔پاکستان کرکٹ بورڈ نے8ریجنز پر مشتمل نئے ڈومیسٹک سسٹم کا منصوبہ تیار کیا ہے،اس کی منظوری کیلیے سرپرست اعلی وزیر اعظم عمران خان سے میٹنگ کا وقت مانگ لیا گیا، چیئرمین احسان مانی اپنے ہمراہ ڈائریکٹر ڈومیسٹک ہارون رشید کو بھی لے کر جائیں گے، اگر عمران خان نے تجاویزکومنظور کر لیا تو اس حوالے سے مزید تفصیلات طے کی جائیں گی۔ذرائع نے بتایا کہ گزشتہ دنوں لاہور میں ڈومیسٹک کرکٹ کے حوالے سے خصوصی اجلاس ہوا، اس میں احسان مانی و دیگر بورڈ حکام کے ساتھ ٹاسک فورس کے سربراہ (ر) لیفٹیننٹ جنرل مزمل حسین نے بھی شرکت کی۔اس موقع پر نئے ڈومیسٹک کرکٹ نظام پر تفصیل سے تبادلہ خیال کیا گیا، 8 ریجنز کی شمولیت اور انھیں ڈپارٹمنٹس سے اسپانسر کرانے کی تجویزپر بورڈ کا پہلے ہی اتفاق ہوچکا۔میٹنگ میں یہ طے پایا کہ پہلے وزیر اعظم عمران خان سے اس کی منظوری لی جائے، پھر دیگر تفصیلات طے ہوں گی، ابھی ایسا نہ ہو کہ پی سی بی پورا پلان بنا لے اور سرپرست اعلی اسے شرف قبولیت نہ بخشیں، اس حوالے سے وزیر اعظم سے ملاقات کیلیے وقت مانگ لیا گیا، وہاں سے منظوری ملنے کے بعد نئے نظام کی دیگر تفصیلات طے کی جائیں گی۔ بورڈ کا اس پر جلد عمل درآمد کا ارادہ بھی ہے۔دوسری جانب مجوزہ سسٹم پر ڈومیسٹک کرکٹرز میں بے چینی پائی جاتی ہے، انھیں اس سے بے روزگار ہونے کا خدشہ ہے،گوکہ پی سی بی کا دعوی ہے کہ ایسا نہیں ہو گا تاہم فی الحال مزید تفصیلات نہیں بتائی گئی ہیں۔