Category بزنس

کراچی(رپورٹ:ایمرا نیوز)بھارت پاکستان کو غیر مستحکم کرنے کی اپنی پالیسی کا واضح اظہار کرتا ہے اور یہ بات کسی حد تک ٹھیک کہ بھارت چین کو اپنے لیے خطرہ سمجھتا ہے لیکن اس کا زیادہ فوکس پاکستان پر ہے۔امریکا اور بھارت چین سے اپنے تعلقات کو بہتر بناتے نظر آرہے ہیں اور چین کے وسیع معاشی شاہراہوں کے منصوبے سے استفادہ کرنا چاہتے ہیں لیکن پاکستان اپنی جغرافیائی حیثیت کی بناء پر انتہائی اہمیت اختیار کئے ہوئے ہے، خاص طور پر پاک چین اکنامک کوریڈور (سی پیک منصوبہ) یعنی کاشغر سے گوادر تک مضبوط رابطے بھارت کو بے چین کئے ہوئے ہیں۔کشمیر میں بھارتی مظالم اور پاکستان کی جانب سے مسئلہ کشمیر پر دنیا کی توجہ دلانے اور کشمیریوں کی اخلاقی حمایت جیسی پالیسی پر بھارتی حکومت شدید بوکھلاہٹ کا شکار ہوگئی ہے، ایک طرف بھارت میں انتخابی دور ہے دوسری طرف موجودہ بھارتی حکومت کو معاملات میں بین الاقوامی سطح پر خفگی اٹھانی پڑی ہے، امریکا اور بھارت افغانستان میں اپنے وسائل لگا کر پاکستان کےخلاف کئی محاذ جاری رکھے ہوئے ہیں۔بھارت کے تھنک ٹینک ان دنوں ایک مرتبہ پھر یہ پالیسی دیتے نظر آرہے ہیں کہ پاکستان کو تنہا کیا جائے، اس سلسلے میں ایک طرف وہ پاکستان کے اندر داخلی انتشار اور دہشت گرد حملوں کی ترغیب دے رہے ہیں تو دوسری جانب یہ رائے بھی دے رہے ہیں کہ پاکستان کو بین الاقوامی سطح پر تنہا کرنے کی کوشش کی جائے۔خطے میں پاکستان کو تنہا کرنے کی بھارتی کوشش تقویت نہ پکڑ سکی کیونکہ پاکستان نے اس سازش کی بو پہلے سونگھ لی تھی، بھارتی سفارت کاروں نے بڑے بڑے بھارتی کاروباری گروپس، صنعتکار اور تاجروں کی مخصوص محفلوں میں یہ پیغام دیا کہ عرب ممالک کے حکمرانوں کو پاکستان سے بدظن کریں اور پاکستان سے ان کے اختلافات کو اجاگر کریں تاکہ پاکستان کے عرب دنیا سے تعلقات کو خراب کیا جاسکے اور بھارت اپنا اثر و رسوخ بڑھا سکے۔بھارتی میڈیا پر بیٹھے ماہرین یہ رائے بھی دے رہے ہیں کہ چین خطے میں بھارت کا گھیراو¿ کررہا ہے بھارت کو بھی چین اور پاکستان کا گھیراو¿ کرنا چاہیے، اس لئے جاپان، ویتنام، جنوبی کوریا، میانمار سے دوستی کریں اور بلاک تشکیل دیں۔بھارت کو جس طرح بڑی طاقتوں کی جانب سے پشت پناہی کی جارہی ہے اس کی واضح مثال پلوامہ حملے کے بعد بھارتی جارحیت کی حمایت کی صورت میں نظر آئی لیکن پاکستان کی کامیاب خارجہ اور دفاعی پالیسی نے ان طاقتور ممالک کو اپنی خارجہ پالیسی پر ازسر نو غور پر مجبور کردیا ہے۔پاکستان نے اپنی پرامن اور مضبوط دفاعی پالیسی سے نہ صرف خطے میں بلکہ عالمی سطح پر بھی اپنا لوہا منوایا ہے، پاکستان خطے کے ممالک سے اپنے تعلقات کو مزید بہتر بنانے کے لئے تیز ترین سفارتی پالیسی پر گامزن ہے، خطے میں بحری تجارتی راہداریوں کی حفاظت اور بحری افواج کی پانیوں پر اثرورسوخ حاصل کرنے کی دوڑ بھی جاری ہے۔

لاہور(نیٹ نیوز) صوبائی وزیرصنعت نے سندر انڈسٹریل اسٹیٹ میں سیفٹی یونٹ اور ساتویں فلاور شو کا افتتاح کردیا ۔ میاں اسلم اقبال کہتے ہیں پنجاب کے چھتیس اضلاع میں کاٹیج انڈسٹری قائم کریں گے۔ ہنر مند افراد کو پچاس ہزار سے دو لاکھ روپے تک کے بلا سود قرضے بھی فراہم کیے جائیں گے ۔ سندر انڈسٹریل اسٹیٹ میں انڈسٹریل سیفٹی یونٹ نے کام شروع کردیا ۔ منصوبے کا افتتاح صوبائی وزیر صنعت میاں اسلم اقبال نے کیا ۔ سیفٹی یونٹ کے تحت 110 سی سی ٹی وی کیمرے نصب کیے گئے ۔ ایمرجنسی کے لیے ہیلپ لائن 1032 بھی شروع کردی گئی ۔ صوبائی وزیر صنعت و تجارت میاں اسلم اقبال نے کہا کہ لاہور، شیخوپورہ اور سیالکوٹ میں اکنامک کوریڈور بنانے جا رہے ہیں۔ پنجاب کے 36 اضلاع میں کاٹیج انڈسٹری کا قیام عمل میں لایا جائے گا۔ ہنر مند افراد کو بچاس ہزار روپے سے دو لاکھ تک کے بلا سود قرضے فراہم کریں گے ۔میاں اسلم اقبال نے سندر انڈسٹریل اسٹیٹ میں ساتویں فلاور شو کا افتتاح بھی کیا۔

زرمبادلہ کے مجموعی ذخائر کی مالیت 15ارب ڈالر سے تجاوز کرگئی
کراچی(ایمرا نیوز آن لائن) زرمبادلہ کے مجموعی ذخائر کی مالیت 15ارب ڈالر سے تجاوز کرگئی ہے۔اسٹیٹ بینک آف پاکستان کے مطابق 15مارچ کو زرمبادلہ کے مجموعی ذخائر کی مالیت 15ارب 70کروڑ96لاکھ ڈالر ریکارڈ کی گئی۔ 15مارچ کو ختم ہونیوالے ہفتے کے دوران متحدہ عرب امارات سے ایک ارب ڈالر موصول ہوئے۔غیرملکی قرضوں اور آفیشل ادائیگیوں کے بعد سرکاری ذخائر میں 71کروڑ 60لاکھ ڈالر کا اضافہ ہوا، زرمبادلہ کے سرکاری ذخائر کی مالیت 8 ارب 83 کروڑ ڈالر تک پہنچ گئی۔

خصوصیت کے ذریعے بینک نوٹوں کی مالیتوں کو انگوٹھے سے رگڑ کر با آسانی شناخت کیا جا سکتا ہے
کراچی(ایمرا نیوز آن لائن) بصارت سے محروم افراد کو مختلف پاکستانی کرنسی نوٹوں کی شناخت اور ان کے درمیان فرق کرنے میں مشکلات پیش آتی ہیں۔بینک دولت پاکستان کے علم میں یہ بات آئی ہے کہ بصارت سے محروم افراد کو مختلف پاکستانی کرنسی نوٹوں کی شناخت اور ان کے درمیان فرق کرنے میں مشکلات پیش آتی ہیں اس لیے اسٹیٹ بینک عوام اور خاص طور پر بصارت سے محروم افراد کی معلومات کے لیے اس بات کا اعادہ کرتا ہے کہ پاکستانی کرنسی نوٹوں میں ایسی خصوصیات موجود ہیں جن کے ذریعے بصارت سے محروم افراد کو کرنسی نوٹوں کے اصلی ہونے کی شناخت کرنے اور مختلف مالیتوں کے درمیان فرق کو پہچاننے میں مدد مل سکتی ہے۔20 روپے اور اس سے زائد مالیت کے تمام کرنسی نوٹوں کی بریل خصوصیات سامنے کے حصے میں ہوتی ہیں جن سے انھیں کرنسی نوٹوں کی مالیت کا تعین کرنے میں سہولت ملتی ہے، اس مقصد کے لیے بینک نوٹ کے بائیں جانب نیچے کونے میں سیریل نمبر سے ذرا اوپر ابھرے ہوئے نقطے اور چھوٹی افقی لکیروں کی چھپائی ہوتی ہے، اس خصوصیت کے ذریعے بینک نوٹوں کی مالیتوں کو انگوٹھے سے رگڑ کر ب آسانی شناخت کیا جا سکتا ہے۔بریل کی خصوصیات ہر مالیت کے نوٹ میں اس طرح دی جاتی ہیں، 20 روپے کے نوٹ پر ایک لائن، 50 روپے پر دو لائنیں جبکہ 100 روپے پر تین لائنیں ہیں، بلند مالیت کے دیگر نوٹوں میں بریل خصوصیات کے طور پر نقطے دیے گئے ہیں، خصوصا 500 روپے پر ایک نقطہ ، 1000 روپے پر دو نقطے اور 5000 روپے پر تین نقطے ہیں، 20 روپے اور اس سے زائد کی تمام مالیتوں کے کرنسی نوٹوں پر بریل خصوصیات کندہ کاری کے ذریعے چھاپی جاتی ہیں۔

کراچی(ایمرا نیوز) بین الاقوامی گولڈ مارکیٹ میں سونے کی فی اونس قیمت میں 11 ڈالر کا اضافہ ہوا جس کے نتیجے میں مقامی صرافہ مارکیٹوں میں فی تولہ سونے کی قیمت 350 روپے مزید مہنگا ہوگیا. آل کراچی صرافہ اینڈ جیولرز ایسوسی ایشن کے مطابق جمعرات کو عالمی مارکیٹ میں سونے کی قیمت 11 ڈالر کے اضافے سے بڑھ کر 1315 ڈالر فی اونس ہوگئی، جس کے زیر اثر ملک بھر میں فی تولہ قیمت 350 روپے کے اضافے سے 69900 روپے جبکہ 10 گرام سونے کی قیمت 300 روپے اضافے سے 59928 روپے ہوگئی البتہ چاندی کی فی تولہ 870 روپے اور 10 گرام چاندی کی قیمت 745.88 روپے مستحکم رہی.

8 ماہ کے دوران متفرق کیمیکلز کی ملکی برآمدات میں 34.61 فیصد کا اضافہ ہوگیا
اسلام آباد(ایمرا نیوز آن لائن )رواں مالی سال 2018-19کے پہلے 8 ماہ کے دوران متفرق کیمیکلز کی ملکی برآمدات میں 34.61 فیصد کا اضافہ ریکارڈ کیا گیا ہے۔ ادارہ برائے شماریات پاکستان کی رپورٹ کے مطابق گزشتہ مالی سال 2017-18میں جولائی تا فروری کے دوران 37ہزار 651 ملین روپے کے متفرق کیمیکلز برآمد کئے گئے جبکہ رواں مالی سال 2018-19کے اسی عرصہ کے دوران متفرق کیمیکلز کی برآمدات50 ہزار 683 ملین روپے تک بڑھ گئیں۔اس طرح گزشہ مالی سال 2017-18کے پہلے 8 ماہ کے مقابلہ میں رواں مالی 2018-19سال کے دوران متفرق کیمیکلز کی ملکی برآمدات میں 13ہزار 32ملین روپے یعنی 34.61 فیصد کا اضافہ ریکارڈ کیا گیا ہے۔

پلاسٹک مٹیریل کی ملکی برآمدات میں 60.44 فیصد کا اضافہ ریکارڈ
اسلام آباد (ایمرا نیوز آن لائن )رواں مالی سال 2018-19کے پہلے 8ماہ کے دوران پلاسٹک مٹیریل کی ملکی برآمدات میں 60.44 فیصد کا اضافہ ریکارڈ کیا گیا ہے۔ادارہ برائے شماریات پاکستان کی رپورٹ کے مطابق گزشتہ مالی سال 2017-18میں جولائی تا فروری کے دوران پلاسٹک مٹیریل کی ملکی برآمدات ایک لاکھ 51ہزار 535 میٹرک ٹن رہیں جنکی مجموعی مالیت 17ہزار 338 ملین روپے تھی جبکہ رواں مالی سال 2018-19کے اسی عرصہ کے دوران پلاسٹک مٹیریل کی ملکی برآمدات ایک لاکھ 70 ہزار 29میٹرک ٹن تک بڑھ گئیں جن کی مجموعی مالیت 28ہزار 417 ملین روپے تک پہنچ گئی۔اس طرح گزشتہ مالی سال 2017-18 کے پہلے 8 ماہ کے مقابلہ میں رواں مالی سال 2018-19 کے اسی عرصہ کے دوران پلاسٹک مٹیریل کی ملکی برآمدات میں 11ہزار 30ملین روپے یعنی 60.44 فیصد کا اضافہ ہوا ہے۔

تمام وزارتوں و ڈویڑنوں سے بجٹ تقریر کیلئے پانچ اپریل تک میٹریل مانگ لیا گیا
اسلام آباد(ایمرا نیوز آن لائن)وزارت خزانہ نے آئندہ مالی سال2019-20 کے وفاقی بجٹ کیلئے بجٹ تقریر کی تیاری شروع کردی ہے۔وزارت خزانہ نے آئندہ مالی سال2019-20 کے وفاقی بجٹ کیلئے وزیر خزانہ اسد عمر کی بجٹ تقریر کی تیاری شروع کردی ہے ،جس کیلئے تمام وزارتوں و ڈویڑنوں سے بجٹ تقریر کیلئے پانچ اپریل 2019 تک میٹریل مانگ لیا گیا ہے ،جس کی بنیاد پر وزیر خزانہ کی بجٹ تقریر کا پارٹ ون تیار کیا جائےگا۔پارٹ ٹو بجٹ سے ایک ہفتہ قبل فائنل کیا جائےگا جبکہ اس ضمن میں وزارت خزانہ کی جانب سے تمام وزارتوں اور ڈوویڑنوں کو مراسلہ بھجوایا گیا ہے۔ذرائع کے مطابق آئندہ مالی سال کے لیے وفاقی بجٹ کی تیاری کا پراسیس جاری ہے۔

لاہور(ایمرا نیوزآن لائن)گور نر پنجاب چودھری سرور نے کہا ہے کہ گور نر ہاؤس کیلئے ’’ بزنس پلان‘‘تیار کر لیاہے جسکے تحت تجارتی تنظیموں سمیت مختلف شعبوں کو گور نر ہاؤس میں تقریبات کی سہولت بھی دی جائیگی ‘ نیوزی لینڈ میں ہونیوالی دہشت گردی سے دنیا سمجھ چکی ہے کہ دہشت گردی کا اسلام سمیت کسی مذہب سے کوئی تعلق نہیں اور دہشت گردی کے خلاف سب کو متحد ہوناپڑیگا۔بھارتی جاسوس ڈرون کو گرا کر پاکستان نے دنیا کے سامنے ایک بار پھر بھارت کے عزائم کو بے نقاب کردیا ہے ‘وفاقی اور پنجاب حکومت زراعت کے شعبے میں جدید ٹیکنالوجی کی فراہمی کیلئے اقدامات کر رہی ہے اور اس میں کوئی شک نہیں اگر پاکستان کو خوشحالی کی راہ پر گامزن کر نا ہے اس کیلئے زراعت کے شعبے اور کسان کو مضبوط کر نا ضروری ہے ۔ ان خیالات کا اظہار انہوں نے گزشتہ روز مقامی ہوٹل میں دی ایج گروپ کے زیر اہتمام ’’ایگری کلچر ‘‘کانفر نس سے خطاب اور میڈیا سے گفتگو کر رہے تھے جبکہ اس موقع پر صوبائی وزیر خوراک سمیع اﷲ چودھری ،صوبائی وزیر رزاعت نعمان لنگڑ یا ل،دی ایج گروپ کے چیئر مین مہر آصف ارشد،رکن پنجاب اسمبلی ندیم قریشی سمیت دیگر بھی موجود تھے ۔ گور نر پنجاب چودھری سرورنے کہا کہ دہشت گردی کے خلاف سب سے زیادہ قر بانیں پاکستانی فوج سمیت ہماری فورسز اور عوام نے دی ہیں۔

لاہور (ایمرا نیوز) مہنگائی کی ستائی عوام نے اتوار بازار کا رخ کیا تو وہاں پتہ چلا کہ سبزیاں پھلوں کے علاوہ بھی گھی پر10روپے قیمتیں بڑھا دی گئی ہیں۔کراچی میں کوکنگ آئل اور گھی کی قیمتوں کے دام بڑھنا شروع ہوگئے۔ ریٹیلرز کے مطابق کمپنیاں قیمتوں میں اضافے کی وجہ روپے کی تنزلی قرار دے رہی ہیں۔ عوام کا کہنا ہے کہ آمدنی بڑھے یا نہ بڑھے مہنگائی ضرور بڑھ رہی ہے مگر حکومت خاموش تماشائی بنی بیٹھی ہے۔کھانے کی تیل کی قیمتوں میں اضافہ مہنگائی کی آگ کو مزید بڑھکا رہا ہے، جس سے ایک عام آدمی ہی سب سے زیادہ متاثر ہو رہا ہے۔کیا پکائیں کیا کھائیں، تبدیلی سرکارنے غریب کی سبزی سے روٹی کھانا بھی مشکل بنا دیا۔ مہنگائی کے آفٹرشاکس سے شہری چکرا کر رہ گئے۔لاہور میں سبزیوں اور پھلوں کی قیمتوں کو پر لگ گئے ، سیب بھی ایک سو بیس سے براہ راست ایک سو چالیس روپے فی کلو ہوگیا، لہسن ،ادرک ،لیموں ،ٹماٹر،ہری مرچیں کی قیمتیں بھی آسمان سے باتیں کرنے لگیں ،ٹماٹراور ہری مرچ تو سٹالوں پرنظر آنے ہی بند ہو گئے۔لاہور کے اتوار بازاروں میں سبزیوں کے ریٹس آلو8، پیاز 27، ٹماٹر80 ، لہسن دیسی 110، ادرک تھائی لینڈ 130، بینگن 50، کھیرا 30، کریلے 135، پالک 15، لیموں 50، میتھی 45، ماڑو40، بند گوبھی18، پھول گوبھی 38، گھیا کدو65، شلجم 20، ہری مرچ200، شملہ مرچ 95، اروی 50، بھنڈی 120، مٹر45روپے، مولی 13روپے، ٹینڈیاں 55، گاجر دیسی 16، ساگ 30، مونگرے60 ، کچنار 322لاہور کے اتوار بازاروں میں پھلوں کے ریٹس سیب 140، کیلا 80، ناریل 140، مسمی80، مالٹا 106، مکئی کے سٹے 18، سٹابری سپیشل 160، بیر 60، چیکو 100، کھجور ایرانی 150، کینو درجن 130، انار دانے 240، شکر گندی 40، امرود60، گنڈھیریاں 35، پپیتا 100، گریپ فروٹ فی عدد20، خربوزہ 75اتوار بازار میں گوشت برائلر 241،بڑا گوشت 350، لاہور کے شہری پھلوں کے معیار سے تو مطمئن ہیں لیکن قیمتیں بڑھنے سے پریشان ہیں ان کا کہنا ہے کہ عام مارکیٹ کی نسبت اتوار بازار میں ریٹ کا فرق ضرور ہے لیکن یہ فرق پچھلے ہفتے کی نسبت اس بار جیب پر بھاری پڑ رہا ہے۔تجزیہ کاروں کے مطابق اگر فی الفور مہنگائی کو قابو کرنے کے اقدامات نہ اٹھائے گئے تو غریب عوام کے لئے دو وقت کی روٹی کا حصول بھی تقریبا ًناممکن ہو جائے گا۔