Category صحت

کراچی(ویب ڈیسک) کورونا وائرس کے کیسز میں کمی کے باوجود ملک میں آکسیجن کی طلب میں اضافہ ہورہا ہے، ڈیلرز کا کہنا ہے کہ آکسیجن کمپنیاں کارٹل بناکر گیس مہنگی کررہی ہیں اور ایک ماہ کے دوران آکسیجن گیس کی قیمت دگنی کردی گئی ہے۔

میڈیا رپورٹس کے مطابق ملک بھر میں کورونا وائرس کے کیسز کی تعداد میں آہستگی کے ساتھ کمی آرہی ہے تاہم اس کے باوجود آکسیجن گیس کی قیمت میں اضافے کا تسلسل برقرار ہے، ایک ماہ کے عرصے میں آکسیجن کی قیمت میں تقریباً دگنا اضافہ ہوچکا ہے جو کہ تشویش ناک بات ہے۔

آکسیجن فراہم کرنے والے ڈیلرز کا کہنا ہے کہ یہ گیس بنانے والی کمپنیاں کارٹل بناکر آکسیجن کی گیس میں اضافہ کررہی ہیں جو کہ مصنوعی ہے۔
دوسری جانب ملک کی بڑی آکسجین گیس کمپنی، پاکستان آکسیجن لمیٹڈ نے آکسیجن کی طلب پوری کرنے سے معذرت کرلی۔ پاکستان آکسیجن لمیٹڈ نے ہسپتالوں کی انتظامیہ اور ایمرجنسی رومز کو ہنگامی طور پر آکسیجن کے حصول کے لیے متبادل ذرائع کا بندوبست کرنے کا پیغام بھیج دیا ہے۔

کمپنی کی جانب سے مختلف اسپتالوں کو بھیجے گئے خط میں کہا گیا ہے کہ کورونا وبا کی صورتحال کی وجہ سے آکسیجن کی طلب میں غیرمعمولی اضافہ ہوا ہے اور کمپنی کے کراچی اور لاہور میں قائم تین پلانٹس پوری پیداواری گنجائش پر چلائے جانے کے باوجود آکسیجن کی اضافی طلب پوری کرنا کمپنی کے بس کی بات نہیں۔

خط میں کہا گیا ہے کہ آکسیجن کی کمی پوری کرنے کے لیے ہسپتال متبادل بندوبست کریں، آکسیجن کی قلت کی صورت میں کسی ناخوشگوار صورتحال کی ذمہ داری پاکستان آکسیجن پر عائد نہیں ہوگی۔

پنسلوانیا(ویب ڈیسک)امریکی ماہرین نے دریافت کیا ہے کہ ہر وقت شدید مصروفیت کی طرح بہت زیادہ فراغت بھی صحت کےلیے نقصان دہ ہوتی ہے جس کا نتیجہ اعصاب پر مسلسل دباؤ کی صورت میں ظاہر ہوتا ہے۔

یہ تحقیق ’’جرنل آف پرسنیلٹی اینڈ سوشل سائیکالوجی‘‘ کے تازہ شمارے میں شائع ہوئی ہے جس کی مرکزی مصنفہ مریسا شریف ہیں جن کا تعلق یونیورسٹی آف پنسلوانیا سے ہے۔مقالے میں بتایا گیا ہے کہ روزانہ کئی گھنٹے فارغ رہنے والوں میں اپنے ’’فضول‘‘ اور ’’ناکارہ‘‘ ہونے کا احساس جنم لیتا ہے جو وقت گزرنے کے ساتھ ساتھ شدید تر ہو کر، ذہنی و جسمانی کے مختلف مسائل کی وجہ بنتا ہے۔
اس تحقیق میں ملازمت پیشہ اور کاروباری امریکیوں پر کیے گئے مختلف مطالعات سے جمع کی گئی معلومات کا جائزہ لیا گیا۔

ان میں سے ایک مطالعہ 2012 سے 2013 کے درمیان کیا گیا تھا جس میں 21,736 امریکیوں میں مصروفیت اور فراغت کے بارے میں معلومات حاصل کی گئی تھیں۔ دوسرے مطالعے میں اگرچہ 13,639 افراد شریک تھے لیکن وہ 1992 سے 2008 تک، یعنی 16 سال کی طویل مدت کا احاطہ کرتا تھا۔

ان اعداد و شمار کے تسلسل میں مریسا شریف اور ان کے ساتھیوں نے دو آن لائن تجربے کیے جن میں چھ ہزار سے زائد امریکیوں نے حصہ لیا۔دونوں تجربات کا مقصد یہ جاننا تھا کہ روزانہ بہت کم (15 منٹ)، مناسب/ اوسط (ساڑھے تین گھنٹے) اور بہت زیادہ (7 گھنٹے) فارغ رہنے والوں کی ذہنی اور جسمانی صحت پر کیا اثرات مرتب ہوتے ہیں۔توقع کے مطابق، یہ بات سامنے آئی کہ جن افراد کے پاس عموماً بہت کم فرصت ہوتی ہے، وہ شدید اعصابی تناؤ میں مبتلا رہتے ہیں جس کا اثر ان کی صحت پر پڑتا ہے۔

لیکن، حیرت انگیز طور پر، روزانہ بہت زیادہ فارغ رہنے والے بھی اسی کیفیت کا شکار تھے۔ ان کا کہنا تھا کہ طویل عرصے تک روزانہ فراغت کی وجہ سے وہ خود کو بے کار محسوس کرنے لگے تھے۔ مسلسل اسی کیفیت میں رہنے کی وجہ سے ان لوگوں میں اعصابی تناؤ زیادہ ہوا اور ان کی صحت بھی خراب رہنے لگی۔البتہ وہ لوگ جنہوں نے اپنا فارغ وقت مختلف مشاغل اور ورزش وغیرہ میں صرف کیا، انہیں یہ شکایت نہیں ہوئی۔

مریسا شریف کے مطابق، یہ تحقیق ثابت کرتی ہے کہ صرف بہت زیادہ مصروفیت ہی نہیں بلکہ حد سے زیادہ فراغت بھی انسان کے جسم و دماغ کےلیے نقصان دہ ہوتی ہے۔ اگرچہ اس کے اثرانداز ہونے کا طریقہ شدید مصروفیت کے مقابلے میں ضرور مختلف ہوتا ہے لیکن عملی طور پر نتیجہ وہی ہوتا ہے۔لہذا، بہتر یہی ہے کہ اگر ہمارے پاس بہت زیادہ فارغ وقت ہو، تب بھی ہم اسے مسلسل آرام اور فضولیات میں ضائع نہ کریں بلکہ اچھی اور مثبت سرگرمیوں میں صرف کریں۔

این سی او سی کے مطابق اب15 سے 18 سال تک کی عمر کے افراد بھی ویکسین کے اہل ہیں۔ این سی او سی نے انسداد کورونا ویکسین لگانے کے لیے عمر کی حد کم کرنے کے حوالے سے تفصیلات جاری کر دیں،جس کےمطابق 13 ستمبر سے 15 سال تک کی عمر کے افراد کو باقاعدہ ویکسین لگانے کا عمل شروع کر دیا جائے گا۔این سی او سی حکام کا کہنا ہے کہ 15سے 18 سال کی عمر کے بچوں کو فائزر ویکسین مفت میں لگائی جائے گی ۔

15 سے 18 سال تک بچوں کی ویکسی نیشن کے لیے رجسٹریشن سرٹیفکیٹ لازمی ہو گا ،تمام مرکزی ویکسی نیشن مراکز پر فائزر ویکسین دستیاب ہو گی۔ موبائل ویکسی نیشن ٹیمیں اسکول اور کالجوں میں ویکسی نیشن کریں گی۔
این سی او سی کے مطابق میسج کاانتظارکیےبغیرکسی بھی دن دوسری ڈوزلگوائی جاسکتی ہے، اتوارکادن خصوصی طورپردوسری ڈوزکےلیےمقررہے۔ خیبرپختونخوا کے 9 اضلاع میں اسکولوں کی بندش میں 15 ستمبر تک توسیع کردی گئی ہے۔

این سی او سی کے جاری کردہ اعدادو شمار کے مطابق گزشتہ 24 گھنٹوں کے دوران مزید 58 افراد جاں بحق ہوگئے جبکہ مجموعی اموات کی تعداد 26 ہزار 720 ہو گئی۔ گزشتہ 24 گھنٹوں کے دوران ملک بھر میں مزید 3 ہزار 153 کورونا کیسز رپورٹ ہوئے۔ ملک میں کورونا کیسز کی مجموعی تعداد 12 لاکھ 4 ہزار 520 ہوگئی۔ گزشتہ 24 گھنٹوں کے دوران ملک بھر میں 57 ہزار 792 کورونا ٹیسٹ کیے گئے۔ گزشتہ24گھنٹے میں مثبت کیسز کی شرح 5.45 فیصد رہی۔

این سی او سی کے مطابق پنجاب میں ابتک12ہزار211افرادجان کی بازی ہار چکے ہیں جبکہ سندھ میں 7 ہزار 133، خیبرپختونخوا 5 ہزار 250، اسلام آباد 887، گلگت بلتستان 179، بلوچستان میں 342 اور آزاد کشمیر میں 718 افراد جان کی بازی ہار چکے ہیں۔ سندھ میں کوروناکیسزکی تعداد4لاکھ 44 ہزار464،خیبر پختونخوا میں ایک لاکھ 68 ہزار 258، پنجاب میں 4 لاکھ 13 ہزار 182، اسلام آباد میں ایک لاکھ 2 ہزار 617، بلوچستان میں 32 ہزار 569، آزاد کشمیر میں 33 ہزار 268 اور گلگت بلتستان میں 10 ہزار 162 ہو گئی ہے۔

ہارورڈ(ویب ڈیسک)دفاتر کی آلودہ اور غیرمعیاری فضا سے وہاں کام کرنے والے افراد کی دماغی صلاحیت پر برے اثرات مرتب ہورہےہیں اور ان کی دماغی اور ذہنی صلاحیت متاثر ہوسکتی ہے۔

ان میں کاربن ڈائی آکسائیڈ اور پی ایم 2.5 کی غیرمعمولی بڑھی ہوئی مقدار ذہانت اور دماغی ٹیسٹ میں ان کی درستگی کو متاثرکرتی ہے اور اس کا اثر دفاتر کی کارکردگی پر بھی ہوتا ہے۔ تحقیق کی روشنی میں کہا گیا ہے کہ دفاتر کی اندرونی ہوا کا معیار بہتر بنانا بہت ضروری ہے تاکہ تازہ ہوا کی آمدورفت جاری رہے۔

ہارورڈ ٹی ایچ چین اسکول برائے عوامی صحت نے پہلی مرتبہ دفاتر اور اداروں کی فضائی کیفیات کے درمیانی تعلقات دریافت کیا ہے۔ اس بڑے مطالعے میں کئی ممالک نے حصہ لیا ہے۔ دفاترمیں ہوا کی آمدورفت اور معلق ذرات کے درمیان تعلق سے انکشاف ہوا ہے کہ وہ کارکنوں کی دماغی صلاحیت کو متاثر کررہے ہیں جس کی تصدیق کئی مروجہ ٹیسٹ سے بھی ہوئی ہے۔اس سے قبل جو بھی تحقیق ہوئی ہے اس میں باہر کی فضائی آلودگی اور دماغی صلاحیت پر ان کے اثرات پر غور ہوا ہے لیکن بند کمروں میں ہوا پر کسی نے غور نہیں کیا تھا۔ اس تحقیق میں 300 افراد کو شامل کرکے ایک سال تک تحقیق کی گئی اور دنیا کے چھ ممالک میں 40 عمارات سے ڈیٹا لیا گیا۔

ہردفتر میں کئی اقسام کے سینسر لگائے جو اسی وقت پی ایم 2.5، کاربن ڈائی آکسائیڈ، درجہ حرارت اور نمی وغیرہ نوٹ کرتے رہے تھے۔ جیسے ہی دفاتر میں پی ایم 2.5 نامی ذرات اور کاربن ڈائی آکسائیڈ کی سطح ایک خاص پیمانے سے اوپر پہنچی تو اسمارٹ فون پر ایک پیغام پہنچا جس میں دماغی صلاحیت والے ایک چھوٹے سے گیم یا ٹیسٹ پورا کرنے کو کہا گیا۔عام طور پر جب جب دفاتر میں کاربن ڈائی آکسائیڈ اور پی ایم 2.5 کی مقدار بڑھی اکثر شرکا نے ٹیسٹ میں اپنا ردِ عمل دیر میں درج کروایا۔ ان میں الفاظ کو پہچاننے کا ایک ٹیسٹ تھا جس میں رنگوں کے وجہ سے الفاظ کو پہچاننے کے لیے غور کرنا پڑتا تھا۔ یہ ٹیسٹ اس وقت خراب واقع ہوا جب دفتر کے ماحول میں یہ دو آلودگیوں کا عروج تھا۔

تحقیقی کے سربراہ ہوزے گیولرمو سیڈانو نے کہا کہ پی ایم 2.5 اور کاربن ڈائی آکسائیڈ کی سطح بڑھنے کے فوراً بعد ہی اکتسابی (کوگنیشن) صلاحیت میں یکدم تیزی سے کمی آجاتی ہے۔ اس لئے دفاتر میں ہوا کا مسلسل بہاؤ بہت ضروری ہے جوعمومی صحت اور دماغ دونوں کے لیے ہی مضر ہوتی ہے۔سائنسدانوں نے کہا ہے کہ کووڈ وبا کے تناظر میں بھی گھروں اور دفاتر میں تازہ ہوا کی آمدورفت کی بہت ضروری ہے۔ اگر ادارے اپنے ملازموں کی صلاحیت بڑھانا چاہتے ہیں تو انہیں چھت کے نیچے ہوا کا معیار بڑھانا ہوگا۔

پنجاب میں کورونا ویکسین کی غلط ڈیٹا انٹری روکنےکے لیے این سی او سی نے کوڈ سسٹم متعارف کرادیا۔
محکمہ صحت پنجاب کے مطابق کمپیوٹر آپریٹر کوڈ کے بغیر ویکسین ڈیٹا کی انٹر ی نہیں کی جاسکے گی، کئی لوگ بغیر ویکسین لگوائے ڈیٹا انٹری کروا رہے تھے اور چند روپوں کے عوض غلط معلومات سسٹم میں آرہی تھیں جسے روکنے کے لیے این سی او سی نے کوڈ سسٹم شروع کردیا ہے۔محکمہ صحت کا کہنا ہےکہ اب ڈیٹا انٹری سے پہلے کمپیوٹر آپریٹر کو ٹیلی فون پر کوڈ موصول ہوگا جس کی مدد سے ڈیٹا انٹری ہوگی۔

اوسلو(ویب ڈیسک) ناروے اور سویڈن میں کی گئی ایک تحقیق سے معلوم ہوا ہے کہ دورانِ حمل خواتین کی جسمانی مشقت مثلاً ورزش سے ان کے نوزائیدہ بچوں کے پھیپھڑے بھی مضبوط ہوتے ہیں۔

یورپین ریسپائریٹری سوسائٹی کی حالیہ انٹرنیشنل کانگریس میں پیش کی گئی اس تحقیق سے حاملہ خواتین میں جسمانی سرگرمیوں کی اہمیت کا ایک اور پہلو سامنے آیا ہے۔یونیورسٹی آف اوسلو، ناروے کی ڈاکٹر ہریفنا کارٹن نے یہ تحقیق 814 نوزائیدہ بچوں اور ان کی ماؤں پر کی ہے۔
اس تحقیق میں حمل کے دوران خواتین کی جسمانی سرگرمیوں بشمول گھریلو کام کاج اور ورزش وغیرہ سے متعلق معمولات پر نظر رکھی گئی جبکہ بچوں کی پیدائش کے تین ماہ بعد ان بچوں کی صحت، بالخصوص پھیپھڑوں کی کیفیت کا جائزہ لیا گیا۔تجزیئے سے معلوم ہوا کہ دورانِ حمل زیادہ آرام کرنے والی خواتین کے یہاں پیدا ہونے والے 290 بچوں میں سے 8.6 فیصد کے پھیپھڑے خاصے کمزور تھے۔ان کی نسبت، حمل کے دوران چاق و چوبند اور سرگرم رہنے والی خواتین کے نوزائیدہ بچوں میں کمزور پھیپھڑوں کی شرح 4.2 فیصد دیکھی گئی۔

واضح رہے کہ پیدائش کے وقت کمزور پھیپھڑوں کا نتیجہ آئندہ زندگی میں سانس کی کئی بیماریوں کو جنم دے سکتا ہے جن میں دمہ بطورِ خاص قابلِ ذکر ہے۔
ڈاکٹر ہریفنا کا کہنا ہے کہ اس تحقیق میں نوزائیدہ بچوں میں پھیپھڑوں پر اثر انداز ہونے والے صرف ایک پہلو کا جائزہ لیا ہے۔اس بارے میں حتمی طور پر جاننے کےلیے ایک وسیع مطالعے کی ضرورت ہے تاکہ مختلف پہلوؤں کو مدنظر رکھتے ہوئے اس حوالے سے کوئی حتمی نتیجہ اخذ کیا جاسکے۔

سویڈن(ویب ڈیسک)ایک چھوٹے سے مطالعے سے معلوم ہوا ہے کہ چکنی مچھلیوں اور دیگر اجناس میں عام پایا جانے والا اومیگا تھری فیٹی ایسڈ الزائیمر کے مریضوں کے لیے بہت مفید ثابت ہوسکتا ہے۔ فیٹی ایسڈ سے ان مریضوں کی یادداشت بہتر رہتی ہے۔

اس ضم میں اپسالا یونیورسٹی کے سائنسداں اور کیرولنسکا انسٹی ٹیوٹ کی ماہر یون فروئنڈ لی وائی نے کہا ہے کہ یہ دنیا میں اپنی نوعیت کا پہلا مطالعہ ہے جس میں الزائیمر کے مریضوں پر اومیگا تھری کے اثرات معلوم کئے گئے ہیں۔ اس میں الزائیمر کےبایو مارکرز کا بطورِ خاص مطالعہ کیا گیا ہے۔
اگرچہ اس میں شریک افراد کی تعداد کم ہے لیکن اس کی شماریاتی اہمیت اپنی جگہ ہے۔ اس سروے میں 33 مریضوں کو شامل کیا گیا جو الزائیمر کے شکار تھے۔ ان میں سے 18 افراد کو صبح و شام اومیگا تھری کی گولیاں کھلائی گئیں جبکہ 15 افراد کو نہیں دی گئیں۔ یہ سلسلہ چھ ماہ تک جاری رہا اور تمام افراد کو شروع، میں درمیان میں اور سروے کے اختتام میں حافظے کے ٹیسٹ سے گزارا گیا۔
نتائج سے معلوم ہوا کہ جن افراد کو اومیگا تھری کھلائی گئی ان کی یادداشت مستحکم رہی اور اس میں کوئی تنزلی نہیں دیکھی گئی جبکہ اومیگا نہ کھانے والے مریضوں کی یادداشت میں مزید زوال واقع ہوا۔ واضح رہے کہ الزائیمر کے مریضوں کا حافظہ بہت تیزی سے تبدیل ہوتا رہتا ہے۔
ساتھ ہی تمام شرکا کے حرام مغز سے بھی مائع نکال کر اس کا تجزیہ کیا گیا لیکن اومیگا تھری استعمال کرنے یا نہ کرنے والوں میں کوئی فرق نہیں دیکھا گیا لیکن حافظے میں واضح فرق تھا۔ اس پر تنقید کرنے والے سائنسدانوں نے کہا ہے کہ اول تو اس تحقیق میں بہت کم افراد شامل کئےگئے ہیں لیکن انہوں نے یہ اعتراف بھی کیا ہے کہ اس پر مزید تحقیق ہونا ضروری ہے۔
اسی ٹیم نے 15 سال قبل 200 مریضوں پر ایسی ہی تحقیق کی تھی۔ اس میں دیکھا گیا تھا کہ اومیگا تھری کے اجزا کھانے سے وہ دماغ تک منتقل ہوتے ہیں اور دماغ پر مثبت اثرات ڈالتے ہیں۔ تاہم یون کی ٹیم اگلے مرحلے میں اس سے بڑی تعداد کےمریضوں کو شامل کرے گی اوران کے مزید ٹیسٹ کئےجائیں گے جن میں خون کے ٹیسٹ بھی ہوں گے۔

وزارت قومی صحت نے کہا ہے کہ دنیا بھر کے ڈاکٹرز اور عالمی ادارے ایکٹیمرا انجکشن کا متبادل تجویز کر رہے ہیں، ایکٹیمرا کورونا وائرس سے شدید متاثر ہونے والے پھیپھڑوں کے مریض کو لگایا جاتا ہے۔میڈیا رپورٹ کے مطابق وزارت قومی صحت نے کہا کہ پاکستان سمیت دنیا بھر میں ایکٹیمرا انجکشن کی قلت ہے، عالمی اداروں نے ایکٹیمرا کا متبادل تجویز کرنے کی ہدایات دی ہیں۔وزارت صحت کے ترجمان کی جانب سے کہا گیا کہ انجکشن کا فارمولا ٹو سیلوزو میب ہے، باریکی ٹینیب اور ٹوفاسی ٹینیب ایکٹیمرا انجکشن کے متبادل ہیں، دنیا بھر میں ایکٹیمرا انجکشن بلیک میں فروخت ہو رہا ہے۔ ذرائع کے مطابق پاکستان میں فارما کمپنیز بیرون ملک سے ایکٹیمرا انجکشن درآمد کرتی ہیں، ڈریپ نے ایکٹیمرا 200 ایم جی کی قیمت 39 ہزار 689 روپے مقرر کی ہے، ڈریپ نے ایکٹیمرا 400 ایم جی کی قیمت 79 ہزار 378 مقرر کی ہے۔ذرائع کے مطابق پاکستان میں اسمگل شدہ ایکٹیمرا انجکشن ڈیڑھ سے 2 لاکھ روپے میں فروخت ہو رہا ہے۔

نگری کی سیمیلویز یونیورسٹی کے محققین نے کافی پینے کی عادتوں، ہارٹ اٹیک اور فالج کے واقعات کے مابین وابستگی کی چھان بین کی۔ درمیانے درجے کی کافی کا استعمال فالج کے خطرے کو کافی نہ پینے والے لوگوں کے مقابلے میں 21 فیصد تک کم کرسکتا ہے،محقیقین کا کہنا ہے کہ یہ لوگوں میں کافی کی باقاعدہ استعمال اور کافی کےقلبی اثرات کا منظم انداز میں جائزہ لینے کا سب سے بڑا مطالعہ ہے.کافی کا باقاعدگی سے استعمال محفوظ ہے، یہاں تک کافی کو روزانہ زیادہ مقدار میں استعمال بھی دل سے متعلق صحت پر منفی اثرات مرتب نہیں کرتا اور دس سے پندرہ سال تک مسلسل کافی پینابھی موت کا سبب نہیں بن سکتا۔
ماہرین کا کہنا ہے کی ایک دن میں آدھے سے 3 کپ تک کافی پینافالج کے خطرات ، قلبی امراض یا کسی بھی وجہ سے موت کےخطرات کو کم کر دیتا ہے۔
مطالعہ میں ، ڈاکٹر سائمن اور ساتھیوں نے 11 سال کی اوسط مدت کے دوران ساڑھے چار لاکھ سے زائد بالغوں کی صحت اور کافی کے استعمال کی عادات کا موازنہ کیا۔ مطالعہ کے آغاز میں ، شرکاء میں سے کسی کو دل کی کوئی بیماری نہیں تھی – اور ان شرکا کی اوسط عمر 56 سال تھی۔
ایک رپورٹ کے مطابق دنیا بھر میں یومیہ 2 ارب کپ سے زائد کافی پی جاتی ہے اور موسم سرما کے دوران اس تعداد میں کئی گنا اضافہ ممکن ہوجاتاہے تاہم کافی کے فوائد اور نقصانات کے حوالے سے یہ بحث رہی ہے کہ کافی کتنی فائدہ مند ہے یا پھر اس کے نقصانات بھی ہیں۔
کافی کو پسند کرنے والے یہ جاننے میں دلچسپی رکھتے ہوں گے کہ سائنسی شواہد اس حوالے سے کیا کہتے ہیں۔
کافی کے مثبت اثرات کی وجہ اس میں پایا جانے والا سب سے اہم جزو کیفین ہے۔ انسانی جسم پر کیفین کے مثبت اثرات کئی تحقیقات کے ذریعے تسلیم شدہ ہیں تاہم مجموعی طور پر کافی مختلف جزو والا ایک پیچیدہ مشروب ہے اور یہی مختلف جزو کافی کو فائدہ مند ہونے کے ساتھ ساتھ نقصان دہ بھی بناسکتے ہیں۔
ورک آؤٹ سے ایک گھنٹہ پہلے لیا گیا بلیک کافی کا ایک کپ جسمانی کارکردگی میں 11 سے 12 فیصد اضافہ کرسکتا ہے۔
کافی میں موجود کیفین خون میں اینڈرلائن ( جسم کو مشقت کے لیے تیار کرنے والا ہارمون )کی سطح کو بڑھا کر کارکردگی میں اضافہ کرتا ہے۔
بی ایم جے میں شائع ہونے والے ایک تحقیقی جائزے کے مطابق روزانہ تین سے چار کپ کافی پینے سے طبی فوائد حاصل ہوسکتے ہیں۔ تحقیق سے ظاہر ہوا ہے کہ کافی پینے والوں میں جگر کی بیمایوں اور کچھ قسم کے سرطان پیدا ہونے کا خطرہ کم ہوتا ہے، جبکہ دماغ کی رگ پھٹنے سے موت کا خطرہ بھی کم ہوتا ہے لیکن محققین یہ ثابت نہیں کرسکے کہ ایسا کافی کی ہی وجہ سے ہوتا ہے۔
اس تحقیقی جائزے کے مطابق حمل کے دوران زیادہ کافی پینا نقصان دہ ہو سکتا ہے جبکہ ماہرین کا کہنا ہے کہ لوگوں کو طبی فوائد حاصل کرنے کے لیے کافی پینا شروع نہیں کرنا چاہیے۔ یونیورسٹی آف ساوتھ ایمپٹن کے محققین نے کافی کے انسان جسم پر پیدا ہونے والے اثرات کے بارے میں ڈیٹا جمع کیا، جس میں 200 تحقیقات شامل تھیں اور ان میں بیشتر مشاہداتی تھیں۔ ایسے افراد کی نسبت جو کافی نہیں پیتے، وہ افراد جو تقریباً تین کپ روزانہ کافی پیتے ہیں ان میں دل کی بیماریاں لاحق ہونے یا ان سے موت کا خطرہ کم ہوتا ہے۔ کافی استعمال کرنے کا سب سے بڑا فائدہ جگر کی بیماری اور سرطان کے خطرے کو کم کرنے میں دیکھا گیا۔