Category پراپرٹی گائیڈ

لاہور (ایمرا نیوز آن لائن)
پنجاب حکومت نے صوبہ بھر میں آن لائن فرد ملکیت کے اجرا کا فیصلہ کرلیا ۔وزیراعلیٰ نے کہا کہ یکم جولائی سے گھر بیٹھے آن لائن فردملکیت کے حصول کا سسٹم فعال ہوجائے گا،اس ضمن میں وزیراعلیٰ پنجاب سردار عثمان بزدار کی زیر صدارت اعلیٰ سطح کا اجلاس ہوا، وزیراعلیٰ پنجاب سردار عثمان بزدار نے اجلاس سے خطاب کرتے ہوئے کہا کہ بینکوں میں فرد ملکیت کے اجرا کے لئے علیحدہ کاؤنٹرزقائم کیے جائیں گے اوراس اقدام سے فرد ملکیت کے حصول میں مزید آسانی ملے گی۔انہوں نے ہدایت کی کہ عوام کی سہولت کیلئے ہر لینڈ ریکارڈ سینٹرزمیں ریونیو واجبات جمع کرانے کا انتظام کیا جائے ، انہوں نے کہا کہ لینڈ ریکارڈ سینٹرزکے دائرہ کار کو بڑھانے کے منصوبے کو جلد از جلد پایہ تکمیل تک پہنچایاجائے اورسرکاری عمارتوں میں مستقبل بنیادوں پر لینڈ ریکارڈ سنٹرز قائم کیے جائیں،انہوں نے کہا کہ ریونیو امور سے متعلقہ عوام کی شکایات کا فوری ازالہ ضروری ہے ،عوام کی سہولت کے کسی بھی پراجیکٹ میں تاخیرتکلیف دہ امر ہے اور میں اپنے عوام کو تکلیف اورمسائل کا شکار دیکھ کر خوش نہیں رہ سکتا،انہوں نے کہا کہ سرکاری اراضی کو لیز پر دے کر کاشتکاری کے فروغ کا شفاف نظام لایا جائے گا،انہوں نے کہا کہ ریونیو سٹاف سے متعلق بدعنوانی کی شکایات قطعاً قابل برداشت نہیں،محکمہ مال سے متعلق امور میں کرپشن کے خاتمے کیلئے ہیلپ لائن /کال سنٹر کو مزیدفعال کیا جائے ،علاوہ ازیں انہوں نے کہاہے کہ پنجاب میں ترقیاتی منصوبوں میں شفافیت اورفنڈزکے درست استعمال کویقینی بنانے کیلئے کڑی مانیٹرنگ کی جا ئے گی۔وزیراعلیٰ عثمان بزدار نے وزیراعلیٰ معائنہ ٹیم،اینٹی کرپشن اورمتعلقہ محکموں کو ترقیاتی منصوبوں کی نگرانی کی ذمہ داری سونپ دی ہے ،وزیراعلیٰ کی ہدایت پر ترقیاتی منصوبوں سمیت ڈیر ہ غازی خان ڈویلپمنٹ پیکیج کی نگرانی کیلئے موثر میکانزم تشکیل دے دیاگیا،وزیراعلیٰ نے منصوبوں کی کڑی مانیٹرنگ کے میکانزم پر من وعن عملدرآمد کا حکم دیتے ہوئے کہا ہے کہ وزیراعلیٰ معائنہ ٹیم،اینٹی کرپشن اورمتعلقہ محکمے ترقیاتی منصوبوں میں شفافیت یقینی بنائیں اورترقیاتی منصوبوں کی سخت نگرانی کا عمل ہر سطح پر جاری رکھا جائے ۔علاوہ ازیں چائلڈ لیبر کے عالمی دن کے موقع پر انہوں نے کہا کہ چائلڈ لیبر ایک سماجی ومعاشی مسئلہ ہے جس کے پس پردہ کئی عوامل کارفرما ہیں، دنیا بھر کے مروجہ قوانین کے مطابق بچوں سے مشقت لینا مجرمانہ فعل ہے ۔وزیراعلیٰ پنجاب سردار عثمان بزدار نے موٹروے پر حافظ آباد کے قریب ٹریفک حادثے کے نتیجے میں قیمتی انسانی جانوں کے ضیاع پر گہرے دکھ اور افسوس کا اظہار کیا ہے ، وزیراعلیٰ پنجاب سردار عثمان بزدار نے بلوچستان کے علاقے وندرمیں ٹریفک حادثے کے نتیجے میں قیمتی انسانی جانوں کے ضیاع پرگہرے دکھ اور افسوس کا اظہار کیا ہے ۔بعدازاں انہوں نے مشکل حالات میں بہترین، متوازن اور عوام دوست بجٹ پیش کرنے پروزیراعظم عمران خان،وزیر مملکت ریونیوحماد اظہر اور ا ن کی ٹیم کو مبارکباد دی ہے ۔

لاہور (ایمرا نیوز آن لائن)

ڈی جی ایل ڈی اے عثمان معظم نےادارےمیں بڑے پیمانےپراصلاحات لانےکا فیصلہ کرلیا، انہوں نے کہا کہ جمعہ کےروز فل ڈے کھلی کچہری لگائی جائے گی،آئندہ تیس روز میں سڑکوں کی بحالی کا کام شروع کردیاجائےگا۔

تفصیلات کے مطابق ڈائریکٹر جنرل ایل ڈی اےمحمد عثمان معظم نےایل ڈی اے کنٹرولڈ ایریا میں سڑکوں کی بحالی اور پیچ ورک بھی شروع کرانے کا فیصلہ کیا ہے،سابق ڈی جی کےدور میں روکی جانےوالی سکیموں کی ایڈمنسٹریٹو منظوری آئندہ دس روز میں دی جائے گی،ڈی جی عثمان معظم ہفتے میں ایک روز جمعہ کو ون ونڈو پرفل ڈے کھلی کچہری لگائیں گے۔

ڈی جی ایل ڈی اے روزانہ ایک ترقیاتی سکیم کا معائنہ کریں گے، عثمان معظم کا کہنا تھاکہ شہر میں میگا پراجیکٹ شروع کرنےکا ہوم ورک مکمل کرلیا گیا ہےجبکہ آئندہ تیس روز میں تمام منجمند ترقیاتی سکیموں کوشروع کرنےکا بھی فیصلہ کیا گیا۔

اسلام آباد (ایمرا نیوز آن لائن)
وزیراعظم کی معاون خصوصی برائے سماجی تحفظ ، خاتمہ غربت اور چیئرپرسن احساس پروگرام ، ڈاکٹر ثانیہ نشتر نے کہا ہے کہ حکومت 10؍ لاکھ غریب لوگوں کیلئے راشن اسکیم لا رہی ہے اور اس کیلئے شفاف طریقے سے کارڈ تقسیم کئے جائینگے، تمام مستحق معذور افراد جو نادرا میں رجسٹرڈ ہیں انہیں انصاف کارڈ دیئے جائیں گے، معذوروںکوویل چیئر،آلہ سماعت، سفید چھڑی مفت دی جائیگی، اسٹریٹ چلڈرن، جبری مشقت کےشکار بچوں کےتحفظ کیلئےنیا ادارہ بنےگا، نیا پاکستان ہائوسنگ اسکیم میں بھی معذور افراد کیلئے 2فیصد کوٹہ بھی مختص کیا گیا ہے، کفایت شعار پروگرام کے تحت 70 لاکھ غریب خواتین کو وظائف دیئے جائینگے، یتیموں کیلئے ایک نئی پالیسی لائی جا رہی ہے جو کہ یتیم خانوں کی حالت بہتر بنائے گی اور ضرورت کے مطابق انکی تعداد میں اضافہ کریگی، ہر ماہ 80؍ہزار بیروزگارافراد کو بلا سود قرضے ،سلائی مشینیں ، مال مویشی، دکان کا سامان دینگے،غریب طالبعلموں کیلئے انڈر گریجویٹ اسکالرشپ اسکیم،ٹیوشن فیس، ہاسٹل کا خرچہ اور وظیفہ دیا جائیگا۔ ان خیالات کا اظہار انہوں نے ہفتہ کو پریس انفارمیشن ڈیپارٹمنٹ (پی آئی ڈی) میں پریس کانفرنس سے خطاب کرتے ہوئے کیا۔ اس موقع پر سیکرٹری شائستہ سہیل اور دیگر حکام موجود تھے۔ ڈاکٹر ثانیہ نشتر نے کہا کہ سال2019-20 ءکا بجٹ ایک کفایت شعار بجٹ ہے‘ شدید مالی قلت کی وجہ سے کئی اداروں نے رضاکارانہ طور پر اپنا بجٹ کم کر دیا ہے اور اکثروزارتوں نے اضافی بجٹ کا مطالبہ نہیں کیا ہے۔ایسے حالا ت میں سماجی تحفظ کے بجٹ کو تقریباً دو گنا کر دینا وزیر اعظم کا ایک اہم اور جرات مندانہ قدم ہے،یہ فلاحی ریاست کی جانب ایک اہم قدم ہے ۔ بجٹ کی تفصیلات بجٹ Speech میں دی جائیں گی -انہوں نے کہا کہ آج میں احساس سے متعلق کچھ پالیسی ڈائریکشنز پر بات کرنا چاہتی ہوں۔ سماجی تحفظ کے ضمن میں تین گروپ ہیں جن کو پالیسی کور دینا ہے پہلا گروپ وہ ہے جو سالہا سال سے غربت میں گھِرا ہوا ہے ، دوسرا آفت زدہ گروپ ہے جو کسی آفت کی وجہ سے غریب ہو رہا ہے اور تیسرا گروپ ہمارے معذور بہن بھائیوں کا گروپ ہے ۔ اس بجٹ میں معذور افراد کیلئے اہم پالیسیاں یہ ہیں جن میں تمام مستحق افراد کو ویل چیئر مفت دی جائیگی، بینائی سے محروم تمام مستحق افراد کو سفید چھڑی مفت مہیا کی جائے گی ،تمام مستحق معذور افراد جو نادرا میں رجسٹرڈ ہیں انہیں انصاف کارڈ دیا جائے گا تاکہ وہ اپنااور اپنے خاندان کا علاج حکومتی خرچے پر مخصوص ہسپتالوں میں مفت کروا سکیں ۔انہوں نے کہا کہ وزیر اعظم عمران خان کی خصوصی ہدایت پر ملازمتوں میں معذور افراد کیلئے دو فیصد کوٹہ پر سختی سے عمل درآمد کیاجائے گا۔اسکے علاوہ معذور حکومتی اہلکاروں کے لئے حکومت کے گھروں میں 2% کوٹہ کی بھی منظوری دے دی گئی ہے ۔ان تمام سہولیات سے فائدہ اٹھانے کیلئے تمام سرکاری ہسپتالوں کو یہ ہدایت جاری کی جا رہی ہے کہ وہ اقوام متحدہ کے اصولوں کے مطابق تمام معذور افراد کو سرٹیفیکیٹ جاری کریں تاکہ معذوری کی قسم کا تعین ہو سکے۔اس کے علاوہ پسماندہ علاقوںمیں معذور افراد کے لئے 20 ہسپتالوں میں سنٹر کھولے جائیں گے جہاں بازو، ٹانگ لگانے کی بھی سہولت ہوگی۔ ڈاکٹر ثانیہ نشتر نے کہا کہ وزارت انسانی حقوق کی طرف سے اقوام متحدہ کے کنونشن برائے حقوق انسان کے مطابق معذوروں کیلئے وفاقی سطح قانون سازی کی جارہی ہے۔ وزارت پلاننگ و ڈیولپمنٹ کی ہدایت کے مطابق آئندہ تمامPC-1 معذور دوست ہوں گے‘ بے روزگار افراد کے لئے ہر ماہ80,000 افراد کو بلا سود قرضے دیئے جائیں گے اور چھوٹے اساسوں کی منتقلی کی جائے گی جیسا کہ سلائی مشین ، مال مویشی ، دکان کا سامان ہے۔غریب طالب علموں کیلئے انڈر گرایجویٹ سکالرشپ اسکیم شروع کی جارہی ہے جس کے ذریعے ان کو ٹیوشن فیس ، ہاسٹل کا خرچہ اور وظیفہ دیا جائے گا۔ غریب بچیوں کیلئے وائجر اسکیم اور سیکنڈ چانس سکیم شروع کی جا رہی ہے تاکہ اگر وہ اسکول چھوڑ چکی ہیں تو واپس داخلہ لے لیں۔انہوں نے کہا کہ کئی پسماندہ اضلاع میں بچوں کو سکول بھیجنے کے عوض والدین کو وظیفے کی سکیم بجٹ میںشامل ہے۔کفایت شعار پروگرام کے تحت 70 لاکھ غریب خواتین کو وظائف دیئے جائینگے ۔500سے زائد کفالت مراکز بنائے جا رہے ہیں جہاں غریب خواتین اور ان کے بچوں کو مفت انٹر نیٹ کی سہولت ملے ہی جہاں انہیں مفت سکول کے سبق، مفت ہنر کی تعلیم ،مفت تعلیم بالغاں اور مفت آئی ٹی شعبے سے منسلک تفصیلات ملیں گی جو کہ ان کی معاشی خودمختاری کا راستہ کھولیں گی۔ انہوں نے کہا کہ احساس میں بے گھر افراد کیلئے بھی پالیسیاں ہیں۔ہر بڑے شہر میں پناہ گاہیں بنائی جائیں گی،غریب افراد کو گھر بنانے کیلئے قرضوں کی سکیم کی بنیاد رکھ دی گئی ہے،غریب بیمار 30 لاکھ خاندانوں کو انصاف کارڈ دیئے جائیں ‘غریب بزرگوں کیلئے ای او بی آئی پنشن 5050/=روپے سے بڑھا کر6500/=روپے کر دی گئی ہے ۔ انکے لئے احساس گھر بنانے کے کام کا آغاز ہو چکا ہے،یتیموں کے لئے ایک نئی پالیسی لائی جا رہی ہے جو کہ یتیم خانوں کی حالت بہتر بنائے گی اور ضرورت کے مطابق ان کی تعداد میں اضافہ کرے گی ،مزدوروں کیلئے خصوصاً دہاڑی والے مزدوروں کیلئے ، گھریلو ملازمین کیلئے رجسٹریشن کا آغاز ہو رہاہے جو کہ ان کی ای او بی آئی اورای ایس ایس آئی میں شمولیت کے پہلا قدم ہے اور جس کے ذریعے ان کو پنشن اور صحت کی سہولیات مل سکیں گی ،بیرون ملک محنت کشوں کے لئےPOE آفسر اور سفارتخانوں میں CWR کی تعداد بڑھائی جا رہی ہے جو محنت کش سات سال سے واپس نہیں آ رہے ان کو ٹکٹ پر سبسڈی دی جائے گی ۔ان محنت کشوں کی حقوق کی آگاہی کا خاص پروگرام بجٹ میں شامل ہے ،انتہائی مجبور لوگوں کیلئے جیسا کہ غریب Seasonal Migrants, Transgender, Bonded Labor,Street Children میں بندھے ہوئے مزدورکے تحفظ کے لئے نیاادارہ قائم کیا جا رہا ہے،غریب افراد کا حکومتی ٹھیکوں میں ، کچی آبادی کے ترقیاتی پروگراموں میں اور شکار پرمٹ سے حاصل ہوئی رقم میں حصہ رکھا جائے گا،ہاریوں کی لئے نئی پالیسی سازی کیلئے بجٹ بھی موجود ہے،حکومت 10 لاکھ غریب لوگوں کیلئے راشن سکیم لا رہی ہے اور اس کے لئے شفاف طریقے سے کارڈ تقسیم ہوں گے،ان ہی کارڈوں کے ذریعے ایک خاص غذا بھی ان دو سال سے کم عمر بچوں کو دی جائے گی جو کہ شدید جسمانی کمزوری کا شکار ہیں۔ ایک سوال کے جواب میں ثانیہ نشتر نے کہا کہ بنک سے کنٹریکٹ 2009ءمیں ہوئے تھے اس میں کئی کمزوریاں تھیں، 2 جنوری 2019ءکو بنکوں سے ای او آئی مانگا گیا۔ بہت سے بنکوں نے بڈز ڈال دیں، کچھ بنک شارٹ لسٹ کردیئے، بے نظیر انکم سپورٹ پروگرام نے بنکوں سے پہلی مرتبہ خواتین کو پیسے ریونیو کرنے جارہے ہیں اس میں شفافیت کو مدنظر رکھا جائے گا۔ انہوں نے کہا کہ ہم چاہتے ہیں کہ بینی فشری خواتین سے عزت سے پیش آئیں، شارٹ لسٹ بنکوں کے ساتھ جلد ہی رقم کی ترسیل کے سلسلے میں مفاہمتی یاداشتوں پر دستخط کریں گے۔ ایک اور سوال کے جواب میں ان کا کہنا تھا کہ توانا پروگرام کے کچھ اچھے اثرات بھی مرتب ہوئے مگر اس میں کرپشن کی شکایات بھی موصول ہوئیں۔

اراضی ریکارڈ سنٹر تحصیل سٹی کے اے ڈی ایل آر عائشہ چیمہ اور سروس سنٹر انچارج کے خلاف محکمانہ کاروائی کی سفارش ۔۔۔

لاہور (ایمرا نیوزآن لائن) ایڈ یشنل ڈپٹی کمشنر لاہور کی ہدایت پر اراضی ریکارڈ سنٹر میں اسسٹنٹ کمشنر سٹی کی جانب سے کی جانے والی انسپکشن نے پنجاب لینڈ ریکارڈ اتھارٹی کی انتظامیہ کی نااہلی و مبینہ غفلت اور مانیٹرنگ کی غیر فعال سسٹم کی تصدیق کر دی. اسسٹنٹ ڈائریکٹر لینڈریکارڈ اور سروس سنٹر انچارج کے خلاف پیڈا ایکٹ کے تحت انکوائری کرنے کی سفارش کر دی.

میڈیا 92 کو ملنے والی انسپکشن رپورٹ کے مطابق اسسٹنٹ کمشنر سٹی شاہد محبوب کی جانب سے گزشتہ روز کی جانے والی انسپکشن کے دوران معلوم ہواکہ کہ اراضی ریکارڈ سنٹر تحصیل سٹی میں زیادہ تر سٹاف وقفہ وقفہ سے چھٹیوں پر ہے یا غیر حاضر ہے.

مزید انکشاف ہوا کہ اسسٹنٹ ڈائریکٹر لینڈ ریکارڈ عائشہ چیمہ کی جانب سے 301 پرچہ رجسٹری کے انتقالات التوا کا شکار کر دیئے گئے اور پرچہ رجسٹری انتقالات پر مختلف سائن سے نشانی لگا کر رکھی گئی جس سے یہ صاف عیاں ہوتاہے کہ اسسٹنٹ ڈائریکٹر لینڈ ریکارڈ کے علم میں یہ سارا معاملہ ہے اور یہ سب پریکٹس ان کی مرضی کے مطابق ہو رہی ہے. جبکہ دوران انسپکشن یہ بھی معلوم ہوا کہ 45 سے زائد فرد بدارت عملہ درآمد کیلئے ایشوز میں رکھی گئی ہیں.

اور ریونیو ریکارڈ کی درستگی کے لیے نہ تو ریونیو آفیسر کو بتایا جارہاہے اور نہ ہی اسسٹنٹ کمشنر کو اس حوالے سے کوئی آگاہی دی گئی یا ان سے رابطہ کیا گیا ہے. انسپکشن کے دوران ایک ساجدہ طارق نامی خاتون نے عدالت مصدقہ آرڈر پیش کیے اور میری موجودگی میں بھی خاتون سائلہ کو کاغذات واپس کرتے ہوئے انتہائی بد سلوکی سے واپس جانے کا کہا ایسا رویہ کسی صورت بھی ایک سرونٹ آفیسر کی طرح نہ تھا.

بعدازاں مزید معلوم ہواکہ اس خاتون کو قبل ازیں بھی فرد جاری کی جاچکی ہے جس پر اے ڈی ایل آر نے اپنی غلطی بھی تسلیم کی انسپکشن کے دوران یہ بھی معلوم ہوا ہے کہ اسسٹنٹ لینڈ ڈائریکٹر اور سروس سنٹر انچارج کی جانب سے انتقالات کی مصدقہ کاپیاں بھی مہیا نہیں‌کی جارہی ہیں.

جس کے باعث اراضی ریکارڈ سنٹر کے اے ڈی ایل آر عائشہ چیمہ اور سروس سنٹر انچارج کے خلاف فوری محکمانہ انکوائری کرنے کی سفارش کر دی. جس پر ایڈیشنل ڈپٹی کمشنر ریونیو اویس ملک نے اے ڈی ایل آر اور سروس سنٹر انچارج سے اس غفلت اور غیر قانونی پریکٹس کے باعث تحریری جواب طلبی کر لی ہے.

لاہور(ایمرا نیوزآن لائن)
صوبائی سلیکشن بورڈ ون نے 50پی ایم ایس افسران سمیت مختلف صوبائی محکموں کے 66افسران کی گریڈ19 اور20میں ترقی کی منظوری دیدی۔ ذرائع کے مطابق صوبائی سلیکشن بورڈ ون کا اجلاس چیف سیکرٹری پنجاب یوسف نسیم کھوکھر کی زیر صدارت سول سیکرٹریٹ میں ہواجس میں تمام قواعد و ضوابط پر پورا اترنے والے محکمہ سروسز اینڈ جنرل ایڈمنسٹریشن کے 14، لائیو سٹاک کے 9، محکمہ خزانہ اور ہاؤسنگ کے ایک ایک افسر کی گریڈ 20میں ترقی کی منظوری دینے کے علاوہ سروسز اینڈ جنرل ایڈمنسٹریشن کے 36، جنگلات اور فشریز کے 4 اورمحکمہ خزانہ

کے ایک افسر کی گریڈ 19میں ترقی کی منظوری بھی دی۔اجلاس میں مجموعی طور پر 50پی ایم ایس افسران سمیت مختلف صوبائی محکموں کے 66افسران کی گریڈ19 اور20میں ترقی کی منظوری دی گئی۔پنجاب حکومت کی جانب سے جن پی ایم ایس افسران کو گریڈ 18 سے 19، اور گریڈ 19 سے 20ویں گریڈ میں ترقی دی گئی ہے ان میں سے یاور مہدی، جاوید اختر چوہدری، فضل الرحمن ، وقار عظیم، جہانگیر انور کی 18ویں سے 19ویں گریڈ میں ترقی ہوئی ہے جبکہ حافظ انیس الرحمن ،افضل ناصر خان، شفاعت علی، زبیر وحید بھی 19 ویں گریڈ میں ترقی پاگئے ہیں۔ بورڈ کے فیصلوں کی روشنی میں محمد اقبال، عبیداﷲ ، طیب فرید ، ڈاکٹر خرم شہزاد، نواز خالد عربی،کوکب نذیر ، فرخ نوید ، منیب الرحمن، شاہد فرخ نوید، شاہد محمود عادل، محمد اسلم پرویز بھی 19 گریڈ میں ترقی

کے حامل قرار دئیے گئے ہیں جبکہ زاہد ، مالک بھلا، اختر، اکرم، طاہر کی 19ویں سے 20 ویں گریڈ میں ترقی کی منظوری دی گئی ہے ۔دریں اثنا حکومت پنجاب نے نذیر احمد گجانہ کو سیکرٹری قانون و پارلیمانی امور پنجاب تعینات کر دیا۔ ان کی تقرری دو سال کے لئے کی گئی ہے ۔علاوہ ازیں سروسز اینڈ جنرل ایڈمنسٹریشن ڈیپارٹمنٹ کی جانب سے سوموار کو جاری کئے گئے نوٹیفکیشن کے مطابق ڈی جی ایل ڈی اے مسز آمنہ عمران کو تبدیل کر کے افسر بکار خاص بنا نے کے علاوہ چیف آپریٹنگ آفیسر ٹیوٹا عثمان معظم کو تبدیل کر کے ڈی جی ایل ڈی اے تعینات کر دیا گیا جبکہ جی ایم آپریشن ٹیوٹا اختر عباس بھروانہ کو چیف آپریٹنگ آفیسر ٹیوٹا کے عہدہ کا اضافی چارج بھی سونپ دیا گیا ہے ۔ادھر محکمہ پرائمری اینڈ سکینڈری ہیلتھ کئیر کا تمام اضلاع کے سی ای اوز

ہیلتھ کو تین برس مکمل ہونے پر کسی ڈاکٹر کی ایڈہاک تقرری میں توسیع نہ دینے کے نوٹیفکیشن کو معطل کر دیا گیا ۔علاوہ ازیں محکمہ سپشلائزڈ ہیلتھ کئیر اینڈ میڈیکل ایجوکیشن نے انسٹی ٹیوٹ آف پبلک ہیلتھ کے پہلے بورڈ آف مینجمنٹ تشکیل دیدیا۔ بورڈ میں پروفیسر شکیلہ زمان، ڈاکٹر عمر فاروق بلوچ، لیفٹیننٹ جنرل (ر) خالد مقبول ، نوید رسول مرزا اور عمران گبول شامل ہیں۔محکمہ لائیو سٹاک کے ترقی پانے والے افسروں میں ڈاکٹرنویداحمد خان نیازی، ڈاکٹرسید ندیم بدر،ڈاکٹرمحموداختر،ڈاکٹرسیدعامرمحمود، ڈاکٹریعقوب ملک ، ڈاکٹررب نوازکوثر، ڈاکٹرحبیب اورڈاکٹرعتیق

الرحمٰن شامل ہیں۔ادھر آئی جی نے تقرری کے منتظر ایس پی سید علی کو ایس پی پوٹھوہار راولپنڈی،کیپٹن ( ر) دوست محمد کو ایس پی آپریشنز سول لائنز لاہور،ایس پی سول لائن رضا صفدر کاظمی کو ایس پی آپریشنز کینٹ لاہور اور تقرری کے منتظر ایس پی شہباز الٰہی کو ایس پی انویسٹی گیشن قصور تعینات کر دیا گیا۔علاوہ ازیں مختلف سروسز گروپ کے افسرا ن کی گریڈ 19سے 20اور گریڈ 20سے 21میں ترقیوں کا جائزہ لینے کیلئے سینٹرل سلیکشن بورڈ کا 3 روز ہ اجلاس شروع ہو گیا ۔

اسلام آباد (ایمرا نیوزآن لائن)
کچھی کینال کی تعمیر میں 10سال تاخیر اور قومی خزانے کو 26ارب روپے نقصان پہنچانے کی ابتدائی انکوائری 2سال قبل مکمل ہونے کے باوجود بااثر واپڈا افسران اور بیوروکریٹس کے خلاف تاحال کارروائی شروع نہ ہونے کا انکشاف ہوا ہے ۔ 92نیوز کوموصول سرکاری دستاویز اور انکوائری رپورٹ کی کاپی کے مطابق2002 میں دریائے سندھ سے بلوچستان کی 7لاکھ 13ہزار ایکڑ زرخیزاراضی سیراب کرنے کرنے کیلئے کچھی کینال منصوبے میں تاخیر سے قومی خزانے اور بلوچستان کے عوام کو ناقابل تلافی نقصان پہنچا ہے ، سابق چیئرمین واپڈا ذوالفقارعلی خان،وزارت

پانی وبجلی، منصوبہ بندی کمیشن اور واپڈا کے افسران کی غفلت کے باعث قومی خزانے کو اربوں روپے کانقصان پہنچا۔سرکاری دستاویزکے مطابق کچھی کینال کی تعمیر فزیبلٹی سٹڈی کے بغیرشروع کی گئی، واپڈا نے نجی کمپنی کو غلط طریقے سے کنٹریکٹ ایوارڈ کیا ۔ واپڈا اور متعلقہ وزارتوں کی غفلت کے باعث منصوبے کی لاگت 31ارب روپے سے بڑھا کر 76ارب روپے مقرر کی گئی لیکن منصوبہ پھر بھی مقرر ہ مدت میں مکمل نہ ہوا جس کے بعد کچھی کینال کی لاگت 102ارب روپے کردی گئی۔ کچھی کینال منصوبے کیلئے منصوبہ بندی، ڈیزائن اور تعمیر پر مطلوبہ معیار کے مطابق عملدرآمد نہیں کیا گیا۔ 2016میں مشترکہ مفادات کونسل نے ذمہ داروں کا تعین کرنے کیلئے سابق چیف جسٹس پاکستان تصدق حسین جیلانی کی سربراہی میں کمیٹی قائم کی۔ کمیٹی

نے تحقیقات کیلئے 20اجلاس منعقد کئے اور متعلقہ افسران سے 174سوالات پوچھے ۔ تحقیقاتی کمیٹی نے اپنی رپورٹ میں 12 افسروں پرمنصوبے میں تاخیرکی ذمہ داری عائدکرتے ہوئے مشترکہ مفادات کونسل سے ذمہ داروں کیخلاف کارروائی اورکچھی کینال منصوبے کو ترجیحی بنیادوں پر مکمل کرنے کی سفارش کی جس کی مشترکہ مفادات کونسل نے توثیق کی تھی۔ گزشتہ دوسالوں کے دوران قومی خزانے کو نقصان پہنچانے کے ذمہ داران کے خلاف کارروائی کیلئے کمیٹی درکمیٹی بنانے کا سلسلہ جاری ہے ۔ وزارت آبی وسائل نے ایک مرتبہ پھر سابق چیئرمین واپڈا،وزارت پانی وبجلی، پلاننگ کمیشن سمیت واپڈا کے 12افسران کے خلاف ضابطے کی کارروائی شروع کرنے کیلئے وفاقی کابینہ سے کمیٹی قائم کرنے کی اجازت طلب کرلی ۔ وفاقی کابینہ وزارت آبی وسائل کی سمری پر آج تیسری مرتبہ ایک اور کمیٹی قائم کرنے کی منظوری دیگی۔

لاہور(ایمرا نیوز آن لائن)وزیر ہاﺅسنگ و اربن ڈویلپمنٹ پنجاب میاں محمود الرشید نے کہا ہے کہ صوبے میں نیا پاکستان ہاﺅسنگ سکیم میں نجی شعبے کی شمولیت یقینی بنانے اور گھروں کی تیزی سے تعمیر کے لئے پبلک پرائیویٹ پارٹنر شپ اتھارٹی قائم کی جائے گی۔

وزیر اعظم عمران خان کے وژن کے مطابق نیا پاکستان ہاﺅسنگ سکیم میں پرائیویٹ سیکٹر کی بھرپور شمولیت کے لئے موثر اقدامات کئے جا رہے ہیں۔ ایک محکمانہ اجلاس سے خطاب کرتے ہوئے انہوں نے کہا کہ بلڈرز اور ڈویلپرز کو ریلیف کی فراہمی کے لئے ایل ڈی اے، پنجاب ہاﺅسنگ اینڈ ٹاﺅن پلاننگ ایجنسی اور دیگر متعلقہ اداروں کے بائی لاز میں ترامیم کی جا رہی ہیں۔

(ایمرا نیوز آن لائن) وائس چئیرمین ایل ڈی اے ایس ایم عمران کی زیر صدارت گورننگ باڈی کا اجلاس، ایل ڈی اے ملازمین کو یوٹیلیٹی الاؤنس دینے اور ایل ڈی اے میں ہفتہ اتوار چھٹی کا ایجنڈا مسترد کردیا گیا۔

ایل ڈی اے آفس جوہر ٹاؤن میں منعقدہ اجلاس میں وائس چئیرمین واسا شیخ امتیاز محمود، سیکرٹری ہاؤسنگ ڈاکٹر ظفر نصراللہ، کمشنر لاہور ڈاکٹر محمد مجتبی پراچہ، ڈی جی ایل ڈی اے آمنہ عمران خان، ایم ڈی واسا سید زاہد عزیز، میجر (ر) برہان احمد، انجینئر عامر قریشی، ایڈیشنل ڈی جی ہیڈ کوارٹر فارقلیط میر اور چیف انجینئر مظہر حسین خان سمیت دیگر ممبران شریک ہوئے۔

اجلاس میں 10 نکاتی ایجنڈا منظوری کیلئے پیش کیا گیا، گورننگ باڈی کے گزشتہ فیصلوں کی توثیق کی گئی۔ ایم ڈی واسا کی تقرری کے لئے طریقہ کار میں ترمیم کا ایجنڈا پیش کیا گیا جس پر اتھارٹی نے حکومت پنجاب کی منظوری اور رائے لینے کی ہدایت کی۔ واسا میں نان پی ای سی ممبرز انجینئرز کو ایکسیئن کے عہدے پر ترقی نہ دینے کا ایجنڈا بھی ریگولیشن ونگ کی مشاورت سے مشروط کردیا گیا۔

ایل ڈی اے کے افسران و ملازمین کو یوٹیلٹی الاؤنس دینے کا ایجنڈا پیش کیا گیا جسے مسترد کردیا گیا اور ایچ آر کمیٹی میں مزید رائے کیلئے بھجوانے کا فیصلہ کیا گیا۔ اس کے علاوہ ایل ڈی اے ملازمین کو 10 ہزار عید الاؤنس دینے کی بجائے 7 ہزار دینے کا فیصلہ کیا گیا۔

لاہور(ایمرا نیوز آن لائن)
ایل ڈی اے کا شادمان میں سرکاری اراضی واگزار کرانے کیلئے آپریشن، قائم غیرقانونی تعمیرات مسمار کر دی گئیں ہیں۔ دریں اثنا قابضین کی جانب سے مزاحمت بھی کی گئی ہے۔ تھانہ شادمان میں اندارج مقدمہ کی درخواست دائر۔ آپریشن ایل ڈی اے کے شعبہ سٹیٹ مینجمنٹ نے کیا ہے۔

اسلام آباد(ایمرا نیوز آن لائن )
عدالت عظمٰی نے نوشہرہ میں ریلوے کی زمین تجارتی مقاصد کے لئے لیز پر دینے سے متعلق کیس کی سماعت کرتے ہوئے آبزرویشن دی ہے کہ ریلوے کی زمین فیڈریشن کی ملکیت ہے اور ریلوے اس کے استعمال میں من مانی نہیں کرسکتا ۔ جسٹس شیخ عظمت سعید کی سربراہی میں تین رکنی بینچ نے سماعت کا آغاز کیا۔جسٹس فیصل عرب نے کہاکہ

ریلوے کو سرکاری زمین استعمال کے لیے دی گئی ہے جبکہ جسٹس عظمت سعید نے کہاکہ ریلوے کی زمین فیڈریشن کی ملکیت ہے ۔جسٹس اعجازالاحسن کا کہنا تھا کہ ریلوے اپنی زمین کمرشل استعمال کے لیے لیز آوٹ نہیں کر سکتاریلوے زمین کو لیز پر دینے کے لیے صدر پاکستان کی اجازت ضروری ہے ۔علاو ہ ازیں جسٹس گلزا ر احمد کی سربراہی میں تین رکنی بینچ نے قادر پور ملتان میں عمارہ نامی خاتون کی زمین پر قبضہ کے چار ملزمان منور حسین،مظہر حسین،طاہر حسین اور شاہد مظہر کی ضمانت قبل

گرفتاری درخواست پر سماعت کی ۔دوران سماعت جسٹس گلزار احمد کا کہنا تھا کہ ملک میں کیا حالات آگئے ،خاتون کے گھر میں گھس کر توڑ پھوڑ کی اور قبضہ کیا،قانون نام کی کوئی چیز ہے یا نہیں؟ زمین کی نشاندہی کرنے کا کمشنر کا اختیار کہاں سے آ گیا ؟ یہ تو دیوانی معاملہ ہے ۔قبضوں کا سدباب ہونا چاہئے ۔عدالت نے ملزمان کی درخواست قبل از ضمانت گرفتاری مسترد کردی ،جس پر پولیس نے ملزمان کو احاطہ عدالت سے گرفتار کرکے تھانہ سیکرٹریٹ منتقل کردیا۔ائوسنگ فائونڈیشن سے متعلق کیس میں روزانہ

کی بنیاد پر جاری سماعت کے دوران ریمارکس دیتے ہوئے جسٹس اعجاز الاحسن نے کہا ہے کہ سی ڈی اے قوانین کے مطابق پرائیویٹ پارٹی اور لوکل باڈی بھی سکیمیں بنا سکتی ہیں سی ڈی اے وہ زمین بھی ایکوائر کر سکتا ہے جو ہائوسنگ فائونڈیشن نے لی ہے ۔