Tag ایمرا نیوز

اسلام آباد (ویب ڈیسک)ذرائع کے مطابق وزیراعظم عمران خان نے چیئرمین نیب کی تقرری کے حوالے سے اپوزیشن لیڈر سے مشاورت سے انکار کردیا ہے۔چیئرمین نیب کی مدت میں توسیع کے لیے وفاقی کابینہ نے نیب آرڈیننس سرکولیشن کے ذریعے منظوری دے دی ہے.ذرائع کا کہنا ہے کہ وزیراعظم نے وفاقی وزیر فواد چوہدری اور فروغ نسیم پراپنا موقف واضح کیا ہے کہ وہ چیئرمین نیب کی تقرری کے حوالے سے اپوزیشن لیڈر سے مشاورت نہیں کریں گے اور نہ ہی ایسا کوئی ارادہ ہے.

گوجرانوالہ (ویب ڈیسک)ایک اور صنف نازک درندگی کا نشانہ بن گئی.تفصیلات کے مطابق تھانہ فیروز والہ کے علاقے میں نئی نویلی دلہن کو مبینہ طور پر زیادتی کا نشانہ بنا گیا۔پولیس کا کہنا ہے کہ ملزم نے لڑکی کو بلیک میل کرکے گھر سے باہر بلایا اور اسے زیادتی کا نشانہ بنا کر فرار ہو گیا۔ایف آئی آر کے متن کے مطابق ملزم مصور پہلے بھی متاثرہ لڑکی کو بلیک میل کرتا تھا اس کے علاوہ اس سے طلائی زیورات اور 20 ہزار نقدی بھی لوٹ لیا۔ پولیس نے متاثرہ لڑکی کے والد کی مدعیت میں مقدمہ درج کر دیا۔

حسن نثار کے قلم سے ……
یوں تو پوری زندگی پر شور، ہنگامہ خیز، دلچسپ، ایڈونچرس اور خوب صورت لوگوں سے بھرپور رہی لیکن یونیورسٹی کے دن دل و دماغ پر نقش ہو کر رہ گئے۔ جب بطور انڈر گریجویٹ آنرز میں داخلہ لیا تو عمر سولہ سال سے کچھ اوپر تھی۔ اللہ بخشے والد، حفیظ خان کو اور مجھے اپنی نیلے رنگ کی خوبصورت ’’برلینا‘‘ میں ہاسٹل چھوڑنے آئے جس کا نمبر حفیظ خان نے برسوں بعد اپنے مقبول انگریزی کالم کے ذریعے مجھے یاد دلایا۔’’ایل آر 16‘‘۔

تب لائل پور کا نام چوری نہیں ہوا تھا۔ عجب اتفاق کہ 16 پلس کے دو لڑکے اور گاڑی کا نمبر بھی 16۔ حفیظ خان تب بھی 6 فٹ کا وجیہہ نوجوان اور میں ساڑھے 5 فٹ کا۔ چند روز ہم دونوں نے ایک ہی کمرہ شیئر کیا تو تاثر یہ ابھرا کہ میں حفیظ خان کا چھوٹا بھائی ہوں جو اسے سیٹل کرکے واپس چلا جائے گا لیکن جب میں کمرہ نمبر 104 میں سیٹل ہوا تو سب جان گئے کہ میں بھی ’’معزز‘‘انڈر گریجویٹ ہوں۔

شروع حفیظ خان سے ہی کرتے ہیں جو بعد ازاں ’’ڈمپل خان‘‘ کے نام سے مقبول ہو کر، جہانگیر بدر یعنی ’’جے بی‘‘ کو شکست دے کر سٹوڈنٹس یونین کا صدر منتخب ہوا اور جاوید ہاشمی سیکرٹری بن گیا۔ آج ان دوستوں کو ان کے ’’نک نیمز‘‘ سے یاد کرنے کو جی چاہتا ہے۔

دن جو پکھیرو ہوتے پنجرے میں میں رکھ لیتا

یا پھر یوں سہی . . . . . . .

اجالے اپنی یادوں کے ہمارے ساتھ رہنے دو

نہ جانے کس گلی میں زندگی کی شام ہو جائے

چند ہفتوں میں زندگی بھر کے بندھن بندھ گئے۔ ایسے رشتے جنہیں موت بھی نہیں توڑ سکتی ورنہ میں آج انہیں اس طرح یاد نہ کر رہا ہوتا۔

اک یاد ہے کہ دامنِ دل چھوڑتی نہیں

ایک بیل ہے جو لپٹی ہوئی ہے شجر کے ساتھ

6 فٹ 2 انچ کا سرخ و سفید یوسف زمان شنواری یاد آتا ہے جو بچوں کی طرح سادہ اور معصوم تھا۔ جوانی میں رخصت ہوگیا۔ ہم سب اسے پیار سے ’’ڈِگلو‘‘کہتے تھے اور کیوں؟ مجھے آج تک معلوم نہیں۔ آج بھی اسے ’’ڈگلو‘‘ کہہ کر ہی یاد کرتے ہیں۔ سردار رجب علی پتافی کو چلتا دیکھ کر نجانے سب کو ’’فوکر‘‘ کیوں یاد آتا تھا سو یہ نام ہٹ ہوگیا۔ اس کا دیا ہوا سو سال سے بھی پرانا ایک مشکیزہ آج بھی میرے پاس محفوظ ہے۔

وہ ’’بیلی پور‘‘ آتا تو میں کئی کئی روز زبردستی اسے روکے رکھتا لیکن جب اسے روکنا ضروری تھا، میں کچھ بھی نہ کرسکا اور وہ پھولوں میں لدا رخصت ہوگیا۔ وہ میرے بچوں کو میری محمدہ، میرا حاتم، میرا ہاشم کہہ کر بلایا کرتا تھا۔ جاوید قریشی سیشن جج ریٹائر ہوا لیکن آج بھی جاوید ’’ککڑ‘‘ ہے۔ ککڑ کی ایسی آواز نکالتا کہ ککڑیاں اپ سیٹ ہو جاتیں اور تقریب درہم برہم۔ ’’نگر‘‘ کےپرنس برکت کے دو نام تھے۔

برکت سے بکو یا پرنس پیرٹ کیونکہ سرخ چہرہ پر طوطا ناک نمایاں تھی۔ زیارتوں پر گیا اور پھر کبھی اس کی زیارت نصیب نہ ہوئی۔ جمیل اختر بہت پڑھاکو لیکن پائوں باہر نکال کر چلنے کی وجہ سے ’’پھاتاں‘‘ مشہور ہوگیا جبکہ اعجاز کو اعجاز بائی گاڈ اس لئے کہتے کہ ’’بائی گاڈ‘‘ اس کا تکیہ کلام تھا اور ہائے ہم سب کا مسعود داڑھو،جتنا ہینڈ سم اتنا ہی سریلا۔ آج بھی میں اس کی یاد میںا س کا فیورٹ گیت گنگناتا ہوں ’’تم بھلائے نہ گئے ہائے بھلائے نہ گئے‘‘۔

افتخار فیروز کو کیسے بھلائیں جو شروع سے ہی ’’ڈھلی‘‘ مشہور تھا کیونکہ اس کے اٹھنے بیٹھنے، چلنے پھرنے، بولنے، پہننے میں اک ناقابل بیان قسم کا ’’ڈھیلا پن‘‘ تھا جو اس پر جچتا بھی بہت تھا۔ اور یاد آیا شیر قادر بلوچ، اک نامور جیالوسٹ جسے ’’شکاری‘‘ اس لئے کہتے کہ چھوٹے سے چھوٹے روشندان سے گزر کر کچھ بھی اڑا لے جاتا لیکن یہ چوریاں اتنی بے ضرر اور معصوم ہوتیں کہ لٹنے والا بھی لوٹ پوٹ ہو جاتا۔ دو بنگالی یاد آئے ایک عبدالعلی جسے اس کے اسٹائل کی وجہ سے ’’گیری کوپر‘‘ کہا جاتا اور دوسرا بابل جو بہت ہی مختصر ہونے کی وجہ سے ’’پستہ‘‘ کہلاتا۔ اللہ نے اسے جسم چھوٹا لیکن دماغ بڑا دیا۔ سقوط ڈھاکہ کے بعد یہ پھر کبھی دکھائی سنائی نہ دیئے لیکن بھولتے نہیں۔

تم بھول گئے ہم کو، ہم تم کو نہیں بھولے

نامور سکن سپیشلسٹ ضیا الدین کو ہم ڈاکٹر ژواگو کہتے۔ والد سینئر فوجی افسر تھے۔ کنگ ایڈورڈ میں داخلہ نہ ملا تو والد نے کہا ’’ایم بی بی ایس‘‘ تو صرف KE میں ورنہ کچھ اور کرو‘‘۔ اس نے جیالوجی میں داخلہ لے لیا۔ دو سال بعد KE کا میرٹ گرا۔ ژواگو بھاگ نکلا۔ اللہ سدا سلامت رکھے۔ یوسف ہونڈا کی وجہ شہرت اس کی موٹر سائیکل اور ترکیب استعمال تھی۔

آج کل بیمار ہے، اللہ اسے صحت کاملہ عطا فرمائے۔ اور اب چلتے ہیں جاوید گتہ کی طرف جو جیالوجی ڈیپارٹمنٹ کے سربراہ شمس صاحب کا فرزند ارجمند ہے۔ ن،م راشد صاحب کا بیٹا شہر یار راشد امریکہ سے آیا، کوالیفائیڈ مارشل آرٹسٹ تھا اور ہم سب کا دوست جس نے شغلاً ہمیں جوڈو کراٹے سکھانے کی دعوت دی۔ صلو درانی اور میں تو بھاگ گئے لیکن جاوید ڈٹ گیا۔ انتہائی ٹف اور ڈینٹ پروف ثابت ہوا تو خلق خدا نے گتہ کا خطاب دیا جس پر کسی چوٹ، ضرب کا اثر نہ ہوتا۔ شیری فارن سروس میں گیا اور پھر بھری جوانی میں رخصت ہوگیا۔

شیری کو سب ’’ماسٹر‘‘ کہتے تھے۔ خالد ہٹلر، ہٹلر اس لئے تھا کہ ہاسٹل میں پلاسٹر آف پیرس سے ہٹلر کے مجسمے بنایا کرتا تھا، حفیظ خان کے ساتھ کینیڈا میں ہوتا ہے۔ اعجاز نقوی ’’ہیرو‘‘ مشہور تھا۔ نہر کنارے اک لڑکی کے قدموں میں ’’تاج محل‘‘ کا چھوٹا سا رپلیکا رکھا۔ اس سنگدل نے ٹھوکر ماری اور ’’ہیرو‘‘ کا پلاسٹک سے بنا ’’تاج محل‘‘ چکنا چور ہوگیا اور آج تک فیصلہ نہ ہو سکا کہ دل کے ٹکڑے زیادہ تھے کہ تاج محل کے۔

جمیل ڈوگی، ڈوگی اس لئے مشہور ہوا کہ سبز آنکھوں والی اک لڑکی جس کی ماں جرمن تھی، اسے ’’بلی بلی‘‘ کہتا تو دوستوں نے ’’بلی‘‘ کے مقابل اسے ’’ڈوگی ڈوگی‘‘ کہنا شروع کردیا جس پر جمیل کو کوئی اعتراض نہ تھا۔ سگِ لیلیٰ تو سگِ لیلیٰ ہی ہوتا ہے۔ صبح کے 4 بجے ہیں، سناٹا بول رہا ہے۔ میں لکھ رہا ہوں لیکن کیا اور کیوں لکھ رہا ہوں؟

تمہاری یاد کے جب زخم بھرنے لگتے ہیں

کسی بہانے تمہیں یاد کرنے لگتے ہیں

دن تو کسی نہ کسی طرح گزر ہی جاتا ہے، یہ رات کیوں آتی ہے جو تاروں بھری نہیں… یادوں بھری ہوتی ہے۔
بشکریہ جیو نیوز

آسٹریلیا (ویب ڈیسک)سابق آسٹریلوی کرکٹرمائیکل سلیٹرکومیچ کےکمنٹری پینل سےنکال دیاگیا ہے۔میڈیا رپورٹس کے مطابق ایک نجی چینل نے مائیکل سلیٹر کا کانٹریکٹ رینیو نہ کرنے کا فیصلہ کیا ہے جس کے بعد وہ ٹی وی کے کمنٹری پینل سے آئوٹ ہوگئے ہیں۔ بتایا گیا ہےکہ مائیکل سلیٹر نے کورونا سے متعلق پابندیوں پر آسٹریلوی وزیراعظم اسکاٹ موریسن کوتنقید کا نشانپ بنایاتھا جس کے باعث انہیں پینل سے نکالا گیا ہے۔انہوں نے مئی میں آسٹریلوی حکومت کی طرف سے بھارت سے آسٹریلوی شہریوں کی وطن واپسی پر پابندی کے فیصلے پر شدید تنقید کی تھی.نجی چینل کی انتظامیہ کا کہنا ہے کہ سلیٹر کا کانٹریکٹ رینیو نہ کرنے کی وجہ ادارے کا بجٹ اور بزنس کے معاملات بتائے گئے ہیں۔

کراچی (ویب ڈیسک)بینک صارفین کی جانب سے بینکوں کی خدمات سے متعلق شکایات میں اضافہ ہو رہا ہے.تفصیلات کے مطابق ڈیجیٹل ادائیگیوں، ای کامرس اور آن لائن بینکاری کی سہولت کے استعمال کے ساتھ بینک صارفین کی بینکوں کی خدمات کے حوالےسے شکایات میں تیزی آتی جا رہی ہے.
بینکنگ محتسب کو جنوری تا دسمبر 2020کے دوران بینکوں سے متعلق صارفین کی 24750شکایات موصول ہوئیں تاہم رواں سال پہلے 9 ماہ میں ہی شکایتوں کی تعداد 27500تک پہنچ چکی ہے۔ بینکوں کی خدمات سے متعلق صارفین کی 40فیصد کے لگ بھگ شکایات کا تعلق اے ٹی ایمز، الیکٹرانک فنڈ ٹرانسفر اور ای کامرس سے متعلق ہیں۔رواں سال کے پہلے 9 ماہ کے دوران بینکنگ محتسب نے صارفین کی بینکوں سے متعلق شکایات کی شنوائی کرتے ہوئے صارفین کو بینکوں سے 47کروڑ روپے کا ریلیف دلوایا جبکہ گزشتہ سال کے 12 مہینوں میں صارفین کو 58کروڑ روپے کا ریلیف دلوایا گیا تھا۔

لاہور (ویب ڈیسک)اداکارہ صبا قمر اور بلال سعید کے خلاف مسجد میں رقص کیس میں اہم پیش رفت ہوئی ہے.مسجد وزیر خان میں شوٹنگ اور ویڈیو بنانے کے معاملے پر اداکارہ صبا قمر اور بلال سعید پر فرد جرم عائد کے لیے تاریخ مقرر کردی گئی ہے۔لاہور کے ضلع کچہری میں جوڈیشل مجسٹریٹ نے کیس پر سماعت کی۔
عدالت میں اداکارہ صبا قمر اور بلال سعید نے اپنے وکیل بیرسٹر حامد لغاری کے ہمراہ حاضری مکمل کرائی۔ اس موقع پر اداکارہ صبا قمر برقع پہنے عدالت میں پیش ہوئیں ۔ پراسیکیوٹر کی جانب سے عدالت میں چالان جمع کرایا گیا۔ عدالت نے آئندہ سماعت پر ملزمان کو چالان کی نقول فراہم کرنے کا حکم دیتے ہوئے کیس کی سماعت 14 اکتوبر تک ملتوی کردی۔

کابل (ویب ڈیسک) برطانیہ کے خصوصی ایلچی سائمن گاس نے امارت اسلامیہ افغانستان کے نائب وزیر اعظم ملا عبدالغنی برادر سے ملاقات کی.اس اہم ملاقات میں سائمن گاس نے انسانی بحران سے نمٹنے کے لیے افغانستان کومالی امداد کی پیشکش کی۔ اس ملاقات کے موقع پر نائب وزیراعظم عبدالسلام حنفی اور وزیر خارجہ امیر اللہ متقی بھی موجود تھے علاوہ ازیں ملاقات کے دوران مالی امداد کی تقسیم اور ترسیل سے متعلق تبادلہ خیال کیا گیا اور ملک کو شدت پسند عسکریت پسندوں کی آماجگاہ نہ بننے دینے کی یقین دہانی کو سراہا۔
برطانوی ایلچی نے ملاقات کے دوران طالبان قیادت سے درخواست کی کہ جو لوگ ملک چھوڑنا چاہتے ہیں انھیں محفوظ راستے فراہم کیے جائیں علاوہ ازیں اقلیتوں اور خواتین کے حقوق کی فراہمی کو بھی یقینی بنایا جائے۔

کراچی (ویب ڈیسک) معروف کامیڈین عمرشریف مرحوم کا جسد خاکی کراچی ایئرپورٹ پر پہنچ گیا ہے .ان کی بیوہ زرین غزل بھی جرمنی سے پاکستان پہنچ گئی ہیں ان کےقونصل جنرل امجدعلی بھی آئے ہیں۔جسد خاکی کو ترکش ائیرلائن کی پرواز ٹی کے708سے لایا گیا ہے، عمر شریف کی میت کو انٹر نیشنل کارگو ٹرمینل منتقل ضابطےکی کارروائی کی گئی۔کارگو ٹرمینل پر سی اے اے کسٹمز اور ایئر لائن افسران بھی موجود رہے اور عمرشریف کے جسد خاکی کی کلیئرنس کے لیے فوری اقدامات کیے جس کے بعدان کا جسدخاکی صاحبزادوں جوادعمر اور فواد عمر کے حوالے کردیا گیا۔بعد ازاں عمرشریف کا جسدخاکی قومی پرچم میں لپیٹ کرایدھی سرد خانے منتقل کیا گیا، ایئر پورٹ سے روانگی کے وقت عمر شریف کی میت لے جانے والی اینبولینس پر پھولوں کی پتیاں نچھاور کی گئیں۔ مرحوم کی نماز جنازہ آج سہہ پہر3 بجے عمر شریف پارک کلفٹن میں ادا کی جائے گی جبکہ نماز جنازہ مولانا بشیر فاروقی پڑھائیں گے۔

ممبئی (ویب ڈیسک) بالی ووڈ کنگ شاہ رخ خان نے لوگوں سے اپیل کی ہے کہ وہ ان کے گھر نہ آئیں .تفصیلات کے مطابق شاہ رخ آریان خان کی گرفتاری کے بعد بالی ووڈ فنکاروں سے اپنے گھر ’منت‘ نہ آنے کی درخواست کی ہے۔آریان کی گرفتاری کے بعد بالی ووڈ کے سلو میاں سلمان خان سب سے پہلے شاہ رخ کے گھر پہنچے. بعد ازاں ان کی بہن الویرا خان، سیما خان، ماہیپ کپور، اداکارہ نیلم کوٹھاری سمیت متعدد بالی ووڈ شخصیات کو شاہ رخ خان کے بنگلے کے باہر دیکھا گیا۔
جو لوگ ان کے گھر نہیں پہنچ سکے انہوں نے سوشل میڈیا کے ذریعے شاہ رخ خان کی سپورٹ کی جن میں سنیل شیٹھی، پوجا بھٹ، اداکارہ سوچیترا کرشنا مورتی اورمیکا سنگھ وغیرہ شامل ہیں۔ تاہم اب رپورٹس سامنے آئی ہیں کہ شاہ رخ خان نے اپنے دوستوں سے ان کے گھر نہ آنے کی درخواست کی ہے۔
رپورٹس کے مطابق معاملے کی سنگینی کو دیکھتے ہوئے اور سیکیورٹی خدشات کے پیش نظر شاہ رخ خان اور ان کی ٹیم نے تمام اداکاروں اور دوستوں سے درخواست کی ہے کہ وہ ان کے گھر نہ جائیں۔

اسلام آباد (ویب ڈیسک) نیشنل لائسنسنگ امتحانات کے خلاف ڈاکٹروں نے احتجاج کیا .تفصیلات کے مطابق نیشنل لائسنسنگ امتحانات کے خلاف ڈاکٹروں کی جانب سے احتجاج کے دوران وفاقی دارالحکومت کا مرکز میدان جنگ بن گیا۔ملک کے مختلف حصوں سے آئے ڈاکٹروں نے نیشنل لائسنسنگ امتحانات کے خلاف اسلام آباد کے جی نائن مرکز پر واقع پی ایم سی کے دفتر کے باہر احتجاج کیا۔ انہوں نے این ایل ای امتحان اور پی ایم سی کے صدر کے خلاف شدید نعرے بازی بھی کی ۔ ڈاکٹرز کا کہنا تھا کہ ایم بی بی ایس کرنے کے بعد این ایل ای کا امتحان ظلم ہے لہٰذا حکومت یہ فیصلہ واپس لے۔ ان کے مطالبات منظور نہ ہوئے تو پاکستان میڈیکل کمیشن کی عمارت کی تالہ بندی کی جائے گی۔
احتجاج کے دوران ڈاکٹرز پی ایم سی کی عمارت کے احاطے میں داخل ہوئے اور عمارت پر پتھراؤ کیاجس کے بعد پولیس نے مظاہرین کو روکنے کی کوشش کی جس کے باعث اسی دوران ینگ ڈاکٹرز اور پولیس کے درمیان ہاتھا پائی ہوئی، پولیس نے مظاہرین کو منتشر کرنے کے لیے آنسو گیس کی شیلنگ کی اور لاٹھی چارج کردیا۔ پولیس نے 15 سے زائد ڈاکٹروں کو گرفتار بھی کرلیا ہے۔