Category کالم

مہمان کالم
آپ اورنج لائین ٹرین کی مثال لے لیجئے‘ پنجاب حکومت نے چین کی مدد سے 25 اکتوبر 2015ءکو لاہور میں یہ منصوبہ شروع کیا‘ یہ 27 کلو میٹر لمبی ٹرین سروس تھی‘ یہ سروس 25 کلو میٹر پلوں کے ذریعے زمین سے اوپر چلنی تھی اور یہ تقریباً پونے دو کلو میٹر زیر زمین ٹنلز میں بننی تھی‘ منصوبے کی لاگت 164 ارب روپے تھی‘ یہ منصوبہ شروع ہوا‘ سول سوسائٹی سامنے آئی‘ احتجاج ہوا‘ مظاہرین لاہور ہائی کورٹ گئے اور ہائی کورٹنے 28 جنوری 2016ءکو پنجاب حکومت کے خلاف سٹے آرڈر جاری کر دیا‘ ہائی کورٹ نے حکم دیا حکومت تاریخی عمارتوں سے دو سو فٹ کی حدود میں کام بند کر دے‘ عدالت کے حکم کے بعد شالا مار باغ‘ گلابی باغ‘ بدو کا آوا‘ چوبرجی‘ زیب النساءکا مقبرہ‘ لکشمی بلڈنگ‘ جی پی او‘ ایوان اوقاف‘ سپریم کورٹ رجسٹری بلڈنگ‘ سینٹ اینڈریو چرچ اور موج دریار دربار پر کام بند ہو گیا تاہم حکومت سٹے سے قبل ان تمام مقامات پر کھدائیاں شروع کر چکی تھی‘ سڑکیں توڑی جا چکی تھیں‘ ستون کھڑے کئے جا چکے تھے اور ٹنلز کےلئے زمین میں سوراخ ہو چکے تھے‘ عدالتی حکم کے بعد یہ کام رک گیا‘ مقدمہ چلنے لگا‘ ہائی کورٹ نے 19 اگست 2016ءکو پنجاب حکومت کے خلاف حتمی فیصلہ بھی دے دیا‘ حکومت نے 13 اکتوبر 2016ءکو ہائی کورٹ کا فیصلہ سپریم کورٹ میں چیلنج کر دیا‘ سپریم کورٹ نے پانچ رکنی بینچ بنایا‘ سماعتیں شروع ہوئیں‘ وکیل آتے اور جاتے رہے اور دلائل دیے اور لئے جاتے رہے یہاں تک کہ سپریم کورٹ نے 17 اپریل 2017ءکو فیصلہ محفوظ کر دیا‘ یہ فیصلہ 8 دسمبر 2017ءتک محفوظ رہا‘ سپریم کورٹ نے 8 دسمبر کو پنجاب حکومت کو اورنج ٹرین لائین ٹرین مکمل کرنے کی اجازت دے دی تاہم ٹرین چلنے کے بعد تھرتھراہٹ چیک کرنے کےلئے کمیٹی بنا دی گئی یوں انصاف کا یہ عمل 22 ماہ جاری رہا‘ ان 22 ماہ میں منصوبے کی کاسٹ 164 ارب روپے سے 260 ارب تک ہو گئی‘ وہہزاروں لوگ جن کے گھروں اور دکانوں کے راستے کھدے ہوئے تھے‘ وہ 22 ماہ تک ذلیل ہوتے رہے‘ لوگوں کے اربوں روپے کے کاروبار تباہ ہوگئے‘ سینکڑوں چھوٹے بڑے حادثے ہوئے اور ان حادثوں میں بے شمار لوگ جان سے گزر گئے‘ لاہور شہر میں 22 ماہ پولوشن بھی پھیلتا رہا‘ یہ پولوشن بھی ہزاروں لوگوں کو بیمار کر گیا‘ یہ منصوبہ 2017ءمیں مکمل ہونا تھا‘ یہ اب 2018ءتک چلا جائے.
گا‘ ریاست کو اس تاخیر کی کاسٹ بھی برداشت کرنا پڑے گی ‘ سپریم کورٹ نے 17 اپریل کو فیصلہ محفوظ کیا تھا‘یہ فیصلہ سات ماہ محفوظ رہا‘ ان سات ماہ کے دوران حکومت کا دو کروڑ روپے روزانہ نقصان ہوتا رہااور حکومت چینی کمپنیوں کو اس نقصان کے علاوہ دس ارب روپے اضافی بھی ادا کرے گی۔میں ادب کے ساتھ یہ پوچھنا چاہتا ہوں اس تاخیر‘ اس نقصان کا ذمہ دار کون ہے؟ کیا یہ عوامی منصوبہ نہیں تھا؟ کیا یہ رقم غریب عوام کی امانت نہیں تھی اور کیا پاکستان دنیا کا پہلا ملک تھا جس میں اس نوعیت کا منصوبہ شروع ہوا؟ دنیا کے پچاس ملکوں کے 148 شہروں میں زیر زمین ٹرینیں چلتی ہیں‘ٹرینوں کے ٹریک دو دو سو فٹ زمین کے نیچے بچھے ہیں‘ زمین کے اوپر پورے کے پورے شہر آباد ہیں اور نیچے ٹرینیں چل رہی ہیں‘ یہ ٹریک آج سے سو سال پہلے اس وقت بنائے گئے جب ٹیکنالوجی ننگے پاﺅں چل رہی تھی‘ لندن میں 1863ءمیں زیر زمین ریلوے سسٹم بنایا گیا اور یہ پیرس میں 1900ءمیں بنا‘ یہ دونوں شہر لاہور سے قدیم بھی ہیں اور یہ ہمارے مقابلے میں ہزار گناہ زیادہ ”ثقافتی اثاثے“ بھی ہیں لیکن وہاں کوئی سٹے آرڈر جاری ہوااور نہ ہی یہ منصوبے 22 ماہ تک لٹکے رہے‘لاہور میں چند سٹیشنوں کا ایشو تھا‘ ٹیکنالوجی ماضی کے مقابلے میں ہزار گناہ بہتر تھی‘ لندن اور پیرس کی ٹرینیں نوے فیصد زمین کے اندر چلتی ہیں‘ لاہور کی اورنج لائین ٹرین کا نوے فیصد حصہ زمین سے اوپر تھا لیکن ہم نے ان حقائق کے باوجود یہ منصوبہ 22 ماہ روکے رکھا‘ کیوں؟ ہم چند لمحوں کےلئے یہ کیوں بھی سائیڈ پر رکھ دیتے ہیں اور ہم یہ فرض کر لیتے ہیں اورنج لائین ٹرین منصوبے میں عدالتوں کا اطمینان ضروری تھا لیکن یہاں سوال پیدا ہوتا ہے جو فیصلہ 22 ماہ میں ہوا کیا وہ دو ماہ میں ممکن نہیں تھا؟ہم نے سات ماہ تک فیصلہ کیوں محفوظ رکھا؟ یہ فیصلہ اگر اپریل میں آ جاتا تو کیا حرج تھا؟ اس تاخیر کا کس کو فائدہ ہوا اور کس کو نقصان ہوا؟ میں دل سے سمجھتا ہوں ہمارے سیاسی اور عسکری نظام کی طرح ہمارے عدالتی نظام کو بھی اصلاح کی ضرورت ہے‘ ریاست کو بہرحال ترقیاتی منصوبوں اور عوامی فلاح کے پراجیکٹس کو عام عدالتی نظام سے الگ کرنا ہو گا‘ ہمیں اس کےلئے الگ ٹریبونل بھی بنانا ہوگا‘ ٹریبونل سے سٹے آرڈر کا استحقاق بھی لینا ہوگا اور ٹریبونل کو فیصلوں کےلئے ٹائم فریم کا پابند بھی کرنا ہوگا ورنہ یہ سسٹم اور یہ ملک نہیں چل سکے گا۔آپ کو یاد ہوگا جسٹس افتخار محمد چودھری نے2006ءمیں سٹیل مل پر سوموٹو نوٹس لے لیا تھا‘ شوکت عزیز حکومت21 ارب68 کروڑ روپے میں سٹیل مل فروخت کرنا چاہتی تھی‘ سودے میں زمین اور دوسری تنصیبات شامل نہیں تھیں‘ سپریم کورٹ نے سودا منسوخ کرا دیا‘ ریاست اب تک سٹیل مل پر 164 ارب روپے خرچ کر چکی ہے لیکن سٹیل مل اس کے باوجود چل نہیں رہی‘ مل کے قرضے بھی بڑھتے چلے جا رہے ہیں‘یہ مل اگر 2006ءمیں فروخت ہو جاتی تو کم از کم 164 ارب روپے تو بچ جاتے‘آپ دیکھ لیجئے گا ہم یہ مل بھی ضرور فروخت کریں گے لیکن ہم اس وقت تک اس پر 500 ارب روپے خرچ کر چکے ہوں گے‘ ہمیں اس کا ایک دھیلا بھی نہیں ملے گا‘ ہم اسے کباڑیوں کے ہاتھوں بیچیں گے اور کباڑ اٹھانے والوں کو معاوضہ بھی دیں گے‘ آپ اسی طرح ریکوڈک کی مثال بھی لے لیجئے‘ افتخار محمد چودھری نے یہ منصوبہ 7 جنوری 2013ءمیں رکوا دیا‘ ریاست اب تک اس پر 250 ارب روپے خرچ کر چکی ہے لیکن ہم ابھی تک سونے کے ان ذخائر تک نہیں پہنچے جنہوں نے قوم کا مقدر بدلنا تھا‘ہم نے اسی طرح 2012ءمیں عدالتی حکم پر ترکی کے رینٹل پاور پلانٹ ”کارکے“ کا معاہدہ منسوخ کر دیا‘ کارکے عالمی عدالت انصاف میں چلی گئی‘ عالمی عدالت نے پاکستان کو 830 ملین ڈالر کا جرمانہ ٹھونک دیا‘ اب یہ نوے ارب روپے کون ادا کرے گا؟ اور کراچی میں اب عدالتی حکم پر عمارتیں گرائی جا رہی ہیں‘ یہ عمارتیں کن کی ملکیت ہیں اور اس کا نقصان کس کو ہوگا؟ آپ یقین کیجئے سینکڑوں لوگ ایک عدالتی فیصلے پر ایک رات میں فٹ پاتھ پر آگئے۔یہ درست ہے کراچی میں پانی کا شدید بحران ہے لیکن یہ بحران پورے عرب امارات‘ پورے یونان‘ پورے لیبیا اور پورے جاپان میں ہے لیکن کیا وہاں عمارتیں گرائی جا رہی ہیں؟ ایمسٹرڈیم شہر کا ایک تہائی حصہ سمندر پر بنا ہے‘ یہ فلوٹنگ ہے لیکن وہاں عمارتیں بنانے پر کوئی پابندی نہیں‘ کیوں؟ میری سپریم کورٹ سے درخواست ہے آپ عمارتیں گرانے یا ہاﺅسنگ سکیموں پر پابندی لگانے کی بجائے تمام ڈویلپرز کو حکم دیں یہ سکیم بنانے سے پہلے سمندر کے کھارے پانی کو استعمال کے قابل بنانے کے پلانٹ لگائیں اور یہ ہر فلیٹ‘ ہر گھر میں واش روم اور واش بیسن کی لائنیں بھی الگ الگ لگائیں ‘یہ مسئلہ ہمیشہ ہمیشہ کےلئے حل ہو جائے گا‘ آپ عمارتوں کو گرانے اور تعمیر پر پابندی کے بجائے اسی طرح ہاﺅسنگ سکیموں کے مالکان اور حکومت کو سمندری پانی کو استعمال کے قابل بنانے کا حکم بھی دیں‘ ہمیں بیرونی سرمایہ کاری‘ انٹرنیشنل کمپنیوں اور ملک کا ملکوں کے ساتھ معاہدوں کے معاملے میں بھی اپنا رویہ تبدیل کرنا ہوگا‘ ہمیں یہ فیصلہ بھی کرنا ہوگا کیا ہمیں ترقیاتی منصوبے چاہئیں‘ کیا ملک میں سڑکیں‘ پل‘ انڈر پاسز‘ اوورہیڈ برج‘ میٹروز اور ٹرینیں ہونی چاہئیں اور ہمیں یہ فیصلہ بھی کرنا ہوگا کیا ائیر لائینز‘ سٹیل ملز اور فیکٹریاں چلانا حکومت کا کام ہے اور ہم کب تک عوام کا پیٹ کاٹ کر قومی سرمایہ سٹیل مل‘ پی آئی اے اور ریلوے جیسے جہنموں میں جھونکتے رہیں گے؟ہمیں یہ فیصلہ بھی کرنا ہوگا ہم کب تک ایل ڈی اے‘ سی ڈی اے اور کے ڈی اے جیسے سفید ہاتھی پالتے رہیں گے‘ ہمیں یہ فیصلہ بھی کرنا ہوگا کیا ہمیں واقعی بیرونی سرمایہ کاری‘ بیرونی کمپنیاں اور بیرونی ایکسپرٹس کی ضرورت ہے اور ہمیں یہ فیصلہ بھی کرنا ہوگا کیا سرکار کی املاک واقعی سرکار کی ہیں‘ ریاست کی سڑکیں واقعی ریاست کی ہیں یا پھر یہ کسی دشمن ملک کی ملکیت ہیں‘ ہم جس دن یہ فیصلہ کر لیں گے ہم اس دن زیادہ بہتر فیصلوں کے قابل ہو جائیں گے‘ ہم اس دن وکلاءکے ہاتھوں سے ملتان جوڈیشل کمپلیکس کے شیشے‘ دروازے اور کھڑکیاں بھی بچا لیں گے اور ہم اس دن اسلام آباد‘ لاہور اور کراچی کی مرکزی شاہراہوں کو بھی دھرنے بازوں سے محفوظ بنا لیں گے۔آپ یقین کیجئے امریکی صدر ڈونلڈ ٹرمپ نے جس دن واشنگٹن میں بیت المقدس کو اسرائیل کا دارالحکومت تسلیم کیا تھا اسلام آباد کے شہری اس دن گھروں میں بیٹھے بیٹھے سہم گئے تھے‘ لوگوں کا خیال تھا ہماری قوم اب بیت المقدس کا مقدمہ اسلام آباد کی سڑکوں پر لڑے گی‘ یہ اپنے راستے‘ اپنی سرکاری املاک اور اپنی گاڑیوں کو نقصان پہنچا کر صدر ٹرمپ کو سبق سکھائیں گے‘ ہم نے جس دن اپنی سڑکوں کو اپنی سڑکیں اور سرکاری املاک کو اپنی املاک سمجھ لیا ہم اس دن اپنے لئے اچھے فیصلے کر لیں گے ورنہ دوسری صورت میں ہم اسی طرح اپنے منہ پر تھپڑ مار کر دوسروں سے انتقام لیتے رہیں گے‘ ہم اپنے منصوبوں کی کاسٹ بڑھا کر اپنے شملے اونچے کرتے رہیں گے اور عوام اسی طرح ایک دوسرے سے پوچھتے رہیں گے ”اس کا ذمہ دار کون ہے؟“۔

تحریر مستنصر امین خاں
E-mail: [email protected]
یہ بات خوش آئند ہے کہ وقت گزرنے کے ساتھ ساتھ کروڑوں عوام کی جان و مال کے تحفظ اور شہریوں کو انصاف کی فراہمی کےلئے قائم کردہ پولیس ڈیپارٹمنٹ میں تبدیلیاں لائی جاتی رہی ہیں۔ محکمہ پولیس ایک منظم فورس ہے جس میں محنتی اور دیانت دار لوگ موجود ہیں اور محنت کرنے سے کبھی بھی انسان رسوا نہیں ہوتا۔ محنت کرنے سے اللہ تعالیٰ بھی خوش ہوتا ہے اور مخلوق خدا بھی خوش ہوتی ہے۔ عوام پولیس پر بھروسہ نہیں کرتے او رپولیس یہ قبول کرنے کو تیار نہیں کہ وہ عوام کی حفاظت اور رہنمائی کےلئے ہیں اور اس کا کام معاشرے کی خدمت کرنا ہے پولیس کا بنیادی کام جرائم کی روک تھام اور عوام کا تحفظ ہے مگر موجودہ حالات میں پورے ملک کی عوام سب سے زیادہ احساس عدم تحفظ سے دو چار ہیں۔ اس کی وجہ یہ ہے کہ ہمارے معاشرے میں بھرتیاں سیاست کی بنیاد پر کی جاتی ہیں۔ پولیس کو عوام دوست بنانے کے لئے اصلاحات کی اشد ضرورت ہے۔ ٹیکس دینے والی عوام ایک ایسی پولیس فورس کی خواہاں ہیں جو ان کے تحفظ اور خدمت کی ذمہ دار ہو نہ کہ طاقت اور جبر کی علامت، پولیس کے رویے کو بہتر بنانے کے جہاں احتساب کا موثر اور شفاف نظام ضروری ہے وہاں اس بات کو یقینی بنایا جائے کہ سیاسی بنیادی پر سفارشتی پھرتیوں کے بجائے قابل اور ایماندار افراد پولیس میں شامل کئے جائیں، برصغیر میں پولیس کا نظام انگریزوں نے اپنے سیاسی اور انتظامی ضرورت کے پیش نظر 1861ءکے پولیس ایکٹ کے تحت قائم کیا تھا۔ یہ لندن میٹروپولیس ایکٹ 1829ءسے بہت مختلف تھا۔ یہ لندن میٹرو پولیس عوام کی خدمت اور تحفظ کےلئے بنائی گئی تھی جبکہ 1861ءکا پولیس ایکٹ ایک نو آبادی کو قابو میں رکھنے کے لئے بنایا گیا تھا۔ جس کا مقصد عوام کو طاقت کے زور پر دبا کر رکھنا تھا نہ کہ انہیں تحفظ فراہم کرنا، پولیس عوام کی خدمت گار نہیں تھی بلکہ حکمرانوں کے ریاستی آلہ کار کی حیثیت رکھتی تھی۔ طاقت اور اکتیارات کی حامل اس پولیس میں انگریزوں نے حکمت عملی کے تحت ان پڑھ اور جاہلوں کو بھرتی کیا اور انہیں عوام کو کچلنے، دبانے اور رعونت سے پیش اانے کی تربیت سے آراستہ کیا۔ سندھ کے ایک سابق انسپکٹر جنرل افضل علی شگری لکھتے ہیں، اس پولیس فورس کا 90فیصد نچلی سطح کے اہلکاروں پر مشتمل تھا ان کو ترقی کے مواقع حاصل نہیں تھے۔ وہ ایک ہی عہدے پر سالوں تک رہتے۔ درمیانی سطح (اسسٹنٹ سب انسپکٹر، سب انسپکٹر (اور علی سطح (اسسٹنٹ سپرنٹنڈنٹ آف پولیس) پولیس کا بہت چھوٹا حصہ تھا۔ مخصوص ذہنی رجحان کی حامل یہی پولیس 1947ءمیں پاکستان کو ورثے میں ملی۔ ایک آزاد اور خود مختار جمہوری مملکت میں اس قسم کا پولیس نظام ان بنیادی اصولوں کے خلاف تھا جن کی بنیاد ی اصولوں کے خلاف تھا جن کی بنیاد پر مملکت خداداد وجود میں آئی تھی۔ ایک آزاد ملک میں استبدانہ سوچ رکھنے والی پولیس کو سب سے پہلے عوامی امنگوں اور خواہشات کے مطابق جمہوری معاشرے کے خدوخال کے مطابق ڈھالنے کی ضرورت تھی۔ مگر انگریزوں کی تربیت یافتہ نوکر شاہی پولیس کو حسب سابق ریاستی آلہ کار کی حیثیت سے برقرار رکھنا چاہتی تھی نوکر شاہی کے شاہانہ ٹھاٹ باٹ اور حاکمیت کے اظہار میں پولیس کا کردار نہایت اہم تھا۔ ضلعی مجسٹریٹ کو بیک وقت انتظامی اور عدالتی اختیارات حاصل تھے۔ پولیس ضلع مجسٹریٹ کے احکامات کی پابند تھی۔ چنانچہ پورا ظام ضلعی مجسٹریٹ کے گرد گھومتا تھا۔ نوکر شاہی یہ شان شوکت اور اختیارات کھونا نہیں چاہتی تھی۔ دانستہ طور پر ان بنیادی طور پر بنیادی اصلاحات سے گریز کیا جا رہا ہے۔ جو پولیس کے نظام کو ایک جمہوری اور مہذب معاشرے کے مطابق بنانے کےلئے ضروری تھیں۔ جاگیردارانہ پس منظر رکھنے والے سیاستدان کے سیاسی مفادات کا تقاضہ بھی تھا کہ پولیس کو اپنے سیاسی مخالفین پر قابو پانے کا ذریعہ بنایا جائے۔ ایک طرف اگر پولیس حکام اپنی ترقی، تعیناتی اور تبادلوں کے لئے سیاست دانوں پر اپنا اثرورسوخ استعمال کرتے تھے تو دوسری طرف پولیس میں سیاسی بنیادوں پر بھرتیاں کرنا، سیاست دانوں کا پسندیدہ مشغلہ تھا۔ جو ااج بھی نوکر شاہی او رسیاست دانوں کے گٹھ جوڑ کے نتیجے میں پولیس ہر قسم کے احتساب سے بالا تر ہو کر ریاستی اختیارات کی ایک ایسی علامت بن گئی جس میںعوام کی کوئی اہمیت نہیں تھی پولیس میں اصلاحات کے لئے مختلف ادوار میں متعدد بار کوشش کی گئی۔ خصوصا فوجی حکمرانوں کے دور میں اس حوالے صحیح کام ہوا۔ کئی کمیشن قائم ہوئے۔ مختلف سفارشات سامنے آئیں۔ کچھ پر عمل ہوا مگر بیش تر فائلوں میں دفن ہو گئیں۔ پاکستان میں پولیس نظام آج بھی اسی ڈگر پر چل رہا ہے۔ جیسا برطانوی راج میں تھا۔ اس نظام کی کمزوریاں اور خامیاں سب کے علم میں ہیں۔ تشویش ناک امر یہ ہے کہ پولیس اور عوام کے درمیان گہری خلیج حائل ہے۔ جو روز بروزبڑھتی جا رہی ہے۔ پولیس آرڈر 2002ءجنرل پرویز مشرف کے ابتدائی زمانے کا ایک قدم پولیس آرڈر 2002 کا اجراءتھا۔ اس اارڈر کا بنیادی مقصد پولیس کو فورس کے بجائے پبلک سروس بنانا تھا کہ سیاسی مداخلت کے بغیر ایک انتہائی پیشہ وارانہ قابل احتساب پولیس تنظیم قائم کی جا سکے اس آرڈر میں اختیارات اور طاقت کے بے جا استعمال پولیس کارروائی مین سیاسی مداخلت انتظامی معاملات غلط رویوں اور ان جیسے دیگر معاملات کا احاطہ کیا گیا۔ پولیس میں احتساب کو یقینی اور شفاف بنانے کےلئے غیر سیاسی اراکین پر مشتمل ادارے کا قیام شامل تھا۔ جو وفاقی دارالحکومت اور صوبوں میں قائم کئے جاتے تھے۔ پولیس کے اعلی افسران کی مدت ملازمت تین سال متعین کی گئی تھی۔

تحریر:۔شاہین خالد بٹ
وائس چیئرپرسن اوورسیز پاکستانیز کمیشن پنجاب

سمندر پار مقیم افراد کا کسی بھی ملک کی معیشت کی مضبوطی میں کردار خصوصی اہمیت کا حامل ہوتا ہے اور ان کی طرف سے بجھوائی جانے والی رقوم سے ملکی اقتصادیات مستحکم بنیادوں پراستوار ہوتی ہے۔پاکستان جیسے ترقی پذیرملک میں سمندر پارافراد کی اہمیت دو چندہوتی ہے۔اگر ہم گرشتہ سال کی تر سیلات زر پر نظر ڈالیں تو ہمیں خوشگوارحیرت ہو گی کہ اوورسیز پاکستانیوں نے20ارب روپے سے زائد رقم ملک بجھوائی۔ میں اس بات کو واضح کرنا ضروری سمجھتاہوں کہ اوورسیز پاکستانی تارکین وطن نہیں۔وہ وطن سے دور ضرورہیں لیکن ان کے دل سے وطن کی محبت کسی طور کم نہیںہوئی۔ ان کے جسم تو سمند رپار ہیں لیکن دل یہیں ہیں۔پاکستان کے مسائل اوران کے حل میں ان کی بھر پور شمولیت ہے۔ وہ پاکستان کے بارے میں اتنے ہی متفکر رہتے ہیںجتنے یہاں موجود پاکستانی،امریکہ میں اپنے36 سالہ قیام کے پیش نظرمیں یہ بات پورے وثوق سے کہہ سکتاہوں کہ اوورسیز پاکستانیوں کے دل میں ہر وقت ملک کا ہی خیال رہتا ہے۔70 فیصد اوورسیز پاکستانیوں کے اہل خانہ تو پاکستان میں ہی رہتے ہیںاور وہ چند سال بعد یہاں چکرلگاتے ہیںلیکن جو پاکستانی دہائیو ں سے بیرون ملک مقیم ہیںان کے دل سے بھی وطن کی محبت رتی بھر کم نہیںہوئی۔پاکستان میں ہونے والے ہر منفی واقعے مثلا دہشت گردی یا دیگر مذاہب کے ساتھ بدسلوکی کے اثرات سب سے پہلے اوورسیز پاکستانی اپنے جسم اور روح پر برداشت کرتے ہیں۔ پاکستان میں ہونے والی جدید ترقی بھی اوورسیز پاکستانیوں کی مرہون منت ہے۔ تعلیم ،بزنس، تعمیرات اور سماجی رجحانات میں ہونے والی مثبت تبدیلیاں بھی اوورسیز پاکستانیوں کی وجہ سے ہیں۔
جس شخصیت نے سب سے پہلے اوورسیز پاکستانیوں کی اہمیت کو تسلیم کرتے ہوئے ان کے مسائل کے حل کیلئے عملی کوششوں کا آغاز کیا وہ وزیر اعلیٰ پنجاب محمد شہباز شریف ہیں ۔طویل عرصے جلا وطنی کی بدولت وہ اوورسیز پاکستانیوں کے مسائل کی شدت اور گہرائی سے نجوبی آگاہ ہیں اور اسی احساس کے پیش نظر انہوں نے اوورسیز پاکستانیز کمیشن(او پی سی) پنجاب کے نام سے ایک ایسا ادارہ قائم کیا جس نے مختصر عرصے میں ایک موثر فورم کی حیثیت اختیار کرلی ہے۔چیئر مین ہونے کی حیثیت سے وزیراعلیٰ نے اس ادارے کا انتظام وا نصرام چلانے کیلئے نہایت باریک بینی سے مخلص،محنتی،قابل اوراوورسیز پاکستانیوں کے مسائل کا ادراک رکھنے والے افراد پرمشتمل ٹیم تشکیل دی اور وزیراعلیٰ کے ویثر ن کے مطابق الحمداللہ آج او پی سی پنجاب کو سمندرپار مقیم ہزاروںپاکستانیوں کے مسائل کو حل کرنے کا ا عزاز حاصل ہوا ہے۔اوورسیز پاکستانیوں کی خدمت کے جذبے کے تحت قائم کئے جانے والے اس ادارے نے مختصر عرصے میں جو معتبرمقام حاصل کیا ہے وہ وزیر اعلیٰ پنجاب کی شفقت اور مسلسل ر ہنمائی کے بغیر ممکن نہ تھا اورگزشتہ ڈھائی سال میںیہ ادارہ اوورسیز پاکستانیوں کو درپیش مسائل اور مشکلات کے حل کیلئے پوری تندہی سے کوشش کررہا ہے۔
زمین یا جائیداد پر ناجائرقبضے کا مسئلہ ہو یا وراثتی جائیداد کی تقسیم ،کاروباری معاہدے کی خلاف ورزی ہو یا پولیس کے معاملات،ریونیو کے مسائل ہوں یا انوسٹمنٹ کے بارے میںرہنما ئی، او پی سی ہر طرح سے سمندرپار پاکستانیوں کی مدد کیلئے مصر وف عمل ہے۔ اوورسیز پاکستانیز کمیشن پنجاب کا قیام دیارغیر میں بسنے والے پاکستانیوں کے مسائل کے حل کیلئے وزیراعلیٰ پنجاب محمد شہباز شریف کی ایک شاندار کاوش ہے اوراس ضمن میں یہ بات قابل ذکر ہے کہ وزیراعلی پنجاب محمد شہباز شریف خود اس کمیشن کی کارکردگی کا جائزہ لیتے ہیں۔ او پی سی پنجاب کی کوششوں سے ابتک ایک نجی ہاﺅسنگ سکیم میں 170گھروں اور پلاٹوں کا قبضہ ان کے مالک اوورسیز پاکستانیوں کے حوالے کردیاگیا ہے۔ہمارے لیے یہ بات قابل فخرہے کہ ہم ابتک موصول ہونے والی دس ہزار سے زائد شکایات میں سے 50 فیصد کا ازالہ کر چکے ہیں۔
او پی سی میں مسائل کے حل کیلئے ایک سٹیٹ آف دی آرٹ سسٹم اپنا یا گیاہے۔پنجاب انفارمیشن ٹیکنا لوجی بورڈکی معاونت سے کمپلینٹ ویب پورٹل قائم کی گئی ہے۔ جہاں اوورسیز پاکستانی دنیا بھر سے اپنی شکایات کا اندرج کراسکتے ہیں۔اوپی سی شکایات متعلقہ اضلاع تک پہنچا کر ان کی بھر پور الیکٹرانک مانیٹرنگ کویقینی بناتاہے جہاں چیئرپرسنزکی قیادت میں ڈسٹرکٹ اوورسیز کمیٹیاں ان شکایات کے حل کیلئے تندہی سے کام کررہی ہیں۔
ادارے کی کارکردگی سے متاثرہوکرآزادجموں و کشمیر حکومت نے بھی سمندر پار مقیم بھائیوں کے مسائل کے حل کیلئے OPCپنجاب کا ماڈل اپنایاہے۔ جس میں OPC پنجاب نے پوری معاونت کی اور آزاد کشمیرکے افسران کیلئے اپنے ادارے میں تربیت کاخصوصی اہتمام کیا تھا۔ اوور سیز پاکستانیز کمیشن غیر ملکی شہریت کے حامل طالبعلموں کے تعلیمی مسائل کو بھی حل کررہا ہے۔ ادارے کی بھر پور کوششوں سے صوبے کے میڈیکل کالجوں میں اوورسیز پاکستانیوں کے بچوں کیلئے اوپن میرٹ کی بنیاد پر 76 نشستیں مختص کردی گئی ہیں۔ پاکستان میں سرمایہ کاری کے لئے اوور سیز پاکستانیوں کی حوصلہ افزائی اور رہنمائی کی جارہی ہے۔اوپی سی ،وفاقی حکومت کے ادارے اوورسیز پاکستانیز فاﺅنڈیشن کے ساتھ باہمی اشتراک کے ذریعے سمندرپار پاکستانیوں کو متعدد سہولیات کی فراہمی یقینی بنارہا ہے ۔جن میں اوورسیز پاکستانیوں کی انشورنس، ان کے بچوں کی بہتر تعلیم ،رہائشی سہولیات اور فلاح وبہبود کے دیگر کئی منصوبے شامل ہیں۔
ہمیںاس بات کا مکمل ادارک ہے کہ پورے ملک میں صرف پنجاب ہی میں اس طرح کا ادارہ قائم کیاگیا ہے اس لئے وزیراعلیٰ محمد شہباز شریف کی ہدایات کے مطابق ہم صرف پنجاب سے تعلق رکھنے والے اوورسیز پاکستانیوں کے مسائل ہی حل نہیں کرتے بلکہ دیگر صوبوں کے اوورسیز پاکستانیوں کی شکایات وصول کرکے ان کے ازالے کیلئے وفاقی حکومت سے مسلسل رابطے میں بھی رہتے ہیں۔اوورسیز پاکستانیوں کے مسائل کے فوری حل کیلئے وفاقی حکومت کے اداروں کے ساتھ مو¿ثر اشتراک کار بھی جاری ہے اور ٹیکس معاملات میں تارکین وطن کی معاونت کیلئے ایف بی آر میں فوکل پرسن کی نامزدگی عمل میں لائی گئی ہے ۔مزید براں وفاقی حکومت کے دیگراداروں، اوورسیز پاکستانیز فاﺅنڈیشن ،وفاقی محتسب ،نیب اور چیف کمشنر اسلام آباد کے ساتھ بھی اشتراک کار بڑھایاگیا ہے تاکہ تارکین وطن کی وفاقی اداروںسے متعلق شکایات کا جلدازجلد ازالہ یقینی بنایا جاسکے۔ ہماری تجویز پران میں سے متعدداداروں نے اوپی سی پنجاب کے ساتھ تعاون کو فروغ دینے کیلئے فوکل پرسن بھی مقررکردیے ہیں۔
او پی سی پنجاب اگرچہ ایک صو بائی ادارہ ہے لیکن اوورسیز پاکستانیوں کے مسائل کے حل کے ضمن میں اس کے اقدامات اور مثبت کردار کی پورے ملک میں تعریف کی جارہی ہے۔یہ حقیقت اس وقت کھل کرہمارے سامنے آتی ہے جب ہم کسی ملک میں روڈ شو منعقد کرتے ہیں اور وہاں موجود دیگر صوبوں سے تعلق رکھنے والے بھائیوں سے ملاقات ہوتی ہے۔ان تمام کا یہ مشترکہ موقف ہوتا ہے کہ اوورسیز پاکستانیز کمیشن قائم کر کے وزیراعلیٰ پنجاب نے دیگرتمام صوبوں پرسبقت حاصل کرلی ہے اور خواہش کرتے ہیںکہ دوسرے صوبوں میں بھی ایسے ادارے قائم ہوں۔ او پی سی وزیراعلیٰ پنجاب کے ایک ایسے خواب کی تعبیر ہے جو انہوں نے سمندرپار مقیم پاکستانیوں کی فلاح و بہبود کیلئے دیکھاتھا۔اوورسیز پاکستانیوں کیلئے اس ادارے کے دروازے ہمیشہ کھلے ہیں اور اس ادارے کے افسران و سٹاف ان کی خدمت کیلئے ہمہ وقت مصر وف عمل ہیں۔اوورسیز پاکستانی اپنے مسائل کے حل کیلئے کسی بھی وقت ہمار ی ویب سائیٹwww.opc.punjab.gov.pk یا ہیلپ لائن+92.42.111-672-672 پر24/7اپنی شکایات درج کراسکتے ہیں۔بذات خود 1 -کلب روڈ جی او آر ون لاہور تشریف لاکریا اضلاع میں موجود ڈسٹرکٹ اوورسیز پاکستانیز کمیٹیوں سے رابطہ کر کے بھی شکایات رجسٹرڈکرائی جا سکتی ہے۔اوورسیز پاکستانیز کمیشن کے مستعد افسران و سٹاف سمندر پار مقیم پاکستانیوں کی خدمت کیلئے چشم براہ ہے۔
٭٭٭٭

مہمان کالم
میں بات آگے بڑھانے سے قبل آپ کے سامنے دو احادیث رکھنا چاہتا ہوں‘ پہلی حدیث کا تعلق صحیح بخاری سے ہے‘ حدیث 2465‘ صفحہ نمبر585 اور جلد سوم ہے‘ رسول اللہ ﷺ نے فرمایا‘راستوں میں بیٹھنے سے باز رہو‘ صحابہؓ نے عرض کیا‘ ہم وہاں بیٹھنے پر مجبور ہیں‘ وہی ہمارے بیٹھنے کی جگہ ہوتی ہے‘ جہاں ہم باتیں کرتے ہیں‘ آپؐ نے فرمایا اگر وہاں بیٹھنے کی مجبوری ہے توپھر راستے کا حق ادا کرو‘ صحابہؓ نے عرض کیا‘ یا رسول اللہ ﷺ راستے کا حق کیا ہے؟ فرمایا‘ نگاہیں جھکا کر رکھنا‘ دوسروں کو اذیت نہ پہنچانا‘ لوگوں کے سلام کا جواب دینا‘ نیکی کا حکم کرنا اور برائی سے روکنا“۔ آپ دوسری حدیث بھی ملاحظہ کیجئے‘ یہ حدیث ابو داؤد کی ہے‘ کتاب 15 اور حدیث کا نمبر 2623 ہے‘ سیدنا معاذ بن انسؓ سے روایت ہے‘ ہم غزوے میں اللہ کے نبیؐ کے ہم رکاب تھے‘ لوگوں نے منزلوں پر پڑاؤ کرنے اور خیمے وغیرہ لگانے میں اتنی تنگی کا مظاہرہ کیا کہ راستہ بھی نہ چھوڑا‘ نبی کریمؐ نے اپنا ایک منادی بھجوایا جس نے لوگوں میں اعلان کیا جو شخص خیمہ لگانے میں تنگی کرے یا راستہ کاٹے تو اس کا جہاد نہیں۔یہ صرف دو احادیث نہیں ہیں‘ آپ صحاح ستہ کا مطالعہ کر لیں‘ آپ چاروں آسمانی کتابیں نکال کر دیکھ لیں‘ آپ کو ان میں راستوں اور شاہراہوں کی حرمت کے درجنوں احکامات مل جائیں گے‘ آپ دنیا بھر کی جنگوں کی تاریخ بھی نکال کر دیکھ لیں‘ آپ کو آدھی سے زیادہ جنگوں کی بنیاد راستے ملیں گے‘ آپ کسی دن گلی محلے کے جھگڑوں پر بھی تحقیق کر لیں آپ کو ان جھگڑوں میں بھی راستے کا ایشو ملے گا‘ آپ کو متاثرین یہ کہتے ملیں گے یہ بار بار ادھر سے گزر رہا تھا‘ میں نے پوچھا اور یہ مجھ سے لڑ پڑا‘ یہ میرا راستہ روک کر کھڑا ہوگیا تھا‘ یہ گلی میں چارپائی بچھا کر بیٹھ جاتا ہے‘ یہ میری دکان‘ میرے گھر کے سامنے موٹر سائیکل یا گاڑی پارک کر گیا تھا اور یہ ہمارے راستے میں کوڑا پھینک جاتے ہیں وغیرہ وغیرہ‘ آپ کو گلی محلے کے ہر جھگڑے کے پیچھے یہ اعتراضات ملیں گے‘ یہ اعتراضات ہر سال سینکڑوں جانیں لے جاتے ہیں‘آپ یورپ اور امریکا سمیت جدید دنیا کے تمام ممالک کا مطالعہ کریں آپ کو ان ملکوں میں گلیاں اور سڑکیں ہر وقت کھلی ملیں گی‘ صدر ہو‘ پوپ ہو یا پھرکوئی سیاسی جماعت ملک کا کوئی گروپ‘ کوئی شخصیت سڑک نہیں روک سکتی جبکہ ہم جس دن اپنے ملک میں تحقیق کریں گے‘ ہم چند لمحوں میں اس حقیقت تک پہنچ جائیں گے ہمارے ملک میں چوروں‘ ڈکیتوں اور قاتلوں کے حقوق ہیں اگر نہیں ہیں تو راستوں اور شاہراہوں کے حقوق نہیں ہیں‘ ہمارے ملک کے کسی بھی کونے میں کوئی بھی شخص کسی بھی وقت کوئی بھی گلی یا شاہراہ روک کر بیٹھ جاتا ہے اور ریاست اس کا منہ دیکھتی رہ جاتی ہے‘ محلے میں کسی کی شادی ہو وہ سڑک پر تمبو لگا دے گا‘ کوئی فوت ہو گیا لواحقین اس کی آخری تقریبات سڑک پر شروع کر دیں گے‘ مرحوم کے قل اور چالیسواں تک سڑک پر ہو گا‘ آپ کو جمعہ کے روز محلے اور شہر کی تمام بڑی گلیاں اور سڑکیں بند ملیں گی‘ شہر کی ہر جامع مسجد کے سامنے گاڑیاں اور موٹر سائیکل کھڑے ہوں گے‘گلیوں میں تسبیحوں‘ مسواکوں اور ٹوپیوں کی ریڑھیاں لگی ہوں گی اور بیریئر ہوں گے‘ آپ وہاں سے پیدل بھی نہیں گزر سکیں گے‘ ملک کے ہر چھوٹے بڑے مذہبی تہوار کا پہلا نشانہ بھی سڑکیں اور گلیاں بنتی ہیں‘ ہم اس وقت تک درود وسلام‘ عزہ داری‘ عرس‘ قوالی اور ختم شروع نہیں کرتے ہم جب تک سڑک بند نہ کر لیں‘ ہم قربانی کے جانور بھی گلی اور سڑک پر باندھتے ہیں‘ ملک کے سارے الیکشن گلیوں اور سڑکوں پر ہوتے ہیں‘ امیدوار ملک کی ترقی اور خوشحالی کے نعرے‘ آوے ہی آوے شیر آوے‘ دلوں کی دھڑکن نواز شریف اور جب آئے گا عمران خان کے ترانے بھی سڑکوں پر گاتے اور سناتے ہیں آپ ملک کے کسی شہر کے کسی بازار میں چلے جائیں آپ کو آدھی سڑک دکانوں کے منہ میں ملے گی‘ آپ پچاس فٹ چوڑی سڑک سے بھی گزر نہیں سکیں گے‘ آپ کسی درگاہ پر چلے جائیں آپ کو پوری گلی‘ پوری سڑک پر پھول بیچنے والوں اور فقیروں کا قبضہ ملے گا اور آپ چھٹی کے وقت کسی سکول‘ کسی کالج اور کسی یونیورسٹی کے سامنے چلے جائیں آپ اس وقت سو فٹ چوڑی سڑک سے گزر نہیں سکیں گے‘ہماری سڑکیں غریب کی جورو بن چکی ہیں‘یہ پورے شہر کی بھابھی ہیں‘ انہیں کوئی بھی روک سکتا ہے‘ انہیں کوئی بھی تاراج کر سکتا ہے۔
ہم ساٹھ برسوں میں اپنی سڑکوں کی حرمت نہیں بچا سکے تھے کہ ہم دس سال پہلے ایک نئی مصیبت کا شکار ہو گئے‘ ملک میں عدلیہ کی بحالی کی تحریک شروع ہوئی‘ دھرنوں کا نیا کلچر متعارف ہوا اور پھر دیکھتے ہی دیکھتے ملک بھر کی تمام بڑی شاہراہیں ”خالہ جی کا ویڑا“بن گئیں‘ وکلاء نے سڑکیں بند کر کے افتخار محمد چودھری تو بحال کرا لئے لیکن پوراملک بند کرا دیا‘ یہ ملک آج تک نہیں کھلا‘ سکندر جیسا پاگل ہو‘ مولانا طاہر القادری ہوں‘ عمران خان ہوں‘ میاں نواز شریف ہوں‘ آصف علی زرداری ہوں یا پھر ناراض ڈاکٹرز‘ ناراض اساتذہ‘ ناراض طالب علم‘ ناراض کلرک‘ ناراض پائلٹس اور ناراض کسان ہوں ملک میں کسی شخص نے اسلام آباد‘ لاہور‘ کراچی اور پشاورکی سڑکوں کی جان نہیں چھوڑی‘ یہ لوگ دس‘ بیس اور پچاس کی تعداد میں آتے ہیں‘ سڑک بند کرتے ہیں اور پورے ملک کی مت مار کر رکھ دیتے ہیں‘یہ دس‘ بیس‘ پچاس لاکھ لوگوں کی زندگی عذاب کر دیتے ہیں‘ اسلام آباد اس ظلم کی بدترین مثال ہے‘ یہ شہر 2007ء سے مسلسل بند چلا آ رہا ہے‘ یہ کبھی عدلیہ کے نام پر‘ کبھی جمہوریت کے نام پر‘ کبھی مسنگ پرسنز کے نام پر‘ کبھی ملک بچانے کے نام پر‘ کبھی دھاندلی کا حساب لینے کے نام پر‘ کبھی حکومت کو نکالنے کے نام پر‘ کبھی دہشت گردی کے مقابلے کے نام پر‘ کبھی احتساب‘ انصاف اور حساب کے نام پر اور کبھی کون سچا اور کون کھرا عاشق رسولؐ ہے کے نام پر بند ہوتاآ رہا ہے‘ میں دس سال سے وفاقی دارالحکومت کی مرکزی سڑکوں کو بند دیکھ رہا ہوں‘ یہ شہر دس سال سے کنٹینروں کے آسیب کا شکار ہے لیکن ریاست ہاتھ پر ہاتھ دھرے بیٹھی ہے‘اسلام آباد اس وقت بھی بند ہے‘ فیض آباد پر دھرنا جاری ہے اور دھرنے کی وجہ سے لاکھوں لوگوں کی زندگی عذاب ہو چکی ہے‘ فیض آباد کے اردگرد آباد پانچ لاکھ لوگ راتوں کو سو نہیں پارہے‘ بچے سکول‘ ملازم دفتر‘ تاجر منڈیوں اور مسافر ائیر پورٹ نہیں پہنچ پا رہے‘ سفارت کار‘ بین الاقوامی میڈیا اور دنیا بھر کے مبصرین 18 دنوں سے یہ تماشہ دیکھ رہے ہیں لیکن ریاست کے ہاتھ بغلوں سے باہر نہیں آ ر ہے‘ دھرنے میں اتنے لوگ موجود نہیں ہیں حکومت نے جتنی پولیس فورس اور ایف سی وہاں کھڑی کر رکھی ہے‘حکومت دھرنے کی حفاظت پر روزانہ 50 لاکھ روپے خرچ کر رہی ہے‘ اب تک 14 کروڑ روپے خرچ ہو چکے ہیں‘ یہ دھرنا اگر آخری ہوتا تو بھی شاید لوگ صبر کر لیتے لیکن یہ دھرنا بازی کے سلسلے کی ایک ننھی سی کڑی ہے‘ یہ سلسلہ اس کے بعد بھی جاری رہے گا‘ یہ سڑکیں‘ یہ شہر اس کے بعد بھی بند ہو گا‘ ملک میں ابھی دودھ میں پانی ڈالنے والوں کو بھی ملاوٹ کی اجازت چاہیے‘یہ بھی اسلام آباد آئیں گے‘ احتساب عدالت نے ابھی میاں نواز شریف کو سزا سنانی ہے‘پاکستان مسلم لیگ ن میاں نواز شریف کی بے گناہی کا مقدمہ بھی سڑکوں پر لڑے گی‘ آصف علی زرداری نے بھی گرفتار ہونا ہے‘ زرداری صاحب کی معصومیت کا فیصلہ بھی اسلام آباد کی سڑکوں پر ہوگا‘ حکومت نے بھی فارغ ہونا ہے اور اس کی بحالی کی جنگ بھی سڑکوں پر لڑی جائے گی اور سپریم کورٹ نے ابھی عمران خان کے کیس کا فیصلہ بھی سنانا ہے‘ ملک میں ابھی اسلامی نظام بھی نافذنہیں ہوا‘ مریم نواز کی سیاسی لانچنگ بھی باقی ہے چنانچہ عشق کے بے شمار امتحان ابھی پیچھے ہیں‘ یہ سڑکیں ابھی مزید بند ہوں گی‘ اسلام آباد کے شہریوں کی جان مزید ہلکان ہوگی۔ ہمارے پاس اب دو آپشن ہیں‘ ہم سڑکوں کو مظاہروں کیلئے وقف کر دیں‘ لوگ آئیں‘ سڑکیں بند کریں اوراپنے مطالبات کی منظوری تک سڑکوں پر قابض رہیں یا پھر ہم سڑکوں کا حق ادا کریں‘ ہم ملک کی تمام بڑی شاہراہیں روکنے والوں کیلئے کڑی سزائیں طے کر دیں‘ ریاست کسی شخص یاکسی گروہ کو سڑک روکنے کی اجازت نہ دے‘ حکومت اگر واقعی سنجیدہ ہے‘ یہ اگر حقیقتاً یہ مسئلہ حل کرنا چاہتی ہے تو یہ قومی اسمبلی میں بل پیش کرے‘ اپوزیشن جماعتوں کو ساتھ ملائے‘ نیا قانون بنائے اور سڑک روکنے والے کسی شخص کے ساتھ اس کے بعد کوئی رعایت نہ کی جائے‘ریاست پوری طاقت کے ساتھ سڑک بھی کھولے‘ مجرموں کو بھاری جرمانہ بھی کرے اور کم از کم پانچ سال کیلئے جیل میں بھی پھینکے‘ یہ تماشہ اب بہرحال بند ہونا چاہیے‘ خدا کی پناہ ہماری ریاست اگر سڑک نہیں کھلوا سکتی تو پھر یہ ریاست کس نام کی ہے؟ ہم اگر سڑکوں کی حرمت کی حفاظت نہیں کرسکتے توہم اپنے ملک کو ملک کیوں کہتے ہیں اور حکومت اگر چند ہزار لوگوں کے قبضے سے سڑک نہیں چھڑوا سکتی تو یہ خود کو حکومت کیوں کہتی ہے؟۔نوٹ:کراچی کے تعلیمی ادارے Gradsy نے میرے نام سے ایک سکالرشپ سکیم شروع کی ہے‘ یہ لوگ ہر سال ایم بی اے‘ بی بی اے یا سی اے کے کسی ایک ضرورت مند طالب علم یا طالبہ کو سو فیصد وظیفہ دیں گے‘ آپ اگر باصلاحیت ہیں‘ آپ میرٹ پر آتے ہیں اور آپ کراچی میں رہتے ہیں لیکن آپ یونیورسٹی کی فیس ادا نہیں کر سکتے تو آپ یونیورسٹی کے صدر سید علی عباس عابدی صاحب سے [email protected] اور 0322-2255969 پر رابطہ کرلیں۔

تحریر: طاہر کلاسرہ
جب سے سپریم کورٹ میں حدیبیہ پیپرز ملز کیس دوبارہ کھلا ہے تو سب لوگوں کو تجسس ہے کہ آخر یہ ہے کیا تو میں نے یہ سوچا کہ اس پر لکھا جائے یہی اصل کہانی ہے شریف خاندان کو مالدار بنانے کی اورکس طرح لوٹ مار کی گئی۔ حدیبیہ پیپر ملز کا قصہ 1997میں اس وقت شروع ہوا جب نوازشریف دوسری مرتبہ وزیراعظم بنے تو شریف فیملی کی حدیبیہ پیپلز مل خسارے میں چل رہی تھی۔ اس کے کل اثاثہ جات کی ویلیو صرف 9کروڑ57لاکھ خسارہ80کروڑ سے بھی زائد ہوچکا تھا۔ حدیبیہ پیپرز مل کے نام پر پاکستان کے سرکاری بینکوں سے پبلک منی سے کروڑوں کا قرض لیا جوکہ بعد میں خسارے کی وجہ سے قرضہ واپس ہی نہ کیا ۔پھر چند مہینوںمیں اس کمپنی کے اکاﺅنٹس میں تقریباً ساڑھے 64کروڑ کی ایک بہت بڑی ٹرانزیکشن نظرآئی جسے شیر منی ڈیپازٹ کی کیٹیگری میں دکھایا گیا چونکہ حدیبیہ پیپرز مل کو بنایا بھی اس مقصد کےلئے گیا تھا اس کے ذریعہ قرضہ لے کر خسارے کی آڑ میں معاف کرالیے جائیں اور پھر اس کمپنی کے اکاﺅنٹس کو استعمال کرتے ہوئے منی لانڈرنگ کے ذریعہ کالے دھن کو سفید کیا جاسکے اس لیے نوازشریف نے اپنے پورے خاندان کو اس کا شیر ہولڈر بنایا۔
1997ءمیں کی گئی 64کروڑ کی رقم ان کے گلے پڑگی اور آج اگر پانامہ اور لندن فلیٹس سے بری بھی ہوگئے تو حدیبیہ پیپر والا کیس ان پر ایک لٹکتی ہوئی تلوار ہے جس نے نواز اورشہبازشریف بھی نااہل ہوسکتے ہیں۔ اسحاق ڈار نے 2000ءمیں جمع کرائے گئے اپنے بیان حلفی سے اپنی مکمل تفصیلات دی تھیں جوکہ میں یہاں پر بیان کررہا ہوں۔ اسحاق ڈار اوراس کے اسسٹنٹ کی بیوی کے بھانجے کے ذریعہ لندن میں مقیم قاضی فیملی کے پاسپورٹ کاپیوں کی بنیاد پرکئی بینکوں میں قاضی فیملی کے افراد کے نام اکاﺅنٹس کھولے گئے پھر ان میں کالے دھن کی رقم ڈالی گئی جو کئی ملین ڈالرز بنتی تھی پھر سعید احمد نامی اسحاق ڈار کے ایک پرانے پارٹنر اور موجودہ صدر سٹیل بینک کے کام پر اکاﺅنٹ کھولا گیا جعلی ناموں سے اکاﺅنٹس کھولے گئے اور رقم ان اکاﺅنٹس میںگھومتی رہی جب کافی ٹرانزیکشنز ہوگئی تو پھر ان سب اکاﺅنٹس سے رقم نکال کر سعید احمد کے اکاﺅنٹس میں ڈال دی گئی۔ یہ منی لانڈرنگ کا ایک طریقہ تھا اس کے ذریعہ سرکلر ٹرانزکیشن سے ریگولیٹرز کو چکمہ دیا گیا کہ وہ اصل سورس تک نہ پہنچیں سعید احمد کے اکاﺅنٹس میں جب اچھی خاصی رقم گئی تو پھر اس رقم کو فرد ضمانت رکھ کر ہجویری حصاربہ کے نام پر قرض لیا گیا یہ اسحاق ڈار کی کمپنی تھی جو 90کی دہائی میں ڈار کے نام سے رجسٹر تھی جب ہجویری حصاربہ کو قرض کی رقم مل گئی پھر اس قرض کو حدیبیہ پیپر مل کے نام پر ٹرانسفر کرکے64کروڑ حدیبیہ مل کے اکاﺅنٹس میں ڈال دیا گیا یوں ایک کالا دھن جو سعید کے اکاﺅنٹس میں تھا وہ بینک قرض کی شکل میں ایک سفید دھن بن چکا تھا جسے شریف فیملی نے اپنی ذاتی کاروبار کےلئے استعمال کرنا شروع کردیا۔
حدیبیہ خسارہ پر ہی چلتی رہی اورحکومت میں رہ کر اس کے قرض معاف کروالیے گئے۔ سعید احمد کے اکاﺅنٹ میں زرضمانت رقم ریلیز ہوگئی جسے فارن کرنسی کی مد میں بیرون ملک ٹرانسفر کردیا گیا۔ یوں جو کالا دھن موٹروے، پیلی ٹیکسی سکیم کے ذریعے سے اکٹھا کیا گیا جو بیرون ملک چلا گیا، اس پیسہ کو ہضم کرلیا اور قومی بینکوں سے قرض لے کر معاف بھی کروالیالیکن قدرت بھی ہر ملزم سے کوئی غلطی کروادیتی ہے۔ نوازشریف سے بھی 64کروڑ کی رقم حدیبیہ پیپر ملز کے اکاﺅنٹس میں دکھایا گیا اس کی غلطی کیوجہ سے وہ پکڑے گئے اور اسحاق ڈار بھی اسی میں وعدہ معاف گواہ بنے تھے۔
یہ تھے وہ ذرائع جس سے شریف خاندان کے بیرون ملک جائیدادیں بنائیں اب اگر ہم آپ کو بیرون ملک ان جائیدادوں کی تفصیل بتائیں تو آپ لوگ حیران رہ جائیں گے اور سوچیں گے۔ یہ ہے ہمارے حکمران جو امیر المومنین بنتے ہیں اور ہمارے حکمران ہیں لندن پارک لین کے4فلیٹس جن کی ملکیت سے 25سال سے انکار کررہے ہیں آج اقرار کررے ہیں اس کے علاوہ لندن میں آکسفورڈ میں33اور 25منزلہ سواسیزر پوائنٹ کے نام سے دو ٹاورجن کی ملکیت کئی سو ملین پاﺅنڈ ہے۔ ہائیڈپارک لندن میںدنیا کے مہنگے ترین فلیٹس جن کی مالیت150ملین پاﺅنڈ ہیں بعض کے جنوبی علاقہ میں340مختلف شیریںہیں پالک جس کی مالیت92ملین پاﺅنڈ ہے۔ فلیٹ نمبر8پونڈ فلیٹس ڈیلیو2مالیت ساٹھ لاکھ پاﺅنڈ فلیٹ نمبر9مالیت 9لاکھ پاﺅنڈ10ڈیوک فلیٹس ڈیوک سٹریٹ لندن ڈیلیو مالیت15ملین پاﺅنڈ فلیٹ نمبر12اے118پارک میںلندن ایس ڈبلیو 1مالیت5لاکھ پاﺅنڈ11گھرسنٹر پلسل، لندن ڈبلیو ون مالیت انمول ان کے علاوہ عین بکنگ برمنگم پیلس کے قریب جائیداد جس کی مالیت45ملین پاﺅنڈ ہے سنٹرل لندن کے اس پاس 80ملین پاﺅنڈ کی جائیدادیں ہیں کچھ عرصہ پہلے جس نواز لندن رئیل اسٹیٹ میں ایک ہی وقت میں1200ملین ڈالرز کی سرمایہ کاری کی اس کا ذکر میڈیا پر بھی آیا نوازشریف صاحب جس راﺅنڈ میں رہائش پذیر ہیں 25000ہزار کینال پر محیط ہے۔
مری میں ایک گھر ہے مال روڈ پر ایک بنگلہ ہے شیخوپورہ کے 88کنال کی زمین لاہور اپر مال پر مکان1700کنال کی مختلف جائیدادیں بھی جہاں تمام گھروں کا سالانہ بجٹ27کروڑ بنتا ہے۔ ان کے علاوہ سعودی عرب، دبئی، سپین اور استنبول میں بھی رہائش گاہیں ہیں اور انکارئیل اسٹیٹ کا کاروبار پوری دنیا میں پھیلا ہوا ہے اتفاق گروپ اور شریف برادران دو کمپنیوں کے مالک ہیں جس کی ذیلی کمپنیوں میں کم ازکم 11شوگر ملز اور15انڈسٹریل اسٹیٹ بھی رمضان شوگرملز، رمضان انرجی لمیٹیڈ، شریف ایگری فارمز شریف پولٹری فارمز شریف ڈیری فارمز، شریف فیڈ ملز رمضان ٹرانسپورٹ محمد بخش ٹیکسٹائل ملز حمزہ بینکنگ ملز،حدیبیہ انجینئرنگ ، حالد سراج انڈسٹریز، برکت ٹیکسٹائل ملز حسیب وقاص رائس ملز اور بھی کئی میکریز اور ملز شامل ہیں ۔
یو اے ای میں ایک سٹیل ملز اتفاق ٹیکسٹائل ملزم سعودی عرب اور جدہ کی اسٹیل ملز یہ بھی سننے میں آرہاہے۔ نیوزی لینڈ کے سرکاری سٹییل کمپنی کے49شیئرز نوازشریف کے نام پر ہیں وہ جائیدادیں جن کا کچھ پتہ لگ سکا ہے باقی کتنی ہیں وہ تو اللہ ہی جانتا ہے۔ لیکن سوال یہ ہے کہ یہ لوگ اتنی جائیدادیں لے کرکہاںجائیں گے یہ صرف نوازشریف نہیں بلکہ شاید اگلے کالم میں میں آپ کو زرداری صاحب جہانگیر ترین اور کئی اور بڑے بڑے سیاستدان کتنی جائیدادیں رکھتے ہیں جوکہ باری باری بناتی جائیں گی ۔
افسوس کی بات یہ ہے کہ ٹیکس کا ایک روپہی بھی نہیں دیتے صرف تنخواہ دار طبقہ یا غریب تاجر دیتا ے باقی یہ ارب پتی لوگ ٹیکس دینے سے ہی انکاری ہیں اور بلکہ غریب عوام کے ٹیکس پر عیاشی کرتی ہے میرا ایک دوست بتارہا تھا کہ بینک میں رقم رکھوانے کے بعد جب رقم نکلوائی جائے تو لاکھ کے پیچھے 600روپے ٹیکس اور اگر دس لاکھ نکلوائے تو 6000ہزار حکومت کو ٹیکس دیں جو غریب آدمی ہیں کمیٹیاں جمع کرکے بینک میں رکھی تھیں اب وہ نکلوانے گئے حکومت کو ٹیکس دے ۔ گاڑی لے تب ٹیکس، اس پر بھی بات ہوگی ہوٹل میں کھانے پر ٹیکس، یہ سادہ اور غریب عوام کدھر جائے زرداری صاحب نے موبائل جگا ٹیکس25روپے100کے بیلنس یہ کاٹا جو آج تک قائم ہے۔ یہ سب لوٹ مار عیاشی غریب عوام کی جیب سے کی جارہی ہے اور کوئی ان سے پوچھنے والا بھی نہیں لیکن ان سب لٹیروں کو یہ نہیں پتہ ان سب چیزوں کا حساب انہیں دینا پڑے گا۔ روز آخرت بھی اور دنیا میں بھی اور یوم حساب اوریوم پکڑ کبھی بھی ہوسکتی ہیں شاید ان لٹیروں کو ان کی جائیدادیں ان کا مال بھی نہ بچا پائے گا کیونکہ یوم حساب اٹل ہے اور وہ ایک دن آکے ہی رہنا ہے سب کےلئے۔
٭٭٭٭

مہمان کالم
خوراک تہذیب کا تیسرا بڑا عنصر ہوتی ہے‘ آپ اگر کسی قوم‘ کسی خاندان یا کسی شخص کی تہذیب کا اندازہ لگانا چاہتے ہیں تو آپ صرف اتنا دیکھ لیں وہ کیا کھا رہا ہے اور وہ کیسے کھا رہا ہے آپ کو مزید تحقیق کی ضرورت نہیں رہے گی‘ ہمارے رسولؐ کے بہترین زندگی کے چالیس اصولوں میں سات اصول صرف کھانے سے متعلق ہیں‘میں دو اصول پچھلے کالم میں لکھ چکا ہوں باقی پانچ یہ ہیں‘ آپؐ نے فرمایا گرم کھانے کو پھونک سے ٹھنڈا نہ کرو‘ پنکھا استعمال کر لیا کرو‘ یہ فرمان بھی ہائی جین پر بیس کرتا ہے‘ ہم جب گرم کھانے کو پھونک مارتے ہیں تو ہمارے منہ کے بیکٹیریا کھانے کو زہریلا بنا دیتے ہیں‘ یہ حرکت تہذیب اور شائستگی کے منافی بھی ہے۔ فرمایا کھاتے ہوئے کھانے کو سونگھا نہ کرو‘ کھانے کو سونگھنا بدتہذیبی بھی ہوتی ہے اور کھانے کی خوشبو ہماری ناک کے اندر موجود سونگھنے کے خلیوں اور پھیپھڑوں کی دیواروں کو بھی زخمی کر دیتی ہے‘ ہمیں چھینک بھی آ سکتی ہے اور یہ چھینک سارے کھانے کو برباد کرسکتی ہے۔ فرمایا اپنے کھانے پر اداس نہ ہوا کرو‘ ہم عموماً کھانے کی مقدار اور کوالٹی پر اداس ہو جاتے ہیں‘ ہم ہمیشہ کھانا کھاتے وقت دوسروں کی پلیٹ کی طرف دیکھتے ہیں‘ یہ عادت ہمارے اندر ناشکری پیدا کرتی ہے‘ ہم اگر اپنے کھانے کو اللہ کا رزق سمجھیں‘ اس پر شکر کریں تو ہمارے اندر برداشت بھی بڑھے گی اور صبر اور شکر کی عادت بھی ڈویلپ ہو گی‘ یہ عادت ہماری زندگی کو بہتر بنا دے گی۔ فرمایا منہ بھر کر نہ کھاؤ‘ ہمارا منہ خوراک کے ہاضمے کا آدھا کام کرتا ہے باقی آدھا کام معدہ سرانجام دیتا ہے‘ ہم جب منہ بھر لیتے ہیں تو زبان اور دانتوں کو اپنا کام کرنے کیلئے جگہ نہیں ملتی‘ ہم جلدی جلدی نگلنے پر مجبور ہو جاتے ہیں اور یوں ہمارے معدے کی ذمہ داری بڑھ جاتی ہے‘معدہ یہ ذمہ داری پوری نہیں کر پاتا‘ ہم بدہضمی کا شکار ہو جاتے ہیں‘ ہمارے رسولؐ ہمیشہ چھوٹا لقمہ لیتے تھے‘ دیر تک چباتے تھے اور آدھا معدہ بھرنے کے بعد ہاتھ کھینچ لیتے تھے‘ آپؐ پوری زندگی صحت مند رہے‘ آپؐ کے صحابہؓ نے بھی یہ عادت اپنا لی چنانچہ مدینہ کے طبیب بے روزگار ہو گئے اور وہ کھجوروں کی تجارت کرنے لگے۔فرمایا اندھیرے میں مت کھاؤ‘ اس فرمان کی دو وجوہات ہیں‘ اندھیرے میں کھانے سے کھانے میں کیڑے مکوڑے ملنے کا خدشہ ہوتا ہے اور دوسرا روشنی کا کھانے کے ساتھ گہرا تعلق ہوتا ہے‘ ہمیں روشنی میں کھایا ہوا کھانا زیادہ انرجی دیتا ہے‘ یہ وہ واحد وجہ ہے جس کی بنا پر دنیا بھر میں ڈنر کے وقت ہال اور کمرے کی تمام لائیٹس آن کر دی جاتی ہیں‘یہ ممکن نہ ہو تو میز پر موم بتیاں جلا دی جاتی ہیں‘ انگریز اس انتظام کو کینڈل لائیٹ ڈنر کہتے ہیں‘ یہ روایت ہزاروں سال سے چلی آ رہی ہے اور یہ انتہائی مفید ہے‘ آپؐ نے بھی روشنی میں کھانے کا حکم دے کر اس روایت کی تائید فرمائی۔آپؐ نے فرمایا دوسروں کے عیب تلاش نہ کرو‘ ہم جب دوسروں میں عیب ڈھونڈتے ہیں تو ہم چغلی‘ غیبت اور منافقت جیسی روحانی بیماریوں کا شکار ہو جاتے ہیں‘ یہ بیماریاں ہمیں حسد جیسے مہلک مرض میں مبتلا کر دیتی ہیں اور یوں ہم ذہنی‘ جسمانی اور روحانی تینوں سطحوں پر علیل ہو جاتے ہیں۔ چنانچہ ہم اگر صرف دوسروں میں عیب تلاش کرنا بند کر دیں تو ہم حسد‘ منافقت‘ غیبت اور چغل خوری جیسے امراض سے بچ جائیں گے‘ ہم صحت مند زندگی گزاریں گے۔ فرمایا اقامت اور اذان کے درمیان گفتگو نہ کیا کرو‘ اللہ کائنات کا سب سے بڑا بادشاہ ہے‘ اذان اس بادشاہ کی طرف سے بلاوا ہوتا ہے اور اقامت شرف باریابی کی اجازت چنانچہ یہ دونوں اوقات پروٹوکول ہیں‘ اللہ تعالیٰ کو پروٹوکول کی خلاف ورزی اچھی نہیں لگتی‘ ہم اگر دنیاوی بادشاہوں کے پروٹوکول کا خیال رکھتے ہیں تو پھر ہمیں دنیا کے سب سے بڑے بادشاہ کے پروٹوکول کا سب سے زیادہ احترام کرنا چاہیے۔ فرمایا بیت الخلاء میں باتیں نہ کیا کرو‘ اس کی وجہ جراثیم ہیں‘ ہم پچھلے کالم میں اس کا تفصیل سے ذکر کر چکے ہیں۔ ہمارے رسولؐ دوستوں کو بہت اہمیت دیا کرتے تھے لہٰذا آپؐ نے فرمایا دوستوں کے بارے میں جھوٹے قصے بیان نہ کیا کرو‘ دوستوں کے بارے میں جھوٹے قصوں سے دوستوں کی دل آزاری بھی ہوتی ہے اور دوست بدنام بھی ہوتے ہیں چنانچہ اس عادت بد سے پرہیز دوستی کیلئے بہت اہم ہے۔ فرمایا دوست کو دشمن نہ بناؤ‘ یہ فرمان نفسیات اور معاشرت دونوں کیلئے انتہائی اہم ہے‘ ہمارے دوست ہماری تمام کمزوریوں سے واقف ہوتے ہیں‘ یہ جب دشمن بنتے ہیں تو یہ دنیا کے خوفناک ترین دشمن ثابت ہوتے ہیں چنانچہ ہمیں زندگی میں کبھی کسی دوست کو دشمن بناناچاہیے اور نہ کبھی کسی دوست کا دشمن بننا چاہیے۔ فرمایا دوستوں کے بارے میں شکوک نہ پالو‘شک دوستی کیلئے زہر ہوتا ہے‘ہم جب دوستوں کے بارے میں مشکوک ہو تے ہیں تو دوستی کا دھاگہ کمزور ہو جاتا ہے چنانچہ شک سے بچنا ضروری ہوتا ہے۔ فرمایا چلتے ہوئے بار بار پیچھے مڑ کر نہ دیکھو‘ چلتے ہوئے پیچھے مڑ کر دیکھنا ایک نفسیاتی بیماری ہے‘ یہ بیماری خوفزدہ‘ ڈرے اور سہمے ہوئے لوگوں میں کامن ہے‘ ہم جب چلتے ہوئے پیچھے مڑ کر دیکھتے ہیں تو ہم اس بیماری کا شکار ہوتے چلے جاتے ہیں‘ پیچھے مڑ کر دیکھنے سے ہماری توجہ بھی بٹ جاتی ہے‘ ایکسیڈنٹ کا خطرہ بھی پیدا ہو جاتا ہے‘ ہماری رفتار بھی آدھی رہ جاتی ہے اور ہم بلاوجہ دوسرے لوگوں کو اپنی طرف متوجہ بھی کر لیتے ہیں۔ فرمایا ایڑھیاں مار کر نہ چلو‘ ایڑھیاں مار کرچلنا یا چلنے کے دوران دھمک یا آواز پیدا کرنا تکبر کی نشانی ہے اور تکبر مسلمانوں کو سوٹ نہیں کرتا۔
ہمارے پاؤں کا ہمارے دماغ کے ساتھ بھی گہرا تعلق ہوتا ہے‘ ایڑھیاں مارنے سے ہمارے دماغ کی چولیں ہل جاتی ہیں‘ ہم دماغی لحاظ سے کمزور ہو جاتے ہیں‘ آپ کو ایڑھیاں مار کر چلنے والے جلد یا بدیر دماغی امراض کی ادویات کھاتے ملیں گے۔ فرمایا کسی کے بارے میں جھوٹ نہ بولو‘ جھوٹ دنیا کی سب سے بڑی معاشرتی برائی اور گناہوں کی ماں ہے‘ ہم اگر صرف جھوٹ بند کر دیں تو معاشرہ ہزاروں برائیوں سے پاک ہو جاتا ہے۔ فرمایا ٹھہر کر صاف بولا کرو تا کہ دوسرے پوری طرح سمجھ جائیں‘ جھوٹ کے بعد غلط فہمی معاشرے کی سب سے بڑی برائی ہے‘ ہم جب گفتگو میں واضح نہیں ہوتے تو غلط فہمیاں پیدا ہوتی ہیں اور یہ غلط فہمیاں معاشرتی بگاڑ کا باعث بنتی ہیں چنانچہ ہم جب بھی بولیں بلند‘ واضح اور صاف بولیں۔آپ ؐ نے فرمایا اکیلے سفر نہ کیا کرو‘ یہ فرمان بھی حکمت سے بھرپور ہے‘ اکیلا آدمی خوفزدہ بھی رہتا ہے‘ پریشان بھی اور یہ عموماً حادثوں کا شکاربھی ہو جاتا ہے‘ تحقیق سے ثابت ہوا سفر کے دوران اکیلے آدمی زیادہ لٹتے ہیں‘ زیادہ جلدی بیمار ہوتے ہیں اور یہ زیادہ غلط فیصلے کرتے ہیں چنانچہ جب بھی سفر کریں ایک یا دو لوگوں کو ساتھ شامل رکھیں بالخصوص عورت کو کبھی اکیلے سفر نہ کرنے دیں۔ فرمایا فیصلے سے قبل مشورہ ضرور کیا کرو‘ انسان 16 کیمیکلز کا مجموعہ ہے‘ یہ کیمیکلز ہمارے موڈز طے کرتے ہیں اور یہ موڈز ہماری زندگی کے چھوٹے بڑے فیصلے کرتے ہیں‘ ہم جب بھی تنہا فیصلے کرتے ہیں ہم موڈز کے تابع فیصلے کرتے ہیں اوریہ عموماً غلط ہوتے ہیں چنانچہ فیصلے سے قبل مشورہ ضروری ہے اور مشورہ ہمیشہ سمجھ دار کی بجائے تجربہ کار شخص سے کرنا چاہیے‘ آپ کو کبھی نقصان نہیں ہوگا۔ فرمایا کبھی غرور نہ کرو‘ غرور ایک ایسی بری عادت ہے جس کا نتیجہ کبھی اچھا نہیں نکلتا۔ میں نے پوری زندگی کسی مغرور شخص کو طبعی موت مرتے نہیں دیکھا‘ یہ غیر طبعی موت مرتے ہیں اورہمیشہ بے عزتی اور ذلت وراثت میں چھوڑتے ہیں۔ فرمایا شیخی نہ بگھارو‘ یہ بھی کمال اصول ہے‘ میں نے آج تک کسی شیخی خور کو باعزت نہیں دیکھا‘ ہم عزت بڑھانے کیلئے شیخی مارتے ہیں اور ہمیشہ پرانی عزت بھی گنوا بیٹھتے ہیں۔ فرمایا گدا گروں کا پیچھا نہ کیا کرو‘ ہم میں سے بے شمار لوگ فقیر کو دس بیس روپے دے کر یہ جاننے کی کوشش کرتے ہیں یہ واقعی حق دار تھا یا نہیں۔
یہ عادت ہمیں شکی بھی بنا دیتی ہے اور یہ صدقے اور خیرات سے بھی دور کر دیتی ہے۔ فرمایا مہمان کی کھلے دل سے خدمت کرو‘ یہ عادت ہماری شخصیت میں کشش پیدا کر دیتی ہے‘ آپ کو مہمان نوازوں میں ہمیشہ مقناطیسی کشش ملے گی‘ آزما کر دیکھ لیں۔ فرمایا غربت میں صبر کیا کرو‘ یہ فرمان بھی کیا شاندار فرمان ہے‘ صبر بہت بڑی دولت ہے‘یہ دولت کبھی کسی انسان کو غریب نہیں رہنے دیتی‘ آپ صابر ہو جائیں آپ کے حالات دنوں میں بدل جائیں گے‘ آپ یہ بھی آزما کر دیکھ لیں۔ فرمایا اچھے کاموں میں دوسروں کی مدد کیا کرو‘اچھائی نیکی ہوتی ہے اور نیکی میں دوسروں کا ساتھ دینے والے بھی جلد نیک ہو جاتے ہیں‘ آپ صرف نیک لوگوں کے معاون بن جائیں آپ نیکوں سے بھی آگے نکل جائیں گے۔ فرمایا اپنی خامیوں پر غور کیا کرو اور توبہ کیا کرو‘ تحقیق بتاتی ہے ہم اگر اپنی کسی ایک خامی پر قابو پا لیں تو ہم میں دس خوبیاں پیدا ہو جاتی ہیں‘ آپ یہ بھی آزما کر دیکھ لیں۔ فرمایا برا کرنے والوں کے ساتھ ہمیشہ نیکی کرو‘ یہ بھی آزما کر دیکھیں یہ عادت آپ کے دشمنوں کی تعداد کم کر دے گی۔ فرمایا اللہ نے جو دیا ہے اس پر خوش رہو‘ میرا تجربہ ہے ہم دوسرے پرندے کی کوشش میں ہاتھ کا پرندہ بھی اڑا بیٹھتے ہیں‘ ہمیں جو مل جائے ہم اگر اسے انجوائے کرنا سیکھ لیں تو یہ دنیا جنت ہو جاتی ہے۔فرمایا زیادہ نہ سویا کرو‘ زیادہ نیند یادداشت کو کمزور کر دیتی ہے‘ یہ بھی طبی لحاظ سے درست ہے‘ نیند موت کی پچھلی سٹیج ہے‘یہ بڑھ جائے تو ہمارے برین سیل مرنے لگتے ہیں چنانچہ سات گھنٹے سے کم اور آٹھ گھنٹے سے زیادہ نیند نہیں لینی چاہیے اور چالیسواں فرمان‘ فرمایا روزانہ کم از کم سو بار استغفار کیا کرو‘ یہ عادت بھی عبادت ہے آپ کر کے دیکھیں آپ کو نتائج حیران کر دیں گے۔ ہمارے رسولؐ کے چالیس اصول مکمل ہو گئے لیکن کیا یہ اصول امت میں موجود ہیں؟یہ ہم اگلے کالم میں ڈسکس کریں گے۔

مہمان کالم
میں نے برسوں پہلے انگریزی کی کسی طبی کتاب میں بہترین زندگی کے چالیس بہترین اصول پڑھے تھے‘ میں نے وہ صفحات کاپی کر کے اپنے پاس رکھ لئے‘ میں گاہے بگاہے یہ صفحات نکال کر پڑھتا رہتا تھا‘ میں ان اصولوں پر عمل کی کوشش بھی کرتا تھا‘ میں نے دس سال قبل تفاسیر اور احادیث کا مطالعہ شروع کیا تو پتہ چلا یہ چالیس اصول دنیا کے کسی طبی ادارے یا یورپ اور امریکا کے کسی سیلف ہیلپ انسٹی ٹیوٹ نے ڈویلپ نہیں کئے‘ یہ تمام اصول ہمارے پیارے رسولؐ کی حیات طیبہ کا نچوڑ ہیں‘ یہ سیرت البنیؐ سے اخذ کئے گئے ہیں‘ ہمارے رسولؐ نے پوری زندگی اپنے اصحابؓ کو ان اصولوں کی ٹریننگ دی‘ آپؓ کے صحابہ کرامؓ بہترین زندگی کے ان چالیس بہترین اصولوں کی چلتی پھرتی تصویر تھے‘ میں نے اس دن سے ان اصولوں پر عبادت کی طرح عمل شروع کر دیا‘ گو میں ابھی تک ان پر مکمل عملدرآمد نہیں کر سکا لیکن مجھے یقین ہے اللہ تعالیٰ میری توفیق میں ضرور اضافہ کرے گا اور میں کسی نہ کسی دن آپؐ کے وضع کردہ ان اصولوں پر عمل میں کامیاب ہو جاؤں گا‘یہ چالیس اصول کیا ہیں‘ آپ وہ اصول اور ان اصولوں کی جدید سائنسی توجہیات ملاحظہ کیجئے‘ مجھ سے اگر تشریح میں کوئی غلطی ہو جائے تو مجھے معاف کر دیجئے گا‘ میرے لئے دعا بھی فرمائیے گا۔آپؐ نے فرمایا فجر اور اشراق‘ عصر اور مغرب اور مغرب اور عشاء کے دوران سونے سے باز رہا کرو۔ اس فرمان میں بے شمار طبی حکمتیں پوشدہ ہیں‘ مثلاً آج میڈیکل سائنس نے ڈسکور کیا کرہ ارض پر فجر اور اشراق کے دوران آکسیجن کی مقدار سب سے زیادہ ہوتی ہے‘ہم اگر اس وقت سو جائیں تو ہم اس آکسیجن سے محروم ہو جاتے ہیں اور یوں ہماری طبیعت میں بوجھل پن آ جاتا ہے‘ ہم آہستہ آہستہ چڑچڑے اور بیزار ہو جاتے ہیں‘ عصر سے مغرب اور مغرب سے عشاء کے درمیان بھی آکسیجن کم سے کم تر ہوتی چلی جاتی ہے‘ ہم اگراس وقت بھی سو جائیں تو ہمارا جسم آکسیجن کی کمی کا شکار ہو جاتا ہے اور ہم دس مہلک بیمایوں میں مبتلا ہو جاتے ہیں‘ دمہ بھی ان دس بیماریوں میں شامل ہے چنانچہ آپ یہ اوقات جاگ کر گزاریں‘آپ پوری زندگی صحت مند رہیں گے‘ میرا تجربہ ہے ہم اگر ان تین اوقات میں واک کریں تو ہماری طبیعت میںبشاشیت آ جاتی ہے۔ آپؐ نے فرمایا‘بدبودار اور گندے لوگوں کے ساتھ نہ بیٹھا کرو۔یہ حکم بھی حکمت سے لبالب ہے‘ بدبو انسان کو ڈپریس کرتی ہے جبکہ خوشبو ہماری توانائی میں اضافے کا باعث بنتی ہے‘ انسان اگر روزانہ دس منٹ بدبو دار اور گندے لوگوں میں بیٹھنا شروع کر دے تو یہ بیس دنوں میں ڈپریشن کا شکار ہو جائے گا‘ ہمارے رسولؐ نے ہمیں شاید اسی لئے بدبودار لوگوں سے پرہیز کا حکم دیا‘آپ بھی یہ کر کے دیکھیں آپ کا مزاج بدل جائے گا۔آپؐ نے فرمایا ان لوگوں کے درمیان نہ سوئیں جو سونے سے قبل بری باتیں کرتے ہیں۔یہ فرمان بھی حکمت کے عین مطابق ہے‘ آج سائنس نے ڈسکور کیا نیند سے قبل ہماری آخری گفتگو ہمارے خوابوں کا موضوع ہوتی ہے اور یہ خواب ہمارے اگلے دن کا موڈ طے کرتے ہیں‘ ہم اگر برا سن کر سوئیں گے تو ہم برے خواب دیکھیں گے اور ہمارے برے خواب ہمارے آنے والے دن کا موڈ بن جائیں گے‘ ہم خوابوں کے طے کردہ موڈ کے مطابق دن گزارتے ہیں چنانچہ نیند سے قبل ہماری آخری محفل اچھی ہونی چاہیے۔
ہمارا اگلا دن اچھا گزرے گا۔ فرمایا تم بائیں ہاتھ سے نہ کھاؤ۔یہ فرمان بھی عین سائنسی ہے‘ہمارے دماغ کے دو حصے ہیں‘ دایاں اور بایاں‘ دایاں حصہ مثبت اور بایاں منفی ہوتا ہے‘ ہم جب اپنے جسم کو دائیں ہاتھ سے ”فیڈ“ کرتے ہیں تو ہماری مثبت سوچ مضبوط ہوتی ہے اور ہم جب اپنے بدن کو بائیں ہاتھ سے کھلاتے ہیں تو ہماری منفی سوچ طاقتور ہوتی چلی جاتی ہے‘ آپ مشاہدہ کر لیں آپ کو بائیں ہاتھ سے کھانے والے اکثر لوگ منفی ملیں گے‘ یہ آپ کو ہمیشہ شکوہ شکایت‘ غیبت اور دوسروں کو نقصان پہنچاتے نظر آئیں گے۔فرمایا منہ سے کھانا نکال کر نہ کھاؤ۔یہ فرمان بھی سائنس سے درست ثابت ہوتا ہے‘ ہمارے منہ میں دس کروڑ سے ایک ارب تک بیکٹیریا ہوتے ہیں‘ یہ بیکٹیریا مہلک جراثیم بن جاتے ہیں‘یہ جراثیم ہمارے کھانے میں مل جاتے ہیں‘ یہ کھانا معدے میں جاتا ہے تو معدے کے غدود ان جراثیم کو مار دیتے ہیں یوں یہ ختم ہو جاتے ہیں لیکن جب ہم جراثیم ملے کھانے کو منہ سے نکال لیتے ہیں تو ان جراثیم کو آکسیجن مل جاتی ہے‘ یہ آکسیجن سیکنڈ کے ہزارویں حصے میں ان جراثیم کی تعداد کھربوں تک پہنچا دیتی ہے‘یہ جراثیم معدے کے غدودوں سے بھی طاقتور ہوتے ہیں‘ ہم جب منہ سے نکلے لقمے کو دوبارہ منہ میں رکھتے ہیں تو یہ لقمہ معدے میں پہنچ کر زہر بن جاتا ہے اور یہ زہر ہمارے پورے نظام ہضم کو تباہ کر دیتا ہے‘ آپ کو زندگی میں کبھی کوئی ایسا شخص صحت مند نہیں ملے گا جسے منہ سے لقمہ نکال کر کھانے کی عادت ہو جبکہ آپ کو ہونٹ بھینچ کر اور آواز پیدا کئے بغیر کھانے والے لوگ ہمیشہ صحت مند ملیں گے۔ہمارے رسول ؐ نے فرمایا ہاتھ کے کڑاکے نہ نکالا کرو۔سائنس کا کہنا ہے ہم میں سے جو لوگ انگلیوں کے کڑاکے نکالتے رہتے ہیں ان کے جوڑ کھلنا شروع ہو جاتے ہیں اور یہ جلد آرتھریٹس کا شکار ہو جاتے ہیں‘ یہ جوڑوں کے درد کی شکایت بھی کرتے ہیں۔ فرمایا جوتا پہننے سے قبل اسے جھاڑ لیا کرو۔ہماری زندگی کے عام واقعات میں کیڑے مکوڑے‘ بچھو‘ چھپکلیاں‘ چھوٹے سانپ اور بھڑیں ہمارے جوتوں میں پناہ لے لیتی ہیں‘ ہمارے بچے بھی جوتوں میں کیل‘ کانٹے اور بلیڈ پھینک دیتے ہیں چنانچہ ہم جب جوتا پہنتے ہیں تو ہمارے پاؤں زخمی ہو جاتے ہیں یا پھر ہمیں کیڑے مکوڑے کاٹ لیتے ہیں لہٰذا جوتا پہننے سے قبل اسے جھاڑ لینا ہمیشہ فائدہ مند رہتا ہے۔فرمایا نماز کے دوران آسمان کی طرف نہ دیکھو‘یہ فرمان بھی درست ہے‘ آسمان میں ایک وسعت ہے‘ یہ وسعت ہمیشہ ہماری توجہ کھینچ لیتی ہے‘ ہم جب بھی آسمان کی طرف دیکھتے ہیں ہماری توجہ بٹ جاتی ہے‘ہمیں توجہ واپس لانے میں ٹھیک ٹھاک وقت لگتا ہے‘ نماز کیلئے یکسوئی درکار ہوتی ہے‘ ہم جب نماز کے دوران آسمان کی طرف دیکھتے ہیں تو ہم سجدے اور رکوع بھول جاتے ہیں چنانچہ حکم دیا گیا نماز کے دوران آسمان کی طرف نہ دیکھو‘ یہ فارمولہ تخلیقی کاموں کیلئے بھی اہم ہے۔
اگر لکھاری لکھتے‘ مصور تصویر بناتے اور موسیقار دھن بناتے ہوئے آسمان کی طرف دیکھ لے تو اس کا تسلسل ٹوٹ جاتا ہے‘یہ اپنا کام مکمل نہیں کر پاتا شاید یہی وجہ ہے دنیا کا زیادہ تر تخلیقی کام بند کمروں میں مکمل ہوا‘ یہ کھلی فضا میں پروان نہیں چڑھا‘ بیتھون کی سمفنیاں ہوں‘ ڈاونچی کا لاسٹ سپر ہو یا پھر ٹالسٹائی کا وار اینڈ پیس دنیا کا ہر ماسٹر پیس بند کمرے میں تخلیق ہوا‘ آپ تخلیق کا آئیڈیا لینا چاہتے ہیں تو آپ کھلے آسمان کے نیچے کھلی فضا میں واک کریں‘آپ آئیڈیاز سے مالا ہول ہو جائیں گے لیکن آپ اگر ان آئیڈیاز پر کام کرنا چاہتے ہیں تو پھر آپ کمرے میں بند ہو جائیں‘ آپ کمال کر دیں گے‘ آپ کو انبیاء‘ اولیاء اور بزرگان دین بھی بند غاروں میں مراقبے کرتے ملیں گے‘ یہاں تک کہ مہاتما بودھ کو نروان بھی ایک ایسے درخت کے نیچے ملا تھا جس سے آسمان دکھائی نہیں دیتا تھا‘ وہ درخت اتنا گھنا تھا کہ وہ بارش تک روک لیتا تھا۔ آپؐ نے فرمایا رفع حاجت کی جگہ (ٹوائلٹ) مت تھوکو۔ یہ حکم اپنے اندر دو حکمتیں رکھتا ہے‘ٹوائلٹ میں تھوکنے سے بعد میں آنے والوں کو بھی تکلیف ہوتی ہے اور دوسرا ٹوائلٹس میں لاکھوں قسم کے جراثیم بھی ہوتے ہیں‘ ہم جب تھوکنے کیلئے منہ کھولتے ہیں تو یہ جراثیم ہمارے منہ میں پہنچ جاتے ہیں‘ یہ ہمارے لعاب دہن میں پرورش پاتے ہیں‘یہ معدے اور پھیپھڑوں میں پہنچتے ہیں اورپھر یہ ہمیں بیمار کر دیتے ہیں‘ آپ کو یہ جان کر حیرانی ہو گی ہماری ناک جراثیم کو پھیپھڑوں تک نہیں جانے دیتی‘ ہماری ناک سے صرف کیمیکلز جسم میں داخل ہوتے ہیں‘ جراثیم زیادہ تر منہ سے بدن میں اترتے ہیں اور ان کا بڑا سورس ٹوائلٹس ہوتے ہیں چنانچہ آپ ٹوائلٹ میں لمبی لبی سانس لینے‘ تھوکنے‘ گانا گانے‘ آوازیں دینے اورموبائل فون پر بات کرنے سے پرہیز کریں‘ آپ کی صحت اچھی رہے گی۔آپؐ نے فرمایا لکڑی کے کوئلے سے دانت صاف نہ کرو۔ ہم میں سے بے شمار لوگ کوئلے سے دانت صاف کرتے ہیں‘ کوئلے سے ہمارے دانت وقتی طور پر چمک جاتے ہیں لیکن یہ بعد ازاں مسوڑے بھی زخمی کر دیتاہے‘ دانتوں کی جڑیں بھی ہلا دیتا ہے اور یہ منہ میں بو بھی پیدا کرتا ہے‘ لکڑی کا کوئلہ سیدھا سیدھا کاربن ڈائی آکسائیڈ ہوتا ہے‘ یہ ”ہائی جینک“ بھی نہیں ہوتا چنانچہ رسول اللہ ﷺ نے اس سے پرہیز کا حکم دیا۔ آپؐ نے فرمایا ہمیشہ بیٹھ کر کپڑے تبدیل کیا کرو۔ ہم میں سے اکثر لوگ شلوار‘پتلون یا پائجامہ پہنتے وقت اپنی ٹانگ پھنسا بیٹھتے ہیں اور گر پڑتے ہیں‘ ہم میں سے ہر شخص زندگی میں کبھی نہ کبھی اس صورتحال کا شکار ضرور ہوتا ہے بالخصوص ہم بڑھاپے میں شلوار یا پتلون بدلتے وقت ضرور گرتے ہیں‘ آپؐ نے شاید اس قسم کے حادثوں سے بچنے کیلئے یہ حکم جاری فرمایاتھا اور آپؐ نے فرمایا اپنے دانتوں سے سخت چیز مت توڑا کرو۔ ہم لوگ اکثر بادام‘ اخروٹ یا نیم پکا گوشت توڑنے کی کوشش میں اپنے دانت تڑا بیٹھتے ہیں‘ دانت ایکٹو زندگی کا قیمتی ترین اثاثہ ہوتے ہیں‘ آپؐ نے شاید اسی لئے دانتوں کو سخت چیزوں سے بچانے کا حکم دیا۔ نوٹ: یہ کامیاب صحت مند زندگی کے بارہ اصول ہیں‘ 28 ابھی باقی ہیں‘ یہ آپ اگلے کالم میں ملاحظہ کیجئے گا۔

مہمان کالم
سموگ کا آغاز لندن سے ہوا تھا‘ لوگ 5 دسمبر 1952ءکی صبح اٹھے توشہر گہرے سیاہ دھوئیں میں ڈوب چکا تھا‘ ہاتھ کو ہاتھ سجائی نہیں دے رہا تھا‘ حد نظر صفر ہو چکی تھی‘ گاڑیاں گاڑیوں کو نظر نہیں آ رہی تھیں‘ ٹرین ڈرائیور پٹڑی نہیں دیکھ پا رہے تھے‘ پائلٹس کو رن وے نظر نہیں آ رہا تھااوربچے والدین اور میاں بیوی ایک دوسرے کو دکھائی نہیں دے رہے تھے‘ پورا شہر دھند میں گم تھا‘ شام کے وقت پتہ چلا یہ دھند دھند نہیں یہ عذاب ہے‘ یہ گاڑھا سیاہ دھواں ہے‘ یہ دھواں اگلے دن چار ہزار لوگوں کی جان لے گیا‘ لوگ کھانس کھانس کر دم توڑنے لگے‘ لندن کی سماجی زندگی رک گئی‘ ٹریفک بند ہو گئی‘ ٹرینیں معطل ہو گئیں‘ فلائیٹس منسوخ ہو گئیں‘ دفتروں اور سکولوں میں چھٹی ہو گئی‘ شاپنگ سنٹرز بند ہو گئے اور لوگوں نے گھروں سے باہر نکلنا ترک کر دیا‘ شہر میں سناٹا تھا‘یہ سناٹا ایمبولینسز کی آوازوں سے پنکچر ہوتا تھا‘ قبرستان بھر چکے تھے اور ہسپتالوں میں مردے اور بیمار دونوں ایک بیڈ پر پڑے تھے‘ یہ عذاب پانچ دن جاری رہا‘ نو دسمبر کی رات بارش شروع ہوئی اور فضا آہستہ آہستہ دھل گئی لیکن اموات کا سلسلہ جاری رہا‘ دسمبر کے آخر تک لندن کے بارہ ہزار لوگ انتقال کر چکے تھے جبکہ ڈیڑھ لاکھ لوگ دمے‘ آشوب چشم‘ ٹی بی اور نروس بریک ڈاؤن کا شکار تھے‘ ماحولیات کے ماہرین نے تحقیقات شروع کر دیں‘ پتہ چلا 5 سے 9 دسمبر کے دوران لندن کی فضا میں روزانہ ہزار ٹن سموک پارٹیکلز پیدا ہوتے رہے‘ ان میں 140 ٹن ہائیڈرو کلورک ایسڈ‘ 14 ٹن فلورین کمپاؤنڈ اور 370 ٹن سلفر ڈائی آکسائیڈ شامل ہوتی تھی‘ یہ تمام مادے صحت کےلئے انتہائی مضر تھے‘ ماہرین نے سوچنا شروع کیا ”یہ تمام پارٹیکلز آئے کہاں سے تھے“ پتہ چلا یہ ساڑھے سات سو سال کی غلطیوں کا دھواں ہے‘ یہ سلسلہ 1200ءمیں شروع ہوا تھا‘ ساڑھے سات سو برسوں میں لندن کی آبادی میں دس گناہ اضافہ ہو گیا‘ جنگل کٹ گئے‘ ندیاں اور جھیلیں ختم ہو گئیں‘ گاؤں دیہات شہر میں آ گئے‘ کھیت کھلیانوں کی جگہ ہاؤسنگ سوسائٹیاں بن گئیں‘ صنعتی انقلاب آیا‘ شہر میں ہزاروں فیکٹریاں لگ گئیں‘ بجلی ایجاد ہوئی‘ کوئلے سے چلنے والے پاور پلانٹ لگ گئے‘ ٹرین سروس شروع ہوئی‘ ٹرام آئی‘ گاڑیاں آئیں‘ تعمیرات شروع ہوئیں‘ دوسری جنگ عظیم نے بھی دھواں اڑایا اور آخر میں لوگ بھی آلودگی پھیلانے لگے چنانچہ لندن کی فضا آلودہ ہوتی چلی گئی‘ ہوا میں آکسیجن کم ہو گئی‘ یہ سلسلہ چلتے چلتے 1952ءتک پہنچ گیا‘ سردی شروع ہوئی‘ لوگوں نے اپنی انگیٹھیوں میں کوئلہ جلایا‘ لاکھوں ٹن دھواںپیدا ہوا‘ یہ دھواں ساڑھے سات سو سال کی آلودگیوں میں ”مکس اپ“ ہوا‘ دسمبر کی دھند میں ملا اور گہری‘ دبیز اور سیاہ گیس میں تبدیل ہو گیا اور یہ گیس پانچ دن شہر کے اندر گھومتی پھرتی رہی‘ ماہرین نے اس دھند کو سموک اور فاگ دو لفظ ملا کر ”سموگ“ کا نام دے دیا اور لندن کے اس ”سانحے کو گریٹ سموگ آف لندن“ قرار دے دیا۔ماحولیات کے ماہرین نے سموگ کی تشخیص کر لی‘ اب علاج کی باری تھی‘ علاج کی ذمہ داری کنزرویٹو پارٹی کے ایم پی سر گیرالڈ ڈیوڈ نے لی‘ یہ شریف خاندان کی طرح بزنس مین اور کارخانے دار تھے‘ یہ 1950ءمیں سیاست میں آئے ‘ یہ گریٹ سموگ آف لندن کے دنوں میں ہاؤس آف کامنز کے تازہ تازہ رکن بنے تھے‘ یہ اٹھے اور لندن کی فضا کو صاف کرنے کا پلان بنانا شروع کر دیا‘ یہ ماہرین کے ساتھ مل کر چار سال منصوبہ بندی کرتے رہے یہاں تک کہ انہوں نے 1956ءمیں ”کلین ائیر ایکٹ“ بنا لیا‘ یہ ایکٹ ہاؤس آف کامنز میں پیش ہوا اور ایوان نے 5 جولائی 1956ءکو اس کی منظوری دے دی‘ یہ ایکٹ چھ بنیادی اصلاحات پر مشتمل تھا‘ حکومت نے شہر کے اندر کوئلے کے استعمال پر پابندی لگا دی‘ عوام کو ”فائر پلیس“ کےلئے متبادل ذرائع فراہم کرنے کا اعلان کر دیا گیا‘ حکومت نے ایک سال میں یہ ذرائع فراہم کر دیئے‘ ماڈرن ہیٹنگ سسٹم اسی ایکٹ کی پیداوار تھا‘ سردیوں میں بجلی بھی سستی کرنے کا فیصلہ کیا گیا تاکہ لوگ بجلی کے ذریعے گھر گرم کر لیں‘ حکومت نے شہر کے اندر فیکٹریاں بند کر دیں‘ مالکان کو شہر سے دور مفت جگہ بھی فراہم کی گئی‘ ٹیکس میں گنجائش بھی اور فیکٹریاں شفٹ کرنے کےلئے قرضے بھی دیئے گئے۔
بجلی کے تمام پلانٹس دو برسوں میں لندن سے دور جنگلوں میں منتقل کر دیئے گئے‘ لندن اور لندن کے اطراف میں درخت کاٹنا‘ زرعی زمینوں کے سٹیٹس میں تبدیلی اور گرین ایریاز کے خاتمے پر پابندی لگا دی گئی‘ ملکہ تک کو درخت کاٹنے سے قبل تحریری اجازت کا پابند بنا دیا گیا اور پبلک ٹرانسپورٹ میں اضافے‘ پرائیویٹ گاڑیوں کی حوصلہ شکنی اور پٹرول کے معیار کو بلند کرنے کا فیصلہ کیا گیا‘ ہاؤس آف کامنز نے ان اصلاحات کی منظوری دی‘ حکومت نے کام شروع کیا اور ایکٹ کی منظوری کے صرف چار سال بعد 1960ءمیں لندن کی فضا مکمل طور پر ”سموگ فری“ ہو گئی‘ یہ ایکٹ اس قدر مکمل اور سخت تھا کہ سرگیرالڈ ڈیوڈ کو خود اس کا نقصان اٹھانا پڑا‘ ان کی اپنی فیکٹریاں بھی لندن سے باہر منتقل ہوئیں۔ہم اب گریٹ سموگ آف لندن سے گریٹ سموگ آف لاہور کی طرف آتے ہیں‘ پنجاب پچھلے تین برسوں سے شدید سموگ کا شکار چلا آ رہا ہے‘ نومبر کے مہینے میں لاہور‘ بہاولنگر‘ پاکپتن‘ فیصل آباد اور ٹوبہ ٹیک سنگھ زہریلی دھند میں گم ہو جاتے ہیں‘پنجاب اس بار بھی سموگ میں دفن ہے‘ ہماری فضا میں اگر 80 مائیکرو گرام زہریلے مادے ہوں تو ہمارے پھیپھڑے انہیں برداشت کر جاتے ہیں لیکن لاہور اور اس کے مضافات میں اس وقت آلودگی کی شرح 200مائیکرو گرام کیوبک میٹر ہے‘ ہم اگر فضا کا ٹیسٹ کریں تو ہمیں اس میں کاربن مانو آکسائیڈ‘ سلفر اور نائیٹروجن کی بھاری مقدار ملے گی‘ یہ تمام مادے زہر ہیں‘ لاہور کی فضا میں تین سو سے چار سو فٹ تک آکسیجن کی شدید کمی بھی ہے‘ یہ فضا کتنی مضر صحت ہے آپ اس کا اندازہ سگریٹ سے لگا لیجئے‘ ہم اگر روزانہ 50 سگریٹ پئیں تو ہمارے پھیپھڑوں کو اتنا نقصان ہو گا جتنا لاہور کی فضا میں ایک دن سانس لینے سے ہو رہا ہے‘ بھارت ہم سے بھی بری صورتحال کا شکار ہے‘ بھارت میں 2012ءمیں سموگ کی وجہ سے پندرہ لاکھ لوگ مر گئے ‘ لاہور میں بھی اس سال چار لاکھ لوگ متاثر ہوئے ہیں‘ یہ لوگ 2018ءکے دوران انتقال فرما جائیں گے۔یہ سموگ کہاں سے آ رہی ہے‘ یہ سوال بہت اہم ہے‘ اس کے چار بڑے سورس ہیں‘ پہلا سورس بھارتی پنجاب کا شہر ہریانہ ہے‘ ہریانہ میں دس سال میں چاول کی فصل میں آٹھ گنا اضافہ ہوا‘ ہریانہ کے کسان ا کتوبر کے آخر میں چاول کے پودے کے خشک ڈنڈل اور خالی سٹے جلاتے ہیں‘ بھارتی کسانوں نے اس سال 3 کروڑ 50 لاکھ ٹن ڈنڈل جلائے‘ ڈنڈلوں کے دھوئیں نے دہلی سے لے کر لاہور تک پورے پنجاب کی مت مار دی‘ دو‘ لاہور کی فیکٹریوں میں اضافہ ہوتا جا رہا ہے‘ یہ فیکٹریاں دھواں پیدا کر رہی ہیں‘ تین‘ حکومت نے لاہور کے گردونواح میں درجن کے قریب بڑے پاور پلانٹس لگائے‘ بجلی کا ایشو ختم ہو گیا لیکن فضا آلودہ ہو گئی اور چوتھا سورس گاڑیاں ہیں‘ لاہور شہر میں دس لاکھ گاڑیاں ہیں‘ ہمارے پٹرول کا معیار انتہائی پست ہے چنانچہ یہ گاڑیاں چلتا پھرتا سموگ ہیں‘ ان چاروں سورسز کے علاوہ بھی سورسز ہیں‘ لاہور میں ٹائروں کو جلا کر تاریں اور تیل حاصل کیا جاتا ہے‘ شہر میں ٹائر جلانے والے سینکڑوں احاطے ہیں اور سیالکوٹ ریجن میں بھی اس موسم میں مونجی کی باقیات جلائی جاتی ہیں‘ لاہور کی آبادی بھی پھیل رہی ہے‘ مضافات میں جنگل‘ کھیت اور کھلیان بھی ختم ہو رہے ہیں اور دیہات بھی‘ آپ لاہور کے گرد ہاؤسنگ سوسائٹیوں کا ڈیٹا نکال کر دیکھ لیجئے‘ آپ سر پیٹ کر رہ جائیں گے۔
یہ ان سوسائٹیوں کا کمال ہے‘ ہم اب سبزیاں‘ پھل اور اناج بھی چین سے امپورٹ کر رہے ہیں‘ ہم امرود‘ تربوز‘ آڑو‘ کینو اور آم بھی درآمد کر رہے ہیں چنانچہ لاہور تیزی سے سموگ میں ڈوبتا چلا جا رہا ہے۔ہمیں ماننا ہوگا ترقی انتہائی اہم ہے‘ ہمیں یہ بھی ماننا ہوگا میاں شہبا زشریف نے پنجاب کےلئے بے تحاشہ کام کیا‘ لاہور اس وقت ملک کا خوبصورت اور ترقی یافتہ ترین شہر بن چکا ہے‘ پنجاب میں انگریز کے بعد پہلی مرتبہ اتنے بڑے پیمانے پر ترقیاتی کام ہوئے۔ ہمیں بہرحال میاں شہباز شریف کو اس کا کریڈٹ دینا ہوگا لیکن اس کے ساتھ ساتھ یہ بھی حقیقت ہے ترقی کا جھنڈا لاشوں پر نہیں لگا کرتا‘ پنجاب اگر اس ترقی کے ہاتھوں بیمار ہو گیا یا لوگ اگر مرنا شروع ہو گئے تو یہ ذمہ داری بھی بہرحال میاں شہباز شریف کے کندھوں پر جائے گی چنانچہ میری درخواست ہے پنجاب حکومت فوری طور پر کلین پنجاب کمیشن بنائے‘ فضائی آلودگی کی وجوہات تلاش کرے‘ اصلاحات کرے‘ اسمبلی سے منظوری لے اور لاہور کو لندن کی سپرٹ سے صاف کرنا شروع کر دے‘لاہور اور اس کے گردونواح میں اصلی شجرکاری کرائے‘ فیکٹریاں باہر شفٹ کرائے‘ گاڑیوں کی تعداد کنٹرول کرے‘ پٹرول کا معیار بہتر بنائے‘ کوڑا‘ ٹائر اور کوئلہ جانے پر پابندی لگائے اور درخت کاٹنے کی سزا متعین کرے‘ حکومت کلین ائیر لندن ایکٹ سے بھی مدد لے سکتی ہے اور یہ بھوٹان ماڈل کو بھی سٹڈی کر سکتی ہے‘ یہ بھارتی حکومت کے ساتھ مل کر دھان کی باقیات جلانے پر بھی پابندی لگا سکتی ہے اور یہ بچوں کے سلیبس میں ماحولیات کا مضمون بھی متعارف کرا سکتی ہے‘ یہ اقدامات ضروری ہیں ورنہ دوسری صورت میں پنجاب بالخصوص لاہور ایک ترقی یافتہ قبرستان بن جائے گا اور اورنج لائین ٹرین مردے ڈھونے کے کام آئے گی۔ کیا میاں شہبازشریف یہ پنجاب چاہتے ہیں۔

تحریر:طاہر کلاسرہ
چیف جسٹس آف پاکستان نے کہا ہے کہنا تو نہیں چاہتے تھے مگر بات نکلی ہے تو بتادیتے ہیں کہ عدالت کہ باہر جو کچھ ہورہا ہے اس پر انتہائی صبر وتحمل کا مظاہرہ کررہے ہیں داد دیں کہ ہم سب ہنستے ہیں لیکن انصاف سے نہیں ہٹتے کمال دیکھیے باتیں ہورہی ہیں مگر ہم ٹس سے مس نہیں ہورہے ، دنیا میں اجر ملے نہ ملے صبروتحمل پر آخرت میں اجر ضرور ملے گا۔ ہماری شان اور انصاف میں کمی نہیں آئے گی ایسی باتوں اور واقعات کو مقدمات پر اثر انداز نہیں ہونے دینگے۔ ان کا یہ بھی کہنا تھا کہ کسی کےلئے اپنے کام میں ڈنڈی کیوں ماریں ججز اور عدلیہ کو جو عزت ملی اس سے زیادہ کوئی کیا دے سکتا ہے عدلیہ اورقانون کو تنقید کا نشانہ بنایا جارہاہے کیا یہ حب الوطنی ہے؟ریمارکس انہوںنے عمران خان کے کیس میں دئیے چیف جسٹس کا یہ بھی کہنا تھا چاہے کچھ بھی ہوجائے انصاف کا دامن نہیں چھوڑیں گے۔ دوسری طرف چیف جسٹس لاہور ہائیکورٹ نے ایک تقریب میں کہا کہ جج طاقتور کے خلاف فیصلہ کرتے ہوئے نتیجہ کا نہ سوچیں آپ کا یہ بھی کہنا تھا کہ ہمیں اپنے لینے نہیں بلکہ ادارہ اور ملک کی فلاح وبہبود کےلئے سوچنا چاہیے لیڈرشپ کو باصلاحیت اور مصنف کو بے خوف ہونا چاہیے۔ہرفرد کا معاشرہ میں رول ہے المیہ یہ ہے ہم میں سے کوئی بھی اپنے حصے کا کام کرنے کےلئے تیار نہیں۔ نظام کو بدلنے کےلئے ٹیکنالوجی کا سہارا لے رہے ہیں یہ باتیں بہت اچھی ہیں لیکن لوگوں کو انصاف کے حصول کےلئے بہت تکالیف ہیں خصوصی طور پر ضلعی عدلیہ جہاں سے انصاف کا عمل شروع ہوتا ہے اس پر توجہ دینے کی ضرورت ہے اور عدلیہ کو مقدس گائے بنانے کی بجائے لوگوں کو یہ بتانے کی بھی ضرورت ہے کہ ان کے خلاف بھی ایکشن ہوتا ہے اور ججز کو نوکریوں سے بھی نکالا جاتا ہے اور ان کو تلقین بھی کی جائے کہ صبر وتحمل کا دامن ہاتھ سے نہ چھوڑیں میرے والد مہر منظور الٰہی کلاسرہ سینئر ترین ایڈووکیٹ ہیں ان کا بھی کہنا ہے کہ اگر ضلعی عدلیہ انصاف کو یقینی بنائیں اور ڈنڈی نہ مارے اور کرپشن سے پاک ہوجائے تقریباً 80فیصد انصاف کا مرحلہ مکمل ہوجائے گا ۔ ججز اپنا بھی احتساب کریں۔ لیکن ایسا نہیں ہوتا جس سے مسائل جنم لیتے ہیں اور انصاف کے عمل میں رکاوٹ پیش ہوتی ہے ۔مجھے امید ہے چیف جسٹس اس عمل کو بھی یقینی بنائیں گے اور اعلیٰ عدلیہ بھی اپنا موثر کردار ادا کرے گی عدلیہ خود نہیں بولتی بلکہ اس کے فیصلے بولتے ہیں۔ اور اس سلسلے میں سیاستدان سے بھی گزارش ہے کہ وہ عدلیہ کو متنازعہ بنانے کی بجائے اسے مضبوط بنائیں اور غلط فیصلوں کی نشاندہی کریں ادھر میاں نوازشریف نے اعلیٰ عدلیہ کے خلاف ایک طرح کا اعلان جنگ کیا ہوا ہے۔ ان کا یہ کہنا ہے کہ یہ عدلیہ آمروں کو تحفظ دیتی ہے بھاگنے والے نہیں ان کا یہ بھی کہنا ہے کہ عدالتوں کا پہلا بھی سامنا کیا ہے اب بھی کریں گے۔ جنوںنے بھاگنا ہے وہ بھاگ گئے ہیں ہم سرخرو ہوں گے۔ ان کا یہ بھی کہنا ہے کہ قانون اور انصاف شرمندہ ہے گویا وہ میاں صاحب کسی طور پر اپنے خلاف ہونے والے فیصلہ کو تسلیم نہیں کررہے ان کی صاحبزادی مریم نواز کا کہنا ہے کہ دلیل نہ ہونے پر منصف مخالف وکیل بن گئے ۔ وہ اس انصاف سے مطمئن نظر نہیں آرہے۔ انصاف ان کو صرف وہ نذر آتا ہے جو ان کے حق میں ہو۔ عدلیہ پر تنقید کرنے کے باوجود آخر کار ان کو دوبارہ اسی عدالت اعلیٰ کا دروازہ کھٹکٹھانا پڑا۔ تو پھر تنقید کی کیا ضرورت ہے۔ انہوںنے اپنے خلاف دئیے گئے فیصلے پر نظر ثانی کی درخواست دی جس پر اعلیٰ عدلیہ نے اپنا تفصیلی فیصلہ جاری کیا ہے۔ جس پر ایک محاورہ یاد آگیا ہے۔( نمازاں بخشاوان گئے تے روزے وی لے آئیں)نظرثانی کی درخواست پر سپریم کورٹ نے کہا کہ نوازشریف نے عدلیہ کو بے وقوف بنایا عدالت کا یہ کہنا تھا پارلیمنٹ و عوام حتی کہ عدالت کو بھی سچ نہیں بتایا ہم نے غیر متنازع فیصلہ دیا تاہم احتساب عدالت اپنے فیصلہ میں آزاد ہے۔ سپریم کورٹ کے اس ریمارکس کے بعد میرے خیال میں کوئی گنجائش نہیں بچی میاں نوازشریف صاحب کو شاید پتہ نہیں کہ فیصلے عدالتی نظام میں ہمیشہ کےلئے محفوظ ہوجاتے ہیں اور تاریخ کاحصہ بن جاتے ہیں اورعدالت نے ان کو جھوٹا قرار دیا ہے اور ریمارکس دئیے کہ انہوں نے عدلیہ کو بے وقوف بنایا ہے یہ فیصلہ تو ہمیشہ آپ کے ساتھ رہے گا۔ اگرچہ بے وقوف عوام شاید یہ سب کچھ بھول جائے مگر فیصلے قائم رہیں گے غلط یا صحیح اسی کا فیصلہ وقت کرے گا مگر اب تک حالات ان کے خلاف جارہے ہیں اور ان سے غلطیوں پرغلطیاں ہورہی ہیں اور وہ اسٹیبلشمنٹ کے خلاف محاذ کھڑا کرکے اپنے آپ کو مزید مسائل سے دوچار کررہے ہیں۔ سپریم کورٹ کورٹ میں حدیبیہ پیپرز مل کا کیس بھی کھل گیا ہے آنے والے وقتوں میں اس کا کیا فیصلہ ہوتا ہے لیکن شریف برادران کےلئے پریشانیاں مزید بڑھ سکتی ہیں آگے جو دکھائی دے رہاہے احتساب کا عمل تیزہوگا کئی برج اس کی لپیٹ میں آئیں گے اس موقع پر توقع کی جارہی ہے کہ احتساب کا عمل سب پر لاگو ہو اور اس باریک چکی میں سب پسیں اس کا فیصلہ بھی آنا والا وقت کرے گا لیکن عوام کو ایک امید سی بندھی ہوئی ہے کہ اب ملک سے شاید کرپٹ عناصر کا خاتمہ ہو۔ سیاستدانوں نے بھی یہ تہیہ کرلیا ہے کہ اور کوشش بھی کررہے ہیں کہ ایسی قانون سازی کی جائے کہ احتساب کا عمل رک جائے اور نیب کو ختم کیا جائے اورکوئی اورراستہ نکالاجائے ان کی یہ بھی کوشش ہے کہ اب کی بار عدلیہ اورجنرل بھی احتساب کی زد میں آئیں۔ بیوروکریسی تو ویسے ہی سیاستدانوں کو کرپٹ کرنے میں اپنا حصہ ڈالتی ہیں یوں توپتہ نہیں سیاستدان اپنی اس کوشش میں کامیاب ہوتے ہیں یا نہیں۔لیکن ایک احتساب کاخوف ان پر سوار ضرور ہے ایک یہی اس چیز کی دلیل ہے کہ ملک میں قانون کی بالادستی قائم ہونے جارہی ہے لیکن کسی ایک فرد واحد یا پارٹی کا احتساب بھی ٹھیک نہیںبے رحمانہ احتساب کیا جائے چاہے اس کےلئے کسی قسم کی بھی قربانی دی جائے اب کی بار عوام نے امید بندھی ہے اسے نہ ٹوٹنے دیا جائے۔ عوام خود بھی اپنا احتساب کرے اور ان لٹیروں کو رد کرکے صاف ستھری قیادت کو سامنے لائے۔جو ملک اور عوام کی بہتری کےلئے کام کریں اور اس ملک کو آگے لے کر چلے نوجوان نسل کو بھی متحرک کرنے کی ضرورت ہے تاہم ایک بات تو طے ہے کہ تبدیلی کی لہر توچل پڑھی۔ اچھے کو اچھا اور برے کو برا کہنا شروع کردیا گیا ہے اور یہی اس ملک کے لوگوں کی جیت ہے اوریہی عوام کی جیت ہے۔

تحریر: وقاص افضل
تین گلیاں چھوڑ کر نکڑ والا مکان آج بھی سنسان ہے، اُس بے آباد گھر کے بارے میں بچپن میں اتنی کہانیاں سنیں کہ بیس، بائیس برس گزرنے کے باوجود بھی تنہا گلی سے گزرتے خوف محسوس ہوتا ہے۔ آسیب زدہ مکان کے بارے میں مشہور تھا کہ آدھی رات کے وقت سر کٹا انسان وہاں سے نکل کر گلیوں میں مٹرگشت کرتا ہے۔ اسی لیے گھر فروخت ہوسکا نہ کرایے دار آئے، قبضہ مافیا کی خواہشات کی تکمیل میں بھی یہی کہانیاں حائل رہیں۔ بچپن اور لڑکپن میں انہی دو باتوں پر زیادہ غور و فکر کرتے رہے کہ وہ بغیر سر والا آدمی کون ہے؟ اور ڈبلیو ڈبلیو ایف کی ریسلنگ حقیقی ہوتی ہے یا نہیں؟ خیر یہ دونوں سوال ہنوز جواب طلب ہیں اور ان کے بارے میں متضاد آراء بھی موجود
ہیں۔
عمر کچھ پختہ ہوئی تو معلوم ہوا کہ ایسی باتوں کے لیے conspiracy theories یعنی سازشی نظریات کی اصطلاح موجود ہے۔ عموماً یہ میدان سیاست میں وقوع پذیر ہونے والے اُن واقعات کے حوالے سے استعمال کی جاتی ہے، جن کی درپردہ حقیقت معلوم نہ کی جاسکے اور متضاد موقف موجود ہوں۔ ماضی میں صدر کینیڈی کے قتل اور سانحۂ نائن الیون کو لے کر ایسی بہت سی کہانیاں وجود میں آئیں۔ مسلمانوں کے زوال کے اسباب پر ہونے والی بیشتر تحقیق بھی انہی سازشی نظریات کے گرد گھومتی نظر آتی ہیں۔
کہیں کہیں یہ بھی کہا جاتا ہے کہ نظریۂ سازش کا سہارا لے کر کارروائیوں کا آغاز سب سے پہلے سی آئی اے نے کیا، کیوںکہ امریکی آئین تب تک جارحیت کی نفی کرتا ہے، جب تک اُس کے مفادات کو کوئی دوسرا ملک نقصان نہ پہنچائے، اس لیے رائج موقف یہ ہے کہ امریکا کو جہاں کارروائی مطلوب ہو، وہ وہاں پہلے ایسے حالات پیدا کرتا ہے، جن سے اس کی دخل اندازی کا
جواز نکالا جاسکے، لیکن امریکی ایجنسی کے ساتھ منسوب باتوں سے قبل بھی اقوام عالم نے محاذ آرائی کے لیے اس کا استعمال کیا ہے۔ درحقیقت جب سے انسان ہے تب سے نظریۂ سازش موجود ہے۔ بے نظیر بھٹو کے ہم سے بچھڑنے والے واقعے سے متعلق بھی ایسی بہت سی کہانیاں زیر گردش ہیں۔ اہم قومی و بین الاقوامی واقعات کے حوالے سے ایسی باتیں اور اُن کے درپردہ سازشوں کے حوالے سے کہانیوں کا جنم لینا لازمی سا امر لگتا ہے اور کوئی اتنی اچنبھے کی بات بھی نہیں سمجھی جاتی، لیکن ہمارے ہاں یونین کونسل کے انتخابات سے ہی نظریۂ سازش کی باتیں شروع ہوجاتی ہیں اور جنرل کونسلر کے ہارنے میں بھی اسٹیبلشمنٹ کا ہاتھ نظر آتا ہے۔ ایسی ایسی منطق پیش کی جاتی ہے کہ سامع کے سکتے میں آنے کے قوی امکانات ہوتے ہیں۔
ایک جاننے والے انکل یونین کونسل کے الیکشن سے ٹکٹ لینے کی جہد کا آغاز کرتے ہیں اور لاہور چیمبر آف کامرس کے انتخابات سے ہوتے ہوئے قومی اسمبلی تک جاپہنچتے ہیں، ہر طرف سے یکساں انکار ہونے کے درپردہ بھی اُنہیں نادیدہ قوتیں ہی نظر آتی ہیں۔
ہماری کرکٹ ٹیم خواہ آٹھویں نمبر پر کیوں نہ ہو نویں پر سرکنے سے بچانے کے لیے پھونک پھونک کے قدم رکھنے پڑتے ہوں، پھر بھی دوسرے، تیسرے درجے پر براجمان ٹیم سے ہار جائے تو سازشی نظریات کے پیروکار طرح طرح کی باتیں شروع کردیتے ہیں کہ میچ فکس تھا، کھلاڑی تو کجا حکومت وقت بھی ملوث ہے۔ ایسے ہی کبھی نچلے نمبرز پر ہوتے ہوئے جیتنا شروع کردے تو بھی یہی سمجھا جائے گا کہ یہ کامیابیاں بھی کسی خفیہ معاہدے کی مرہون منت ہیں۔ آج کل بھی سننے میں آرہا ہے کہ لاہو ر والا ٹی ٹوئنٹی بھی عوام کی توجہ نیب ریفرنسز سے ہٹانے کے لیے کروایا جارہا ہے۔ مان لیتے ہیں کہ ہماری سیاست میں کرکٹ ڈپلومیسی کی بازگشت بھی سنائی دیتی ہے مگر صاحب! موجودہ حالات میں تو ہم ڈپلومیسی کے ذریعے اپنی کرکٹ بچارہے ہیں، ایسے میں کرکٹ کو سیاسی مقاصد کے حصول کے لیے استعمال کرنا مشکل سا امر لگتا ہے۔
عوام کا سازشی نظریات پر بات کرنا ایسا معیوب فعل بھی نہیں، نجی محفلوں میں ایسی چہ میگوئیاں ہوتی ہی ہیں، لیکن مسئلہ تب پیدا ہوتا ہے جب ان نظریات کا سہارا لے کر اہم مناصب پر فائز لوگ اپنے فرائض منصبی میں پہلوتہی برتتے ہوئے خواہش قلبی کے حصول کے لیے سازشی کہانیاں تشکیل دیتے ہیں۔ سیاست دانوں کے ایسے بیانات تیقن کی فضا میں دراڑیں ڈالتے اور غیر ضروری تشکیک کو جنم دیتے ہیں، عوام میں پراگندگی بڑھنے کی وجہ سے وہ یہ سوچنے میں حق بجانب ہوتے ہیں کہ جب تمام اہم امور کے درپردہ بڑی قوتیں اور طاقتیں موجود ہیں تو پھر ہمارے ووٹ اور حصول حقوق کی جدوجہد سب بے معنی ہوئے۔ یہ فکر ہی عوام کا مورال کم کرنے کا سبب بنتی ہے، جس سے بے چینی، اضطراب اور شکوک و شبہات کے سائے ہر شے پر گہرے ہونے لگتے ہیں۔ تمام شعبۂ زندگی سے وابستہ عوام و خواص کا اپنی ناکامیوں کا ملبہ سازشی عناصر پر ڈالنے کی وجہ سے اب تو ڈر لگتا ہے کہ اُس وقت سے جب اسکول و کالج کے طالب علم بھی اپنی خراب کارکردگی کا سبب نادیدہ قوتوں کو ٹھہرائیں گے اور امتحانات میں کم نمبرز کے تانے بانے امریکا سے جوڑیں گے۔
اس بے چینی کی صورت حال میں سونے پر سہاگے کا کام علم و دانش کے حوالے سے معتبر شخصیات کی باتیں بھی کرتی ہیں۔ جب نامور لکھاری بھی اشارے کنایوں میں باتیں کرنے لگتے ہیں تو سازشی نظریات کو تقویت ملتی ہے، آندریں حالات میں تو جس کی باتوں میں شک کے سائے زیادہ گہرے ہوں جو نادیدہ قوتوں کی موجودگی کو زیادہ اچھے سے بیا ن کرلے، اُس کا کاروبار چل نکلتا ہے، ہاں ایک دو دھمکی آمیز فون کالز اور لفافوں کی پیشکش کا ذکر بھی وقفے وقفے سے کرتے رہیں تو کامیابی کے امکانات بڑھ جاتے ہیں۔ ضروری ہے کہ ہمیں من حیث القوم نظریہ سازش کی اوٹ میں چھپنے سے گریز کرنا چاہیے۔ ہر ناکامی کو سازشی نـظریات کے کھاتے میں ڈال کر خود کو معصوم سمجھنے والی عادت اب ختم کرنا ہوگی، کیونکہ قدآور شخصیات کی ایسی باتوں سے نوجوان نسل پراگندگی کا شکار ہوتی ہے، اُن میں مایوسی اور نظام پر عدم اعتماد بڑھتا ہے۔