Category پراپرٹی گائیڈ

لاہور(ویب ڈیسک) واہگہ ٹاؤن میں انڈر ویلیو رجسٹریوں کی پاسنگ میں ملوث رجسٹری محرر کی معطلی کے بعد رجسٹریشن برانچ لاوارث ہو گئی،7روز گزر جانے کے بعد بھی رجسٹریشن برانچ میں آر ایم ون کی تعیناتی نہ ہونے کے سبب شہریوں کی کثیر تعداد خوار ہونے پر مجبور ہو گئی ایڈیشنل ڈپٹی کمشنر ریونیو سے نوٹس لینے کی اپیل کی گئی ہے ۔ روزنامہ پاکستان کے سروے کے دوران معلوم ہوا ہے کہ تحصیل کینٹ میں واقع بورڈ آف ریونیو شعبہ رجسٹریشن برانچ واہگہ ٹاؤن میں رجسٹری محرر راجہ ندیم کوانڈر ویلیو رجسٹریوں کی پاسنگ میں ملوث ہونے کے الزام کے تحت معطل کر دیا گیا جس کی باقاعدہ انکوائری بھی کی جا رہی ہے تاہم رجسٹریشن برانچ واہگہ ٹاؤن میں رجسٹری محرر کی عدم دستیابی کے باعث پانچ سو سے زائد رجسٹری دستاویزات التوا کا شکار ہیں جس کے باعث روزانہ کی بنیاد پر رجسٹریشن برانچوں میں آنیوالے سائلین کو بھی شدید مشکلات کا سامنا کرنا پڑ رہا ہے شہریوں محمد رمضان، تنویر احمد، قاسم خان، نوید شہزاد، ولایت علی اور شہباز احمد نے آگاہی دی کہ صبح سے لیکر شام تک کھڑے رہتے ہیں اور واپس چلے جاتے ہیں کوئی رجسٹری محرر کام نہیں کر رہا ، اشٹام فروش، آغا خرم، وسیم خان، فیصل محمود اور سجاد گھمن کا کہنا ہے کہ جن لوگوں کی رجسٹریاں اعتراضات میں پہلے ڈالی گئی تھیں اب کلیئر ہوئی ہیں مگر اب کوئی پاسنگ نہیں کی جا رہی عوام ہم سے لڑ رہے ہیں۔دوسری جانب سب رجسٹرار واہگہ ٹاؤن شہزاد آصف نے موقف دیا ہے کہ رجسٹری محرر کی تعیناتی کردی ہے آئندہ 2روز میں تمام پینڈنگ دستاویزات کلیئر کر دیے جائیں گے۔

لاہور(اپنے نمائندے سے) ہربنس پورہ میں دوران آپریشن شہریوں کی کثیر تعداد نے آگاہی دی ہے کہ ہربنس پورہ میں قبل ازیں بھی جتنے آپریشن کئے گئے ہیں بعدازاں تھوڑے عرصہ بعد ان پر دوبارہ قبضے ہ جاتے ہیں اور دیکھتے ہی دیکھتے پختہ تعمیرات اور عمارتیں، گھر، دفاتر بن جاتے ہیں شہریوں نے آگاہی دی کہ ہربنس پورہ میں ایک مخصوص گینگ ہے جو یہاں سے تعمیرات کے پہلے بھی اکٹھے کرتا ہے اعلیٰ افسران کے نام سے لاکھوں روپے کی وصولیاں بھی کرتا ہے اور یہاں پر ریکارڈ اور موضع جات سے واقف ہونے کی وجہ سے خود کو ریونیو سٹاف ظاہر کرتا ہے اور تعمیرات کرواتا ہے موجودہ حالات میں بھی آپریشن صرف 8کنال کی حد تک کیا گیا ہے باقی سرکاری اراضی ابھی بھی ناجائز قابضین کے زیر استعمال ہے جہاں پر 2,2کنال ایک ایک کنال کے عالی شان گھر زیر تعمیر ہیں ان کو فی الحال نہیں چھیڑا گیا ہے صرف 8کنال کی ایک چار دیواری گرائی گئی ہے شہریوں نے مزید آگاہی دی کہ جس طرح سابق ڈی سی او نسیم صادق ہربنس پورہ کا وزٹ کرتے ہوئے سرکاری جائیداد کو بچانے کیلئے متحرک نظر آئے تھے اسی طرح اگر موجودہ ڈپٹی کمشنر لاہور انوار الحق بھی متحر ک ہو جائیں تو مزید سرکاری اراضی قبضہ گروپوں کے قبضے سے بچ سکتی ہے اور یہاں پر موجود اسے پرانے گینگ اور مافیا پر بھی گرفت ڈالی جا سکتی ہے جو کہ سرکاری اراضی پر قبضے کروانے اور پختہ تعمیرات مکمل کروانے کے ٹھیکے حاصل کئے ہوئے ہیں ۔شہریوں نے ڈپٹی کمشنر لاہور سے نوٹس لینے کا مطالبہ کیا ہے۔

پراپرٹی ڈیسک(میڈیا 92 نیوز)بورڈ آف ریونیو پنجاب نے ضلع لاہور میں سٹیلمنٹ کرنے کی غرض سے بلوائے جانے والے پٹواریوں ،قانگو اور ریونیو افسران نے ضلع بدر کرنے کا فیصلہ کرلیا۔ باہر کے اضلاع سے آنے والے ریونیو سٹاف کی فہرست مرتب کرنے کا عندیہ دیدیا گیا۔ بورڈ آف ریونیو کے ذرئع سے معلوم ہوا ہے کہ بورڈ آف ریونیو پنجاب کے انتظامی افسران نے ضلع لاہومیں31جولائی سے قبل سٹیلمنٹ ختم ہونے کی سمری منظورہونے کے بعد باہر کے اضلاع سے ضلع لاہور میں بلوائے جانے والے پٹواریوں قانگو اور ریونیو کو بھی ضلع بدر کرنے کا فیصلہ کرلیا گیا ہے مبینہ اطلاعات کے مطابق جو پٹواری قانگو اور ریونیو افسران جن اضلاع سے آئے ہیں ان کو واپس انہی اضلاع میں بھیج دیا جائے گا۔ اور اس حوالے سے کمشنر لاہور اور ڈپٹی کمشنر لاہور اورڈسٹرکٹ سٹیلمنٹ آفیسرز سے ایسے ریونیو سٹاف کی فہرست مرتب کرنے کی بھی ہدایت کردی ہیں۔ دوسری طرف ضلع بدر ہونے والے شعبہ سٹیلمنٹ کا ریونیو سٹاف بھی اس اطلاعات سے انتہائی خوفزدہ دکھائی دے رہا ہے۔17سال ضلع لاہور میں سروس کرنے والے ریونیو سٹاف کا نجی کاروبار گھر اور خرید کردہ جائیداد بھی موجود ہے جوکہ ان کے تبادلے کاے بعد ا ن کےلئے انتہائی مشکلات کا سبب بنے گی سٹیلمنٹ کے ریونیو سٹاف نے نگران سیٹ اپ میں تعینات ہونے والے افسران پر سفارشات کے ذریعے اپنے تبادلے رکوانے کےلئے بھاگ دوڑ شروع کردی ہے۔

لاہور ہائیکورٹ کے جسٹس علی اکبر قریشی نے محمد رمضان کی درخواست پر سماعت کی۔ درخواست میں موقف اختیار کیاگیا تھا کہ گوجرنوالہ میں ڈی ایچ اے نے 60ایککڑ اراضی شہدا کے نام پر ایکوائر کی۔اور متاثرہ افراد کو سیکشن 17کےتحت ڈی سی ریٹ کے تحت ادائیگیاں کردیں جس کے بعد ڈی ایچ اے نے اراضی کو سوسائٹی میں شامل کرکے فرخت دیگر لوگوں کو بھی شروع کردی ڈی ایچ اے کے وکیل نے عدالت میں موقف اختیار کیا کہ الزامات بے بنیاد ہیں۔ ڈی ایچ شہدا کے لیے مختص کی گئی اراضی کو فروخت نہیں کیا جارہا عدالت نے ریمارکس دیئے کہ آپ ریاست کی لینڈ کو کیسے شہریوں سے ایکوائر کرسکتے ہیں؟ آپ نے شہدا کے نام پر سوسائٹی بنانے کے لیے سستی زمین حاصل کی اور اب اسے فروخت کررہے ہیں۔عدالت نے مرکزی پٹیشن پر مقدمہ کا فیصلہ محفوظ کرلیا ۔۔۔۔

پراپرٹی ڈیسک(میڈیا 92 نیوز) جسٹس شمس محمود مرزا نے ایڈیشنل رجسٹرار کمپنیز ایس ای دی پی کی درخواست پر فیصلہ سنایا۔ ایس ای سی پی نے درخواست میں ایم جی رئیلٹرز کو فریق بنایا۔ فیصلے میں عدالت کی طرف سے کہا گیا ہے کہ ایم جی رئیلٹرز نے ہائوسنگ سوسائٹی میں تجربہ نہ ہونے کے باوجود پراجیکٹ شروع کیا، طاہر خان نیازی نے اسلام آباد نیو سٹی پراجیکٹ کیلئے این او سی لئے بغیر ہائوسنگ پراجیکٹ شروع کر کے عوام الناس سے فراڈ کیا گیا، ایم جی رئیلٹرز اور ایم جی ہرٹز پرائیویٹ لمیٹڈ نے فراڈ کا انکشاف ہونے پر پراجیکٹ تیسری کمپنی کے حوالے کر دیا، طاہر خان نیازی نے اسلام آباد نیو سٹی پراجیکٹ کی اراضی تیرہ مختلف دیہاتی علاقوں سے ایکوائر کی گئی، ایم جی رئیلٹرز اور ایم جی ہرٹز پرائیویٹ لمیٹڈ کو تحلیل کر دیا جائے۔
عدالت نے کمپنیوں کے اثاثے فروخت کرنے کیلئے آفیشل لیکوڈیٹرز کو بنک میں اکائونٹ کھلوانے کا حکم دیتے ہوئے کمپنیوں کے بینک اکائونٹس میں موجود تمام رقم کو بھی نئے بنک اکائونٹ میں منتقل کرنے کا حکم دے دیا، عدالت نے اثاثوں کی نیلامی کے اخراجات بھی نئے بنک اکائونٹس سے پورے کرنے کا حکم دیا۔ عدالت نے آفیشل لیکوڈیٹرز سے اثاثوں کی فروخت کیلئے دو اکتوبر کو رپورٹ بھی طلب کر لی۔ درخواست میں موقف اختیار کیا گیا تھا کہ وفاقی دارالحکومت میں بیس ہزار کنال پر مشتمل اسلام آباد نیو سٹی ہائوسنگ پراجیکٹ شروع کیاگیا،ایم جی رئیلٹرز نے 1995 ء میں ہائوسنگ سوسائٹی میں تجربہ نہ ہونے کے باوجود پراجیکٹ شروع کیا،ہائوسنگ سوسائٹی کیلئے نیشنل ہائی وے اتھارٹی کے ساتھ جوائنٹ وینچر کیا گیا کابینہ کمیٹی کے احتساب سیل نے نوٹس لیکر فرانزک آڈٹ کا حکم دیا، آڈٹ میں دو کمپنیوں کی جانب سے فراڈ اور بے ضابطگیوں کا انکشاف کیا گیا، اقتصادی رابطہ کمیٹی نے ایم جی رئیلٹرز سمیت دیگر کمپنیوں کو ڈیفالٹر قرار دینے کی سفارش کی، ایم جی رئیلٹرز سمیت دیگر کمپنیوں کے اثاثہ جات بیچنے اور نیب میں کارروائی کی بھی سفارش کی گئی، ہائوسنگ سوسائٹی کے نام پر عوام سے فراڈ کرنیوالی کمپنیوں کے اثاثے فروخت کرنے کاحکم دیا جائے۔….

کراچی(مانیٹرنگ ڈیسک/ایمرا نیوز)سپریم کورٹ نے سندھ میں صنعتی اراضی کی بغیر نیلامی خرید پرپابندی عائد کردی۔ اوپرنوٹوکرپشن نیچے کرپشن ہی کرپشن ہے۔ دوران سماعت چیف جسٹس نے ریمارکس دئیے کہ قبضہ مافیا ملک کھاگئے، ریاست کا تحفظ ہماری ذمہ داری ہے۔ سرکاری زمینوں کی بندر بانٹ نہیں ہونے دینگے۔ زمینوں کو لیز اور الاٹمنٹ کی شفافیت کو یقینی بنائیں نگے اور قانون کومدنظر رکھ کر فیصلہ کرینگے۔اوپرنوٹوکرپشن، نیچے کرپشن ہی کرپشن ہے۔ بعدازاں عدالت نے صنعتی اراضی سے متعلق درخواستوں کی سماعت آج بدھ تک ملتوی کردی اور وکلاءکو تیاری کرکے آنے کی ہدایت کی۔تفصیلات کے مطابق سپریم کورٹ کراچی رجسٹری میں چیف جسٹس پاکستان کی سربراہی میں جسٹس سجاد علی شاہ اور جسٹس منیب اختر پرمشتمل لارجر بنچ نے سندھ میں سرکاری اراضی کی لیز اور الاٹمنٹ کے معاملے پولٹری فارمز اوردیگر صنعتی اراضی کی لیز کےلئے 40سے زائد درخواستوں کی سماعت ہوئی۔ سماعت کے موقع پر سینئر ممبربورڈ آف ریونیو ایڈووکیٹ جنرل سندھ اور درخواست گزار بھی موجود تھے۔ چیف جسٹس ثاقب نثار نے کہاکہ زمینوں کی بندر بانٹ کی گئی اور بغیر نیلامی کے پلاٹ بنائے گئے۔ سماعت کے دوران چیف جسٹس نے ونڈپاورپروجیکٹ کے وکیل سے مکالمہ کیا کہ آپ پڑھیں ایک صفحے پر نوکرپشن لکا ہے، بس اوپر نوٹوکرپشن مگر نیچے سب کرپشن ہی کرپشن ہے۔ جسٹس ثاقب نثار نے استفسار کیا کہ سندھ میں کس قانون کے تحت سرکاری زمینیں الاٹ کی جاری ہیں؟ یہ تو ساری بدمعاشیاں چل رہی ہیں میں نے کالونی لاءکو تبدیل کیا، گھر بیٹھے درخواست پر پلاٹ الاٹ اور مرضی کے 4افراد کی کمیٹی بن جاتی ہے، ہم کرپشن کے دروازے نہیں کھولنے دینگے۔ چیف جسٹس نے بغیر نیلامی کے زمین لینے پر پابندی عائد کرتے ہوئے کہا کہ جس نے زمین لینی ہے کھلے عام نیلامی میں جائے کسی کو بغیر نیلامی زمین نہیں لینے دیں گے۔

لاہور(ایمرا نیوز)
اسسٹنٹ کمشنر شالیمار علی اکبر بھنڈر کی ہدایت پر کارروائی،10مرلہ سرکاری اراضی پر ہونے والی پختہ تعمیرات گرادی گئی۔ قبضہ کرنے والے ارشاد نامی شخص پر مقدمہ کا اندراج کردیا گیا۔ پٹواری حلقہ آصف حبیب اور تحصیلدار اسد رشید بٹ نے موقع پر آپریشن کرتے ہوئے سرکاری اراضی کا قبضہ واپس لیا۔ مزید معلوم ہوا ہے کہ گزشتہ روز اسسٹنٹ کمشنر علی اکبر بھنڈر کو اطلاع ملی کہ ریلوے لائن کے عقب میں ارشاد خان نامی شخص نے سرکاری اراضی پر قبضہ کررکھا ہے جس پر اسسٹنٹ کمشنر نے ریونیو سٹاف آصف حبیب اور اسد رشید بٹ تحصیلدار کو ہدایت کی کہ وہ فوری طور پر ان کے خلاف کارروائی کرے۔ جس پر ریونیو سٹاف نے کارروائی کرتے ہوئے چاردیواری گرادی، قبضہ کرنے والے افراد کے خلاف مقدمہ کا اندراج بھی کروادیا، اسسٹنٹ کمشنر کا کہنا تھا کہ سرکاری زمین پر قبضہ کسی صورت برداشت نہیں کیا جائے گا۔

لاہور(ایمرا نیوز) مسلم لیگ(ن) کے سابق ایم پی اے سیف الملوک کھوکھر گزشتہ روزفیروز پور سٹی کیس کے سلسلے میں نیب لاہور میں پیش ہوگئے۔ نیب ذرائع نے بتایا کہ فیروزپور سٹی کیس نے نیب افسران کے روبرو پیش ہوکر سوالات کے جوابات دئیے۔ نیب ترجما ن نے بتایا کہ سابق ایم پی اے تقریباً1گھنٹہ سے زائد وقت تک سوالات کے جواب دیتے رہے، اس حوالے سے رپورٹ تیارکرکے ہیڈکوارٹر ارسال کردی گئی ہے۔ ان کی دوبارہ طلبی کے حوالے سے فیصلہ ہیڈکوارٹر کریگا۔

اسلام آباد(مانیٹرنگ ڈیسک /ایمرا نیوز) نیب نے سابق ڈکٹیٹر پرویز مشرف کے خلاف اختیارات کے غلط استعمال اور اپنے پسندیدہ آفیسرز کو کئی مہنگے اور قیمتی پلاٹس جن کی مالیت1000کھرب روپے تک ہے ، ان کی غیر قانونی الاٹمنٹ کے حوالے سے نئے ثبوت جمع کرلیے ہیں۔ ثبوتوں میں کھربوں روپے مالیت کی 10اہم پراپرٹیز کی ایک فہرست شامل ہے جو مشرف اور ان کے خاندان کے افراد کے نام پر تھی۔ یہ تازہ ثبوت ایک ریٹائر ڈ آرمی آفیسر کرنل ایڈووکیٹ انعا م رحیم قومی احتساب بیورو راولپنڈی کے ڈپٹی ڈائریکٹر کو آرڈینیشن میں جمع کرائے۔ نیب کے ایک اہلکار نے میڈیا کو تصدیق کی کہ بیوروسابق فوجی حکمران کے خلاف اختیارات کا ناجائز استعمال کرنے کے حوالے سے ایک انکوائری میں ثبوتوں کا جائزہ لے رہا ہے۔ تاہم نیب نے تاحال سابق ڈکٹیٹر کے خلاف طلبی کا نوٹس جاری کرنا ہے۔

لاہور(ایمرا نیوز ) پنجاب لینڈ ریکارڈ اتھارٹی کی جانب سے سروس سٹرکچر کی بحالی میں ناکامی کے سبب رواں مالی سال کے دوران45سے زائد ملازمین نے نوکریوں کو خیر آباد کہہ دیا جبکہ 132سے زائد ملازمین نے دیگر محکمہ جات میں مستقل بنیادوں پر ملنے والی جاب کیلئے این او سی حاصل کرلیے۔ صوبے بھر کے ملازمین ایک بار پھر پنجاب لینڈ ریکارڈ اتھارٹی نان پروفیشنل رویہ سے تنگ آکر اجتماعی ہڑتال کیلئے متحد ہوگئے۔ سروس سٹرکچر کی منظوری کیلئے لکھ کردے چکے ہیں۔ ان ملازمین کو مستقل کیے جانے کا اختیار ہمارے پاس نہیں۔ ترجمان پی ایل آر اے ایمرا نیوز کو ملنے والی معلومات کے مطابق پنجاب لینڈ ریکارڈ اتھارٹی انتظامیہ سٹاف کو مستقل کیے جانے کے حوالے سے کاغذی کارروائیوں سے آگے نہیں بڑھ سکی۔ جس کے سبب رواں سال بھی45سے زائد ملازمین کی جانب سے محکمے کو خیرآباد کہتے ہوئے نوکریاں چھوڑ دی گئی اوردیگر محکمہ جات میں مستقل نوکری کے حصول کیلئے بھی132سے زائد ملازمین جن میں اے ڈی اے آر سروس سنٹر انچارج ایل آر اواور سروس سنٹر آفیشل شامل ہیں نے محکمے سے این او سی بھی وصول کرلیے ہیں نام ظاہر نہ کرنے کی شرط پر اراضی ریکارڈ سنٹرز میں تعینات ملازمین کا کہنا تھا کہ پنجاب لینڈ ریکارڈ اتھارٹی میں نان پروفیشنل آفیسرز کی اجارہ داری ہے جوکہ ہمارے سروس سٹرکچر میں بڑی رکاوٹ ہیں اور سینئر ممبرز سمیت چیف سیکرٹری پنجاب کے پاس جاکر بھی ہمارے خلاف پروپیگنڈہ کرنے میں مصروف ہیں جبکہ ان کے اسی نان پروفیشنل طریقہ کار اور رویے سے ہم تنگ آچکے ہیں ملازمین کا کہنا تھا کہ ہم ایک مرتبہ پھر اجتماعی مفاد کو مدنظر رکھتے ہوئے متحد ہوکر ہڑتال کریں گے اور اسی دفعہ بورڈ آف ریونیو پنجاب کی ایسوسی ایشن اور تمام اضلاع کی ڈسٹرکٹ ایڈمنسٹریشن کا سٹاف بھی ہماری ہڑتال کا حصہ ہوگا دوسری جانب ترجمان پی ایل آر کا کہنا ہے کہ سروس سٹرکچر کی منظوری کیلئے لکھ کردے چکے ہیں۔ ان ملازمین کو مستقل کیے جانے کا اختیار ہمارے پاس نہیں۔ ہم تو خود چاہتے ہیں کہ ان کو مستقل کیا جائے۔