Tag وزیراعظم عمران خان

اسلام آباد(ویب ڈیسک)وفاقی حکومت نے سوشل میڈیا کے خلاف شکنجہ سخت کرنے کی ٹھان لی ہے۔وزیراعظم عمران خان کی زیرِ صدارت وفاقی کابینہ کے اجلاس میں بڑا فیصلہ کیا گیا ہے۔ کابینہ نے سوشل میڈیا سے متعلق قوانین کی منظوری دے دی ہے۔ سوشل میڈیا کمپنیوں کو پاکستان کے قوانین کے تحت کام کرنا ہوگا۔حکومت نے سوشل میڈیا قوانین بین الاقوامی سوشل میڈیا کمپنیوں کے ساتھ شیئر کرنے کا بھی فیصلہ کیا ہے۔ طے کردہ حکومتی قواعد و ضوابط کے اندر رہ کر کام کرنے کی اجازت ہوگی۔

کراچی (ویب ڈیسک) سابق وزیراعلیٰ سندھ سیّد غوث علی شاہ نے پاکستان تحریک انصاف (پی ٹی آئی )میں شمولیت اختیار کرنے کا اعلان کردیا۔علاوہ ازیں سابق وفاقی وزیر سیّد ظفر علی شاہ اور بیرسٹر مرتضی مہیسر نے بھی پاکستان تحریک انصاف میں شامل ہونے کا فیصلہ کیا ہے۔ سیاسی رہنماؤں نے وزیراعظم عمران خان سے گورنر ہاؤس میں ملاقات کے بعد باقاعدہ شمولیت کا اعلان کیا۔
وزیراعظم نے انہیں پارٹی میں شمولیت پرخوش آمدید کہتے ہوئے پارٹی مفلر پہنائے۔ ملاقات کے دوران پاکستان تحریک انصاف کے سینئر رہنما اور سندھ اسمبلی میں اپوزیشن لیڈر حلیم عادل شیخ بھی وہاں پرموجود تھے۔

اسلام آباد (ویب ڈیسک) وزیراعظم عمران خان کا کہنا ہے کہ پاکستان کو افغانستان میں جنگ کے نتائج پر مورد الزام نہیں ٹھہرانا چاہئے.ان کا مزید کہنا تھا کہ کیا 3 لاکھ افغان سیکیورٹی فورسز کے مکمل طور پر ہتھیار ڈالنے پر پاکستان کو مورد الزام ٹھہرانا درست ہے؟
وزیراعظم عمران خان نے امریکی جریدے واشنگٹن پوسٹ میں مضمون لکا .ان کا کہہنا تھا کہ حیرت ہے کہ امریکی کانگریس میں امریکی نقصان پر پاکستان پر الزام لگایا گیا. ماضی میں پاکستانی حکومتیں امریکہ کو افغانستان کے معاملے پر خوش کرتی رہیں،نائن الیون واقعے کے بعد ماضی کے مجاہدین کو دہشت گرد قرار دیا گیا، عسکری گروپس نے پاکستان کی ریاست کے خلاف جنگ شروع کردی، ہم اپنی بقا کے لئے لڑے، بہترین فوج اور انٹیلی جنس کے باعث دہشتگردی کو شکست دی۔
انہوں نےمزید کہا کہ نائن الیون کے بعد یکے بعد دیگرے آنے والی افغان حکومتیں افغانوں کی نظروں میں مقام پیدا نہ کرسکیں، یہی وجہ تھی کہ افغانستان میں کوئی بھی بدعنوان اور ناکام حکومت کے لئے لڑنے کو تیار نہ تھا، اس حقیقت کو تسلیم کرنے کی بجائے افغان اور مغربی حکومتیں پاکستان پر الزام لگانے کے لئے بھارت کے ساتھ مل کر جعلی خبریں چلاتی رہیں، بے بنیاد الزامات کے باوجود پاکستان نے سرحد کے بائیو میٹرک کنٹرول اور سرحد کی مشترکہ نگرانی کی پیشکش کی، ہم نے اپنے محدود وسائل کے باوجودافغانستان کے ساتھ سرحد پر باڑ لگائی، ہمیں اب الزام تراشی کا رویہ ترک کردینا چاہیے اور افغانستان کے مستقبل کی جانب دیکھنا چاہیئے۔

اسلام آباد (ویب ڈیسک)وزیراعظم عمران خان نےاقوام متحدہ کی جنرل اسمبلی کے 76ویں اجلاس سے ویڈیو لنک کے ذریعے خطاب کیا.خطاب میں وزیراعظم نے مسئلہ کشمیر، افغانستان کی صورتحال، اسلام فوبیا، کووڈ 19، ماحولیات اور دیگر اہم امور پر اپنے خیالات کا اظہار کیا۔ وزیراعظم نے کہا کہ جنوبی ایشیا میں امن کا دارو مدار مسئلہ کشمیر کے حل میں ہی ہے۔انہوں نے کشمیر کا مقدمہ پیش کرتے ہوئے کہا کہ نئی دہلی جموں و کشمیر تنازع پر خود ساختہ آخری حل کی طرف بڑھ رہاہے، بھارت مقبوضہ کشمیر کی مسلم اکثریت کو مسلم اقلیت میں بدلنا چاہتا ہے، قرارداد واضح ہے کہ مسئلہ کشمیر کا حتمی حل علاقے کے افراد اقوام متحدہ کے تحت آزاد اور غیرجانبدار رائے شماری سے کریں گے.
وزیراعظم عمران خان نےخطاب میں اس بات پر زور دیا کہ جنرل اسمبلی مطالبہ کرے کہ سیدعلی گیلانی کی تدفین شہدا قبرستان میں کی جائے۔ انہوں نےکہا کہ بھارت کی کشمیر میں انسانی حقوق کی خلاف ورزیاں جنیوا کنونشن کے خلاف ہیں۔انہوں نے کہا کہ بھارتیہ جنتا پارٹی (بی جے پی) آر ایس ایس رجیم فاشسٹ نظریہ پھیلا رہا ہے .عمران خان نے کہا کہ ہمیں اسلاموفوبیا سے مشترکہ طور پر نمٹنا ہوگا، ہمیں بین المذاہب ہم آہنگی کو فروغ دینا ہوگا، اسلاموفوبیا پرقابو پانے کے لیے عالمی مکالمہ ہونا چاہیے۔ ان کا مزید کہنا تھا کہ افغانستان کی صورتحال کا امریکا اور یورپ میں بعض لوگ پاکستان کو ذمہ دارٹھہراتے ہیں، افغانستان کے بعد اگر کوئی سب سے زیادہ متاثر ہوا تو وہ پاکستان ہے۔پاکستان میں اس وقت 30 لاکھ افغان پناہ گزین ہیں، دہشت گردی کے خلاف جنگ میں پاکستان کو 150 ارب ڈالر کانقصان ہوا جبکہ 80 ہزار سے زائد جانیں قربان کیں اور افغانستان کے بعد اگر کوئی ملک متاثر ہوا ہے تو وہ پاکستان ہے۔

لاہور(ویب ڈیسک) پاکستان مسلم لیگ (ن) کے صدر اور قائد حزب اختلاف شہباز شریف نے بڑھتی مہنگائی پرتشویش کا اظہارکیا ہے .شہبازشریف کاکہنا تھا کہ تمام بنیادی اشیاء کی قیمتوں میں اضافہ کر کے وسائل جمع کرنا ظلم، ظلم اور بدترین ظلم ہے۔
انہوں نے کہا کہ نمائشی اجلاس بلانے سے مہنگائی کم نہیں ہو گی اس کے لیے صرف ٹھوس اقدامات کرنے ہوں گے. یہ ہے نیا پاکستان، ہمارے دور میں 35 روپے فی کلو ملنے والے آٹے کی قیمت میں موجودہ حکومت نے 75 روپے سے اوپر کر دی، انڈے، گوشت، مرغی، دال، گھی کی قیمتوں میں ظالمانہ اضافے نے عوام کی چیخیں نکال دی ہیں۔ پاکستان مسلم لیگ (ن) کے صدر کا کہنا تھا کہ معاشی تباہی، بے روزگاری اور بدترین مہنگائی کی ذمہ دار موجودہ نااہل حکومت اور اس کی چوریاں ہیں.

ڈیرہ اسماعیل خان (ویب ڈیسک)وزیراعظم عمران خان نے کہا ہے کہ مافیازکے خلاف جنگ میں ہم کامیاب ہو گئے ہیں ۔وزیراعظم عمران خان نے ڈیرہ اسماعیل خان میں کسانوں میں کسان کارڈ تقسیم کرنے کی تقریب سے خطاب کیا.خطاب کے دوران انہوں نے کہا کہ جھوٹے اورڈرپوک لوگ قوم نہیں بنا سکتے، بڑا مافیا کہتا ہے ہمیں این آراودو اورباقی مجرموں کوپکڑو، باہربیٹھے لوگ اربوں کی پراپرٹی لیے بیٹھے ہیں.
وزیراعظم کا مزید کہنا تھا کہ دنیا میں قیمتیں بڑھنے کی وجہ سے پاکستان میں بھی مہنگائی ہوئی، ماضی کے حکمرانوں نے ملکی نظام کومضبوط نہیں ہونے دیا، یہ لوگ باہر بیٹھے تقاریرتو کرتے ہیں لیکن پیسہ بنانے کی ایک رسید مانگو تو پیش نہیں کرتے.
عمران خان نے کہا کہ آبادی تیزی سے بڑھ رہی ہے گزشتہ سال ہم نے 40 لاکھ ٹن گندم امپورٹ کرنا پڑی اس لیے ابھی سے پلاننگ کررہے ہیں ۔ اناج اگانے سے فرق نہیں پڑے گا مگرامپورٹ سے فرق پڑے گا، ہمارے پاس زمینیں ہیں ہمیں عقل کا بہتراستعمال کرتے ہوئے خود کفیل بننا چاہیے، شوگرمافیا کسانوں کوپیسہ نہیں دیتا تھا مگر ہم نے دلوایا۔

اسلام آباد (ویب ڈیسک) ورلڈکپ سکواڈ میں قومی ٹیم نے چئیرمیں پی سی بی رمیز راجہ کے ہمراہ وزیراعظم عمران خان سےملاقات کی ہے۔ ملاقات کے دوران وزیراعظم نے کھلاڑیوں کو بے خوف ہو کر کھیلنے کا مشورہ دیا۔تفصیلات کے مطابق وزراعظم عمران خان سے ٹی 20 ورلڈکپ سکواڈ میں شامل قومی کھلاڑیوں نے ملاقات کی اورکرکٹ کی موجودہ صورتحال پر تبادلہ خیال کیا .ملاقات کرنے والوں میں بابر اعظم، شاداب خان، آصف علی، اعظم خان، حارث رؤف، حسن علی، عماد وسیم، خوشدل شاہ، محمد حفیظ، محمد حسنین، محمد نواز، محمد رضوان، محمد وسیم، شاہین شاہ آفریدی، صہیب مقصود شامل تھے۔ملاقات سے قبل جب قومی کھلاڑی وزیراعظم ہاؤس پہنچے تو کھلاڑیوں نے سفید قمیض شلوار اور گہرے نیلے رنگ کی ویسٹ کوٹ زیب تن کر رکھی تھی۔ذرائع کا کہنا ہے کہ پاکستان میں ڈومیسٹک سسٹم سمیت کرکٹ کے امور پر بات چیت بھی ہوئی۔وزیراعظم نے ہدایت دیتے ہوئے کہا کہ نیوزی لینڈ انگلینڈ کے دورہ منسوخی کا بہترین پرفارمنس سے جواب دیں، پاکستان کھیلوں کےلئے محفوظ ملک ہے، آپ اپنی پرفارمنس بہتر بنانے پر فوکس کریں، انشاء اللہ جلد پاکستان میں انٹرنیشنل کرکٹ ہوگی۔

ویب ڈیسک : چیئرمین پیپلز پارٹی بلاول بھٹو نے طالبان کی حکومت کو تسلیم کرنے سے متعلق وزیراعظم عمران خان کے بیان کو خوش آئند قرار دے دیا۔غیرملکی نشریاتی ادارے کو دیئے گئے انٹرویو چیئر مین پیپلزپارٹی بلاول بھٹو کا کہناتھاکہ طالبان کی حکومت کوتسلیم کرنے سےمتعلق وزیراعظم کا بیان خوش آئند ہے،میری تجویزہےکہ اس معاملے پروزیراعظم پارلیمان میں بھی بحث کرائیں۔ انہوں نے کہا کہ بدقسمتی سے اب تک اس اہم معاملے پر پارلیمان میں بحث نہیں ہو سکی۔
چیئرمین پیپلز پارٹی کا کہنا تھا کہ خطے کا امن افغانستان سے جڑا ہوا ہے،افغانستان کے مستقبل کا فیصلہ افغان عوام کوکرناہے۔افغان عوام کواپنےحقوق دیناہوں گے،چیئرمین پیپلز پارٹی بلاول بھٹو نے مطالبہ کیا کہ عالمی برادری افغانستان کی مدد کرے۔

اسلام آباد (ویب ڈیسک) وزیراعظم عمران خان کے معاون خصوصی توانائی تابش گوہر نےاچانک استعفیٰ دے دیا۔ تفصیلات کے مطابق وزیراعظم عمران خان کے معاون خصوصی تابش گوہرنے استعفیٰ دے دیا ہے جسے وزیراعظم نے منظور کرلیا۔تابش گوہر 7 سال تک کے الیکٹرک میں بطور سی ای او، ڈائریکٹر اور چیئرمین کے عہدے پر فائز رہے تاہم 2015 میں وہ مستعفی ہوگئے تھے جس کے بعد وہ بجلی و توانائی کے شعبے میں تعینات کیا گیا.

اسلام آباد(ویب ڈیسک) وزیراعظم عمران خان کو بیرون ممالک سے ملے تحائف کے بارے میں حکومت نے تفصیلات دینےسے انکار کر دیا ہے.تفصیلات کے مطابق وفاقی حکومت نےعمران خان کو بطوروزیراعظم ملنے والے تحائف کو’کلاسیفائیڈ’ یعنی خفیہ قراردیتے ہوئے تفصیلات دینے سے انکار کر دیا ہے.۔ اس حوالے سے کابینہ ڈویژن کا کہنا ہے کہ سربراہان مملکت کےدرمیان تحائف کا تبادلہ ریاست کے مابین تعلقات کاعکاس ہوتاہے، ان کا مزید کہنا ہے کہ میڈیا ان تفاصیل حاصل کرنے کے بعد غیرضروری خبریں‌ پھیلائے گا جس سے بیرون ممالک کیساتھ تعلقات متاثر اورملکی وقارمجروح ہوگا۔کابینہ ڈویژن نے شہری کو تحائف کی تفصیلات دینے سے متعلق انفارمیشن کمیشن آف پاکستان کا حکم اسلام آباد ہائیکورٹ میں چیلنج کردیا۔
کابینہ ڈویژن کی جانب سے اسسٹنٹ اٹارنی جنرل عتیق الرحمان صدیقی اسلام آباد ہائیکورٹ میں پیش ہوئے۔ عدالت نے پاکستان انفارمیشن کمیشن اور شہری ابرارخالد کو نوٹس جاری کرتے ہوئے جواب طلب کرلیا۔