Category جرم وانصاف

لاہور(کرائم رپورٹر) کوٹ لکھپت جیل میں فرضی مشقوں کا انعقاد کیا گیا، فرضی مشقوں میں ایلیٹ فورس، سپیشل برانچ، سی ٹی ڈی، ریسکیو1122، بم ڈسپوزل، میڈیکل ٹیم اورکوٹ لکھپت پولیس کی بھاری نفری نے حصہ لیا، اس موقع پر سپرنٹنڈنٹ جیل چودھری اعجاز اصغر، ایس ایچ او کوٹ لکھپت عاطف ذوالفقار، ڈپٹی سپرنٹنڈنٹ کوٹ لکھپت جیل ظہیر احمد ورک سمیت پولیس کی بھاری نفری موجود تھی،فرضی مشقوں کے دوران فرضی دہشت گرد بھی موجود تھا جسے پولیس نے گرفتار کیا،جیل انتظامیہ کے مطابق فرضی مشق آئی جی جیل خانہ جات مرزا شاہد سلیم بیگ اورڈی آئی جی ملک مبشر احمد خان کی ہدایت پر کی گئی ہیں۔ ہنگامی مشقوں کا مقصد دہشت گردی جیسی ہنگامی صورتحال سے نمٹا ہے۔ فرضی مشقوں کے دوران فرضی دہشت گرد کو گرفتار اورچیک کیا گیا جبکہ وہ فرضی زخمیو ں کو فوری طبی امداد کیلئے کارروائی کی گئی ہنگامی مشقوں میں ایس پی ماڈل ٹاؤن ڈویژن شاکر احمد شاہد نے خود ریسپانس ٹائم چیک کیا، ڈی آئی جی آپریشن لاہور ڈاکٹرحیدراشرف کا کہنا تھا کہ دہشت گردی کی اطلاعات پر تمام ڈویژنل ایس پیز، سرکل افسران، ایس ایچ اوز کو احکامات جاری کیے گئے ہیں کہ وہ حساس مقامات، تعلیمی اداروں، سرکاری دفاتر سمیت دیگر اہم مقامات پر فرضی مشقیں منعقد کریں، پولیس رسپانس ٹائم کو چیک کریں اور پولیس فورس کو اس حوالے سے بریف کریں۔

اسلام آباد(کورٹ رپورٹر/ایمرا نیوز)چیف جسٹس پاکستان جسٹس ثاقب نثار نے کہا کہ پاکستان میں بیٹھا ایک شخص بیرون ملک ڈگریاں بیچ رہا تھا، ملک کی بدنامی ہورہی ہے۔ اگر جعلی ڈگریوں کی خبر میں صداقت ہے تو کوئی نہیں بچ پائے گا۔
چیف جسٹس پاکستان ثاقب نثار کی سربراہی میں سپریم کورٹ کے تین رکنی بینچ نے ایگزیکٹ جعلی ڈگری از خود نوٹس کیس کی سماعت کے دوران ریمارکسدیئے کہ کسی کو چُھوٹ نہیں ، سب کا نام ای سی ایل میں ڈالیں گے، ڈی جی ایف آئی اے نے عدالت کو بتایا پاکستان میں بیٹھ کر 330 یونیورسٹیوں کی ویب سائٹس بنائی گئیں۔
چیف جسٹس نے ڈی جی ایف آئی اے سے کہا ہمیں بتائیں ایگزیکٹ کا کیا معاملہ ہے، پہلے بھی شور اٹھا تھا، دفاتر کو سیل کرکے دستاویزست قبضے میں لی گئیں، اب یہ معاملہ دوبارہ نمایاں ہو رہا ہے، اگر یہ درست ہے تو بتا دیں، ملک کی بدنامی ہو رہی ہے ۔
چیف جسٹس نے کہا اگر جعلی ڈگریوں کی خبر میں صداقت ہے تو کوئی نہیں بچ پائے گا، ڈی جی ایف آئی اے بشیرمیمن نے عدالت کو بتایا کہ 15مئی 2015کوایگزیکٹ سے متعلق خبر شائع ہوئی، پشاور میں جعلی ڈگری والے پروفیسر پکڑے گئے، ایگزیکٹ کاہیڈ کوارٹر کراچی میں ہے، ایگزیکٹ کے ایک فلور پر کام کرنے والوں کو دوسرے فلور سے متعلق کچھ علم نہیں ہوتا تھا۔
جس کے جواب میں چیف جسٹس نے کہا ملکی وقار بہت بڑا بنیادی حق ہے، پاکستان کی عزت بچانے کے لیے جانتے ہیں کیا کرنا ہے، مجھےملزمان کے نام لکھوا دیں۔ چیف جسٹس نے کہا میرا دل دھڑک رہاہے، پتہ ہے کیوں؟ کہیں عامر لیاقت نے ان سے ڈگری نہ لی ہو؟ اگر عامر لیاقت نے ڈگری لی ہے تو چھوڑوں گا نہیں۔
ڈی جی ایف آئی اے نے کہا 2007ء میں ڈگری لینے والوں میں عامر لیاقت کا نام بھی ہےالبتہ کہہ نہیں سکتا ڈگری ملی یا نہیں، لیکن نام موجود ہے،
چیف جسٹس نے عدالت میں موجود عامر لیاقت کی طرف دیکھ کر کہا یہ کس طرح سے بیٹھے ہیں آپ کورٹ کا ایک احترام ہوتا ہے، آپ کھڑے ہوجائیں، کہا یہ ٹی وی چینل نہیں ہے، عامر لیاقت نے اپنی حرکت پر عدالت سے معافی مانگ لی۔
دوران سماعت چیف جسٹس نےکہا ایک آدمی یہاں سے بیٹھ کر بیرون ملک ڈگریاں بیچ رہا تھا، پاکستان سافٹ وئیر ایکسپورٹ بورڈ نے کوئی ایکشن نہیں لیا، چیف جسٹس نے کہا کہ آج کل ہم اپنی غلطیوں کی نشاندہی کررہے ہیں، کیا ملک کی بدنامی پر از خود نوٹس لینا بھی غلطی ہے؟ اس غلطی کو بھی ہماری فہرست میں ڈال دیں، عدالت نے ایگزیکٹ جعلی ڈگری اسکینڈل کے تمام ملزمان کوطلب کرتے ہوئے مزید سماعت 9 فروری تک ملتوی کر دی۔
اس سے قبل چیف جسٹس پاکستان نے ایگزیکٹ جعلی ڈگری اسکینڈل سے متعلق خبروں پر ازخود نوٹس لے کر ایف آئی اے کو تفصیلی رپورٹ جمع کرانے کا حکم دیا تھا، تاہم ایف آئی اے کی جانب سے سپریم کورٹ میں جمع کرائی گئی رپورٹ تضادات سے بھر پور نظر آئی۔
ایف آئی اے نے تسلیم کیا تھا کہ 2 لاکھ 15 ہزار، 507 طالب علموں کو جعلی ڈگریاں اور سرٹیفکیٹ بیچے گئے ، لیکن جو رپورٹ جمع کرائی گئی اس میں ملزمان کو بچ نکلنے کا راستہ فراہم کیا گیا۔
ایف آئی اے نے یہ تو بتا دیا کہ 4 ہزار متاثرین سے ای میل کے ذریعے رابطہ کیا گیا لیکن ان کی آڈیو ریکارڈنگز کو اپنی رپورٹ میں شامل نہ کیا۔
رپورٹ میں کہا گیا کہ امریکی سفارت خانے کے لیگل اتاشی کو ایک خط میں ایگزٹ کے شئیر ہولڈرز اور ڈائریکٹرز سمیت افسران کی معلومات مانگی گئیں، مگر کوئی جواب نہیں آیا، حقیقت یہ ہے کہ امریکی سفارت خانے نے8 فروری 2016کو خط میں ایگزٹ سے منسلک کمپنیز اور سوالوں کے تفصیل سے جواب دیے تھے۔
ایف آئی اے کی رپورٹ میں امریکا میں ایگزٹ کے خلاف چلنے والے مقدمات کا تذکرہ بھی نہیں کیا گیا، ایک مقدمے میں امریکا میں ایگزٹ کا ملازم سلاخوں کے پیچھے بھیجا گیا، دوسرا کیس نام نہاد بیل فورڈ یونی ورسٹی کا تھا جوایگزیکٹ امریکی عدالت میں ہار گئی تھی۔
مقدمات کی تفصیل امریکی محکمہ انصاف کی ویب سائٹ پر موجود ہے، ایف آئی اے عدالت میں ایگزٹ کے بڑے منی لانڈرنگ کیس کی تفصیلات بھی پیش کرنے میں ناکام رہی جس میں حوالہ اور دوسرے غیر قانونی ذرائع سے پیسہ پاکستان سے باہر اور باہر سے پاکستان منتقل کیا گیا۔
بدنام زمانہ ڈگری اسکینڈل میں ملوث ایگزیکٹ کا پول پہلے امریکی اخبار نیو یارک ٹائمز نے کھولا تھا، پھر برطانوی نشریاتی ادارے بی بی سی سمیت کئی عالمی اخبارات میں شائع ہونے والی خبروں سے بھونچال آگیا۔

لاہور(کورٹ رپورٹر/ایمرا نیوز)قصورکی مقتولہ زینب کے والد نے ملزم عمران سے متعلق تحقیقات کا ریکارڈ حاصل کرنے کے لیے انسدادِ دہشت گردی کی خصوصی عدالت سے رجوع کر لیا۔
7سالہ زینب کے والدامین انصاری نےآفتاب باجوہ ایڈووکیٹ کے توسط سے انسدادِ دہشت گردی کی خصوصی عدالت میں درخواست دائر کی، درخواست میں جے آئی ٹی اور تھانہ اے ڈویژن قصور کو فریق بنایا گیا ہے۔
درخواست گزار نے استدعا کی ہے کہ ملزم سے کی جانے والی تفتیش کا تمام ریکارڈ ان کے حوالے کرنے کا حکم دیا جائے، جبکہ ملزم کی سی سی ٹی وی فوٹیج، ڈی این اے ٹیسٹ اور فرانزک ٹیسٹ رپورٹ بھی مہیا کی جائے۔

لاہور(کورٹ رپورٹر/9میڈیا2نیوز) جسٹس سید منصور علی شاہ کے اعزاز میں فل کورٹ ریفرنس تقریب آج عدالت عالیہ کے لائبریری ہال میں سجائی جائے گی ۔ ریفرنس میں جسٹس سید منصور علی شاہ کی اعلٰی خدمات کو سراہا جائے گا ۔جسٹس محمد یاور علی کی بطور چیف جسٹس لاہور ہائی کورٹ تقریب حلف برداری کل گورنر ہاؤس میں منعقد ہوگی۔ اس موقع پر جسٹس یاور علی، عدالت عالیہ کے معزز ججز اور رجسٹرار لاہور ہائیکورٹ خورشید انور رضوی خصوصی شرکت کریں گے۔ وزیراعلٰی پنجاب بھی تقریب میں خصوصی شرکت کریں گے۔

لاہور(کورٹ رپورٹر/M-92نیوز)چیف جسٹس لاہور ہائی کورٹ سید منصور علی شاہ نے کہا ہے کہ جو جج مصلحت کا شکارہوتا ہے یا سمجھوتہ کرتے ہوئے انصاف فراہم کرتا ہے وہ ناکام شخص ہے اور نظام عدل میں رہنے کے لائق نہیں ہے۔

چیف جسٹس لاہور ہائی کورٹ نے سول ججز کی خالی اسامیوں کے لئے تحریری امتحانات کے نتائج کے اعلان کی تقریب سے خطاب کرتے ہوئے کہاکہ ہم صبح و شام ایک امتحان سے گزرتے ہیں، قانون سے ہٹ کر فیصلہ کرنے کا سوچنا بھی نہیں ہے اور نہ ہی اصولوں کو پس ڈالنا ہے۔

چیف جسٹس منصور علی شاہ نے کہا کہ مقابلے کے امتحانات کی طرز پر سول ججز کے امتحانات کا انعقاد آسان کام نہیں تھا لیکن ہماری کمیٹی نے مشکل کام کو ممکن کر دکھایا ۔

اس موقع پر نامزد چیف جسٹس محمد یاور علی نےکہا کہ شفاف انداز میں ججز کی تقرری عدلیہ معاشرے اور سائلین کےلئے بہت اہم ہے تقریب میں جوڈیشری سے متعلقہ افراد نے بھی شرکت کی ۔

لاہور(رضوان یوسف سے)صوبائی دارلحکومت میں رواں سال 2017کے دوران محکمہ ریونیو کی پانچوں تحصیلوں میں تعینات اسسٹنٹ کمشنرز 100فیصد ریکوری ،جوڈیشلی کیسز کو نمٹانے ،اوورسیز پاکستانیوں کی داد رسی کرنے اور پرچہ رجسٹری قانون پر عمل درآمدکروانے میں پنجاب بھر کے اسسٹنٹ کمشنر ز کو پیچھے چھوڑ گئے،رکاری زمینوں کا تحفظ ہو یا لینڈ مافیا کے خلاف کارروائی کرتے ہوئے کروڑوں کی زمینیں واہ گزار کروانی ہو،ڈسٹرکٹ ایڈمنسٹریشن لاہور ایک بار پھر صوبے بھر کے اضلاع سے کارکردگی میں آگے نکل گئے ،ضلع لاہور کی ڈسٹرکٹ ایڈمنسٹریشن میں تعینات افسران کی کارکردگی رپورٹ وزیر اعلیٰ پنجاب کو بھجوا دی گئی ، ذرائع کے مطابق وزیر اعلیٰ پنجاب کو بھجوائی جانے والی رپورٹ کے مطابق تحصیل سٹی میں تعینات اسسٹنٹ کمشنر عبداللہ خرم نیازی جو ایک سال تحصیل شالیمار میں بھی تعینات رہے اور اپنی تعیناتی کے دوران ہربنس پورا میں سول سروس اکیڈمی کی 40کنال ،مزنگ میں 3کنال ،میانی صاحب قبرستان،کوٹ کمبوہ78کنال،گنجہ کلاں44کنال سرکاری اراضی ناجائز قابضین سے واہ گزار کرواتے ہوئے پنجاب حکومت کی 2ارب سے زائد قیمتی زمین محفوظ کرنے میں کامیاب ہوئے اور صوبے بھر میں سرکار ی زمینوں کو تحفظ فراہم کرنے میں اول نمبر حاصل کیا،اس طرح تحصیل سٹی میں پرچہ رجسٹری پر عمل درآمد 100فیصد نظر آیا،جوڈیشلی کیسز کو نمٹانے ،انتقال فرد ،فیس کی وصولی،حکومتی خزانے میں جمع کروانے ،ایل ڈی اے کی جانب سے بھیجے والے 136لیٹر کی تصدیق جائیداد بھی مکمل کروائی گئی،اس طرح 55سے زائد اورسیز پاکستانیوں کی جائیدادوں پر کئے جانے والے قبضوں کی بابت ریفرنس ،رپورٹ اور کیسز کی 100فیصد تکمیل بھی مکمل کروائی گئی ذرائع کے مطابق تحصیل سٹی میں 17316پرچہ رجسٹری وصولی ہوئی ،پرچہ رجسٹری قانون کے مطابق اور 300انتقال مختلف عدالتوں سے حکم امتناعی کی بابت تاخیر کا شکار جبکہ پاس شدہ انتقالات میں 16200انتقالات کے پرت سرکار بھی دفتر قانگو برانچ میں جمع کروائے جاچکے ہیں ،ٹائم اور ون ڈش کی خلاف ورزی کی بناءپر تحصیل سٹی میں اسسٹنٹ کمشنر عبداللہ خرم نیازی کی ہدائت پر پٹواری عمران مظہر سمیت دیگر ریونیو سٹاف نے بیس سے زائد شادی ہال کو سیل کر دیا اور اٹھارہ سے زائد گرفتاریاں کروائیں گزشتہ روز سپریم کورٹ کی ہدائت پر عمل درآمد کرتے ہوئے بند روڈ پر ہسپتالوں ،ڈسپنسریوں میں استعمال شدہ سرنجوں اور دوسرے پلاسٹک ویسٹ کو اکٹھا کرنے والے کارخانوں اور گوداموں کے مالکان کے خلاف بھی ڈی جی انوائرنمنٹ اور سیکریٹری ریونیو پنجاب کی نگرانی میں کارروائی کرتے ہوئے دس سے زائد کارخانے گودام سیل کئے گئے اور بیماریوں سے بھرے ہو ئے سامان کو تلف کر دیا گیا تحصیل ماڈل ٹاﺅن کے انور بریال کاکرردگی کی بناءپر دوسرے نمبر پر رہے جو وہاں اسٹیٹ سے کروڑوں روپے کی سرکاری کمرشل اراضی واہ گزار کروائی اور مرے ہوئے شخص کی جگہ دیگر جعلسازوں کی قیمتی زمین ہتھیانے کی کوشش ناکام کی سو فیصد سے زائد اورسیز پاکستانیوں کی انتہائی قیمتی جائیدادیں واہ گزار کروائی ،پرچہ رجسٹری قانون پر عمل درآمد کروایا ،پندرہ سے زائد شادی ہال کے خلاف ورزی پر سیل کئے ،انتہائی مختصر عرصہ میں جوڈیشلی کیسز ز نمٹائے،دس فیصد ایل ڈی اے لیٹرز کی تصدیق کروائی جبکہ تحصیل شالیمار میں سابق اسسٹنٹ کمشنر صفدر علی ورک کی کارکردگی بھی بہترین اور نمایاں تھی تاہم نیب کیس بننے کے باعث تحصیل شالیمار میں راشد ملک اور بعد ازاں علی اکبر بھنڈر کی تعیناتی رہی ،موجودہ اسسٹنٹ کمشنر علی اکبر بھنڈر نے بھی پوری قوت کے ساتھ لینڈ مافیا کے خلاف گرینڈ آپریشن کرتے ہوئے ایجوکیشن ڈیپارٹمنٹ کی پندرہ کنال سرکاری اراضی واہ گزار کروائی اور دیگر غیر قانونی تعمیرات کو گرانے کے لئے نشان بھی لگا دیئے ہیں ،تحصیل رائے ونڈ کے اسسٹنٹ کمشنر راشد ملک اور تحصیل کینٹ کے اسسٹنٹ کمشنر شاہ میر کی گرفت بھی اپنی تحصیلوں میں بھرپور نظر آئی،ڈسٹرکٹ ایڈمنسٹریشن لاہور کے اسسٹنٹ کمشنر ز کی موجودہ کارکردگی کی مثال پورے پنجاب میں دی جارہی ہے ۔

لاہور(رضوان یوسف سے) آئی جی پنجاب نے 28 پولیس افسران کے تقرر و تبادلوں کے احکامات جاری کر دئیے، ایس پی سول لائنز لاہور علی رضاایس پی آپریشنز سٹی ڈویژن لاہور تعینات جبکہ عادل میمن کو ایس پی انویسٹی گیشن صدر ڈویژن لاہور تعینات کر دیا گیا۔ جبکہ فیصل شہزاد ایس
پی آپریشنز صدر ڈویژن ،رضوان عمر گوندل ایس پی ڈولفن اسکواڈ لاہور،شاکر احمد شاہد ایس پی آپریشنز ماڈل ٹاؤن ڈویژن لاہور،سید حسنین حیدر چیف ٹریفک آفیسر فیصل آباد ، رضا صفدر کاظمی ایس پی آپریشنز سول لائنز ڈویژن لاہور ،عمران کرامت بخاری ایس پی سکیورٹی ڈویژن لاہور ، محمد مسعود رضا ایس پی سکیورٹی ڈویژن وزیر اعلٰی ہاؤس ، غلام مصطفٰی ایس پی سٹی ملتان،جلیل عمران خان ایس پی گلگشت ڈویژن ملتان ، محمد ظفر ایس پی راجن پور،انور چشتی ایس پی انویسٹی گیشن ڈی جی خان ، سلیم نیازی ایس پی انویسٹی گیشن بہاولنگر،نویدارشاد ایس پی انویسٹی گیشن ساہیوال ، مستنصر عطا باجوہ ایس پی وی وی آئی پی سکیورٹی لاہور، قدوس بیگ ایس پی انویسٹی گیشن قصور،امجد محمود قریشی ایس پی انوسٹی گیشن شیخوپورہ ، آفتاب احمد پھلروان ایس پی صدر فیصل آباد،اسد الرحمن ایس پی انویسٹی گیشن اقبال ٹاؤن لاہور، خرم شہزاد ایس پی انویسٹی گیشن جھنگ،امتیاز محمود ایس پی ڈسپلن فیصل آباد، اسد مظفر ایس پی انویسٹی گیشن گجرات،احمد نواز شاہ ایس پی مدینہ ٹاؤن فیصل آباد ، صفدر مہدی ایس پی ڈسپلن ملتان،عون محمد ایس پی انٹیلی جنس لاہور،عاطف حیات ایس پی اینٹی وہیکل لفٹنگ اسکواڈ لاہورتعینات جبکہ ایس پی پی ایچ پی ڈی جی خان محمد باقر کو او ایس ڈی بنا دیا گیا۔

لاہور (رضوان یوسف سے)نیب نے بڑی کارروائی کے دوران مفرور ملزم گرفتا رکر لیا. بتایا گیا ہے کہ مفرور ملزم حاجی عبدالقیوم غیر قانونی طور پر پلاٹس کی فروخت کے الزام میں گرفتار کیا گیا ہے. ملزم نیب کو گزشتہ 7 سالوں سے مطلوب تھا، ملزم حاجی عبدالقیوم کی ایل ڈی اے ملازمین کی باہمی ملی بھگت سے کروڑوں روپے مالیت کے پلاٹس فروخت کرتا رہا، ملزم دوران انکوائری بارہا طلب کرنے کر بھی پیش نہ ہوا جبکہ ملزم 2010 میں مفرور قرار دیا گیا، واضح رہے کہ مفرور ملزمان کی گرفتاری کے لئے ڈی جی نیب لاہور نے واضح احکامات جاری کر رکھے ہیں، پلاٹس کی غیر قانونی فروخت کے الزام میں نیب لاہور متعدد ملزمان کی گرفتاری عمل میں لاچکا ہے، نیب ذرائع کے مطابق ملزم عبدالقیوم کو جسمانی ریمانڈ کے حصول کیلئے کل احتساب عدالت کے روبرو پیش کیا جائیگا

لاہور(رضوان یوسف سے) پٹرولنگ پولیس کی کارروائی 39.50 کلو گرام چرس برآمدکر لی، نوسرباز گرفتار پچاس ہزار نقدی برآمد، چوری شدہ موٹر سائیکل اصل مالک کے حوالے ،48 اشتہاریوں سمیت 123 ملزمان گرفتار، ناجائز اسلحہ اور570 لیٹر شراب پکڑلی اور3012مسافروں کو مدد فراہم کی۔ تفصیلات کے مطابق پٹرولنگ پوسٹ دلیل پور نے دوران ناکہ بندی ایک مشکوک کار نمبر FU-779 کو روکا جوکہ محمد کریم چلا رہا تھا اور اس کے ساتھایک عورت کرن بی بی موجود تھی دوران تلاشی ان کے قبضہ سے 39.50 گلو گرام چرس برآمد کی جس پر ایڈیشنل آئی جی پٹرولنگ نے ملازمین کو نقد انعام اورتعریفی اسناد CC-II سرٹیفیکیٹ دینے کا اعلان کیا۔پٹرولنگ پوسٹ دھرنل نے ایک نوسرباز خورشید احمد کو گرفتار کر کے اس کے قبضہ سے 50470 روپے نقدی برآمد کی۔پٹرولنگ پوسٹ 86-EB نے اطلاع ملنے پر چوری شدہ موٹرسائیکل تلاش کر کے اصل مالک لیاقت علی کے حوالے کی۔علاوہ ازیں پنجاب ہائی وے پٹرول نے48اشتہاریوں اور7 عدالتی مجرموں بہادر علی، عبدالحمید، افضال، نذیر مسیح ، بشیر مسیح، محمد شعیب، غلام فرید، ظفر اقبال، تصور، عمران، محمد ریاض، طارق انعام، عرفان، حاجی سیف، غلام حسین، نجف علی، ریاض احمد، عرفان، بشیر، عنایت، حقان حیدر، امجد حسین، ممتاز، محمد سلیم، فاروق، فرید، علی شان، عمران، محمد اکرم، عامر، خرم علی، محمد بلال، قیصر محمود، ریاض، محمد شریف، محمد شرافت، منیر احمد اور آفتاب کو گرفتار کیا۔دریںاثناء پنجاب ہائی وے پٹرول نے منشیات کے40 ملزمان مقصود احمد، خضر عباس، تیمور، عابد، مہر علی، راشد، محمد عارف، محمد احمد، سلیم اختر، وکیل، صغیر، حفیظ، خیرات حسین، عبدالرزاق، کامران، حسنین، ذوہیب، محمد عثمان، زرار، سیف اللہ، مشتاق، محمد حسین، محمد اسلم، بشیر حسین اور عمران صفدر کو گرفتار کرکے ان کے قبضہ سے570لیٹرشراب،9040گرام چرس اور175 گرام افیون برآمدکی۔جبکہ پنجاب ہائی وے پٹرول نے23ملزمان جمیل، عبدالمناف، کرم علی، رب نواز، عبدالرشید، انتخاب، شہزاد، صادام، ذاہد عمران، محمد طارق، بابر علی، نوید، مزمل، عمران، فرحان، غلام عباس، جمشید، عمر دراز اور محمد حسین کو گرفتار کر کے ان کے قبضہ سے17پسٹل،5گن،01 کلاشنکوف،01 میگزینز، 14 کارتوس اور72گولیاں برآمدکیں۔پنجاب ہائی وے پٹرول نے مزید کارروائی کرتے ہوئے 05 گمشدہ بچوں محمد اویس، گڑیا بی بی، نوید احمد، مزمل اور دلاور کو ان کے والدین سے ملوایااور 3012 مسافروں کو مدد فراہم کی۔

لاہور (اظہر محمود) محکمہ ہائر ایجوکیشن نے کرپشن کے الزامات پر وائس چانسلر پنجاب یونیورسٹی ڈاکٹر ظفر معین ناصر کو فوری طور پر عہدے سے ہٹانے کی سمری وزیر اعلی کو ارسال کر دی۔ وائس چانسلر ڈاکٹر ظفر معین ناصر کی جگہ کسی مناسب فیکلٹی ممبر کو تعینات کیا جائے، سمری میں سفارش۔ وزیر اعلیٰ معائنہ ٹیم کے ذریعے ڈاکٹر ظفر معین پر لگے مالی و انتظامی بدعنوانی کے سنگین الزامات کی فوری تحقیقات کی جائیں،سمری میں الزام لگایا گیا ہےکہ ڈاکٹر ظفر معین ناصر نے گورنر کے اختیارات استعمال کرتے ہوئے ڈین، رجسٹرار اور خزانہ دار تعینات کئے،اس کے علاوہ وائس چانسلر نے 32 کروڑ کے تعمیراتی ٹھیکے غیر قانونی طور پر دئیے اور غیرقانونی طور پر گورنر کے اختیارات استعمال کرتے ہوئے اہم عہدوں پر تقرریاں کیں ، ڈاکٹر ظفر معین نے خاص طلباء تنظیم سے وابستہ افراد کی اہم عہدوں پر تقرریاں بھی کیں، سمری میں الزام لگایاگیا ہے کہ ڈاکٹر ظفر معین کرپشن کے الزام میں ملوث افسران کے خلاف کارروائی کرنے کی بجائے اہم عہدوں سے نوازا، جبکہ وائس چانسلر نے محکمہ ہائر ایجوکیشن کی طرف سے لگائے گئے الزامات کی تردید کر دی۔ ظفر معین کا کہنا تھا کہ جس قسم کی تحقیقات کرنا چاہتے ہیں کریں مجھے کوئی اعتراض نہیں ہے، یہ میرے خلاف سوچی سمجھی سازش ہے ۔ان الزامات میں کوئی صداقت نہیں ہے۔